សឿន សំណាង - La Reine Media

(វីដេអូ)-ទ័ពយន្តហោះដ្រោន ហោះគេចឧបសគ្គ និងឆ្លងកាត់ព្រៃឫស្សីក្រាស់ ដោយស្វ័យប្រវត្តិ

នៅក្នុងការសាកល្បងហោះហើររបស់សាកលវិទ្យាល័យ Zhejiang យន្តហោះគ្មានមនុស្សបើក (drone) ចំនួន ១០ គ្រឿង បានទទួលជោគជ័យក្នុងការឆ្លងកាត់បរិស្ថានដែលគ្មានការគ្រប់គ្រង និងសម្បូរដោយឧបសគ្គ នៅក្នុងព្រៃឫស្សី។

សារព័ត៌មាន SCMP បានឱ្យដឹងថា យន្តហោះដ្រោនស្វ័យប្រវត្តិទាំង ១០ គ្រឿងនេះ អាចហោះឆ្លងកាត់ព្រៃឫស្សីមួយនៅ ប្រទេសចិន។ បច្ចេកទេសកុំព្យូទ័រមួយនាំផ្លូវឱ្យពួកវាគេចពីឧបសគ្គ ហោះហើរប្រកបដោយប្រសិទ្ធភាព និងសហការគ្នាធ្វើការជាក្រុម។

ពួកវាអាចហោះឆ្លងកាត់ចន្លោះចង្អៀតរវាងដើមឫស្សី។ ទាំងដើមឫស្សីឈរត្រង់ ដើមឫស្សីទេរ ឫស្សីរលំទាប គម្ពោតព្រៃក្រាស់ មែកឈើ ឬស្លឹកឈើជាដើម សុទ្ធតែមិនអាចរារាំងដ្រោនទាំងនេះបាន។

នេះគឺជាផ្នែកមួយនៃការសាកល្បងបច្ចេកវិទ្យារបស់ក្រុមអ្នកស្រាវជ្រាវប្រចាំសាកលវិទ្យាល័យ Zhejiang ប្រទេសចិន ហើយវាគឺជាក្រុមយន្តហោះដ្រោនដំបូងគេដែលទទួលបានជោគជ័យក្នុងការហោះហើរក្នុងបរិស្ថានមិនមានការគ្រប់គ្រង។

បើតាមទ្រឹស្ដី បច្ចេកវិទ្យានេះអាចជួយបង្កើតផែនទីពីលើទីខ្ពស់ និងជួយដោះស្រាយគ្រោះមហន្តរាយ។ល។

May 6, 2022

នាវាទេសចរណ៍តម្លៃរាប់រយលានដុល្លាររបស់ មហាសេដ្ឋីរុស្ស៊ី ត្រូវបានរឹបអូសដោយប្រទេសកោះតូចមួយនៅកណ្ដាលសាគរ

អាជ្ញាធររបស់ ប្រទេសកោះ Fiji ជំនួសមុខឱ្យ សហរដ្ឋអាម៉េរិក រឹបអូសនាវាទេសចរណ៍មួយគ្រឿង តម្លៃ ៣០០ លានដុល្លារ របស់ មហាសេដ្ឋីរុស្ស៊ី Kerimov នៅក្នុងកិច្ចប្រឹងប្រែងដាក់ទណ្ឌកម្មលើ ទីក្រុងមូស្គូ។

កាលពីថ្ងៃទី ៥ ខែឧសភា ឆ្នាំ ២០២២ ក្រសួងយុត្តិធម៌របស់ អាម៉េរិក បានប្រកាសថា អាជ្ញាធរនៃប្រទេស Fiji បានរឹបអូសនាវាទេសចរណ៍ Amadea ប្រវែងជាង ១០០ ម៉ែត្រ របស់ មហាសេដ្ឋីរុស្ស៊ី Suleyman Kerimov ក្រោមមូលហេតុថា «រំលោភច្បាប់អាម៉េរិក»។

