សឿន សំណាង - La Reine Media

យន្តហោះទម្លាក់គ្រាប់បែកប្រភេទយុទ្ធសាស្ត្ររបស់ អាម៉េរិក ឆាបឆេះសន្ធោសន្ធៅ

យន្តហោះទម្លាក់គ្រាប់បែក B-១B Lancer ឆេះម៉ាស៊ីន នៅឯទីលានសម្រាប់ចតក្នុងមូលដ្ឋានទ័ព Dyess នៃរដ្ឋ Texas របស់ សហរដ្ឋអាម៉េរិក បណ្ដាលឱ្យមានមនុស្សរងរបួសយ៉ាងតិច ២ នាក់។

ក្រុមហោះហើរទម្លាក់គ្រាប់បែកលេខ ៧ នៃ ទ័ពអាកាសអាម៉េរិក កាលពីម្សិលមិញបានឱ្យដឹងថា ហេតុការណ៍ខាងលើបានកើតឡើងនៅក្នុងដំណាក់កាលថែទាំយន្តហោះ B-១B Lancer នៅឯមូលដ្ឋាន Dyess កាលពីថ្ងៃទី ២០ មេសា។ ម៉ាស៊ីន ១ ក្នុងចំណោម ៤ របស់យន្តហោះនេះបានឆាបឆេះយ៉ាងសន្ធោសន្ធៅ។

«កម្លាំងប្រតិកម្មរហ័សបានមកដល់កន្លែងកើតហេតុ និងគ្រប់គ្រងអគ្គិភ័យនេះបានទាំងស្រុង។ មនុស្ស ២ នាក់ រងរបួស ប៉ុន្តែមិនគ្រោះថ្នាក់ដល់ជីវិត និងត្រូវបានបញ្ជូនទៅកាន់មន្ទីរពេទ្យដែលនៅក្បែរនោះ» ប្រកាសរបស់ក្រុមហោះហើរលេខ ៧ ឱ្យដឹងដូច្នេះ។

វីដេអូដែលត្រូវបានចែករំលែកលើបណ្ដាញសង្គមបង្ហាញថា អណ្ដាតភ្លើងឆាបឆេះសន្ធោសន្ធៅនៅលើមួយផ្នែកនៃដងខ្លួន ស្លាប និងផ្នែកខាងក្រោមរបស់យន្តហោះដែលកំពុងស្ថិតនៅកន្លែងចត។

https://www.youtube.com/watch?v=0EdcHtOfSCE

B-១B ត្រូវបានផលិតក្នុងអំឡុងពីឆ្នាំ ១៩៨៣ ដល់ ១៩៨៨ ក្នុងនោះ ១ គ្រឿងដំបូងត្រូវបានដាក់ឱ្យប្រើប្រាស់កាលពីថ្ងៃទី ១ តុលា ១៩៨។ យន្តហោះនេះអាចបំពាក់អាវុធចំនួន ៥៧ ប្រភេទ ក្លាយជាយន្តហោះទម្លាក់គ្រាប់បែកយុទ្ធសាស្ត្រដែលអាចផ្ទុកអាវុធបានច្រើនជាងគេរបស់ អាម៉េរិក។

កាលពីឆ្នាំកន្លង សហរដ្ឋអាម៉េរិក បានដាក់ឱ្យចូលនិវត្តន៍ចំពោះយន្តហោះ ១៧ គ្រឿង ក្នុងចំណោមយន្តហោះ B-១B Lancer ចំនួន ៦២ គ្រឿង ក្រោយពីបានប្រើប្រាស់អស់រាប់សិបឆ្នាំមកនេះ។ អាម៉េរិក មានគម្រោងឈប់ប្រើប្រាស់ក្រុមយន្តហោះទម្លាក់គ្រាប់បែប B-១B ទាំងអស់នេះក្នុងរយៈពេល ១០ ទៀត ដើម្បីទុកកន្លែងឱ្យយន្តហោះទម្លាក់គ្រាប់បែកយុទ្ធសាស្ត្រប្រភេទថ្មីជាងនេះ។

April 22, 2022

«នំសូកូឡាដែលវែងជាងគេបង្អស់ក្នុងពិភពលោក» ជាកំណត់ត្រាថ្មី បង្កើតឡើងក្នុងប្រទេសមួយនៅតំបន់អាម៉េរិកខាងត្បូង

