សឿន សំណាង - La Reine Media

Elon Musk ចង់ប្រែក្រឡាស់រឿងទិញដូរបណ្ដាញសង្គម Twitter

មហាសេដ្ឋី Elon Musk កំពុងពិចារណារកវិធីដើម្បីទិញបណ្ដាញសង្គម Twitter ក្នុងតម្លៃទាបជាង ៤៤ ពាន់លានដុល្លារអាម៉េរិក។

យោងតាមសារព័ត៌មាន New York Times នៅក្នុងសិក្ខាសាលា All-In Summit កាលពីម្សិលមិញ លោក Elon Musk ត្រូវបានសួរអំពីលទ្ធភាពនៃការចរចាលើការទិញដូរបណ្ដាញសង្គម Twitter។ មហាសេដ្ឋីរូបនេះឆ្លើយថា ការទិញ Twitter ក្នុងតម្លៃទាបជាង ៤៤ ពាន់លានដុល្លារគឺជារឿងដែល «មិនទាន់អាចរំលងចោលបានឡើយ»។

មហាសេដ្ឋីអាម៉េរិកដើមកំណើតអាហ្វ្រិកខាងត្បូង រូបនេះ និងបណ្ដាញសង្គម Twitter មិនទាន់មានប្រតិកម្មអ្វីទៅនឹងការចុះផ្សាយព័ត៌មានខាងលើរបស់ New York Time នៅឡើយ។

ក្រុមអ្នកវិភាគយល់ថា លោក Musk ទំនងជាកំពុងតែរកវិធីដើម្បីដកខ្លួនចេញពីកិច្ចព្រមព្រៀង ឬលើកឡើងនូវតម្លៃទាបជាងបច្ចុប្បន្ន ពិសេសគឺនៅពេលតម្លៃភាគហ៊ុនដែលទាក់ទងបានធ្លាក់ចុះទាបចាប់តាំងពីករណីទិញដូរនេះត្រូវបានប្រកាសជាសាធារណៈ។

កាលពីថ្ងៃទី ២៥ មេសា Twitter ប្រកាសថា បានយល់ព្រមតាមសំណើសុំទិញបណ្ដាញសង្គមនេះរបស់នាយកប្រតិបត្តិនៃក្រុមហ៊ុនផលិតរថយន្តអគ្គិសនី Tesla ក្នុងតម្លៃ ៥៤.២០ ដុល្លារ/ហ៊ុន ដូច្នេះ Twitter មានតម្លៃ ៤៤ ពាន់លានដុល្លារអាម៉េរិក។

May 17, 2022

(វីដេអូ)-ចិន ស្ថាបនាផ្លូវល្បឿនលឿនប្រវែងជាង ១៥០ គីឡូម៉ែត្រ ឆ្លងកាត់សមុទ្រខ្សាច់

អាជ្ញាធរចិន កំពុងតែស្ថាបនាផ្លូវល្បឿនលឿន (highway) ថ្មី នៅកណ្ដាល Taklimakan ដែលជាសមុទ្រខ្សាច់ធំជាងគេ និងពោរពេញដោយឧបសគ្គ ដូចជាព្យុះខ្សាច់ និងសីតុណ្ហភាពក្ដៅខ្លាំង ឬត្រជាក់ខ្លាំងជាដើម របស់ប្រទេសនេះ។

សមុទ្រខ្សាច់ Taklimakan ស្ថិតនៅភាគពាយព្យនៃតំបន់ស្វយ័ត Xinjiang។ ផ្លូវនេះនឹងមានប្រវែង ១៥១,៧៦៤ គីឡូម៉ែត្រ ភ្ជាប់ទីរួមស្រុក Tazhong នៅកណ្ដាលសមុទ្រខ្សាច់ជាមួយនឹងផ្លូវជាតិ G៣១៥ នៅភាគខាងត្បូង។ ផ្លូវថ្មីនេះនឹងក្លាយជាកំណាត់ផ្លូវមួយខ្សែរបស់ផ្លូវល្បឿនលឿនឆ្លងកាត់សមុទ្រខ្សាច់ Junmin។

