សឿន សំណាង - La Reine Media

មហាសេដ្ឋីលេខ ១ នៅ វៀតណាម ថា ឡានអគ្គិសនី VinFast ចំនួន ៦ សែនគ្រឿង នឹងត្រូវនាំចេញទៅកាន់ សហរដ្ឋអាម៉េរិក នៅឆ្នាំ ២០២៦

ប្រធានក្រុមហ៊ុន VinGroup អះអាងថា នឹងលក់រថយន្តអគ្គិសនីចំនួន ៧៥០,០០០ គ្រឿង នៅលើទឹកដីអាម៉េរិក ក្នុងឆ្នាំ ២០២៦ ក្នុងនោះរថយន្តដែលត្រូវនាំចូលពី វៀតណាម នឹងមានរហូតដល់ ៦០០,០០០ គ្រឿង។

ក្នុងកិច្ចប្រជុំរវាងក្រុមប្រឹក្សាភិបាល និងភាគហ៊ុនិក នាព្រឹកមិញនេះ ក្រុមហ៊ុន VinGroup បានប្រកាសគម្រោងពាណិជ្ជកម្មសម្រាប់ឆ្នាំ ២០២២ ដែលក្នុងនោះ ក្រុមហ៊ុនគ្រោងនឹងរកបានប្រាក់ចំណូលជាង ៦ ពាន់លានដុល្លារអាម៉េរិក ខណៈដែលប្រាក់ចំណេញក្រោយការបង់ពន្ធរួច នឹងមានចំនួន ២៦០ លានដុល្លារអាម៉េរិក។

ឆ្នាំនេះ VinFast បានបង្ហាញរថយន្តអគ្គិសនីឆ្លាតវៃជាច្រើនម៉ូដែល ហើយបើកឱ្យបញ្ជាទិញចំពោះរថយន្ត ៣ ម៉ូដែល គឺ VF ៥, VF ៨ និង VF ។ បច្ចុប្បន្ន VinFast កំពុងប្រគល់រថយន្ត VFe៣៤ ដល់អតិថិជននៅ វៀតណាម និងត្រៀមប្រគល់ VF ៨ និង VF ៩ ឱ្យអតិថិជននៅទីផ្សារអន្តរជាតិ ចាប់ពីចុងឆ្នាំនេះ។

រោងចក្រ VinFast នៅ សហរដ្ឋអាម៉េរិក អាចផលិតរថយន្តបាន ១៥០,០០០ គ្រឿង/ឆ្នាំ ប៉ុន្តែ ប្រធានក្រុមហ៊ុន VinGroup អះអាងថា នឹងលក់រថយន្តអគ្គិសនីរហូតដល់ ៧៥០,០០០ គ្រឿង នៅលើទីផ្សារនេះនៅឆ្នាំ ២០២៦ ដូច្នេះ ក្រុមហ៊ុននេះ នឹងត្រូវនាំចូលពី វៀតណាម រហូតដល់ ៦០០,០០០ គ្រឿង។

May 11, 2022

សណ្ឋាគារអវកាសនឹងបើកទ្វារទទួលភ្ញៀវទេសរណ៍នៅឆ្នាំ ២០២៥

ក្រុមហ៊ុន Orbital Assembly នៅ Fontana រដ្ឋ California សហរដ្ឋអាម៉េរិក បានបង្ហើបឱ្យដឹងអំពីស្ថានីយអវកាសថ្មីចំនួន ២ ដែលនឹងប្រើប្រាស់ដើម្បីទទួលភ្ញៀវទេសចរណ៍អវកាស ហើយគ្រោងនឹងបើកដំណើរការចាប់ពីឆ្នាំ ២០២៥។

ក្រុមហ៊ុន Gateway Foundation បានណែនាំអំពីគំនិតសាងសង់សណ្ឋាគារអវកាសកាលពីឆ្នាំ ២០១៩។ គោលដៅរបស់ពួកគេគឺបង្កើតទីតាំងមួយដែលនៅឆ្ងាយពីផែនដី មានបន្ទប់ធ្វើការ និងបន្ទប់សម្រាប់ភ្ញៀវទេសចរណ៍។

