សឿន សំណាង - La Reine Media

មេឃក្ដៅខ្លាំង ទីក្រុងនៅ សហរដ្ឋអាម៉េរិក ក្រាលកាវពិសេសលើដងផ្លូវ ដើម្បីបង្កើនភាពត្រជាក់

ទីក្រុង Phoenix ទប់ទល់នឹងកម្ដៅថ្ងៃដោយវិធីក្រាលកាវពិសេសមួយប្រភេទលើដងផ្លូវកៅស៊ូ ដើម្បីជួយបង្កើនប្រសិទ្ធភាពចំណាំងផ្លាតពន្លឺព្រះអាទិត្យរបស់ដងផ្លូវ។

«ពលរដ្ឋនៅ Phoenix និយាយថា ពួកគេទទួលបានភាពខុសប្លែក» Kate Gallego អភិបាលក្រុងនៅលើសមុទ្រខ្សាច់ភាគខាងលិច នៃ សហរដ្ឋអាម៉េរិក ឱ្យដឹងដូច្នេះ និងបន្ថែម ផ្ទៃរបស់ដងផ្លូវនេះ បន្ទាប់ពីត្រូវបានក្រាលកាវពិសេស នឹងត្រជាក់ជាងពី ១០ ទៅ ១២ អង្សាសេ ធៀបនឹងផ្ទៃផ្លូវដែលក្រាលកៅស៊ូ។

ផ្លូវប្រវែងប្រហែល ១១៨ គីឡូម៉ែត្រ នៅទីក្រុង Phoenix ក្នុងរដ្ឋ Arizona ត្រូវបានក្រាលកាវពិសេស ក្នុងគម្រោងសាកល្បងបន្សាបកម្ដៅផ្ទៃផ្លូវ តម្លៃ ៣.៣ លានដុល្លារ របស់ទីក្រុងនេះ។

បម្រែបម្រួលអាកាសធាតុ កំពុងតែធ្វើឱ្យសីតុណ្ហភាពនៅក្នុងទីក្រុងដែលក្ដៅជាងគេនៅ សហរដ្ឋអាម៉េរិក កាន់តែឡើងកម្ដៅខ្ពស់។ កាលពីឆ្នាំ ២០២០ ទីក្រុង Phoenix បានឆ្លងកាត់កម្ដៅជាង ៤៣ អង្សាសេ ក្នុងរយៈពេល ៥៣ ថ្ងៃ បណ្ដាលឱ្យមនុស្សជិត ២០០ នាក់បានបាត់ជីវិត ដោយសារតែរលកកម្ដៅ។

ទីក្រុង Phoenix , Los Angeles និង Miami បានបង្កើតគណកម្មការដើម្បីស្វែងរកវិធីទប់ស្កាត់ផលប៉ះពាល់ពីកម្ដៅថ្ងៃ ក្នុងគ្រាដែលបណ្ដាទីក្រុងនៅ សហរដ្ឋអាម៉េរិក ក៏ដូចជាបណ្ដាទីក្រុងនៅពាសពេញពិភពលោក កំពុងប្រឈមនឹងការឡើងកម្ដៅទ្វេដងធៀបនឹងមធ្យមភាគ ព្រោះតែការស្រូប និងរក្សាកម្ដៅរបស់អគារ និងផ្ទៃផ្លូវក្នុងទីក្រុង៕

July 23, 2022

«កាឡាក់ស៊ីខ្មោច» ក្នុងរូបដែលបានចម្រាញ់ពណ៌ ថតដោយកែវយឹតអវកាស James Webb

រូបភាពដែលបានមកពីទិន្នន័យនៃការសង្កេតថ្មីរបស់តេឡេស្កុបអវកាស James Webb បង្ហាញថា កាឡាក់ស៊ី Messier 74 មានរូបរាងដូចទៅនឹងកំណួចទឹកដ៏មហាប្រល័យ។

តេឡេស្កុបអវកាស James Webb ថតបានកាឡាក់ស៊ី Messier 74 ឬហៅថា NGC 628 ឬក៏កាឡាក់ស៊ីខ្មោច កាលពីថ្ងៃទី ១៧ កក្កដា និងបានផ្ញើមកកាន់ផែនដី។ យោងទៅលើទិន្នន័យដំបូងដែល ណាសា បានប្រកាស សាស្ត្រាចារ្យផ្នែកតារាសាស្ត្រ Gabriel Brammer មកពីសាកលវិទ្យាល័យ Copenhagen របស់ ដាណឺម៉ាក បានបង្កើតជារូបភាពចម្រាញ់ពណ៌មួយដែលប្រកបដោយភាពទាក់ទាញខ្លាំង ទាក់ទងនឹងរចនាសម្ព័ន្ធរាងគូទខ្យងរបស់ NGC 628។

