នៅពេលនេះ មានករណីអគ្គិភ័យមួយកំពុងកើតឡើងនៅក្លឹបមួយកន្លែង ដែលស្ថិតនៅក្នុងសង្កាត់ផ្សារដេីមថ្កូវខណ្ឌចំការមន រាជធានីភ្នំពេញ។
ករណីអគ្គិភ័យនេះ កើតឡើងនៅវេលាម៉ោង ១០ និង ៥០ នាទីព្រឹក ថ្ងៃទី ០១ ខែកញ្ញា ឆ្នាំ ២០២២ នេះបើតាមការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ។
ក្រោយពីទទួលបានដំណឹងនេះភ្លាម កម្លាំងសមត្ថកិច្ចជំនាញ បានចេញរថយន្តពន្លត់អគ្គិភ័យទៅជួយអន្តរាគមន៍បន្ទាន់។
យានអវកាស Voyager 1 ដែលស្ថិតនៅចម្ងាយ ២៣.៥ ពាន់លានគីឡូម៉ែត្រពីផែនដី បន្តបំពេញបេសកកម្មនៅតំបន់អវកាសអន្តរតារា បន្ទាប់ពី ណាសា បានដោះស្រាយបញ្ហាទាក់ទងនឹងម៉ាស៊ីនកុំព្យូទ័រ។
ក្រោយរយៈពេលច្រើនខែដែលបានផ្ញើទិន្នន័យសំរាមមកកាន់ស្ថានីយគ្រប់គ្រងនៅលើផែនដី យានអវកាស Voyager 1 របស់ ណាសា បានដំណើរការត្រឹមត្រូវឡើងវិញ និងបន្តផ្ញើទិន្នន័យច្បាស់លាស់ពីស្ថានភាពរបស់វានៅក្នុងតំបន់អន្តរតារា ដែលស្ថិតនៅក្រៅប្រព័ន្ធព្រះអាទិត្យ នេះបើតាម Space ចុះផ្សាយកាលពីថ្ងៃទី ៣១ សីហា។
ណាសា បានប្រកាសអំពីបញ្ហានៅលើយានអវកាសដែលមានអាយុ ៤៥ ឆ្នាំ ជាលើកដំបូងកាលពីខែឧសភា ២០២២។ ក្រុមអ្នកជំនាញបានដឹងថា បញ្ហាស្ថិតនៅក្នុងប្រព័ន្ធ AACS ដែលជាប្រព័ន្ធអាចកំណត់ឱ្យអង់តែនរបស់វា បែរមកកាន់ផែនដី។
នៅពេលសង្ស័យថា Voyager 1 ប្រើប្រាស់កុំព្យូទ័រដែល «ងាប់» ក្រុមវិស្វកររបស់ ណាសា ក៏បានបញ្ជាឱ្យវាប្រើប្រាស់កុំព្យូទ័រមួយគ្រឿងផ្សេងទៀតដើម្បីអាចឱ្យ AACS រក្សាទំនាក់ទំនងជាមួយស្ថានីយគ្រប់គ្រងនៅលើផែនដី។
សូមបញ្ជាក់ថា រលកវិទ្យុដែលបញ្ជូនពីផែនដី នឹងត្រូវការពេលជិត ២២ ម៉ោង ដើម្បីទៅដល់យាន Voyager 1 ដែលជាយានអវកាសមួយគ្រឿងកំពុងស្ថិតនៅឆ្ងាយពីផែនដីប្រមាណ ២៣.៥ ពាន់លានគីឡូម៉ែត្រ និងកំពុងហោះចេញទៅឆ្ងាយថែមទៀត។
ណាសា បានបាញ់បង្ហោះ Voyager 1 និង Voyager 2 ឡើងទៅកាន់ទីអវកាសកាលពីឆ្នាំ ១៩៧៧ ក្នុងបំណងស្រាវជ្រាវពិភពនានានៅខាងក្រៅប្រព័ន្ធព្រះអាទិត្យ។ Voyager 1 បានហោះឆ្លងកាត់ពិភពព្រហស្បតិ៍ និង ពិភពសៅរ៍ បន្ទាប់មកក៏បានហោះឆ្ពោះទៅកាន់តំបន់អន្តរតារា នៅឆ្នាំ ២០១២។ Voyager 2 សម្រេចបានគោលដៅនេះនៅឆ្នាំ ២០១៨៕
