សឿន សំណាង - La Reine Media

ប្រទេសថៃ ពន្យារសុពលភាពនៃការបន្ថយពន្ធប្រើប្រាស់ពិសេសចំពោះប្រេងម៉ាស៊ូត

រាជរដ្ឋាភិបាលថៃ កាលពីម្សិលមិញ បានឯកភាពលើការពន្យារសុពលភាពនៃការបន្ថយពន្ធប្រើប្រាស់ពិសេសចំពោះប្រេងម៉ាស៊ូត ត្រឹម ៥ បាត/លីត្រ (១៤ សេនអាម៉េរិក/លីត្រ) រយៈពេល ២ ខែទៀត (ចាប់ពីថ្ងៃទី ២១ កក្កដា ដល់ ២០ កញ្ញា) ដើម្បីជួយកាត់បន្ថយផលប៉ះពាល់ពីឥទ្ធិពលនៃតម្លៃឥន្ធនៈដែលកំពុងឡើងខ្ពស់។

អ្នកនាំពាក្យរបស់ រាជរដ្ឋាភិបាលថៃ Thanakorn Wangboonkongchana បានឱ្យដឹងថា ការពន្យារសុពលភាពខាងលើនេះគ្រាន់តែជាវិធានការបណ្ដោះអាសន្ន ដើម្បីជួយកាត់បន្ថយការចំណាយរបស់ប្រជាជន និងសហគ្រាស នៅពេលតម្លៃប្រេងពិភពលោកនៅតែស្ថិតក្នុងកម្រិតខ្ពស់។

មុននោះ កាលពីខែឧសភា ២០២២ គណៈរដ្ឋមន្ត្រីថៃ បានអនុម័តលើការកាត់បន្ថយពន្ធប្រើប្រាស់ពិសេសចំពោះប្រេងម៉ាស៊ូត ចំនួន ៥ បាត/លីត បន្ថែមទៀត រហូតដល់ថ្ងៃទី ២០ កក្កដា។ ការកាត់បន្ថយពន្ធនេះត្រូវបានធ្វើឡើងបន្ទាប់ពីរដ្ឋាភិបាលបានសម្រេចបន្ថយពន្ធប្រើប្រាស់ពិសេស ៣ បាត/លីត្រ កាលពីខែកុម្ភៈ។

លោក Thanakorn បានអះអាងថា ការបន្ថយពន្ធនេះនឹងនាំឱ្យរដ្ឋាភិបាលបាត់បង់ប្រាក់ចំណូលប្រហែល ២០ ពាន់លានបាត (៥៥១ លានដុល្លារអាម៉េរិក) ក្នុងនោះ ការបន្ថយពន្ធ ១ បាត/លីត្រ នឹងធ្វើឱ្យរដ្ឋាភិបាលបាត់បង់ចំណូលប្រហែល ១.៩ ពាន់លានបាត (៥២ លានដុល្លារអាម៉េរិក) ជារៀងរាល់ខែ៕

July 13, 2022

មន្ត្រីជាន់ខ្ពស់នៃក្រសួងពាណិជ្ជកម្ម ថា ចំនួនពាក្យស្នើសុំធ្វើអាជីវកម្មដែលចុះបញ្ជីតាមប្រព័ន្ធអនឡាញកើនឡើងខ្ពស់

គិតមកដល់បច្ចុប្បន្ន ក្រសួងពាណិជ្ជកម្ម បានទទួលពាក្យស្នើសុំលិខិតអនុញ្ញាត ឬអាជ្ញាប័ណ្ណពាណិជ្ជកម្មតាមប្រព័ន្ធអេឡិចត្រូនិក បានកើនដល់ជិត ៧,០០០ ពាក្យហើយ នេះបើតាមលោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម។

ប្រសាសន៍របស់ រដ្ឋលេខាធិការក្រសួងពាណិជ្ជកម្ម ត្រូវបានលើកឡើងនៅឯសណ្ឋាគារ អូឡាំព្យា ស៊ីធី ក្នុងពិធីបិទវគ្គ និងប្រគល់វិញ្ញាបនបត្របណ្តុះបណ្តាល ស្តីពីអាជីវកម្មបែបឌីជីថលសម្រាប់សហគ្រាសធុនមីក្រូ តូច និងមធ្យម កាលពីរសៀលថ្ងៃទី ១២ កក្ដដា។