«ការរឹបអូសនេះបង្ហាញប្រាប់ក្រុមអ្នកមាននៅ រុស្ស៊ី ថា ពួកគេមិនអាចលាក់ខ្លួនបានឡើយ សូម្បីតែនៅទីកន្លែងឆ្ងាយដាច់ស្រយាលបំផុតរបស់ពិភពលោក» អនុរដ្ឋមន្ត្រីក្រសួងយុត្តិធម៌អាម៉េរិក Lisa Monaco ប្រកាសដូច្នេះ។

មហាសេដ្ឋី Kerimov ដែលជាអ្នកមានជាងគេមួយរូបនៅ ប្រទេសរុស្ស៊ី រកស៊ីក្នុងវិស័យរុករករ៉ែមាស។ លោកគឺជាតំណាងរាស្ត្រនៅសភាជាន់ខ្ពស់ តំណាងឱ្យសាធារណរដ្ឋ Dagestan នៃ សហព័ន្ធរុស្ស៊ី និងត្រូវបានគេដឹងថា មានទំនាក់ទំនងជិតស្និទ្ធជាមួយ ប្រធានាធិបតីរុស្ស៊ី លោក ពូទីន។

សារព័ត៌មាន Forbes បានគណនាឃើញថា លោក Kerimov មានទ្រព្យ ១៣ ពាន់លានដុល្លារអាម៉េរិក។ មហាសេដ្ឋីរូបនេះត្រូវបាន សហរដ្ឋអាម៉េរិក, អង់គ្លេស និង សហភាពអឺរ៉ុប ដាក់ទណ្ឌកម្មតាំងពីខែមីនា ២០២២ បន្ទាប់ពី រុស្ស៊ី បានបើកការឈ្លានពានលើ អ៊ុយក្រែន។

May 6, 2022

ចំនួនមនុស្សស្លាប់ក្នុងករណីស្រុតរលំអគារនៅ ប្រទេសចិន កើនដល់ជាង ៥០ នាក់

ក្រុមមន្ត្រីចិន បានបញ្ចប់ភារកិច្ចជួយសង្គ្រោះ និងបានប្រកាសថា ករណីស្លាប់នៅក្នុងហេតុការណ៍បាក់រលំអគារមួយនៅខេត្ត Huna បានកើនដល់ ៥៣ នាក់។

«អ្នកដែលត្រូវជាប់ និងមិនអាចផ្លាស់ទីចេញពីកន្លែងកើតហេតុ ត្រូវបានរកឃើញអស់ហើយ។ មនុស្ស ១០ នាក់ ត្រូវបានជួយសង្គ្រោះ និង ៥៣ នាក់ បានស្លាប់» ទូរទស្សន៍រដ្ឋចិន ផ្សាយនាថ្ងៃនេះដូច្នេះ។ មួយថ្ងៃមុននេះ ចំនួនមនុស្សដែលត្រូវបានគេបញ្ជាក់ថាស្លាប់គឺ ២៦ នាក់។

អគារកម្ពស់ ៦ ជាន់ ដែលរួមមានរោងកុន ផ្ទះសំណាក់ ហាងកាហ្វេ ហាងទំនិញ និងទីស្នាក់នៅមួយនៅទីក្រុង Changsha ខេត្ត Hunan បានរាបដល់ដី នៅក្នុងហេតុការណ៍បាក់រលំកាលពីថ្ងៃទី ២៩ មេសា។

កងកម្លាំងជួយសង្គ្រោះបន្ទាន់ប្រើប្រាស់សុនក ម៉ាស៊ីនរុករក និងយន្តហោះគ្មានមនុស្សបើក បានប្រឹងប្រែងស្វែងរកជនរងគ្រោះដែលនៅមានជីវិតក្នុងរយៈពេល ៦ ថ្ងៃកន្លងមកនេះ បន្ទាប់ពីហេតុការណ៍កើតឡើង។

បច្ចុប្បន្ន អាជ្ញាធរក្នុងតំបន់ កំពុងសហការជាមួយស្ថាប័នពាក់ព័ន្ធដើម្បីស៊ើបអង្កេតឱ្យបានម៉ត់ចត់ ស្វែងរកមូលហេតុដែលនាំឱ្យមានហេតុការណ៍នេះកើតឡើង។