រូបភាពបង្ហាញថា Messier 74 មានរូបរាងដូចទៅនឹងកំណួចទឹកដ៏មហាប្រល័យ ដោយមានសរសៃរាងគូទខ្យងពណ៌ស្វាយដ៏ចម្លែក។ ក៏ប៉ន្តែ នេះមិនមែនជាអ្វីដែលយើងអាចមើលឃើញជាក់ស្ដែងដោយភ្នែក។ ពណ៌ស្វាយបានមកពីរលកដែលបាញ់ចេញពីវិទ្យុសកម្មក្នុងកាឡាក់ស៊ី ហើយមនុស្សមិនអាចមើលឃើញដោយផ្ទាល់។

Messier 74 ដែលថតបានដោយតេឡេស្កុបអវកាស James Webb

ស្ថិតក្នុងរយៈចម្ងាយពីផែនដីប្រហែល ៣២ លានឆ្នាំពន្លឺ និងនៅក្នុងកញ្ចុំផ្កាយ Pisces កាឡាក់ស៊ី Messier 74 មានដៃរាងគូទខ្យងលាតសន្ធឹងប្រហាក់ប្រហែលគ្នា។ កាឡាក់ស៊ីនេះ មានអង្កត់ផ្ចិតប្រវែងឡើងដល់ ៩៥,០០០ ឆ្នាំពន្លឺ និងមានផ្កាយប្រហែល ១០០ ពាន់លានដួង៕

July 23, 2022

រថយន្តអគ្គិសនីតាក់ស៊ីបើកបរដោយស្វ័យប្រវត្ត មិនមានចង្កូត នឹងបង្ហាញខ្លួនក្នុងទីផ្សារនៅឆ្នាំក្រោយ

(ប្រទេសចិន)-ក្រុមហ៊ុនបច្ចេកវិទ្យា Baidu បង្ហើបឱ្យដឹងអំពីម៉ូដែលរថយន្តអគ្គិសនីបើកបរស្វ័យប្រវត្ត បំពាក់កាមេរ៉ា ១២ គ្រាប់, ឧបករណ៍ស្កេតដោយឡាស៊ែរ (lidar) ៨ គ្រាប់ និងចង្កូចដែលអាចដោះចោលបាន។

Apollo RT6 នឹងក្លាយជារថយន្តអគ្គិសនីបើកបរស្វ័យប្រវត្តដែលមានចង្កូចអាចដោះចោលបានដំបូងរបស់ក្រុមហ៊ុនបច្ចេកវិទ្យាចិន Baidu។ រថយន្តម៉ូដែល Apollo RT6 នេះ ត្រូវបាន Baidu បង្ហាញនៅក្នុងវេទិកា Baidu World 2022 នៅ ទីក្រុងប៉េកាំង កាលពីថ្ងៃទី ២១ កក្កដា។

ក្រុមហ៊ុន Baidu ឱ្យដឹងថា Apollo RT6 ជួយកាត់បន្ថយការចំណាយទៅលើការផលិតបានជិតពាក់កណ្ដាល ដោយនៅត្រឹមតែ ៣៧,០០០ ដុល្លារអាម៉េរិក ធៀបនឹងការចំណាយ ៧១,០០០ ដុល្លារ នៃការផលិតរបស់រថយន្តជំនាន់មុន។

រចនារូបរាងដែលមិនមានកង្កូត ក៏ជួយបង្កើនកន្លែងទំនេរសម្រាប់អ្នកដំណើរ។ Apollo RT6 បំពាក់កាមេរ៉ាចំនួន ១២ គ្រាប់ និង លីដា (lidar) (ឧបករណ៍ស្កេនដូចទៅនឹងរ៉ាដា ប៉ុន្តែប្រើឡាសែរជំនួសរលកវិទ្យុ) ចំនួន ៨ គ្រាប់។

លោក Robin Li សហស្ថាបនិក និងជា CEO របស់ Baidu បាននិយាយថា «ដោយមានរបកគំហើញធំៗក្នុងបច្ចេកវិទ្យាបើកបរស្វ័យប្រវត្ត យើងបានកាត់បន្ថយការចំណាយប្រហាក់ប្រហែលនឹងយានដើរដោយថាមពលថ្មីធម្មតាមួយគ្រឿង»។

