សឿន សំណាង - La Reine Media

អាម៉េរិក ថា អ៊ុយក្រែន «ជោគជ័យ» ក្នុងដំណាក់កាលដំបូងនៃសង្គ្រាម

ឧត្តមសេនីយ៍អាម៉េរិក និយាយថា សង្គ្រាមនៅ អ៊ុយក្រែន បានឈានចូលដល់ដំណាក់កាលថ្មី ជាមួយនឹង «ជោគជ័យ» របស់ ទីក្រុងកៀវ ប៉ុន្តែថា រុស្ស៊ី មិនទាន់មានផែនការឈប់បាញ់ ហើយសង្គ្រាមនឹងអូសបន្លាយពេលយូរទៀត។

នៅឯសភាជាន់ខ្ពស់អាម៉េរិក ប្រធានក្រុមប្រឹក្សាភិបាលកងទ័ពអាម៉េរិក Mark Milley អះអាងថា លទ្ធភាពដែល រុស្ស៊ី យល់ព្រមឈប់បាញ់ និងដោះស្រាយតាមការទូតក្នុងបញ្ហានៅ អ៊ុយក្រែន គឺនៅតែមានកម្រិតទាប។ មេដឹកនាំកងទ័ពអាម៉េរិក បានព្រមានថា សង្គ្រាមនៅ អ៊ុយក្រែន គឺជា «ទុក្ខវេទនាដែលអូសបន្លាយពេលយូរ»។

លោក Milley សង្កត់ធ្ងន់ថា «អាចនិយាយបានថា ដំណាក់កាលដំបូងនៃសង្គ្រាម បានកើតឡើងដោយជោគជ័យ» សម្រាប់កងទ័ពរបស់ អ៊ុយក្រែន និងបានបញ្ចប់ទៅហើយ។ ប៉ុន្តែ គោលដៅដែល អ៊ុយក្រែន បានដាក់ចេញ រួមមាន ការរក្សាស្ថានភាពឯករាជ្យ និងបូរណភាពទឹកដី គឺជារឿងលំបាកបំផុត។ លោកថា ទីបញ្ចប់នៃសង្គ្រាមនេះ នៅតែជាបញ្ហាដែលពិបាកព្យាករឱ្យបានសុក្រឹត។

អង្គការសហប្រជាជាតិ បានឱ្យដឹងថា ប្រជាជនប្រមាណ ១១.៣ លាននាក់ នៅ អ៊ុយក្រែន បានភៀសខ្លួនចេញពីសង្គ្រម ក្នុងនោះមានជាង ៤.៣ លាននាក់បានចាកចេញពីប្រទេស ចាប់តាំងពី រុស្ស៊ី បើកការឈ្លានពាន។ នេះគឺជាវិបត្តិជនភៀសខ្លួនធំបំផុតនៅ អឺរ៉ុប ក្រោយពីសង្គ្រាមលោកលើកទីពីរបានបញ្ចប់។

April 8, 2022

(វីដេអូ)-យន្តហោះដឹកទំនិញត្រូវបាក់ជាពីរកំណាត់ នៅពេលកំពុងចុះចត

(កូស្ដារីកា)-យន្តហោះដឹកទំនិញ ១ គ្រឿង បានធ្លាក់ចេញពីផ្លូវរត់ និងបាក់ជា ២ កំណាត់ នៅពេលចុះចតនៅព្រលានយន្តហោះអន្តរជាតិ San Jose ក្នុង ប្រទេសកូស្ដារីកា នាតំបន់ អាម៉េរិកកណ្ដាល ប៉ុន្តែមិនបង្កគ្រោះថ្នាក់ដល់មនុស្ស។

យន្តហោះ Boeing-៧៥៧ ធ្វើដំណើរពីព្រលានយន្តហោះអន្តរជាតិ Juan Santamaria នៅជាយក្រុង San Jose ដើម្បីឆ្ពោះទៅកាន់ ក្វាតេម៉ាឡា នៅវេលាថ្ងៃត្រង់នៃថ្ងៃទី ៧ មេសា (យប់ថ្ងៃទី ៧ មេសា នៅ ភ្នំពេញ) ប៉ុន្តែ ត្រូវត្រលប់ក្រោយ បន្ទាប់ពីហោះឡើងបាន ២៥ នាទី ដើម្បីចុះចតបន្ទាន់។ ក្រុមហោះហើរបានរកឃើញបញ្ហានៅក្នុងប្រព័ន្ធអ៊ីដ្រូលីក (hydraulic system)។

ផ្សែងបាញ់ចេញពីយន្តហោះពណ៌លឿងរបស់ក្រុមហ៊ុនដឹកជញ្ជូន អាល្លឺម៉ង់ DHL នៅពេលវាធ្លាក់ចេញពីផ្លូវរត់ និងបានបាក់ជា ២ កំណាត់។

ក្រុមហោះហើរនៃយន្តហោះនេះ មានសុវត្ថិភាព នេះបើតាមមេដឹកនាំអង្គភាពពន្លត់អគ្គិភ័យរបស់ កូស្ដារីកា លោក Hector Chaves។

