ក្នុងអំឡុង ២៤ ម៉ោង នៃថ្ងៃទី ១៩ ខែឧសភា ២០២២ កម្ពុជា មានអ្នកជាសះស្បើយ ០៣ នាក់ ខណៈដែលអ្នកវិជ្ជមានថ្មី និងអ្នកស្លាប់ថ្មី ដោយសារកូវីដ-១៩ មិនមាននោះទេ។
Author: សឿន សំណាង
ក្រសួងពាណិជ្ជកម្ម ជូនដំណឹងស្ដីពី «ការស្នើសុំប័ណ្ណសម្គាល់ជាអ្នកតំណាងស្របច្បាប់ក្នុងការស្នើសុំចុះបញ្ជីពាណិជ្ជកម្ម និងការបន្តសុពលភាពប័ណ្ណសម្គាល់»
ក្រសួងពាណិជ្ជកម្ម ជូនដំណឹងដល់អ្នកតំណាងស្របច្បាប់ជំនាន់ទី ១ និងជំនាន់ទី ២ ទាំងអស់ថា ក្រសួង នឹងចាប់ផ្តើមទទួលពាក្យស្នើសុំសម្រាប់អ្នកដែលមានគោលបំណងស្នើសុំប័ណ្ណសម្គាល់ដើម្បីក្លាយជាអ្នកតំណាងស្របច្បាប់ក្នុងការស្នើសុំចុះបញ្ជីពាណិជ្ជកម្ម និងអ្នកតំណាងស្របច្បាប់ក្នុងការស្នើសុំចុះបញ្ជីពាណិជ្ជកម្មដែលមានគោលបំណងបន្តសុពលភាពប័ណ្ណសម្គាល់របស់ខ្លួន ចាប់ថ្ងៃទី ១៦ ឧសភា ២០២២ តទៅ។
១. លក្ខណៈសម្បត្តិ និងឯកសារភ្ជាប់
អ្នកស្នើសុំត្រូវមានលក្ខណៈសម្បត្តិ និងបំពេញឯកសារភ្ជាប់ តាមប្រកាសលេខ ២៥៨ ព.ណ ចបព.ប្រក ចុះថ្ងៃទី០១ ខែវិច្ឆិកា ឆ្នាំ ២០១៧ ស្តីពីការទទួលស្គាល់អ្នកតំណាងស្របច្បាប់ការស្នើសុំចុះបញ្ជីពាណិជ្ជកម្ម ឬឯកសារនាំចេញ-នាំចូល នៅក្រសួងពាណិជ្ជកម្ម។
២. នីតិវិធីក្នុងការដាក់ពាក្យស្នើសុំ
– ទាញយកពាក្យស្នើសុំតាមរយៈគេហទំព័រចុះបញ្ជីពាណិជ្ជកម្ម www.businessregistration.moc.gov.kh
– ពាក្យស្នើសុំ និងឯកសារតម្រូវច្បាប់ដើម (Soft Copy) ត្រូវបញ្ជូនទៅកាន់អ៊ីម៉ែល [email protected]
– ដាក់ពាក្យស្នើសុំ និងផ្តល់ឯកសារតម្រូវច្បាប់ដើម នៅការិយាល័យប្រតិវេទន៍ និងតាមដានអាជីវកម្ម (បន្ទប់លេខ៣១៣) ឲ្យបានមុនថ្ងៃទី៣១ ខែឧសភា ឆ្នាំ២០២២ ឬមុនថ្ងៃផុតកំណត់នៃប័ណ្ណរបស់ខ្លួន
– ពាក្យស្នើសុំនឹងត្រូវត្រួតពិនិត្យ តាមប្រកាសលេខ ២៥៨ ព.ណ ចបព.ប្រក ចុះថ្ងៃទី០១ ខែវិច្ឆិកា ឆ្នាំ២០១៧ ស្តីពីការទទួលស្គាល់អ្នកតំណាងស្របច្បាប់ការស្នើសុំចុះបញ្ជីពាណិជ្ជកម្ម ឬឯកសារនាំចេញ-នាំចូល នៅក្រសួងពាណិជ្ជកម្ម។
សម្រាប់ព័ត៌មានបន្ថែម សូមទំនាក់ទំនងទៅកាន់ នាយកដ្ឋានចុះបញ្ជីពាណិជ្ជកម្ម ឬតាមរយៈលេខទូរស័ព្ទ ០៩៦ ៩៦៣ ២៣៦៣ / ០៨៨ ៦០៨ ៣០៨២ ដែលមាន Extension លេខ០ ឬ។