កាលពីថ្ងៃទី ២០ មេសា ប្រទេសវ៉េណេស៊ុយអេឡា បង្កើតបានកំណត់ត្រាថ្មីមួយទៀតស្ដីពី «នំសូកូឡាវែងជាងគេបង្អស់ក្នុងពិភពលោក» ដែលទីតាំងនៃកំណត់ត្រានេះស្ថិតនៅក្នុងស្រុក Caripito រដ្ឋ Monagas ភាគឦសានប្រទេស។

ប្រកាសរបស់មូលនិធិ Fundatierra ដែលជាស្ថាប័នឧបត្ថម្ភ និងបង្កើតកំណត់ត្រាខាងលើ ឱ្យដឹងថា អង្គការ Guinness បានចេញលិខិតទទួលស្គាល់ឯតទគ្គកម្ម ដោយនំសូកូឡាចំនួន ៤,២៨៩ បន្ទះ ត្រូវបានតម្រៀបជាប់គ្នាប្រវែង ៨៥៤ ម៉ែត្រ ចាប់ផ្ដើមពីបូជនីយដ្ឋាន Simon Bolivar រហូតដល់រូបសំណាកព្រះយេស៊ូ គ្រីស្ត នៅតាមបណ្ដោយមហាវិថី Nueva Jerusalen របស់ Caripito។

មនុស្សសរុបចំនួន ៦០៧ នាក់ បានចូលរួមក្នុងការតម្រៀបបន្ទះនំសូកូឡាទៅលើទីតាំងដែលបង្កើតបានជាកំណត់ត្រា កាលពីថ្ងៃទី ១៩ មេសា។ អង្គការ Guinness ក៏បានបង្ហោះសារអបអរសាទរចំពោះ វ៉េណេស៊ុយអេឡា សម្រាប់ឯតទគ្គកម្មនេះផងដែរ។

បច្ចុប្បន្ន Fundatierra និង Caripito កំពុងកាន់កាប់ឯតទគ្គកម្មពិភពលោក Guinness ចំនួន ៣ ផ្សេងទៀត ដែលសុទ្ធតែទាក់ទងនឹងនំសូកូឡា រួមមាន ប្រាក់សូកូឡាធំបំផុត ទម្ងន់ ៨៧៤ គីឡូក្រាម និងអង្កត់ផ្ចិត ២.៤ ម៉ែត្រ កម្រាស់ ២០ ស.ម (ឆ្នាំ ២០១៥), ពិធីភ្លក់នំសូកូឡាដែលមានមនុស្សចូលរួមច្រើនបំផុត (ឆ្នាំ ២០១៦) ដោយមានមនុស្ស ៦០០ នាក់ និងរូបភាពបន្តុបដោយនំសូកូឡាធំជាងគេបំផុត ប្រវែងជិត ១៩ ម៉ែត្រ (២០១៧)៕

April 21, 2022

ប្រើហិង្សាលើកម្មករនៅ ទ្វីបអាហ្វ្រិក អ្នកជំនួញចិន ត្រូវបានកាត់ទោសឱ្យជាប់ពន្ធនាគារម្ភៃឆ្នាំ

អ្នកជំនួញជនជាតិចិនម្នាក់ដែលជាអ្នកគ្រប់គ្រងអណ្ដូងរ៉ែមួយនៅ ទ្វីបអាហ្វ្រិក ត្រូវបានតុលាការកាត់ទោសដាក់ពន្ធនាគារ ២០ ឆ្នាំ ដោយសារបានប្រើអំពើហិង្សាដាក់កម្មករ។

ចៅក្រមតុលាការរបស់ ប្រទេសរវ៉ាន់ដា Jacques Kanyarukiga កាលពីថ្ងៃទី ១៩ មេសា បានឱ្យដឹងថា អ្នកជំនួញជនជាតិចិនម្នាក់ ឈ្មោះ Sun Shujun អាយុ ៤៣ ឆ្នាំ បាន «ធ្វើទារុណកម្មលើរាងកាយរបស់ជនរងគ្រោះ ក្នុងបំណងអាក្រក់» ហើយថា បុរសនេះ «ជាប់ទោសឧក្រិដ្ឋធ្ងន់ធ្ងរ»។

