សឿន សំណាង - La Reine Media

មហាសេដ្ឋីរូបនេះ បច្ចុប្បន្នមានទ្រព្យច្រើនជាងមហាសេដ្ឋីអាម៉េរិក Warren Buffet ទៅទៀត

Gautam Adani បានលោតឡើងទៅគ្រងតំណែងជាអ្នកមានជាងគេលំដាប់ទី ៥ ក្នុងពិភពលោក ជាមួយនឹងទ្រព្យសម្បត្តិសុទ្ធ ១២៥ ពាន់លានដុល្លារអាម៉េរិក ច្រើនជាងនាយកប្រតិបត្តិរបស់ក្រុមហ៊ុន Berkshire Hathaway ទៅទៀត។ នេះបើតាមទំព័រ Bloomberg Billionaires Index ចេញផ្សាយកាលពីដើមសប្ដាហ៍នេះ។

មហាសេដ្ឋី Buffett ដែលជានាយកប្រតិបត្តិរបស់ក្រុមហ៊ុន Berkshire Hathaway Inc បច្ចុប្បន្នមានទ្រព្យប្រមាណ ១២០ ពាន់លានដុល្លារអាម៉េរិក។

ទ្រព្យសម្បត្តិសុទ្ធរបស់លោក Adani បានកើន ៤៨ ពាន់លានដុល្លារ គិតចាប់ពីដើមឆ្នាំ ២០២២។ ចំណែកទ្រព្យរបស់លោក Buffett វិញ បានកើនឡើង ១១ ពាន់លានដុល្លារក្នុងឆ្នាំនេះ។

ទាំងលោក Buffett ទាំងលោក Adani សុទ្ធតែមិនទាន់ឆ្លើយបតនឹងសំណើសុំការអធិប្បាយ ទាក់ទងនឹងព័ត៌មានខាងលើនេះនៅឡើយ។

មហាសេដ្ឋី Adani គឺជាស្ថាបនិក និងជាប្រធានរបស់ Adani Group ដែលជាក្រុមហ៊ុនខ្នាតយក្ស រកស៊ីក្នុងវិស័យជាច្រើន ដូចជា ថាមពល រ៉ែ អចលនទ្រព្យ និងកសិកម្មជាដើម។

Adani Group មានក្រុមហ៊ុនបុត្រសម្ព័ន្ធចំនួន ៧ ដែលបានឡើងផ្សារហ៊ុន និងមានមូលធនទីផ្សារតម្លៃប្រមាណ ២២០ ពាន់លានដុល្លារអាម៉េរិក។

បច្ចុប្បន្ន លោក Adani ជាមហាសេដ្ឋីដែលមានទ្រព្យច្រើនជាងគេបង្អស់ក្នុងពិភពលោក បន្ទាប់ពី លោក Elon Musk នាយកប្រតិបត្តិ របស់ Tesla, លោក Bezos ស្ថាបនិករបស់ Amazon, លោក Bernard Arnault នាយកប្រតិបត្តិរបស់ LVMH និងលោក Bill Gates សហស្ថាបនិករបស់ Microsoft៕

April 29, 2022

អាម៉េរិក ចាប់ខ្លួនមេដឹកនាំប្រជុំកោះ Virgin នៃចក្រភពអង់គ្លេស

ក្រុមមន្ត្រីអាម៉េរិក បានចាប់ខ្លួនមេដឹកនាំ Fahie រួមនឹងមន្ត្រីម្នាក់ទៀតនៃ ប្រជុំកោះ Virgin របស់ ចក្រភពអង់គ្លេស ដោយចោទថា មានផែនការដឹកជញ្ជូនថ្នាំញៀន។

អភិបាលប្រជុំកោះ Virgin នៃ ចក្រភពអង់គ្លេស Andrew Fahie ត្រូវបានកងកម្លាំងប្រឆាំងគ្រឿងញៀន (DEA) របស់ ក្រសួងយុត្តិធម៌អាម៉េរិក ចាប់ខ្លួនកាលពីថ្ងៃទី ២៨ មេសា នៅទីក្រុង Miami រដ្ឋ Florida ក្រោមបទចោទថា មានផែនការដឹកជញ្ជូនគ្រឿងញៀនចូលទឹកដីរបស់ អាម៉េរិក និងលាងលុយកខ្វក់។