ការជួញដូរក្នុងថ្ងៃទី ១៩ ឧសភា តម្លៃមាសពិភពលោកឡើងខ្ពស់បំផុតរាប់ចាប់ពីថ្ងៃទី ១២ មេសា
តម្លៃមាសនៅក្នុងផ្សារជួញដូរ New York កើនឡើងនៅក្នុងថ្ងៃទី ១៩ ខែឧសភា នៅពេលរូបិយប័ណ្ណដុល្លារអាម៉េរិក ធ្លាក់ថ្លៃ។
មាសប្រគល់ក្នុងខែមិថុនាដែលត្រូវបានគេជួញដូរច្រើនជាងគេ កើន ២៥.៣ ដុល្លារ ឬ ១.៣៩% ដោយបញ្ចប់ការជួញដូរត្រឹម ១,៨៤១.២ ដុល្លារ/អោន (អោន-ounce ជិតស្មើនឹង ៨.៣ ជី)។ នេះគឺជាតម្លៃដែលកើនឡើងខ្ពស់បំផុតរាប់ចាប់ពីថ្ងៃទី ១២ មេសា។
មាសឡើងថ្លៃខ្ពស់បែបនេះ មួយផ្នែកក៏ដោយសារតួលេខនៃការស្នើសុំជំនួយពីរដ្ឋាភិបាលដោយសារគ្មានការងារធ្វើ មានការកើនឡើងខ្ពស់ ខណៈដែលសកម្មភាពកែច្នៃផលិតផលក៏ថយចុះខ្លាំងក្នុងខែឧសភា និងអត្រានៃការទិញដូរអចលនទ្រព្យនៅ សហរដ្ឋអាម៉េរិក ក្នុងខែមេសា ក៏បានធ្លាក់ចុះច្រើនភាគរយ បើធៀបនឹងដំណាក់កាលដូចគ្នាក្នុងឆ្នាំ ២០២១។
រុស្ស៊ី ថា មីស៊ីល Sarmat អាចកម្ទេចទឹកដីមួយផ្នែកធំនៃទ្វីបរបស់សត្រូវ
មន្ត្រីរុស្ស៊ី យល់ថា កំពូលមីស៊ីល Sarmat មានកម្លាំងខ្លាំងគ្រប់គ្រាន់ អាចកម្ទេចតំបន់ដែលមានទំហំធំនៃបណ្ដាប្រទេសជាសត្រូវរបស់ ទីក្រុងមូស្គូ។
«មីស៊ីលផ្លោងអន្តរទ្វីប (ICBM) Sarmat មានកម្លាំងខ្លាំងគ្រប់គ្រាន់ដើម្បីកម្ទេចទឹកដីពាក់កណ្ដាលនៃឆ្នេរសមុទ្ររបស់ទ្វីបដែលជាសត្រូវរបស់យើងខ្ញុំ» អគ្គនាយកក្រុមហ៊ុនអវកាសចរណ៍ជាតិរុស្ស៊ី (Roscosmos) លោក Dmitry Rogozin កាលពីម្សិលមិញបាននិយាយដូច្នេះ។ ក៏ប៉ុន្តែ លោកមិនបាននិយាយច្បាស់ថា «ទ្វីបជាសត្រូវ» នេះស្ថិតនៅទីណានោះឡើយ។
ការថ្លែងរបស់លោក Rogozin ត្រូវបានធ្វើឡើងមួយខែបន្ទាប់ពី រុស្ស៊ី បានបាញ់សាកល្បងជាលើកដំបូងនូវកំណែពេញលេញនៃមីស៊ីលអន្តរទ្វីប Sarmat ពីព្រលានអវកាស Plesetsk នៅភាគខាងជើងប្រទេស។ កាលណោះ ប្រធានាធិបតី ពូទីន ក៏បានអះអាងថា មីស៊ីល Sarmat អាចបាញ់ចាំគ្រប់គោលដៅទាំងអស់នៅលើផែនដី។