ហេតុការណ៍នេះបានធ្វើឱ្យព្រលានយន្តហោះត្រូវបិទទ្វាររហូតដល់ម៉ោង ១៨ ក្នុងថ្ងៃដដែល។ អ្នកនាំពាក្យរបស់ DHL ឱ្យដឹងថា ការស៊ើបអង្កេតនឹងត្រូវបានធ្វើឡើងដើម្បីស្វែងរកមូលហេតុ។

April 8, 2022

កំលោះកើតឆ្នាំ ១៩៩២ ក្លាយជាមហាសេដ្ឋីដោយសារ «អែបបញ្ជាទិញ និងប្រគល់អាហារតាមទូរស័ព្ទ»

ដោយមានទ្រព្យ ១.១ ពាន់លានដុល្លារអាម៉េរិក Andy Fang ប្រធានផ្នែកបច្ចេកវិទ្យា (CTO) របស់ DoorDash ក៏មានវត្តមាននៅក្នុងបញ្ជីចំណាត់ថ្នាក់មហាសេដ្ឋីវ័យក្មេងបំផុតរបស់ទស្សនាវដ្ដី Forbes។

នៅពេលនិយាយដល់អ្នកជំនួញក្នុងវិស័យបច្ចេកវិទ្យានៅជ្រលងភ្នំ Silicon គេមិនអាចមិនរំលឹកដល់ Andy Fang ដែលជា CTO របស់ក្រុមហ៊ុនប្រគល់អាហាររហ័ស DoorDash។

កំលោះជនជាតិអាម៉េរិក ដើមកំណើតចិន កើតឆ្នាំ ១៩៩២ ជាមនុស្សពូកែ ឧស្សហ៍ព្យាយាម និងហ៊ានប្រឈមមុខនឹងហានិភ័យ។ ប៉ុន្តែ ទាំងនេះមិនមែនគ្រប់យ៉ាងដែលនាំឱ្យ Andy Fang ជោគជ័យនោះទេ។

«Andy Fang គឺជាសិស្សគំរូម្នាក់ដែលគ្រូបង្រៀនណាក៏ចូលចិត្ត។ គាត់ប្រឹងប្រែងខ្លាំងណាស់ សូម្បីតែមេរៀនដែលតូចតាចបំផុត» Eric Nelson ប្រធានមុខវិជ្ជវិទ្យាសាស្ត្រកុំព្យូទ័រនៅសាកលវិទ្យាល័យ Stanford បានប្រាប់ The Harker ដូច្នេះ។

មុនពេលបានក្លាយជាប្រធានផ្នែកបច្ចេកវិទ្យារបស់ក្រុមហ៊ុនធុរកិច្ចថ្មីមួយដែលមានតម្លៃបំផុតនៅជ្រលង Silicon កំលោះ Fang គឺជាសិស្សឆ្នើម។ គាត់ធ្លាប់ជាប្រធានសមាគមនិស្សិត។

ឱកាសបានផ្ដល់ឱ្យ Andy Fang នៅពេលកំពុងជានិស្សិតឆ្នាំទីពីរ។ គ្រាមួយ គាត់រួមនឹងនិស្សិត ៣ នាក់ទៀត គឺ Evan Moore, Stanley Tang និង Tony Xu បានធ្វើកិច្ចការសាលាជាមួយគ្នា និងមានឱកាសពិភាក្សាគ្នាច្រើន ក្នុងនោះមានទាំងបញ្ហាបញ្ជាទិញអាហារផងដែរ។ បន្ទាប់បាននិយាយជាមួយម្ចាស់ភោជនីយដ្ឋានជិត ១០ កន្លែង ពួកគេក៏ដឹងថា ការទទួលការបញ្ជាទិញ និងការប្រគល់ទំនិញនៅលើគេហទំព័រ តែងតែមានបញ្ហា និងមិនងាយស្រួល។ ពួកគេក៏បានបង្កើត PaloAltoDelivery ដែលអនុញ្ញាតឱ្យអ្នកប្រើប្រាស់បញ្ជាទិញទំនិញបានយ៉ាងលឿននៅលើទូរស័ព្ទ។ មិនយូរប៉ុន្មាន ពួកគេក៏ទទួលបានការគាំទ្រពីសំណាក់អ្នកប្រើប្រាស់ និងក្រុមម្ចាស់ភោជនីយដ្ឋាន។

ដើម្បីស្វែងរកអតិថិជនដំបូងៗ ក្រុមរបស់ Andy Fang ក៏បាននាំគ្នាផ្ញើសារឱ្យនិស្សិតក្នុងសាលា និងក្នុងអន្តេវាសិកដ្ឋាន។ មកដល់ឆ្នាំ ២០១៣ PaloAltoDelivery ទទួលប្រាក់ ១២០,០០០ ដុល្លារពីកម្មវិធីជំនួយក្នុងការបើកក្រុមហ៊ុនថ្មីរបស់ Y Combinator។ Fang និងសហការី បានប្ដូរឈ្មោះ PaloAltoDelivery ទៅជា DoorDash។