នៅចំពោះមុខតុលាការ Sun សារភាពថា ពិតជាបានប្រើអំពើហិង្សាលើកម្មករ ប៉ុន្តែ បានអះអាងថា ក៏ព្រោះតែខឹង និងធុញទ្រាន់នឹងសកម្មភាពលួចរ៉ែ» របស់កម្មករទាំងនោះ។

Sun និយាយថា បានចេញថ្លៃសំណងជំងឺចិត្តដល់ជនរងគ្រោះប្រហែល ១,០០០ ដុល្លារអាម៉េរិក និងបានចុះកិច្ចសម្របសម្រួលរួចហើយ។ ប៉ុន្តែ ក្រុមរដ្ឋអាជ្ញាបានចោទថា តាមពិត Sun បានវាយធ្វើបាបកម្មកររហូតដល់ ៤ នាក់ ហើយជនរងគ្រោះត្រូវបង្ខំចិត្តទទួលប្រាក់សំណងជំងឺចិត្ត ព្រោះតែការភ័យខ្លាច។

កម្មករនៅអណ្ដូងរ៉ែត្បូង ដែល Sun បានប្រើអំពើហិង្សា

កាលពីឆ្នាំកន្លង វីដេអូមួយបានបង្ហាញថា Sun យករំពាត់វាយយ៉ាងធ្ងន់ និងជាបន្តបន្ទាប់ទៅលើកម្មករនៅ អាហ្វ្រិក ដែលកំពុងជប់ចំណង។ វីដេអូនេះ បានធ្វើឱ្យមានការខឹងយ៉ាងខ្លាំងពីសំណាក់អ្នកលេងបណ្ដាញសង្គម។

Sun មានពេល ៣០ ថ្ងៃ ដើម្បីប្ដឹងឡើងសាលាឧទ្ធរណ៍។ ស្ថានទូតចិន ប្រចាំ ប្រទេសរវ៉ាន់ដា កាលពីថ្ងៃទី ២០ មេសា ឆ្នាំ ២០២២ បានប្រកាសថា បានដឹងរួចហើយអំពីករណីរបស់ Sun នៅតុលាការ និងបានអំពាវនាវឱ្យពលរដ្ឋចិន ដែលរស់នៅក្នុងប្រទេសនេះ គោរពច្បាប់។

សេចក្ដីប្រកាសរបស់ស្ថានទូតចិន មានឃ្លាសរសេរថា «ស្ថានទូតអំពាវនាវឱ្យមានការកាត់ទោសសមស្រប យុត្តិធម៌ និងស្នើឱ្យការពារសិទ្ធិស្របច្បាប់របស់ពលរដ្ឋចិន ឱ្យបានត្រឹមត្រូវ»៕

April 21, 2022

រោងចក្រវារីអគ្គិសនីខ្នាតតូចមួយ ដែលសាងសង់ដោយប្រាក់រៃអង្គាសបាន នៅ ប្រទេសកុងហ្គោ

អ្នកស្រី Alphonsine Ciza ចំណាយពេលទាំងថ្ងៃទាំងយប់ ដោយពាក្យស្បែកជើងកវែង មួកការពារសុវត្ថិភាព ដើម្បីគ្រប់គ្រងរោងចក្រវារីអគ្គិសនីដ៏តូចមួយដែលអ្នកស្រីបានកសាងឡើង ក្នុងបំណងដោះស្រាយបញ្ហាដាច់ភ្លើងនៅក្នុងទីរួមស្រុក Miti នៅ ប្រទេសកុងហ្គោ។

សារព័ត៌មាន Reuters របស់ អង់គ្លេស ឱ្យដឹងថា អ្នកស្រី Alphonsine Ciza ធ្វើការជាមួយក្រុមដូនជី និងវិស្វករ ដើម្បីគ្រប់គ្រងរោងចក្រវារីអគ្គិសនីតូចមួយដែលដំណើរការដោយពឹងទៅលើបឹងមួយក្បែរនោះ។