យោងតាមសេចក្ដីជូនដំណឹងរបស់ ក្រសួងពាណិជ្ជកម្ម តម្លៃប្រេងឥន្ធនៈ ដែលនឹងត្រូវលក់ ចាប់ពីថ្ងៃទី 0១ ដល់ថ្ងៃទី ១០ ខែកញ្ញា ឆ្នាំ ២០២២ បង្ហាញថា ប្រេងសាំងមានតម្លៃ ៤,៧០០ រៀល/លីត្រ និង ប្រេងម៉ាស៊ូតតម្លៃ ៥,៥០០ រៀល/លីត្រ។
ព័ត៌មានលម្អិត សូមអានសេចក្ដីជូនដំណឹងរបស់ ក្រសួងពាណិជ្ជកម្ម ខាងក្រោម ៖
ក្រុមហ៊ុនផលិតរថយន្តរបស់ ប្រទេសជប៉ុន មួយនេះ នឹងចាប់ផ្ដើមផលិតថ្មផ្ទុកអគ្គិសនីពីឆ្នាំ ២០២៤ ដល់ ២០២៦ ដោយប្រើប្រាស់ទុនប្រមាណ ៧៣០ ពាន់លានយេន ដើម្បីបង្កើនសមត្ថភាពក្នុងការផលិតថ្ម ទាំងនៅ ជប៉ុន ទាំងនៅ សហរដ្ឋអាម៉េរិក ឱ្យបានឡើងដល់ ៤០ GWh។
Toyota ដែលជាក្រុមហ៊ុនផលិតរថយន្តរបស់ ជប៉ុន កាលពីថ្ងៃទី ៣១ សីហា បានឱ្យដឹងថា នឹងវិនិយោគ ៧៣០ ពាន់លានយេន (ប្រហែល ៥.២៧ ពាន់លានដុល្លារអាម៉េរិក) នៅ ជប៉ុន និងនៅ សហរដ្ឋអាម៉េរិក ដើម្បីផលិត និងផ្គត់ផ្គង់ថ្មផ្ទុកថាមពលសម្រាប់រថយន្តដើរដោយកម្លាំងអគ្គិសនី។
Toyota កំណត់គោលដៅចាប់ផ្ដើមផលិតថ្មផ្ទុកអគ្គិសនីពីឆ្នាំ ២០២៤ ដល់ ២០២៦ ដោយប្រើប្រាស់ទុនខាងលើ ដើម្បីបង្កើនសមត្ថភាពក្នុងការផលិតថ្ម ទាំងនៅ ជប៉ុន ទាំងនៅ សហរដ្ឋអាម៉េរិក ឱ្យបានដល់ ៤០ GWh។
ក្នុងខ្ទង់ប្រាក់វិនិយោគខាងលើ Toyota នឹងចំណាយប្រហែល ៤០០ ពាន់លានយេន សម្រាប់រោងចក្រផលិតថ្មផ្ទុកអគ្គិសនីនៅ ជប៉ុន និងប្រមាណ ២.៥ ពាន់លានដុល្លារទៀត សម្រាប់ការផលិតនៅ សហរដ្ឋអាម៉េរិក។
បណ្ដាក្រុមហ៊ុននៅទូទាំងពិភពលោក កំពុងតែចំណាយប្រាក់រាប់សិបពាន់លានដុល្លារ ដើម្បីបង្កើនការផលិតរថយន្តអគ្គិសនី និងថ្មផ្ទុកអគ្គិសនី ក្នុងគ្រាដែលបណ្ដាប្រទេស និងអង្គការអន្តរជាតិនានា ចាប់ផ្ដើមរឹតបន្តឹងលើការការពារបរិស្ថាន៕
(សហរដ្ឋអាម៉េរិក)-Austin Bellamy អាយុ ២០ ឆ្នាំ រស់នៅក្នុងរដ្ឋ Ohio បានបាត់បង់ស្មារតី និងត្រូវប្រើប្រាស់ម៉ាស៊ីនជំនួយដង្ហើម ក្រោយពីត្រូវឃ្មុំពិឃាតអាហ្វ្រិកទិចនៅពេលកំពុងឆ្ការមែនឈើ។
Austin Bellamy បានកាប់ចំមែនឈើដែលមានសំបុកឃ្មុំពិឃាតអាហ្វ្រិក ពេលកំពុងត្រួសមែនឈើនៅក្នុងតំបន់ Cincinnati រដ្ឋ Ohio សហរដ្ឋអាម៉េរិក ភ្លាមនោះស្រាប់តែត្រូវហ្វូងឃ្មុំឡោមព័ទ្ធ និងទិចយ៉ាងដំណំកាលពីល្ងាចថ្ងៃទី ៣០ សីហា។ នេះបើតាមសារព័ត៌មាន AFP ដកស្រង់ព័ត៌មានពីទំព័ររៃអង្គាសប្រាក់របស់អ្នកស្រី Shawna Carters ដែលត្រូវជាម្ដាយជនរងគ្រោះ។