មុនពេលជ្រើសរើសបុគ្គលិកសម្រាប់ដឹកជញ្ជូន សហស្ថានិកទាំង ៤ រូបរបស់ DoorDash នៅតែធ្វើការដឹកជញ្ជូនដោយផ្ទាល់ ចាប់ពីម៉ោង ៦ ដល់ម៉ោង ១៨ ជារៀងរាល់ថ្ងៃ។ ឆ្នាំ ២០១៤ DoorDash ទទួលបានខ្ទង់វិនិយោគ ២០ លានដុល្លារ។ ពេលនោះ DoorDash ក៏បានក្លាយជាក្រុមហ៊ុនប្រគល់អាហារសម្រាប់ភោជនីយដ្ឋានជាង ១,០០០ នៅ Bay Area និង Los Angeles មុនពេលពង្រីកខ្លួនពាសពេញទឹកដីអាម៉េរិក។

ពីរឆ្នាំក្រោយមក Andy Fang និង Stanley Tang មានឈ្មោះនៅក្នុងបញ្ជី Forbes Under ៣០ ក្នុងប្រភេទបច្ចេកវិទ្យាសម្រាប់អតិថិជន។ ចុងឆ្នាំ ២០១៩ DoorDash ប្រមូលទុនបានជាង ២.៥ ពាន់លានដុល្លារពីអ្នកវិនិយោគធំៗដូចជា SoftBank, Sequoia Capital និង Singapore GIC ជាដើម នេះបើតាម CNBC។

មួយឆ្នាំបន្ទាប់មកទៀត DoorDash បានឡើងផ្សារហ៊ុន។ Fang បានឈានជើងចូលក្នុងក្លឹបមហាសេដ្ឋីរបស់ពិភពលោក ហើយបច្ចុប្បន្នមានទ្រព្យចំនួន ១.១ ពាន់លានដុល្លារអាម៉េរិក។ ក្រោយពីជោគជ័យនៅ អាម៉េរិក DoorDash ចាប់ផ្ដើមពង្រីកខ្លួនទៅក្នុងទីផ្សារបរទេស ដូចជា អាល្លឺម៉ង់ និង ជប៉ុន។

«យើងនៅតែធ្វើកិច្ចការដើម្បីកសាងប្រព័ន្ធដឹកជញ្ជូនមួយដែលឆ្លាតវៃ។ គ្រប់ការងារលម្អិត សុទ្ធតែត្រូវបានយកចិត្តទុកដាក់ខ្ពស់ ដូចជា អ្នកប្រគល់ទំនិញអាចចតយានយន្តនៅកន្លែងណាក្នុងទីក្រុង, ចំណាយពេលប៉ុន្មានក្នុងការធ្វើនំភីហ្សា ១ ឈុត ឬការ៉ែម ១ ដើមអាចរក្សាភាពត្រជាក់បានរយៈពេលប៉ុន្មាននាទី។ល។ កិច្ចការលម្អិតនីមួយៗសុទ្ធតែត្រូវបានគិតគូរយ៉ាងប្រុងប្រយ័ត្ន ទាមទារឱ្យមានសុក្រឹតភាពខ្ពស់។ ប្រការនេះបានជួយឱ្យ DoorDash ខុសប្លែកពីបណ្ដាអែបប្រគល់អាហារផ្សេង» មហាសេដ្ឋី Andy Fang បញ្ជាក់ដូច្នេះ៕

April 7, 2022

អ្នកដំណើរក្នុងយន្តហោះស្រែកទ្រហោយំ ពេល Boeing ៧៣៧-៨០០ មុជក្បាលចុះភ្លាមៗ

យន្តហោះ Boeing ៧៣៧-៨០០ របស់ ក្រុមហ៊ុនអាកាសចរណ៍ម៉ាឡេស៊ី ជួបបញ្ហាបច្ចេកទេស និងទម្លាក់កម្ពស់ភ្លាមមៗ ធ្វើឱ្យអ្នកដំណើរលើយន្តហោះភ័យស្លន់ស្លោ ស្រែកទ្រហោយំ ព្រោះគិតថា ពួកគេនឹងត្រូវស្លាប់មិនខាន។

យន្តហោះនេះចេញដំណើរពី ព្រលានយន្តហោះអន្តរជាតិ Kuala Lumpur (KLIA) នៅវេលាម៉ោង ១៤ កន្លះ ថ្ងៃទី ៣ មេសា ២០២២ ហើយពេលកំពុងឆ្ពោះទៅកាន់ទីក្រុង Tawau ក៏ស្រាប់តែមុជក្បាលចុះភ្លាមៗ ចំនួន ២ លើក ក្រោយការហោះឡើងបានប្រហែល ៣០ នាទី។ អ្នកបើកបរបានសម្រេចចិត្តបញ្ជាឱ្យយន្តហោះត្រលប់ក្រោយ និងចុះចតដោយសុវត្ថិភាព។

នាង Halimah Nasoh ដែលជាអ្នកដំណើរម្នាក់នៅលើជើងហោះហើរខាងលើ នាព្រលប់ថ្ងៃនោះ បានចែករំលែករឿងរ៉ាវដែលបានកើតឡើង។ ហេតុការណ៍ដែល Halimah បានរៀបរាប់ ត្រូវបានសារព័ត៌មានរបស់ ម៉ាឡេស៊ី យកមកចុះផ្សាយកាលពីម្សិលមិញ។

