កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ២៦ នាក់ ក្នុងអំឡុង ២៦ ម៉ោង នៃថ្ងៃទី ១៥ ខែសីហា ២០២២ ក្នុងនោះមានករណីឆ្លងក្នុងសហគមន៍ចំនួន ២៦ នាក់។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ៣២ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
នាយកដ្ឋានអាកាសចរណ៍វៀតណាម គ្រោងនឹងតម្រូវឱ្យបណ្ដាក្រុមហ៊ុនរកស៊ីក្នុងវិស័យអាកាសចរណ៍ ត្រូវមានផែនការងាកមកប្រើប្រាស់យានយន្តដែលដំណើរការដោយអគ្គិសនី ជំនួសយានយន្តប្រើប្រេងសាំងនាបច្ចុប្បន្ន។
នាយកដ្ឋានអាកាសចរណ៍របស់ ប្រទេសវៀតណាម បានឱ្យដឹងថា កំពុងតែស្រង់មតិសម្រាប់សេចក្ដីព្រាងសំណើរបស់ខ្លួន ដែលកំណត់អំពីការការពារបរិស្ថាននៅក្នុងវិស័យអាកាសចរណ៍ស៊ីវិល។ ក្រោយពីការស្រង់មតិ និងការអនុម័តពីរដ្ឋាភិបាល សារាចរណែនាំនេះនឹងត្រូវអនុវត្តចំពោះអង្គការ ស្ថាប័ន បុគ្គលដែលមានទំនាក់ទំនងជាមួយសកម្មភាពអាកាសចរណ៍ស៊ីវិលនៅ វៀតណាម។
អ្វីដែលគួរឱ្យចាប់អារម្មណ៍នោះគឺថា នៅក្នុងសេចក្ដីព្រាងសំណើរបស់ នាយកដ្ឋានអាកាសចរណ៍របស់ ប្រទេសវៀតណាម ក៏មានការកំណត់ឱ្យបណ្ដាក្រុមហ៊ុនដែលធ្វើសកម្មភាពក្នុងវិស័យអាកាសចរណ៍ ត្រូវមានផែនការផ្លាស់ប្ដូរយានយន្តដែលប្រើប្រាស់ប្រេងឥន្ធនៈហ្វូស៊ីល មកប្រើប្រាស់យានយន្តដែលដំណើរការដោយថាមពលអគ្គិសនី។
ក្នុងសេចក្ដីព្រាងសំណើដែលកំពុងស្រង់មតិនេះ ក៏មានការកំណត់ទាក់ទងនឹងការការពារបរិស្ថាននៅក្នុងតំបន់ព្រលានយន្តហោះ ដោយតម្រូវឱ្យក្រុមហ៊ុនក្នុងវិស័យអាកាសចរណ៍ សុំអាជ្ញាប័ណ្ណបរិស្ថានទៅតាមច្បាប់គ្រប់គ្រងបរិស្ថានរបស់ប្រទេសនេះផងដែរ៕
ថ្មីៗនេះ ក្រុមអ្នកអភិវឌ្ឍរបស់ រុស្ស៊ី បានបង្ហាញគំរូសុនកយន្តមួយដែលត្រូវបានបំពាក់មីស៊ីលប្រឆាំងរថក្រោះ RPG-26។
យោងតាមសារព័ត៌មាន News Week នៅក្នុងព្រឹត្តិការវេទិកាបច្ចេកទេស-យោធាអន្តរជាតិ Army-2022 ក្នុងថ្ងៃទី ១៥ សីហា ក្រុមអ្នកអភិវឌ្ឍបច្ចេកវិទ្យារបស់ រុស្ស៊ី បានបង្ហាញរ៉ូបូតថ្មីមួយដែលមានរូបរាងដូចសត្វសុនក បំពាក់កាណុងបាញ់រ៉ុក្កែតនៅលើខ្នង។
