បណ្ដាញសារព័ត៌មានរដ្ឋអ៊ីរ៉ង់ បានឱ្យដឹងថា ឯកអគ្គរដ្ឋទូតរងអង់គ្លេស Whitaker ត្រូវបានចាប់ខ្លួនពីបទធ្វើសកម្មភាពចារកម្ម ប៉ុន្តែ ទីក្រុងឡុងដ៍ បានច្រានចោលព័ត៌មាននេះ។
សារព័ត៌មានរដ្ឋអ៊ីរ៉ង់ កាលពីថ្ងៃទី ៦ កក្កដា បានផ្សាយថា ឆ្មាំបដិវត្តអ៊ីស្លាម (IRGC) បានចាប់ខ្លួនជនបរទេសជាច្រើននាក់ ក្នុងនោះក៏មានទាំង ឯកអគ្គរដ្ឋទូតរងអង់គ្លេស នៅ អ៊ីរ៉ង់ គឺលោក Giles Whitaker ផងដែរ ដោយបានសង្ស័យថា មានសកម្មភាពចារកម្ម ប៉ុន្តែ មិនបានឱ្យដឹងលម្អិតអំពីហេតុការណ៍នេះ។
«ក្រុមចារបុរសបានយកសំណាកដីនៅសមុទ្រខ្សាច់ភាគកណ្ដាលរបស់ អ៊ីរ៉ង់ ជាទីដែល IRGC ធ្វើសមយុទ្ធបាញ់មីស៊ីល» បណ្ដាសារព័ត៌មានរដ្ឋអ៊ីរ៉ង់ ចេញផ្សាយដូច្នេះ និងបានបង្ហាញរូបថតលោក Whittaker ដែលហាក់កំពុងតែប្រមូលសំណាកដីនៅពេលកំពុងធ្វើដំណើរជាមួយគ្រួសារ។ «ជននេះត្រូវបានបណ្ដេញចេញពីទីក្រុង បន្ទាប់ពីបានសូមអភ័យទោសចំពោះអាជ្ញាធរ»។
អ្នកនាំពាក្យក្រសួងការបរទេសអង់គ្លេស បានច្រាលចោលព័ត៌មាននេះ ដោយយល់ថា «ព័ត៌មានស្ដីពីករណីចាប់ខ្លួនអ្នកការទូតអង់គ្លេស នៅ អ៊ីរ៉ង់ គឺជារឿងមិនពិត»។ «ជាងនេះ គាត់មិននៅធ្វើការក្នុង ប្រទេសអ៊ីរ៉ង់» អ្នកនាំពាក្យរបស់ ស្ថានទូតអង់គ្លេស ប្រចាំ សហរដ្ឋអាម៉េរិក Samuel Heath សរសេរលើ Twitter ដូច្នេះ។
បណ្ដាញសារព័ត៌មានរដ្ឋអ៊ីរ៉ង់ ក៏បានឱ្យដឹងថា ក្នុងចំណោមក្រុមមនុស្សដែលត្រូវបានចាប់ខ្លួនក៏មានស្វាមីរបស់ អនុព័ន្ធវប្បធម៌អូទ្រីស ប្រចាំនៅ អ៊ីរ៉ង់ និងសាស្ត្រាចារ្យនៃសាកលវិទ្យាល័យប៉ូឡូញ ផងដែរ។
