សឿន សំណាង - La Reine Media

រុស្ស៊ី បង្ហាញលក្ខខណ្ឌដើម្បីបញ្ចប់សង្គ្រាមជាមួយ អ៊ុយក្រែន

អ៊ុយក្រែន ត្រូវតែទទួលយក និងធ្វើតាមសំណើទាំងអស់របស់ រុស្ស៊ី បើសិនជាចង់បញ្ចប់សង្គ្រាម ដែលបច្ចុប្បន្នបានឈានចូលដល់ខែទី ៤ នេះបើតាមអ្នកនាំពាក្យរបស់ វិមានក្រឹមឡាំង Dmitry Peskov។

កាលពីថ្ងៃទី ២៣ មិថុនា លោក Peskov បាននិយាយថា រាល់កិច្ចព្រមព្រៀងសន្តិភាពអាចកើតឡើងបានលុះណាតែ អ៊ុយក្រែន បាន «បំពេញភារកិច្ចទៅតាមរាល់សំណើរបស់ភាគី រុស្ស៊ី»។ អ្នកនាំពាក្យរូបនេះក៏បានអះអាងថា អ៊ុយក្រែន «ដឹងច្បាស់គ្រប់យ៉ាង»។

សម្ដីរបស់លោក Peskov ត្រូវបានលើកឡើងបន្ទាប់ពីមានអត្ថបទសារព័ត៌មានមួយដែលបានចុះផ្សាយលើទំព័រ National Interest កាលពីសប្ដាហ៍កន្លង ដែលបានបង្ហាញអំពីសេណារីយោមួយចំនួន ក្នុងនោះរួមមាន «អ៊ុយក្រែន ត្រូវសន្យាធ្វើជាប្រទេសអព្យាក្រឹតជារៀងរហូត, រុស្ស៊ី ដកទ័ពត្រលប់ទៅកាន់ទីតាំងដូចមុនសង្គ្រាម ហើយ មូស្គូ យល់ព្រមឱ្យ អ៊ុយក្រែន ចូលជាសមាជិករបស់ សហភាពអឺរ៉ុប»។ គម្រោងខាងលើក៏បានអំពាវនាវឱ្យ អ៊ុយក្រែន ទទួលស្គាល់ថា គ្រីមៀ គឺជារបស់ រុស្ស៊ី និងកាត់បន្ថយកម្លាំងទាហានអចិន្ត្រៃយ៍នៅលើដីមកនៅត្រឹម 150.000 នាក់។

ការបញ្ចេញមតិរបស់លោក Peskov ចំពេលដែល អ៊ុយក្រែន ទទួលបានការយល់ព្រមឱ្យក្លាយជាបេក្ខភាពសមាជិករបស់ សហភាពអឺរ៉ុប ដែលនេះអាចបញ្ជាក់ថា អ៊ុយក្រែន ស្ថិតក្នុងតំបន់ អឺរ៉ុប មិនមែនជាផ្នែកមួយរបស់ រុស្ស៊ី ឡើយ៕

June 24, 2022

អាម៉េរិក ផ្ដល់ជំនួយជាអាវុធតម្លៃ ៤៥០ លានដុល្លារបន្ថែមទៀតដល់ អ៊ុយក្រែន

សេតវិមាន ប្រកាសថា សហរដ្ឋអាម៉េរិក នឹងផ្ដល់ជំនួយជាអាវុធតម្លៃ ៤៥០ លានដុល្លារទៀត រួមមានទាំង ប្រព័ន្ធកាំជ្រួចហ្វូងទំនើបជាងមុនចំនួន ៤ ប្រព័ន្ធ ដើម្បីទប់ទល់នឹង រុស្ស៊ី។

«កញ្ចប់ជំនួយនេះរួមមាន អាវុធ និងយោធូបករណ៍ ក្នុងនោះមានប្រព័ន្ធកាំជ្រួចហ្វូងប្រតិកម្មរហ័ស។ ក្រៅពីនេះក៏មាននាវាល្បាត និងគ្រាប់កាំភ្លើងធំរាប់ម៉ឺនគ្រាប់ផងដែរ» អ្នកនាំពាក្យ សេតវិមាន John Kirby កាលពីថ្ងៃទី ២៣ មិថុនា បានឱ្យដឹងដូច្នេះ និងបន្ថែមថា ប្រភេទអាវុធ និងយោធូបករណ៍អាចត្រូវបានប្ដូរផ្លាស់នៅនាទីចុងក្រោយ។