យោងតាមកម្មវិធីតាមដានជើងហោះហើរ Flight Radar ដែល Halimah បានទាញយកមកប្រើនៅលើទូរស័ព្ទ យន្តហោះកំពុងស្ថិតនៅលើកម្ពស់ជិត ៧,៦២០ ម៉ែត្រ ក៏ស្រាប់តែធ្លាក់ចុះមកនៅ ៧,០១០ ម៉ែត្រ ធ្វើឱ្យនាង «អណ្ដែត» នៅលើកៅអី ដោយសារមិនបានដាក់ខ្សែក្រវាត់សុវត្ថិភាព។ ក្រោយមក យន្តហោះក៏ងើបឡើងវិញ។

«ពិតជាគួរឱ្យភ័យខ្លាចសម្រាប់មនុស្សជាច្រើនក្នុងចំណោមពួកយើង។ អ្នកដំណើរស្រែកទ្រហោយំ ព្រោះមានអារម្មណ៍ថា ខ្លួនជិតត្រូវស្លាប់ហើយ» នាងសរសេរនៅ Facebook ដូច្នេះ និងបន្តថា «ខ្លួនខ្ញុំត្រូវខ្ទាតច្រើនលើក ព្រោះតែមិនបានដាក់ខ្សែក្រវាត់សុវត្ថិភាព»។

«យន្តហោះមិនមានស្ថិរភាពក្នុងរយៈពេលប្រហែល ១០ នាទី និងបន្តមុជក្បាលចុះម្ដងទៀត ប៉ុន្តែ មិនអាក្រក់ដូចលើកដំបូង។ បើទោះជាមានការភ័យខ្លាច យន្តហោះបានហោះជុំវិញទីក្រុង Melaka មុនពេលវាត្រលប់មកកាន់ KLIA និងចុះចតដោយសុវត្ថិភាពនៅវេលាម៉ោង ១៧ និង ០៣ នាទី» នាង Halimah Nasoh រៀបរាប់ដូច្នេះ និងបានសរសើរចំពោះក្រុមអ្នកបើកបរដែលដោះស្រាយស្ថានការណ៍បន្ទាន់នេះបានល្អ។

ក្រុមហ៊ុន Malaysia Airlines កាលពីថ្ងៃទី ៤ មេសា បានប្រកាសទទួលស្គាល់ថា ជើងហោះហើរដែលមានលេខសម្គាល់ MH២៦៦៤ ពី Kuala Lumpur ទៅកាន់ Tawau នាថ្ងៃទី ៣ មេសា ត្រូវត្រលប់ក្រោយវិញ ដោយសារបញ្ហាបច្ចេកទេស និងអាកាសមិនអំណោយផល។

April 7, 2022

លោកឧកញ៉ា គីម ហ៊ាង ម្ចាស់ បុរី វិមានសំណាង អតីតអ្នករត់តុ និងធ្លាប់ជាក្មេងវត្តកម្សត់

នៅលើទំព័របណ្ដាញសង្គម លោកឧកញ៉ាបណ្ឌិត គីម ហ៊ាង ដែលបច្ចុប្បន្នជាម្ចាស់ បុរី វិមានសំណាង និងជាអ្នកជំនាញមួយរូបក្នុងវិស័យអចលនទ្រព្យ នាថ្ងៃនេះ បានរៀបរាប់ទ្រួសៗអំពីប្រវត្តិរបស់លោក ដែលបញ្ជាក់ថា លោកគឺជាមនុស្សម្នាក់បានឆ្លងកាត់ការលំបាកយ៉ាងច្រើន មុននឹងបានរកឃើញជោគជ័យ។

លើទំព័របណ្ដាញសង្គម Facebook គេតែងតែឃើញលោក ឧកញ៉ារូបនេះ និយាយអំពីបទពិសោធន៍ និងព័ត៌មានដែលទាក់ទងនឹងវិស័យអចលនទ្រព្យ។ នាថ្ងៃទី ០៧ មេសានេះ ក្នុងទំព័របុគ្គលសាធារណៈ (Public figure) នៃបណ្ដាញសង្គមនេះ លោកឧកញ៉ាបណ្ឌិត គីម ហ៊ាង បានបង្ហើបឱ្យដឹងខ្លះៗអំពីប្រវត្តិផ្ទាល់ខ្លួន។

លោកបណ្ឌិតបានសរសេរថា៖

«ក្រោយប្រលងជាប់បាក់ឌុបឆ្នាំ ១៩៩៨ នៅវិទ្យាល័យស្វាយរៀង គឺ គីម ហ៊ាង បានប្រលងចូលរៀនច្បាប់ នៅសាលា RULE ប្រលងចូលរៀនភាសានៅ IFL និងប្រលងចូលរៀន ប្រវត្តិវិទ្យា នៅ RUPP តែបានធ្លាក់ទាំងអស់!»។

