សឿន សំណាង - La Reine Media

FBI បានរកឃើញឯកសារ «មហាសម្ងាត់» នៅក្នុងផ្ទះរបស់អតីតប្រធានាធិបតី ដូណាល់ ត្រាំ

បុគ្គលិកពិសេសរបស់ FBI បានប្រមូលយកឯកសារសម្ងាត់មួយចំនួន នៅពេលធ្វើការត្រួតពិនិត្យភ្លាមៗទៅលើគេហដ្ឋានឯកជនរបស់លោក ដូណាល់ ត្រាំ នៅ Mar-a-Lago ក្នុងនោះមានទាំងឯកសារ «មហាសម្ងាត់» ផងដែរ។

សារព័ត៌មានអាម៉េរិក កាលពីម្សិលមិញ (១២ សីហា) បានរាយការណ៍ថា កម្លាំងពិសេសរបស់ ការិយាល័យស៊ើបអង្កេតអាម៉េរិក (FBI) បានរកឃើញឯកសារមួយចំនួនដែលត្រូវបានសម្គាល់ថា «មហាសម្ងាត់» នៅក្នុងពេលចូលឆែកឆេរផ្ទះរបស់ អតីតប្រធានាធិបតីអាម៉េរិក លោក ដូណាល់ ត្រាំ នៅក្នុងរដ្ឋ Florida។

យោងតាម ទីភ្នាក់ងារសារព័ត៌មាន Wall Street Journal បុគ្គលិកពិសេសរបស់ FBI បានប្រមូលយកឯកសារសម្ងាត់ចំនួន ១១ ច្បាប់ នៅពេលធ្វើការត្រួតពិនិត្យភ្លាមៗទៅលើគេហដ្ឋានឯកជនរបស់លោក ដូណាល់ ត្រាំ នៅ Mar-a-Lago ដែលហេតុការណ៍នេះកំពុងតែបង្កការភ្ញាក់ផ្អើលខ្លាំងក្នុងវិស័យនយោបាយ និងកាន់តែធ្វើឱ្យបញ្ហាប្រកាន់បក្សពួកនៅ សហរដ្ឋអាម៉េរិក មានសភាពធ្ងន់ធ្ងរ។

អ្វីដែលគួរឱ្យចាប់អារម្មណ៍ គឺថា ឯកសារសម្ងាត់ដែល FBI ប្រមូលបានពីផ្ទះរបស់លោក ត្រាំ ក៏មានឯកសារមហាសម្ងាត់ ហើយបើតាមការកំណត់ ឯកសារនោះត្រូវបានអនុញ្ញាតឱ្យរក្សាទុកនៅក្នុងមូលដ្ឋានពិសេសរបស់រដ្ឋាភិបាលតែប៉ុណ្ណោះ។

ព័ត៌មានខាងលើត្រូវបានលើកឡើងក្នុងគ្រាដែល ក្រសួងយុត្តិធម៌អាម៉េរិក បានស្នើឱ្យចៅក្រមតុលាការនៅក្នុងរដ្ឋ Florida ប្រកាសជាសាធារណៈអំពីដីកាត្រួតពិនិត្យ កាលពីថ្ងៃទី ១២ សីហា លើកលែងតែមានការជំទាស់ពីលោក ត្រាំ។

បច្ចុប្បន្ន ទាំងលោក ត្រាំ ដែលកំពុងមានបំណងឈរឈ្មោះជាបេក្ខភាពប្រធានាធិបតីក្នុងការបោះឆ្នោតឆ្នាំ ២០២៤ ទាំង បក្សសាធារណរដ្ឋ មិនទាន់មានការអធិប្បាយអ្វីទាក់ទិននឹងព័ត៌មានខាងលើនៅឡើយ៕

August 13, 2022

សេតវិមាន ៖ ករណីផ្ទុះធំក្នុងព្រលានយន្តហោះយោធានៅ ឧបទ្វីបគ្រីមៀ មិនមែនបង្កឡើងដោយអាវុធរបស់ អាម៉េរិក