ប្រព័ន្ធកាំជ្រួចហ្វូងប្រតិកម្មរហ័ស HIMARS គឺជាអាវុធដែល អ៊ុយក្រែន ចង់បានបំផុតនៅពេលកំពុងជាប់ដៃប្រយុទ្ធនៅភាគខាងកើត ហើយ រុស្ស៊ី កំពុងតែមានប្រៀបជាង ដោយមានការគាំទ្រពីកាំភ្លើងធំធុនធ្ងន់។

អង្គភាពដំបូងចំនួន ៤ នៃប្រព័ន្ធកាំជ្រួចហ្វូងប្រតិកម្មរហ័សខាងលើ ត្រូវបានប្រគល់រួចហើយ ដើម្បីចាប់ផ្ដើមកម្មវិធីបណ្ដុះបណ្ដាលដល់ ទាហានអ៊ុយក្រែន ក្នុងការប្រើប្រាស់អាវុធទំនើបនេះ។ មន្ទីរបញ្ចកោណ បានឱ្យដឹងថា ៤ អង្គភាពផ្សេងទៀតកំពុងត្រូវបានបញ្ជូនទៅកាន់ អ៊ុយក្រែន។

យោងតាម មន្ទីរបញ្ចកោណ កញ្ចប់ជំនួយថ្មីនេះក៏មានទាំងគ្រាប់កាំភ្លើងធំចំនួន ៣៦,០០០ គ្រាប់, រថយន្តទាញកាំភ្លើងធំ ១៥៥ មម ចំនួន ១៨ គ្រឿង, កាំភ្លើងបាញ់គ្រាប់បែក ១,២០០ ដើម, កាំភ្លើងយន្ត ២,០០០ ដើម, នាវាល្បាតឆ្នេរសមុទ្រ និងទន្លេចំនួន ១៨ គ្រឿង រួមនឹងគ្រឿងបន្លាស់ផងដែរ។

គិតចាប់តាំងពីពេល រុស្ស៊ី ចូលឈ្លានពាន អ៊ុយក្រែន សហរដ្ឋអាម៉េរិក បានផ្ដល់ជំនួយដល់ អ៊ុយក្រែន សរុប ៦.១ ពាន់លានដុល្លារ រាប់ទាំងកញ្ចប់ជំនួយថ្មីនេះ៕

June 24, 2022

ទំនិញឡើងថ្លៃខ្ពស់ រាជរដ្ឋាភិបាលម៉ាឡេស៊ី ផ្ដល់ប្រាក់ជំនួយដល់គ្រួសារក្រីក្រដែលរងផលប៉ះពាល់

នាយករដ្ឋមន្ត្រីម៉ាឡេស៊ី លោក Ismail Sabri Yaakob បានប្រកាសបញ្ចេញកញ្ចប់ថវិកាជំនួយបន្ថែមចំនួន ៦៣០ លាន RM (១៤៣ លានដុល្លារអាម៉េរិក) ដើម្បីជួយដល់បណ្ដាគ្រួសារដែលមានប្រាក់ចំណូលទាប សម្រាប់ទប់ទល់នឹងបញ្ហាទំនិញឡើងថ្លៃ ដែលបណ្ដាលឱ្យមានការចំណាយខ្ពស់។

គ្រួសារក្រីក្រទាំងឡាយដែលរកបានប្រាក់ចំណូលសរុបក្រោម ៤,៨៥០ RM (១,០០០ ដុល្លារអាម៉េរិក)/ខែ នឹងទទួលបានប្រាក់ជំនួយ ១០០ RM (២២ ដុល្លារ)/ម្នាក់។ ចំណែកអ្នកនៅលីវនឹងទទួលបាន ១១ ដុល្លារ/ម្នាក់។ កម្មវិធីខាងលើនេះនឹងត្រូវបានអនុវត្តចាប់ពីថ្ងៃទី ២៧ មិថុនា និងចែកជា ៤ ដំណាក់កាល។