យោងតាមប្រសាសន៍របស់លោកជំទាវ តឹករ៉េត កំរង ចរន្តនៃបដិវត្តន៍ឧស្សាហកម្មជំនាន់ទី ៤ កំពុងជះឥទ្ធិពលយ៉ាងខ្លាំងលើគ្រប់វិស័យ ក្នុងនោះ វិស័យធុរកិច្ចទទួលរងឥទ្ធិពលពីបច្ចេកវិទ្យាឌីជីថល ខ្លាំងក្លាជាងគេ។ អាជីវកម្មបែបឌីជីថលបច្ចុប្បន្ន ពិតជារួមចំណែកយ៉ាងសំខាន់ក្នុងការលើកកម្ពស់បច្ចេកវិទ្យាឌីជីថលសម្រាប់សហគ្រាសធុនមីក្រូ តូច និងមធ្យម ដែលជាឆ្អឹងខ្នងនៃសេដ្ឋកិច្ចជាតិ។

កម្មវិធីបណ្តុះបណ្តាល ស្តីពីអាជីវកម្មបែបឌីជីថលសម្រាប់សហគ្រាសធុនមីក្រូ តូច និងមធ្យម ខាងលើនេះ ត្រូវបានអនុវត្តដោយ សមាគមសហគ្រិនវ័យក្មេងកម្ពុជា គាំទ្រដោយភ្នាក់ងារអភិវឌ្ឍន៍អង្គការសហប្រជាជាតិ ក្រោមការផ្តួចផ្តើមថ្មី នៃគម្រោងពង្រីកពាណិជ្ជកម្មតាមប្រព័ន្ធអេឡិចត្រូនិចនៅ កម្ពុជា ផ្តោតលើជំនាញ និងសហគ្រិនភាព សម្រាប់ការធ្វើពាណិជ្ជកម្មតាមប្រព័ន្ធអេឡិចត្រូនិច ដែលទទួលបានការគាំទ្រផ្នែកហិរញ្ញវត្ថុពី ក្រសួងសេដ្ឋកិច្ច និងហិរញ្ញវត្ថុ និង កម្មវិធី EIF (Enhanced Integrated Framework)៕

July 13, 2022

លើកដំបូងក្នុងរយៈពេល ២០ ឆ្នាំ ដែលប្រាក់ដុល្លារអាម៉េរិក ខ្លាំងជាងប្រាក់ អឺរ៉ូ ក្នុងផ្សារជួញដូរនៅ រុស្ស៊ី

ប្រាក់អឺរ៉ូ បានធ្លាក់ថ្លៃចុះមកនៅទាបជាងប្រាក់ដុល្លារអាម៉េរិក នៅក្នុងផ្សារជួញដូរ Moskva កាលពីថ្ងៃទី ១២ កក្កដា ក្នុងគ្រាមានការបារម្ភអំពីវិបត្តិថាមពលដែលអាចរុញច្រាន សហភាពអឺរ៉ុប (EU) ឱ្យធ្លាក់ទៅក្នុងវិបត្តិសេដ្ឋកិច្ច។

យោងតាមបណ្ដាញព័ត៌មាន RT (រុស្ស៊ី) ១ ដុល្លារអាម៉េរិក ដូរបាន ៥៨.៧ រូប្លរុស្ស៊ី ខណៈដែល ១ អឺរ៉ូ ដូរបាន ៥៨.៥២ រូប្លរុស្ស៊ី នៅវេលាម៉ោង ១៧ និង ៥៦ នាទី នៃថ្ងៃទី ១២ កក្កដា (ម៉ោងនៅ កម្ពុជា)។

នៅលើផ្សារជួញដូរអន្តរជាតិ ប្រាក់អឺរ៉ូ មានតម្លៃជិតស្មើនឹង ប្រាក់ដុល្លារអាម៉េរិក។ ក្នុងការជួញដូររូបិយប័ណ្ណបរទេស ប្រាក់របស់ សហភាពអឺរ៉ុប ធ្លាក់ថ្លៃមកនៅប្រហែល ១.០០០១ ដុល្លារអាម៉េរិក ដែលនេះគឺជាតម្លៃទាប់បំផុតក្នុងរយៈពេល ២០ ឆ្នាំកន្លងមកនេះ។

គិតមកដល់បច្ចុប្បន្ន ប្រាក់អឺរ៉ូ បានធ្លាក់ថ្លៃ ១២% ធៀបនឹងប្រាក់ដុល្លាររបស់ សហរដ្ឋអាម៉េរិក នៅក្នុងឆ្នាំនេះ។ មូលហេតុដែលនាំឱ្យមានបញ្ហានេះកើតឡើងគឺដោយសារតម្លៃថាមពលកើនឡើងខ្ពស់ នៅពេលកើតមានសង្គ្រាមនៅ អ៊ុយក្រែន និងទណ្ឌកម្មដែលបានដាក់ទៅលើ រុស្ស៊ី ដែលជាអ្នកផ្គត់ផ្គង់ថាមពលធំជាងគេរបស់ ទ្វីបអឺរ៉ុប ធ្វើឱ្យសេដ្ឋកិច្ចរបស់ទ្វីបនេះ ពើបប្រទះនឹងភាពវឹកវរ៕