នៅបច្ចុប្បន្ននេះ ចង្កូតដែលអាចដោះចោលបានមិនទាន់មានភាពស្របច្បាប់ និងកំពុងរង់ចាំការយល់ព្រមពីអាជ្ញាធរចិន។

ក្រុមហ៊ុន Baidu ឱ្យដឹងថា ម៉ូដែលរថយន្តថ្មីនេះគ្រោងនឹងដាក់ឱ្យប្រើប្រាស់នៅក្នុងគម្រោងសេវាកម្មរថយន្តតាក់ស៊ី Apollo Go របស់ក្រុមហ៊ុននេះនៅឆ្នាំក្រោយ។

July 23, 2022

រុស្ស៊ី អះអាងថា មិនផ្គត់ផ្គង់ប្រេងដល់បណ្ដាប្រទេសដែលកំណត់តម្លៃពិតាន

ទេសាភិបាលធនាគារជាតិរុស្ស៊ី ប្រកាសថា ទីក្រុងមូស្គូ នឹងមិនផ្គត់ផ្គង់ប្រេងដល់បណ្ដាប្រទេសដែលកំណត់តម្លៃពិតានចំពោះប្រេង ក្នុងគ្រាដែលលោកខាងលិចកំពុងរកវិធីលុបបំបាត់ចំណូលពីថាមពលរបស់ រុស្ស៊ី។

ទេសាភិបាលធនាគារជាតិរុស្ស៊ី Elvira Nabiullina បានប្រកាសដូចខាងលើនៅក្នុងសន្និសីទសារព័ត៌មានមួយកាលពីថ្ងៃទី ២២ កក្កដា ដើម្បីឆ្លើយតបនឹងផែនការកំណត់តម្លៃពិតានចំពោះប្រេងដែលនាំចូលពី ប្រទេសរុស្ស៊ី។

លោកស្រី Nabiullina ព្រមានថា សំណើរបស់ក្រុមប្រទេសអភិវឌ្ឍលំដាប់កំពូលពិភពលោក (G7) ក្នុងបំណងលុបបំបាត់ប្រភពចំណូលពីថាមពលរបស់ រុស្ស៊ី ទាក់ទិននឹងសង្គ្រាមនៅ អ៊ុយក្រែន នឹងរុញច្រានតម្លៃប្រេងពិភពលោកឱ្យឡើងថ្លៃខ្ពស់។

ទេសាភិបាលធនាគារជាតិរុស្ស៊ី ថ្លែងថា «យើងនឹងមិនផ្គត់ផ្គង់ប្រេងដល់បណ្ដាប្រទេសដែលនឹងកំណត់តម្លៃពិតាន។ ប្រេង និងផលិតផលធ្វើពីប្រេងរបស់យើង នឹងផ្គត់ផ្គង់ដល់ប្រទេសទាំងឡាយដែលព្រមសហការជាមួយយើងតែប៉ុណ្ណោះ»។

សូមបញ្ជាក់ថា បច្ចុប្បន្ន រុស្ស៊ី គឺជាអ្នកផលិតប្រេងធំជាងគេលំដាប់ទីពីរក្នុងពិភពលោក បន្ទាប់ពី ប្រទេសអារ៉ាប៊ីសាអូឌីត។

ការអះអាងរបស់ទេសាភិបាលធនាគារជាតិរុស្ស៊ី ត្រូវបានលើកឡើងនៅក្នុងគ្រាដែល សហរដ្ឋអាម៉េរិក និងប្រទេសជាច្រើនទៀត ពិសេសគឺបណ្ដាប្រទេសនៅ អឺរ៉ុប កំពុងពិចារណាអំពីការកំណត់តម្លៃពិតានចំពោះប្រេងដែលនាំចូលពី ប្រទេសរុស្ស៊ី ដើម្បីប្រឆាំងនឹងយុទ្ធនាការយោធាពិសេសរបស់ ទីក្រុងមូស្គូ នៅ អ៊ុយក្រែន៕

July 23, 2022

មេដឹកនាំមួយរូបរបស់ ឥណ្ឌា ត្រូវចូលពេទ្យ បន្ទាប់ពីពិសាទឹកទន្លេពិសិដ្ឋ (វីដេអូ)

