ក្រុមហ៊ុន Airbus នឹងបាញ់បង្ហោះម៉ាស៊ីនបោះពុម្ភ 3D លោហធាតុដំបូងទៅកាន់ស្ថានីយអវកាសអន្តរជាតិ (ISS) នៅឆ្នាំក្រោយ ដើម្បីបើកផ្លូវសម្រាប់គម្រោងសាងសង់រោងចក្ររបស់ខ្លួននៅក្នុងទីអវកាស។
ក្រុមហ៊ុនអាកាសចរណ៍អវកាសអឺរ៉ុប Airbus នឹងបញ្ជូនម៉ាស៊ីនបោះពុម្ភ 3D លោហធាតុ ឡើងទៅកាន់ស្ថានីយ ISS នៅឆ្នាំ ២០២៣។ នេះគឺជាជំហានដំបូងនៅក្នុងគម្រោងបង្កើតរោងចក្រផលិតផ្កាយរណបនៅលើគន្លងគោចរជុំវិញផែនដីរបស់ក្រុមហ៊ុន Airbus នេះបើតាមទីភ្នាក់ងារសារព័ត៌មាន Space ចុះផ្សាយកាលពីថ្ងៃទី ៨ មិថុនា។
ម៉ាស៊ីនបោះពុម្ភដែលមានឈ្មោះថា Metal3D អាចដំណើរការជាមួយលោហធាតុរាវក្ដៅដែលមានសីតុណ្ហភាពឡើងដល់ ១,២០០ អង្សាសេ។ Metal3D នឹងក្លាយជាម៉ាស៊ីនបោះពុម្ភ 3D លោហធាតុដំបូងគេនៅលើ ISS ដែលអាចអនុញ្ញាតឱ្យអវកាសចរបោះពុម្ភសម្ភារនានាដូចជា បន្ទះស្កាត់វិទ្យុសកម្ម។ល។ មុននោះ ក្រុមហ៊ុនអាម៉េរិក Made In Space ក៏ធ្លាប់បាននាំយកម៉ាស៊ីនបោះពុម្ភ 3D ឡើងទៅកាន់ ISS ប៉ុន្តែ ទាំងនោះមិនអាចបោះពុម្ភលោហធាតុ។
យោងតាម Airbus កំណែម៉ាស៊ីនបោះពុម្ភ 3D ក្នុងពេលអនាគត អាចបោះពុម្ភសម្ភារដោយប្រើប្រាស់ដីនៅលើឋានព្រះចន្ទ និងកែច្នៃគ្រឿងម៉ាស៊ីននានារបស់ផ្កាយរណបចាស់។ Metal3D គ្រាន់តែជាគ្រឿងបច្ចេកវិទ្យាមួយក្នុងចំណោមគម្រោងជាច្រើនរបស់ Airbus ក្នុងបំណងសាងសង់រោងចក្រមួយនៅក្នុងទីអវកាស។
ការផលិតផ្កាយរណបនៅក្នុងទីអវកាសគឺល្អប្រសើរសម្រាប់បរិស្ថាន ព្រោះថា វាមិនទាមទារឱ្យមានការបាញ់បង្ហោះរ៉ុក្កែតជាច្រើនលើក។ ក្រុមហ៊ុន Airbus សង្ឃឹមថា អាចផលិតផ្កាយរណបពេញលេញនៅក្នុងទីអវកាស ក្នុងអំឡុងពី ៣ ទៅ ៤ ឆ្នាំខាងមុខ។
ISS គ្រាន់តែជាចំណងដំបូងរបស់ Metal3D។ នៅចុងទសវត្សរ៍នេះ កំណែទំនើបរបស់ម៉ាស៊ីនបោះពុម្ភ 3D លោហធាតុ នឹងអាចបោះពុម្ភរ៉ូបូត និងផ្ទះនៅលើឋានព្រះចន្ទ៕