July 13, 2022

ប្រជាពលរដ្ឋសិង្ហបុរី បោះបង់គំនិតទិញរថយន្តផ្ទាល់ខ្លួន នៅពេលវាឡើងថ្លៃ «កប់ពពក»

អ្នកជំនាញផ្នែកប្រព័ន្ធផ្សព្វផ្សាយនៅ សិង្ហបុរី Ellie Lim បានបោះបង់គម្រោងទិញរថយន្ត Volvo ប្រភេទ SUV ថ្មី សម្រាប់ដឹកកូន ប្រពន្ធ នៅពេលដឹងថា ការក្លាយជាម្ចាស់រថយន្តថ្មីមួយគ្រឿងនឹងត្រូវចំណាយប្រាក់ ១៤២,០០០ ដុល្លារអាម៉េរិក។

Lim ដែលមានអាយុ ៣៤ ឆ្នាំ បានឱ្យដឹងថា «ការទិញរថយន្តថ្មីមួយគ្រឿងគឺជាការសម្រេចចិត្តប្រកបដោយអស្ថិរភាពចំពោះហិរញ្ញវត្ថុ នៅពេលអត្រាការប្រាក់នៃឥណទានទិញរថយន្ត តម្លៃប្រេងសាំង និងការចំណាយលើការថែទាំ មានកម្រិតខ្ពស់ខ្លាំង។ ហេតុអ្វីត្រូវចំណាយប្រាក់ស្មើនឹងតម្លៃផ្ទះមួយខ្នងដើម្បីបានក្លាយជាម្ចាស់ទ្រព្យដែលធ្លាក់ថ្លៃលឿនបែបនេះ?»។

នៅ សិង្ហបុរី គំនិតដូច Lim ពិតជាមានច្រើនណាស់។ សិង្ហបុរី គ្រប់គ្រងយ៉ាងតឹងរឹងទៅលើចំនួនរថយន្តដែលបរនៅលើដងផ្លូវ ដោយបង្ខំឱ្យអ្នកទិញធ្វើការដេញថ្លៃលិខិតអនុញ្ញាតប្រើប្រាស់យានយន្ត នាំឱ្យប្រទេសនេះក្លាយជាកន្លែងមួយដែលមានការចំណាយខ្ពស់បំផុតទៅលើរថយន្ត។

កាលពីខែកន្លង ដោយសារតែតម្រូវការកើនឡើងខ្ពស់ និងដោយសារប្រជាពលរដ្ឋចង់ទិញរថយន្តអគ្គិសនីច្រើនពេក ទើបតម្លៃរបស់លិខិតអនុញ្ញាតក៏ត្រូវបានរុញឡើងថែមមួយកម្រិតទៀត។

ដើម្បីកាត់បន្ថយការកកស្ទះចរាចរណ៍ និងការបញ្ចេញឧស្ម័នពុល អាជ្ញាធរសិង្ហបុរី ក៏បានអនុវត្តគម្រោងមួយដែលធ្វើឱ្យរថយន្តក្លាយជារបស់ «ប្រណិត» ទន្ទឹមនឹងការវិនិយោគរាប់ពាន់លានដុល្លារទៅលើបណ្ដាញគមនាគមន៍សាធារណៈដែលមានប្រសិទ្ធភាពជាងមុខ។

លោក Song Seng Wun សេដ្ឋវិទូប្រចាំធនាគារ CIMB បានឱ្យដឹងថា សិង្ហបុរី «គឺជាទីក្រុងមួយក្នុងចំណោមទីក្រុងដ៏តិចតួចបំផុតដែលអាចកាត់បន្ថយចំនួនរថយន្ត។ អ្នកមិនអាចស្ថាបនាផ្លូវបន្ថែម ហើយក៏មិនអាចយកកន្លែង និងធនធានរបស់អ្នកដទៃ ដូច្នេះ បើសិនអ្នកចង់បើកបររថយន្ត អ្នកត្រូវតែបង់លុយ»។

រដ្ឋាភិបាលសិង្ហបុរី គ្រប់គ្រងចរាចរណ៍ដោយប្រើប្រាស់យុទ្ធសាស្ត្រ «បរិមាណមានកំណត់ (កូតា)» និងពន្ធជាច្រើនប្រភេទ នាំឱ្យការចំណាយទៅលើការបើកបររយន្តនៅលើដងផ្លូវត្រូវឡើងខ្ពស់ជាង ៥ ដង ធៀបនឹងតម្លៃនៅក្នុងបណ្ដាប្រទេសផលិតរថយន្ត។ ការចំណាយធំបំផុតគឺលិខិតបញ្ជាក់កម្មសិទ្ធិលើរថយន្ត (COE) ដែលត្រូវបានដាក់ឱ្យដេញថ្លៃ ២ លើកជារៀងរាល់ខែ។ COE ផ្ដល់សិទ្ធិឱ្យរថយន្ត ១ គ្រឿង បើកបរលើដងផ្លូវបាន ១០ ឆ្នាំនៅ សិង្ហបុរី ហើយនៅពេលអស់សុពលភាព ម្ចាស់រថយន្តត្រូវទិញ COE មួយទៀត បើចង់បន្តប្រើប្រាស់រថយន្ត។