មេដឹកនាំរដ្ឋ Punjab ត្រូវបានគេជឿថា បានចូលព្យាបាលនៅមន្ទីរពេទ្យដោយសារតែឈឺពោះខ្លាំង បន្ទាប់ពីបានពិសាទឹកទន្លេពិសិដ្ឋ Kali Bein។

កាលពីចុងសប្ដាហ៍កន្លង អភិបាលរដ្ឋ Punjab លោក Bhagwant Mann រួមនឹងក្រុមមន្ត្រីអមដំណើរ បានចូលរួមពិធីរម្លឹកអនុស្សាវរីយ៍ ២២ ឆ្នាំ នៃការចាប់ផ្ដើមយុទ្ធនាការសម្អាតទន្លេ Kail Bein ដែលត្រូវបានក្រុមអ្នកកាន់សាសនាស៊ីក ចាត់ទុកជាទន្លេពិសិដ្ឋ។

តំណាងរាស្ត្រ និងជាអ្នកការពារបរិស្ថានដ៏ល្បីឈ្មោះនៅ ឥណ្ឌា លោក Baba Balbir Singh Seechewal បានអញ្ជើញអភិបាលរដ្ឋ Punjab ពិសាទឹកទន្លេដែលហូរកាត់ទីក្រុង Sultanpur Lodhi រដ្ឋ Punjab ភាគខាងជើងប្រទេសឥណ្ឌា។ លោកអភិបាលរដ្ឋក៏បានពិសាទឹកពិសិដ្ឋនេះអស់ ១ កែវ ហើយមនុស្សម្នានៅជុំវិញក៏ស្រែកសាទរ។

India Express កាលពីម្សិលមិញ ដកស្រង់ប្រភពព័ត៌មានច្បាស់ការណ៍មួយឱ្យដឹងថា នៅព្រលប់ថ្ងៃទី ១៩ កក្កដា ២ ថ្ងៃក្រោយការពិសាទឹកទន្លេ Kali Bein អភិបាលរដ្ឋខាងលើក៏មានអាការឈឺពោះយ៉ាងខ្លាំងក្លា។ លោកក៏ត្រូវបានដឹកតាមឧទ្ធម្ភាគចក្រពីភូមិគ្រឹះរបស់លោកនៅ Chandigarh ទៅកាន់មន្ទីរពេទ្យនៅ ទីក្រុងដេលី។

ប្រភពព័ត៌មាននានាបានឱ្យដឹងថា អភិបាលរដ្ឋ Punjab លោក Mann ត្រូវចូលពេទ្យគឺដោយសារតែការពិសាទឹកទន្លេ Kali Bein។ NDTV ផ្សាយថា ទន្លេ Kali Bein តែងតែកខ្វក់ ព្រោះតែទឹកដែលបង្ហូរចេញពីទីរួមស្រុក និងទីប្រជុំជននានានៅក្បែរនោះ។

ក្រុមមេដឹកនាំបក្ស Aam Aadmi (AAP) បញ្ជាក់អំពីព័ត៌មានដែលថាលោក Mann ចូលពេទ្យ ប៉ុន្តែនិយាយថា អភិបាលរដ្ឋរូបនេះទៅពិនិត្យសុខភាពតាមការណាត់ និងបានចេញពីពេទ្យវិញហើយ៕

July 23, 2022

រថយន្តក្រុងដឹកអ្នកដំណើរជិត ៣០ នាក់ ជ្រុលចង្កូតធ្លាក់ជ្រោះ

(វៀតណាម)-រថយន្តដឹកអ្នកដំណើរជិត ៣០ នាក់ ពី ដាឡាត (Da Lat) ទៅកាន់ ហ្វានធៀត (Phan Thiet) បានជួបគ្រោះថ្នាក់នៅព្រឹកនេះនៅលើភ្នំមួយ បណ្ដាលឱ្យមនុស្សច្រើននាក់រងរបួសធ្ងន់ធ្ងរ។

វេលាម៉ោងប្រហែល ៥ ព្រឹក ថ្ងៃទី ២៣ កក្កដា រថយន្តក្រុងមួយគ្រឿងដឹកទេសចរ ២៧ នាក់ ដែលភាគច្រើនជាស្ត្រី និងកុមារ បានជ្រុលចង្កូតធ្លាក់ចូលជ្រោះនៅក្នុងខេត្ត ប៊ិញធួន (Binh Thuan) ភាគនិរតីប្រទេសវៀតណាម។