រោងចក្រនេះផ្គត់ផ្គង់អគ្គិសនីដោយមិនគិតថ្លៃសម្រាប់វិហារមួយ, កន្លែងស្នាក់នៅរបស់បុព្វជិតមួយ, សាលារៀនពីរកន្លែង និងមន្ទីរពេទ្យតូចមួយ។ មិនមានរោងចក្រនេះទេ ប្រជាជនក្នុងទីរួមស្រុកប្រមាណ ៣០០,០០០ នាក់ នឹងមានអគ្គិសនីប្រើប្រាស់តែប៉ុន្មានម៉ោងប៉ុណ្ណោះ នៅក្នុងរយៈពេលពី ២ ទៅ ៣ ថ្ងៃ ក្នុង ១ សប្ដាហ៍។

បញ្ហាដាច់ភ្លើងអគ្គិសនីកើនឡើងជាញឹកញាប់នៅ កុងហ្គោ ដែលជាប្រទេសមួយមានប្រជាជន ៩០ លាននាក់ នៅ អាហ្វ្រិកកណ្ដាល។ ប្រភពផ្គត់ផ្គង់អគ្គិសនីចម្បងរបស់ប្រទេសនេះគឺប្រព័ន្ធវារីអគ្គិសនីដែល «ជិតអស់ថាមពល» និងការគ្រប់គ្រងមិនបានល្អ។

រដ្ឋាភិបាលកុងហ្គោ បាន និងកំពុងធ្វើការជាមួយដៃគូបរទេស ដើម្បីបង្កើនផលិតភាព។ ក៏ប៉ុន្តែ មានការរិះគន់ថា គម្រោងវារីអគ្គិសនីថ្មីនានា ផ្ដោតទៅលើតែការផ្គត់ផ្គង់ថាមពលដល់បណ្ដាអណ្ដូងរ៉ែ និងនាំចេញទៅកាន់ប្រទេសជិតខាង។

យោងតាមធនាគារពិភពលោក (WB) បច្ចុប្បន្ន នៅ កុងហ្គោ ប្រជាជនប្រមាណ ២០% ប៉ុណ្ណោះ បានប្រើប្រាស់អគ្គិសនី។ ដោយសារតែហត់នឿយនឹងការអុជទៀន និងបញ្ឆេះម៉ាស៊ីនភ្លើង បព្វជិត Ciza ក៏បានចាប់ផ្ដើមរៃអង្គាសថវិកាកាលពីឆ្នាំ ២០១៥ ដើម្បីសាងសង់រោងចក្រវារីអគ្គិសនី។

ក្រោយរយៈបេល ៣ ឆ្នាំ ដូនជី Ciza ក៏រៃអង្គាសបាន ២៩៧,០០០ ដុល្លារអាម៉េរិក និងសាងសង់រោងចក្រវារីអគ្គិសនីតូចមួយដែលផលិតបានពី ០.០៥ ដល់ ១ គីឡូវ៉ាត់។

ដោយសារការប្រឹងប្រែងរបស់ដូនជី Ciza សិស្សនៅសាលាអនុវិទ្យាល័យ Maendeleo នៃទីរួមស្រុក Miti អាចរៀនជំនាញកុំព្យូទ័រពីអេក្រង់ពិត ជំនួសឱ្យសៀវភៅ។

នាយកសាសា Mweze Nsimire Gilberte ថ្លែងថា «កាលពីមុន មានអគ្គិសនីតែនៅពេលយប់ នៅពេលសិស្សបានចេញពីសាលា។ ការដែលមានអគ្គិសនីប្រើប្រាស់ដូច្នេះ ពិតជាធ្វើឱ្យយើងបានធូរស្រាលក្នុងចិត្ត»៕

April 21, 2022

ប្រទេសដំបូងគេបង្អស់នៅ ទ្វីបអឺរ៉ុប ដែលបានឯករាជ្យពីវិស័យថាមពលរបស់ រុស្ស៊ី

ការដែល ប្រទេសលីទុយអានី (Lithuania) ទទួលបានជោគជ័យក្នុងការសាងសង់ស្ថានីយផ្ទុកឧស្ម័នធម្មជាតិរាវ (LNG) អណ្ដែតលើទឹក ដើម្បីបានឯករាជ្យពីថាមពលរបស់ រុស្ស៊ី គឺជាមេរៀនមួយសម្រាប់បណ្ដាប្រទេសនៅក្នុង សហភាពអឺរ៉ុប។