លោកឧកញ៉ាបណ្ឌិត គីម ហ៊ាង ម្ចាស់ បុរី វិមានសំណាង

លោកបន្ថែមថា លោក គីម ហ៊ាង គឺជាកូនកំព្រាម្តាយ មកពីព្រំដែនបាវិត។ លោកបានជាប់ការងារជាអ្នករត់តុ តាមក្លិបកំសាន្ត និងហាង KTV ពីម៉ោង ៦ល្ងាច ដល់ ២ ភ្លឺ។ លោកបញ្ជាក់ថា លោកក៏ជាក្មេងវត្តមួយរូបដែលស្នាក់នៅកុដិលេខ ១៨ វត្តមហាមន្ត្រី ក្នុង រាជធានីភ្នំពេញ រយៈពេល ៦ ឆ្នាំ ចាប់ពីឆ្នាំ ១៩៩៨ ដល់ឆ្នាំ ២០០។

បុរសវ័យ ៤២ ឆ្នាំរូបនេះ បានរំលឹកអំពីប្រវត្តិផ្ទាល់ខ្លួន បន្ទាប់ពីព្រះសង្ឃដែលធ្លាប់មានគុណលើរូបលោក និងមានទំនាក់ទំនងជាគ្រូ និងសិស្សជាង ២៤ ឆ្នាំ បាននិមន្តមកគេហដ្ឋាន។

លោកបណ្ឌិត គីម ហ៊ាង កាលពីពេលថ្មីៗនេះ ធ្លាប់ធ្វើឱ្យមានការខឹង និងមតិរិះគន់ពីសាធារណជន ទាក់ទិននឹងការបញ្ចេញយោបល់របស់លោក នៅក្នុងសិក្ខាសាលាអចលនទ្រព្យ ឆ្នាំ ២០២២ ស្តីអំពី «អនាគតនៃវិស័យអចលនទ្រព្យខេត្តសៀមរាប ក្រោយជំងឺរាតត្បាតកូវីដ-១៩ ធូរស្រាល» កាលពីថ្ងៃសៅរ៍ ទី ១២ ខែកុម្ភៈ ឆ្នាំ ២០២២ នៅសណ្ឋាគារ អង្គរផារ៉ាឌី ក្រុងសៀមរាប ខេត្តសៀមរាប។

លោកបណ្ឌិត គីម ហ៊ាង ធ្វើជាវាគ្មិននៅក្នុងសិក្ខាសាលាអចលនទ្រព្យ ឆ្នាំ ២០២២ ស្តីអំពី «អនាគតនៃវិស័យអចលនទ្រព្យខេត្តសៀមរាប ក្រោយជំងឺរាតត្បាតកូវីដ-១៩ ធូរស្រាល» កាលពីថ្ងៃសៅរ៍ ទី ១២ ខែកុម្ភៈ ឆ្នាំ ២០២២

ក្នុងសិក្ខាសាលានោះ លោកបានបកស្រាយពីចំណុចខ្សោយ ចំណុចខ្លាំង ឱកាស និង ការគំរាមកំហែង ចំពោះការវិនិយោគ និងអភិឌ្ឍន៍វិស័យអចលនទ្រព្យ នៅខេត្តសៀមរាប។ ការបកស្រាយមួយចំនួនរបស់លោក បានប៉ះពាល់ដល់វប្បធម៌ជាតិ ធ្វើឱ្យមានមតិប្រតិកម្មយ៉ាងខ្លាំងក្លាពីសាធារណជន ពិសេសគឺក្រុមអ្នកអភិរក្សនិយម។ ប៉ុន្តែ ក្រោយមក លោកក៏បានធ្វើការសុំទោសជាលាយលក្ខណ៍អក្សរ និងជាសាធារណៈ៕

April 7, 2022

(វីដេអូ)-យានហោះហើរជាលក្ខណៈបុគ្គលរបស់ ក្រុមហ៊ុនអាម៉េរិក អាចផ្ទុកទម្ងន់ ៩០ គីឡូក្រាម

យានហោះហើររបស់ក្រុមហ៊ុន Ascend Dynamics មានបំពាក់មុខងារជាច្រើនសម្រាប់បេសកកម្មជួយសង្គ្រោះ ពន្លត់អគ្គិភ័យ និងការថែទាំនៅទីខ្ពស់។

វិស្វករ Daniel Gant ដែលជាស្ថាបនិករបស់ក្រុមហ៊ុន Ascend Dynamics, LLC នៅ Poplar រដ្ឋ Wisconsin សហរដ្ឋអាម៉េរិក បានចំណាយពេល ១ ឆ្នាំកន្លះ ដើម្បីអភិវឌ្ឍឧបករណ៍ហោះហើរដើរដោយថាមពលអគ្គិសនីខាងលើ។ ម៉ូដែលគំរូដំបូងមានឈ្មោះថា Skypak V១ ត្រូវបានរចនាឡើងដើម្បីអាចពាក់នៅលើខ្នង ដោយមានគ្រោងធ្វើពីអាលុយមីញោមដែលមានស្លាបចំនួន ៣ លយចេញមកក្រៅ។

នៅខាងចុងស្លាបនីមួយៗ មានម៉ាស៊ីនរុញច្រានចំនួន ២ និងស្លាប់ចក្រធ្វើពីឈើ។ យាននេះមានម៉ូទ័រអគ្គិសនី ៧ គីឡូវ៉ាត់ ចំនួន ១២ គ្រឿង ដែលផ្ដល់កម្លាំង ១១២ សេះ សម្រាប់គ្រោងឆ្អឹងដែលមានទម្ងន់ ៣៦ គីឡូក្រាម។