John Rankin ដែលជាមន្ត្រីម្នាក់របស់ប្រជុំកោះខាងលើ ក៏បានទទួលស្គាល់ព័ត៌មាននេះ។ «នេះគឺជាដំណឹងគួរឱ្យភ្ញាក់ផ្អើលបំផុតសម្រាប់សាធារណជន។ ខ្ញុំអំពាវនាវឱ្យគ្រប់គ្នារក្សាភាពស្ងប់ស្ងាត់» លោក Rankin ថ្លែងដូច្នេះ។

ក្រៅពីអភិបាលប្រជុំកោះ Falhei កងកម្លាំងរបស់ អាម៉េរិក ក៏បានចាប់ខ្លួនប្រធានកំពង់ផែនៃ ប្រជុំកោះ Virgin គឺ លោកស្រី Oleanvine Maynard និងកូនប្រុសឈ្មោះ Kadeem ផងដែរ។

ប្រជុំកោះ Virgin នៃ ចក្រភពអង់គ្លេស គឺជាដែនដីឯនាយសមុទ្ររបស់ ចក្រភពអង់គ្លេស ស្ថិតនៅក្នុងតំបន់ សមុទ្រការីប៊ីន (Caribbean Sea) មានផ្ទៃក្រឡា ប្រហែល ១៥៣ គីឡូម៉ែត្រ និងមានប្រជាជនសរុបជាង ២៨,០០០ នាក់។ ប្រជុំកោះនេះ ទទួលបានសិទ្ធិស្វ័យសម្រេចកាលពីឆ្នាំ ១៩៦៧៕

April 29, 2022

ស្ថាបនិករបស់ SpaceX នឹងក្លាយជានាយកប្រតិបត្តិដែលជំពាក់បំណុលច្រើនជាងគេបង្អស់ នៅ សហរដ្ឋអាម៉េរិក បើសិនទិញ Twitter

អ្នកមានទ្រព្យច្រើនជាងគេបង្អស់ក្នុងពិភពលោក អាចទទួលបានងារថ្មីផ្សេងមួយទៀត នោះគឺ នាយកប្រតិបត្តិដែលជាប់បំណុលច្រើនបំផុតនៅ សហរដ្ឋអាម៉េរិក។

លោក Elon Musk ត្រូវការប្រាក់ ៤៤ ពាន់លានដុល្លារ ដើម្បីអាចទិញបាន Twitter ហើយលោកត្រូវចំណាយប្រាក់ ២/៣ ក្នុងចំណោមកញ្ចប់ថវិកាសម្រាប់ទិញបណ្ដាញសង្គមនេះ។ ៤៤ ពាន់លានដុល្លារគឺជាចំនួនច្រើន បើទោះលោក Musk មានទ្រព្យសុទ្ធសរុបប្រហែល ២៥០ ពាន់លានដុល្លារ។ ទ្រព្យរបស់លោក Musk ផ្សារភ្ជាប់ទៅនឹងភាគហ៊ុន Tesla រួមនឹងទុននៅក្នុងក្រុមហ៊ុន SpaceX និង The Boring ដូច្នេះ លោកនឹងត្រូវលក់ភាគហ៊ុនរាប់លានហ៊ុន និងចំណាយបន្ថែមរាប់លានដុល្លារដើម្បីប្រមូលប្រាក់ឱ្យបានគ្រប់ចំនួនសម្រាប់ទិញបណ្ដាញសង្គម។

យោងតាមរបាយការណ៍ដែលបានបញ្ជូនទៅកាន់ គណៈកម្មការមូលបត្រអាម៉េរិក (SEC) គម្រោងហិរញ្ញវត្ថុសម្រាប់ការទិញដូរ Twitter របស់លោក Musk នឹងរួមមាន ១៣ ពាន់លានដុល្លារជាកម្ចីពីធនាគារ, ២១ ពាន់លានដុល្លារជាប្រាក់ផ្ទាល់ខ្លួន និង ១២.៥ ពាន់លានដុល្លារជាប្រាក់កម្ចីដែលដាក់បញ្ចាំភាគហ៊ុន Tesla។