កាលពី ១២ ឆ្នាំមុន អ្នកនយោបាយ អតីតរដ្ឋមន្ត្រីក្រសួងចរាចរណ៍ និងបណ្ដាញទំនាក់ទំនងរបស់ លីទុយអានី លោក Rokas Masiulis ត្រូវបានប្រគល់ភារកិច្ចថ្មី ជាមួយនឹងគោលដៅប្រកបដោយមហិច្ឆតា គឺ «បញ្ចប់ការពឹងផ្អែកលើឥន្ធនៈរបស់ រុស្ស៊ី»។

ក្នុងនាមជាអ្នកដឹកនាំរបស់ក្រុមហ៊ុន Klaipedos Nafta ដែលជាប្រតិបត្តិករប្រចាំកំពង់ផែប្រេងគ្រប់គ្រងដោយរដ្ឋ លោក Masiulis ធ្វើការត្រួតពិនិត្យលើដំណើរការ និងដាក់ឱ្យប្រើប្រាស់ស្ថានីយឧស្ម័នធម្មជាតិរាវអណ្ដែតលើទឹក (Liquefied Natural Gas/LNG) នៅលើលម្ហសមុទ្រ Baltic របស់ លីទុយអានី។ LNG គឺជាឧស្ម័នធម្មជាតិដែលត្រូវបានធ្វើឱ្យចុះត្រជាក់ទៅជាសភាពរាវ នៅប្រហែល -១២៦ អង្សាសេ សម្រាប់ងាយស្រួលក្នុងការដឹកជញ្ជូន និងការផ្ទុក។

ស្ថានីយឧស្ម័នដែលមានឈ្មោះថា FSRU Independence (ហៅកាត់ថា «Independence» ឬ «ឯករាជ្យ») នេះ ត្រូវបានដាក់ឱ្យដំណើរការកាលពីឆ្នាំ ២០១។ វាត្រូវបានសាងសង់ឡើងដើម្បីធានាថា អ្នកប្រើប្រាស់ក្នុង ប្រទេសលីទុយអានី នៅតែទទួលបានឧស្ម័ន សូម្បីតែនៅពេលទំនាក់ទំនងផ្នែកនយោបាយជាមួយ រុស្ស៊ី ប្រែងជាអាក្រក់ដល់ថ្នាក់ប្រភពផ្គត់ផ្គង់ពី ទីក្រុងមូស្គូ ត្រូវបានកាត់ផ្ដាច់។

កាលពីដើមខែនេះ នៅពេលសង្គ្រាមរវាង រុស្ស៊ី និង អ៊ុយក្រែន បន្តអូសបន្លាយ រដ្ឋាភិបាលលីទុយអានី បានប្រកាសថា ពួកគេបានក្លាយជាប្រទេសអឺរ៉ុប ដំបូងគេ ដែលបានផ្អាករាល់សកម្មភាពនាំចូលឧស្ម័នពី រុស្ស៊ី។ ស្ថានីយឧស្ម័ន «Independence» នេះ បានបង្ហាញអំពីតម្លៃដ៏ធំធេងរបស់វា ហើយប្រភពផ្គត់ផ្គង់ឧស្ម័នសម្រាប់ លីទុយអានី នៅតែដំណើរការដោយរលូន។

ស្ថានីយឧស្ម័នធម្មជាតិរាវ FSRU Independence របស់ លីទុយអានី អាចផ្លាស់ទីពីកន្លែងមួយទៅកន្លែងមួយ

«ខ្ញុំពិតជាមានមោទកភាពជាមួយនឹងគម្រោង Independence នៅពេលយើងបានចាប់ផ្ដើមអនុវត្ត ប៉ុន្តែ ខ្ញុំពិតជានឹកស្មានមិនដល់ថា មកដល់ពេលនេះ គម្រោងមួយនេះមានតួនាទីយ៉ាងសំខាន់ដូច្នេះសោះ» លោក Masiulis ថ្លែងដូច្នេះ។