ស្ថានីយ Pioneer អាចដាក់មនុស្សបាន ២៨ នាក់ នៅពេលបើកដំណើរការនៅឆ្នាំ ២០២៥។ ស្ថានីយមួយទៀតគឺ Voyager ដែលគ្រោងនឹងបើកទ្វារទទួលភ្ញៀវនៅឆ្នាំ ២០២៧ អាចដាក់មនុស្សបាន ៤០០ នាក់។

«គោលដៅរបស់យើងគឺការនាំមនុស្សច្រើននាក់ទៅរស់នៅ ធ្វើការ និងអភិវឌ្ឍនៅទីអវកាស» Tim Alatorre នាយកប្រតិបត្តិរបស់ Orbital Assembly ដែលជាក្រុមហ៊ុនទទួលខុសត្រូវក្នុងការសាងសង់ស្ថានីយអវកាសទាំងពីរខាងលើ ឱ្យដឹងដូច្នេះ។

ស្ថានីយអវកាសទាំង ២ ដែលមានរូបរាងដូចទៅនឹងកង់ឡាន មានទំនាញសិប្បនិម្មិត អនុញ្ញាតឱ្យមនុស្សដើរបានស្រួល។ ស្ថានីយ Pioneer តូចជាងស្ថានីយ Voyager ប៉ុន្តែនឹងមានបន្ទប់ចំនួន ៥ នៅជុំវិញកង់របស់វា។

May 11, 2022

ប្រធានាធិបតីដំបូងរបស់ អ៊ុយក្រែន បានទទួលមរណភាព

លោក Leonid Kravchuk ដែលជាប្រធានាធិបតីដំបូងរបស់ អ៊ុយក្រែន ក្រោយពីប្រទេសនេះបានផ្ដាច់ចេញពីសហភាពសូវៀត បានទទួលមរណភាពក្នុងវ័យ ៨៨ ឆ្នាំ។

«នេះគឺជាដំណឹងដ៏ក្រៀមក្រំ និងជាការបាត់បង់ដ៏ធំធេង» ជំនួយការប្រធានាធិបតីអ៊ុយក្រែន Andriy Yermak បង្ហោះសារនៅលើ Telegram ប្រកាសអំពីការលាចាកលោករបស់ អតីតប្រធានាធិបតី Leonid Kravchuk កាលពីថ្ងៃទី ១០ ឧសភា ២០២២។

ប្រធានាធិបតីអ៊ុយក្រែន វ៉ូឡូឌីមៀ ហ្សេឡែនស្គី បានហៅលោក Kravchuk ថាជាតួអង្គប្រវត្តិសាស្ត្រ និងលើកសរសើរអំពីតួនាទីរបស់លោកនៅពេលដឹកនាំប្រទេសជាតិឆ្លងកាត់ដំណាក់កាលលំបាក ក្រោយពី សូវៀត បានដួលរលំ។

លោក Kravchuk ចាប់កំណើតក្នុងឆ្នាំ ១៩៣៤ ក្នុងគ្រួសារកសិករមួយ។ លោកកាន់តំណែងប្រធានាធិបតីអ៊ុយក្រែន ចន្លោះឆ្នាំ ១៩៩១ ដល់ ១៩៩៤ និងបានយល់ព្រមប្រគល់អាវុធនុយក្លេអែររបស់ សូវៀត ដែលនៅសល់លើទឹកដី អ៊ុយក្រែន ឱ្យ រុស្ស៊ី ទៅតាមកិច្ចព្រមព្រៀងមួយដែលទទួលបានការគាំទ្រពី សហរដ្ឋអាម៉េរិក។

សុខភាពរបស់លោក Kravchuk ថ្មីៗបានប្រែជាអាក្រក់ទៅៗ ហើយលោកក៏ត្រូវឆ្លងកាត់ការវះកាត់បេះដូងម្ដងរួចហើយកាលពីឆ្នាំ ២០២១៕

May 11, 2022

ករណីជះទឹកថ្នាំលាបលើឯកអគ្គរដ្ឋទូតរុស្ស៊ី! រដ្ឋមន្ត្រីមហាផ្ទៃប៉ូឡូញ ថា អាចយល់បាននូវអារម្មណ៍របស់បាតុករ