May 6, 2022

កូវីដ-១៩ នៅ កម្ពុជា! រកឃើញអ្នកឆ្លងថ្មី ០១ នាក់ទៀត ក្នុងថ្ងៃទី ០៥ ឧសភា ឆ្នាំ ២០២២

អ្នកវិជ្ជមាននឹង កូវីដ-១៩ ចំនួន ០១ នាក់ ដែលទើបតែបានរកឃើញក្នុងអំឡុង ២៤ ម៉ោងនៃថ្ងៃទី ០៥ ឧសភា គឺជាករណី អូមីក្រុង និងជាករណីឆ្លងក្នុងសហគមន៍។

May 6, 2022

កម្ពុជា បើកច្រកទ្វារអន្តរជាតិអូរស្មាច់ នៅព្រំដែនថៃឡើងវិញហើយ

ច្រកទ្វារអន្តរជាតិអូរស្មាច់ ដែលស្ថិតក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ ត្រូវបានបើកដំណើរ ឡើងវិញ នៅព្រឹកថ្ងៃទី ៦ ឧសភា ២០២២ ក្រោយប្រជាពលរដ្ឋទន្ទឹងរង់ចាំអស់រយៈពេលជាយូរដោយសារកូវីដ-១។

ការសម្រេចបើកច្រកទ្វារអន្តរជាតិអូរស្មាច់នេះ ត្រូវបានធ្វើឡើងក្រោយពីជំនួបរវាងអភិបាលខេត្តឧត្តរមានជ័យ និងអភិបាលខេត្តសុរិន្ទ ប្រទេសថៃ កាលពីរសៀលថ្ងៃទី ៥ ខែឧសភា ឆ្នាំ ២០២២។

ប្រជាពលរដ្ឋធ្វើដំណើរទៅកាន់ប្រទេសថៃ ដែលកាន់លិខិតឆ្លងដែន (ប៉ាស្ព័រ) ត្រូវមានលិខិតថៃឡង់ផាស (Thailand Pass) ប័ណ្ណធានារ៉ាប់រងសុខភាព និងប័ណ្ណចាក់វ៉ាក់សាំងពេញលេញ ហើយក្នុងករណីនេះនឹងអាចដើរពេញប្រទេសថៃបាន។ ចំណែកប្រជាពលរដ្ឋដែលប្រើប័ណ្ណព្រំដែន (Border Pass) ត្រូវមានប័ណ្ណចាក់វ៉ាក់សាំងពេញលេញ ហើយអាចស្នាក់ប្រទេសថៃបានចំនួន ៣ ថ្ងៃ។

May 6, 2022

មហាសេដ្ឋី Elon Musk ចង់យកថ្លៃពីអ្នកប្រើប្រាស់ Twitter មួយចំនួន ក្នុងនោះមានរដ្ឋាភិបាលផងដែរ

មហាសេដ្ឋីអាម៉េរិក ដើមកំណើតអាហ្វ្រិកខាងត្បូង លោក Elon Musk ឱ្យដឹងថា ចង់កំណត់គោលការណ៍យកថ្លៃប្រើប្រាស់ចំពោះគណនីមួយចំនួន ក្រោយពីចូលក្ដោបក្ដាប់ Twitter ជាផ្លូវការ។

ក្នុងសារដែលបានបង្ហោះថ្មី លោក Elon Musk អះអាងថា បណ្ដាញសង្គមនេះនឹង «នៅតែមិនគិតថ្លៃចំពោះអ្នកប្រើប្រាស់ធម្មតា» ប៉ុន្តែ អាចនឹង «យកថ្លៃតិចតួចចំពោះអ្នកប្រើប្រាស់សក្នុងបំណងពាណិជ្ជកម្ម ឬរដ្ឋាភិបាល»។ ម្ចាស់ក្រុមហ៊ុន Tesla និង SpaceX មិនបាននិយាយច្បាស់ថា ចង់យកថ្លៃទៅតាមបែបចុះឈ្មោះប្រើប្រាស់ ឬតាមរយៈគណនីដែលត្រូវបង់ប្រាក់ទៅតាមអត្ថបទដើម្បីបង្ហាញខ្លួនទូលំទូលាយដូចអ្វីដែល Facebook កំពុងធ្វើ ឬយ៉ាងណានៅឡើយ។