សុនកយន្តនេះមានសមត្ថភាពផ្លាស់ទីយ៉ាងលឿន និងប្រកបដោយភាពបត់បែនខ្ពស់ ជាមួយនឹងជើងទាំង ៤ របស់វា។ ជើងទាំងអស់របស់រ៉ូបូតនេះ គឺដូចទៅនឹងសុនកពិតៗ ដោយសារតែអាចថយក្រោយ បង្វិលខ្លួន ងើបឈរ និងអង្គុយ ឬក្រាបបានយ៉ាងល្អ។
ក្រៅពីប្រការខាងលើ នៅលើខ្នងរបស់សុនករ៉ូបូតនេះថែមទាំងអាចត្រូវបានបំពាក់កាណុង RPG-26 សម្រាប់បាញ់គ្រាប់រ៉ុក្កែតប្រឆាំងរថក្រោះទៀតផង។
វិស្វករម្នាក់មកពីក្រុមអ្នកអភិវឌ្ឍសុនករ៉ូបូតនេះ បាននិយាយថា សុនកយន្តនេះអាចត្រូវបានប្រើប្រាស់ទាំងនៅក្នុងវិស័យយោធា ទាំងក្នុងវិស័យស៊ីវិល។
នៅលើពិភពលោកនេះ ការដែលសុនករ៉ូបូតត្រូវបានកងទ័ពប្រើប្រាស់ មិនមែនជារឿងកម្រនោះទេ។ មុននោះ សហរដ្ឋអាម៉េរិក ក៏បានដាក់ឱ្យប្រើប្រាស់សុនកយន្តសម្រាប់ការពារសន្តិសុខ និងឈ្លបយកការណ៍នៅតាមបន្ទាយរបស់ខ្លួនផងដែរ៕
សេចក្ដីព្រាងច្បាប់ស្ដីពីការធានាលើខ្ទង់ហិរញ្ញប្បទានឡើងដល់ ១៥០ ពាន់លានបាត (៤.២៣ ពាន់លានដុល្លារអាម៉េរិក) សម្រាប់មូលនិធិរ៉ែប្រេងរដ្ឋ ក្នុងបំណងជួយបញ្ចុះតម្លៃថាមពល និងជួយទប់ទល់នឹងបញ្ហាអតិផរណា ត្រូវបានគណៈរដ្ឋមន្ត្រីថៃ អនុម័តកាលពីថ្ងៃទី ១៦ សីហា។
សេចក្ដីព្រាងច្បាប់នេះនឹងត្រូវការត្រួតពិនិត្យដោយ ក្រុមប្រឹក្សាជាតិ ដែលជាស្ថាប័នប្រឹក្សាផ្នែកច្បាប់របស់ រាជរដ្ឋាភិបាល មុននឹងបញ្ជូនទៅកាន់សភាដើម្បីអនុម័តបន្ត។
គិតត្រឹមថ្ងៃទី ១៤ សីហា ការិយាល័យនៃមូលនិធិប្រេងឥន្ធនៈថៃ (Offo) កំពុងខាតប្រហែល ១១៧ ពាន់លានបាត (៣.៣ ពាន់លានដុល្លារអាម៉េរិក) ដោយសារការផ្ដល់ជំនួយ និងគ្រប់គ្រងតម្លៃប្រេង បំណងរក្សាអត្រាកំណើននៃអតិផរណា ដែលបានឡើងខ្ពស់បំផុតក្នុងអំឡុង ១៤ ឆ្នាំ កាលពីខែកក្កដា។