ខណៈដែលរដ្ឋមន្ត្រីក្រសួងការបរទេសប៉ូឡូញ រិះគន់លើករណីបាតុករជះទឹកថ្នាំលាបលើឯកអគ្គរដ្ឋទូតរុស្ស៊ី Andreev រដ្ឋមន្ត្រីក្រសួងមហាផ្ទៃប៉ូឡូញ ឯណោះវិញ បែរជានិយាយថា គេអាចយល់បាននូវអារម្មណ៍របស់ក្រុមបាតុករនាពេលនោះ។

«ក្រុមអ្នកការទូតត្រូវតែទទួលបាននូវការការពារពិសេស បើទោះជាគោលនយោបាយដែលរដ្ឋាភិបាលរបស់ពួកគេកំពុងអនុវត្តបែបណាក៏ដោយ» រដ្ឋមន្ត្រីការបរទេសប៉ូឡូញ Zbigniew Rau លើកឡើងដូច្នេះ បន្ទាប់ពីមានករណីក្រុមបាតុករជះទឹកថ្នាំលាបលើ ឯកអគ្គរដ្ឋទូតរុស្ស៊ី លោក Sergei Andreev នៅ រដ្ឋធានា Warsaw កាលពីថ្ងៃទី ៩ ឧសភា។ រដ្ឋមន្ត្រីការបរទេសប៉ូឡូញ បានហៅទង្វើនេះថាជាហេតុការណ៍ «អាក្រក់ជាទីបំផុត»។

ក៏ប៉ុន្តែ អ្នកនាំពាក្យរបស់រដ្ឋាភិបាលប៉ូឡូញ លោក Lan Piotr Muller កាលពីថ្ងៃទី ១០ ឧសភា បានឱ្យដឹងថា «អាចយល់បាន» នូវការផ្ទុះកំហឹងរបស់ក្រុមបាតុករដែលបានជះទឹកថ្នាំលាបលើ ឯកអគ្គរដ្ឋទូតរុស្ស៊ី Andreev ហើយថា «មិនមានមូលហេតុណាមួយដែលគួររិះគន់ទង្វើរបស់ពួកគេឡើយ»។

រដ្ឋមន្ត្រីក្រសួងមហាផ្ទៃរបស់ ប៉ូឡូញ លោក Mariusz Kaminski ក៏បានបង្ហោះសារនៅលើ Twitter ថា «ការប្រមូលផ្ដុំរបស់ក្រុមប្រឆាំងយុទ្ធនាការយោធារបស់ រុស្ស៊ី នៅ អ៊ុយក្រែន គឺជារឿងស្របច្បាប់ទាំងស្រុង។ អារម្មណ៍របស់ក្រុម ស្ត្រីអ៊ុយក្រែន ដែលបានចូលរួមធ្វើបាតុកម្ម ជាអ្នកដែលមានស្វាមីកំពុងប្រយុទ្ធដើម្បីការពារទឹកដី គឺជាប្រការដែលងាយយល់»។

May 11, 2022

តម្លៃប្រេងសាំងដែលត្រូវអនុវត្តចាប់ពីថ្ងៃនេះ ដល់ថ្ងៃទី ២០ ខែឧសភា ឆ្នាំ ២០២២

ក្រសួងពាណិជ្ជកម្ម ថ្ងៃនេះបានចេញសេចក្ដីប្រកាសព័ត៌មានស្ដីពីតម្លៃប្រេងឥន្ធនៈថ្មី ដែលត្រូវអនុវត្តចាប់ពីថ្ងៃទី ១១ ដល់ថ្ងៃទី ២០ ខែឧសភា ឆ្នាំ ២០២២ ក្នុងនោះ សាំងមានតម្លៃ ៥,៥៥០ រៀល ក្នុង ១ លីត្រ ខណៈដែលម៉ាស៊ូតមានតម្លៃ ៥,៨០០ រៀល ក្នុង ១ លីត្រ។

ធៀបនឹងតម្លៃដែលបានអនុវត្តចាប់ពីថ្ងៃទី ០១ ដល់ថ្ងៃទី ១០ ខែ ឧសភា ឆ្នាំ ២០២២ ឃើញថា តម្លៃសាំង និងម៉ាស៊ូត ដែលនឹងត្រូវអនុវត្តចាប់ពីថ្ងៃនេះ កើន ៣០០ រៀល/លីត្រ សម្រាប់សាំងធម្មតា និងកើន ២០០ រៀល/លីត្រ សម្រាប់ប្រេងម៉ាស៊ូត។

