Author: សឿន សំណាង

(វីដេអូ)-យន្តហោះចម្បាំងរបស់ ចិន ធ្លាក់ចំផ្ទះប្រជាជននៅខេត្ត Hubei បណ្ដាលឱ្យមនុស្សស្លាប់ និងរបួសច្រើននាក់
យន្តហោះចម្បាំង J-៧ របស់ ប្រទេសចិន ធ្លាក់ត្រង់តំបន់ប្រជុំជននៅក្នុងខេត្ត Hubei ក្នុងពេលហ្វឹកហាត់ បណ្ដាលឱ្យមនុស្សម្នាក់បាត់បង់ជីវិត និង ២ នាក់រងរបួស។
ទូរទស្សន៍ CCTV បានរាយការណ៍ថា យន្តហោះចម្បាំង J-៧ បានជួបគ្រោះថ្នាក់កាលពីព្រឹកមិញ ពេលកំពុងហ្វឹកហាត់ហោះហើរនៅក្បែរព្រលានយន្តហោះ Laohekou ក្នុងខេត្ត Hubei។
រូបភាពពីកន្លែងកើតហេតុបង្ហាញថា យន្តហោះនេះត្រូវបាក់បែកខ្ទេចបន្ទាប់ពីធ្លាក់ចំតំបន់ប្រជុំជនក្បែរដងផ្លូវ បណ្ដាលឱ្យផ្ទះជាច្រើនខ្នងត្រូវឆាបឆេះ។ អ្នកបើកបរបានចុចឆត្រយោងរំដោះខ្លួនមុនពេលយន្តហោះធ្លាក់ដល់ដី ប៉ុន្តែត្រូវរងរបួសធ្ងន់។
CCTV ឱ្យដឹងថា អ្នកបើកបរយន្តហោះម្នាក់ និងប្រជាពលរដ្ឋម្នាក់ដែលរងរបួសត្រូវបានបញ្ជូនទៅកាន់មន្ទីរពេទ្យ ខណៈដែលមនុស្សម្នាក់បានស្លាប់នៅនឹងកន្លែងកើតហេតុ។ សមត្ថកិច្ចក៏បានឱ្យដឹងថា មូលហេតុនៃគ្រោះថ្នាក់ រួមនឹងចំនួនអ្នកស្លាប់ និងរងរបួស កំពុងត្រូវបានស៊ើបអង្កេត និងតាមដានជាបន្ត។
នៅ ប្រទេសចិន កាលពីឆ្នាំ ២០១៥ មានករណីធ្លាក់យន្តហោះយោធា ១ គ្រឿង ទៅលើខ្នងភ្នំ ប៉ុន្តែ អ្នកបើកបរបានរួចពីការស្លាប់។ នៅឆ្នាំ ២០១៣ អ្នកបើកបរយន្តហោះចម្បាំងម្នាក់របស់ ចិន ក៏បានបាត់បង់ជីវិតនៅពេលយន្តហោះធ្លាក់នៅពេលកំពុងហ្វឹកហាត់ហោះហើរពេលយប់៕
https://www.youtube.com/watch?v=amjR1RPgY5I
June 9, 2022
ក្រុមហ៊ុនធុរកិច្ចថ្មីរបស់ ចិន បង្ហើបអំពីកំណែគំរូតាក់ស៊ីហោះ ល្បឿន ៣០០ គីឡូម៉ែត្រ/ម៉ោង
កំណែគំរូតាក់ស៊ីហោះដែលមានទំហំស្មើនឹង ១/២ នៃកំណែពិតរបស់ក្រុមហ៊ុន Pantuo Aviation សម្រេចបាននូវការសាកល្បងស្ដីពីរចនារូបរាង និងប្រព័ន្ធហោះហើរ។
ក្រុមហ៊ុន Pantuo Aviation បានបង្ហើបឱ្យដឹងអំពីរចនារូបរាងរបស់តាក់ស៊ីហោះ Pantala Concept H កាលពីឆ្នាំកន្លង។ ពេលនេះ បន្ទាប់ពីការប្រឹងប្រែងអភិវឌ្ឍអស់រយៈពេលមួយឆ្នាំ Pantuo Aviation ក៏បានបញ្ចេញវីដេអូដំបូងស្ដីពី T១ ដែលជាកំណែគំរូដែលមានទំហំស្មើនឹងពាក់កណ្ដាលនៃទំហំរបស់ Pantala Concept H នេះបើតាម New Atlas ចេញផ្សាយកាលពីថ្ងៃទី ៧ មិថុនា។
តាមគម្រោង Pantala Concept H នឹងមានល្បឿន ៣០០ គីឡូម៉េត្រ/ម៉ោង និងហោះបានរយៈចម្ងាយ ២៥០ គីឡូម៉ែត្រ។ តាក់ស៊ីហោះនេះប្រើប្រាស់អគ្គិសនីទាំងស្រុង ដោយបំពាក់ថ្ម lithium-ion និងប្រព័ន្ធកង្ហារចំនួន ២២ គ្រឿង។ កង្ហារទាំងអស់របស់ Pantala Concept H នឹងផ្ដេកខ្លួននៅពេលងាកពីការហោះឡើងត្រង់ទៅរកការហោះឆ្ពោះទៅមុខ។
យោងតាម Pantuo Aviation ការប្រឹងប្រែងរបស់ពួកគេក្នុងឆ្នាំកន្លងបាននាំមកនូវមូលដ្ឋានរឹងមាំសម្រាប់ការអភិវឌ្ឍ Pantala Concept H កំណែពេញលេញ។ ក្រុមហ៊ុននេះដាក់គោលដៅយកឱ្យបាននូវវិញ្ញាបនបត្រទទួលស្គាល់ ហើយចាប់ផ្ដើមដំណើរការសេវាកម្មតាក់ស៊ីហោះរបស់ខ្លួនយ៉ាងយូរត្រឹមឆ្នាំ ២០២៧។
ក្រៅពី Pantuo Aviation ក៏នៅមានក្រុមហ៊ុនរបស់ អាល្លឺម៉ង់ ចំនួន ២ គឺ Lilium និង Volocoter ដែលសុទ្ធតែប្រកាសថានឹងដំណើរការសេវាតាក់ស៊ីហោះរបស់ខ្លួននៅឆ្នាំ ២០២៤។ ក្រុមអ្នកជំនាញព្យាករថា ទីផ្សារតាក់ស៊ីហោះនឹងមានតម្លៃឡើងដល់ ៦.៦៣ ពាន់លានដុល្លារនៅឆ្នាំ ២០៣០។