ថ្មីៗនេះ តម្លៃដេញថ្លៃទិញ COE បានកើនឡើងដល់កម្រិតខ្ពស់បំផុត គឺ ១១០,៥២៤ ដុល្លារសិង្ហបុរី ប្រហែល ៧៨,៦០០ ដុល្លារអាម៉េរិក។ យោងតាមក្រុមអ្នកសេដ្ឋសាស្ត្រ និងក្រុមហ៊ុនចែកចាយរថយន្ត តម្លៃនេះអាចនឹងកើនឡើងជាបន្តទៀត យ៉ាងហោចក៏ត្រឹមចុងឆ្នាំ ២០២២៕

July 13, 2022

Twitter ចាប់ផ្ដើមប្ដឹងមហាសេដ្ឋី Elon Musk ៖ សង្គ្រាមផ្លូវច្បាប់ធំបំផុតក្នុងប្រវត្តិសាស្ត្រ Wall Street

កាលពីថ្ងៃទី ១២ កក្កដា ក្រុមហ៊ុន Twitter Inc បានដាក់ពាក្យប្ដឹងប្រឆាំងនឹងម្ចាស់ក្រុមហ៊ុនរថយន្តអគ្គិសនី Tesla លោក Elon Musk ដោយចោទថា មហាសេដ្ឋីរូបនេះបានរំលោភលើកិច្ចព្រមព្រៀងទិញ Twitter ក្នុងតម្លៃ ៤៤ ពាន់លានដុល្លារ និងស្នើឱ្យលោក Musk បង្ហើយការទិញដូរនេះ។

ក្នុងពាក្យបណ្ដឹង Twitter បានតវ៉ាអំពីការដែលលោក Musk មើលស្រាលច្បាប់ពាណិជ្ជកម្មរបស់រដ្ឋ Delaware ដោយសារបានប្ដូរផ្លាស់គំនិតតាមតែអំពើចិត្ត ធ្វើឱ្យមានការខាតបង់ដល់ក្រុមហ៊ុន បង្កការរអាក់រអួលដល់សកម្មភាព និងបំផ្លាញតម្លៃរបស់ភាគហ៊ុនិក។

បញ្ចប់ការជួញដូរកាលពីថ្ងៃទី ១២ កក្កដា នៅក្នុងទីផ្សារ New York ភាគហ៊ុនរបស់ Twitter មានតម្លៃ ៣៤.០៦ ដុល្លារ/ហ៊ុន កើន ៤.៣% ធៀបនឹងថ្ងៃជួញដូរមុននោះ ប៉ុន្តែនៅទាបជាងឆ្ងាយបើធៀបនឹងជាង ៥០ ដុល្លារ កាលពីអំឡុងពេលភាគីលោក Elon Musk និង Twitter យល់ព្រមទិញដូរបណ្ដាញសង្គមនេះក្នុងតម្លៃ ៥៤.២ ដុល្លារ/ហ៊ុន កាលពីចុងខែមេសា ២០២២។

រឿងក្ដីនេះ ត្រូវបានក្រុមអ្នកជំនាញវាយតម្លៃថា នឹងក្លាយជាសង្គ្រាមផ្លូវច្បាប់ធំបំផុតក្នុងប្រវត្តិសាស្ត្រ Wall Street ទាក់ទងនឹងក្រុមហ៊ុនខ្នាតយក្ស៕

July 13, 2022

កម្ពុជាគ្រោងដំឡើងឧបករណ៍ «ប្រឆាំងរន្ទះ» នៅតំបន់ដែលមានហានិភ័យខ្ពស់

ខណៈដែលបាតុភូតរន្ទះបានបង្កឱ្យមានមនុស្សស្លាប់ និងសត្វពាហនៈងាប់ជារៀងរាល់ឆ្នាំ គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) គ្រោងនឹងរៀបចំដំឡើងឧបករណ៍ប្រឆាំងរន្ទះ នៅតាមតំបន់មួយចំនួនដែលតែងកើតមានបាតុភូតនេះ។