May 11, 2022

តុលាការអាម៉េរិក កាត់ទោសជនសង្ស័យពីបទសម្លាប់ម្ដាយដើម្បីទទួលបានមរតក

ជនសង្ស័យមានអាយុ ២៨ ឆ្នាំ ត្រូវបានចោទប្រកាន់ពីបទសម្លាប់ម្ដាយខ្លួនឯង និងពន្លិចទូកដែលដឹកពួកគេនៅក្នុងពេលទៅស្ទូចត្រីកាលពីឆ្នាំ ២០១៦ ដើម្បីទទួលបានមរតក។

ក្រសួងយុត្តិធម៌អាម៉េរិក ប្រកាសថា Nathan Carman អាយុ ២៨ ឆ្នាំ មកពី Vermont ត្រូវបានចាប់ខ្លួនកាលពីថ្ងៃទី ១០ ឧសភា។ Nathan ត្រូវបានចោទប្រកាន់ពីបទសម្លាប់ម្ដាយឈ្មោះ Linda Carman នៅក្នុងដំណើរទៅស្ទូចត្រីកម្សាន្តនៅក្នុងរដ្ឋ Rhode Island ភាគឦសាននៃ សហរដ្ឋអាម៉េរិក កាលពីឆ្នាំ ២០១។

ជនសង្ស័យត្រូវបានសមត្ថកិច្ចរកឃើញនៅលើទូក បន្ទាប់ពីករណីខាងលើកើតឡើងបាន ៨ ថ្ងៃ។ សាកសពរបស់អ្នកស្រី Carman មកដល់បច្ចុប្បន្នមិនទាន់ត្រូវបានរកឃើញនៅឡើយ។ រដ្ឋអាជ្ញាបានចោទថា ជនសង្ស័យនេះបានពន្លិចទូក និងមានផែនការបោកបន្លំក្រុមហ៊ុនធនារ៉ាប់រងទូក។

ជនសង្ស័យបានបដិសេធការចោទប្រកាន់ខាងលើ ប៉ុន្តែ សាក្សីនិយាយថា Nathan បានដោះគ្រឿងមួយចំនួនរបស់ទូក ហើយយកកាវមកបិទ។

Nathan ក៏ត្រូវបានចោទថា បានបាញ់សម្លាប់ជីតារបស់ខ្លួន ឈ្មោះ John Chakalos នៅឯផ្ទះក្នុងតំបន់ Windsor រដ្ឋ Connecticut ផងដែរ។ ឯកសារចោទប្រកាន់ឱ្យដឹងថា នៅថ្ងៃទី ១១ វិច្ឆិកា ២០១៣ Nathan បានប្រើប្រាស់ប័ណ្ណបើកបរ ដើម្បីទិញកាំភ្លើង ហើយប្រើអាវុធនេះបាញ់សម្លាប់ Chakalos កាលពីថ្ងៃទី ២០ ធ្នូ ២០១៣ ក្នុងពេលជនរងគ្រោះកំពុងដេក។

ក្រោយមក ជននេះទទួលបានប្រាក់ ៥៥០,០០០ ដុល្លារ ពីគណនីជាច្រើន ហើយក៏បានទៅកាន់ Vermont ក្នុងឆ្នាំ ២០១។ ដោយសារតែគ្មានការងារធ្វើ មកដល់ឆ្នាំ ២០១៦ ជនជាប់ចោទនេះក៏អស់ប្រាក់ចាយ។ ខែកញ្ញា ២០១៦ ជននេះបានរៀបគម្រោងទៅស្ទូចត្រីកម្សាន្តជាមួយម្ដាយ។

ពាក្យបណ្ដឹងថ្មី បានចោទ Nathan ថា បានសម្លាប់សាច់ញាតិ ២ នាក់ ដើម្បីយកប្រាក់ពីអចលនទ្រព្យ និងមូលនិធិវិនិយោគរបស់លោក Chakalos និងគ្រួសារ។ Nathan នឹងត្រូវចូលតុលាការនៅ Vermont ក្នុងថ្ងៃទី ១១ ឧសភានេះ។