យោងតាម Gant ជាមួយនឹងថ្ម lithium – polymer ៥០ Vm ១.៨២ គីឡូវ៉ាត់ម៉ោង ដូចបច្ចុប្បន្ន យាននេះអាចហោះហើរក្នុងរយៈពេល ២ នាទី។ Gant កំពុងមានផែនការស្វែងរកទុនបន្ថែម ដើម្បីអភិវឌ្ឍកំណែទីពីរ ដើម្បីធ្វើការហោះហើរសាកល្បងដោយមានមនុស្សបើកបរ។ កំណែទីពីរដែលមានឈ្មោះថា Skypak V២ នាពេលខាងមុខ នឹងប្រើប្រាស់ស្លាបចក្រធំជាងកំណែទីមួយ និងស្ថិតក្នុងគ្រោងការពារ ជួយធានាសុវត្ថិភាពសម្រាប់អ្នកបើកបរ។ ដូច្នេះ ទម្ងន់របស់គ្រោងយានក៏កើនឡើងដល់ ៤៥ គីឡូក្រាម និងអាចដឹកអ្នកបើកបរដែលមានទម្ងន់ ៩០ គីឡូក្រាម ហើយហោះហើរបាន ២ នាទី។

បន្ទាប់ពីកំណែទីពីរទទួលបានជោគជ័យ Gant នឹងនាំផលិតផលរបស់ខ្លួនចូលក្នុងទីផ្សារ។ គ្រោងឆ្អឹងធ្វើពីអាលុយមីញោម នឹងត្រូវបានជំនួសដោយសរសៃកាបូន ខណៈដែលម៉ូទ័រត្រូវបានបន្ថែមកម្លាំង ចំណែកទម្ងន់ដែលវាអាចផ្ទុកបានក៏នឹងត្រូវបង្កើនដល់ ១៣៦ គីឡូក្រាម។

យោងតាមក្រុមហ៊ុន Ascend យានហោះហើររបស់ពួកគេមានអត្ថប្រយោជន៍ច្រើននៅក្នុងបេសកកម្មជួយសង្គ្រោះ, អនុវត្តច្បាប់, ពន្លត់អគ្គិភ័យ សកម្មភាពយោធា រួមនឹងការត្រួតពិនិត្យហេដ្ឋារចនាសម្ព័ន្ធនៅទីខ្ពស់។ល។ យាននេះអនុញ្ញាតឱ្យបើកបរដោយផ្ទាល់ ឬដោយស្វ័យប្រវត្ត។

April 7, 2022

កូវីដ-១៩ នៅ កម្ពុជា! រកឃើញអ្នកឆ្លងថ្មី ២៧ នាក់ទៀត ក្នុងថ្ងៃទី ០៦ មេសា ២០២២

អ្នកវិជ្ជមាននឹង កូវីដ-១៩ ចំនួន ២៧ នាក់ ដែលទើបតែបានរកឃើញក្នុងអំឡុង ២៤ ម៉ោងនៃថ្ងៃទី ០៦ មេសា គឺសុទ្ធតែជាករណី អូមីក្រុង និងជាករណីឆ្លងក្នុងសហគមន៍។

April 7, 2022

ក្រុមមហាសេដ្ឋីនៅ ប្រទេសអ៊ុយក្រែន បាត់បង់ទ្រព្យជិតពាក់កណ្ដាល ចាប់តាំងពី រុស្ស៊ី បើកការឈ្លានពាន

វិបត្តិសង្គ្រាមនៅ អ៊ុយក្រែន បានបណ្ដាលឱ្យទ្រព្យសម្បត្តិរបស់មហាសេដ្ឋី ៧ រូប នៅ អ៊ុយក្រែន ថយចុះ ៩.៧ ពាន់លានដុល្លារអាម៉េរិក នេះបើតាមការគណនារបស់ ទស្សនាវដ្ដីអាម៉េរិក Forbes។

តួលេខខាងលើនេះប្រហាក់ប្រហែលនឹង ៤៥% នៃតម្លៃទ្រព្យសរុបនៅមុនថ្ងៃទី ២៨ កុម្ភៈ។ Forbes ឱ្យដឹងថា មូយក្នុងចំណោមមូលហេតុដែលនាំឱ្យទ្រព្យរបស់ក្រុមមហាសេដ្ឋីនៅ អ៊ុយក្រែន មិនបន្តធ្លាក់ចុះ បើទោះសង្គ្រាមមិនទាន់បញ្ចប់ គឺដោយសារទ្រព្យភាគច្រើនស្ថិតនៅបរទេស។

