Author: សឿន សំណាង

«ថូផ្កាបុរាណ» ដែលធ្លាប់ត្រូវគេដាក់ចោលក្នុងផ្ទះបាយ ត្រូវបានលក់ដេញថ្លៃ រហូតដល់ ១.៨ លានដុល្លារសហរដ្ឋអាម៉េរិក
ថូផ្ការបស់រាជវាំងដែលមានជាប់ទាក់ទងនឹងស្ដេច ឆៀនឡុង (Qianlong) ដែលមានពណ៌យ៉ាងស្រស់ស្អាត និងយ៉ាងពិសិដ្ឋ ត្រូវបានលក់ក្នុងតម្លៃខ្ពស់ជាង ១០ ដង ធៀបនឹងការគ្រោងទុក។
យោងតាមការរំពឹងទុកដំបូងរបស់អ្នករៀបចំព្រឹត្តិការណ៍លក់ដេញថ្លៃ Dreweatts ដែលមានមូលដ្ឋាននៅ ចក្រភពអង់គ្លេស ថូផ្កាបុរាណនេះអាចមានតម្លៃចន្លោះពី ១០០,០០០ ទៅ ១៥០,០០០ ផោន ប្រហែលពី១២៦,០០០ ទៅ ១៨៩,០០០ ដុល្លារអាម៉េរិក។ ប៉ុន្តែ ចុងក្រោយ វត្ថុបុរាណមួយនេះត្រូវបានលក់ក្នុងតម្លៃរហូតដល់ ១.៨ លានដុល្លារអាម៉េរិក។ ព្រឹត្តិការណ៍លក់ដេញថ្លៃនេះត្រូវបានធ្វើឡើងកាលពីថ្ងៃទី ១៨ ឧសភា ២០២២ ប៉ុន្តែ អត្តសញ្ញាណអ្នកទិញ មិនត្រូវបានបង្ហើបឱ្យដឹងនោះទេ។
Dreweatts ឱ្យដឹងថា ថូផ្កាធ្វើអំពីសេរ៉ាមិក កាលពីសតវត្សរ៍ទី ១៨ នេះ មានកម្ពស់ ៦១.៥ សម និងទទឹង ៤២ សម, ត្រូវបានលាបពណ៌ខៀវយ៉ាងពិសិដ្ឋ អមជាមួយនឹងរចនាលម្អដោយមាស និងប្រាក់ ដែលរៀបរាប់អំពីពពក សត្វក្រៀល, ក្អែក, សារិកា និងប្រចៀវ។
ការរួមផ្សំរបស់រចនា រូបភាពដែលលម្អដោយមាស ប្រាក់នៅលើថូផ្កានេះ «ពិតជាពិបាកធ្វើឱ្យបានសម្រេច ហើយនោះគឺជាប្រការដែលវាពិសេស និងខុសពីធម្មតា» Mark Newstead អ្នកជំនាញផ្នែកសេរ៉ាមិក និងសិល្បអាស៊ី នៃក្រុមហ៊ុន Dreweatts បញ្ជាក់ដូច្នេះ។
យោងតាម Dreaweatts ថូនផ្កានេះទំនងជាធ្លាប់បានដាក់តាំងនៅក្នុងរាជវាំង Zijincheng (紫禁城 / Forbidden City) ឬរាជវាំងមួយផ្សេងទៀតរបស់អធិរាជ ឆៀនឡុង(១៧១១-១៧៩៩) ជាស្ដេចជំនាន់ទី ៦ របស់រាជវង្សឈីង ដែលជារាជវង្សសក្តិភូមិចុងក្រោយក្នុងប្រវត្តិសាស្ត្រចិន។
មុនពេលត្រូវបានយកមកដាក់លក់ដេញថ្លៃ «វត្ថុបុរាណរបស់រាជវង្សឈីង» បានឆ្លងកាត់ដំណាក់កាលត្រូវគេបំភ្លេចចោលនៅក្នុងផ្ទះបាយមួយនៅ ចក្រភពអង់គ្លេស។ ក្រុមអ្នកប្រវត្តិសាស្ត្របច្ចុប្បន្ន មិនទាន់ប្រាកដអំពីប្រវត្តិរបស់ថូផ្កានេះនៅឡើយ។

May 28, 2022
ប្រាក់ឈ្នួលគោលនៅលើពិភពលោក បច្ចុប្បន្នស្ថិតក្នុងកម្រិតណា?