យោងតាមប្រកាសនាថ្ងៃនេះ នាយករដ្ឋមន្ត្រីម៉ាឡេស៊ី យល់ថា កម្មវិធីផ្ដល់ជំនួយនេះនឹងផ្ដល់ផលប្រយោជន៍ដល់ពលរដ្ឋជាង ៨.៦ លាននាក់ ក្នុងនោះ គ្រួសារនីមួយៗនឹងទទួលបានប្រាក់ឧបត្ថម្ភខ្ពស់បំផុតត្រឹម ៥០០ RM ប្រហែល ១១៣ ដុល្លារអាម៉េរិក។

ដំណាក់កាលទីពីរ នឹងបែងចែកបន្ថែមចំនួន ៦៥០ លាន RM នាំឱ្យកញ្ចប់ជំនួយសរុបឡើងដល់ ១.៧៤ ពាន់លាន RM ប្រហែល ៣៩៥ លានដុល្លារអាម៉េរិក។

June 23, 2022

រោងចក្រផលិតរថយន្តអគ្គិសនី Tesla កំពុងតែខាតរាប់ពាន់លានដុល្លារសហរដ្ឋអាម៉េរិក

«ទាំងរោងចក្រនៅ រដ្ឋធានី Berlin ទាំងរោងចក្រនៅ Austin គឺសុទ្ធជា «ឡដុតលុយ» ដ៏ធំ» នេះបើតាម មហាសេដ្ឋី Elon Musk ដែលបានបង្ហើបឱ្យដឹងក្នុងកិច្ចសម្ភាសមួយនាពេលថ្មីៗនេះ។

ទីភ្នាក់ងារសារព័ត៌មាន Bloomberg បានរាយការណ៍ថា បណ្ដារោងចក្រផលិតរថយន្តអគ្គិសនីរបស់ Tesla នៅ ប្រទេសអាល្លឺម៉ង់ និងនៅ Texas សហរដ្ឋអាម៉េរិក កំពុងខាតរាបសិបពាន់លានដុល្លារ ក្នុងគ្រាដែលក្រុមហ៊ុននេះកំពុងប្រឹងប្រែងបង្កើនផលិតភាព។

នៅក្នុងកិច្ចសម្ភាសមួយកាលពីពេលថ្មីៗនេះ នាយកប្រតិបត្តិរបស់ Tesla លោក Elon Musk បានឱ្យដឹងថា «ទាំងរោងចក្រនៅ Berlin ទាំងរោងចក្រនៅ Austin គឺសុទ្ធតែជា «ឡដុតលុយ» ដ៏ធំ»។

លោក Musk ក៏បានបង្ហើបឱ្យដឹងដែរអំពីគម្រោងកាត់បន្ថយបុគ្គលិកពេញសិទ្ធិចំនួន ១០% និងជ្រើសរើសបុគ្គលិកថ្មីដែលធ្វើតាមកិច្ចសន្យា។ ការសម្រេចនេះនឹងត្រូវអនុវត្តក្នុងអំឡុង ៣ ខែខាងមុខ។ បច្ចុប្បន្ន បុគ្គលិកពេញសិទ្ធិរបស់ Tesla មានចំនួន ២/៣ នៃកម្មករសរុបរបស់ក្រុមហ៊ុននេះ ក្រៅពីនេះគឺសុទ្ធតែជាបុគ្គលិកមានកិច្ចសន្យា។

យោងតាម Bloomberg ក្រុមហ៊ុន Tesla បានចំណាយពេលច្រើនឆ្នាំដើម្បីផ្ដល់អាទិភាពលើការសាងសង់រោងចក្រថ្មីនៅពាសពេញពិភពលោក ដើម្បីកាត់បន្ថយការចំណាយទៅលើការចែកចាយផលិតផល។ តាមគម្រោង រោងចក្រ Tesla នៅ អាល្លឺម៉ង់ នឹងផលិតរថយន្តបាន ៥០០,០០០ គ្រឿងជារៀងរាល់ឆ្នាំ។