ប្រធានាធិបតីលីទុយអានី លោក Gitanas Nauseda សង្កត់ធ្ងន់ថា «ច្រើនឆ្នាំមុន លីទុយអានី បានធ្វើការសម្រេចចិត្តមួយដែលថ្ងៃនេះ អនុញ្ញាតឱ្យយើងផ្អាកទំនាក់ទំនងផ្នែកថាមពលជាមួយ រុស្ស៊ី បានដោយងាយ។ បើសិន លីទុយអានី អាចធ្វើបាន ដូច្នេះប្រទេសដទៃទៀតនៅ អឺរ៉ុប ក៏អាចធ្វើបាន!»។ លោក Nauseda ថែមទាំងបានប្រកាសថា ប្រទេសនេះនឹងលែងទិញប្រេងរបស់ រុស្ស៊ី ផងដែរ។

ស្ថានីយឧស្ម័ន «Independence» របស់ លីទុយអានី គឺជាប្រព័ន្ធស្ដារ និងឃ្លាំងផ្ទុកអណ្ដែតលើទឹក ដែលហៅថា FSRU (Floating Storage and Regasification Unit)។ ប្រព័ន្ធនេះត្រូវបានសាងសង់ក្នុងរយៈពេលខ្លី ក្នុងនោះ ការអនុវត្តគម្រោងអាចចំណាយពេលពី ១ ដល់ ៣ ឆ្នាំ ហើយតែងតម្រូវឱ្យមានលិខិតអនុញ្ញាតតិចជាង ធៀបនឹងនៅលើដីគោក។ FSRU អាចផ្លាស់ទីពីកន្លែងមួយ ទៅកន្លែងមួយផ្សេងទៀត។

សំខាន់ជាងនេះ FSRU ក៏អនុញ្ញាតឱ្យប្រទេសមួយអាចជ្រើសរើសប្រភពផ្គត់ផ្គង់ LNG របស់ពួកគេបានតាមចិត្ត។ សម្រាប់ លីទុយអានី បច្ចុប្បន្នទទួលយកការផ្គត់ផ្គង់ LNG មួយផ្នែកធំពី ន័រវែស, អាម៉េរិក និង កាតា៕

April 21, 2022

ក្រសួងពាណិជ្ជកម្ម កំណត់តម្លៃប្រេងឥន្ធនៈក្នុងស្រុក សម្រាប់ពីថ្ងៃទី ២១ ដល់ ៣០ ខែមេសា ឆ្នាំ ២០២២

ផ្អែកតាមតម្លៃមធ្យមនៃប្រេងឥន្ធនៈលើទីផ្សារអន្តរជាតិ ក្រសួងពាណិជ្ជកម្មបានកំណត់ថ្លៃលក់ប្រេងសាំងក្នុងស្រុក សម្រាប់ដំណាក់កាលចាប់ពីថ្ងៃទី ២១ ដល់ ៣០ មេសា ២០២។

ក្នុងនោះ ប្រេងសាំងធម្មតា EA៩២ ត្រូវលក់ក្នុងតម្លៃ ៥,៣១០ រៀល/លីត្រ និងប្រេងម៉ាស៊ូត លក់ក្នុងតម្លៃ ៥,៦៦០ រៀល/លីត្រ។

ព័ត៌មានលម្អិត សូមអានសេចក្ដីជូនដំណឹងរបស់ ក្រសួងពាណិជ្ជកម្ម ដែលមាននៅខាងក្រោម៖

April 21, 2022

គ្រាដែល អ៊ុយក្រែន ខាតបង់ ៧ ពាន់លានដុល្លារ/ខែ ក្រុមប្រទេស G៧ ក៏បានសន្យាផ្ដល់ជំនួយបន្ថែម ២៤ ពាន់លានដុល្លារ ដល់ ទីក្រុងកៀវ

រដ្ឋមន្ត្រីក្រសួងហិរញ្ញវត្ថុនានារបស់ក្រុមប្រទេស G៧ បានឱ្យដឹងថា ពួកគេបានផ្ដល់ និងបានសន្យាជាមួយសហគមន៍អន្តរជាតិ ក្នុងការផ្ដល់ជំនួយបន្ថែមជាង ២៤ ពាន់លានដុល្លារអាម៉េរិក ដល់ អ៊ុយក្រែន ក្នុងឆ្នាំ ២០២២ និងឆ្នាំបន្តបន្ទាប់។