នេះគឺជាបំណងផ្លាស់ប្ដូរដំបូងដែល Musk ចង់អនុវត្ត បន្ទាប់ពីសម្រេចបានកិច្ចព្រមព្រៀងទិញ Twitter ក្នុងតម្លៃ ៤៤ ពាន់លានដុល្លារ កាលពីសប្ដាហ៍កន្លង។ មិនត្រឹមតែអ្នកលេងរាប់លាននាក់នោះទេ សូម្បីតែក្រុមអ្នកតាក់តែងច្បាប់នៅ សហរដ្ឋអាម៉េរិក និង អឺរ៉ុប ក៏កំពុងរង់ចាំមើលសកម្មភាពផ្លាស់ប្ដូររបស់ Elon Musk ចំពោះTwitter នេះបើតាម CNN។

យោងតាមសារព័ត៌មាន Reuters មហាសេដ្ឋីរូបនេះ ថែមទាំងមានគម្រោងកាត់បន្ថយប្រាក់បៀវត្សរ៍របស់នាយកប្រតិបត្តិ និងសមាជិកក្រុមប្រឹក្សាភិបាលផងដែរ ដើម្បីបន្ថយការចំណាយ ក៏ដូចជាអភិវឌ្ឍវិធីរកប្រាក់ថ្មីពីការបង្ហោះសារនៅលើ Twitter។ តាមការគណនា ខ្ទង់ប្រាក់ដែលសំច័យបានពីការផ្លាស់ប្ដូរខាងលើ គឺប្រហែល ៣ លានដុល្លារ ខណៈដែលខ្ទង់ប្រាក់រង្វាន់យោងទៅតាមចំនួនភាគហ៊ុនរបស់ក្រុមហ៊ុន ក្នុងឆ្នាំ ២០២១ គឺ ៦៣០ លានដុល្លារ កើន ៣៣% ធៀបនឹងឆ្នាំ ២០២០។

May 6, 2022

តម្លៃភាគហ៊ុន Twitter កើនឡើងច្រើនភាគរយ ក្រោយពីផ្សារជួញដូរប្រាក់ឌីជីថលធំជាងគេ រួមចំណែកជាមួយ Elon Musk

ផ្សារជួញដូររូបិយវត្ថុឌីជីថល ធំជាងគេបង្អស់ក្នុងពិភពលោក Binance ចំណាយប្រាក់ ៥០០ លានដុល្លារអាម៉េរិក ដើម្បីរួមចំណែកជាមួយមហាសេដ្ឋី Elon Musk ក្នុងការទិញ Twitter។

ឯកសាររបស់ម្ចាស់ក្រុមហ៊ុន Tesla ដែលបានដាក់ឡើងទៅកាន់គណៈកម្មការមូលបត្រ និងផ្សារហ៊ុនអាម៉េរិក កាលពីថ្ងៃទី ៥ ឧសភាឱ្យដឹងថា ក្រុមហ៊ុន Binance ស្ថិតក្នុងចំណោមអ្នកវិនិយោគ ១៩ ភាគី ដែលរួមចំណែកក្នុងករណីទិញដូរបណ្ដាញសង្គម Twitter។ ប្រាក់សរុបដែលប្រមូលបានគឺ ៧.១ ពាន់លានដុល្លារ ក្នុងនោះ Binance គឺជាភាគីមួយក្នុងចំណោមអ្នកវិនិយោគធំៗ ដោយចំណាយរហូតដល់ ៥០០ លានដុល្លារ។

ឆ្លើយនឹងសំណួររបស់ CoinDesk តំណាងរបស់ Binance ឱ្យដឹងថា ពួកគេចូលរួមក្នុងករណីទិញដូរខាងលើ ក្នុងនាមជាអ្នកវិនិយោគ និងគាំទ្រគម្រោងនានារបស់លោក Elon Musk សម្រាប់ Twitter។ ចំណែកស្ថាបនិករបស់ Binance លោក Changpeng Zhao បានសរសេរនៅលើបណ្ដាញសង្គមថា នេះគឺជាការរួមចំណែកតិចតួចទៅក្នុងមុខជំនួញ។