ក្នុងហេតុការណ៍នេះ មានមនុស្ស ៣ នាក់រងរបួសធ្ងន់ ត្រូវបានបញ្ជូនទៅកាន់មន្ទីរពេទ្យសង្គ្រោះបន្ទាន់។ មនុស្ស ២៤ នាក់ផ្សេងទៀតរងរបួសស្រាល ត្រូវបានបញ្ជូនទៅកាន់មណ្ឌលសុខភាពនៅក្បែរនោះ។

ជាង ១ ម៉ោងបន្ទាប់ពីហេតុការណ៍បានកើតឡើង ប៉ូលិសក៏បានទៅដល់កន្លែងកើតហេតុ ឯក្រុមសង្គ្រោះក៏កំពុងធ្វើដំណើរតាមពីក្រោយ។

July 23, 2022

មហាសេដ្ឋីឥណ្ឌា «យកឈ្នះ» លើ Bill Gates ក្លាយជាអ្នកមានជាងគេទី ៤ ក្នុងពិភពលោក

មហាសេដ្ឋី Gautam Adani មានទ្រព្យ ១១២.៥ ពាន់លានដុល្លារអាម៉េរិក ច្រើនជាងសហស្ថាបនិករបស់ Microsoft លោក Bill Gates ប្រមាណ ២៣០ លានដុល្លារ។

យោងតាម Bloomberg Billionaires Index កំពូលអ្នកមាននៅ ឥណ្ឌា លោក Gautam Adani រកបាន ៣៦ ពាន់លានដុល្លារបន្ថែមទៀតក្នុងឆ្នាំនេះ។ នេះគឺជាតួលេខដែលកើនឡើងច្រើនជាងគេក្នុងពិភពលោក។ ចំណែកទ្រព្យរបស់លោក Bill Gates បែរជាត្រូវថយចុះ ដោយសារតែសកម្មភាពមនុស្សធម៌របស់លោក និងភាគហ៊ុនត្រូវបានគេលក់ចោលច្រើន។

គិតត្រឹមក្រោយការជួញដូរក្នុងផ្សារមូលបត្រថ្ងៃទី ២១ កក្កដា លោក Adani មានទ្រព្យសរុប ១១២.៥ ពាន់លានដុល្លារអាម៉េរិក ច្រើនជាងទ្រព្យរបស់លោក Bill Gates ២៣០ លានដុល្លារ ដូច្នេះ តំណែងអ្នកមានជាងគេលំដាប់ទី ៤ ក្នុងពិភពលោក បានធ្លាក់ទៅលើដៃរបស់ មហាសេដ្ឋីឥណ្ឌូរូបនេះ។

កាលពីថ្ងៃទី ១៣ កក្កដាកន្លងទៅ លោក Bill Gates បានប្រកាសថា នឹងបរិច្ចាគប្រាក់ ២០ ពាន់លានដុល្លារសម្រាប់កិច្ចការមនុស្សធម៌។ លោកបានសរសេរលើ Twitter ថា «យើងមានគម្រោងបង្កើនការចំណាយពីជិត ៦ ពាន់លានដុល្លារជារៀងរាល់ឆ្នាំនាបច្ចុប្បន្ន ឡើងដល់ ៩ ពាន់លានដុល្លារជារៀងរាល់ឆ្នាំ នៅឆ្នាំ ២០២៦។ ដើម្បីអនុវត្តគម្រោងនេះ ខ្ញុំនឹងផ្ទេរ ២០ ពាន់លានដុល្លារអាម៉េរិក ទៅក្នុងមូលនិធិ ក្នុងខែនេះ»។

ចំណែកលោក Adani វិញ ក៏កំពុងតែប្រឹងប្រែងបំពេញការងារមនុស្សធម៌របស់លោក។ កាលពីខែមុន លោក Adani បានប្រកាសបរិច្ចាគ ៧.៧ ពាន់លានដុល្លារសម្រាប់កិច្ចការសង្គម៕

July 22, 2022

តំណាងរាស្ត្រអាម៉េរិកមួយរូប វិះនឹងត្រូវខ្មាន់អាវុធចាក់ប្រហារនៅក្នុងហ្វូងមនុស្ស (វីដេអូ)

តំណាងរាស្ត្រ Zeldin ដែលជាអតីតទាហានមួយរូប បានប្រតិកម្មទាន់ពេល និងចាប់ជាប់ដៃរបស់ជនសង្ស័យម្នាក់ដែលកាន់វត្ថុស្រួច ប្រុងនឹងចាក់តម្រង់ករបស់គាត់នៅកណ្ដាលព្រឹត្តិការណ៍ឃោសនារកសំឡេងឆ្នោត។