មន្ត្រីការពារជាតិអាម៉េរិក អះអាងថា ប្រទេសនេះមិនទាន់ផ្ដល់អាវុធដែលអាចឱ្យ អ៊ុយក្រែន វាយប្រហារលើព្រលានយន្តហោះយោធានៅលើ ឧបទ្វីបគ្រីមៀ (Crimea)។

«យើងមិនទាន់ផ្ដល់អ្វីមួយដែលអនុញ្ញាត ឬអាចអនុញ្ញាតឱ្យ អ៊ុយក្រែន វាយប្រហារលើ គ្រីមៀ» មន្ត្រីការពារជាតិជាន់ខ្ពស់មួយរូបរបស់ សហរដ្ឋអាម៉េរិក កាលពីថ្ងៃទី ១២ សីហា បានឱ្យដឹងដូច្នេះ។ «នោះមិនមែនជា ATACMS ព្រោះថា យើងមិនទាន់ផ្ដល់មីស៊ីលនេះទៅឱ្យពួកគេ»។

ប្រព័ន្ធមីស៊ីលយុទ្ធសាស្ត្រសម្រាប់កងទ័ពថ្មើរជើង (ATACMS) MGM-140 គឺជាមីស៊ីលយុទ្ធសាស្ត្ររយៈចម្ងាយមធ្យមដែលអាចបាញ់ចំគោលដៅក្នុងរយៈចម្ងាយ ៣០០ គីឡូម៉ែត្រ ដោយបាញ់ចេញពីប្រព័ន្ធមីស៊ីលប្រតិកម្មកម្រិតខ្ពស់ (HIMARS) M142 ឬពីប្រព័ន្ធមីស៊ីលហ្វូងប្រតិកម្មរហ័ស (MLRS)។ អ៊ុយក្រែន ធ្លាប់បានស្នើសុំឱ្យ សហរដ្ឋអាម៉េរិក ផ្ដល់ ATACMS ឱ្យប្រទេសនេះ។

កាលពីថ្ងៃទី ០៩ សីហា មានករណីផ្ទុះដ៏ធំនៅឯព្រលានយន្តហោះយោធា Saki នៅលើ ឧបទ្វីបគ្រីមៀ។ ក្រសួងការពារជាតិរុស្ស៊ី ឱ្យដឹងថា ឃ្លាំងអាវុធនៅក្នុងព្រលានយន្តហោះនេះបានផ្ទុះ បង្កឱ្យមានការផ្ទុះធំៗ និងបង្កការខូចខាតយ៉ាងដំណំ ប៉ុន្តែ មិនមែនដោយសារការវាយប្រហាររបស់ អ៊ុយក្រែន។ «ការមិនគោរពគោលការណ៍សុវត្ថិភាព បង្ការ និងពន្លត់អគ្គិភ័យ គឺជាមូលហេតុដែលនាំឱ្យកើតមានហេតុការណ៍ផ្ទុះនេះ» ក្រសួងការពារជាតិរុស្ស៊ី ប្រកាសដូច្នេះ។

មន្ត្រីម្នាក់របស់ អ៊ុយក្រែន និយាយថា ហេតុការណ៍ផ្ទុះនោះគឺជាលទ្ធផលនៃការវាយប្រហារបែបទ័ពព្រៃដែលគាំទ្រ កងទ័ពអ៊ុយក្រែន នៅលើទឹកដីដែល រុស្ស៊ី កំពុងកាន់កាប់។ ប៉ុន្តែ រដ្ឋាភិបាលអ៊ុយក្រែន មិនទាន់ប្រកាសសេចក្ដីលម្អិតនៃហេតុការណ៍ផ្ទុះនេះនៅឡើយ។