ព័ត៌មានខាងលើនេះត្រូវបានចុះផ្សាយដោយ Reuters នាថ្ងៃទី ២១ មេសា ២០២។ ក្រុមរដ្ឋមន្ត្រីនៃបណ្ដាប្រទេស G៧ (បណ្ដាប្រទេសដែលមានសេដ្ឋកិច្ចជឿនលឿនលំដាប់កំពូលក្នុងពិភពលោក) ក៏បានឱ្យដឹងដែរថា ពួកគេបានត្រៀមជាស្រេចដើម្បីធ្វើអ្វីៗច្រើនជាងនេះ នៅពេលចាំបាច់។

មុននោះ សារព័ត៌មានរុស្ស៊ី Sputnik ដកស្រង់សម្ដីលោក Oleg Ustenko ទីប្រឹក្សាសេដ្ឋកិច្ចរបស់ ប្រធានាធិបតីអ៊ុយក្រែន កាលពីថ្ងៃទី ១៧ មេសា បញ្ជាក់ថា ទីក្រុងកៀវ បានស្នើឱ្យ G៧ និងមូលនិធិរូបិយវត្ថុអន្តរជាតិ (IMF) ផ្ដល់ជំនួយផ្នែកហិរញ្ញវត្ថុឡើងដល់ ៥០ ពាន់លានដុល្លារអាម៉េរិក។ ទន្ទឹមនឹងនេះ អ៊ុយក្រែន ក៏កំពុងតែពិចារណា ស្នើឱ្យ IMF ផ្ដល់ប្រាក់កម្ចីពីសិទ្ធិដកទុនពិសេសផងដែរ។

យោងតាមលោក Ustenko ប្រទេសអ៊ុយក្រែន ត្រូវខាតបង់ប្រាក់ប្រហែល ៧ ពាន់លានដុល្លារជារៀងរាល់ខែ ដូច្នេះ ការខាតបង់សរុបក្នុងរយៈពេល ៦ ខែ នឹងឡើងដល់ជិត ៥០ ពាន់លានដុល្លារអាម៉េរិក។

ក្រុមប្រទេស G៧ (Group of Seven) នេះ មានប្រទេសចំនួន ៧ រួមមាន កាណាដា, បារាំង, អាល្លឺម៉ង់, អ៊ីតាលី, ជប៉ុន, អង់គ្លេស និង សហរដ្ឋអាម៉េរិក៕

April 21, 2022

កូវីដ-១៩! កម្ពុជា បានរកឃើញអ្នកឆ្លងថ្មីច្រើនជាងជិត ៥០% ធៀបនឹងក្រោយចូលឆ្នាំខ្មែរ ១ ថ្ងៃ

ក្នុងអំឡុង ២៤ ម៉ោងនៃថ្ងៃទី ២០ មេសា កម្ពុជា បានរកឃើញអ្នកវិជ្ជមាននឹង កូវីដ-១៩ ចំនួន ២៩ នាក់ ដែលសុទ្ធតែជាប្រភេទ អូមីក្រុង ក្នុងនោះមានករណីឆ្លងក្នុងសហគមន៍ ២២ នាក់ និងអ្នកដំណើរពីបរទេស ៧ នាក់។

តួលេខអ្នកវិជ្ជមានថ្មីខាងលើនេះ ខ្ពស់ជាងជិតពាក់កណ្ដាល បើធៀបនឹងថ្ងៃទី ១៧ ខែមេសា ឆ្នាំ ២០២២ ពោលគឺក្រោយពិធីបុណ្យចូលឆ្នាំខ្មែរ ១ ថ្ងៃ។ នៅថ្ងៃទី ១៧ មេសា កម្ពុជា មានអ្នកឆ្លងកូវីដ-១៩ ចំនួន ១៦ នាក់ ដែលសុទ្ធតែជាប្រភេទ អូមីក្រុង និងជាករណីឆ្លងក្នុងសហគមន៍។

April 21, 2022

ដកវិធានការពាក់ម៉ាសបង្ការកូវីដ-១៩ នៅក្នុងទីតាំងបិទជិត (អ៊ីស្រាអែល)

កាលពីម្សិលមិញ រដ្ឋាភិបាលអ៊ីស្រាអែល បានសម្រេចដកវិធានការពាក់ម៉ាសដោយបង្ខំ នៅក្នុងទីកន្លែងបិទជិត គ្រាដែលស្ថានភាពកូវីដ-១៩ នៅប្រទេសនេះ បន្តធូរស្រាលជាងមុន។