ដោយសារតែបណ្ដាធនាគារតម្រូវឱ្យមានការធានាខ្ពស់សម្រាប់ភាគហ៊ុនដែលអាចមានការប្រែប្រួលខ្ពស់ដូចជា Tesla ជាដើម លោក Musk នឹងត្រូវដាក់បញ្ចាំភាគហ៊ុន Tesla ប្រហែល ៦៥ ពាន់លានដុល្លារ ឬប្រហាក់ប្រហែលនឹង ១/៤ នៃទ្រព្យបច្ចុប្បន្នរបស់លោក សម្រាប់ប្រាក់កម្ចី។

ក្រុមហ៊ុនស្រាវជ្រាវទីផ្សារ Audit Analytics បានឱ្យដឹងថា លោក Musk បានត្រៀមភាគហ៊ុនតម្លៃជាង ៩០ ពាន់លានដុល្លារសម្រាប់ការដាក់បញ្ចាំ។ ខ្ទង់ប្រាក់នេះធ្វើឱ្យលោក Musk ក្លាយជាកូនបំណុលដែលដាក់បញ្ចាំភាគហ៊ុនធំបំផុតក្នុងចំណោម CEO នៅ សហរដ្ឋអាម៉េរិក។ តួលេខនេះច្រើនជាងឆ្ងាយធៀបនឹងនាយកប្រតិបត្តិដែលជាកូនបំណុលធំទី ២ គឺ Larry Ellison ប្រធាន និងជា CEO របស់ Oracle។ លោក Larry Ellison ជំពាក់បំណុល ២៤ ពាន់លានដុល្លារអាម៉េរិក នេះបើតាម ISS Corporate Solutions៕

April 29, 2022

ខ្យល់កន្ត្រាក់ខ្លាំងនៅ ខេត្តបន្ទាយមានជ័យ បណ្ដាលឱ្យផ្ទះជាង ១០០ ខ្នង រកការខូចខាត

កាលពីល្ងាចថ្ងៃទី ២៨ មេសា ២០២២ មានហេតុការណ៍ខ្យល់បោកបក់ខ្លាំង ព្រមជាមួយនឹងភ្លៀងធំ បានធ្វើឱ្យផ្ទះរបស់ប្រជាពលរដ្ឋប្រមាណ ១១០ ខ្នង ក្នុងតំបន់មួយចំនួនរបស់ ស្រុកម៉ាឡៃ នៃ ខេត្តបន្ទាយមានជ័យ ត្រូវរងការខូចខាត។

គ្រោះធម្មជាតិនេះ បានកើតឡើងនៅក្នុងភូមិចំនួន ៣ នៃតំបន់ខាងលើ ក្នុងនោះក៏មាន ភូមិបឹងជង្រុកតេជោឈ្នះ-ឈ្នះ របស់ ឃុំទួលពង្រ ផងដែរ ដែលមានផ្ទះចំនួន ៥៥ ខ្នងបានរងផលប៉ះពាល់។ នេះបើតាម លោក ស្វាយ ជា អភិបាលស្រុកម៉ាឡៃ។ លោកបានបន្ថែមថា ពុំមានករណីរងគ្រោះថ្នាក់ដល់អាយុជីវិត ឬរងរបួសនោះឡើយ នៅក្នុងហេតុការណ៍នេះ។

យោងតាមលោកអភិបាលស្រុកម៉ាឡៃ ក្រោយកើតហេតុការណ៍នេះ អាជ្ញាធរមូលដ្ឋានរួមជាមួយកងកម្លាំងសមត្ថកិច្ច បានចុះជួយរៀបចំ ជួសជុល សាងសង់ផ្ទះជូនប្រជាជនជាបណ្ដើរៗហើយ។ លោកថា ជំនួយជា ស័ង្កសី អង្ករ ទឹកត្រី ទឹកស៊ីអ៊ីវ ទឹកសុទ្ធ ជាដើម ក៏ត្រូវបាននាំយកទៅចូលរួមចំណែកជួយដល់ជីវភាពរបស់ពួកគាត់ផងដែរ។

April 29, 2022

ម្ចាស់ Facebook រកប្រាក់បាន ១១ ពាន់លានដុល្លារអាម៉េរិក ក្នុង ១ ថ្ងៃ

ភាគហ៊ុន Meta Platforms ដែលជាក្រុមហ៊ុនមេរបស់ Facebook លោតឡើងខ្ពស់ខ្លាំងក្នុងថ្ងៃទី ២៨ មេសា ជួយឱ្យទ្រព្យរបស់ មហាសេដ្ឋី Mark Zuckerberg កើនឡើងខ្ពស់បំផុតគិតមកដល់បច្ចុប្បន្ន។

