ឯកអគ្គរដ្ឋទូតរុស្ស៊ី ប្រចាំ ប្រទេសអង់គ្លេស Andrei Kelin យល់ថា ការដែលនាយករដ្ឋមន្ត្រី ចនសុន លាលែងពីតំណែងគឺជា «រង្វាន់» ដែលបានពីគោលនយោបាយប្រឆាំងនឹង រុស្ស៊ី ដើម្បីគាំទ្រ អ៊ុយក្រែន។
«ចនសុន ផ្ដោតទៅលើស្ថានការណ៍ភូមិសាស្ត្រនយោបាយខ្លាំងពេក អំពី អ៊ុយក្រែន និងបណ្ដែតបណ្ដោយបញ្ហាជាច្រើននៅក្នុងប្រទេស ប្រជាជន និងស្ថានភាពសេដ្ឋកិច្ច ហើយអ្វីដែលកើតឡើងនៅថ្ងៃនេះគឺជាលទ្ធផលនៃការបណ្ដែតបណ្ដោយនោះ» ឯកអគ្គរដ្ឋទូតរុស្ស៊ី ប្រចាំ អង់គ្លេស លោក Kelin ថ្លែងនៅក្នុងកិច្ចសម្ភាសកាលពីថ្ងៃទី ៧ កក្កដា។
«ប្រជាជនកំពុងត្រូវរងផលប៉ះពាល់ពីតម្លៃទំនិញឡើងខ្ពស់ ពន្ធឡើងខ្ពស់។ ការសន្យារបស់រដ្ឋាភិបាល មិនត្រូវបានអនុវត្ត» លោក Kelin អាយុ ៦៥ ឆ្នាំ និយាយអំពីបញ្ហាដែលលោក ចនសុន បានបន្សល់ទុក។
រាប់ចាប់តាំងពីថ្ងៃទី ៥ កក្កដា នៅ អង់គ្លេស មានរដ្ឋមន្ត្រី អនុរដ្ឋមន្ត្រី និងជំនួយការតំណាងរាស្ត្រជិត ៦០ រូប នៃគណបក្សអភិរក្សនិយម (Conservative Party) បាននាំគ្នាដាក់ពាក្យសុំលាលែងពីតំណែង នៅពេលការគាំទ្រសម្រាប់លោក ចនសុន បានថយចុះយ៉ាងគំហុក។
លោក បូរីស ចនសុន ថ្មីៗនេះបានប្រឈមមុខនឹងបញ្ហា និងការរិះគន់ជាច្រើន ក្នុងនោះមានទាំងការដែលលោកបានធ្វើពិធីជប់លៀងក្នុងគ្រាដែល អង់គ្លេស កំពុងបិទខ្ទប់ដើម្បីបង្ការជំងឺកូវីដ-១៩ កាលពីឆ្នាំ ២០២០ បញ្ហាសេដ្ឋកិច្ចដែលត្រូវបានគេព្យាករថា មានហានិភ័យធ្លាក់ទៅក្នុងវិបត្តិ ព្រោះតែអស្ថិរភាពដែលទាក់ទិននឹងបញ្ហាទំនិញឡើងថ្លៃ និងវិបត្តិប្រេងឥន្ធនៈសកលដែលកើតឡើងដោយសារសង្គ្រាមនៅ អ៊ុយក្រែន៕