កូនស្រី ៣ នាក់របស់លោក Chakalos បានប្ដឹងប្រឆាំង Nathan នៅ Now Hampshire ដើម្បីរារាំងជននេះមិនឱ្យទទួលបានមរតកពីគ្រួសារ Chaklos។ ចៅក្រមបានបដិសេធបណ្ដឹងកាលពីឆ្នាំ ២០១៩ ដោយសារតែ Chakalos មិនមែនជាពលរដ្ឋរបស់ New Hampshire។ បណ្ដាំមរតកត្រូវបានបញ្ជូនទៅកាន់ Connecticut និងកំពុងរង់ចាំការដោះស្រាយ៕

May 11, 2022

កម្ពុជា មានអ្នកស្លាប់ជាង ៣ ពាន់នាក់ ដោយសារជំងឺកូវីដ-១៩ គិតមកដល់ថ្ងៃទី ១១ ខែឧសភា ២០២២

ក្នុងអំឡុង ២៤ ម៉ោង នៃថ្ងៃទី ១០ ខែឧសភា ២០២២ កម្ពុជា មិនមានអ្នកវិជ្ជមាន អ្នកជាសះស្បើយ ឬអ្នកស្លាប់ដោយសារ កូវីដ-១៩ ឡើយ!

ស្ថានភាពជំងឺកូវីដ-១៩ នៅ កម្ពុជា គិតត្រឹមព្រឹក ថ្ងៃទី ១១ ខែឧសភា ឆ្នាំ ២០២២ រួមមាន៖
– អ្នកឆ្លងសរុប= ១៣៦,២៦២ នាក់
– អ្នកជាសះស្បើយ= ១៣៣,១៨៤ នាក់
– អ្នកស្លាប់= ៣,០៥៦ នាក់

May 11, 2022

សមត្ថកិច្ចឃាត់ខ្លួនជនសង្ស័យម្នាក់ ក្នុងករណី «សម្លាប់មុន រំលោភក្រោយ»

(សៀមរាប)-សមត្ថកិច្ចខេត្តសៀមរាប នាថ្ងៃទី ១១ ខែឧសភានេះ បានបញ្ជូនបុរសម្នាក់ទៅកាន់តុលាការ ដោយជាប់សង្ស័យថា ពាក់ព័ន្ធករណីសម្លាប់ហើយរំលោភ។

ជនសង្ស័យឈ្មោះ អុក វឿ ភេទប្រុស អាយុ ៣១ ឆ្នាំ រស់នៅភូមិរវៀង ឃុំស្រណាល ស្រុកក្រឡាញ់ ខេត្តសៀមរាប ត្រូវកម្លាំងការិយាល័យនគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលស្រុកក្រឡាញ់ នៃស្នងការដ្ឋាននគរបាលខេត្តសៀមរាប ចាប់ឃាត់ខ្លួន កាលពីថ្ងៃទី ៩ ខែឧសភា ឆ្នាំ ២០២២ ដោយយោងតាមពាក្យបណ្ដឹងរបស់ឈ្មោះ ខ្វាវ លំ ភេទស្រី អាយុ ៦៨ ឆ្នាំ ត្រូវជាជីដូនរបស់សពនារីរងគ្រោះ ដែលមានទីលំនៅភូមិរវៀង ឃុំស្រណាល ស្រុកក្រឡាញ់ ខេត្តសៀមរាប។

ដើមបណ្ដឹងបានឱ្យដឹងថា នៅថ្ងៃទី ៨ ខែឧសភា ឆ្នាំ ២០២២ វេលាម៉ោងប្រហែល ២១ កន្លះ ចៅស្រីរបស់គាត់ឈ្មោះ ផុន ឃីម ភេទស្រី អាយុ ១៣ ឆ្នាំ បានចេញទៅឆ្លុះកង្កែបតែម្នាក់ឯងនៅក្នុងភូមិ បានប្រហែលមួយសន្ទុះគាត់ក៏ឃើញចៅស្រីរបស់គាត់បានយកកង្កែបមកទុកនៅផ្ទះ។

លោកយាយរបស់ក្មេងស្រីរងគ្រោះរៀបរាប់ថា នៅយប់ថ្ងៃទី ៨ ខែឧសភា ឆ្នាំ ២០២២ វេលាម៉ោងប្រហែល ២១ កន្លះ ចៅស្រីរបស់គាត់បានទៅឆ្លុះរកកង្កែប រហូតដល់ម៉ោង ៣ ទៀបភ្លឺ ទើបគាត់ដឹងថា ចៅស្រីមិនទាន់ត្រលប់មកផ្ទះ ពេលនោះគាត់ក៏ស្រែកហៅឱ្យអ្នកជិតខាងជួយតាមរក។ ដល់ម៉ោង ៥ ភ្លឺ ទើបរកឃើញចៅស្រីរបស់គាត់ ដេកស្លាប់នៅលើវាលស្រែ។