បច្ចុប្បន្ន Binance គឺជាផ្សារជួញដូររូបិយវត្ថុឌីជីថល ធំជាងគេបង្អស់ក្នុងពិភពលោក។ Changpeng Zhao ដែលមានរហ័សនាមថា CZ ក៏ជាអ្នកមានជាងគេបង្អស់នៅក្នុងពិភពប្រាក់ឌីជីថលផងដែរ ដោយមានទ្រព្យប្រហែល ៦៥ ពាន់លានដុល្លារអាម៉េរិក នេះបើតាមសារព័ត៌មាន Forbes។

ក្រៅពី Binance នៅមានអ្នកវិនិយោគជាច្រើនផ្សេងទៀតចូលរួមកម្លាំងជាមួយ Elon Musk ក្នុងការទិញដូរ Twitter ក្នុងនោះមានដូចជា Larry Ellison (១ ពាន់លានដុល្លារ), Sequoia Capital (៨០០ លានដុល្លារ), VyCapital (៧០០ លានដុល្លារ)។

Elon Musk ប្រកាសថា បានសម្រេចកិច្ចព្រមព្រៀងទិញ Twitter កាលពីថ្ងៃទី ២៥ មេសា ក្នុងតម្លៃប្រហែល ៤៤ ពាន់លានដុល្លារ ហើយគ្រោងនឹងរួចរាល់នៅខែតុលា។

ក្រោយពីព័ត៌មានស្ដីពី Binance ចំណាយប្រាក់ទិញ Twitter ត្រូវបានចុះផ្សាយ តម្លៃភាគហ៊ុន Twitter ក៏បានកើន ២% ទៀត ពោលគឺឡើងដល់ ៥០.១២ ដុល្លារ/ហ៊ុន ខណៈដែលប្រាក់គ្រីបតូ (Cryptocurrency) ឬហៅថា ប្រាក់ឌីជីថល របស់ Binance គឺ Binane Coin (BNB) កើនពី ៣៩៩ ឡើងដល់ ៤១៤ ដុល្លារ/កាក់។

May 6, 2022

កូរ៉េខាងជើង សាកល្បងអាវុធប្រល័យលោក នៅក្នុងខែឧសភា! នេះជាការសង្ស័យរបស់ សហរដ្ឋអាម៉េរិក

ស្ថាប័នស៊ើបការណ៍សម្ងាត់ និងយោធាអាម៉េរិក អះអាងថា កូរ៉េខាងជើង អាចនឹងធ្វើការសាកល្បងអាវុធនុយក្លេអែរ នៅក្រោមដី នៅចុងខែឧសភា ២០២២។

ការវាយតម្លៃរបស់ស្ថាប័នចារកម្ម និងយោធាអាម៉េរិក បានឈានដល់ការសន្និដ្ឋានថា កូរ៉េខាងជើង កំពុងធ្វើសកម្មភាពត្រៀមនៅឯទីលានសាកល្បងអាវុធ Punggye-ri ហើយអាចសាកល្បងនុយក្លេអែរ នៅចុងខែឧសភា នេះបើតាមមន្ត្រី ៣ រូបរបស់ សហរដ្ឋអាម៉េរិក ដែលបានឱ្យដឹងកាលពីម្សិលមិញ។

រូបភាពពីផ្កាយរណបបង្ហាញថាមានសកម្មភាពរបស់មនុស្ស និងយានយន្តនៅលើទីលានសាកល្បង Punggye-ri ប៉ុន្តែមិនទាន់ដឹងច្បាស់ថា កូរ៉េខាងជើង បានដឹកឧបករណ៍នុយក្លេអែរ ចូលទៅក្នុងផ្លូវក្រោមដីហើយ ឬនៅ។

បើសិនជាករណីសាកល្បងនេះត្រូវបានធ្វើឡើង វានឹងជាការសាកល្បងអាវុធនុយក្លេអែរ លើកទី ៧ របស់ កូរ៉េខាងជើង និងជាករណីដំបូងក្នុងរយៈពេលជិត ៥ ឆ្នាំមកនេះ។