លោកយាយរបស់ Austin Bellamy រៀបរាប់ប្រាប់ថា «ពេលចៅខ្ញុំកាប់ចំបែកឈើ ហ្វូងឃ្មុំក៏បានហោះចេញ គេព្យាយាមបាំងបិទប៉ុន្តែមិនអាច។ ចៅខ្ញុំស្រែកឱ្យជួយ ប៉ុន្តែមិនមានអ្នកណាអាចជួយបាន»។
អ្នកផ្ទះរបស់ Austin Bellamy ដែលនៅខាងក្រោមដើមឈើ មិនអាចជួយជនរងគ្រោះបាន ព្រោះថា ពួកគេក៏ត្រូវឃ្មុំទិចដូចគ្នា។
អ្នកស្រី Carters បានឱ្យដឹងថា Bellamy ត្រូវឃ្មុំទិចប្រហែល ២ ម៉ឺនទ្រនិច ក្នុងនោះមានប្រហែល ៣០ ទ្រនិចនៅក្នុងមាត់ ធ្វើឱ្យក្រុមវេជ្ជបណ្ឌិតត្រូវចំណាយពេលពេញ ១ ថ្ងៃ ទើបដកយកទ្រនិចចេញអស់។
អ្នកស្រី Carters បានថ្លែងអំណរគុណដល់ក្រុមពន្លត់អគ្គិភ័យដែលបានជួយសង្គ្រោះកូនរបស់គាត់ និងនាំទៅសង្គ្រោះបន្ទាន់។ ក្រុមវេជ្ជបណ្ឌិតនិយាយថា Bellamy នឹងបានជាសះស្បើយឡើងវិញមិនខាន។
ឃ្មុំពិឃាតអាហ្វ្រិក គឺជាប្រភេទឃ្មុំល្បីឈ្មោះនៅ សហរដ្ឋអាម៉េរិក ដោយសារតែ «ចរិតកោងកាច» របស់ពួកវា។ នៅពេលសំបុករបស់ពួកវារងការគំរាមកំហែង ហ្វូងឃ្មុំនៅក្នុងសំបុក និងនៅក្រៅសំបុក នឹងហោះសម្រុកចេញវាយប្រហារលើអ្នកឈ្លានពាន៕
ជាមួយនឹងទិសដៅបង្កើនការនាំចេញ និងអភិវឌ្ឍស្លាកយីហោវៀតណាម ក្រុមហ៊ុន Bong Bach Tuyet កំពុងសម្លឹងគោលដៅទីផ្សារនៅក្នុងបណ្ដាប្រទេសក្បែរខាង ក្នុងនោះមាន កម្ពុជា ផងដែរ។
កន្លងទៅថ្មីៗនេះ សាជីវកម្ម Bong Bach Tuyet នៅ ប្រទេសវៀតណាម បានចុះហត្ថលេខាលើកិច្ចព្រមព្រៀងផ្គត់ផ្គង់ផ្ដាច់មុខនូវផលិតផលសម្លីថែទាំស្បែក Calla, ម៉ាស និងសម្លីសម្អាតជាដើម ជាមួយនឹងក្រុមហ៊ុន TM & DV VK Mart (VK Mart) ដែលជាអ្នកផ្គត់ផ្គង់ផលិតផលនានាទៅឱ្យបណ្ដាផ្សារទំនើបនៅ កម្ពុជា។
Bong Bach Tuyet គឺជាយីហោដែលមានអាយុកាលយូរមួយនៅ វៀតណាម ដោយមានបទពិសោធន៍ ៦២ ឆ្នាំ ក្នុងវិស័យផលិត និងផ្គត់ផ្គង់ផលិតផលសុខាភិបាលទាក់ទងនឹងសម្លីកប្បាស ដូចជាសម្លីជូតសម្អាតរបួស បង់រុំរបួស។ល។
ផលិតផលដែលលេចធ្លោជាងគេនាពេលថ្មីៗរបស់ Bong Bach Tuyet គឺម៉ាស N95 និងធ្យូងកែច្នៃដែលទទួលវិញ្ញាបនបត្រ FFP3 របស់ អឺរ៉ុប។