លោកយាយរបស់ក្មេងស្រីរងគ្រោះបញ្ជាក់ថា បុរសឈ្មោះ វឿ គឺជាអ្នកដែលបានប្រាប់ចៅស្រីរបស់គាត់ថា នៅខាងលិចភូមិមានកង្កែបច្រើនណាស់ នេះបើតាមទំព័រ អគ្គស្នងការដ្ឋាននគរបាលជាតិ។

ក្រោយពីត្រូវបានចាប់ឃាត់ខ្លួន ជនសង្ស័យឈ្មោះ អុក វឿ ភេទប្រុស អាយុ ៣១ ឆ្នាំ រស់នៅភូមិ ឃុំកើតហេតុខាងលើ បានសារភាពថា ខ្លួនពិតជាបានចាប់ក្មេងស្រីរងគ្រោះជ្រមុជទឹកឱ្យស្លាប់ មុននឹងយកសាកសពទៅរំលោភ ហើយក៏បោះសាកសពទៅក្នុងទឹក៕

May 11, 2022

ឧទ្ធម្ភាគចក្ររបស់ ចិន ឆ្លងផុតបន្ទាត់ខណ្ឌចែកច្រកសមុទ្រ តៃវ៉ាន់ ជាលើកដំបូង

ឧទ្ធម្ភាគចក្រវាយប្រហារ Z-១០ របស់ ចិនដីគោក បានហោះឆ្លងផុតបន្ទាត់ខណ្ឌចែកដែនទឹកនៅច្រកសមុទ្ររបស់ កោះតៃវ៉ាន់ ប៉ុន្តែមិនទាន់ដឹងច្បាស់អំពីបេសកកម្មនេះនៅឡើយ។

កងកម្លាំងការពារជាតិរបស់ តៃវ៉ាន់ ឱ្យដឹងថា ឧទ្ធម្ភាគចក្រ Z-១០ របស់ កងទ័ពចិន ហោះចូលក្នុងតំបន់កំណត់អត្តសញ្ញាណការពារដែនអាកាស (ADIZ) នៅជុំវិញ កោះតៃវ៉ាន់ កាលពីម្សិលមិញ។ ឧទ្ធម្ភាគចក្រនេះក៏បានហោះឆ្លងផុតបន្ទាត់ព្រំដែនដែលត្រូវបានគេយល់ថាជាបន្ទាត់ខណ្ឌចែកនៅលើ ច្រកសមុទ្រតៃវ៉ាន់។

អង្គភាពឧទ្ធម្ភាគចក្រប្រមាញ់នាវាមុជទឹក Ka-២៨ របស់ កងទ័ពជើងទឹកចិន ក៏ធ្វើសកម្មភាពនៅតំបន់ភាគនិរតី ADIZ របស់ តៃវ៉ាន់ ផងដែរ។ គេមិនទាន់ដឹងថា ឧទ្ធម្ភាគចក្រ Z-១០ មានជាប់ទាក់ទងនឹងសកម្មភាពរបស់អង្គភាព Ka-២៨ ឬយ៉ាងណានៅឡើយ។

ក្រសួងការពារជាតិរបស់ ប្រទេសចិន មិនទាន់មានប្រតិកម្មឆ្លើយតបនៅឡើយចំពោះការលើកឡើងខាងលើរបស់ តៃវ៉ាន់។

យន្តហោះយោធាចិន កម្រនឹងហោះឆ្លងកាត់បន្ទាត់កណ្ដាលនៅលើច្រកសមុទ្រតៃវ៉ាន់។ អង្គភាពយន្តហោះចម្បាំង J-១០, J-១១ និង J-១៦ របស់ចិន កាលពីថ្ងៃទី ១៩ កញ្ញា ២០២០ ធ្លាប់បានហោះឆ្លងកាត់បន្ទាត់កណ្ដាលនេះ នៅក្នុងថ្ងៃដែល អនុរដ្ឋមន្ត្រីការបរទេសអាម៉េរិក Keith Krach មកធ្វើទស្សនកិច្ច កោះតៃវ៉ាន់។ ក៏ប៉ុន្តែ លើកនេះគឺជាករណីដំបូងដែលឧទ្ធម្ភាគចក្រ Z-១០ របស់ចិន មានសកម្មភាពដូច្នេះ។