គ្រោះធម្មជាតិកើតមានជារៀងរាល់ឆ្នាំ និងបានបំផ្លិតបំផ្លាញទ្រព្យសម្បត្តិ អាយុជីវិតជាច្រើនរបស់ប្រជាពលជន ក្នុងនោះមានដូចជា ទឹកជំនន់ ខ្យល់កន្ត្រាក់ រន្ទះបាញ់ រាំងស្ងួត បាក់ច្រាំងទន្លេ និងជំងឺរាតត្បាតជាដើម នេះបើតាម ឯកឧត្តមទេសរដ្ឋមន្ត្រី គន់ គីម អនុប្រធានទី១ នៃ គ.ជ.គ.ម មានប្រសាសន៍នៅក្នុងវេទិការជាតិស្តីពី ការកាត់បន្ថយហានិភ័យគ្រោះមហន្តរាយ លើកទី ២៩ ធ្វើឡើងនៅថ្ងៃទី ១៣ ខែកក្កដា។

យោងតាម អនុប្រធានទី១ នៃ គ.ជ.គ.ម បញ្ហារន្ទះបាញ់ បានបង្កគ្រោះថ្នាក់ដល់អាយុជីវិតពលរដ្ឋជារៀងរាល់ឆ្នាំ ប៉ុន្តែមិនសូវត្រូវបានគេយកចិត្តទុកដាក់ ដូចនេះ ឯកឧត្តមក៏បានស្នើឱ្យ លេខាធិការដ្ឋានតាមបណ្ដារាជធានីខេត្ត ពិនិត្យមើលតំបន់ទាំងឡាយណាដែលតែងកើតមានរន្ទះ ហើយនៅឆ្នាំនេះ គ.ជ.គ.ម គ្រោងនឹងស្នើសុំទៅក្រសួងសេដ្ឋកិច្ច និងហិរញ្ញវត្ថុ ជួយពិនិត្យលទ្ធភាពទប់ទល់នឹងបាតុភូតនេះ។

ឯកឧត្តមទេសរដ្ឋមន្ត្រី គន់ គីម អនុប្រធានទី១ នៃ គ.ជ.គ.ម

គ.ជ.គ.ម បានឱ្យដឹងថា ដើម្បីទប់ទល់នឹងគ្រោះមហន្តរាយនៅរដូវវស្សាឆ្នាំនេះ គណៈកម្មាធិការ បានត្រៀមកម្លាំងអន្តរាគមន៍ជិត ២,០០០ នាក់ នៅទូទាំងប្រទេស ដោយក្នុងនោះមានបំពាក់ឧបករណ៍សង្គ្រោះបន្ទាន់ យានជំនិះ និងស្បៀងអាហារផងដែរ៕

July 13, 2022

ស្ថានភាពជំងឺកូវីដ-១៩ នៅ កម្ពុជា គិតត្រឹមវេលាទៀបភ្លឺ ថ្ងៃទី ១៣ ខែកក្កដា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ១៦ នាក់ទៀត ក្នុងអំឡុង ២៤ ម៉ោងនៃថ្ងៃទី ១២ ខែកក្កដា ២០២២ ដែលទាំងនេះសុទ្ធតែជាករណីឆ្លងក្នុងសហគមន៍ ខណៈដែលអ្នកជាសះស្បើយថ្មីចំនួន ១៤ នាក់ ចំណែកករណីស្លាប់ថ្មីដោយសារជំងឺនេះ មិនទាន់មាន។

គួរបញ្ជាក់ថា មកទល់ពេលនេះ កម្ពុជាមានករណីឆ្លងថ្មីសរុបចំនួន ១៣៦,៣៩០ នាក់, ករណីជាសះស្បើយចំនួន ១៣៣,២៥៨ នាក់ និងករណីស្លាប់សរុបចំនួន ៣,០៥៦ នាក់។

July 13, 2022

គម្រោងសាងសង់រដ្ឋធានីថ្មីរបស់ ឥណ្ឌាណេស៊ី ទាក់ទាញចំណាប់អារម្មណ៍អ្នកវិនិយោគធំៗ

យោងតាមប្រភពព័ត៌មានពី ហ្សាការតា រដ្ឋាភិបាលឥណ្ឌូណេស៊ី បានឱ្យដឹងថា ក្រុមហ៊ុនអន្តរជាតិចំនួនពីរគឺ Foxconn និង Fosun បានសម្ដែងការចាប់អារម្មណ៍ចំពោះការវិនិយោគទៅលើគម្រោងរដ្ឋធានីថ្មី (IKN) Nusantara នៅក្នុងខេត្ត Kalimantan ខាងកើត បន្ទាប់ពីក្រុមហ៊ុន SoftBank របស់ ជប៉ុន ដកខ្លួនថយកាលពីខែមីនា។

រដ្ឋមន្ត្រីក្រសួងវិនិយោគ Bahlil Lahadalia ថ្លែងថា ក្រុមហ៊ុន Foxconn និង Fosun កំពុងស្វែងយល់អំពីលទ្ធភាពវិនិយោគទៅលើ IKN ក្នុងនោះ Foxconn ពិនិត្យមើលលើការផ្គត់ផ្គង់ថ្នាលបច្ចេកវិទ្យាទីក្រុងឆ្លាតវៃទៅឱ្យ Nusantara។ លោក Bahlil បន្ថែមថា អេមីរ៉ាតអារ៉ាប់រួម (UAE) នៅតែអះអាងថា រក្សាការសន្យាក្នុងការវិនិយោគយ៉ាងតិច ២០ ពាន់លានដុល្លារទៅក្នុងគម្រោងនេះ។