កាលពីខែកន្លង មន្ត្រីរុស្ស៊ី បានឱ្យដឹងថា គ្រាប់មីស៊ីល Sarmat ដំបូងៗគ្រោងនឹងត្រូវបានដាក់ឱ្យប្រើប្រាស់ក្នុងអង្គភាពមួយនៅខេត្ត Krasnoyarsk ដែលមានចម្ងាយពី មូស្គូ ប្រហែល ៣,០០០ គីឡូម៉ែត្រ ទៅទិសខាងត្បូង ចាប់ពីរដូវស្លឹកឈើជ្រុះឆ្នាំនេះ។
អាម៉េរិក អនុម័តកញ្ចប់ថវិកាជំនួយ ៤០ ពាន់លានដុល្លារ ដល់ អ៊ុយក្រែន
សភាជាន់ខ្ពស់សហរដ្ឋអាម៉េរិក កាលពីថ្ងៃទី ១៩ ឧសភា បានអនុម័តសេចក្ដីព្រាងច្បាប់ជំនួយបន្ទាន់ផ្នែកយោធា សេដ្ឋកិច្ច និងមនុស្សធម៌ធំបំផុតមិនធ្លាប់មានពីមុនមក ដើម្បីជួយដល់ អ៊ុយក្រែន។
កញ្ចប់ជំនួយដែលមានតម្លៃរហូតដល់ ៤០ ពាន់លានដុល្លារអាម៉េរិក ខ្ពស់ជាងតួលេខ ៣៣ ពាន់លានដុល្លារដែលបានស្នើដោយ ប្រធានាធិបតី ចូ បៃដិន ត្រូវបានអនុម័តដោយមាន ៨៦ សំឡេងគាំទ្រ និង ១១ សំឡេងជំទាស់។
សមាជិកសភាទាំងអស់នៃបក្សប្រជាធិបតេយ្យបានគាំទ្រដល់សេចក្ដីព្រាងច្បាប់នេះ ខណៈដែលសមាជិកចំនួន ១១ រូបរបស់បក្សសាធារណរដ្ឋ បានបោះឆ្នោតប្រឆាំង។
កញ្ចប់ថវិកានេះគ្រោងនឹងត្រូវបានផ្ដល់ជាជំនួយឱ្យ អ៊ុយក្រែន ក្នុងរង្វង់ ៥ ខែខាងមុខ ក្នុងនោះក៏មាន ៦ ពាន់លានដុល្លារសម្រាប់សន្តិសុខ, ៨.៧ ពាន់លានដុល្លារសម្រាប់បន្ថែមសព្វាវុធទៅក្នុងឃ្លាំងអាវុធរបស់ អាម៉េរិក ទុកផ្ដល់ឱ្យ អ៊ុយក្រែន និង ៣.៩ ពាន់លានដុល្លារ សម្រាប់សកម្មភាពរបស់បញ្ជាការដ្ឋានយោធាអាម៉េរិក នៅ អឺរ៉ុប (EUCOM)។
កញ្ចប់ជំនួយខាងលើក៏នឹងផ្ដល់ជិត ៩ ពាន់លានដុល្លារសម្រាប់មូលនិធិជួយដល់សេដ្ឋកិច្ចរបស់ អ៊ុយក្រែន, ប្រហែល ៩០០ លានដុល្លារ សម្រាប់ជួយដល់ជនភៀសខ្លួនអ៊ុយក្រែន និង ៥ ពាន់លានដុល្លារសម្រាប់ដោះស្រាយស្ថានការណ៍វិបត្តិស្បៀងសកលដែលកើតឡើងដោយសារសង្គ្រាមនៅ អ៊ុយក្រែន។
ក្រៅពីនេះ កញ្ចប់ថវិកា ៤០ ពាន់លានដុល្លារនេះក៏ផ្ដល់សិទ្ធិបន្ថែម ១១ ពាន់លានដុល្លារសម្រាប់សេចក្ដីព្រាងច្បាប់ផ្ដល់សិទ្ធិការពារជាតិ (NDAA) ដែលអនុញ្ញាតឱ្យ ប្រធានាធិបតី ចូ បៃដិន ធ្វើការជញ្ជូនទំនិញ និងសេវាកម្មពីឃ្លាំងទំនិញរបស់ សហរដ្ឋអាម៉េរិក ដោយមិនចាំបាច់មានការយល់ព្រមពីសភា ដើម្បីទប់ទល់នឹងករណីបន្ទាន់ផងដែរ។