បច្ចុប្បន្ន អ៊ុយក្រែន មានមហាសេដ្ឋី ៧ រូប ដោយមានទ្រព្យសរុប ១១.៩ ពាន់លានដុល្លារអាម៉េរិក។ បើធៀបទៅនឹងបញ្ជីដែលត្រូវបានប្រកាសកាលពីចុងខែមីនា ២០២១ ទ្រព្យសម្បត្តិរបស់ពួកគេបានបាត់បង់អស់ជាង ៧ ពាន់លានដុល្លារ។ ម្នាក់ក្នុងចំណោមបុគ្គលល្បីឈ្មោះបំផុតនៅ អ៊ុយក្រែន គឺ Petro Poroshenko ដែលធ្លាប់ជាប្រធានាធិបតីរបស់ប្រទេសនេះចាប់ពីឆ្នាំ ២០១៤ ដល់ ២០១៩ ក៏បានបាត់ឈ្មោះពីបញ្ជីចំណាត់ថ្នាក់មហាសេដ្ឋីរបស់ Forbes សម្រាប់ឆ្នាំ ២០២២។

ទ្រព្យសុទ្ធរបស់លោក Petro Poroshenko បានថយចុះជាងពាក់កណ្ដាល ពោលគឺប្រហែល ៧០០ លានដុល្លារអាម៉េរិក ដោយសារតែតម្លៃមូលធនទីផ្សារនៃក្រុមហ៊ុនផលិតនំ Roshen របស់លោក បានបាត់បង់ប្រហែល ៧៥% និងត្រូវបិទទ្វាររោងចក្រចំនួន ២ នៅ ទីក្រុងកៀវ និង បូរីស្ពីល ព្រោះតែសង្គ្រាម។

ខាងក្រោមនេះគឺជាក្រុមមហាសេដ្ឋី របស់ អ៊ុយក្រែន ដែលស្ទើរតែទាំងអស់ បានបាត់បង់ប្រាក់យ៉ាងច្រើន៖

១-Rinat Akhmetov
-ទ្រព្យសុទ្ធ៖ ៤.២ ពាន់លានដុល្លារអាម៉េរិក
-ប្រភពចំណូល៖ ដែក ធ្យូង
-ទ្រព្យដែលបានប្រែប្រួល៖ -៤.៣ ពាន់លានដុល្លារអាម៉េរិក

២-Victor Pinchuk

-ទ្រព្យសុទ្ធ៖ ១.៩ ពាន់លានដុល្លារអាម៉េរិក
-ប្រភពចំណូល៖ បំពង់ដែកថែប, ពហុវិស័យ
-ទ្រព្យដែលបានប្រែប្រួល៖ -៧០០ លានដុល្លារអាម៉េរិក

៣-Vadim Novinsky

-ទ្រព្យសុទ្ធ៖ ១.៣ ពាន់លានដុល្លារអាម៉េរិក
-ប្រភពចំណូល៖ ដែកថែប
-ទ្រព្យដែលបានប្រែប្រួល៖ -២.២ ពាន់លានដុល្លារអាម៉េរិក

៤-Kostyantin Zhevago

-ទ្រព្យសុទ្ធ៖ ១.៣ ពាន់លានដុល្លារអាម៉េរិក
-ប្រភពចំណូល៖ រុករករ៉ែ
-ទ្រព្យដែលបានប្រែប្រួល៖ -៨០០ លានដុល្លារអាម៉េរិក

៥-Henadiy Boholyubov

-ទ្រព្យសុទ្ធ៖ ១.១ ពាន់លានដុល្លារអាម៉េរិក
-ប្រភពចំណូល៖ ធនាគារ, វិនិយោគ
-ទ្រព្យដែលបានប្រែប្រួល៖ -៩០០ លានដុល្លារអាម៉េរិក

៦-Vlad Yatsenko

-ទ្រព្យសុទ្ធ៖ ១.១ ពាន់លានដុល្លារអាម៉េរិក
-ប្រភពចំណូល៖ Fintech
-ទ្រព្យដែលបានប្រែប្រួល៖ មិនមាន

៧-Ihor Kolomoyskyy

-ទ្រព្យសុទ្ធ៖ ១ ពាន់លានដុល្លារអាម៉េរិក
-ប្រភពចំណូល៖ ធនាគារ, វិនិយោគ
-ទ្រព្យដែលបានប្រែប្រួល៖ -៨០០ លានដុល្លារអាម៉េរិក

April 7, 2022

កម្មកររុស្ស៊ី រាប់ពាន់នាក់នៅទីក្រុងផលិតរថយន្ត ត្រូវបាត់បង់ការងារ ក៏ព្រោះតែទណ្ឌកម្មពីបស្ចិមលោក ទាក់ទងនឹងវិបត្តិនៅ អ៊ុយក្រែន

នៅពេលទណ្ឌកម្មនានារបស់លោកខាងលិច ត្រូវបានដាក់ទៅលើទីក្រុង Kaluga របស់ រុស្ស៊ី ក៏ដូចជាបណ្ដាក្រុមហ៊ុនផលិតរថយន្តរបស់បរទេសដែលរកស៊ីនៅទីនេះ កម្មកររាប់ពាន់នាក់ក្នុងវិស័យរថយន្ត ត្រូវឈប់ ឬផ្អាកពីការងារដោយមិនទទួលបានប្រាក់ខែ ខណៈដែលតម្លៃទំនិញកើនឡើងខ្ពស់។