បច្ចុប្បន្ន នៅ សហរដ្ឋអាម៉េរិក ប្រាក់ឈ្នួលគោលគឺ ៧.២៥ ដុល្លារ/ម៉ោង ខណៈដែលនៅ កូរ៉េខាងត្បូង បានកំណត់ប្រាក់ឈ្នួលគោលត្រឹម ៨ ដុល្លារអាម៉េរិក។
យោងតាមនិយមន័យរបស់ អង្គការពលកម្មអន្តរជាតិ (ILO) ប្រាក់ឈ្នួលគោល គឺជាប្រាក់កម្រៃអប្បបរមាដែលនិយោជកត្រូវផ្ដល់ជូននិយោជិត សម្រាប់ការងារដែលត្រូវបានអនុវត្តក្នុងអំឡុងពេលកំណត់ណាមួយ។ គោលដៅនៃគោលនយោបាយនេះគឺដើម្បីបញ្ចៀសបញ្ហាដែលបុគ្គលិក និងយោជិត ត្រូវបានផ្ដល់ប្រាក់ឈ្នួលទាបដោយមិនសមហេតុផល។
នៅលើពិភពលោក ប្រទេសស្ទើរតែទាំងអស់សុទ្ធតែកំណត់អំពីប្រាក់ឈ្នួលអប្បបរមា ដោយគិតទៅតាមម៉ោង ថ្ងៃ សប្ដាហ៍ ឬខែ។ នៅ សហរដ្ឋអាម៉េរិក ប្រាក់ឈ្នួលអប្បបរមាគិតតាមម៉ោងគឺ ៧.២៥ ដុល្លារ។ រដ្ឋខ្លះបានកំណត់ប្រាក់ឈ្នួលអប្បបរមាខ្ពស់ជាងនេះ ឬស្មើនឹងការកំណត់របស់សហព័ន្ធ។
នៅ ប្រទេសអង់គ្លេស ប្រាក់ឈ្នួលអប្បបរមាក៏ត្រូវបានកំណត់ទៅតាមម៉ោង និងចែកជាប្រភេទទៅតាមអាយុ។ ចាប់ពីចាកចេញពីសាលារៀន ដល់អាយុ ១៨ ឆ្នាំ ទទួលបានប្រាក់ឈ្នួល ៤.៨១ ផោង (៦ ដុល្លារអាម៉េរិក) ក្នុង ១ ម៉ោង, ចាប់ពីអាយុ ១៨ ឆ្នាំ ដល់ ២០ ឆ្នាំ ទទួលបាន ៦.៨៣ ផោន (៨.៦៣ ដុល្លារ), អាយុពី ២១ ដល់ ២២ ឆ្នាំ ទទួលបាន ៩.១៨ ផោន (១១.៥៨ ដុល្លារ) និងលើសពី ២៣ ឆ្នាំ ទទួលបាន ៩.៥ ផោន (១២ ដុល្លារ)។
នៅអាស៊ី មានប្រទេស និងដែនដីមួយចំនួនតូចប៉ុណ្ណោះដែលបានកំណត់ប្រាក់ឈ្នួលគោលទៅតាមម៉ោង ដូចជា ហុងកុង ជប៉ុន និង កូរ៉េខាងត្បូង។ នៅ ហុងកុង បច្ចុប្បន្ន ប្រាក់ឈ្នួលគោលគឺ ៣៧.៥ ដុល្លារហុងកុង (៤.៨ ដុល្លារអាម៉េរិក) ក្នុង ១ ម៉ោង។
នៅ ប្រទេសជប៉ុន ប្រាក់ឈ្នួលគោលមធ្យមភាគទូទាំងប្រទេសគឺ ៩៣០ យេន (៨.៤៦ ដុល្លារ) ក្នុង ១ ម៉ោង។ អាជ្ញាធរខេត្តនានានឹងបង្កើតគោលការណ៍លើប្រាក់ឈ្នួលអប្បបរមាដោយឡែករបស់ពួកគេ។ តំបន់ដែលមានប្រាក់ឈ្នួលអប្បបរមាខ្ពស់បំផុតនៅ ជប៉ុន គឺ រាជធានីតូក្យូ (១,០៤១ យេន ប្រហែល ៨.១៩ ដុល្លារអាម៉េរិក) ចំណែកឈ្នួលអប្បបរមាទាបបំផុតនៅប្រទេសនេះគឺ ៨២០ យេន/ម៉ោង ស្មើនឹង ៦.៤៥ ដុល្លារ។
នៅក្នុងឆ្នាំ ២០២២ នេះ កូរ៉េខាងត្បូង បានកំណត់យក ៩,១៦០ វ៉ុន (៨ ដុល្លារ) ជាប្រាក់ឈ្នួលអប្បបរមា គិតជាម៉ោង។
May 28, 2022