ក្រុមហ៊ុនគ្រប់គ្រងកម្មវិធី GoTo បានខាតអស់ប្រមាណ ១៤.១៧ ទ្រីលានរូពី (ប្រហែល ៩៥៥ លានដុល្លារអាម៉េរិក) ក្នុងអំឡុង ៦ ខែដើមឆ្នាំ ២០២២ ច្រើនជាងទ្វេដង ធៀបនឹង ៦ ខែដើមឆ្នាំ ២០២១។
៦ ខែដើមឆ្នាំ ២០២២ GoTo ដែលជាម្ចាស់គ្រប់គ្រងរបស់ក្រុមហ៊ុនហៅរថយន្តតាក់ស៊ី Gojek បានខតបង់អស់ ១៤.១៧ ទ្រីលានរូពី ច្រើនជាងទ្វេដង ធៀបនឹងការខាតបង់អស់ ៦.៦ ទ្រីលានរូពី កាលពី ៦ ខែដើមឆ្នាំកន្លង។ ក្នុងអំឡុង ៦ ខែដើមឆ្នាំនេះដែរ ប្រាក់ចំណូលរបស់ Gojek បានកើន ៣.៣ ទ្រីលានរូពី។
នេះគឺជារបាយការណ៍ហិរញ្ញវត្ថុលើកទីបីរដែល GoTo ប្រកាស រាប់ចាប់តាំងពីបានឡើងផ្សារហ៊ុនកាលពីខែមេសា ២០២២ ហើយក៏ជារបាយការណ៍ដែលបង្ហាញអំពីឧបសគ្គដែល Gojek បានជួបប្រទះ។
GoTo ត្រូវបានបង្កើតឡើងកាលពីខែឧសភា ២០២១ បន្ទាប់ពីការច្របាច់បញ្ចូលគ្នារវាងកម្មវិធីទូរស័ព្ទហៅយានជំនិះ និងអាហារ Gojek ជាមួយនឹងក្រុមហ៊ុនផ្សារអនឡាញ Tokopedia របស់ ឥណ្ឌូណេស៊ី។
ឆ្នាំ ២០២១ GoTo ខក ២១.៤ ទ្រីលានរូពី។ ក្នុង ៣ ខែដើមឆ្នាំនេះ GoTo ក៏បន្តខាតប្រមាណ ៦ ទ្រីលានរូពី ច្រើនជាងឆ្ងាយធៀបនឹងខ្ទង់ប្រាក់ខាតបង់ ១.៨ ទ្រីលានរូពី នៅមុនពេលច្របាច់បញ្ចូលគ្នា កាលពីឆ្នាំកន្លង។
ទោះជាយ៉ាងនេះក៏ដោយ ក្រុមហ៊ុនបច្ចេកវិទ្យារបស់ ឥណ្ឌូណេស៊ី នេះ នៅតែសង្ឃឹមយ៉ាងមុតមាំថា ស្ថានការណ៍ជំនួញនឹងត្រូវបានកែលំអ នៅពេលតម្លៃប្រតិបត្តិការសរុប និងប្រាក់ចំណូលសរុបនៅតែកើនឡើងក្នុងឆ្នាំ ២០២១ និងត្រីមាសទីមួយឆ្នាំ ២០២២៕
ក្នុងចំណោមធនធានមនុស្សដែលក្រុមហ៊ុនរបស់ វៀតណាម Vingroup ត្រូវការ មានប្រហែល ២០% ជាបុគ្គលិកជាន់ខ្ពស់ដែលតម្រូវឱ្យមានសញ្ញាបត្របរិញ្ញា និងប្រហែល ១០% សម្រាប់ផ្នែកផលិតផលនាំចេញទៅបរទេស។
ដំណឹងខាងលើនេះត្រូវបានអគ្គនាយករបស់ក្រុមហ៊ុន Vingroup ប្រកាសកាលពី ២ សប្ដាហ៍មុន នៅចំពោះមុខ នាយករដ្ឋមន្ត្រីវៀតណាម Pham Minh Chinh។
យោងតាម អគ្គនាយករបស់ Vingroup ក្រុមហ៊ុននេះបច្ចុប្បន្នមាន ៣ ផ្នែកសំខាន់ៗគឺ បច្ចេកវិទ្យា និងឧស្សាហកម្ម, ពាណិជ្ជកម្ម និង សេវាកម្ម និងទី ៣ គឺ សង្គមស្ម័គ្រចិត្ត។