រដ្ឋាភិបាលរបស់លោក Jokowi បានប្រកាសគម្រោងរើរដ្ឋធានីទៅកាន់ខេត្ត Kalimantan ខាងកើត ដែលស្ថិតនៅលើកោះ Borneo ក្រោយពីបានជាប់ឆ្នោតកាលពីឆ្នាំ ២០១៩។ ដើមឆ្នាំនេះ សភាជាន់ទាបបានអនុម័តច្បាប់ស្ដីពី IKN ហើយរដ្ឋាភិបាលក៏បានដាក់ដេញថ្លៃសម្រាប់គម្រោងស្ថាបនាហេដ្ឋារចនាសម្ព័ន្ធមួយចំនួននៅក្នុងតំបន់នេះ។

គម្រោងនេះ ដំបូងឡើយបានទាក់ទាញចំណាប់អារម្មណ៍របស់អ្នកវិនិយោគអន្តរជាតិ ក្នុងនោះមាន Softbank និង UAE ផងដែរ។ ស្ថាបនិករបស់ Softbank លោក Masayoshi Son ត្រូវបានបោះឆ្នោតឱ្យធ្វើជាសមាជិកគណៈកម្មាធិការតាមដានគម្រោង IKN រួមជាមួយនឹងព្រះអង្គម្ចាស់ Abu Dhabi Mohammed Bin Zayed AI Nahyan និង អតីតនាយករដ្ឋមន្ត្រីអង់គ្លេស លោក Tony Blair។ ប៉ុន្តែ កាលពីខែមីនា ក្រុមហ៊ុន Softbank បានប្រកាសដកខ្លួនចេញពីគម្រោងនេះ។

ឥណ្ឌូណេស៊ី ព្យាករថា គម្រោងសាងសង់រដ្ឋធានីថ្មី នឹងចំណាយពេលពី ១៥ ទៅ ២០ ឆ្នាំ

Fosun International គឺជាក្រុមហ៊ុនដ៏ធំមួយរបស់ ប្រទេសចិន ដោយមានចំណូលសរុប ២៥ ពាន់លានដុល្លារ និងទ្រព្យសរុប ១២៦ ពាន់លានដុល្លារ កាលពីឆ្នាំ ២០២១។ តំណាងរបស់ Fosun បានទៅកាន់ ឥណ្ឌូណេស៊ី កាលពីថ្ងៃទី៤ កក្កដា និងត្រូវបានទទួលស្វាគមន៍ដោយ ប្រធានាធិបតី Jokowi កាលពីថ្ងៃទី ៥ កក្កដា។ ចំណែក Foxconn ដែលជាក្រុមហ៊ុនបច្ចេកវិទ្យាមួយ មានចំណូលសរុប ២០១ ពាន់លានដុល្លារ និងចំណេញ ៤ ពាន់លានដុល្លារកាលពីឆ្នាំ ២០២១។

យោងតាមលោក Bahlil ក្រុមហ៊ុន Foxconn ចង់វិនិយោគទៅលើគម្រោង IKN។ ក្រៅពីគម្រោង IKN ក្រុមហ៊ុន Foxconn ថ្មីៗនេះក៏បានបង្ហាញអំពីបំណងវិនិយោគទៅលើវិស័យបច្ចេកវិទ្យារថយន្តអគ្គិសនី និងព័ត៌មានវិទ្យា (ITC) របស់ ឥណ្ឌូណេស៊ី ដោយមានទឹកប្រាក់សរុប ៨ ពាន់លានដុល្លារអាម៉េរិក។

លោក Bahlil ឱ្យដឹងថា Foxconn នឹងចាប់ផ្ដើមការវិនិយោគទៅលើគម្រោងខាងលើនៅក្នុងត្រីមាសទី៣ ឬទី៤ ឆ្នាំនេះ ដោយការសាងសង់បណ្ដារោងចក្រនៅក្នុងតំបន់ឧស្សាហកម្ម Batang។

ចំណាប់អារម្មណ៍របស់បណ្ដាក្រុមហ៊ុនវិនិយោគធំៗទៅលើ IKN កើតមានឡើងក្នុងគ្រាដែលកំពុងមានការសង្ស័យអំពីលទ្ធភាពនៃវត្តមានរបស់គម្រោងនេះ នេះបើតាមលទ្ធផលនៃការស្ទង់មតិមួយកាលពីពេលថ្មីៗនេះរបស់ មជ្ឈមណ្ឌលស្រាវជ្រាវយុទ្ធសាស្ត្រ និងអន្តរជាតិ CSIS៕