ក៏ប៉ុន្តែ ដោយសារតែការទិញដូរ Twitter នៅមានបញ្ហាច្រើន ដូច្នេះ ក្រុមអ្នកជំនាញយល់ថា Elon Musk ទំនងជាពិបាកក្នុងការផ្ដោតអារម្មណ៍ទៅលើការដឹកនាំ Tesla ពិសេសគឺនៅក្នុងពេលដែលក្រុមហ៊ុនដទៃកំពុងប្រឹងប្រែងដណ្ដើមទីផ្សាររថយន្តអគ្គិសនីដែលកំពុងផ្ទុះការពេញនិយមខ្លាំងនាបច្ចុប្បន្ន៕

June 23, 2022

ធ្លាក់ឧទ្ធម្ភាគចក្រនៅ សហរដ្ឋអាម៉េរិក បណ្ដាលឱ្យមនុស្សច្រើននាក់បាត់បង់ជីវិត

យោងតាម CNN ដែលបានចុះផ្សាយនាថ្ងៃនេះ មនុស្ស ៦ នាក់បានស្លាប់នៅក្នុងហេតុការណ៍ធ្លាក់ឧទ្ធម្ភាគចក្រទេសចរណ៍មួយគ្រឿងនៅក្នុងស្រុក Logan កាលពីព្រលប់ថ្ងៃទី ២២ មិថុនា។

នាយកដ្ឋានអាកាសចរណ៍អាម៉េរិក បានឱ្យដឹងថា ឧទ្ធម្ភាគចក្រប្រភេទ Bell UH-1B មួយគ្រឿងបានធ្លាក់នៅលើផ្លូវល្បឿនលឿនលេខ១៧ (State Route 17) នៅក្នុងស្រុក Logan នៃតំបន់ភាគនិរតីរបស់ រដ្ឋ Virginia ខាងលិច នាវេលាម៉ោងប្រហែល ១៧ ម្សិលមិញ (ម៉ោងក្នុងស្រុក)។ ឧទ្ធម្ភាគចក្រនេះបានឆាបឆេះមុនពេលក្រុមសង្គ្រោះបន្ទាន់បានទៅដល់។

បន្ទាប់ពីហេតុការណ៍ខាងលើបានកើតឡើង អភិបាលរដ្ឋ Virginia ខាងលិច លោក Jim Justice ក៏បានបង្ហោះសារចូលរួមរំលែកទុក្ខដល់គ្រួសារជនរងគ្រោះ និងបញ្ជាក់ថា នឹងប្រកាសមូលហេតុដែលនាំឱ្យកើតមានគ្រោះថ្នាក់នេះ៕

June 23, 2022

កប៉ាល់ដឹកកុងតឺន័រធំជាង ៣.៥ ដង ធៀបនឹងទីលានបាល់ទាត់ ត្រូវបានប្រគល់ជូនអតិថិជន

ក្នុងអំឡុងពេលតែជាងមួយខែសោះ ប្រទេសចិន បានប្រគល់កប៉ាល់ដឹកកុងតឺន័រខ្នាតធំបំផុតក្នុងពិភពលោក ទៅឱ្យក្រុមហ៊ុន Evergreen Marine របស់ តៃវ៉ាន់។

Hudong Zhonghua Shipbuilding ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនសាងសង់កប៉ាល់រដ្ឋចិន បានបញ្ចប់ការងារដំឡើងកប៉ាល់ដឹកកុងតឺន័រមហាយក្ស Ever Alot និងប្រគល់ជូនដៃគូសហការ Evergreen Marine កាលពីថ្ងៃទី ២២ មិថុនា។

ដោយមានបណ្ដោយប្រវែង ៣៩៩.៩៩ ម៉ែត្រ និងទទឹងធំជាង ៣.៥ ដង ធៀបនឹងទីលានបាល់ទាត់ស្ដង់ដា នេះគឺជាកប៉ាល់ដឹកកុងតឺន័រប្រភេទធំបំផុតក្នុងពិភពលោក ពោលគឺធំស្មើនឹង Ever Aria ដែលត្រូវបានប្រគល់ជូនអតិថិជនកាលពីខែមុន។

