មន្ទីរបញ្ចកោណ បានប្រកាសថា អ៊ុយក្រែន បានទទួលយន្តហោះចម្បាំង និងគ្រឿងបន្លាស់ពីបរទេស ដើម្បីបង្កើនទំហំនៃក្រុមយន្តហោះចម្បាំង។
«ពួកគេបានទទួលប្រព័ន្ធនានា និងគ្រឿងបន្លាស់បន្ថែមដើម្បីបង្កើនទំហំនៃក្រុមហោះហើរ ប៉ុន្តែ ខ្ញុំនឹងមិននិយាយលម្អិតអំពីរឿងនេះ» អ្នកនាំពាក្យរបស់ មន្ទីរបញ្ចកោណ John Kirby ថ្លែងកាលពីថ្ងៃទី ១៩ មេសាដូច្នេះ និងបន្ថែមថា «បច្ចុប្បន្ន ពួកគេមានយន្តហោះចម្បាំងច្រើនជាង ធៀបនឹងកាលពី ២ សប្ដាហ៍មុន»។
លោក Kirby បដិសេធការបង្ហើបឱ្យដឹងអំពីចំនួន ប្រភេទ និងប្រភពរបស់យន្តហោះចម្បាំងបរទេសដែលបានប្រគល់ឱ្យ អ៊ុយក្រែន។ លោកថា «ប្រទេសផ្សេងដែលមានបទពិសោធន៍ក្នុងការប្រើប្រាស់យន្តហោះប្រភេទនោះ អាចជួយឱ្យពួកគេ (អ៊ុយក្រែន) គ្រប់គ្រង និងប្រើប្រាស់បាន។ អាម៉េរិក ជួយដឹកជញ្ជូនគ្រឿងបន្លាស់មួយចំនួនដើម្បីឆ្លើយតបនឹងតម្រូវការរបស់ពួកគេ ប៉ុន្តែ យើងមិនដឹកជញ្ជូនយន្តហោះទាំងមូលឡើយ»។
ព័ត៌មានខាងលើនេះត្រូវបានលើកឡើងក្រោយពី ប្រធានាធិបតីអាម៉េរិក លោក ចូ បៃដិន កាលពីសប្ដាហ៍កន្លងបានអនុម័តកញ្ចប់ជំនួយយោធាបន្ថែមដែលមានតម្លៃ ៨០០ លានដុល្លារ ដល់ អ៊ុយក្រែន ដែលកញ្ចប់ជំនួយនេះអាចនឹងត្រូវបានប្រកាសលម្អិតក្នុងពេលដ៏ខ្លីខាងមុខ។ មន្ត្រី ១ រូប នៅ សេតវិមាន កាលពីថ្ងៃទី ១៦ មេសា បានឱ្យដឹងថា ការដឹកជញ្ជូនសព្វាវុធនានានៃកញ្ចប់ជំនួយនេះ បានទៅដល់កន្លែងរួចហើយ។