មានប្រវែង ១,០០០ គូឡូម៉ែត្រ និងទទឹង ៤០០ គីឡូម៉ែត្រ Taklimakan គឺជាសមុទ្រខ្សាច់ផ្លាស់ទីធំជាងគេលំដាប់ទី ២ ក្នុងពិភពលោក ដោយមានផ្ទៃដី ៨៥% គឺជាផ្នូរខ្សាច់។

ការស្ថាបនាផ្លូវលើសមុទ្រខ្សាច់គឺជារឿងលំបាកខ្លាំងដោយសារតែមានឧបសគ្គច្រើន។ បញ្ហាសីតុណ្ហភាពក្ដៅ និងត្រជាក់ខុសគ្នាឆ្ងាយ ធ្វើឱ្យការស្ថាបនាកាន់តែមានភាពស្មុគស្មាញ។ នៅរដូវក្ដៅ សីតុណ្ហភាពរបស់ Taklimakan កន្លែងខ្លះឡើងដល់ ៧០ អង្សាសេ។

ឧបសគ្គធំជាងគេបច្ចុប្បន្នគឺព្យុះខ្សាច់ដែលមានកម្លាំងខ្យល់ខ្លាំង ពិសេសនៅក្នុងខែមេសា ឧសភា នេះបើតាម Li Panfeng ប្រធានក្រុមវិស្វកររបស់គម្រោងនេះ។

គម្រោងនេះបានចាប់ផ្ដើមស្ថាបនាតាំងពីថ្ងៃទី ២៦ កុម្ភៈ ២០២២ ហើយគ្រោងនឹងរួចរាល់នៅក្នុងខែតុលា ២០២៣។

May 17, 2022

ប៉ុន្មានខែមុនគឺជាអ្នកមានលំដាប់ទីមួយប្រចាំប្រទេស ប៉ុន្តែពេលនេះបាត់បង់ទ្រព្យអស់ ៨០% ដោយសារភាគហ៊ុនធ្លាក់ថ្លៃ

កាលពីប៉ុន្មានខែមុននេះ Forrest Li ដែលជាសហស្ថាបនិករបស់ក្រុមហ៊ុន Sea មានទ្រព្យប្រមាណ ២២ ពាន់លានដុល្លារអាម៉េរិក និងជាអ្នកមានជាងគេបង្អស់ប្រចាំប្រទេសសិង្ហបុរី ក៏ប៉ុន្តែបច្ចុប្បន្ន ទ្រព្យសម្បត្តិរបស់បុរសនេះនៅសល់តែ ៥ ពាន់លានដុល្លារប៉ុណ្ណោះ។

Forrest Li គឺជាអ្នកមានមួយរូបក្នុងចំណោមអ្នកដែលបានបាត់បង់ទ្រព្យច្រើនជាងគេនៅក្នុង «រលកនៃការលក់ភាគហ៊ុនចោល» នាពេលថ្មីៗនេះ បណ្ដាលឱ្យអ្នកមានជាងគេទាំង ៥០០ នាក់របស់ពិភពលោក បាត់បង់ទ្រព្យសម្បត្តិអស់ជាង ១ ទ្រីលាន (១ លានលាន/១,០០០,០០០,០០០,០០០) ដុល្លារអាម៉េរិក នៅក្នុងឆ្នាំនេះ។