«ខ្ញុំស្វាគមន៍សភាដែលបានបញ្ជូនសារយ៉ាងច្បាស់ពីបក្សទាំងពីរ ទៅកាន់ពិភពលោកថា ប្រជាពលរដ្ឋអាម៉េរិក នឹងប្រកៀកស្មាគ្នាជាមួយនឹង ប្រជាពលរដ្ឋអ៊ុយក្រែន ក្នុងការការពារប្រជាធិបតេយ្យ និងសេរីភាព» ប្រធានាធិបតីអាម៉េរិក លោក ចូ បៃដិន ថ្លែងដូច្នេះបន្ទាប់ពីសភាជាន់ខ្ពស់បានអនុម័តសេចក្ដីព្រាងច្បាប់ខាងលើ។
ប្រធានាធិបតីអ៊ុយក្រែន លោក ហ្សេឡែនស្គី ក៏បានផ្ញើសារអរគុណដល់ប្រធានាធិបតី បៃដិន និងអះអាងថា ៤០ ពាន់លានដុល្លារ គឺជាការរួមចំណែកមួយភាគធំដើម្បីស្ដារសន្តិភាព និងសន្តិសុខនៅ អ៊ុយក្រែន អឺរ៉ុប និងពិភពលោក។
នៅពេលដែលត្រូវបានលោក ចូ បៃដិន ចុះហត្ថលេខា កញ្ចប់ថវិកានេះនឹងបង្កើនជំនួយរបស់ អាម៉េរិក សម្រាប់ អ៊ុយក្រែន ឡើងដល់ជាង ៥០ ពាន់លានដុល្លារ រាប់ចាប់តាំងពីសង្គ្រាមបានផ្ទុះឡើងកាលពីថ្ងៃទី ២៤ កុម្ភៈ។ លោក បៃដិន គ្រោងនឹងចុះហត្ថលេខាលើសេចក្ដីព្រាងច្បាប់នេះនៅក្នុងដំណើរទស្សនកិច្ចផ្លូវការមកកាន់ កូរ៉េខាងត្បូង នាថ្ងៃនេះ៕
(វីដេអូ)-ប្រទេសចិន បង្ហាញកប៉ាល់មេគ្មានមនុស្សបើកបរដំបូង
កប៉ាល់ Zhu Hai Yun អាចនាំយកយានយន្ត និងឧបករណ៍ស្រាវជ្រាវជាច្រើនដើម្បីប្រមូលទិន្នន័យក្នុងបេសកកម្មរយៈពេលយូរនៅលើសមុទ្រ។
កាលពីថ្ងៃទី ១៨ ឧសភា ប្រទេសចិន បានបង្ហាញកប៉ាល់មេស្រាវជ្រាវគ្មានមនុស្សបើកបរដំបូង នៅទីក្រុង Guangzhou ខេត្ត Guangdong ភាគខាងត្បូងប្រទេសនេះ។ កប៉ាល់ដែលមានឈ្មោះថា Zhu Hai Yun នេះ ត្រូវបានផលិតឡើងដើម្បីស្រាវជ្រាវសមុទ្រ។
Zhu Hai Yun អាចត្រូវបានបញ្ជាពីចម្ងាយ ឬដំណើរការស្វ័យប្រវត្តនៅក្នុងតំបន់លម្ហសមុទ្រ។ ដំបូលកប៉ាល់មានទំហំធំទូលាយអាចផ្ទុកយានយន្ត និងឧបករណ៍ស្រាវជ្រាវគ្មានមនុស្សបើកបរជាច្រើនប្រភេទដូចជា យន្តហោះដ្រោន ទូកស្វ័យប្រវត្ត និងនាវាមុជទឹកសមុទ្រជ្រៅជាដើម។
ដោយសារត្រូវបានបំពាក់ប្រព័ន្ធបើកបរស្វ័យប្រវត្ត និងបញ្ញាសិប្បនិម្មិត កប៉ាល់មេនេះអាចដំណើរការរយៈពេលយូរនៅលើសមុទ្រដើម្បីប្រមូលទិន្នន័យ។
ប្រព័ន្ធថាមពល ប្រព័ន្ធរុញច្រាន ប្រព័ន្ធឆ្លាតវៃ និងប្រព័ន្ធជំនួយសកម្មភាពស្រាវជ្រាវរបស់កប៉ាល់នេះ សុទ្ធតែត្រូវបានអភិវឌ្ឍនៅ ប្រទេសចិន ដោយប្រើប្រាស់បច្ចេកវិទ្យាស្នូលដែលអាចកែសម្រួលបាន។