Ever Alot អាចផ្ទុកកុងតឺន័របាន ២៤,០០០ TEU ដែលប្រហាក់ប្រហែលនឹងតុងតឺន័រស្ដង់ដា ២០ feet ចំនួន ២៤,០០០ កុងតឺន័រ។ ធៀបនឹងកប៉ាល់ប្រភេទ ២៣,០០០ TEU ដែលប្រើប្រាស់ឥន្ធនៈធម្មតា កប៉ាល់ ២ គ្រឿងថ្មីដែលត្រូវបានសាងសង់ដោយ Hudong Zhonghua Shipbuilding មិនត្រឹមតែអាចដឹកកុងតឺន័របានច្រើនជាងនោះទេ តែក៏ប្រើប្រាស់បច្ចេកវិទ្យាដែលអនុញ្ញាតឱ្យវាបញ្ចេញឧស្ម័នកាបូនតិចជាង ៣៨ តោន/ថ្ងៃ។

Hudong Zhonghua Shipbuilding បានឱ្យដឹងថា ពួកគេទទួលបានការបញ្ជាទិញកប៉ាល់ប្រភេទនេះចំនួន ៩ គ្រឿងឯណោះ ហើយ ៣ គ្រឿងក្នុងចំណោមនោះនឹងត្រូវប្រគល់ជូនអតិថិជននៅក្នុងឆ្នាំនេះ។

June 23, 2022

ស្ថានភាពជំងឺកូវីដ-១៩ នៅ កម្ពុជា សម្រាប់ថ្ងៃទី ២៣ ខែមិថុនា ២០២២

ក្នុងអំឡុង ២៤ ម៉ោង នៃថ្ងៃទី ២២ ខែមិថុនា ២០២២ កម្ពុជា មិនមានករណីជាសះស្បើយថ្មី, មិនមានករណីវិជ្ជមានថ្មី និងមិនមានករណីស្លាប់ថ្មី ដោយសារកូវីដ-១៩ នោះទេ។

នេះគឺជាថ្ងៃទី ៤៧ ហើយ ដែល កម្ពុជា មិនមានករណីវិជ្ជមានថ្មីនឹងជំងឺកូវីដ-១៩។

June 23, 2022

ប្រទេសចិន ទើបតែរកឃើញ «ខ្សាច់ច្រៀង» លើកដំបូងនៅឆ្នេរសមុទ្រ

ខ្សាច់ច្រៀង ដែលជាតំបន់ខ្សាច់បញ្ចេញសំឡេងដោយធម្មជាតិនៅពេលមានខ្យល់បក់ ត្រូវបានរកឃើញជាលើកដំបូងនៅលើកោះ ហៃណាន (Hainan) របស់ ប្រទេសចិន។

ក្រុមអ្នកវិទ្យាសាស្ត្របានរកឃើញ «ខ្សាច់ចម្រៀង» ខាងលើ នៅតាមឆ្នេរនៃឈូងសមុទ្រ Clearwater របស់ឧបទ្វីប Shenzhou និងតំបន់មួយចំនួនទៀតនៅក្នុង ខេត្តហៃណាន នេះបើតាមការចុះផ្សាយរបស់ Xinhua កាលពីថ្ងៃទី ២០ មិថុនា។ នេះគឺជាលើកដំបូងហើយដែលបាតុភូតសំឡេងខ្សាច់ដ៏ចម្លែកនេះត្រូវបានរកឃើញនៅឯឆ្នេរសមុទ្ររបស់ ប្រទេសចិន។

ខ្សាច់ច្រៀង ខ្សាចហួច ឬហៅថាខ្សាច់កញ្ជ្រៀវ គឺជាតំបន់ខ្សាច់នៅសមុទ្រខ្សាច់ ឬឆ្នេរសមុទ្រដែលអាចបង្កើតជាសំឡេងទៅតាមធម្មជាតិនៅក្នុងខ្យល់ ឬបញ្ចេញសំឡេងចម្លែកនៅពេលមានមនុស្សដើរ ឬពីលើ ដោយសារតែមានការរួមផ្សំរវាងចំណុចពិសេសនៃរូបវិទ្យា ដូចជាទំហំ និងសមាសធាតុរបស់ខ្សាច់នៅទីនោះ។

ខ្សាច់ច្រៀង មាននៅលើតំបន់ជាច្រើនក្នុង ប្រទេសចិន ក្នុងនោះមានភ្នំខ្សាច់ច្រៀងនៅ Dunhuang ខេត្ត Gansu ជាដើម។