លោក Forrest Li ឆ្នាំនេះបានជួបរឿងមិនល្អជាច្រើន ក្នុងនោះមានដូចជា ភាគហ៊ុនត្រូវគេលក់ជាបន្តបន្ទាប់ ផ្នែកពាណិជ្ជកម្មអេឡិត្រូនិកនៅ ឥណ្ឌា ត្រូវបិទទ្វារ និងរបាយការណ៍ស្ដីពីប្រាក់ចំណេញទាប ធ្វើឱ្យតម្លៃភាគហ៊ុននៅ សហរដ្ឋអាម៉េរិក របស់ក្រុមហ៊ុនលោក ធ្លាក់ចុះជាង ៨០% ធៀបនឹងកម្រិតកំពូលកាលពីខែតុលា ២០២១។

បញ្ហាទាំងឡាយខាងលើនេះ បានធ្វើឱ្យទ្រព្យសម្បត្តិរបស់ Forrest Li ថយចុះយ៉ាងគំហុក។ បច្ចុប្បន្ន លោក Forrest Li នៅតែជាមហាសេដ្ឋី ដោយមានទ្រព្យ ៤.៧ ពាន់លានដុល្លារ នេះបើតាម Bloomberg Billionaires Index។ ប៉ុន្តែ តួលេខនេះមិនអាចជួយឱ្យលោករក្សាវត្តមានរបស់ខ្លួននៅក្នុងក្រុមអ្នកមានជាងគេទាំង ៥០០ នាក់ របស់ពិភពលោកទៀតបានឡើយ។

អគារនៃក្រុមហ៊ុន Shopee ដែលជាក្រុមហ៊ុនបុត្រសម្ព័ន្ធរបស់ Sea Ltd

ថ្ងៃនេះ ក្រុមហ៊ុន Sea នឹងប្រកាសរបាយការណ៍ហិរញ្ញវត្ថុសម្រាប់ត្រីមាសទី។ ក្រុមហ៊ុននេះត្រូវបានគេព្យាករថា នឹងខាតជាង ៧៥០ លានដុល្លារអាម៉េរិក។ ខ្ទង់ប្រាក់ខាតបង់របស់ Sea បានកើនឡើងចាប់តាំងពីត្រីមាសចុងក្រោយនៃឆ្នាំកន្លង ដោយសារពួកគេបង្កើនល្បឿននៃការពង្រីកពាណិជ្ជកម្ម។

ភាគហ៊ុនរបស់ Sea ពេលនេះកំពុងមានការប្រែប្រួលខ្លាំង។ ក្រោយពីកើន ៣២% ក្នុងការជួញដូររយៈពេល ២ ថ្ងៃនៅចុងសប្ដាហ៍កន្លង តម្លៃរបស់វាបែរជាធ្លាក់ចុះ ៦.៧% នៅក្នុងថ្ងៃដើមសប្ដាហ៍នេះ។ Gang Ye ដែលជាសហស្ថាបនិកម្នាក់របស់ Sea ក៏បានបាត់បង់ទ្រព្យអស់ ៤.៣ ពាន់លានដុល្លារអាម៉េរិកក្នុងឆ្នាំនេះ។ ចំណែក សហស្ថាបនិក David Chen ក៏បានធ្លាក់ពីចំណាត់ថ្នាក់មហាសេដ្ឋី ចុះមកនៅជាសេដ្ឋីវិញម្ដង៕

May 17, 2022

ស្ថានភាពជំងឺកូវីដ-១៩ នៅ កម្ពុជា សម្រាប់ថ្ងៃទី ១៧ ខែឧសភា ២០២២

ក្នុងអំឡុង ២៤ ម៉ោង នៃថ្ងៃទី ១៦ ខែឧសភា ២០២២ កម្ពុជា មិនមានអ្នកជាសះស្បើយ អ្នកវិជ្ជមាន ឬអ្នកស្លាប់ ដោយសារកូវីដ-១៩ នោះទេ។

May 17, 2022

រាជរដ្ឋាភិបាលកម្ពុជា មិនគិតលុយពីពលរដ្ឋដាច់ខាត ចំពោះការចាក់វ៉ាក់សាំងបង្ការជំងឺកូវីដ-១៩