June 9, 2022
រាជបុត្រីនៃរាជវង្សន័រវែស ភ្ជាប់ពាក្យជាមួយគ្រូវេទមន្តអាម៉េរិក
រាជវាំងន័រវែស ប្រកាសថា ព្រះនាង Martha Louise ព្រះជន្ម ៥០ វស្សា បានភ្ជាប់ពាក្យជាមួយមិត្តប្រុសជនជាតិអាម៉េរិក ឈ្មោះ Durek Verret ដែលចាត់ទុកខ្លួនឯងថាជាគ្រូមន្តអាគម។
«ព្រះមហាក្សត្រ និងព្រះអគ្គមហេសី ប្រទានពរយ៉ាងស្មោះស្ម័គ្របំផុត សង្ឃឹមថា អ្នកទាំងពីរនឹងទទួលបានប្រការល្អៗបំផុតក្នុងអនាគត» រាជវាំងន័រវែស ប្រកាសដូច្នេះកាលពីថ្ងៃទី ៧ មិថុនា ជាការបញ្ជាក់អំពីព័ត៌មានដែលថា រាជបុត្រី Martha Louis បានភ្ជាប់ពាក្យ។
ព្រះនាង Martha Louise ព្រះជន្ម ៥០ វស្សា គឺជារាជបុត្រីរបស់មហាក្សត្រ Harald ឈរលំដាប់ទី ៤ នៅក្នុងបញ្ជីរាយនាមអ្នកដែលត្រូវស្នងរាជបល្ល័ង្ក ប៉ុន្តែ បានបោះបង់តំណែង ឋានៈ និងភារកិច្ចជារាជវង្សស្ទើរតែទាំងអស់ដើម្បីផ្ដោតលើសកម្មភាពផ្ទាល់ខ្លួន។ ព្រះនាងគឺជាមនុស្សជឿលើរឿងអបិយជំនឿ និងធ្លាប់ប្រកាសថាអាចទំនាក់ទំនងបានជាមួយនឹងពពួកទេវតា។
រាជបុត្រីអង្គនេះបានបង្ហាញជាសាធារណៈនូវទំនាក់ទំនងស្នេហាជាមួយ Durek Verret តាំងពីខែឧសភា ២០១៩។ Durek Verret អាយុ ៤៧ ឆ្នាំ រស់នៅក្នុងទីក្រុង Los Angeles សហរដ្ឋអាម៉េរិក ធ្លាប់បានប្រកាសថា ខ្លួនគឺជា «គ្រូមន្តអាគម Durek» ធ្លាប់ព្យាបាលជំងឺឱ្យតារាសម្ដែងល្បីឈ្មោះជាច្រើននាក់នៅ សហរដ្ឋអាម៉េរិក។
ព្រះនាង Martha ធ្លាប់បានរៀបអភិសេកជាមួយកំពូលអ្នកនិពន្ធជនជាតិន័រវែស Ari Behn កាលពីឆ្នាំ ២០០២ និងមានបុត្រី ៣ អង្គជាមួយគ្នា។ អ្នកទាំងពីរបានលែងលះគ្នាកាលពីឆ្នាំ ២០១៦ ហើយក្រោយមក Ari Behn បានធ្វើអត្តឃាតកាលពីឆ្នាំ ២០១៩ ក្នុងវ័យ ៤៧ ឆ្នាំ។
June 9, 2022
ស្ថានភាពជំងឺកូវីដ-១៩ នៅ កម្ពុជា សម្រាប់ថ្ងៃទី ០៩ ខែមិថុនា ២០២២
ក្នុងអំឡុង ២៤ ម៉ោង នៃថ្ងៃទី ០៨ ខែមិថុនា ២០២២ កម្ពុជា មិនមានករណីជាសះស្បើយថ្មី, មិនមានករណីវិជ្ជមានថ្មី និងមិនមានករណីស្លាប់ថ្មី ដោយសារកូវីដ-១៩ នោះទេ។
June 9, 2022
អង្គការសហប្រជាជាតិ ថា «គ្រោះទូរភិក្សអាក្រក់បំផុត» នឹងកើតឡើងដោយសារសង្គ្រាមនៅ អ៊ុយក្រែន
(សហរដ្ឋអាម៉េរិក)-អគ្គលេខាធិការនៃ អង្គការសហប្រជាជាតិ បានឱ្យដឹងថា សង្គ្រាមរវាង រុស្ស៊ី-អ៊ុយក្រែន បង្កផលប៉ះពាល់ធ្ងន់ធ្ងរដល់ពិភពលោក អាចរុញច្រានមនុស្ស ១.៦ ពាន់លាននាក់ធ្លាក់ទៅក្នុងគ្រោះទុរភិក្សអាក្រក់បំផុត។
«ផលប៉ះពាល់ពីសង្គ្រាមទៅលើសន្តិសុខស្បៀង ថាមពល និងហិរញ្ញវត្ថុ គឺជាឥទ្ធិពលដែលមានលក្ខណៈជាប្រព័ន្ធ ធ្ងន់ធ្ងរ និងកំពុងតែបង្កើនល្បឿន» អគ្គលេខាធិការនៃអង្គការសហប្រជាជាតិ លោក Antonio Guterres អធិប្បាយនៅក្នុងរបាយការណ៍ស្ដីពីផលវិបាកដែលកើតឡើងដោយសារសង្គ្រាម រុស្ស៊ី-អ៊ុយក្រែន កាលពីថ្ងៃទី ៨ មិថុនា។
លោក Antonio Guterres និយាយថា សង្គ្រាមនេះអាចបណ្ដាលឱ្យមានគ្រោះអត់ឃ្លានដ៏ធ្ងន់ធ្ងរមិនធ្លាប់មានពីមុនមក និងបន្សល់ទុកនូវផលវិបាកយ៉ាងច្របូកច្របល់ទាក់ទងនឹងសេដ្ឋកិច្ចសង្គម។ «មានវិធីតែមួយគត់ដើម្បីទប់ស្កាត់ព្យុះដែលកំពុងតែកកើតឡើងនេះ នោះគឺការបញ្ចប់យុទ្ធនាការយោធារបស់ រុស្ស៊ី នៅ អ៊ុយក្រែន» លោក Antonio Guterres សង្កត់ធ្ងន់ដូច្នេះ។