បញ្ចប់ការជួញដូរកាលពីថ្ងៃទី ២៨ មេសា ភាគហ៊ុន Meta Platforms កើន ១៧.៦% ក្រោយរបាយការណ៍ហិរញ្ញវត្ថុត្រីមាសទី ១ បង្ហាញថា បណ្ដាញសង្គមនេះទាក់ទាញបានអ្នកប្រើប្រាស់ថ្មីច្រើនជាងការរំពឹងទុក។ ប្រការនេះជួយឱ្យ នាយកប្រតិបត្តិ Zuckerberg រកបាន ១១ ពាន់លានដុល្លារបន្ថែមទៀត នេះបើតាម Bloomberg Billionaires Index។

ដោយសារតែការជួញដូរនៅផ្សារហ៊ុនមានលទ្ធផលល្អកាលពីម្សិលមិញ ចំណាត់ថ្នាក់មហាសេដ្ឋីរបស់ម្ចាស់ Facebook ក៏លោតឡើងបាន ៦ កាំ ពោលគឺឈរលំដាប់ទី ១២ ក្នុងចំណោមមហាសេដ្ឋីដែលមានទ្រព្យច្រើនជាងគេក្នុងពិភពលោក ដោយមានសម្បត្តិសរុប ៧៥.៩ ពាន់លានដុល្លារ។ បច្ចុប្បន្ន លោក Zuckerberg កាន់កាប់ភាគហ៊ុន ១៣% នៅក្នុងក្រុមហ៊ុន Meta។

April 29, 2022

មហាសេដ្ឋី Elon Musk លក់ភាគហ៊ុន Tesla រាប់លាយហ៊ុន ដើម្បីយកប្រាក់មកសម្រេចមហិច្ឆតា «លើកកម្ពស់សេរីភាពបញ្ចេញមតិ»

ក្រុមអ្នកវិភាគទីផ្សារយល់ថា មហាសេដ្ឋីអាម៉េរិក ដើមកំណើតអាហ្វ្រិកខាងត្បូង លោក Elon Musk ត្រូវការលក់ភាគហ៊ុនរបស់លោក ដើម្បីមានប្រាក់សម្រាប់ទិញបណ្ដាញសង្គម Twitter។

យោងតាមឯកសារដែលបញ្ជូនទៅកាន់គណៈកម្មការមូលបត្រអាម៉េរិក (SEO) នាយកប្រតិបត្តិរបស់ក្រុមហ៊ុន Tesla បានលក់ភាគហ៊ុនប្រហែល ៤.៤ លានហ៊ុន ក្នុងអំឡុងថ្ងៃទី ២៦ និង ២៧ មេសា។ ចំនួនភាគហ៊ុននេះ មានតម្លៃប្រហែល ៤ ពាន់លានដុល្លារអាម៉េរិក។

នៅលើទំព័របណ្ដាញសង្គម Twitter មហាសេដ្ឋីរូបនេះប្រកាសថា «ថ្ងៃនេះ ពុំមានគម្រោងលក់ភាគហ៊ុន Tesla បន្ថែមទៀតឡើយ»។

ក្រុមអ្នកវិភាគនៅ Wall Street និងអ្នកវិនិយោគយល់ថា លោក Musk អាចនឹងត្រូវការលក់ភាគហ៊ុនដើម្បីមានប្រាក់គ្រប់គ្រាន់សម្រាប់ទិញ Twitter ដែលលោកគិតថា អាចនឹងកែលម្អបញ្ហាសេរីភាពបញ្ចេញមតិនៅលើបញ្ដាញសង្គម។ មហាសេដ្ឋីលេខ ១ ក្នុងពិភពលោក និងបណ្ដាញសង្គម Twitter ដើមសប្ដាហ៍នេះ បានយល់ព្រមទិញដូរ Twitter ក្នុងតម្លៃប្រមាណ ៤៤ ពាន់លានដុល្លារអាម៉េរិក។

កាលពីសប្ដាហ៍មុន លោក Musk ប្រកាសថា បានធានាថាមានប្រាក់ ៤៦.៥ ពាន់លានដុល្លារ សម្រាប់ការទិញដូរនេះ ក្នុងនោះមាន ១៣ ពាន់លានដុល្លារជាកម្ចីពីធនាគារ, ២១ ពាន់លានដុល្លារជាប្រាក់ផ្ទាល់ខ្លួន និង ១២.៥ ពាន់លានដុល្លារជាប្រាក់កម្ចីដែលដាក់បញ្ចាំភាគហ៊ុន Tesla។