យោងតាមសារព័ត៌មាន Reuters ក្រុមមន្ត្រីនៅតំបន់ Kaluga (មានចម្ងាយពី ទីក្រូងមូស្គូ ១៩០ គីឡូម៉ែត្រ ទៅទិសនិរតី) ឱ្យដឹងថា ចាប់តាំងពីឆ្នាំ ២០០៦ ពួកគេទាក់ទាញការវិនិយោគបាន ១៥ ពាន់លានដុល្លារអាម៉េរិក ដែលភាគច្រើនគឺទុនពីបរទេស។

ក៏ប៉ុន្តែ ទណ្ឌកម្មរបស់បស្ចិមលោក ក្នុងរយៈពេលប៉ុន្មានសប្ដាហ៍កន្លងទៅនេះ បានធ្វើឱ្យបញ្ហាខ្វះគ្រឿងបន្លាស់កាន់តែមានសភាពធ្ងន់ធ្ងរ និងបណ្ដាលឱ្យរោងចក្រផលិតរថយន្តធំៗចំនួន ២ របស់ Volkswagen (អាល្លឺម៉ង់) និង Volvo (ស៊ុយអែត) ត្រូវផ្អាកដំណើរការ។

រោងចក្រផលិតរថយន្តទីបី គឺ PSMA Rus ដែលជាកិច្ចសហការរវាង Stellantis និង Mitsubishi និងមានកម្មករប្រមាណ ២,០០០ នាក់ ក៏អាចនឹងត្រូវផ្អាកដំណើរការក្នុងពេលឆាប់ៗនេះ ព្រោះតែកង្វះគ្រឿងបន្លាស់។

Pavel Terpugov ជាកម្មករម្នាក់នៅរោងចក្រ PSMA Rus ឱ្យដឹងថា «មិនច្បាស់ថា នឹងមានអ្វីកើតឡើងបន្តទៀត។ ពួកគេមិនបានផ្ដល់ព័ត៌មានជាក់លាក់ឱ្យពួកយើងដឹងទេ»។

Pavel Terpugov ប្រាប់ថា គាត់ត្រូវចំណាយប្រាក់ច្រើនជាងមុនទ្វេដង នៅពេលទិញគ្រឿងទេស បើធៀបនឹងមុនពេលមានទណ្ឌកម្ម។ ក្រុមអ្នកវិភាគព្យាករថា អតិផរណារបស់ រុស្ស៊ី អាចកើនឡើង ២៤% ក្នុងឆ្នាំនេះ គ្រាដែលសេដ្ឋកិច្ចអាចថយចុះស្មើនឹងឆ្នាំ ២០០៩។

សហរដ្ឋអាម៉េរិក និង អឺរ៉ុប កំពុងពិចារណាលើការដាក់ទណ្ឌកម្មបន្ថែម ប្រឆាំងនឹង រុស្ស៊ី បន្ទាប់ពីមានការចោទប្រកាន់ថា កងទ័ពរុស្ស៊ី បានបាញ់សម្លាប់ជនស៊ីលនៅ អ៊ុយក្រែន។

April 7, 2022

ជប៉ុន ដកការរឹតបន្តឹងលើទិដ្ឋាការ ចំពោះពលរដ្ឋមកពីប្រទេស និងដែនដីចំនួន ១០៦

យោងតាមព័ត៌មានពី តូក្យូ ព្រលប់ថ្ងៃទី ៦ មេសា រាជរដ្ឋាភិបាលជប៉ុន បានសម្រេចដកការកំណត់លើទិដ្ឋាការដែលត្រូវបានអនុវត្តកន្លងមកក្នុងបំណងទប់ស្កាត់កូវីដ-១។

ចាប់ពីថ្ងៃទី ៨ មេសា ខាងមុខ ជនបរទេសមកពីប្រទេស និងដែនដីចំនួន ១០៦ ក្នុងនោះមាន អង់គ្លេស, សហរដ្ឋអាម៉េរិក, កាណាដា, បារាំង, អាល្លឺម៉ង់, ឥណ្ឌា ជាដើម នឹងត្រូវបានលើកលែងការកំណត់ក្នុងការផ្ដល់ទិដ្ឋាការចូលមក ប្រទេសជប៉ុន។ ចំណែកប្រទេស និងដែនដីចំនួន ៥៦ ផ្សេងទៀតនៅ អាម៉េរិកឡាទីន, អឺរ៉ុប, មជ្ឈិមបូព៌ា, ទ្វីបអាហ្វ្រិក នៅតែត្រូវបានរឹតបន្តឹងលើការផ្ដល់ទិដ្ឋាការចូលមកកាន់ ប្រទេសជប៉ុន។

ដូច្នេះ សិស្ស និស្សិត មកពីប្រទេស និងដែនដី ចំនួន ១០៦ ខាងលើ អាចទៅកាន់ ប្រទេសជប៉ុន បន្ទាប់ពីទទួលបានទិដ្ឋាការតាមរយៈការធានារបស់ក្រុមហ៊ុន ឬសាលារៀន។ ក៏ប៉ុន្តែ ប្រទេសជប៉ុន នៅតែកំណត់ចំនួនមនុស្សដែលអាចចូលមកកាន់ប្រទេសនេះ ពោលគឺត្រឹម ១០,០០០ នាក់/ថ្ងៃ (ចាប់ពីថ្ងៃទី ១០ មេសា)។

April 7, 2022

Author: សឿន សំណាង