(ភ្នំពេញ)-ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបញ្ជាក់ថា ទោះបីជាត្រូវចាក់វ៉ាក់សាំងបង្ការជំងឺកូវីដ-១៩ ដល់ប្រជាពលរដ្ឋ រហូតដល់ដូសទី ១០ ក៏ដោយ ក៏រដ្ឋាភិបាលនៅតែមិនយកប្រាក់ពីប្រជាពលរដ្ឋជាដាច់ខាត។

ប្រសាសន៍របស់ សម្ដេច តេជោ ត្រូវបានលើកឡើងនៅក្នុងឱកាសជួបសំណេះសំណាលជាមួយក្រុមគ្រូពេទ្យស្ម័គ្រចិត្តយុវជនសម្ដេចតេជោ (TYDA) នៅថ្ងៃទី ១៧ ឧសភានេះ។ ប្រមុខរាជរដ្ឋាភិបាល ថ្លែងថា កម្ពុជា ប្រហែលជាមិនទទួលបានជោគជ័យនោះឡើយ បើសិនជាការអនុវត្តការចាក់វ៉ាក់សាំងទៅតាមប្រទេសមួយចំនួន។

គិតមកដល់បច្ចុប្បន្ន កម្ពុជា ទទួលបានវ៉ាក់សាំងកូវីដ-១៩ សរុបប្រមាណ ៥២ លានដូសរួចហើយ ក្នុងនោះវ៉ាក់សាំងដែលទិញដោយខ្លួនឯងមានជាង ២៨ លានដូស។ ពេលនេះ កម្ពុជា មានវ៉ាក់សាំងក្នុងដៃប្រមាណ ៩ លានដូសទៀត សម្រាប់បន្តចាក់ជូនពលរដ្ឋ និងកំពុងរង់ចាំវ៉ាក់សាំងដែល កម្ពុជា បានបញ្ជាទិញ ក៏ដូចជាវ៉ាក់សាំងដែលជាជំនួយពីបរទេស។

May 17, 2022

ប្រធានាធិបតីរុស្ស៊ី «បើកភ្លើងខៀវ» ចំពោះបញ្ហា ប្រទេសហ្វាំងឡង់ និង ស៊ុយអែត ចង់ចូលជាសមាជិករបស់ ណាតូ

រុស្ស៊ី បានព្រមានថា នឹងមានប្រតិកម្មឆ្លើយតប បើសិន ណាតូ (NATO) ដាក់ពង្រាយសព្វាវុធលើទឹកដីរបស់ ហ្វាំងឡង់ និង ស៊ុយអែត ក្រោយពីប្រទេសទាំងនេះបានចូលជាសមាជិកនៃសម្ព័ន្ធយោធានេះជាផ្លូវការ។

ការផ្ដល់សញ្ញាទទួលយក ក៏ដូចជាការព្រមានរបស់ ប្រធានាធិបតីរុស្ស៊ី លោក វ្ល៉ាឌីមៀ ពូទីន ខាងលើ ត្រូវបានលើកឡើងនៅក្នុងកិច្ចប្រជុំកំពូលរបស់ អង្គការសន្ធិសញ្ញាសន្តិសុខសមូហភាព (CSTO) ដែលដឹកនាំដោយ រុស្ស៊ី កាលពីថ្ងៃទី ១៦ ឧសភា។ លោក ពូទីន ថា សំណើសុំចូលជាសមាជិកណាតូ របស់ ស៊ុយអែត និង ហ្វាំងឡង់ មិន «គំរាមកំហែងផ្ទាល់ដល់ រុស្ស៊ី» ឡើយ។ លោកអះអាងថា ទីក្រុងមូស្គូ មិនមានបញ្ហាអ្វីជាមួយ ហ្វាំងឡង់ និង ស៊ុយអែត នោះទេ។