ចំណែកឯតម្លៃភាគហ៊ុនរបស់ Tesla នៅលើផ្សារមូលបត្រ វិញ កាលពីម្សិលមិញ ការជួញដូរត្រូវបានបញ្ចប់ក្នុងតម្លៃ ៤៩.១១ ដុល្លារ/ហ៊ុន ទាបជាងច្រើនដុល្លារ ធៀបនឹង ៥៤.២ ដុល្លារ/ហ៊ុន ដែលលោក Musk បានដាក់លក់៕

April 29, 2022

កូវីដ-១៩! កម្ពុជា បានរកឃើញអ្នកឆ្លងថ្មីតែ ០៦ នាក់ទៀត ក្នុងអំឡុងថ្ងៃទី ២៨ ខែមេសា ឆ្នាំ ២០២២

ក្នុងអំឡុង ២៤ ម៉ោងនៃថ្ងៃទី ២៨ មេសា កម្ពុជា បានរកឃើញអ្នកវិជ្ជមាននឹង កូវីដ-១៩ ចំនួន ០៦ នាក់ ដែលសុទ្ធតែជាប្រភេទ អូមីក្រុង និងសុទ្ធតែជាករណីឆ្លងក្នុងសហគមន៍។

April 29, 2022

ស្ថានីយប្រេងសាំងបើកថ្មី ជួលស្រីស្អាតស្លៀកខ្លីមកឃោសនា បណ្ដាលឱ្យចរាចរណ៍ត្រូវកកស្ទះ

(ប្រទេសចិន)- ស្ថានីយប្រេងសាំងថ្មីមួយកន្លែងនៅទីក្រុង Qingdao ជួលស្រីស្អាតស្លៀកខ្លីជាច្រើនរូប ឱ្យមកជួយផ្សព្វផ្សាយ បណ្ដាលឱ្យអ្នកបើកបរនាំគ្នាមកចាក់សាំង ធ្វើឱ្យចរាចរណ៍ត្រូវកកស្ទះធ្ងន់ធ្ងរ។

ស្ថានីយប្រេងសាំងដែលស្ថិតក្នុងទីក្រុង Qingdao ខេត្ត Shandong ភាគខាងកើតប្រទេសចិន បានសម្ពោធបើកដំណើរការក្នុងសប្ដាហ៍នេះ និងបានជួលនារីបង្ហាញម៉ូដច្រើននាក់ ដើម្បីឱ្យជួយឃោសនា បម្រើសេវាដល់អតិថិជន។

«ចាក់សាំងដោយមិនគិតថ្លៃ ចាក់សាំងដោយមិនគិតថ្លៃ» នារីបង្ហាញម៉ូដស្លៀកប៊ីគីនី ពណ៌ខៀវ ស្រែកដូច្នេះ។

អ្នកបើកបររថយន្តម្នាក់ ឱ្យដឹងថា ស្ថានីយប្រេងនេះកំពុងឃោសនា ប្រូម៉ូសិន ដោយអនុញ្ញាតឱ្យអតិថិជនចាក់សាំងដោយឥតគិតថ្លៃ បើសិនធ្វើប័ណ្ណសមាជិក និងបញ្ចូលលុយទៅក្នុងប័ណ្ណនេះ។ ការប្រូម៉ូសិន ចាប់ផ្ដើមពីថ្ងៃទី ២៦ ខែមេសា ដល់ថ្ងៃទី ២ ខែឧសភា។ បុគ្គលិករបស់ស្ថានីយប្រេងសាំងខាងលើ បានបដិសេធការឆ្លើយតបទៅនឹងសំណួររបស់អ្នកយកព័ត៌មាន។

អាជ្ញាធរគ្រប់គ្រងទីផ្សាររបស់ទីក្រុង Qingdao បានស្នើឱ្យស្ថានីយប្រេងសាំងនេះ បញ្ឈប់ «សកម្មភាពឃោសនាដែលមិនសមស្រប» ព្រោះតែបង្កការកកស្ទះចរាចរណ៍។