July 13, 2022

ខ្មាន់កាំភ្លើងបាញ់ប្រហារលើទីតាំងសាសនា មុនពេលលួចធ្វើឃាតលោក ស្ហ៊ីនហ្សូ អាបេ

ជនសង្ស័យ Yamagami បានបាញ់សាកល្បងទៅលើទីតាំងសាសនាដែលជននេះស្អប់ មួយថ្ងៃមុនការធ្វើឃាត អតីតនាយករដ្ឋមន្ត្រីជប៉ុន លោក ស្ហ៊ីនហ្សូ អាបេ។

«ខ្ញុំបានបាញ់ទៅលើទីតាំងសាសនាមួយនៅក្នុងខេត្ត Nara កាលពីវេលាទាបភ្លើង ថ្ងៃទី ៧ កក្កដា» ជនសង្ស័យ Tetsuya Yamagami អាយុ ៤១ ឆ្នាំ បានសារភាពប្រាប់ក្រុមអ្នកស៊ើបអង្កេត និងប៉ូលិសខេត្ត Nara កាលពីថ្ងៃទី ១១ កក្កដាដូច្នេះ។

យោងតាមប៉ូលិស កាមេរ៉ាសន្តិសុខថតបានរូបភាពរថយន្តមួយគ្រឿងដែលដូចទៅនឹងរថយន្តរបស់ជនសង្ស័យដែលសមត្ថកិច្ចឃាត់បាន កាលពីព្រឹកថ្ងៃទី ៧ កក្កដា។ ប៉ូលិសជឿថា Yamagami ពេលនោះកំពុងតែពិសោធកាំភ្លើងដែលខ្លួនបានកែច្នៃ។

Yamagami សារភាពថា ខ្លួនស្អប់ក្រុមសាសនាមួយនោះ ហើយមានបំណងធ្វើឃាតលោក អាបេ ដោយសារតែមានទំនាក់ទំនងជាមួយក្រុមសាសនានោះ។

ប្រជាជនរស់នៅក្បែរទីតាំងសាសនាមួយនោះ ដែលស្ថិតក្នុងទីក្រុង Nara និយាយថា ពួកគេឮសំឡេងផ្ទុះនៅវេលាម៉ោងប្រហែល ៤ ថ្ងៃទី ៧ កក្កដា។

ទីតាំងសាសនានោះស្ថិតនៅចម្ងាយប្រហែល ១ គីឡូម៉ែត្រពីផ្ទះរបស់ជនសង្ស័យ។ ប៉ូលិសបានរកឃើញវត្ថុតាំងមួយចំនួននៅក្នុងរថយន្តរបស់ Yamagami។ នៅពេលត្រូវបានសួរ ជនសង្ស័យឆ្លើយថា វត្ថុទាំងនោះត្រូវបានប្រើប្រាស់ដើម្បីធ្វើតេស្តកាំភ្លើង។

ជនសង្ស័យ Yamagami អតីតសមាជិកនៃកងកម្លាំងការពារដែនសមុទ្រជប៉ុន បានធ្វើឃាត អតីតនាយករដ្ឋមន្ត្រីជប៉ុន លោក ស្ហ៊ីនហ្សូ អាបី កាលពីថ្ងៃទី ៨ កក្កដា។ ជននេះនិយាយថា ម្ដាយរបស់ខ្លួនបានចូលរួមជាមួយអង្គការសាសនាដែលខ្លួនស្អប់ និងត្រូវបានពួកគេធ្វើឱ្យអស់ទ្រព្យសម្បត្តិ។

សាច់ញាតិបានប្រាប់ថា Yamagami «ចងគំនុំជាយូរមកហើយ» ចំពោះអង្គការសាសនានោះ។ ប្រភពព័ត៌មានមួយចំនួននិយាយថា ដំបូងឡើយ ជនសង្ស័យមានបំណងធ្វើឃាតមេដឹកនាំសាសនានោះ ប៉ុន្តែ បានបោះបង់ទៅវិញដោយសារ «ពិបាក»។

សមត្ថកិច្ចមិនទាន់បញ្ជាក់ថា អង្គការសាសនានោះគឺជាអ្វី ប៉ុន្តែ សារព័ត៌មានមួយចំនួនសុទ្ធតែផ្ដោតទៅលើ Unification Church។ នេះគឺជាក្រុមគ្រីស្ទសាសនិកដ៏ល្បីឈ្មោះ ទាក់ទងនឹងពិធីរៀបការជាក្រុម និងតែងតែប្រឹងប្រែងដើម្បីកសាងទំនាក់ទំនងជាមួយបណ្ដាបក្សនយោបាយអភិរក្សនិយមនៅលើពិភពលោក។