មេដឹកនាំអង្គការពិភពលោករូបនេះ ស្នើឱ្យមានកិច្ចចរចាជាកញ្ចប់ដែលអនុញ្ញាតឱ្យនាំចេញស្បៀងរបស់ អ៊ុយក្រែន តាមច្រកសមុទ្រខ្មៅ និងនាំចេញស្បៀង និងជីរបស់ រុស្ស៊ី ដោយមិនមានការរារាំង។
របាយការណ៍របស់ អង្គការសហប្រជាជាតិ ឱ្យដឹងថា ប្រទេសចំនួន ៩៤ ជាទីដែលមានមនុស្សរស់នៅប្រហែល ១.៦ ពាន់លាននាក់ រងផលប៉ះពាល់ពីសង្គ្រាមនៅ អ៊ុយក្រែន និងមិនមានកម្លាំងគ្រប់គ្រាន់ដើម្បីប្រឈមមុខនឹងបញ្ហាហិរញ្ញវត្ថុ ស្បៀងអាហារ និងថាមពល។
នៅចុងឆ្នាំនេះ សង្គ្រាមនៅ អ៊ុយក្រែន អាចនឹងធ្វើឱ្យបាត់បង់សន្តិសុខស្បៀង បណ្ដាលឱ្យមនុស្សជាង ៣២៣ លាននាក់ត្រូវរងផលប៉ះពាល់ ធៀបនឹង ៤៧ លាននាក់នាបច្ចុប្បន្ន។ ជនជាតិអាហ្វ្រិកប្រហែល ៥៨ លាននាក់ទៀត អាចនឹងធ្លាក់ទៅក្នុងគ្រោះទុរភិក្សក្នុងឆ្នាំនេះ។
ស្ថានភាពអត់ឃ្លានធ្ងន់ធ្ងរនៅ មជ្ឈិមបូព៌ា និង អាហ្វ្រិកខាងជើង អាចកើនដល់ ២.៨ លាននាក់នៅឆ្នាំ ២០២២ ចំណែក ៥០០ លាននាក់នៅ អាស៊ីអាគ្នេយ៍ ក៏កំពុងតែប្រឈមនឹងហានិភ័យនេះដែរ។
របាយការណ៍ខាងលើបានលើកឡើងថា «ត្រូវតែអនុវត្តនូវកិច្ចប្រឹងប្រែងជាក់ស្ដែងបន្ថែមទៀតដើម្បីធានាថាប្រភពផ្គត់ផ្គង់ស្បៀង និងថាមពល បានទៅដល់ដៃអ្នកដែលងាយរងផលប៉ះពាល់បំផុត»៕
June 9, 2022
ខេត្តមួយនៅភាគអាគ្នេយ៍ប្រទេសអ៊ុយក្រែន ចង់ធ្វើប្រជាមតិស្ដីពីការបង្រួបបង្រួមទៅក្នុងទឹកដីរុស្ស៊ី
អាជ្ញាធរដែលគាំទ្រដោយ ទីក្រុងមូស្គូ នៅខេត្ត Zaporizhzhia ប្រកាសអំពីគម្រោងធ្វើប្រជាមតិស្ដីពីការច្របាច់បញ្ចូលខេត្តនេះទៅក្នុង សហព័ន្ធរុស្ស៊ី នៅឆ្នាំនេះ។
«ប្រជាជននឹងសម្រេចលើអនាគតរបស់ខេត្ត Zaporizhzhia។ ការធ្វើប្រជាមតិស្ដីពីការបង្រួបបង្រួមជាមួយ រុស្ស៊ី នឹងត្រូវបានធ្វើឡើងនៅក្នុងឆ្នាំនេះ» Vladimir Rogov ដែលជាមន្ត្រីម្នាក់ត្រូវបាន រុស្ស៊ី គាំទ្រ នៅខេត្ត Zaporizhzhia ភាគអាគ្នេយ៍នៃ ប្រទេសអ៊ុយក្រែន បាននិយាយដូច្នេះកាលពីថ្ងៃទី ៨ មិថុនា។
លោក Rogov អះអាងថា លទ្ធផលនៃការធ្វើប្រជាមតិនឹងមានសុពលភាពបើសិនប្រជាជនជាង ៥០% បោះឆ្នោត ដោយសង្កត់ធ្ងន់ថា នេះគឺជាឱកាសដើម្បីលុបបំបាត់ការកំណត់ដែល អ៊ុយក្រែន បានអនុវត្តក្នុងអំឡុងច្រើនឆ្នាំកន្លងទៅ។
រុស្ស៊ី មិនទាន់មានការអធិប្បាយអ្វីអំពីព័ត៌មានខាងលើ ក្នុងគ្រាដែលមន្ត្រីរបស់ អ៊ុយក្រែន មួយរូប បានទាត់ចោលគម្រោងធ្វើប្រជាមតិ និងអះអាងថា ប្រជាជននៅមូលដ្ឋាននឹងមិនបោះឆ្នោតស្ដីពីបញ្ហាច្របាច់បញ្ចូលទៅក្នុង ប្រទេសរុស្ស៊ី ឡើយ។
កងទ័ពរុស្ស៊ី ដណ្ដើមបាន ២/៣ នៃទឹកដីរបស់ខេត្ត Zaporizhzhia ដែលមានប្រជាជនប្រហែល ១.៦ លាននាក់កំពុងរស់នៅ និងជាមជ្ឈមណ្ឌលឧស្សាហកម្មធំជាងគេមួយនៅក្នុងតំបន់ភាគអាគ្នេយ៍របស់ អ៊ុយក្រែន។ ការដណ្ដើមបានតំបន់នេះ អនុញ្ញាតឱ្យ រុស្ស៊ី ឆ្ពោះទៅកាន់ភាគកណ្ដាលរបស់ អ៊ុយក្រែន។
June 9, 2022
រថភ្លើងធ្លាក់ចេញពីផ្លូវដែក សម្លាប់មនុស្ស ១៧ នាក់ និងរាប់សិបនាក់ទៀតរងរបួស
(អ៊ីរ៉ង់)-រថភ្លើងមួយខ្សែបានធ្លាក់ចេញពីផ្លូវដែក និងជ្រុលទៅបុកត្រាក់ទ័រមួយគ្រឿងដែលនៅក្បែរនោះ បណ្ដាលឱ្យមានមនុស្សស្លាប់យ៉ាងតិច ១៧ នាក់ និងរាប់សិបនាក់រងរបួស។