August 13, 2022

រន្ទះបាញ់ខ្នាតយក្ស មិនបាញ់ចុះក្រោម បែរជាបាញ់ត្រង់ឡើងទៅដល់ជាយអវកាស

ផ្លេកបន្ទោរនៅពីលើរដ្ឋ Oklahoma សហរដ្ឋអាម៉េរិក ដែលថតបានកាលពីឆ្នាំ ២០១៨ គឺជារន្ទះមួយក្នុងចំណោមរន្ទះដែលកម្រកើតមាន និងមានថាមពលខ្លាំងបំផុតនៅលើផែនដី។

នៅក្នុងរបាយការណ៍ដែលត្រូវបានប្រកាសកាលពីថ្ងៃទី ០៣ សីហា លើទស្សនាវដ្ដី Science Advances ក្រុមអ្នកស្រាវជ្រាវបានវិភាគទៅលើរន្ទះបាញ់ខ្នាតយក្សមួយដែលបាញ់ពីពពកនៅលើរដ្ឋ Oklahoma កាលពីឆ្នាំ ២០១។ រន្ទះខ្នាតយក្សនេះមិនបានបាញ់ចុះមកដី ឬបាញ់ពីពពកមួយទៅកាន់ពពកមួយនោះទេ ប៉ុន្តែ វាបែរជាបាញ់ត្រង់ឡើងទៅលើ កម្ពស់ ៨០ គីឡូម៉ែត្រ ជិតដល់ជាយអវកាស។ រន្ទះបែបនេះត្រូវបានគេហៅថា gigantic jet ដែលបញ្ចេញថាមពលខ្លាំងជាងប្រហែល ៥០ ដង ធៀបនឹងរន្ទះធម្មតា។

អ្នកវិទ្យាសាស្ត្រម្នាក់នៅ Hawley រដ្ឋ Texas ថតបានផ្លេកបន្ទោរនេះនៅថ្ងៃទី ១៤ ឧសភា ២០១៨។ ទិន្នន័យបង្ហាញថា ថ្វីបើមានថាមពលខ្លាំង ប៉ុន្តែរន្ទះនេះមានកម្ដៅប្រហែលតែ ២០៤ អង្សាសេប៉ុណ្ណោះ។

ក្រុមអ្នកវិទ្យាសាស្ត្រ មកដល់បច្ចុប្បន្ន មិនទាន់យល់ច្បាស់អំពីមូលហេតុដែលនាំឱ្យរន្ទះបាញ់ពីក្រោមឡើងទៅលើនៅឡើយ។ រន្ទះប្រភេទ gigantic jet ភាគច្រើនកើតមានឡើងនៅក្នុងព្យុះដែលមិនមានរន្ទះច្រើន៕

August 12, 2022

រកប្រាក់បាន ១១៥,០០០ ដុល្លារ/ឆ្នាំ ដោយសារការឆ្លើយនឹងសំណួរនៅលើអ៊ីនធើណិត

លោកតា Randall Gibbons អាយុ ៧៦ ឆ្នាំ ធ្លាប់ជាម្ចាស់រោងជាងជួសជុលរថយន្តលម្ហែកាយនៅ Yreka រដ្ឋ California សហរដ្ឋអាម៉េរិក រកប្រាក់បានជាង ១០០,០០០ ដុល្លារ/ឆ្នាំ ដោយសារការឆ្លើយនឹងសំណួរលើអ៊ីនធើណិត។