កប៉ាល់ Zhu Hai Yun គ្រោងនឹងត្រូវបានដាក់ឱ្យប្រើប្រាស់ជាផ្លូវការចាប់ពីចុងឆ្នាំនេះ បន្ទាប់ពីបានបញ្ចប់ដំណាក់កាលសាកល្បង៕
ចំណាយសរុបលើខ្ទង់ការពារជាតិរុស្ស៊ី កើនឡើងដល់រាប់រយលានដុល្លារ/ថ្ងៃ ក្នុងអំឡុងសង្គ្រាមនៅ អ៊ុយក្រែន
ការចំណាយរបស់ រុស្ស៊ី ទៅលើខ្ទង់ការពារជាតិ បានឡើងដល់ ៣០០ លានដុល្លារអាម៉េរិក ជារៀងរាល់ថ្ងៃ ក្នុងគ្រាប្រទេសនេះធ្វើយុទ្ធនាការយោធាពិសេសនៅ អ៊ុយក្រែន។
ទីភ្នាក់ងារសារព័ត៌មាន Moscow Times កាលពីថ្ងៃទី ១៩ ឧសភា ដកស្រង់ឯកសាររបស់ ក្រសួងហិរញ្ញវត្ថុរុស្ស៊ី ឱ្យដឹងថា ប្រទេសនេះបានចំណាយអស់ជាង ៣០០ លានដុល្លារ/ថ្ងៃ សម្រាប់វិស័យការពារជាតិនៅក្នុងខែមេសា ២០២២ កើនឡើងទ្វេដងធៀបនឹងដំណាក់កាលមុនសង្គ្រាម។
ថ្វីបើមានការចំណាយខ្ពស់ជាងមុនទ្វេដងលើវិស័យការពារជាតិ ប៉ុន្តែ រុស្ស៊ី មិនដណ្ដើមបានជ័យជម្នះឆាប់រហ័សឡើយ ហើយបានឈានដល់ដំណាក់កាលទីពីរ គឺការផ្ដោតទៅលើការគ្រប់គ្រងតំបន់ភាគខាងកើតរបស់ អ៊ុយក្រែន។
ចំណាយសម្រាប់វិស័យការពារជាតិរបស់ រុស្ស៊ី ក្នុងខែកុម្ភៈ គឺប្រមាណ ៥.៤ ពាន់លានដុល្លារអាម៉េរិក, ខែមីនា ប្រមាណ ៦.៦ ពាន់លានដុល្លារអាម៉េរិក ហើយខែមេសាគឺជាខែដែល រុស្ស៊ី ចាយប្រាក់ច្រើនជាងគេ គឺប្រមាណ ៩.២ ពាន់លានដុល្លារ ដែលតួលេខនេះប្រហាក់ប្រហែលនឹង ៣០៨ លានដុល្លារអាម៉េរិក/ថ្ងៃ។
នៅមុនសង្គ្រាម ពោលគឺនៅក្នុងខែមករា ២០២២ រុស្ស៊ី បានចំណាយអស់ប្រមាណ ៣.៤ ពាន់លានដុល្លារ។ កាលពីខែមេសា ២០២១ ការចំណាយសរុបក្នុងវិស័យការពារជាតិរបស់ រុស្ស៊ី គឺត្រឹមតែជាង ៤.៤ ពាន់លានដុល្លារអាម៉េរិក ប៉ុណ្ណោះ។
គិតចាប់ពីខែមករា ដល់ចុងខែមេសា ឆ្នាំ ២០២២ កញ្ចប់ថវិកាប្រមាណ ២៤.៦ ពាន់លានដុល្លារ ត្រូវបានបែងចែកទៅលើការចំណាយសម្រាប់យោធារបស់ រុស្ស៊ី។ តួលេខនេះខ្ពស់ជាង ៣ ដងធៀបនឹងថវិកាសម្រាប់វិស័យអប់រំ, ខ្ពស់ជាងទ្វេដងធៀបនឹងថវិកាសម្រាប់សុខាភិបាល និងខ្ពស់ជាង ១០ ដង ធៀបនឹងការចំណាយលើវិស័យបរិស្ថាន៕
អាម៉េរិក នឹងផ្ដល់មីស៊ីលប្រឆាំងនាវាចម្បាំងឱ្យ អ៊ុយក្រែន ដើម្បីបំបែកកម្លាំងបិទខ្ទប់កំពង់ផែនៅសមុទ្រខ្មៅ?