ទីតាំងសាកល្បងអាវុធនុយក្លេអែរ របស់ កូរ៉េខាងជើង

ភាគីកូរ៉េខាងជើង មិនទាន់មានការអធិប្បាយអ្វីនៅឡើយ ទាក់ទិននឹងការសង្ស័យរបស់ ក្រុមមន្ត្រីអាម៉េរិក។

ប្រធានាធិបតីអាម៉េរិក លោក ចូរ បៃដិន គ្រោងនឹងធ្វើទស្សនិច្ចនៅ ប្រទេសជប៉ុន និង កូរ៉េខាងត្បូង នៅចុងខែឧសភា។ នេះមិនមែនជាលើកដំបូងទេដែលព័ត៌មានស្ដីពី កូរ៉េខាងជើង ជិតសាកល្បងអាវុធនុយក្លេអែរ ត្រូវបានចុះផ្សាយនៅមុនដំណើរទស្សនិច្ចរបស់ ប្រធានាធិបតីអាម៉េរិក។ កាលពីឆ្នាំ ២០១៤ កូរ៉េខាងជើង ធ្លាប់បានត្រៀមធ្វើតេស្តនុយក្លេអែរ នៅពេលលោក អូបាម៉ា ធ្វើទស្សនកិច្ចនៅ កូរ៉េខាងត្បូង។ ឆ្នាំ ២០១៦ កូរ៉េខាងជើង ក៏ធ្លាប់បានសាកល្បងអាវុធនុយក្លេអែរ បន្ទាប់ពីលោក អូបាម៉ា និងក្រុមមេដឹកនាំពិភពលោក ចាកចេញពី ទ្វីបអាស៊ី ក្រោយកិច្ចប្រជុំកំពូលមួយ។

មេដឹកនាំរបស់ កូរ៉េខាងជើង លោក គីម ជុងអុន ធ្លាប់បាននិយាយថា មានតែកម្លាំងនៃអាវុធនុយក្លេអែរ ដ៏ខ្លាំងក្លាប៉ុណ្ណោះ ទើបអាចការពារប្រទេសជាតិពីការឈ្លានពានរបស់សត្រូវ៕

May 6, 2022

ប៉ាណាម៉ា ព្រមានអំពីជំងឺរាតត្បាតបង្កឡើងដោយវីរុស F៤០-៤១ នៅទូទាំងប្រទេស

កាលពីថ្ងៃទី ៥ ឧសភា ស្ថាប័នសុខាភិបាលរបស់ ប្រទេសប៉ាណាម៉ា ប្រកាសថា បានរកឃើញករណីរលាកថ្លើមភ្លាមៗ ប្រភេទ F៤០-៤១ ជាលើកដំបូងនៅលើកុមារតូច និងចាប់ផ្ដើមបង្កើនការយកចិត្តទុកដាក់ ព្រមទាំងព្រមានអំពីជំងឺរាតត្បាតនៅគ្រប់គ្រឹះស្ថានសុខាភិបាលទាំងអស់របស់ប្រទេសនេះ។

យោងតាមប្រភពព័ត៌មានពី តំបន់អាម៉េរិកខាងត្បូង ក្រសួងសុខាភិបាលរបស់ ប៉ាណាម៉ា ឱ្យដឹងថា ករណីនេះកើតលើកុមារអាយុ ២ ឆ្នាំម្នាក់ រស់នៅក្នុងភាគខាងកើតខេត្ត Panama។ លទ្ធផលនៃការពិនិត្យបានបង្ហាញថា កុមាររូបនេះបានរលាកថ្លើមស្រួចស្រាវប្រភេទ F៤០-៤១ ដូចទៅនឹងការព្រមានដែលអង្គការសុខភាពសហរដ្ឋអាម៉េរិក (PAHO) និងការិយាល័យតំបន់របស់ អង្គការសុខភាពពិភពលក (WHO) បានលើកឡើងមុននោះ។