ទីក្រុងប៉េកាំង បានរិះគន់ច្រើនដងដល់សកម្មភាពដូចខាងលើរបស់ នាវាចម្បាំងអាម៉េរិក ហើយបានហៅសកម្មភាពនេះថាជា «ការបង្កហេតុ និងបញ្ជូនសារខុសឆ្គងដល់ក្រុមផ្ដាច់ខ្លួននៅ តៃវ៉ាន់ ក្នុងបំណងបំផ្លាញសន្តិភាព និងសន្តិសុខក្នុងតំបន់»។

ចិនដីគោក ចាត់ទុក កោះតៃវ៉ាន់ គឺជាខេត្តមួយរបស់ខ្លួន ដែលកំពុងរង់ចាំតែការបង្រួបបង្រួមប៉ុណ្ណោះ ហើយថានឹងប្រើកម្លាំងបាយរឹបអូសយកមកវិញ បើសិនជាចាំបាច់៕

May 11, 2022

អតីតប្រធានាធិបតីរបស់ កូរ៉េខាងត្បូង ត្រលប់ទៅធ្វើចំការនៅឯស្រុកកំណើត

លោក Moon Jae-in និងភរិយា បានត្រលប់ទៅស្រុកកំណើតនៅឯ Yangsan ដើម្បីរស់នៅក្នុងជីវភាពថ្មីក្រោយចប់អាណត្តិប្រធានាធិបតី។

លោក Moon Jae-in អតីតប្រធានាធិបតីកូរ៉េខាងត្បូង និងលោកស្រី Kim Jung-sook បានត្រលប់ទៅដល់ផ្ទះនៅក្នុងទីក្រុង Yangsan ភាគខាងកើតនៃ ប្រទេសកូរ៉េខាងត្បូង កាលពីម្សិលមិញ បន្ទាប់ពីបានចូលរួមពិធីស្បថចូលកាន់តំណែងប្រធានាធិបតីរបស់លោក Yoon Suk-yeol។

«នៅពេលត្រលប់ទៅផ្ទះ ខ្ញុំមានអារម្មណ៍ថាធូរស្បើយ ព្រោះថា ចុងក្រោយក៏បានសម្រេចគ្រប់យ៉ាងប្រកបដោយសុវត្ថិភាព» លោក Moon Jae-in និយាយដូច្នេះនៅពេលត្រលប់ទៅស្រុកកំណើត។

លោក Moon Jae-in ឱ្យដឹងថា នឹងរស់នៅក្នុងជីវភាពមួយក្នុងនាមជាកសិករ ធ្វើការងារកសិកម្ម និងក្រេបរសជាតិ makgeolli ដែលជាស្រាបិតពីអង្ករមួយប្រភេទរបស់ កូរ៉េខាងត្បូង ជាមួយកសិករនៅក្នុងតំបន់។

លោក Moon Jae-in និងភរិយា បានឡើងរថភ្លើងល្បឿនលឿន KTX នៅ សេអ៊ូល កាលពីព្រឹកម្សិលមិញ ដើម្បីត្រលប់ទៅស្រុកកំណើតដែលមានចម្ងាយពីសេអ៊ូល ៤២០ គីឡូម៉ែត្រ ជាមួយនឹងអតីតជំនួយការ និងតំណាងរាស្ត្រមួយចំនួនរបស់បក្សប្រជាធិបតេយ្យ។

អ្នកគាំទ្រប្រហែល ១,០០០ នាក់ បានប្រមូលផ្ដុំគ្នានៅចំណាតរថភ្លើងសេអ៊ូល ដើម្បីជូនដំណើរអតីតប្រធានាធិបតី ក្នុងនោះគេឃើញមានអ្នកគាំទ្រខ្លះលើកបដាដែលសរសេរថា «លោកនៅតែជាកំពូលតារារបស់ខ្ញុំ» ឬ «ខ្ញុំគោរពស្រលាញ់ Moon Jae-in»។

May 11, 2022

Author: សឿន សំណាង