អ៊ុយក្រែន ប្រកាសថា បានបាញ់ទម្លាក់យន្តហោះចម្បាំង Su-៣៥S របស់ រុស្ស៊ី
ទ័ពអាកាសរបស់ អ៊ុយក្រែន ប្រកាសថា យន្តហោះចម្បាំង MiG-២៩ របស់ខ្លួន បានបាញ់ទម្លាក់យន្តហោះចម្បាំង Su-៣៥S នៅលើអាកាស Kherson ប៉ុន្តែ មិនទាន់បញ្ចេញព័ត៌មានលម្អិត។
«ថ្ងៃនេះ នៅវេលាម៉ោង ១៤ នៃថ្ងៃទី ២៧ ឧសភា យន្តហោះចម្បាំង MiG-២៩ របស់ ទ័ពអាកាសអ៊ុយក្រែន បាញ់ទម្លាក់យន្តហោះចម្បាំង Su-៣៥S របស់ រុស្ស៊ី នៅក្នុងខេត្ត Kherson នៅពេលវាកំពុងស្វែងរកយន្តហោះចម្បាំងរបស់យើង» ក្រសួងការពារជាតិអ៊ុយក្រែន ប្រកាសនៅលើគេហទំព័រដូច្នេះ។
ក្រសួងការពារជាតិអ៊ុយក្រែន បង្ហោះសារខាងលើ អមជាមួយនឹងរូបដែលសាក្សីបានថតពីដី ដែលត្រូវបានគេជឿថាជាការបង្ហាញនូវស្ថានករណ៍ប្រយុទ្ធលើអាកាស។
ស្ថាប័នខាងលើរបស់ អ៊ុយក្រែន មិនបានផ្ដល់ព័ត៌មានលម្អិតស្ដីពីការប្រយុទ្ធគ្នានៅលើអាកាសក្នុងករណីនេះ ក៏ដូចជាមិនទាន់ប្រកាសបង្ហញរូបថត ឬវីដេអូដែលទាក់ទិននឹងសាកសពយន្តហោះ Su-៣៥S នៅលើដី។
ក្រសួងការពារជាតិរបស់ រុស្ស៊ី មិនទាន់មានប្រតិកម្មអ្វីទៅនឹងព័ត៌មានខាងលើនេះនៅឡើយ។
រូបថតនេះត្រូវបានគេជឿថា ជាស្ថានការណ៍ចុងក្រោយនៃការប្រឈមមុខដាក់គ្នារវាង MiG-២៩ របស់ អ៊ុយក្រែន និង Su-៣៥S របស់ រុស្ស៊ី នៅលើអាកាស Kherson
Su-៣៥S របស់ រុស្ស៊ី ចេញដំណើរទៅប្រយុទ្ធនៅ សមរភូមិអ៊ុយក្រែន កាលពីខែមេសា ២០២២
May 28, 2022
សង្គ្រាមនៅ អ៊ុយក្រែន ថ្ងៃទី ៩៣ ៖ រុស្ស៊ី មានប្រៀបលើសលុបលើគូសត្រូវ
ក្រុមមន្ត្រីរបស់ អ៊ុយក្រែន បានទទួលស្គាល់ថា កងកម្លាំងរបស់ប្រទេសនេះអាចនឹងត្រូវដកថយពីទីតាំងមួយចំនួននៅតំបន់ Donbass ដោយសារតែ រុស្ស៊ី មានប្រៀបលើសលុប ទាំងចំនួនទាហាន ទាំងចំនួនសព្វាវុធ។
កងទ័ពរុស្ស៊ី និងក្រុមផ្ដាច់ខ្លួន ប៉ុន្មានថ្ងៃចុងក្រោយនេះបានប្រើប្រាស់មីស៊ីលផ្លោងរយៈចម្ងាយខ្លី កាំជ្រួចហ្វោង កាំភ្លើងធំធុនធ្ងន់ និងរថក្រោះ ក្នុងការវាយសម្រុកយ៉ាងខ្លាំងក្លាទៅលើទីរួមស្រុក និងទីក្រុងនៅក្នុងខេត្ត Lugansk និង Donetsk ជាទីដែល អ៊ុយក្រែន កំពុងគ្រប់គ្រង នេះបើតាមក្រុមមន្ត្រីរបស់ អ៊ុយក្រែន។