លោកតា Randall Gibbons ធ្វើការងារច្រើនប្រភេទ ក្នុងនោះមានការងារមួយដែលហាក់ដូចចម្លែកសម្រាប់មនុស្សភាគច្រើន ប៉ុន្តែវាបានជួយឱ្យគាត់រកបានប្រាក់ច្រើនបំផុត នោះគឺ ការឆ្លើយនឹងសំណួរលើអ៊ីនធើណិត។ ឆ្នាំ ២០០៩ លោកតា Gibbons ដែលពេលនោះគឺជាជាងជួសជុលឡានប្រភេទ RV (recreational vehicle ជាឡានដែលមានកន្លែងស្នាក់នៅ សម្រាប់ដំណើរកម្សាន្តឆ្ងាយៗ) បានចុះឈ្មោះធ្វើជាអ្នកជំនាញផ្នែក RV នៅលើទំព័រ JustAnswer។ JustAnswer គឺជាគេហទំព័រមួយសម្រាប់ទទួលសំណួរ និងផ្ដល់ចម្លើយ ទាក់ទងនឹងវិស័យជួសជុលម៉ាស៊ីន ច្បាប់អន្តរជាតិ និងហិរញ្ញវត្ថុ។ល។

ដំបូងឡើយ លោកតា Gibbons គ្រាន់តែទទួលឆ្លើយនឹងសំណួរនៅក្នុងពេលសម្រាកថ្ងៃត្រង់ប៉ុណ្ណោះ។ ពេលនេះ វាគឺជាការងារពេញម៉ោងរបស់គាត់។ លោកតា Gibbons រកប្រាក់ពី JustAnser បានជាង ១១៥,០០០ ដុល្លារអាម៉េរិក កាលពីឆ្នាំ ២០២១។ ទឹកប្រាក់ប្រចាំខែដែលគាត់ធ្លាប់រកបានច្រើនជាងគេ គឺនៅក្នុងខែកក្កដា ២០២១។

លោកតា Gibbons ឆ្លើយនឹងសំណួរប្រហែល ៣០០ ជារៀងរាល់សប្ដាហ៍ ស្ដីពីការជួសជុល និងប្រើប្រាស់រថយន្ត RV។ គាត់ទទួលបានប្រាក់ ២០ ដុល្លារសម្រាប់ ១ សំណួរ។

ប្រាក់ចំណូលរបស់គាត់ បានបង្ហាញអំពីជំនាញរបស់គាត់។ JustAnswer មានប្រព័ន្ធចាត់ចែងចំណាត់ថ្នាក់សម្រាប់ក្រុមអ្នកជំនាញរបស់ខ្លួន ក្នុងនោះ អ្នកជំនាញដែលទើបចូលរួម នឹងទទួលបាន ៥ ដុល្លារសម្រាប់ការឆ្លើយ ១ សំណួរ។

ជោគជ័យរបស់លោកតា Gibbons នៅក្នុងវិស័យខាងលើ មិនមែនជារឿងងាយស្រួលដូចការគិតឡើយ។ លោកតា Gibbons អាចឆ្លើយនឹងសំណួរទាំងអស់ក៏ព្រោះតែគាត់មានបទពិសោធន៍ជាង ៦០ ឆ្នាំ ក្នុងវិស័យគ្រឿងចក្រ។ លោកតាចំណាយពេលប្រហែល ៥០ ម៉ោង/សប្ដាហ៍ និងត្រូវក្រោកពីម៉ោង ៤ កន្លះទៀបភ្លឺ ដើម្បីចូលឆ្លើយនឹងសំណួរសម្រាប់អ្នករស់នៅក្នុងតំបន់ដែលមានពេលវេលាខុសពីគាត់ ក្នុងនោះ ១ សំណួរ លោកតាត្រូវចំណាយពេលប្រហែល ១០ នាទី៕

August 12, 2022

៣ ប្រទេសនៅ អាស៊ីអាគ្នេយ៍ ស្ថិតក្នុងបញ្ជីប្រទេសទាំង ១០ ដែលត្រូវបានព្យាករថា មានកំណើន GDP លឿនជាងគេបំផុតលើពិភពលោក ក្នុង ៨ ឆ្នាំខាងមុខ