មេដឹកនាំរបស់ រុស្ស៊ី សង្កត់ធ្ងន់ថា «សកម្មភាពពង្រីកហេដ្ឋារចនាសម្ព័ន្ធយោធាណាមួយនៅលើទឹកដីរបស់ប្រទេសទាំងពីរនេះ ប្រាកដណាស់ថា នឹងបញ្ឆេះប្រតិកម្មពី រុស្ស៊ី មិនខាន» ហើយ «ប្រតិកម្មកម្រិតណានោះ វាអាស្រ័យលើស្ថានភាពនៃការគំរាមកំហែងដែលពួកគេបង្កើតឡើងចំពោះ រុស្ស៊ី»។

សម្ដីរបស់ លោក ពូទីន ហាក់បង្ហាញថា រុស្ស៊ី អាចរួមរស់ជាមួយនឹងស្ថានភាពដែល ហ្វាំងឡង់ និង ស៊ុយអែត ក្លាយជាសមាជិកនៃអង្គការសន្ធិសញ្ញាអាត្លង់ទិកខាងជើង (NATO) ក្នុងលក្ខខណ្ឌដែល ណាតូ មិនដាក់ពង្រាយសព្វាវុធនៅប្រទេសទាំងនេះ ហើយនេះក៏ជាវិធីដែល ណាតូ បានធ្វើចំពោះសមាជិកមួយចំនួននៅតំបន់ Baltic និង អឺរ៉ុបខាងកើត មុនពេលផ្ទុះសង្គ្រាមរវាង រុស្ស៊ី និង អ៊ុយក្រែន។

May 17, 2022

ប្រទេសស្រីលង្កា អស់សាំងពីឃ្លាំង! ប្រជាជនតម្រៀបជួរ ៨ ម៉ោង ដើម្បីរង់ចាំទិញឥន្ធនៈ

កាលពីថ្ងៃទី ១៦ ឧសភា មនុស្សរាប់រយនាក់បានឈរតម្រៀបជួរនៅខាងក្រៅស្ថានីយប្រេងសាំងនានានៅ ស្រីលង្កា រង់ចាំពី ៧ ទៅ ៨ ម៉ោង ដើម្បីបានចាក់ឥន្ធនៈ ប៉ុន្តែ ភាគច្រើនបានត្រលប់ទៅផ្ទះដោយ «ដៃទទេ»។

ទីភ្នាក់ងារសារព័ត៌មានរបស់ រុស្ស៊ី Sputnik បានរាយការណ៍ថា នាយករដ្ឋមន្ត្រីថ្មីរបស់ ប្រទេសស្រីលង្កា គឺលោក Ranil Wickremesinghe បានប្រាប់អ្នកយកព័ត៌មានថា ប្រទេសនេះអស់សាំងកាលពីថ្ងៃទី ១៦ ឧសភា។

ក៏ប៉ុន្តែ មេដឹកនាំដែលទើបត្រូវបានជ្រើសតាំងកាលពីសប្ដាហ៍កន្លង បានសន្យាថា នឹងបកស្រាយពេញលេញនាពេលខាងមុខ ស្ដីពីវិបត្តិហិរញ្ញវត្ថុដែលកំពុងកើតឡើងនៅ ប្រទេសស្រីលង្កា។

«បច្ចុប្បន្ន សេដ្ឋកិច្ចរបស់ ស្រីលង្កា ពិតជាដុនដាបខ្លាំងណាស់» អ្នកនយោបាយវ័យ ៧៣ ឆ្នាំខាងលើ បានថ្លែងដូច្នេះ។ កាលពីថ្ងៃទី ១៦ ឧសភា អ្នកលេងបណ្ដាញសង្គមក្នុងប្រទេសនេះ បានចែករំលែកតៗគ្នាអំពីវីដេអូដែលស្ដែងពីទិដ្ឋភាពយានយន្តតម្រៀបជាជួរយ៉ាងវែង និងអស់រយៈពេលយ៉ាងយូរ ដើម្បីរង់ចាំចាក់សាំង នៅតាមទីតាំងស្ថានីយប្រេងសាំងនានារបស់ ស្រីលង្កា។