តំណាងរាស្ត្ររបស់ បក្សសាធារណរដ្ឋ លោក Lee Zeldin កាលពីថ្ងៃទី ២១ កក្កដា បានប្រារព្ធពិធីជួបជុំ និងឃោសនាមួយនៅជាយក្រុង New York ដើម្បីរកសំឡេងឆ្នោតសម្រាប់ការបោះឆ្នោតជ្រើសរើសអភិបាលរដ្ឋ។ ពេលលោក Zeldin កំពុងថ្លែងការណ៍នៅលើវេទិកា ក៏ស្រាប់តែបុរសមាតធំម្នាក់ដែលមានអាវុធស្រួចក្នុងដៃ ដើរចូលមកក្បែរ និងប្រុងចាក់តម្រង់ករបស់គាត់។

ភ្លាមនោះ លោក Zeldin ក៏បានប្រតិកម្មទាន់ពេល ដោយចាប់ដៃបុរសនោះជាប់ មុនពេលក្រុមសន្តិសុខ និងប្រជាពលរដ្ឋរត់មកជួយ។ គណៈកម្មការឃោសនារកសំឡេងឆ្នោតរបស់លោក Zeldin ឱ្យដឹងថា តំណាងរាស្ត្ររូបនេះមិនបានរងរបួសក្នុងហេតុការណ៍នេះទេ។

លោក Zeldin បានសរសេរនៅលើ Twitter ថា «គាត់មកក្បែរខ្ញុំ ហើយនិយាយថា «អ្ហែងចប់ហើយ» មុនពេលបម្រុងនឹងចាក់ប្រហារខ្ញុំ។ សំណាងណាស់ដែលខ្ញុំចាប់កដៃអាគាត់នេះទាន់ពេល»។

ប៉ូលេសក្នុងតំបន់មិនទាន់មានការអធិប្បាយអ្វីនៅឡើយ ទាក់ទិននឹងហេតុការណ៍ខាងលើ។ អភិបាលរដ្ឋ New York លោកស្រី Kathy Hochul ដែលជាសមាជិកបក្សប្រជាធិបតេយ្យ បានឱ្យដឹងថា លោកស្រីត្រេកអរណាស់ដែលតំណាងរាស្ត្រ Zeldin មិនបានរងរបួស និងបន្ថែមថា ជនសង្ស័យកំពុងត្រូវបានស៊ើបអង្កេត។

តំណាងរាស្ត្រ Zeldin អាយុ ៤២ ឆ្នាំ ធ្លាប់ជាទាហាន និងត្រូវបានជ្រើសតាំងជាបេក្ខភាពអភិបាលរដ្ឋ New York របស់ បក្សប្រជាធិបតេយ្យ តាំងពីខែមិថុនាកន្លងទៅ។

July 22, 2022

កសិដ្ឋានឈរត្រង់បំពាក់បច្ចេកវិទ្យាខ្ពស់ ដាំបន្លែបានជាង ៩០០ តោនជារៀងរាល់ឆ្នាំ

(អេមីរ៉ាតអារ៉ាប់រួម/UAE)-កសិដ្ឋាន Emirates Crop One មានទំហំប្រហែល ៣០,៦៥០ ម៉ែត្រក្រឡា និងអាចសន្សំសំច័យទឹកបាន ២៥០ លានលីត្រជារៀងរាល់ឆ្នាំ ធៀបនឹងការដាំបន្លែនៅលើដីខាងក្រៅផ្ទះតាមបែបប្រពៃណី។

កសិដ្ឋានឈរត្រង់គឺជាដំណោះស្រាយដ៏មានប្រសិទ្ធផាព ជួយកាត់បន្ថយវិបត្តិកង្វះដីដាំដុះនាបច្ចុប្បន្ន។ ក្រុមហ៊ុន Crop One Holdings (សហរដ្ឋអាម៉េរិក) និងក្រុមហ៊ុន Emirates Flight Catering (UAE) បានសហការគ្នាសាងសង់កសិដ្ឋានឈរត្រង់ Emirates Crop One នៅ ឌូបៃ ក្បែរព្រលានយន្តហោះអន្តរជាតិ Al Maktoum។ កាលពីថ្ងៃទី ១៨ កក្កដា ក្រុមហ៊ុនទាំងពីរនេះបានប្រកាសបើក Emirates Crop One ហើយបានហៅវាថាជា «កសិដ្ឋានឈរត្រង់ធំជាងគេបង្អស់ក្នុងពិភពលោក»។