ការដែលតម្លៃថាមពលកើនឡើងខ្ពស់ ក៏ទាញអតិផរណាឱ្យឡើងខ្ពស់ជាងមុន ដែលបញ្ហានេះមិនត្រឹមតែជាឧបសគ្គចំពោះការស្ដារសេដ្ឋកិច្ចនោះទេ ប៉ុន្តែ ក៏ធ្វើឱ្យរតនាគារជាតិត្រូវអស់ប្រាក់ច្រើន ក្នុងគ្រាដែលប្រទេសថៃ កំពុងត្រូវការប្រាក់ចាំបាច់ដើម្បីទប់ទល់នឹងបញ្ហាសេដ្ឋកិច្ចដែលបានកើតឡើងដោយសារកូវីដ-១៩៕
មនុស្ស ២ នាក់បានបាត់បង់ជីវិត និង ៥ នាក់ទៀតរងរបួស បន្ទាប់ពីយន្តហោះធុនតូច ១ គ្រឿង បានធ្លាក់ទៅក្នុងបឹង Powell ដែលស្ថិតនៅចន្លោះរដ្ឋ Arizona និងរដ្ឋ Utah របស់ សហរដ្ឋអាម៉េរិក។
អាជ្ញធារក្នុងតំបន់ កាលពីថ្ងៃទី ១៦ សីហា បានឱ្យដឹងថា យន្តហោះធុនតូច ១ គ្រឿង បានធ្លាក់ចូលទៅក្នុងបឹងមួយដែលស្ថិតនៅចន្លោះរដ្ឋ Arizona និងរដ្ឋ Utah របស់ សហរដ្ឋអាម៉េរិក បណ្ដាលឱ្យមនុស្ស ២ នាក់ស្លាប់ និង ៥ នាក់ទៀតរងរបួស។
សក្សីបានឱ្យដឹងថា ពួកគេបានឃើញយន្តហោះហោះសំដៅបឹង Powell នៅក្បែរជ្រលងភ្នំ Face នៅវេលាម៉ោង ១៧ និង ៣០ នាទី ថ្ងៃទី ១៣ សីហា។
ក្រុមមន្ត្រីនៃនាយកដ្ឋានអាកាសចរណ៍អាម៉េរិក បានបញ្ជាក់ថា អ្នកបើកបររបស់យន្តហោះ Cessna 207 បានរាយការណ៍អំពីបញ្ហាម៉ាស៊ីន មុនពេលយន្តហោះជួបគ្រោះថ្នាក់។ អ្នកដំណើរ ៦ នាក់នៅលើយន្តហោះដែលបានធ្លាក់នោះគឺជា ជនជាតិបារាំង។
បច្ចុប្បន្ន សាកសពយន្តហោះកំពុងស្ថិតនៅក្រោមផ្ទៃទឹកបឹងដែលមានជម្រៅ ៣៧ ម៉ែត្រ។ ចំណែកអត្តសញ្ញាណរបស់ជនរងគ្រោះក្នុងហេតុការណ៍នេះមិនទាន់ត្រូវបានប្រកាសនៅឡើយ។ សមត្ថកិច្ចកំពុងតែស្រាវជ្រាវរកមូលហេតុជាក់លាក់ដែលនាំឱ្យកើតមានហេតុការណ៍នេះ៕
លោក ចូ បៃដិន បានចុះហត្ថលេខាលើសេចក្ដីព្រាងច្បាប់តម្លៃ ៤៣០ ពាន់លានដុល្លារ ដើម្បីដោះស្រាយបញ្ហាអាកាសធាតុ បញ្ចុះតម្លៃឱសថតាមវេជ្ជបញ្ជា និងកាត់បន្ថយអតិផរណា។
ការចុះហត្ថលេខាលើសេចក្ដីព្រាងច្បាប់ខាងលើត្រូវបានធ្វើឡើងនៅ សេតវិមាន កាលពីថ្ងៃទី ១៦ សីហា ដោយមានវត្តមានរបស់ក្រុមមេដឹកនាំនៃ បក្សប្រជាធិបតេយ្យ។