ការរកឃើញឆ្នេរខ្សាច់ច្រៀងនេះ នឹងនាំមកនូវផលប្រយោជន៍ច្រើនសម្រាប់សេដ្ឋកិច្ច ដោយសារថា វានឹងទាក់ទាញទេសចរមកទស្សនាកាន់តែច្រើន៕

June 23, 2022

FDA កំពុងស្រាវជ្រាវលើករណីទារកទី ១០ ដែលបានស្លាប់បន្ទាប់ពីញ៉ាំទឹកដោះគោ Abbott

ស្ថាប័នគ្រប់គ្រងអាហារ និងឱសថអាម៉េរិក (FDA) ប្រកាសបើកការស៊ើបអង្កេតលើករណីថ្មីបំផុត ទាក់ទិននឹងទារកម្នាក់ដែលត្រូវបានគេរាយការណ៍ថា បានស្លាប់ «បន្ទាប់ពីប្រើប្រាស់ផលិតផលទឹកដោះគោរូបមន្តដែលផលិតដោយក្រុមហ៊ុន Abbott»។

FDA មិនបានលើកឡើងច្បាស់អំពីផលិតផលជាក់លាក់របស់ Abbott ដែលទារកម្នាក់បានស្លាប់នោះប្រើប្រាស់ ក៏ដូចជាទីតាំងផលិត ប៉ុន្តែបានបញ្ជាក់ថា ការស៊ើបអង្កេតកំពុងស្ថិតនៅក្នុងដំណាក់កាលបឋម។

ចំណែកអ្នកនាំពាក្យរបស់ Abbott បានឱ្យដឹងថា បច្ចុប្បន្ន «មិនមានការសន្និដ្ឋាន» ក៏ដូចជា «មិនមានភ័ស្ដុតាងណាមួយដែលបង្ហាញអំពីទំនាក់ទំនងនៃមូលហេតុ និងលទ្ធផល» រវាងបណ្ដាផលិតផលរបស់ Abbott និងការស្លាប់របស់ទារកខាងលើឡើយ។

ការស៊ើបអង្កេតថ្មីបំផុតនេះត្រូវបានធ្វើឡើងក្រោយពី FDA បានបើកភ្លើងខៀវឱ្យ Abbott កាលពីជិតមួយខែមុន ដោយអនុញ្ញាតឱ្យបើកទ្វាររោងចក្រផលិតម្សៅទឹកដោះគោរបស់ខ្លួននៅ Sturgis ក្នុងរដ្ឋ Michigan។ នេះគឺជារោងចក្រផលិតម្សៅទឹកដោះគោធំជាងគេបង្អស់នៅ សហរដ្ឋអាម៉េរិក។

រោងចក្រខាងលើនេះត្រូវបង្ខំឱ្យបិទទ្វារកាលពីខែកុម្ភៈ ២០២២ បន្ទាប់ពីមានករណីទារក ៤ នាក់ បានឆ្លងមេរោគ ក្នុងនោះមាន ២ នាក់បានស្លាប់។ ប៉ុន្តែ លទ្ធផលនៃការស៊ើបអង្កេតបានបង្ហាញថា ផលិតផលរបស់ Abbott មិនមានលទ្ធភាពជាប្រភពចម្លងមេរោគនៅក្នុងករណីស្លាប់របស់ទារកខាងលើនេះទេ។

សហរដ្ឋអាម៉េរិក បច្ចុប្បន្នប្រឈមនឹងបញ្ហាកង្វះផលិតផលទឹកដោះគោនៅទូទាំងប្រទេស។ កាលពីថ្ងៃទី ២២ មិថុនា រដ្ឋាភិបាលរបស់លោក បៃដិន បានប្រកាសថា កំពុងតែជួយជ្រោមជ្រែកក្នុងការនាំចូលផលិតផលម្សៅទឹកដោះគោសម្រាប់កុមារ ប្រហែល ១៦ លានកំប៉ុង ពី ប្រទេសម៉ិកស៊ិក ដោយចាប់ផ្ដើមពីចុងសប្ដាហ៍នេះ។

គិតមកដល់បច្ចុប្បន្ន FDA បានពិនិត្យ និងស៊ើបអង្កេតលើការតវ៉ាចំនួន ១២៩ ករណី ទាក់ទងនឹងផលិតផលទឹកដោះគោរបស់ Abbott ក្នុងនោះ ភាគច្រើនគឺជាការតវ៉ាដែលត្រូវបានធ្វើឡើងបន្ទាប់ពី Abbott ស្ម័គ្រចិត្តប្រមូលផលិតផលរបស់ខ្លួនមកវិញកាលពីថ្ងៃទី ១៧ កុម្ភៈ៕