Emirates Crop One មានផ្ទៃក្រឡាប្រហែល ៣០,៦៥០ ម៉ែត្រ និងអាចផលិតបន្លែបានជាង ៩០០ តោន ជារៀងរាល់ឆ្នាំ។ ប្រភេទបន្លែដែលដាំនៅក្នុងកសិដ្ឋាននេះសុទ្ធតែប្រកបដោយភាពអនាម័យខ្ពស់ និងមិនចាំបាច់លាងសម្អាត ព្រោះថា ពុំមានថ្នាំសម្លាប់សត្វល្អិត ថ្នាំសម្លាប់ស្មៅ ឬគីមីឡើយ។ Emirates Crop One ប្រើប្រាស់ទឹកតិចជាង ៩៥% ធៀបនឹងកសិដ្ឋានបែបប្រពៃណី ហើយគ្រោងនឹងផលិតបន្លែបាន ៣ តោនជារៀងរាល់ថ្ងៃ។ កសិដ្ឋាននេះក៏ប្រើប្រាស់ការរួមផ្សំរវាងបច្ចេកវិទ្យាបញ្ញាសិប្បនិម្មិត (AI) និងការវិភាគទិន្នន័យដើម្បីនាំមកនូវប្រសិទ្ធភាពខ្ពស់ជាងមុន។

Emirates Crop One បំពាក់ប្រព័ន្ធបង្ហូរទឹកយ៉ាងស្អាត និងអាថ៌កំបាំង បង្ហូរទឹកពីបន្លែមួយដើម ទៅបន្លែមួយដើមទៀត ដើម្បីប្រើប្រាស់ឱ្យមានប្រសិទ្ធភាព។ ទឹកដែលហួតជាចំហាយក្នុងពេលស្រោចស្រពនឹងត្រូវបានទាញយក កែច្នៃ និងបញ្ជូនត្រលប់ចូលប្រព័ន្ធវិញ ជួយសន្សំសំច័យបាន ២៥០ លានលីត្រជារៀងរាល់ឆ្នាំ ធៀបនឹងការដាំនៅខាងក្រៅផ្ទះតាមបែបប្រពៃណី។

បន្លែរបស់ Emirates Crop One នឹងត្រូវបានផ្គត់ផ្គង់សម្រាប់អតិថិជននៅលើជើងយន្តហោះដែលក្រុមហ៊ុន Emirates Flight Catering សហការជាមួយ។ ក្រៅពីនេះ បន្លែរបស់ Emirates Crop One ក៏នឹងមានវត្តមាននៅក្នុងហាងនានានៅក្នុងស្រុកដែលមានយីហោ Bustanica។

Craig Ratajczyk នាយកប្រតិបត្តិរបស់ Crop One បានឱ្យដឹងថា «បេសកកម្មរបស់យើងគឺកសាងអនាគតមួយដែលមានស្ថិរភាពដើម្បីឆ្លើយតបនឹងតម្រូវការចំពោះអាហារស្រស់ អាហារក្នុងស្រុក ហើយកសិដ្ឋានបែបថ្មីនេះជួយបង្ហាញអំពីប្រការទាំងនេះ។ កសិដ្ឋានថ្មីនេះដើរតួនាទីដូចទៅនឹងរូបភាពគំរូមួយសម្រាប់អ្វីដែលអាចធ្វើទៅរួចនៅពាសពេញពិភពលោក»។

យោងតាម Simpleflying កសិដ្ឋាន Emirates Crop One នេះ ត្រូវបានបោះទុនវិនិយោគក្នុងទឹកប្រាក់ប្រមាណ ៤០ លានដុល្លារអាម៉េរិក៕

July 22, 2022

ឥណ្ឌា មានប្រធានាធិបតីជាស្ត្រីដំបូងគេក្នុងប្រវត្តិសាស្ត្រដែលមានប្រភពពីសហគមន៍ជនជាតិដើមភាគតិច

លោកស្រី Draupadi Murmu អាយុ ៦៤ ឆ្នាំ ក្លាយជាប្រធានាធិបតីជាស្ត្រីភេទដំបូងរបស់ ឥណ្ឌា ដែលមានដើមកំណើតពីសហគមន៍ជនជាតិដើមភាគតិច។