រថភ្លើងដឹកអ្នកដំណើរ ៣៤៨ នាក់ ជួបគ្រោះថ្នាក់ចរាចរណ៍កាលពីព្រឹកថ្ងៃទី ៨ មិថុនា នៅពេលកំពុងធ្វើដំណើរពីទីក្រុង Mashhad ភាគខាងជើងនៃ ប្រទេសអ៊ីរ៉ង់ ទៅកាន់ទីក្រុង Yazd ដែលនៅភាគកណ្ដាលប្រទេសនេះ។
អ្នកនាំពាក្យអង្គភាពសង្គ្រោះបន្ទាន់ Mojtaba Khaledi បានប្រាប់ទូរទស្សន៍រដ្ឋអ៊ីរ៉ង់ ថា «មនុស្ស ១៧ នាក់បានស្លាប់ និង ៣៧ នាក់ក្នុងចំណោមអ្នករងរបួស ៨៦ នាក់ ត្រូវចូលពេទ្យ។ ចំនួនអ្នកស្លាប់អាចកើនឡើង ដោយសារតែអ្នករងរបួសធ្ងន់ធ្ងរមានចំនួនច្រើន»។
Khaledi ឱ្យដឹងថា រថយន្តសង្គ្រោះបន្ទាន់ចំនួន ២៤ គ្រឿង និងឧទ្ធម្ភាគចក្រចំនួន ៣ គ្រឿង ត្រូវបានបញ្ជូនមកកាន់កន្លែងកើតហេតុ។
អ៊ីរ៉ង់ កាលពីឆ្នាំ ២០១៦ ក៏មានករណីគ្រោះថ្នាក់រថភ្លើងមួយកើតឡើង បន្ទាប់ពីរថភ្លើង ២ ខ្សែ បានបុកគ្នា និងឆាបឆេះនៅភាគខាងជើងប្រទេស បណ្ដាលឱ្យមនុស្ស ៤៤ នាក់ត្រូវបាត់បង់ជីវិត និងរាប់សិបនាក់រងរបួស ។ មេដឹកនាំស្ថាប័នគ្រប់គ្រងផ្លូវដែករបស់ អ៊ីរ៉ង់ ពេលនោះបានលាលែងពីតំណែង បន្ទាប់ពីបុគ្គលិក ៤ នាក់របស់លោកត្រូវបានចាប់ខ្លួន។
June 9, 2022
ខាងអគ្គិសនីធ្វើកូដកម្ម ស្រីលង្កា អាចធ្លាក់ទៅក្នុងស្ថានភាពដាច់ភ្លើងទូទាំងប្រទេសចាប់ពីថ្ងៃនេះ
បញ្ហាដាច់ភ្លើងទូទាំងប្រទេសនឹងធ្វើឱ្យស្ថានការណ៍នៅ ស្រីលង្កា កាន់តែស្មុគស្មាញ ក្នុងគ្រាដែលវិបត្តិសេដ្ឋកិច្ចដ៏អាក្រក់បំផុតក្នុងអំឡុងច្រើនទសវត្សរ៍កន្លងមកនេះមិនទាន់មានច្រកចេញ។
ប្រទេសស្រីលង្កា អាចធ្លាក់ទៅក្នុងស្ថានភាពគ្មានអគ្គិសនីប្រើប្រាស់នៅទូទាំងប្រទេសចាប់ពីព្រឹកថ្ងៃទី ៩ មិថុនា ដោយសារតែសហជីពក្នុងវិស័យអគ្គិសនីរបស់ប្រទេសនេះ ប្រកាសធ្វើកូដកម្មដើម្បីប្រឆាំងនឹងច្បាប់ថ្មីរបស់រដ្ឋាភិបាល។
សហជីពអគ្គិសនីស្រីលង្កា បានឱ្យដឹងថា កូដកម្មនេះនឹងមិនមានកំណត់ពេលឡើយ។ បញ្ហាដាច់ភ្លើងទូទាំងប្រទេសនឹងនាំឱ្យស្ថានការណ៍នៅប្រទេសកោះមួយនេះកាន់ដុនដាបថែមមួយកម្រិតទៀត ខណៈដែលរដ្ឋាភិបាលមិនទាន់រកឃើញដំណោះស្រាយសមស្រប។
យោងតាមសហជីពអគ្គិសនីស្រីលង្កា វិស្វករប្រហែល ៩០០ នាក់ ក្នុងចំណោម ១,១០០ នាក់ របស់ក្រុមហ៊ុនអគ្គិសនី Ceylon ដែលជាស្ថានប័នរបស់រដ្ឋ និងជាអ្នកផលិតអគ្គិសនីធំជាងគេនៅ ស្រីលង្កា បានចុះឈ្មោះមិនមកធ្វើការក្នុងថ្ងៃទី ៩ មិថុនា។ ក្រុមបុគ្គលិកដែលធ្វើការក្នុងផ្នែកផលិត បញ្ជូនថាមពល និងបែងចែកអគ្គិសនី នឹងចាកចេញពីកន្លែងធ្វើការនៅពាក់កណ្ដាលយប់។
ស្រីលង្កា កំពុងតែឆ្លងកាត់វិបត្តិសេដ្ឋកិច្ចអាក្រក់បំផុតរាប់ចាប់តាំងពីដណ្ដើមបានឯករាជ្យកាលពីឆ្នាំ ១៩៤៨។ ប្រជាជន ២២ លាននាក់របស់ប្រទេសនេះកំពុងតែជួបការលំបាកខ្លាំងទាក់ទងនឹងបញ្ហាខ្វះឧស្ម័ន ស្បៀងអាហារ ឱសថ និងទំនិញចាំបាច់ជាច្រើនផ្សេងទៀត។
បញ្ហាដាច់ភ្លើងបានកើតឡើងជាញឹកញាប់នៅ ស្រីលង្កា គិតចាប់ពីដើមឆ្នាំនេះ ព្រោះតែខ្វះរូបិយប័ណ្ណអន្តរជាតិដើម្បីនាំចូលឧស្ម័នបម្រើដល់ការផលិតអគ្គិសនី។
បច្ចុប្បន្ន ស្ថានការណ៍ដាច់ភ្លើងបានប្រសើរឡើងបន្តិចហើយដោយសារមានភ្លៀងធ្លាក់ច្រើន ជួយឱ្យបណ្ដារោងចក្រវារីអគ្គិសនីដំណើរការបានរលូនជាងមុន។ ក៏ប៉ុន្តែ បើសិនកូដកម្មក្នុងវិស័យអគ្គិសនីមិនត្រូវបានដោះស្រាយ ស្រីលង្កា អាចនឹងធ្លាក់ទៅក្នុងបញ្ហាដាច់ភ្លើងទ្រង់ទ្រាយធំយូរអង្វែងជាថ្មី៕
June 9, 2022