នាយករដ្ឋមន្ត្រីវិញ ក៏បានប្រកាសថា ប្រទេសនេះកំពុងខ្វះថ្នាំពេទ្យសំខាន់ៗ ១៤ មុខ ហើយថា បញ្ហាអតិផរណាអាចកើនឡើងខ្ពស់ក្នុងរយៈពេលខ្លី។ លោកបានឱ្យដឹងថា បញ្ហាដាច់ភ្លើងប្រចាំថ្ងៃអាចកើនដល់ ១៥ ម៉ោង/ថ្ងៃ។

ស្ថាប័នពាក់ព័ន្ធរបស់ ប្រទេសស្រីលង្កា បានអំពាវនាវឱ្យពលរដ្ឋអត់ធ្មត់ ហើយមិនចេញមកតម្រៀបជួរចាំចាក់សាំង និងមិនត្រូវទិញសាំងទុកក្នុងរយៈពេល ៣ ថ្ងៃ រហូតដល់ប្រេងសាំងត្រូវបានចែកចាយនៅតាមស្ថានីយប្រេងនានា។

មុននោះ អតីតនាយករដ្ឋមន្ត្រី Mahinda Rajapaksa បានចុះចេញពីតំណែងដោយមានសម្ពាធពីក្រុមបាតុករ។ អំពើហិង្សារវាងក្រុមអ្នកគាំទ្ររដ្ឋាភិបាល និងក្រុមបាតុករ បានធ្វើឱ្យមានមនុស្សស្លាប់ ៩ នាក់ និងរបួសជាង ៣០០ នាក់ កាលពីសប្ដាហ៍កន្លង។

May 17, 2022

របកគំហើញថ្មី! កោសិកាដែលបានឆ្លងជំងឺ កូវីដ-១៩ អាចត្រូវ «ផ្ទុះ»

ក្រុមអ្នកវិទ្យាសាស្ត្របានរកឃើញថា កោសិកាមួយចំនួនដែលមានផ្ទុកវីរុស SARS-CoV-២ បង្កជំងឺកូវីដ-១៩ ទំនងជាបាន «ផ្ទុះ»។ របកគំហើញនេះអាចជួយឱ្យអ្នកវិទ្យាសាស្ត្របង្កើតបាននូវវិធីសាស្ត្រព្យាបាលថ្មីប្រកបដោយប្រសិទ្ធភាពជាងបច្ចុប្បន្ន។

ប្រតិកម្ម «ផ្ទុះ» នៅលើកោសិកាងាប់ដែលមានឈ្មោះថា pyroptosis ត្រូវបានគេជឿថា ជាប់ទាក់ទងនឹងអាការរលាក និងកើតឡើងលើអ្នកជំងឺប្រហែល ៨ ករណី ក្នុងចំណោម ១០ ករណីដែលបានចូលពេទ្យព្យាបាលជំងឺកូវីដ-១៩។ បាតុភូតនេះអាចបកស្រាយអំពីវិធីដែលវីរុស SARS-CoV-២ បង្កឱ្យមានរបួសធ្ងន់ធ្ងរនៅលើសួត និងអវយវៈដទៃ។

ក្រុមអ្នកស្រាវជ្រាវរបស់ អង់គ្លេស រកឃើញថា នៅពេលប្រព័ន្ធការពាររាងកាយព្យាយាមកម្ចាត់វីរុស វាអាចបញ្ចេញម៉ូលេគុលដ៏គ្រោះថ្នាក់មួយប្រភេទទៅក្នុងឈាម បង្កជាបញ្ហារលាកត្រង់អវយវៈដែលងាយរងគ្រោះរបស់រាងកាយមនុស្ស។

