ប្រធានាធិបតីអាម៉េរិក លោក ចូ បៃដិន ថ្លែងថា លោកខាងលិចនឹងត្រូវខាតបង់ធ្ងន់ធ្ងរ បើសិនចុះចាញ់ រុស្ស៊ី និងបានស្នើកញ្ចប់ថវិកា ចំនួន ៣៣ ពាន់លានដុល្លារ ដើម្បីជួយដល់ អ៊ុយក្រែន។
«ការប្រកួតប្រជែងនេះមានតម្លៃមិនថោកឡើយ។ ប៉ុន្តែ តម្លៃដែលត្រូវខាតបង់នឹងធ្ងន់ធ្ងរជាងនេះ បើសិនយើងចុះចាញ់» លោក បៃដិន ថ្លែងនៅ សេតវិមាន កាលពីថ្ងៃទី ២៨ មេសាដូច្នេះ និងបានដាក់សំណើសុំបញ្ចេញកញ្ចប់ថវិកា តម្លៃ ៣៣ ពាន់លានដុល្លារ ដើម្បីបញ្ជូនអាវុធ និងជំនួយឱ្យ ប្រទេសអ៊ុយក្រែន។
មន្ត្រីជាន់ខ្ពស់មួយរូបនៃរដ្ឋាភិបាលអាម៉េរិក សុំមិនបញ្ចេញឈ្មោះ បានឱ្យដឹងថា កញ្ចប់ថវិកាជំនួយសម្រាប់ អ៊ុយក្រែន ខាងលើនេះក៏រួមមានទាំង ២០ ពាន់លានដុល្លារសម្រាប់ផ្ដល់ជំនួយជាយោធា សន្តិសុខ និងទិញសព្វាវុធ។ ចំណែកប្រហែល ៨.៥ ពាន់លានដុល្លារទៀតសម្រាប់សេដ្ឋកិច្ច ជួយឱ្យ ទីក្រុងកៀវ ដោះស្រាយបញ្ហាវិបត្តិបន្ទាន់ និងប្រមាណ ៣ ពាន់លានដុល្លារផ្សេងទៀត សម្រាប់ជំនួយមនុស្សធម៌ និងដោះស្រាយបញ្ហា ស្បៀងអាហារឡើងថ្លៃទូទាំងសកលលោក។
កញ្ចប់ថវិកានេះ ត្រូវរង់ចាំការអនុម័តពីសភាអាម៉េរិក។ បើទោះជាជំនួយសម្រាប់ អ៊ុយក្រែន គឺជាប្រធានបទទទួលបានការគាំទ្រច្រើនពីសភា ប៉ុន្តែ វាហាក់នៅស្រពេចស្រពិលនៅឡើយ ដោយសារតែបក្សប្រជាធិបតេយ្យ និងបក្សសាធារណរដ្ឋ កំពុងជជែកអំពីកញ្ចប់ថវិកា ២២.៥ ពាន់លានដុល្លារសម្រាប់ទប់ទល់កូវីដ-១៩ ដែលលោក បៃដិន បានស្នើឡើង។
យ៉ាងណាក៏ដោយ អ្នកនាំពាក្យរបស់ សេតវិមាន Jen Psaki អះអាងថា ក្រុមការងាររបស់ប្រធានាធិបតី នឹងប្រើប្រាស់កម្លាំងទាំងអស់ដើម្បីជំរុញឱ្យសភាអនុម័តកញ្ចប់ជំនួយសម្រាប់ អ៊ុយក្រែន នេះ។
នៅ សេតវិមាន លោក បៃដិន បានថ្លែងថា ក្នុងរថក្រោះរបស់ រុស្ស៊ី ១ គ្រឿង ដែល អ៊ុយក្រែន ត្រូវប្រឈមមុខ មន្ទីរបញ្ចកោណ បានផ្ដល់អាវុធចំនួន ១០ ដើម ដើម្បីកម្ទេច។