ក្រុមហ៊ុនអាកាសចរណ៍ ថៃ វៀតចេត មានជើងហោះហើរ ភ្នំពេញ-បាងកក ជារៀងរាល់ថ្ងៃ

(បាងកក,០៣ មិថុនា ២០២២) – ក្រុមហ៊ុនអាកាសចរណ៍ ថៃ វៀតចេត បានបង្កើនជើងហោះហើរអន្តរជាតិរបស់ខ្លួន ភ្នំពេញ-បាងកក (សុវណ្ណភូមិ) ដោយបន្ថែមកាលវិភាគហោះហើរជាប្រចាំថ្ងៃ។ ដើម្បីឆ្លើយតបទៅនឹងកំណើននៃភ្ញៀវទេសចរ និងការបន្ធូរបន្ថយនៃការរឹតបន្តឹងក្នុងការធ្វើដំណើរនៅទូទាំងពិភពលោក ក៏ដូចជាការដកចេញនូវវិធានការ ‘Test & Go’ នៅក្នុងប្រទេសថៃផងនោះ ក្រុមហ៊ុនអាកាសចរណ៍ ថៃ វៀតចេត នឹងបង្កើនជើងហោះហើររបស់ខ្លួនដោយមានកាលវិភាគហោះហើររហូតទៅដល់ ២ ជើងក្នុងមួយថ្ងៃ និង ៧ ថ្ងៃក្នុងមួយសប្តាហ៍ ចាប់ពី ខែកក្កដា ឆ្នាំ ២០២២ នេះតទៅ ដែលនឹងភ្ជាប់ទំនាក់ទំនងប្រជាជន និងភ្ញៀវទេសចររវាងប្រទេសទាំងពីរជាមួយនឹងជម្រើសនៃការធ្វើដំណើរឱ្យកាន់តែភាពសម្បូរបែប និងងាយស្រួល។