ក្រុមមន្ត្រីរដ្ឋាភិបាលអ៊ុយក្រែន ប្រកាសថា រុស្ស៊ី សម្រេចបានគោលដៅតូចតាចនៅលើសមរភូមិជាក់ស្ដែង ប៉ុន្តែ បានទទួលស្គាល់ថា ស្ថានការណ៍ «លំបាកខ្លាំងណាស់» ហើយថា កងកម្លាំងអ៊ុយក្រែន ត្រូវដកថយពីទីកន្លែងមួយចំនួន។
កម្លាំងរុស្ស៊ី ហាក់កំពុងប្រើប្រាស់កាំភ្លើងធំធន់ធ្ងន់ បាញ់ទៅលើទីរួមស្រុកនានានៅតំបន់ Donbass ដើម្បីកម្ទេចខ្សែការពារ និងកាត់ផ្ដាច់ផ្លូវផ្គត់ផ្គង់របស់ អ៊ុយក្រែន។
កងកម្លាំងរុស្ស៊ី កំពុងពង្រីកការឡោមព័ទ្ធទីក្រុង Severodonetsk ក្នុងបំណងគ្រប់គ្រងទាំងស្រុងទៅលើខេត្ត Lugansk។ អភិបាលខេត្តនេះឱ្យដឹងថា កងកម្លាំងរុស្ស៊ី បានឡោមព័ទ្ធ និងគ្រប់គ្រងប្រមាណ ២/៣ នៃទឹកដីរបស់ Severodonetsk និង ៩០% នៃអគារក្នុងទីក្រុងនេះ ត្រូវបានបំផ្លាញ។
ក្នុងគ្រាដែលការប្រយុទ្ធគ្នាកំពុងកើតឡើងនៅតំបន់ Donbass ការចរចាសន្តិភាពរវាង រុស្ស៊ី និង អ៊ុយក្រែន នៅតែត្រូវបានពន្យារពេល ហើយភាគីទាំងពីរទម្លាក់កំហុសលើគ្នា។
ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ឱ្យដឹងថា មកដល់បច្ចុប្បន្ន ប្រជាជនអ៊ុយក្រែន ចំនួន ៦.៧ លាននាក់ បានចាកចេញពីប្រទេស បន្ទាប់ពីថ្ងៃទី ២៤ កុម្ភៈ ២០២២។ ឧត្តមស្នងការនៃអង្គការសហប្រជាជាតិ ទទួលបន្ទុកសិទ្ធិមនុស្ស (OHCHR) រកឃើញថា សង្គ្រាមនៅ អ៊ុយក្រែន បានបណ្ដាលឱ្យមានប្រជាជនសាមញ្ញយ៉ាងហោច ៤,០៣១ នាក់បាត់បង់ជីវិត និង ៤,៧៣៥ នាក់ រងរូស ប៉ុន្តែ បានព្រមានថា តួលេខពិតអាចខ្ពស់ជាងនេះ។
May 28, 2022
គម្រោង «ចិញ្ចឹមសាច់» ដោយមិនកាប់សម្លាប់សត្វ របស់ Good Meat និងផ្គត់ផ្គង់សាច់សិប្បនិម្មិតជាង ១៣ ពាន់តោន/ឆ្នាំ
(សហរដ្ឋអាម៉េរិក)-Good Meat ដែលជាក្រុមហ៊ុនបុត្រសម្ព័ន្ធរបស់ Eat Just នឹងសាងសង់រោងចក្រដែលមានម៉ាស៊ីន ឬឡប្រតិកម្មជីវសាស្ត្រចំនួន ១០ គ្រឿង ដែលធំជាងគេបង្អស់ក្នុងពិភពលោក ដើម្បីចិញ្ចឹមសាច់ ក្នុងនោះ ឡនីមួយៗមានចំណុះ ២៥០,០០០ លីត្រ។
ប្រកាសកាលពីថ្ងៃទី ២៥ ឧសភា របស់ក្រុមហ៊ុនខាងលើបានបញ្ជាក់ថា រោងចក្ររបស់ពួកគេនឹងផលិតសាច់គោ និងសាច់មាន់សិប្បនិម្មិត។ ឡប្រតិកម្មជីវសាស្ត្ររបស់ Good Meat នឹងប្រើប្រាស់កោសិការស់ដែលបានមកពីធនាគារកោសិកា ឬស៊ុត ដូច្នេះនឹងមិនមានការកាប់សម្លាប់សត្វឡើយ។