យោងតាមរបាយការណ៍ស្ដីពី ការព្យាករកំណើនសេដ្ឋកិច្ចនៃបណ្ដាប្រទេសរហូតដល់ឆ្នាំ ២០៣០ របស់ មជ្ឈមណ្ឌលអភិវឌ្ឍអន្តរជាតិ នៃ សាកលវិទ្យាល័យ Harvard (សហរដ្ឋអាម៉េរិក) ប្រទេសមួយចំនួននៅ អាស៊ី នឹងមានកំណើន GDP លឿនជាងគេបំផុតក្នុងពិភពលោក នៅក្នុងរយៈពេលជិតមួយទសវត្សរ៍ខាងមុខ ក្នុងនោះ នាំមុខគឺ ឥណ្ឌូណេស៊ី។

នៅក្នុងក្រុមប្រទេស ASEAN+6 (១០ ប្រទេសជាសមាជិកសមាគមប្រជាជាតិអាស៊ីអាគ្នេយ៍ បូកនឹង ចិន, ជប៉ុន, កូរ៉េខាងត្បូង, អូស្ត្រាលី, នូវែលសេឡង់ និង ឥណ្ឌា) គឺមានតែ ឥណ្ឌូណេស៊ី, វៀតណាម និង ម៉ាឡេស៊ី ប៉ុណ្ណោះដែលបានជាប់ក្នុងបញ្ជី top 10 ស្ដីពី បណ្ដាប្រទេសត្រូវបានព្យាករថា នឹងមានកំណើន GDP មធ្យមលឿនជាងគេបំផុតក្នុងពិភពលោក នៅក្នុងរយៈពេល ៨ ឆ្នាំខាងមុខ។

ឥណ្ឌូណេស៊ី ត្រូវបានព្យាករថា នឹងមានកំណើន GDP ៥.៦៤%/ឆ្នាំ ជាប់ចំណាត់ថ្នាក់ទី ៤, វៀតណាម នឹងសម្រេចបាន ៥.៥៦%/ឆ្នាំ ជាប់លេខ ៦ និង ម៉ាឡេស៊ី នឹងសម្រេចបាន ៥.៣១%/ឆ្នាំ ជាប់ចំណាត់ថ្នាក់ទី ៩ នៅលើពិភពលោក។ ដូច្នេះ នៅក្នុង តំបន់អាស៊ាន ប្រទេសទាំង ៣ ខាងលើនេះ ត្រូវបានព្យាករថា នឹងនាំមុខគេស្ដីពី កំណើន GDP មធ្យម ខ្ពស់ជាងគេបង្អស់។

ប្រទេសថៃ ក្នុងរយៈពេល ៨ ឆ្នាំទៀត នឹងមានកំណើន GDP ជាប់លេខ ១៥ ក្នុងពិភពលោក និង លេខ ៤ ក្នុងតំបន់ ASEAN+6 ខណៈដែល ហ្វ៊ីលីពីន ជាប់លេខ ២៨ ក្នុងពិភពលោក និងលេខ ៥ ក្នុង ASEAN+6, សិង្ហបុរី ជាប់លេខ ៧១ ក្នុងពិភពលោក និងលេខ ៦ ក្នុង ASEAN+6។

August 12, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ១២ ខែសីហា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ៤១ នាក់ ក្នុងអំឡុង ២៤ ម៉ោង នៃថ្ងៃទី ១១ ខែសីហា ២០២២ ក្នុងនោះមានករណីឆ្លងក្នុងសហគមន៍ចំនួន ៤១ នាក់។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ៣៨ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

August 12, 2022

ប្រេងឥន្ធនៈពិភពលោកឡើងថ្លៃ បន្ទាប់ពី IEA ព្យាករថា តម្រូវការនឹងកើនឡើង

តម្លៃប្រេង Brent ប្រគល់មានកាលកំណត់ បានកើន ២.៣% ក្នុង ១ ធុង ខណៈដែលប្រេងអាម៉េរិក WTI ប្រគល់មានកាលកំណត់ ក៏ឡើងថ្លៃ ២.៥% ក្នុង ១ ធុង។