ដោយមានខ្ទង់ប្រាក់ជាង ៣០០ ពាន់លានដុល្លារ សម្រាប់វិនិយោគទៅលើវិស័យអាកាសធាតុ ច្បាប់ថ្មីនេះត្រូវបានចាត់ទុកថាជាកញ្ចប់ថវិកាអាកាសធាតុធំបំផុតក្នុងប្រវត្តិសាស្ត្រអាម៉េរិក។ ក្រៅពីអាកាសធាតុ ច្បាប់នេះក៏អនុញ្ញាតឱ្យ Medicare ចរចាតម្លៃឱសថឱ្យមកនៅទាបជាងមុនសម្រាប់ពលរដ្ឋវ័យចំណាស់ ក៏ដូចជាធានាឱ្យបានថា បណ្ដាក្រុមហ៊ុន និងក្រុមអ្នកមាន ត្រូវបង់ពន្ធបន្ថែម
បក្សប្រជាធិបតេយ្យ និយាយថា ច្បាប់នេះនឹងជួយកាត់បន្ថយអតិផរណាផងដែរ តាមរយៈការកាត់បន្ថយឱនភាពសេដ្ឋកិច្ចជាតិ បើទោះជាក្រុមសេដ្ឋវិទូឯករាជ្យយល់ថា ត្រូវការពេលច្រើនឆ្នាំទើបគេបានឃើញប្រសិទ្ធភាពរបស់វិធានការនេះ។
ក្នុងការជួញដូរនៃថ្ងៃទី ១៦ សីហា តម្លៃប្រេង Brent ប្រគល់មានកាលកំណត់ បានធ្លាក់ចុះ ១.២១ ដុល្លារអាម៉េរិក ក្នុង ១ ធុង ក្នុងគ្រាដែលតម្លៃប្រេងឆៅអាម៉េរិក (WTI) ក៏បាត់បង់អស់ ៨៤ សេនអាម៉េរិក ក្នុង ១ ធុង។
តម្លៃប្រេងនៅ អាស៊ី ដាំក្បាលចុះនៅក្នុងរសៀសថ្ងៃទី ១៦ សីហា នៅពេលទិន្នន័យសេដ្ឋកិច្ចមិនសូវល្អពី ប្រទេសចិន ដែលជាប្រទេសនាំចូលប្រេងច្រើនជាងគេ បានធ្វើឱ្យមានការបារម្ភអំពីឱនភាពសេដ្ឋកិច្ចសកល។
ក្នុងការជួញដូរនៃថ្ងៃទី ១៦ សីហា តម្លៃប្រេង Brent ប្រគល់មានកាលកំណត់ បានធ្លាក់ចុះ ១.២១ ដុល្លារអាម៉េរិក (១.៣%) មកនៅត្រឹម ៩៣.៨៩ ដុល្លារ/ធុង នៅវេលាម៉ោង ១៣ និង ៣៥ នាទី (ម៉ោងនៅ ភ្នំពេញ) ក្នុងគ្រាដែលតម្លៃប្រេងឆៅអាម៉េរិក (WTI) ក៏បាត់បង់អស់ ៨៤ សេនអាម៉េរិក (០.៩%) មកនៅត្រឹម ៨៨.៥៧ ដុល្លារ/ធុង។ កិច្ចព្រមព្រៀងជួញដូរអនាគតរបស់ប្រេងទាំងពីរខាងលើ បានថយចុះប្រហែល ៣% នៅក្នុងការជួញដូរប៉ុន្មានថ្ងៃចុងក្រោយនេះ។
ក្រៅពីបញ្ហាទាក់ទិននឹងសេដ្ឋកិច្ចនៅ ប្រទេសចិន ក៏នៅមានរឿងជាច្រើនទៀតដែលនាំឱ្យប្រេងពិបាកឡើងថ្លៃ មានដូចជា បញ្ហាស្ដីពីកិច្ចព្រមព្រៀងនុយក្លេអែរ រវាង អាម៉េរិក និង អ៊ីរ៉ង់ និងរបាយការណ៍ស្ដីពីបរិមាណប្រេងនៅក្នុងឃ្លាំងផ្ទុករបស់ សហរដ្ឋអាម៉េរិក ដែលគ្រោងនឹងកើនប្រមាណ ៩ លានធុង/ថ្ងៃ នៅក្នុងខែកញ្ញាខាងមុខ។ល។