ចាប់តាំងពីខែឧសភា ឆ្នាំ ២០២២ ក្រុមហ៊ុនអាកាសចរណ៍ ថៃ វៀតចេត បានបើកដំណើរការជើងហោះហើររវាងរាជធានីភ្នំពេញ និងទីក្រុងបាងកក ដែលមានកាលវិភាគត្រឹមតែមួយជើងក្នុងមួយថ្ងៃ (ជើងហោះហើរប្រចាំថ្ងៃ) ដោយបច្ចុប្បន្នថៃ វៀតចេតបានបង្កើនការហោះហើរ ២ ដងក្នុងមួយថ្ងៃ ដូចទៅតាមកាលវិភាគហោះហើរខាងក្រោម៖

លេខហោះហើរ	ប្រភពដើម	គោលដៅ	ការចេញដំណើរ	ការមកដល់	ថ្ងៃហោះហើរ
VZ720	បាងកក	ភ្នំពេញ	08:30	09:40	ប្រចាំថ្ងៃ
VZ721	ភ្នំពេញ	បាងកក	10:40	11:55	ប្រចាំថ្ងៃ
VZ722	បាងកក	ភ្នំពេញ	17:05	18:15	ប្រចាំថ្ងៃ(*ចាប់ពីថ្ងៃ 03 កក្កដា, 2022)
VZ723	ភ្នំពេញ	បាងកក	19:10	20:25	ប្រចាំថ្ងៃ(*ចាប់ពីថ្ងៃ 03 កក្កដា, 2022)

លោក Woranate Laprabang, នាយកប្រតិបត្តិ នៃក្រុមហ៊ុនអាកាសចរណ៍ ថៃ វៀតចេត ក៏មានប្រសាសន៍ផងដែរថា “ផ្នែកឧស្សាហកម្មទេសចរណ៍ និងអាកាសចរណ៍កំពុងស្ថិតក្នុងស្ថានភាពប្រសើរឡើងវិញបន្ទាប់ពីការអាក់ខានដោយសារជំងឺរាតត្បាតកូវីដ-១៩។ សព្វថ្ងៃនេះ ប្រទេសជាច្រើនបានដកការរឹតបន្តឹងក្នុងការធ្វើដំណើរ ដោយបើកព្រំដែនរបស់ពួកគេឡើងវិញសម្រាប់ទទួលស្វាគមន៍ភ្ញៀវទេសចរអន្តរជាតិ។ ក្នុងនាមជាក្រុមហ៊ុននាំមុខគេក្នុងការស្តារទីផ្សារមួយនេះឡើងវិញ ក្រុមហ៊ុនអាកាសចរណ៍ ថៃ វៀតចេត ក៏បានត្រៀមខ្លួនរួចជាស្រេចក្នុងការការបើកដំណើរការឡើងវិញនៃជើងហោះហើរអន្តរជាតិរបស់យើង។ ចាប់តាំងពីខែឧសភា ឆ្នាំ ២០២២ មក យើងបានបង្កើនជើងហោះហើររវាងរាជធានីភ្នំពេញ និងទីក្រុងបាងកក ដោយផ្តល់ជូនប្រជាជន និងភ្ញៀវទេសចរពីប្រទេសកម្ពុជា និងប្រទេសថៃ នូវឱកាសកាន់តែច្រើនក្នុងការធ្វើដំណើរជាមួយនឹងសេវាកម្មប្រកបដោយផាសុកភាពរបស់យើងក្នុងតម្លៃសមរម្យ»។

លើសពីនេះ ក្រុមហ៊ុនអាកាសចរណ៍ ថៃ វៀតចេត បានសហការជាមួយមន្ទីរពេទ្យ Phyathai ដោយដាក់ចេញនូវកញ្ចប់ពិសេស ‘Buy 1 Get 1 Free’ ដែលរួមមានសេវាកម្មពិនិត្យសុខភាពដល់អតិថិជននៅមន្ទីរពេទ្យ Phyathai និងសំបុត្រយន្តហោះទៅមកដោយឥតគិតថ្លៃរបស់ក្រុមហ៊ុន ថៃ វៀតចេត ពី ភ្នំពេញ ទៅ បាងកក ដែលជួយសម្រួលដល់ភ្ញៀវទេសចរពី កម្ពុជា ទៅកាន់ ប្រទេសថៃ ក្នុងការធ្វើដំណើរ និងពិនិត្យសុខភាព។ សម្រាប់ព័ត៌មានបន្ថែម សូមចូលទៅកាន់គេហទំព័រ http://skyfun.travel ។