PAHO បានព្រមានកាលពីខែមេសា ២០២២ ក៏ដោយសារតែកើតមានករណីរលាកថ្លើមភ្លាមៗ និងធ្ងន់ធ្ងរជាច្រើននាក់ដោយមិនដឹងមូលហេតុនៅក្នុងប្រទេសមួយចំនួន និងនៅលើក្មេង។ ចំណែក WHO វិញ ថ្មីៗនេះបានឱ្យដឹងថា បានរកឃើញករណីកើតជំងឺនេះប្រហែល ២៣០ នាក់ នៅទូទាំងសកលលោក។

ជំងឺរលាកថ្លើមនេះធ្វើឱ្យស្បែកប្រែជាពណ៌លឿង ចុះរាក ក្អួតចង្អោរ និងឈឺពោះ។ មានករណីខ្លះត្រូវវះកាត់ភ្ជាប់ថ្លើម និងមានករណីស្លាប់ចំនួន ៤ នាក់។ ភាគច្រើននៃករណីកើតជំងឺនេះគឺនៅ អឺរ៉ុប ពិសេសគឺ ប្រទេសអង់គ្លេស។

May 6, 2022

ប្រាក់ខែនៅក្រុមហ៊ុនបច្ចេកវិទ្យាខ្នាតយក្ស ៖ ធ្វើតែប៉ុន្មានឆ្នាំប៉ុណ្ណោះ នឹងក្លាយជាសេដ្ឋី

សារព័ត៌មាន Business Insider បានវិភាគទៅលើទិន្នន័យពី ការិយាល័យទទួលស្គាល់និយោជិតបរទេស របស់ សហរដ្ឋអាម៉េរិក ដើម្បីស្វែងយល់អំពីខ្ទង់ប្រាក់បៀវត្សរ៍របស់បុគ្គលិកដែលធ្វើការឱ្យបណ្ដាក្រុមហ៊ុនបច្ចេកវិទ្យាធំៗ ក្នុងមុខតំណែងវិស្វករ រចនាផលិតផល និងពាណិជ្ជកម្ម។

យោងតាមរបាយការណ៍កាលពីខែកក្កដា ២០២១ របស់ សមាគមឧស្សាហកម្មបច្ចេកវិទ្យាកុំព្យូទ័រ (CompTIA) បណ្ដាក្រុមហ៊ុនបច្ចេកវិទ្យាបានជ្រើសរើសបុគ្គលិកជាង ៨០,០០០ នាក់ នៅ សហរដ្ឋអាម៉េរិក ក្នុងពាក់កណ្ដាលដើមឆ្នាំ ២០២១។ Alphabet ដែលជាក្រុមហ៊ុនមេរបស់ Google បានជ្រើសរើសជាង ៤,០០០ នាក់ ក្នុងត្រីមាសទី ២ ឆ្នាំ ២០២១។

ប្រធានផ្នែកគ្រប់គ្រងគម្រោង, វិស្វករប្រព័ន្ធ និងអ្នកវិភាគទិន្នន័យ គឺជាមុខតំណែងដែលត្រូវបានគេផ្សាយជ្រើសរើសច្រើនជាងគេ។ ចំណែកការងារក្នុងវិស័យបច្ចេកវិទ្យាថ្មី ដូចជា បញ្ញាសិប្បនិម្មិត (AI) ជាដើម មានរហូតដល់ជាង ១/៤ ក្នុងចំណោមមុខតំណែងសរុបដែលបានផ្សាយជ្រើសរើស។

ខាងក្រោមនេះគឺជាបណ្ដាក្រុមហ៊ុនបច្ចេកវិទ្យាដែលផ្ដល់ប្រាក់បៀវត្សរ៍ខ្ពស់ជាងគេ៖

TikTok

ByteDance និងក្រុមហ៊ុនបុត្រសម្ព័ន្ធ TikTok បានផ្ដល់ប្រាក់បៀវត្សរ៍ចាប់ពី ៥៩,៧០០ ដុល្លារ ដល់ ៤៨០,០០០ ដុល្លារ ក្នុងឆ្នាំ ២០២០ និង ២០២១។ ប្រាក់បៀវត្សរ៍គោលមធ្យមប្រចាំឆ្នាំនៅ TikTok និង ByteDance គឺ ១៨៨,៥០០ ដុល្លារអាម៉េរិក។