បច្ចុប្បន្ន មានក្រុមហ៊ុនប្រហែល ១៧០ ក្នុងពិភពលោក កំពុងតែអភិវឌ្ឍសាច់សិប្បនិម្មិត ប៉ុន្តែ Good Meat គឺជាក្រុមហ៊ុនតែមួយគត់ដែលទទួលបានអាជ្ញាប័ណ្ណលក់ផលិតផលរបស់ខ្លួននៅក្នុងទីផ្សារនាបច្ចុប្បន្ន។ ក្រុមហ៊ុននេះបានចាប់ផ្ដើមផ្គត់ផ្គង់សាច់មាន់ដែលចិញ្ចឹមពីកោសិកាសត្វមាន់នៅ សិង្ហបុរី កាលពីខែធ្នូ ២០២០។
ការចិញ្ចឹមសត្វនាំឱ្យប៉ះពាល់បរិស្ថាន ព្រោះតែវាបំភាយឧស្ម័យមេតាន ការកាប់ព្រៃឈើយកកន្លែងធ្វើកសិដ្ឋាន និងការប្រើប្រាស់ទឹកច្រើន ដូច្នេះ ការចិញ្ចឹមកោសិកាដើម្បីឱ្យវាធំធាត់ទៅជាសាច់គឺជាដំណោះស្រាយល្អ។
អ្នកគាំទ្រ និងអ្នកដែលបានបរិភោគសាច់សត្វសិប្បនិម្មិតបានឱ្យដឹងថា សាច់ដែលចិញ្ចឹមពីកោសិកាគឺមានរសជាតិដូចទៅនឹងសាច់សត្វដែលគេចិញ្ចឹមដោយឱ្យចំណី។
ក្រុមហ៊ុន Good Meat កំពុងសាងសង់ឡប្រតិកម្មជីវសាស្ត្រចំនួន ១០ ក្នុងនោះ ឡនីមួយៗមានចំណុះ ២៥០,០០០ លីត្រ និងកម្ពស់ ៤ ជាន់ ធំជាងគេបង្អស់ក្នុងពិភពលោកនៅក្នុងវិស័យនេះ។ ក្នុងរយៈពេល ៣ ខែទៀត ឡទាំងនេះនឹងត្រូវបានដាក់ក្នុងរោងចក្ររបស់ Good Meat នៅ សហរដ្ឋអាម៉េរិក។
តាមគម្រោង រោងចក្រខាងលើនឹងដំណើរការចាប់ពីចុងឆ្នាំ ២០២៤ និងអាចផ្គត់ផ្គង់សាច់សិប្បនិម្មិតចំនួន ១១,៨០០ តោននៅឆ្នាំ ២០២៦ និង ១៣,៧០០ តោននៅឆ្នាំ ២០៣០។
សាច់មាន់អាំងសិប្បនិម្មិតនៅក្នុងចង្ក្រានរបស់ភោជនីដ្ឋាន Eat Just

May 27, 2022
អ៊ុយក្រែន អាចនឹងបិទបណ្ដាញបង្ហូរប្រេង បើសិន សមាជិកណាតូ មួយនេះ នៅតែរារាំងទណ្ឌកម្មប្រឆាំងនឹង រុស្ស៊ី
រដ្ឋមន្ត្រីក្រសួងថាមពលអ៊ុយក្រែន ព្រមានថា អាចនឹងប្រើប្រាស់បណ្ដាញបំពង់បង្ហូរប្រេង Druzhba ដើម្បីដាក់សម្ពាធលើ ប្រទេសហុងគ្រី នៅពេល ទីក្រុងប៊ុយដាប៉ែស (Budapest) រារាំងការដាក់ទណ្ឌកម្មរបស់ សហភាពអឺរ៉ុប (EU) ប្រឆាំងនឹង រុស្ស៊ី។
«អ៊ុយក្រែន មានឧបករណ៍ដាក់សម្ពាធយ៉ាងខ្លាំងក្លា នោះគឺផ្លូវបំពង់បង្ហូរ Druzhba» រដ្ឋមន្ត្រីក្រសួងថាមពលអ៊ុយក្រែន Lana Zerkal បានថ្លែងកាលពីថ្ងៃទី ២៦ ឧសភា ទាក់ទងនឹងការដែល ហុងគ្រី រារាំងទណ្ឌកម្មរបស់ អឺរ៉ុប និងប្រព័ន្ធបំពង់បង្ហូរប្រេងប្រវែងប្រហែល ៤,០០០ គីឡូម៉ែត្រ ដែលរត់ពី រុស្ស៊ី ទៅកាន់ អឺរ៉ុប។