គួរបញ្ជាក់ផងដែរថា បច្ចុប្បន្ននេះ អ្នកដំណើរដែលចូលទៅកាន់ប្រទេសថៃមិនតម្រូវឱ្យមានវិញ្ញាបនបត្រធ្វើតេស្តិ៍កូវីដ-១៩ មុនពេលចូលប្រទេស ឬពេលមកដល់នោះទេ។ លើសពីនេះ អ្នកដំណើរមិនតម្រូវឱ្យធ្វើចត្តាឡីស័កពេលមកដល់ ដោយសារការដកចេញនូវវិធានការ ‘Test & Go’ ចាប់តាំងពីថ្ងៃទី ០១ ខែឧសភា ឆ្នាំ ២០២២មក។

ក្រុមហ៊ុនអាកាសចរណ៍ ថៃ វៀតចេត បានផ្តល់នូវសេវាកម្មឈានមុខគេដល់អ្នកដំណើរប្រកបដោយ កម្រិតសុវត្ថិភាពខ្ពស់បំផុតក្នុងការធ្វើដំណើរអំឡុងពេលការរីករាលដាលនៃជំងឺកូវិដ-១៩នេះ។ ក្រុមការងារអាកាសចរណ៍ បានអនុវត្តយ៉ាងតឹងរ៉ឹងក្នុងការសម្លាប់មេរោគលើយន្តហោះទាំងអស់របស់ក្រុមហ៊ុនដោយអនុលោមស្របតាមការណែនាំរបស់ក្រសួងសុខាភិបាលប្រទេសថៃ និងសេចក្តីណែនាំរបស់ CAAT ដើម្បីកាត់បន្ថយហានិភ័យដែលអាចប៉ះពាល់ទៅដល់ការធ្វើដំណើររបស់ភ្ញៀវទេសចរ និងបុគ្គលិករបស់ក្រុមហ៊ុន។

អំពីក្រុមហ៊ុន ថែ វៀតចេត

ក្រុមហ៊ុន ថៃ វៀតចេត បានបង្កើតឡើងក្នុងឆ្នាំ២០១៤ ហើយបានសហការជាមួយក្រុមហ៊ុន វៀតចេត អ៊ែរ ដើម្បីពង្រីកបណ្តាញហោះហើររបស់ខ្លួន និងផ្តល់ឱកាសកាន់តែច្រើនសម្រាប់អ្នកធ្វើដំណើរទៅកាន់ប្រទេសថៃ និងប្រទេសជាច្រើនទៀតប្រកបដោយសេវាកម្មរួសរាយរាក់ទាក់ និងសប្បាយរីករាយ។ ដោយផ្តោតលើសមត្ថភាពគ្រប់គ្រងការចំណាយ ប្រតិបត្តិការដែលប្រកបដោយប្រសិទ្ធភាព និងការអនុវត្តរបស់ក្រុមហ៊ុនអាកាសចរណ៍ យើងអាចផ្តល់ជូននូវការហោះហើរដោយសន្សំសំចៃ និងតម្លៃដែលអាចផ្លាស់ប្ដូរទៅតាមកាលទេសៈ ព្រមទាំងសេវាកម្មជាច្រើនទៀតដើម្បីសម្របតាមតម្រូវការរបស់អតិថិជន។

ថៃ វៀតចេត ទទួលបានពានរង្វាន់ ក្រុមហ៊ុនដឹកអ្នកដំណើរដែលមានតម្លៃទាបនិងរីកលូតលាស់លឿនបំផុតនៃឆ្នាំ២០២០ ដោយទស្សនាវដ្តី Global Business Outlook។ ក្រុមហ៊ុនកំពុងបន្តពង្រីកបណ្តាញហោះហើររបស់ខ្លួនទាំងក្នុងស្រុក និងក្រៅស្រុក ក៏ដូចជាពង្រីកងារជាក្រុមហ៊ុនក្មេងជាងគេដែលមានយន្តហោះទំនើបៗ ដោយមានយន្តហោះ Airbus A320 និង A321។ ថ្មីៗនេះ ក្រុមហ៊ុនអាកាសចរណ៍ ថៃ វៀតចេត ក៏បានទទួលពានរង្វាន់ជាក្រុមហ៊ុនអាកាសចរណ៍ ដែលមានបាហុនិការរួសរាយ រាក់ទាក់ជាងគេ ពីទស្សនាវដ្ដី International Finance ដោយសង្កត់ធ្ងន់លើជំហររបស់ខ្លួនជា “ក្រុមហ៊ុនអាកាសចរណ៍នៃបដិសណ្ឋារកិច្ច” ដោយពង្រឹងតម្លៃស្នូលនៃ មិត្តភាព និងភាពសប្បាយរីករាយ រួមជាមួយនឹង សុវត្ថិភាព ពេលវេលា និង តម្លៃសមរម្យ។

បច្ចុប្បន្នក្រុមហ៊ុន ថៃ វៀតចេត ប្រទេសថៃបានប្រតិបត្តិការជើងហោះហើរក្នុងស្រុកចំនួន ១៤ ជើង ក្នុងនោះរួមមានជើងហោះហើរពី ទីក្រុងបាងកក (សុវណ្ណភូមិ) ទៅ ឈៀងម៉ៃ ឈៀងរ៉ៃ ភូកេត ក្រាប៊ី អ៊ូដនថានី ហាតយ៉ៃ ខនខេន ណាខនស៊ី ថាម៉ារ៉ាត់ អ៊ូបន់ រ៉ាត់ឆាថានី និង ស៊ូរ៉ាត់ ថានី។ ចំណែកឯជើងហោះហើរឆ្លងតំបន់មាន ពីភូកេតទៅឈៀងរ៉ៃ ឈៀងម៉ៃ និង អ៊ូដុន ថានី រួមទាំងជើងហោះហើរត្រង់ពី ហាត់យ៉ៃ ទៅ ឈៀងរ៉ៃ ផងដែរ។ ក្រុមហ៊ុនក៏កំពុងតែពង្រីកបណ្តាញហោះហើរអន្តរជាតិរបស់ខ្លួនយ៉ាងសកម្មទៅកាន់គោលដៅជាច្រើននៅទូទាំងអាស៊ីប៉ាស៊ីហ្វិក ដោយភ្ជាប់ប្រទេសថៃជាមួយ វៀតណាម សិង្ហបុរី កោះតៃវ៉ាន់ និងគោលដៅផ្សេងៗទៀតនៅក្នុងតំបន់។