ប្រធានអង្គការ Unification Church សាខានៅ ជប៉ុន លោក Tomihiro Tanaka កាលពីថ្ងៃទី ១១ កក្កដា បានបញ្ជាក់ថា ម្ដាយរបស់ជនសង្ស័យគឺជា «សមាជិកយូរឆ្នាំ» របស់អង្គការនេះ។ លោក Tanaka ថ្លែងថា Yamagami មិនមែនជាសមាជិករបស់ក្រុមសាសនានេះ ហើយ Unification Church ក៏មិនមានទំនាក់ទំនងអ្វីជាមួយ អតីតនាយករដ្ឋមន្ត្រី អាបេ នោះដែរ។

សមត្ថកិច្ចជឿថា Yamagami បានរៀបផែនការធ្វើឃាតលោក អាបេ យ៉ាងហោចក៏តាំងតែពីជាង ១ ឆ្នាំមុន ព្រោះជននេះបានប្រាប់ក្រុមអ្នកស៊ើបអង្កេតថា ខ្លួនចាប់ផ្ដើមកែច្នៃអាវុធកាលពីរដូវផ្ការីកឆ្នាំ ២០២១។ អ្នកជិតខាងម្នាក់របស់ជនសង្ស័យបាននិយាយថា ធ្លាប់បានឮសំឡេងដូចទៅនឹងការកែច្នៃឈើ ចេញពីបន្ទប់របស់ Yamagami នៅពេលយប់៕

July 13, 2022

ក្រុមផ្ដាច់ខ្លួនថា អ៊ុយក្រែន វាយប្រហារអង្គភាពការពារដែនអាកាសនៅ Lugansk

តំណាងរបស់ក្រុមផ្ដាច់ខ្លួនបានឱ្យដឹងថា កងទ័ពអ៊ុយក្រែន បានវាយប្រហារទៅលើអង្គភាពការពារដែនអាកាសនៃទីក្រុង Lugansk ក្នុងនោះ មានទីតាំងមួយត្រូវរងគ្រាប់រ៉ុក្កែត។

«កងកម្លាំងអ៊ុយក្រែន បើកការវាយប្រហារធំសំដៅលើអង្គភាពការពារដែនអាកាសដែលការពារសន្តិសុខសម្រាប់ទីក្រុង Lugansk» Andrei Marochko ដែលជាមន្ត្រីមួយរូបរបស់កងកម្លាំងការពារប្រជាជននៃក្រុមដែលហៅខ្លួនឯងថា សាធារណរដ្ឋប្រជាមានិត Lugansk (LPR) កាលពីថ្ងៃទី ១២ កក្កាដា បានប្រកាសដូច្នេះ។

លោក Marochko ឱ្យដឹងថា រ៉ុក្កែតមួយចំនួនរបស់ អ៊ុយក្រែន បានបាញ់ចំគោលដៅ ប៉ុន្តែអះអាងថា កងកម្លាំងបម្រុងរបស់ក្រុមផ្ដាច់ខ្លួននៅតែជាអ្នកគ្រប់គ្រងដែនអាកាស Lugansk។

ផ្សែងបាញ់ចេញពីអគ្គិភ័យនៅ Lugansk ដែលក្រុមផ្ដាច់ខ្លួនថាជាការវាយប្រហាររបស់ អ៊ុយក្រែន នៅក្នុងវីដេអូមួយដែលផ្សាយកាលពីថ្ងៃទី ១៣ កក្កាដា

ភាគីខាងអ៊ុយក្រែន មិនទាន់មានប្រតិកម្មអ្វីទៅនឹងការអះអាងរបស់ក្រុមផ្ដាច់ខ្លួននៅ Lugansk នៅឡើយ។ ចំណែក រុស្ស៊ី ក៏មិនទាន់មានការអធិប្បាយអ្វីដែរទាក់ទិននឹងបញ្ហានេះ។

ក្រុមមន្ត្រីអ៊ុយក្រែន យល់ថា រុស្ស៊ី និងក្រុមផ្ដាច់ខ្លួន កំពុងប្រមូលកម្លាំងដ៏ធំ ពិសេសគឺនៅជុំវិញស្រុក Bakhmut, Sieversk, Sloviansk និង Kramatorsk ក្នុងខេត្ត Donetsk។

ការវាយប្រហារខាងលើរបស់ អ៊ុយក្រែន ត្រូវបានធ្វើឡើងបន្ទាប់ពី ទីក្រុងកៀវ បានប្រកាសថានឹងវាយយកទឹកដីដែល រុស្ស៊ី និងក្រុមផ្ដាច់ខ្លួនបានដណ្ដើមកាន់កាប់ បន្ទាប់ពីទទួលបានអាវុធទំនើបៗពី សហរដ្ឋអាម៉េរិក និងបណ្ដាប្រទេសនៅ អឺរ៉ុប៕

July 13, 2022

Author: សឿន សំណាង