ប្រធានផ្នែកបច្ចេកទេសជាន់ខ្ពស់ ទទួលបានប្រាក់បៀវត្សរ៍ពី ៤៤០,០០០ ដល់ ៤៨០,០០០ ដុល្លារ/ឆ្នាំ ខណៈដែលបុគ្គលិកផ្នែកគណនី គឺប្រហែល ៥៩,៧០០ ដុល្លារ/ឆ្នាំ និង HR ប្រហែល ៦៨,៤០៨ ដុល្លារ។

Google

Google វិស្វករផ្នែកទន់ ទទួលបានបៀវត្សរ៍ ៣៥៣,០០០ ដុល្លារ/ឆ្នាំ, អនុប្រធានផ្នែកបច្ចេកទេសទទួលបាន ៤៧៥,០០០ ដុល្លារ/ឆ្នាំ និងអនុប្រធានជាន់ខ្ពស់ ទទួលបាន ៦៥០,០០០ ដុល្លារ/ឆ្នាំ។

Apple

ក្រុមហ៊ុននេះយកចិត្តទុកដាក់ខ្លាំងទៅលើផ្នែកទីផ្សារ។ តំណែងផ្នែកទីផ្សារជាន់ខ្ពស់នៅ Apple ទទួលបានប្រាក់បៀវត្សរ៍ឡើងដល់ ៣២៥,០០០ ដុល្លារ/ឆ្នាំ។

Facebook

ប្រធានផ្នែកផ្សព្វផ្សាយអាចទទួលបានជាង ៣៣០,០០០ ដុល្លារ/ឆ្នាំ ចំណែកតំណែងប្រធានបច្ចេកទេស ទទួលបានប្រហែល ៣៦០,០០០ ដុល្លារ/ឆ្នាំ។ មុខតំណែងជាអ្នកវិភាគទិន្នន័យ ទទួលបានពី ១១១,០០០ ដល់ ១៥០,០០០ ដុល្លារ/ឆ្នាំ, វិស្វករផ្នែកទន់ ទទួលបានពី ១១៨,០០០ ដល់ ១៦០,០០០ ដុល្លារ/ឆ្នាំ។

Microsoft

នៅក្នុងក្រុមហ៊ុន Microsoft បណ្ដាមុខតំណែងដែលទទួលបានប្រាក់បៀវត្សរ៍ខ្ពស់ជាងគេរួមមាន វិស្វករផ្នែកទន់, ប្រធានផ្នែកលក់ និងអ្នកស្រាវជ្រាវ។ នៅទីនេះ ប្រធានផ្នែកលក់ ទទួលបាន ២៥០,០០០ ដុល្លារ/ឆ្នាំ។

Amazon

ចាប់ពីខែមករា ដល់មិថុនា ២០២១ ក្រុមហ៊ុននេះបានផ្សាយជ្រើសរើសបុគ្គលិកជាង ២០០ នាក់ សម្រាប់មុខតំណែងអភិវឌ្ឍផ្នែកទន់, វិទ្យាសាស្ត្រទិន្នន័យ, បុគ្គលិកផ្នែកជំនួញជាដើម ដែលទាំងនេះទទួលបានប្រាក់បៀវត្សរ៍ពី ៩០,៨០០ ដល់ ១៨៥,០០០ ដុល្លារ/ឆ្នាំ។

Intel

នៅទីនេះ មុខតំណែងប្រធានផ្នែកបច្ចេកទេស អាចទទួលបានប្រាក់បៀវត្សរ៍ជាង ៣០០,០០០ ដុល្លារ/ឆ្នាំ។

Snap

Snap ដែលជាក្រុមហ៊ុនមេរបស់ SnapChat ឱ្យដឹងថា នៅចុងឆ្នាំ ២០២០ និង ២០២១ ប្រាក់បៀវត្សរ៍គោលប្រចាំឆ្នាំសម្រាប់បុគ្គលិក គឺចាប់ពី ៥៩,០០០ ដល់ ៥០០,០០០ ដុល្លារ/ឆ្នាំ។

May 5, 2022

Author: សឿន សំណាង