បាតុភូតមួយដែលប្រហាក់ប្រហែលនឹងបាតុភូតដែលទើបត្រូវបានរកឃើញនេះ ត្រូវបានគេហៅថា «ព្យុះ cytokine» (កើតឡើងនៅពេលប្រព័ន្ធភាពស៊ាំបញ្ចេញប្រូតេអ៊ីនប្រឆាំងនឹងមេរោគច្រើនពេក ដែលហៅថា cytokine ហើយក្រោយមកវាយប្រហារត្រលប់មកលើជាលិកាល្អ) ត្រូវបានគេស្គាល់ថា បានបង្កគ្រោះថ្នាក់ធ្ងន់ធ្ងរដល់រាងកាយ នៅពេលប្រតិកម្មទៅនឹងវីរុស SARS-CoV-២ ដែលបង្កជំងឺកូវីដ-១៩។

ក៏ប៉ុន្តែ របកគំហើញថ្មីស្ដីពីឥទ្ធិពលរបស់ pyroptosis ចំពោះអ្នកជំងឺកូវីដ-១៩ កម្រិតធ្ងន់នេះ មានលទ្ធភាពបើកផ្លូវសម្រាប់ការបង្កើតវិធីសាស្ត្រព្យាបាលថ្មី នេះបើតាមវេជ្ជបណ្ឌិត Gautam Mehta មកពីមន្ទីរពេទ្យ Royal Free ក្នុងទីក្រុងឡុងដ៍។

Pyroptosis (មានន័យថា ការស្លាប់ដោយការឆេះរបស់កោសិកា) តែងត្រូវបានគេមើលឃើញនៅលើអ្នកជំងឺថ្លើមធ្ងន់ធ្ងរ។ បញ្ហាទាំងឡាយបានកើតឡើងនៅពេលមេរោគលេចធ្លាយពីពោះវៀន ហើយចូលទៅក្នុងថ្លើម។

…

May 17, 2022

កងទ័ពអ៊ុយក្រែន ចេញបញ្ជាឱ្យទាហានឈរជើងនៅ Azovstal «លើកទង់សចុះចាញ់»

ថ្ងៃទី ១៧ ឧសភា នេះ កងទ័ពអ៊ុយក្រែន បានចេញបញ្ជាឱ្យទាហានទាំងឡាយរបស់ខ្លួនដែលកំពុងជាប់ដៃប្រយុទ្ធនៅឯរោងចក្រដែកថែប Azovstal ក្នុងទីក្រុង Mariupol លើកទង់សចុះចាញ់ ដើម្បីការពារអាយុជីវិត។

យោងតាម RT (រុស្ស៊ី) អាជ្ញាធរទីក្រុងកៀវ ប្រកាសថា អង្គភាពនានាបាន «សម្រេចភារកិច្ចប្រយុទ្ធដែលបានប្រគល់»។

អគ្គបញ្ជាការដ្ឋានកងទ័ពអ៊ុយក្រែន បានបញ្ជាក់នៅលើបណ្ដាញសង្គមថា ទាហានរបស់ខ្លួនដែលកំពុងលាក់ខ្លួនក្នុងរោងចក្រដែកថែប Azovstal ក្នុងទីក្រុង Mariupol ទទួលបានបញ្ជាឱ្យចុះចាញ់។

ក្នុងសេចក្ដីប្រកាសមួយ កងទ័ពអ៊ុយក្រែន លើកឡើងថា «កងកម្លាំងនៅ Mariupol បានសម្រេចភារកិច្ចប្រយុទ្ធដែលពួកគេបានទទួល…អគ្គបញ្ជារដ្ឋានកងទ័ពបានចេញបញ្ជាឱ្យមេបញ្ជាការនៃអង្គភាពទាំងឡាយដែលឈរជើងនៅ Azovstal ត្រូវរក្សាអាយុជីវិតរបស់សមាជិក»។