ក្រសួងចរាចរណ៍ថៃ បានឱ្យដឹងថា ក្នុងរង្វង់ ៣ ឆ្នាំខាងមុខ នាយកដ្ឋានដឹកជញ្ជូនសាធារណៈនៃ រាជធានីបាងកក (BMTA) នឹងទិញរថយន្តក្រុងអគ្គិសនីចំនួន ៣,២០០ គ្រឿង ដើម្បីជំនួសរថយន្តក្រុងម៉ាស៊ីនសាំងទាំងអស់ដែលធ្វើចរាចរណ៍នៅលើដងផ្លូវក្នុងរាជធានីរបស់ប្រទេសនេះ។
គម្រោងនេះគឺជាផ្នែកមួយក្នុងផែនការស្ដារស្ថានការណ៍ពាណិជ្ជកម្មដែលគ្រោងនឹងត្រូវបាន BMTA ដាក់សំណើឡើងទៅកាន់រាជរដ្ឋាភិបាលដើម្បីសុំការអនុម័តក្នុងអំឡុង ២ ខែទៀត នេះបើតាម អនុរដ្ឋលេខាធិការអចិន្ត្រៃយ៍នៃ ក្រសួងដឹកជញ្ជូនថៃ Sorapong Paitoonphong។
តាំងពីឆ្នាំ ២០២០ BMTA បានមានគម្រោងទិញរថយន្តក្រុងថ្មីចំនួន ២,៨០០ គ្រឿង ដើម្បីជំនួសរថយន្តចាស់ដែលកំពុងដំណើរការក្នុងទីក្រុង ប៉ុន្តែ BMTA បានកែសម្រួលផែនការ បន្ទាប់ពី ការិយាល័យគោលនយោបាយសហគ្រាសរដ្ឋថៃ បានណែនាំឱ្យបន្ថែមបច្ចេកវិទ្យារថយន្តអគ្គិសនី។
យោងតាមផែនការថ្មី BMTA នឹងប្រើប្រាស់រថយន្តក្រុងដែលដំណើរការដោយថាមពលអគ្គិសនីដើម្បីជំនួសក្រុមរថយន្តម៉ាស៊ីនសាំង។ ក៏ប៉ុន្តែ នាយកដ្ឋាននេះមិនទាន់សម្រេចចិត្តថា នឹងត្រូវទិញ ឬជួលរថយន្តក្រុងអគ្គិសនីទាំងនេះនៅឡើយ។
ក្នុងពេលកំពុងរង់ចាំការអនុម័តពីថ្នាក់លើ MBTA គ្រោងនឹងជួលក្រុមហ៊ុនមួយចំនួនដើម្បីដំណើរការរថយន្តក្រុង ២២៤ គ្រឿង នៅតាមដងផ្លូវមួយចំនួនជាមួយនឹងថវិកាប្រហែល ៩៥៣ លានបាត ដែលប្រហែលនឹង ២៦,៨៩៨,០០០ ដុល្លារអាម៉េរិក។
ចំណែកបណ្ដាក្រុមហ៊ុនដែលទទួលបានការផ្ដល់សិទ្ធិឱ្យដំណើរការរថយន្តក្រុងនៅលើដងផ្លូវ ៥៤ ខ្សែនៅ បាងកក និងបណ្ដាខេត្តក្បែររាជធានី នឹងចាប់ផ្ដើមជំនួសរថយន្តក្រុងចាស់ ដោយរថយន្តក្រុងដែលប្រើប្រាស់អគ្គិសនីនៅក្នុងខែនេះ៕
ឃ្លាំងអាវុធនៅ ឧបទ្វីបគ្រីមៀ បានផ្ទុះនៅថ្ងៃនេះ បណ្ដាលឱ្យប្រជាជនក្នុងតំបន់ ត្រូវជម្លៀសខ្លួនទៅកាន់ទីសុវត្ថិភាព។