ទីក្រុងវ៉ាស៊ីងតោន ត្រូវបានគេជឿថា កំពុងពិនិត្យមើលលទ្ធភាពក្នុងការប្រើប្រាស់វិធីដើម្បីផ្គត់ផ្គង់មីស៊ីលដែលមានកម្លាំងខ្លាំងជាង ទៅឱ្យ ទីក្រុងកៀវ បំណងជួយបំបែកការបិទខ្ទប់បណ្ដាកំពង់ផែនៅឆ្នេរ សមុទ្រខ្មៅ (Black Sea)។
ទូរទស្សន៍ RT (រុស្ស៊ី) ដកស្រង់ប្រភពព័ត៌មាន Reuters ឱ្យដឹងថា អាជ្ញាធររបស់ប្រធានាធិបតី ចូ បៃដិន ត្រូវបានគេជឿថា កំពុងរៀបចំការដឹកជញ្ជូនមីស៊ីលប្រឆាំងនាវាចម្បាំងនានាដែលទំនើបជាងមីស៊ីលដែលបានប្រើប្រាស់កន្លងមក ទៅកាន់ អ៊ុយក្រែន ដើម្បីជួយ ទីក្រុងកៀវ បំបែកការបិទខ្ទប់របស់ កងទ័ពរុស្ស៊ី ចំពោះបណ្ដាកំពង់ផែនៅ សមុទ្រខ្មៅ។
ប្រភេទមីស៊ីលដែលស្ថិតក្នុងបញ្ជីខាងលើរួមមាន Harpoon ផលិតដោយ Boeing និង Naval Strike ផលិតដោយ Kongsberg និង Raytheon Technologies នេះបើតាម Reuters ដកស្រង់ប្រភពព័ត៌មានពីមន្ត្រី និងសមាជិកសភាអាម៉េរិក ដែលសុំមិនបញ្ចេញឈ្មោះ។ ការពិភាក្សាកំពុងកើតឡើងយ៉ាងផុសផុលស្ដីពីការប្រគល់មីស៊ីលឱ្យ ទីក្រុងកៀវ ដោយផ្ទាល់ ឬតាមរយៈសម្ព័ន្ធមិត្តណាមួយនៅ អឺរ៉ុប។
ការបំបែកកម្លាំងបិទខ្ទប់របស់ រុស្ស៊ី នៅ Odessa និងបណ្ដាកំពង់ផែមួយចំនួនផ្សេងទៀតនៅ សមុទ្រខ្មៅ អាចអនុញ្ញាតឱ្យ អ៊ុយក្រែន អាចនាំចេញស្រូវសាលី និងទំនិញផ្សេងៗរបស់ប្រទេសនេះ ទៅកាន់បរទេស។
ក៏ប៉ុន្តែ ភាគីខាង រុស្ស៊ី ព្រមានថា ការដឹកជញ្ជូនអាវុធរបស់លោកខាងលិចទៅឱ្យ អ៊ុយក្រែន គឺជា «ការចាក់ប្រេងលើភ្លើង» ហើយអាចបញ្ឆេះសង្គ្រោះទ្រង់ទ្រាយធំជាងបច្ចុប្បន្ន៕
តៃវ៉ាន់ សាកល្បងយន្តហោះគ្មានមនុស្សបើកបំពាក់អាវុធជំនាក់ថ្មី
វិទ្យាស្ថានស្រាវជ្រាវនៃ កោះតៃវ៉ាន់ ដំណើរការសាកល្បងយន្តហោះគ្មានមនុស្សបើក (UAV) ជំនាន់ថ្មី ដោយយកលំនាំតាមគំរូយន្តហោះដែលអាចបំពាក់មីស៊ីលបាញ់ពីអាកាសមកដី។
វិទ្យាស្ថានជាតិវិទ្យាសាស្ត្រ និងបច្ចេកវិទ្យា Chung-Shan (National Chung-Shan Institute of Science and Technology) ដែលជាស្ថាប័នអភិវឌ្ឍអាវុធកំពូលរបស់ កោះតៃវ៉ាន់ ក្នុងរយៈពេល ២ សប្ដាហ៍កន្លង បានសាកល្បងលើសមត្ថភាពហោះហើររយៈចម្ងាយមធ្យម និងឆ្ងាយរបស់យន្តហោះគ្មានមនុស្សបើក Dang Van ។