អ្នកលេងបណ្ដាញសង្គមនៅ ប្រទេសចិន មានមតិផ្សេងៗគ្នាចំពោះព័ត៌មានខាងលើ។ អ្នកខ្លះថា «ស្លៀកប៊ីគីនី តើវាមានបញ្ហាអ្វី ខ្ញុំឃើញថា ពុំមានបញ្ហាអ្វីសោះ»។ ចំណែកអ្នកខ្លះទៀត សរសេររិះគន់ថា នេះគឺជារបៀបផ្សព្វផ្សាយ «មួយរៀល»។

ក៏ប៉ុន្តែ មានមនុស្សមួយចំនួនយល់ថា ការដែលមានរថយន្តជាច្រើនមកចាក់សាំងនៅស្ថានីយប្រេងថ្មីនេះ ក៏ព្រោះតែតម្លៃទាប។ វិក្កយបត្រមួយដែលត្រូវបានបង្ហោះលើបញ្ហាញសង្គមបង្ហាញថា តម្លៃក្នុងពេលប្រូម៉ូសិន នៅទីនេះ ទាបជាងពាក់កណ្ដាលធៀបនឹងតម្លៃដើម ១.២១ ដុល្លារអាម៉េរិក/លីត្រ។

April 29, 2022

អាម៉េរិក ប្រើប្រាស់កម្មវិធីពីសម័យសង្គ្រាមលោកលើកទី ២ ដើម្បីអាចបញ្ជូនអាវុធឱ្យ អ៊ុយក្រែន បានលឿន

សភាអាម៉េរិក អនុម័តច្បាប់ដើម្បីធ្វើឱ្យរស់ឡើងវិញនូវកម្មវិធីដែលធ្លាប់ត្រូវបានអនុវត្តក្នុងសង្គ្រាមលោកលើកទី ២ បំណងធ្វើឱ្យការផ្ដល់ជំនួយយោធាដល់ អ៊ុយក្រែន មានដំណើរការរលូត និងឆាប់រហ័ស។

សភាជាន់ទាបអាម៉េរិក កាលពីថ្ងៃទី ២៨ មេសា ឆ្នាំ ២០២២ បានអនុម័តលើសេចក្ដីព្រាងនៃ «ច្បាប់ឱ្យខ្ចី-ឱ្យជួល ការពារប្រជាធិបតេយ្យអ៊ុយក្រែន ២០២២» ដោយមាន ៤១៧ សំឡេងគាំទ្រ និង ១០ សំឡេងប្រឆាំង បន្ទាប់ពីសេចក្ដីព្រាងច្បាប់នេះត្រូវបានសភាជាន់ខ្ពស់អាម៉េរិក អនុម័តរួចកាលពីប៉ុន្មានថ្ងៃមុន។ សេចក្ដីព្រាងច្បាប់នឹងត្រូវបានបញ្ជូនទៅកាន់ សេតវិមាន ដើម្បី ប្រធានាធិបតី ចូ បៃដិន ចុះហត្ថលេខាចុងក្រោយ។

ក្រោយពីលោក បៃដិន បានចុះហត្ថលេខារួច ច្បាប់នេះនឹងធ្វើឱ្យកម្មវិធីជំនួយ Lend-Lease (ឱ្យខ្ចី-ឱ្យជួល) កាលពីសម័យសង្គ្រាមលោកលើកទី ២ រស់ឡើងវិញ ក្នុងនោះ វានឹងអនុញ្ញាតឱ្យ អាម៉េរិក ឱ្យខ្ចី ឬផ្ដល់ជំនួយសព្វាវុធ ដល់បណ្ដាប្រទេសជាសម្ព័ន្ធមិត្ត ដោយប្រើពេលអនុម័តខ្លីបំផុត។

ក្រុមទាហានអ៊ុយក្រែន ឈរក្បែរមីស៊ីល ដែលទទួលបានពី អាម៉េរិក

ក្រៅពី អ៊ុយក្រែន បណ្ដាប្រទេសដែលរងផលប៉ះពាល់ពីយុទ្ធនាការយោធារបស់ រុស្ស៊ី ដូចជា ប៉ូឡូញ និងបណ្ដាប្រទេសនៅ អឺរ៉ុបខាងកើត ក៏ទទួលបានផលប្រយោជន៍ពីកម្មវិធីនេះផងដែរ។