June 23, 2022

ប្រធានាធិបតីរុស្ស៊ី លោក ពូទីន បង្ហើបឱ្យដឹងថា អង្គការ BRICS កំពុងអភិវឌ្ឍរូបិយប័ណ្ណអន្តរជាតិថ្មី

កាលពីថ្ងៃទី ២២ មិថុនា ប្រធានាធិបតីរុស្ស៊ី លោក ពូទីន បានឱ្យដឹងថា ក្រុមប្រទេសដែលមានសេដ្ឋកិច្ចទើបលេចធ្លោ (BRICS) ដែលរួមមាន ប្រទេសប្រេស៊ីល, រុស្ស៊ី, ឥណ្ឌា, ចិន និង អាហ្វ្រិកខាងត្បូង កំពុងតែធ្វើការជាមួយគ្នាដើម្បីបង្កើតរូបិយប័ណ្ណបម្រុងអន្តរជាតិថ្មីមួយ។

«បញ្ហាបង្កើតរូបិយប័ណ្ណបម្រុងអន្តរជាតិ ដោយយោងទៅតាមកញ្ចប់ហិរញ្ញវត្ថុរបស់បណ្ដាប្រទេស BRICS គឺជាប្រធានបទដែលកំពុងត្រូវបានពិភាក្សា» បណ្ដាញសារព័ត៌មាន RT (រុស្ស៊ី) ដកស្រង់សម្ដីរបស់ ប្រធានាធិបតី ពូទីន នៅឯវេទិកាសហគ្រិន BRICS បានឱ្យដឹងដូច្នេះ។

មុននោះ BRICS បានឱ្យដឹងថា ពួកគេកំពុងអភិវឌ្ឍបណ្ដាញទូទាត់ប្រាក់រួមមួយដើម្បីកាត់បន្ថយការពឹងផ្អែកលើប្រព័ន្ធហិរញ្ញវត្ថុរបស់បស្ចិមលោក។ ក្នុងថ្ងៃដដែល លោក ពូទីន ក៏បានអះអាងថា បណ្ដាធនាគារនៃបណ្ដាប្រទេសដែលស្ថិតក្នុងអង្គការ BRICS អាចភ្ជាប់ខ្លួនជាមួយប្រព័ន្ធបញ្ជូនសារផ្នែកហិរញ្ញវត្ថុ (SPFS) របស់ រុស្ស៊ី ជំនួសឱ្យ SWIFT។ ក្រុមប្រទេស BRICS ក៏កំពុងតែជំរុញការប្រើប្រាស់រូបិយប័ណ្ណក្នុងស្រុកសម្រាប់ពាណិជ្ជកម្ម។

SPFS មានមុខងារដូចទៅនឹងប្រព័ន្ធទូទាត់ប្រាក់អន្តរជាតិ SWIFT។ SWIFT (Society of Worldwide Interbank Financial Telecommunication) គឺជាបណ្ដាញទូរគមនាគមន៍ហិរញ្ញវត្ថុ នៃធនាគារទូទាំងពិភពលោក។ ប្រព័ន្ធ SWIFT នេះមានស្ដង់ដារតែមួយ ដែលមានសុវត្ថិភាពខ្ពស់បំផុតនៅក្នុងការផ្ទេរ និងទទួលប្រាក់ពីធនាគារ និងស្ថាប័នហិរញ្ញវត្ថុជាង ១១,០០០ ក្រុមហ៊ុន នៅក្នុងប្រទេស និងដែនដីជាង ២០០ របស់ពិភពលោក។ ធនាគារជាតិរបស់ រុស្ស៊ី បានបង្កើត SPFS ដើម្បីប្រើប្រាស់ជំនួស SWIFT គ្រាដែលប្រទេសនេះរងទណ្ឌកម្មយ៉ាងធ្ងន់ធ្ងរដោយសារតែការចូលឈ្លានពានលើ អ៊ុយក្រែន៕

June 23, 2022

Author: សឿន សំណាង