ផ្នែកខាងត្បូងនៃប្រព័ន្ធបំពង់បង្ហូរប្រេង Druzhba រត់ឆ្លងកាត់ទឹកដីរបស់ អ៊ុយក្រែន ទៅកាន់ ហុងគ្រី និង ស្លូវ៉ាគី។ រដ្ឋមន្ត្រី Zerkal យល់ថា នឹងងាយយល់ណាស់ «បើសិនជាមានបញ្ហាអ្វីមួយកើតឡើង» ចំពោះបំពង់បង្ហូរប្រេង Druzhba ដែលឆ្ពោះទៅកាន់ ហុងគ្រី ប៉ុន្តែ មិនបាននិយាយលម្អិតថា នោះនឹងជាបញ្ហាអ្វី។
រដ្ឋមន្ត្រី Zerkal បានរិះគន់លើ រដ្ឋាភិបាលហុងគ្រី ដែលចេះតែរារាំងការអនុម័តលើបទបញ្ជាស្ដីពីការដាក់ទណ្ឌកម្មរបស់ សហភាពអឺរ៉ុប ទៅលើ ទីក្រុងមូស្គូ ក្នុងនោះមានការហាមឃាត់ប្រេងរបស់ រុស្ស៊ី ផងដែរ។
រដ្ឋមន្ត្រីក្រសួងថាមពលអ៊ុយក្រែន លោកស្រី Lana Zerkal
បណ្ដាញបំពង់បង្ហូរប្រេង Druzhba
May 27, 2022
មហាសេដ្ឋីលេខមួយនៅ អ៊ុយក្រែន ចង់ប្ដឹងប្រឆាំង រុស្ស៊ី ព្រោះទម្លាក់គ្រាប់បែកលើរោងចក្ររបស់ខ្លួន
Rinat Akhmetov ចង់ដាក់ពាក្យប្ដឹងប្រឆាំង រុស្ស៊ី ព្រោះតែបានទម្លាក់គ្រាប់បែកលើរោងចក្រផលិតដែកថែបរបស់លោកនៅ Mariupol បង្កការខាតបង់ពី ១៧ ដល់ ២០ ពាន់លានដុល្លារអាម៉េរិក។
«យើងប្រាកដជាប្ដឹងប្រឆាំង រុស្ស៊ី និងទាមទារសំណងឱ្យបានសមស្រប ដោយសាររងការខូចខាតហេដ្ឋារចនាសម្ព័ន្ធ និងសកម្មភាពជំនួញ» មហាសេដ្ឋី Akhmetov បានប្រាប់ទំព័រ mrpl.city ដូច្នេះ។
មហាសេដ្ឋីអ៊ុយក្រែន វ័យ ៥៥ ឆ្នាំខាងលើ មានភាគហ៊ុននៅក្នុងក្រុមហ៊ុនជាច្រើនតាមរយៈក្រុមហ៊ុនហិរញ្ញវត្ថុនិងឧស្សាហកម្ម SCM។ ភាគហ៊ុនធំជាងគេរបស់លោក Akhmetov គឺស្ថិតនៅក្នុងក្រុមហ៊ុនផលិតដែកថែបលំដាប់កំពូលរបស់ អ៊ុយក្រែន គឺ Metinvest Group។
រោងចក្រដែកថែប Azovstal បានរងការខូចខាតធ្ងន់ធ្ងរដោយសារការទម្លាក់គ្រាប់បែករបស់ កងទ័ពរុស្ស៊ី
រោងចក្រដែកថែប Azovstal បានរងការខូចខាតធ្ងន់ធ្ងរដោយសារការទម្លាក់គ្រាប់បែករបស់ កងទ័ពរុស្ស៊ី នៅពេលតំបន់រោងចក្រនេះក្លាយជាលេណដ្ឋានចុងក្រោយរបស់ ទាហានអ៊ុយក្រែន នៅ Mariupol។ រោងចក្រជាច្រើនផ្សេងទៀតក៏បានរងការខូចខាតធ្ងន់ធ្ងរ។
មហាសេដ្ឋី Akhmetov បញ្ជាក់ថា «ការចំណាយទៅលើការជួសជុលព្រោះតែសកម្មភាពរបស់ រុស្ស៊ី គឺប្រមាណពី ១៧ ទៅ ២០ ពាន់លានដុល្លារអាម៉េរិក។ តួលេខចុងក្រោយនឹងត្រូវបានលើកឡើងនៅក្នុងពាក្យបណ្ដឹងប្រឆាំង រុស្ស៊ី»។
May 27, 2022