នៅថ្ងៃទី ២២ កក្កដានេះ លោកស្រី Murmu ទទួលបានសំឡេងឆ្នោតគាំទ្រ ៦៨% នៅពេលតំណាងរាស្ត្រជិត ៥,០០០ រូបរបស់ សភាឥណ្ឌា បានបោះឆ្នោតជ្រើសរើសប្រធានាធិបតីថ្មី។ ជាមួយនឹងលទ្ធផលនេះ លោកស្រីក្លាយជាប្រធានាធិបតីជាស្ត្រីភេទដំបូងគេរបស់ ប្រទេសឥណ្ឌា ដែលមានដើមកំណើតពីសហគមន៍ជនជាតិដើមភាគតិច និងជាប្រធានាធិបតីភេទស្រីទីពីររបស់ប្រទេសនេះ បន្ទាប់ពីលោកស្រី Pratibha Patil។

លោកស្រី Draupadi Murmu ត្រូវបាន បក្សសម្ព័ន្ធប្រជាធិបតេយ្យជាតិ (NDA) ដែលកំពុងកាន់អំណាច ជ្រើសរើសជាបេក្ខភាពប្រធានាធិបតី។ លោកស្រីនឹងចូលកាន់អំណាចបន្ទាប់ពី ប្រធានាធិបតីឥណ្ឌា Ram Nath Kovind ដែលនឹងអស់អាណត្តិនៅថ្ងៃទី ២៤ កក្កដាខាងមុខ។

ក្រោយពីលទ្ធផលនៃការរាប់សន្លឹកឆ្នោតត្រូវបានប្រកាស គេឃើញមាន ប្រជាពលរដ្ឋឥណ្ឌា ជាច្រើន ក្នុងនោះមានទាំងប្រជាជនមកពីសហគមន៍ជនជាតិដើមភាគតិចផងដែរ ប្រមូលផ្ដុំគ្នាតាមដងផ្លូវដើម្បីអបអរសាទរប្រធានាធិបតីថ្មី។

លោកស្រី Draupadi Murmu ចាប់កំណើតនៅថ្ងៃទី ២០ មិថុនា ១៩៥៨ ក្នុងគ្រួសារមួយនៃកុលសម្ព័ន្ធ Santali នៅខណ្ឌ Mayurbhanj រដ្ឋ Odisha ភាគខាងកើតនៃ ប្រទេសឥណ្ឌា។ ទាំងលោកឪពុក និងលោកតារបស់លោកស្រី សុទ្ធតែបានជាប់ឆ្នោតជាមេដឹកនាំក្នុងប្រព័ន្ធអាជ្ញាធរស្វ័យគ្រប់គ្រងនៅតំបន់ជនបទក្នុង ប្រទេសឥណ្ឌា។

លោកស្រី Draupadi Murmu និងនាយករដ្ឋមន្ត្រីឥណ្ឌា លោក Narendra Modi

នាយករដ្ឋមន្ត្រីឥណ្ឌា Narendra Modi ក៏បានសម្ដែងការអបអរសាទរដល់លោកស្រី Murmu និងបានហៅជ័យជម្នះរបស់លោកស្រីថា ជាជោគជ័យដ៏គួរឱ្យភ្ជាប់ផ្អើល។

សហគមន៍ជនជាតិដើមភាគតិចនៅ ឥណ្ឌា រួមមានប្រហែល ១០៤ លាននាក់ ប្រមាណជា ៨.៦% នៃប្រជាជនសរុបរបស់ប្រទេសនេះ។ សហគមន៍ទាំងនេះភាគច្រើនរស់នៅក្នុងតំបន់ដាច់ស្រយាល និងមិនសូវទទួលបានការគាំពារល្អផ្នែកសុខុមាលភាព និងអប់រំ។

ការជាប់ឆ្នោតរបស់លោកស្រី Murmu ត្រូវបានក្រុមអ្នកវិភាគជឿថា នឹងនាំមកនូវការផ្លាស់ប្ដូរសម្រាប់សហគមន៍ជនជាតិដើមភាគតិចនៅ ឥណ្ឌា។

សូមបញ្ជាក់ថា ប្រធានាធិបតីឥណ្ឌា គឺជាមេដឹកនាំកំពូលរបស់ប្រទេស ប៉ុន្តែមិនកាន់អំណាចប្រតិបត្តិច្រើនដូចនាយករដ្ឋមន្ត្រី៕

July 22, 2022

Author: សឿន សំណាង