ប្រភពព័ត៌មានពីទីក្រុង តែលអាវីវ (Tel Aviv) ដកស្រង់ប្រកាសរួមរបស់ នាយករដ្ឋមន្ត្រី Naftali Bennett និង រដ្ឋមន្ត្រីក្រសួងសុខាភិបាល Nitzan Horowitz ឱ្យដឹងថា «ការកំណត់ឱ្យពាក់ម៉ាសនៅក្នុងបរិយាកាសបិទជិត នឹងត្រូវបានដកចេញចាប់ពីវេលាម៉ោង ២០ ថ្ងៃទី ២៣ មេសា បន្ទាប់ពីត្រូវបានអនុម័តដោយគណៈកម្មការសុខាភិបាល នៃ រដ្ឋសភា»។ ក៏ប៉ុន្តែ ការសម្រេចថ្មីនេះមិនបានរាប់បញ្ចូលឡើយ ចំពោះទីកន្លែងដែលមានហានិភ័យខ្ពស់ ដូចជា មន្ទីរពេទ្យ, មណ្ឌលចាស់ជរា នៅក្នុងយន្តហោះ និងចំពោះអ្នកដែលត្រូវធ្វើចត្តាឡីស័ក។

កន្លងមក អ៊ីស្រាអែល ធ្លាប់បានដកវិធានការពាក់ម៉ាសនៅក្នុងទីកន្លែងបិទជិតម្ដងរួចហើយកាលពីខែមិថុនា ២០២១ ប៉ុន្តែ បានអនុវត្តឡើងវិញបន្ទាប់ពីដកចោលបាន ២ សប្ដាហ៍ ដោយសារតែរលកនៃការឆ្លងរាលដាលខ្លាំងនៃវីរុសបំប្លែងខ្លួនថ្មី ដេលតា។

កាលពីថ្ងៃទី ២០ មេសា ក្រសួងសុខាភិបាលអ៊ីស្រាអែល ប្រកាសថា បានរកឃើញអ្នកវិជ្ជមានថ្មីចំនួនជាង ៤,០០០ នាក់ថែមទៀត ដែលតួលេខនេះគឺទាបបំផុតក្នុងអំឡុង ៤ ខែកន្លង។

សាស្ត្រាចារ្យ Roni Gamzu ប្រធានមន្ទីរពេទ្យ Ichilov និងជាអតីតអ្នកទទួលខុសត្រូវក្នុងយុទ្ធនាការប្រឆាំងកូវីដ-១៩ របស់ អ៊ីស្រាអែល ឱ្យដឹងថា «ពលរដ្ឋអ៊ីស្រាអែល ដែលទៅកាន់បរទេស មានការភ្ញាក់ផ្អើលនៅពេលបានឃើញថា កូវីដ-១៩ ថយចុះខ្លាំងនៅស្ទើរគ្រប់ប្រទេស។ ដល់ពេលដែល អ៊ីស្រាអែល គួរដកចោលវិធានការមួយចំនួននៅតាមទីកន្លែងបិទជិត ក្នុងនោះមានសាលារៀនជាដើម ដោយសារតែបច្ចុប្បន្ន កូវីដ-១៩ មិនបង្កគ្រោះថ្នាក់ដូចមុន»៕

April 21, 2022

កម្ពុជា កែប្រែរយៈពេលនៃការធ្វើចត្តាឡីស័ក សម្រាប់អ្នកដំណើរពីបរទេស

ចំពោះអ្នកដំណើរពីបរទេសដែលមិនទាន់បានទទួលការចាក់វ៉ាក់សាំងបង្ការជំងឺកូវីដ-១៩ នឹងត្រូវធ្វើចត្តាឡីស័យ ៧ ថ្ងៃ ជំនួសឱ្យ ១៤ ថ្ងៃ ដែលធ្លាប់បានអនុវត្តកន្លងមក។

ព័ត៌មានលម្អិត សូមអានសេចក្ដីប្រកាសព័ត៌មានរបស់ ក្រសួងសុខាភិបាល ដូចខាងក្រោម៖

April 21, 2022

Author: សឿន សំណាង