តម្លៃប្រេងពិភពលោក កើនឡើង ២ ដុល្លារ/ធុង នៅក្នុងការជួញដូរថ្ងៃទី ១១ សីហា ក្រោយពី អង្គការថាមពលអន្តរជាតិ (IEA) ដំឡើងការព្យាករកំណើននៃតម្រូវការប្រើប្រាស់ក្នុងឆ្នាំនេះ ដោយសារតែតម្លៃឧស្ម័នធម្មជាតិកើនឡើងខ្ពស់ បណ្ដាលឱ្យប្រទេសជាច្រើន ងាកទៅប្រើប្រាស់ប្រេងរ៉ែ។

ប្រេង Brent ប្រគល់មានកាលកំណត់ ឡើងថ្លៃ ២.២០ ដុល្លារ (២.៣%) ដោយត្រូវបានជួញដូរក្នុងតម្លៃ ៩៩.៦០ ដុល្លារ/ធុង។ ប្រេងអាម៉េរិក (WTI) ប្រគល់មានកាលកំណត់ ក៏ឡើងថ្លៃ ២.៤១ ដុល្លារ/ធុង និងលក់ក្នុងតម្លៃ ៩៤.៣៤ ដុល្លារ/ធុង។

ក្នុងរបាយការណ៍ប្រចាំខែ IEA ឱ្យដឹងថា «តម្លៃអគ្គិសនី និងឧស្ម័នធម្មជាតិបានកើនឡើងដល់កំណត់ត្រាថ្មី នាំឱ្យប្រទេសជាច្រើន ប្ដូរពីការប្រើប្រាស់ឧស្ម័ន ទៅប្រើប្រាស់ប្រេងរ៉ែ បណ្ដាលឱ្យមានការរំពឹងថា តម្រូវការប្រេងក្នុងឆ្នាំនេះ នឹងកើនបន្ថែម ៣៨០,០០០ ធុង/ថ្ងៃ។

ចំណែកការព្យាកររបស់ OPEC (អង្គការនៃក្រុមប្រទេសនាំចេញប្រេងរ៉ែ) វិញ បានទម្លាក់ការព្យាករកំណើនតម្រូវការប្រេងរបស់ពិភពលោកក្នុងឆ្នាំ ២០២២ ដោយលើកឡើងថា មកពីផលប៉ះពាល់នៃវិបត្តិនៅ អ៊ុយក្រែន, បញ្ហាអតិផរណាកើនឡើងខ្ពស់ និងការប្រឹងប្រែងទប់ស្កាត់កូវីដ-១៩៕

August 12, 2022

គម្រោងរោងចក្រឧស្សាហកម្មចំនួន ៣ ទៀត ត្រូវបានអនុម័តឱ្យដំណើរការនៅ ភ្នំពេញ និង កំពង់ស្ពឺ

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនចំនួន ៣ បន្ថែមទៀត ដែលនឹងបើកដំណើរការនៅ ភ្នំពេញ និង ខេត្តកំពង់ស្ពឺ ជាមួយនឹងទុនវិនិយោគ ១៥.៧ លានដុល្លារអាម៉េរិក និងបង្កើតការងារប្រមាណ ២,២៧៩ កន្លែង។

បណ្ដាក្រុមហ៊ុនវិនិយោគដែលទើបតែត្រូវបានផ្ដល់វិញ្ញាបនបត្រចុះបញ្ជីគម្រោងវិនិយោគទាំងនោះ រួមមាន ៖

១. JADE FASHION (CAMBODIA) GARMENTS COMPANY LIMITED គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគប្រមាណ ៥.៣ លានដុល្លារអាមេរិក និងអាចបង្កើតការងារបានចំនួន ១,០២៤ កន្លែង។

២. HONG YU FANG GARMENT CO., LTD គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៥.២ លានដុល្លារអាមេរិក និងអាចបង្កើតការងារបានចំនួន ១,០២៩ កន្លែង។