សម្រាប់ព័ត៌មានបន្ថែម៖ 012 33 00 22 ឬ www.vietjetair.com

June 8, 2022

សិង្ហបុរី រឹតបន្តឹងសន្តិសុខដើម្បីត្រៀមការពារកិច្ចប្រជុំកំពូលសន្តិសុខអាស៊ី ឆ្នាំ ២០២២ ដែលនឹងមានប្រតិភូជាង ៥០០ ក្រុមចូលរួម
រដ្ឋាភិបាលសិង្ហបុរី ថ្មី ៗនេះបានឱ្យដឹងថា នឹងបង្កើនការរឹតបន្តឹងសន្តិសុខដើម្បីធានាចរាចរណ៍ឱ្យបានរលូន ក៏ដូចជាការពារសន្តិសុខ សុវត្ថិភាពជូនដល់ក្រុមប្រតិភូនានាដែលនឹងចូលរួម ព្រឹត្តិការណ៍សន្ទនា IISS Shangri-La ២០២២។
ក្រសួងការពារជាតិសិង្ហបុរី អះអាងថា នឹងសហការយ៉ាងជិតស្និទ្ធជាមួយគណៈកម្មការរៀបចំ និងដៃគូសហការនានាដើម្បីរៀបចំវិធានការធានាសន្តិសុខខ្ពស់បំផុត និងធ្វើការកែសម្រួលស្ថានការណ៍នានាដើម្បីការពារសុវត្ថិភាពជូនប្រតិភូដែលចូលរួមព្រឹត្តិការណ៍នេះ។
ទាហានរាប់ពាន់នាក់របស់ សិង្ហបុរី ក៏ត្រូវបានដាក់ពង្រាយដើម្បីការពារសន្តិសុខ។ ទន្ទឹមនឹងនេះ សមត្ថកិច្ចក៏កំពុងញាប់ដៃញាប់ជើងក្នុងការដំឡើងកាមេរ៉ា នៅជុំវិញសណ្ឋាគារ IISS Shangri-La ២០២២ សម្រាប់តាមដានរាល់សភាពការណ៍ដើម្បីអាចរកឃើញ និងទប់ទល់នឹងបញ្ហាដែលអាចប៉ះពាល់ដល់សន្តិសុខ សុវត្ថិភាពនៃព្រឹត្តិការណ៍នេះ។
ប្រជាជនសិង្ហបុរី ត្រូវបានស្នើឱ្យចៀសពីបណ្ដាដងផ្លូវដែលនៅជុំវិញទីតាំងប្រារព្ធព្រឹត្តិការណ៍ចាប់ពីថ្ងៃទី ១០ ដល់ ១២ មិថុនា ហើយត្រូវគោរពតាមការណែនាំរបស់ប៉ូលិសនៅពេលចូលរួមធ្វើដំណើរតាមដងផ្លូវក្បែរតំបន់សណ្ឋាគារ Shangri-La។
ព្រឹត្តិការណ៍សន្ទនា IISS Shangri-La លើកទី ១៩ ឆ្នាំ ២០២២ ត្រូវបានរៀបចំឡើងវិញបន្ទាប់ពីត្រូវផ្អាកពីរឆ្នាំដោយសារកូវីដ-១៩។ ឆ្នាំនេះ Shangri-La គ្រោងនឹងទទួលប្រតិភូជាង ៥០០ ក្រុម មកពីប្រទេស និងដែនដីជិត ៥០ ក្នុងពិភពលោក។
ព្រឹត្តិការណ៍សន្ទនា IISS Shangri-La គឺជាវេទិកាលំដាប់កំពូលដែលពិភាក្សាគ្នាអំពីបញ្ហាសន្តិសុខ និងការពារជាតិដ៏ធំមួយក្នុងពិភពលោក។ នាយករដ្ឋមន្ត្រីជប៉ុន នឹងធ្វើជាវាគ្មិនសំខាន់ ថ្លែងសន្ទរកថាគន្លឹះៗនៅក្នុងថ្ងៃបើកកិច្ចសន្ទនា។ ក្រៅពីនេះ រដ្ឋមន្ត្រីការពារជាតិអាម៉េរិក និង ចិន ក៏បានបញ្ជាក់ថា នឹងចូលរួមកិច្ចប្រជុំកំពូលសន្តិសុខអាស៊ី នេះ។
ចំណែក កម្ពុជា វិញ ឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ ក៏នឹងអញ្ជើញដឹកនាំគណៈប្រតិភូជាន់ខ្ពស់នៃកងយោធពលខេមរភូមិន្ទ ចូលរួមកិច្ចសន្ទនា Shangri-La លើកទី ១៩ នេះផងដែរ៕
June 8, 2022