«ការសាកល្បងនេះគឺដើម្បីពិនិត្យមើលថាតើ UAV ជំនាន់ទី ២ អាចហោះបានឆ្ងាយកម្រិតណា និងដំណើរការបានយូរប៉ុនណា» ប្រភពព័ត៌មានមួយដែលស្និទ្ធនឹងក្រុមការងារសាកល្បង UAV ខាងលើ កាលពីថ្ងៃទី ១៧ ឧសភា បានឱ្យដឹងដូច្នេះ។
វិទ្យាស្ថានជាតិវិទ្យាសាស្ត្រ និងបច្ចេកវិទ្យា Chung-Shan គ្រោងនឹងចាប់ផ្ដើមដាក់ឱ្យប្រើប្រាស់សាកល្បង UAV Dang Van ២ នៅក្នុងខែមិថុនាខាងមុខ និងសង្ឃឹមថា អាចបង្កើតក្រុមប្រយុទ្ធរួមជាមួយនឹងយន្តហោះ MQ-៩B Sea Guardians ដែលផលិតដោយ សហរដ្ឋអាម៉េរិក។
រុស្ស៊ី ប្រកាសថា ទាហានអ៊ុយក្រែន ជិត ១,០០០ នាក់ បានទម្លាក់អាវុធចុះចាញ់
ក្រសួងការពារជាតិរុស្ស៊ី ឱ្យដឹងថា ទាហានអ៊ុយក្រែន ៩៥៩ នាក់ នៅក្នុងរោងចក្រដែកថែប Azovstal បានដាក់អាវុធចុះចាញ់ បន្ទាប់ពី អ៊ុយក្រែន ប្រកាសបញ្ចប់ភារកិច្ចប្រយុទ្ធនៅ Mariupol។
«ក្នុង ២៤ ម៉ោងកន្លង ទាហាន ៦៩៤ នាក់ បានចុះចាញ់ ក្នុងនោះមាន ២៩ នាក់រងរបួស។ ជាសរុប ចាប់ពីថ្ងៃទី ១៦ ខែឧសភា មានទាហាន ៩៥៩ នាក់ បានទម្លាក់អាវុធ ក្នុងនោះមាន ៨០ នាក់រងរបួស និង ៥១ នាក់បានចូលពេទ្យ» ក្រសួងការពារជាតិរុស្ស៊ី ថ្ងៃនេះបានឱ្យដឹងដូច្នេះនៅក្នុងសន្និសីទសារព័ត៌មានប្រចាំថ្ងៃស្ដីពីយុទ្ធនាការយោធានៅ អ៊ុយក្រែន។
ក្រៅពីនេះ ក្រសួងខាងលើក៏បានបញ្ជាក់ថា ពួកគេបានសម្លាប់ទាហានអ៊ុយក្រែន ២៧០ នាក់, កម្ទេចឧបករណ៍យោធាចំនួន ៥៤ គ្រឿង, បាញ់ទម្លាក់យន្តហោះ ២ គ្រឿង និងយន្តហោះគ្មានមនុស្សបើក ១៥ គ្រឿង កាលពីយប់មិញ។
កាលពីថ្ងៃទី ១៧ ឧសភា កងទ័ពអ៊ុយក្រែន បានចេញបញ្ជាឱ្យទាហានទាំងឡាយរបស់ខ្លួនដែលកំពុងជាប់ដៃប្រយុទ្ធនៅឯរោងចក្រដែកថែប Azovstal ក្នុងទីក្រុង Mariupol លើកទង់សចុះចាញ់ ដើម្បីការពារអាយុជីវិត។
ក្នុងសេចក្ដីប្រកាសមួយ កងទ័ពអ៊ុយក្រែន លើកឡើងថា «កងកម្លាំងនៅ Mariupol បានសម្រេចភារកិច្ចប្រយុទ្ធដែលពួកគេបានទទួល…អគ្គបញ្ជារដ្ឋានកងទ័ពបានចេញបញ្ជាឱ្យមេបញ្ជាការនៃអង្គភាពទាំងឡាយដែលឈរជើងនៅ Azovstal ត្រូវរក្សាអាយុជីវិតរបស់សមាជិក»៕