«ករណីផ្ទុះគ្រាប់រំសេវ បានកើតឡើងនៅតំបន់ភាគខាងជើងនៃ ឧបទ្វីបគ្រីមៀ (Crimea)» នេះបើតាមទីភ្នាក់ងារសារព័ត៌មាន TASS ស្រង់សម្ដីមេដឹកនាំរបស់ គ្រីមៀ Segey Aksyonov ដែលនិយាយដល់ឃ្លាំងអាវុធស្ថិតនៅក្នុងភូមិ Maiskoye មានចម្ងាយពីទីរួមស្រុក Dzhankoi ប្រហែល ២៥ គីឡូម៉ែត្រ ទៅទិសខាងត្បូង។ ប្រជាជនក្នុងតំបន់ កំពុងត្រូវបានឈ្លៀសទៅកាន់ទីសុវត្ថិភាព។
បច្ចុប្បន្ន មិនទាន់ដឹងច្បាស់អំពីមូលហេតុនៃហេតុការណ៍ផ្ទុះឃ្លាំងអាវុធនេះ។ ទីភ្នាក់ងារសារព័ត៌មាន RIA Novosti ស្រង់ព័ត៌មានពី ក្រសួងការពារជាតិរុស្ស៊ី ឱ្យដឹងថា ករណីផ្ទុះនៅ Maiskoye នេះ មិនបានបណ្ដាលឱ្យមានមនុស្សស្លាប់ឡើយ។
ករណីផ្ទុះនេះកើតឡើងតែប៉ុន្មានថ្ងៃប៉ុណ្ណោះក្រោយហេតុការណ៍ប្រហាក់ប្រហែលនេះបានកើតឡើងនៅឯព្រលានយន្តហោះយោធារបស់ រុស្ស៊ី នៅ គ្រីមៀ ដែលបានបណ្ដាលឱ្យយន្តហោះចម្បាំងជាច្រើនគ្រឿងរងការខូចខាត។
ឧបទ្វីបគ្រីមៀ ស្ថិតនៅជាប់នឹងខេត្ត Kherson នៃភាគខាងត្បូងរបស់ អ៊ុយក្រែន ជាទីដែលកំពុងត្រូវបានកាន់កាប់ដោយ រុស្ស៊ី និងនៅក្បែរតំបន់ Zaporizhzhia ភាគអាគ្នេយ៍របស់ អ៊ុយក្រែន ដែលបច្ចុប្បន្នត្រូវបាន រុស្ស៊ី គ្រប់គ្រងមួយភាគធំ។
រុស្ស៊ី បានរឹបអូសយក គ្រីមៀ កាលពីឆ្នាំ ២០១៤ តាមរយៈការធ្វើប្រជាមតិ។ ទីក្រុងកៀវ មិនទទួលស្គាល់ប្រការនេះ និងបានហៅ គ្រីមៀ ថាជា «ទឹកដែលត្រូវគេឈ្លានពាន»។ ទីប្រឹក្សារបស់ ប្រធានាធិបតីអ៊ុយក្រែន និយាយថា សង្គ្រាមជាមួយនឹង រុស្ស៊ី អាចត្រូវបានបញ្ចប់ លុះណាតែ ទីក្រុវកៀវ ដណ្ដើមបាន ឧបទ្វីបគ្រីមៀ មកវិញ៕
កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ៣៦ នាក់ ក្នុងអំឡុង ២៤ ម៉ោង នៃថ្ងៃទី ១៥ ខែសីហា ២០២២ ក្នុងនោះមានករណីឆ្លងក្នុងសហគមន៍ចំនួន ៣៦ នាក់។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ២៤ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
គិតមកទល់ពេលនេះ កម្ពុជា មានករណីឆ្លងសរុបចំនួន ១៣៧,៣០០ នាក់, ករណីជាសះស្បើយចំនួន ១៣៣,៩៨២ នាក់ និងករណីស្លាប់សរុបចំនួន ៣,០៥៦ នាក់។