អាម៉េរិក ថា រុស្ស៊ី បាត់បង់រថក្រោះប្រហែល ១,០០០ គ្រឿង នៅ អ៊ុយក្រែន
មន្ត្រីអាម៉េរិក បានឱ្យដឹងថា កងទ័ពរុស្ស៊ី បានបាត់បង់រថក្រោះជិត ១,០០០ គ្រឿង និងកាំភ្លើងធំជាង ៣៥០ ដើម ប៉ុន្តែ នៅតែមានប្រៀបជាងបើធៀបនឹងកងទ័ពរបស់ អ៊ុយក្រែន។
«រហូតដល់បច្ចុប្បន្ន កងកម្លាំងរុស្ស៊ី បានបាត់បង់រថក្រោះជិត ១,០០០ គ្រឿង, កាំភ្លើងធំជាង ៣៥០ ដើម, យន្តហោះចម្បាំងទម្លាក់គ្រាប់បែកជិត ៣០ គ្រឿង និងឧទ្ធម្ភាគចក្រជាង ៥០ គ្រឿង ក្នុងសង្គ្រាមនៅ អ៊ុយក្រែន» មន្ត្រីការពារជាតិជាន់ខ្ពស់អាម៉េរិក បង្ហើបឱ្យដឹងដូច្នេះកាលពីថ្ងៃទី ២៦ ឧសភា។
មន្ត្រីអាម៉េរិក ខាងលើក៏បានបញ្ជាក់ថា បើទោះជាទទួលរងការខាតបង់ច្រើន ប៉ុន្តែ កងកម្លាំងរុស្ស៊ី នៅមានសមត្ថភាពខ្លាំងក្លានៅឡើយ។ «រុស្ស៊ី ចំណាយយ៉ាងច្រើនទៅលើសព្វាវុធ និងបុគ្គលិកសម្រាប់យុទ្ធនាការនេះ ពួកគេរងការខាតបង់ ហើយភាគីខាង អ៊ុយក្រែន ក៏ដូច្នេះដែរ» មន្ត្រីអាម៉េរិក អះអាងដូច្នេះ។
រថក្រោះរបស់ រុស្ស៊ី ត្រូវបានកម្ទេចនៅក្នុងភូមិ Dmytrivka ក្បែររដ្ឋធានីកៀវ របស់ អ៊ុយក្រែន កាលពីថ្ងៃទី ២៣ ឧសភា ២០២២
យន្តហោះចម្បាំងរបស់ រុស្ស៊ី ត្រូវបានកម្លាំងរបស់ អ៊ុយក្រែន បាញ់ទម្លាក់ពីលើអាកាសនៃតំបន់ Odesa នេះបើតាមគណនីបណ្ដាញសង្គមរបស់ កងទ័ពទឹកទឹកអ៊ុយក្រែន
May 27, 2022
បណ្ដាប្រទេសនៅ អឺរ៉ុប «ដណ្ដើមគ្នាទិញ» វ៉ាក់សាំងបង្ការជំងឺអុតស្វា (monkeypox)
បណ្ដាប្រទេសនៅ អឺរ៉ុប កំពុងដុតដៃដុតជើង ក្នុងការចាក់វ៉ាក់សាំងបង្ការជំងឺអុតស្វា ដើម្បីត្រៀមទប់ទល់នឹងស្ថានការណ៍អាក្រក់បំផុតក្នុងគ្រាដែលករណីឆ្លងមានការកើនឡើង។
អង់គ្លេស បានចាក់វ៉ាក់សាំងចំនួន ១,០០០ ដូស ដល់អ្នកដែលបានប៉ះពាល់អ្នកជំងឺ បុគ្គលដែលមានហានិភ័យខ្ពស់ និងបុគ្គលិកសុខាភិបាលដែលថែទាំអ្នកជំងឺអុតស្វា។ ប្រទេសនេះគ្រោងនឹងចាក់វ៉ាក់សាំងបង្ការអុតស្វាប្រហែល ៣,៥០០ ដូសបន្ថែមទៀតនៅក្នុងពេលដ៏ខ្លីខាងមុខ។
ប្រទេសបារាំង វិញ ក៏បានប្រកាសថា កំពុងចាក់វ៉ាក់សាំងជូនដល់ក្រុមអាទិភាព ជាក់ស្ដែងគឺក្រុមអ្នកប៉ះពាល់ ឬនៅក្បែរអ្នកជំងឺអុតស្វា និងក្រុមគ្រូពេទ្យជាដើម ដើម្បីទប់ស្កាត់ការផ្ទុះឆ្លងជំងឺនេះ។