មកដល់បច្ចុប្បន្ន Vingroup មានបុគ្គលិកសរុបប្រមាណ ៤៥,០០០ នាក់ ប៉ុន្តែ ក្រុមហ៊ុននេះគ្រោងនឹងជ្រើសរើសបន្ថែមឱ្យបានឡើងដល់ ១៥០,០០០ នាក់ នៅក្នុងអំឡុង ២ ឆ្នាំខាងមុខ។ ក្នុងចំណោមធនធានមនុស្សដែលក្រុមហ៊ុននេះត្រូវការ មានប្រហែល ២០% ជាបុគ្គលិកជាន់ខ្ពស់ដែលតម្រូវឱ្យមានសញ្ញាបត្របរិញ្ញា និងប្រហែល ១០% សម្រាប់ផ្នែកផលិតផលនាំចេញទៅបរទេស។
ក្រុមហ៊ុនដែលត្រូវបានបង្កើតឡើងដោយមហាសេដ្ឋី Pham Nhat Vuong របស់ វៀតណាម មួយនេះ មានក្រុមហ៊ុនបុត្រសម្ព័ន្ធជាច្រើន មានដូចជា VinFast ជាក្រុមហ៊ុនផលិតរថយន្តអគ្គិសនី, Vinhomes ខាងអភិវឌ្ឍលំនៅឋាន, VinSmart ផលិតឧបករណ៍បច្ចេកវិទ្យា និង VinID ជាក្រុមហ៊ុនអភិវឌ្ឍមុខងារបច្ចេកវិទ្យា។ល។
កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ២៤ នាក់ ក្នុងអំឡុង ២៤ ម៉ោង នៃថ្ងៃទី ៣០ ខែសីហា ២០២២។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ២៦ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
ពិធីសម្ពោធបើកការដ្ឋានសាងសង់ស្ពានអាកាសក្នុង រាជធានីភ្នំពេញចំនួន ២ ដែលមានតម្លៃសរុបជាង ៤៦ លានដុល្លារអាមេរិក ត្រូវបានធ្វើឡើងក្រោមអធិបតីភាព សម្តេចតេជោ ហ៊ុន សែន នៅព្រឹកថ្ងៃទី ៣១ ខែសីហានេះ។
ស្ពានអាកាសថ្មីចំនួន ២ ខាងលើនេះ រួមមាន ស្ពានទី ១ ស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយផ្លូវលេខ ២៧១ (វិថីកងយោធពលខេមរភូមិន្ទ) ក្នុងទឹកដីខណ្ឌចំការមន និងខណ្ឌមានជ័យ។ ស្ពានអាកាសទី ២ ស្ថិតនៅចំណុចប្រសព្វមហាវិថីសហព័ន្ធរុស្ស៉ី ជាមួយផ្លូវលេខ ២០០៤ (មហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល) ក្នុងខណ្ឌពោធិ៍សែនជ័យ រាជធានីភ្នំពេញ។
ស្ពានអាកាសដែលស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយវិថីកងយោធពលខេមរភូមិន្ទ-២៧១ ក្នុងទឹកដីខណ្ឌចំការមន និងខណ្ឌមានជ័យ ត្រូវបាន សម្តេចតេជោ ហ៊ុន សែន បានប្រសិទ្ធនាមថា «ស្ពានអាកាសព្រះមុនីវង្ស» ខណៈដែលស្ពានអាកាសនៅចំណុចប្រសព្វរវាង មហាវិថីសហព័ន្ធរុស្ស៊ី និងផ្លូវលេខ ២០០៤ ក្នុង ខណ្ឌពោធិ៍សែនជ័យ ត្រូវបានហៅថា «ស្ពានអាកាស គង់ សំអុល»។
គិតមកដល់បច្ចុប្បន្ន រាជធានីភ្នំពេញ មានស្ពានអាកាសចំនួន ៧ កន្លែង រួមទាំងស្ពានអាកាសចំនួន ២ ដែលត្រូវសម្ពោធបើកការដ្ឋានសាងសង់នៅព្រឹកនេះ៕