៣. SHUN WEI FANG ZHI KE JI CO., LTD គម្រោងបង្កើតរោងចក្រផលិតអំបោះគ្រប់ប្រភេទ ដែលមានទីតាំងវិនិយោគស្ថិតនៅភូមិព្រៃខ្វាវ ឃុំរកាកោះ ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៥.២ លានដុល្លារអាមេរិក និងអាចបង្កើតការងារបានចំនួន ២២៦ កន្លែង។

August 12, 2022

កម្មវិធីអនុគ្រោះពន្ធ ៧,៥០០ ដុល្លារ សម្រាប់ពលរដ្ឋទិញរថយន្តអគ្គិសនីរបស់ អាម៉េរិក ត្រូវ អឺរ៉ុប រិះគន់

សភាពជាន់ខ្ពស់របស់ សហរដ្ឋអាម៉េរិក បានអនុម័តសេចក្ដីព្រាងច្បាប់ស្ដីពីអាកាសធាតុ និងថាមពលស្អាត ក្នុងនោះក៏មានកម្មវិធីអនុគ្រោះពន្ធ ៧,៥០០ ដុល្លារអាម៉េរិក សម្រាប់ពលរដ្ឋអាម៉េរិកម្នាក់ ទិញរថយន្តអគ្គិសនី ពីរោងចក្រមួយនៅ អាម៉េរិកខាងជើង ដែលមានបំពាក់ថ្មផលិតដោយ សហរដ្ឋអាម៉េរិក។

សហភាពអឺរ៉ុប (EU) កាលពីថ្ងៃទី ១១ សីហា បានសម្ដែងការបារម្ភនៅចំពោះមុខកម្មវិធីអនុគ្រោះពន្ធរបស់ សហរដ្ឋអាម៉េរិក សម្រាប់រថយន្តអគ្គិសនី ដោយយល់ថា កម្មវិធីនេះមានលក្ខណៈ «រើងអើង» ជាមួយបណ្ដាក្រុមហ៊ុនផលិតរថយន្តរបស់ អឺរ៉ុប។

«យើងគិតថា កម្មវិធីនេះ មានចរិតរើសអើងជាមួយបណ្ដាក្រុមហ៊ុនផលិតរថយន្តបរទេស…។ ហើយពិតណាស់ កម្មវិធីនេះមិនសមស្របជាមួយការកំណត់របស់ អង្គការពាណិជ្ជកម្មពិភពលោក (WTO)» អ្នកនាំពាក្យរបស់ គណកម្មធិការអឺរ៉ុប (EC) Carcia Ferrer លើកឡើងដូច្នេះ។

EU បានសម្ដែងការព្រួយបារម្ភខាងលើ បន្ទាប់ពី សភាជាន់ខ្ពស់អាម៉េរិក កាលពីថ្ងៃទី ០៧ សីហា បានអនុម័តសេចក្ដីព្រាងច្បាប់អាកាសធាតុ និងថាមពលស្អាត ដែលក្នុងនោះមានទាំងកម្មវិធីអនុគ្រោះពន្ធ ៧,៥០០ ដុល្លារ/ម្នាក់ សម្រាប់ទិញរថយន្តអគ្គិសនីរបស់រោងចក្រមួយនៅ អាម៉េរិកខាងជើង ដែលបំពាក់ថ្មផលិតដោយ ក្រុមហ៊ុនអាម៉េរិក។

យោងតាម EU កម្មវិធីខាងលើនឹងបង្កឧបសគ្គធ្ងន់ធ្ងរដល់បណ្ដាក្រុមហ៊ុនផលិតរថយន្តដែលមិនមែនជារបស់ សហរដ្ឋអាម៉េរិក ខណៈដែល ទ្វីបអឺរ៉ុប កំពុងជំរុញសកម្មភាពផលិតថ្មរថយន្តអគ្គិសនី ក្នុងបំណងបន្សាបកាបូនក្នុងពេលអនាគត។