April 29, 2022

អាម៉េរិក ផ្ដល់ជំនួយដល់ វៀតណាម ដើម្បីបង្កើនសមត្ថភាពការពារដែនទឹក

សហរដ្ឋអាម៉េរិក ប្រគល់មជ្ឈមណ្ឌលហ្វឹកហ្វឺន និងថែទាំកប៉ាល់ និងផ្ដល់ជំនួយជាយន្តហោះគ្មានមនុស្សបើក ដើម្បីប៉ូលិសជើងទឹកវៀតណាម អាចលើកកម្ពស់សមត្ថភាពការពារសន្តិសុខលើផ្ទៃសមុទ្រ។

«យើងទើបតែបានចូលរួមពិធីប្រគល់មជ្ឈមណ្ឌលហ្វឹកហ្វឺន និងថែទាំ ឱ្យ ប៉ូលិសការពារដែនសមុទ្រវៀតណាម នៅ ហៃហ្វុង» បណ្ឌិត Robert Pope ប្រធានផ្នែកកាត់បន្ថយការគំរាមកំហែង និងសហប្រត្រិបត្តិការ (CTR) នៃ អង្គភាពកាត់បន្ថយការគំរាមកំហែងផ្នែកការពារជាតិអាម៉េរិក (DTRA) បាននិយាយនៅ រដ្ឋធានីហាណូយ កាលពីល្ងាចម្សិលមិញដូច្នេះ។

លោក Pope ឱ្យដឹងថា មជ្ឈមណ្ឌលនេះអាចថែទាំកប៉ាល់ធំៗ ជួយឱ្យពួកវាដំណើរការបានល្អ និងយូរអង្វែង។ «ប្រការនេះនឹងជួយដល់ វៀតណាម ល្បាតសមុទ្ររបស់ខ្លួន ដើម្បីធានាសេរីភាពចំពោះចរាចរណ៍ផ្លូវទឹក និងពាណិជ្ជកម្ម»។

វរសេនីយ៍ឯក Thomas M. Stevenson មន្ត្រីអនុព័ន្ធយោធាអាម៉េរិក ប្រចាំ វៀតណាម និយាយថា DTRA បានជួយដល់ការសាងសង់មូលដ្ឋានហ្វឹកហ្វឺន និងថែទាំ ៤ កន្លែង សម្រាប់ប៉លិសនៅក្នុង ៤ តំបន់សមុទ្ររបស់ វៀតណាម។ នៅក្នុងមជ្ឈមណ្ឌលទាំងនេះ អាម៉េរិក បានផ្ដល់ប្រព័ន្ធបច្ចេកវិទ្យាទាំងឡាយជួយឱ្យក្រុមនាវិកវៀតណាម ធ្វើការហ្វឹកហ្វឺន ក្នុងការបើកបរ លើកកម្ពស់សមត្ថភាពប្រើប្រាស់កប៉ាល់ ដើម្បីបម្រើដល់សកម្មភាពល្បាត និងការពារដែនទឹករបស់ពួកគេឱ្យបានល្អជាងមុន។

ក្រៅពីនេះ អាម៉េរិក ក៏ផ្ដល់ជំនួយជាយន្តហោះគ្មានមនុស្សបើក (UAV) ដល់ វៀតណាម ផងដែរ ដើម្បីជួយឱ្យ នាវារបស់ ប៉ូលិសវៀតណាម ពង្រឹង និងពង្រីកសមត្ថភាពល្បាតលើដែនសមុទ្រ។

ទំនាក់ទំនងរវាង អាម៉េរិក-វៀតណាម បានត្រលប់មកជាធម្មតាវិញ ចាប់ពីឆ្នាំ ១៩៩។ ប្រទេសទាំង ២ បានបង្កើតទំនាក់ទំនងពេញលេញកាលពីឆ្នាំ ២០១៣ ហើយ អាម៉េរិក ក៏បានប្រកាសដកការហាមឃាត់អាវុធចំពោះ ប្រទេសវៀតណាម កាលពីឆ្នាំ ២០១៦។

គិតមកដល់ឆ្នាំ ២០២០ ការដោះដូរពាណិជ្ជកម្មរវាង អាម៉េរិក និង វៀតណាម បានកើនឡើងដល់ ៩០.៥ ពាន់លានដុល្លារ ច្រើនជាងឆ្ងាយធៀបនឹង ៤៥០ លានដុល្លារកាលពីឆ្នាំ ១៩៩៤៕

April 29, 2022

Author: សឿន សំណាង