បច្ចុប្បន្ន នៅ ទ្វីបអឺរ៉ុប មានវ៉ាក់សាំងបង្ការជំងឺអុតស្វាតែមួយប្រភេទប៉ុណ្ណោះ ដែលនេះបណ្ដាលឱ្យប្រទេសមួយចំនួន «ដណ្ដើមគ្នាទិញ»។
Rolf Sass Sorensen ប្រធានផ្នែកព័ត៌មាន និងទំនាក់ទំនងវិនិយោគនៅ Bavarian Nordic ដែលជាក្រុមហ៊ុនផលិតវ៉ាក់សាំងរបស់ ដាណឺម៉ាក ឱ្យដឹងថា «យើងកំពុងចរចាជាមួយប្រទេសជាច្រើនដែលមានតម្រូវការទិញវ៉ាក់សាំង។ វ៉ាក់សាំងត្រូវបានអនុញ្ញាតឱ្យប្រើប្រាស់ប្រឆាំងនឹងជំងឺអុតធំ (smallpox ឬ variola) នៅ សហភាពអឺរ៉ុប ក៏ដូចជាជំងឺអុតស្វានៅ សហរដ្ឋអាម៉េរិក និង កាណាដា»។
រូបភាពវីរុសបង្កជំងឺអុតស្វា
អង្គការសុខភាពពិភពលោក (WHO) រួមនឹងស្ថាប័នបម្រុងនិងទប់ស្កាត់ស្ថានការណ៍អាសន្នផ្នែកសុខាភិបាល របស់ គណកម្មការអឺរ៉ុប (HERA) ក៏កំពុងតែចរចាជាមួយក្រុមហ៊ុន Bavarian Nordic រឿងទិញវ៉ាក់សាំងបង្ការជំងឺអុតស្វា។
WHO បានអំពាវនាវឱ្យបណ្ដាប្រទេស បង្កើនការតាមដាន ស្រាវជ្រាវអ្នកដែលបានប៉ះពាល់អ្នកជំងឺអុតស្វា ឬសង្ស័យថាវិជ្ជមាននឹងវីរុសបង្កជំងឺនេះ។ ក៏ប៉ុន្តែ អង្គការនេះបានព្រមានថា ការដណ្ដើមគ្នាទិញវ៉ាក់សាំងនៅពេលករណីឆ្លងនៅមានកម្រិតទាបបែបនេះនឹងនាំឱ្យមានផលមិនល្អ។
យោងតាមទិន្នន័យថ្មីបំផុត ប្រទេសអង់គ្លេស បច្ចុប្បន្នមានអ្នកឆ្លងជំងឺអុតស្វាសរុបចំនួន ៧០ ករណី ចំណែកបណ្ដាប្រទេសនៅ អឺរ៉ុប ផ្សេងទៀត បានរកឃើញសរុប ៦៧ ករណី។
យោងតាម អង្គការសុខភាពពិភពលោក (WHO) ជំងឺអុតស្វា មិនងាយឆ្លងពីមនុស្សទៅមនុស្ស។ វីរុសនេះឆ្លងនៅពេលមនុស្សប៉ះពាល់គ្នាយូរជាមួយនឹងរបួស ធាតុរាវរបស់រាងកាយ តំណក់ទឹកផ្លូវដង្ហើម ឬសម្ភរដែលមានផ្ទុកវីរុស ដូចជា ភួយខ្នើយជាដើម។ អាការដំបូងនៃជំងឺអុតស្វា គឺ ក្ដៅខ្លួន ឈឺក្បាល ហើមកូនកណ្ដុរ ឈឺខ្នង និងសាច់ដុំ ក្រោយមកក៏ចេញពងមានខ្ទុះលើស្បែកនៅត្រង់មុខ ដៃ និងកន្លែងជាច្រើនទៀតរបស់រាងកាយ។ រោងសញ្ញាចាប់ផ្ដើមបង្ហាញខ្លួនក្នុងរង្វង់ពី ១ ទៅ ២ សប្ដាហ៍ រាប់ចាប់ពីពេលឆ្លងវីរុស។
May 27, 2022
ស្ថានភាពជំងឺកូវីដ-១៩ នៅ កម្ពុជា សម្រាប់ថ្ងៃទី ២៧ ខែឧសភា ២០២២
ក្នុងអំឡុង ២៤ ម៉ោង នៃថ្ងៃទី ២៦ ខែឧសភា ២០២២ កម្ពុជា មិនមានករណីជាសះស្បើយថ្មី អ្នកវិជ្ជមានថ្មី និងអ្នកស្លាប់ថ្មី ដោយសារកូវីដ-១៩ នោះទេ។
May 27, 2022