លោក John Bozzella ដែលជាប្រធាន និងជា នាយកប្រតិបត្តិនៃ សម្ព័ន្ធសម្រាប់ការច្នៃប្រឌិតរថយន្ត (Alliance for Automotive Innovation) ដែលមានការិយាល័យកណ្ដាលនៅ សហរដ្ឋអាម៉េរិក បានអំពាវនាវឱ្យ រដ្ឋាភិបាលប្រទេសនេះ បន្ធូរបន្ថយការកំណត់ស្ដីពីថ្មសម្រាប់រថយន្តអគ្គិសនិ ក្នុងនោះក៏គួរតែទិញរថយន្តដែលបំពាក់ថ្មផលិតនៅក្នុងប្រទេសទាំងឡាយដែលមានកិច្ចព្រមព្រៀងការពារជាតិជាមួយ សហរដ្ឋអាម៉េរិក ដូចជាបណ្ដាប្រទេសនៅក្នុង អង្គការណាតូ និង ប្រទេសជប៉ុន ជាដើម។ល។

August 12, 2022

បស្ចិមលោកផ្ដល់ជំនួយយោធាតម្លៃ ១.៥ ពាន់លានអឺរ៉ូបន្ថែមទៀត ដល់ អ៊ុយក្រែន

ក្រុមប្រទេសលោកខាងលិច ដែលបានបើកកិច្ចប្រជុំមួយនៅ រដ្ឋធានីកូប៉ិនហាក (Copenhagen) របស់ ប្រទេសដាណឺម៉ាក កាលពីថ្ងៃទី ១១ សីហា បានឯកភាពគ្នាក្នុងការផ្ដល់ជំនួយយោធាតម្លៃ ១.៥ ពាន់លានអឺរ៉ូ បន្ថែមទៀត ដល់ រដ្ឋាភិបាលទីក្រុងកៀវ ដើម្បីជួយទប់ទល់ក្នុងការប្រយុទ្ធប្រឆាំងនឹង រុស្ស៊ី។

យោងតាមសេចក្ដីសម្រេចដែលត្រូវបានលើកឡើងនៅក្នុងកិច្ចប្រជុំរបស់រដ្ឋមន្ត្រីការពារជាតិ របស់ប្រទេសចំនួន ២៦ នៅ អឺរ៉ុប កញ្ចប់ជំនួយយោធាតម្លៃ ១.៥ ពាន់លានអឺរ៉ូ ដែលបណ្ដាប្រទេសនៅ អឺរ៉ុប ផ្ដល់ឱ្យ អ៊ុយក្រែន នឹងត្រូវបានប្រើប្រាស់សម្រាប់ការទិញសព្វាវុធឱ្យកងទ័ពរបស់ អ៊ុយក្រែន ដើម្បីបង្កើនកម្លាំងការពារជាតិរបស់នេះ។

តួលេខស្ដីពីខ្ទង់ថវិកាការចូលរួមចំណែករបស់ប្រទេសនីមួយៗ មិនត្រូវបានគេប្រកាសជាសាធារណៈ ប៉ុន្តែ បើយោងតាមសារព័ត៌មានរបស់ ដាណឺម៉ាក រដ្ឋធានីកូប៉ិនហាក រួមចំណែក ១១០ លានអឺរ៉ូ។ ចក្រភពអង់គ្លេស គឺជាប្រទេសដែលចូលរួមចំណែកច្រើនជាងគេ គឺ ៣០០ លានអឺរ៉ូ។

កិច្ចប្រជុំបន្ទាប់របស់ក្រុមប្រទេសផ្ដល់ជំនួយដល់ អ៊ុយក្រែន គ្រោងនឹងត្រូវធ្វើឡើងនៅពាក់កណ្ដាលខែកញ្ញា ២០២២៕

August 12, 2022

Author: សឿន សំណាង