RT (រុស្ស៊ី) ឱ្យដឹងថា ការចុះចាញ់ដំបូងត្រូវបានធ្វើឡើងរួចរាល់កាលពីថ្ងៃទី ១៦ ឧសភា នៅពេលទាហានរបស់ អ៊ុយក្រែន ចំនួន ២៦៤ នាក់ បានចាកចេញពី Azovstal។ បច្ចុប្បន្នមានទាហានរងរបួស ៥៣ នាក់ កំពុងស្ថិតនៅក្នុងមន្ទីរពេទ្យមួយនៅ Novoazovsk និង ២១១ នាក់នៅ Yelenovka ដែលទាំងនេះស្ថិតក្នុងតំបន់ Donetsk។

យោងតាមប្រភពព័ត៌មានរបស់ រុស្ស៊ី តំបន់រោងចក្រ Azovstal មានមនុស្សចំនួនប្រហែល ២,២០០ នាក់ បានជាប់គាំងនៅក្នុងបន្ទប់ក្រោមដីនានា។ ទីតាំងនេះមានទំហំ ១១ គីឡូម៉ែត្រក្រឡា ហើយផ្នែកដែលនៅក្រោមដីត្រូវបានសាងសង់ឡើងដើម្បីទប់ទល់នឹងការវាយប្រហារដោយអាវុធនុយក្លេអែរ។

May 17, 2022

បារាំងមាននាយករដ្ឋមន្ត្រីជាស្ត្រីដំបូងគេក្នុងអំឡុងជាង ៣ ទសវត្សរ៍មកនេះ

ប្រធានាធិបតីបារាំង លោក ម៉ាក្រុង បានតែងតាំងរដ្ឋមន្ត្រីក្រសួងពលកម្ម Borne ជានាយករដ្ឋមន្ត្រីរបស់ បារាំង ដែលនេះគឺជាស្ត្រីដំបូងគេកាន់តំណែងនេះក្រោយរយៈពេលជាង ៣០ ឆ្នាំកន្លង។

វិមានអេលីសេ កាលពីថ្ងៃទី ១៦ ឧសភា បានប្រកាសថា លោកស្រី Elisabeth Borne ត្រូវបានតែងតាំងជានាយករដ្ឋមន្ត្រីបារាំង ជំនួសលោក Jean Castex ដែលបានដាក់ពាក្យសុំលាលែងពីតំណែងកាលពីពេលថ្មីៗនេះ។ លោកស្រី Borne បានទៅកាន់ភូមិគ្រឹះ Matignon របស់ នាយករដ្ឋមន្ត្រីបារាំង នៅ ប៉ារីស ដើម្បីទទួលភារកិច្ច។

ស្ត្រីជានាយករដ្ឋមន្ត្រីដំបូងគេរបស់ បារាំង គឺលោកស្រី Edith Cresson ដែលបានចូលកាន់តំណែងចាប់ពីខែឧសភា ឆ្នាំ ១៩៩១ ដល់ខែមេសា ឆ្នាំ ១៩៩២ ក្នុងសម័យលោកប្រធានាធិបតី Francois Mitterrand។

លោកស្រី Borne អាយុ ៦១ ឆ្នាំ ត្រូវបានវាយតម្លៃថាជាមនុស្សម្នាក់ដែលមានសក្ដានុពល និងអាចចរចាប្រកបដោយប្រសិទ្ធភាពជាមួយក្រុមសហជីពនៅក្នុងពេលប្រធានាធិបតី ម៉ាក្រុង ចាប់ផ្ដើមកែទម្រង់សង្គមថ្មី ក្នុងនោះមានទាំងការបង្កើនអាយុសម្រាប់ការចូលនិវត្តន៍ ដែលជាការសម្រេចចិត្តមួយប្រឈមនឹងហានិភ័យកើតមានបាតុកម្ម។

May 17, 2022

Author: សឿន សំណាង