កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ១៣ នាក់ ក្នុងអំឡុង ២៤ ម៉ោង នៃថ្ងៃទី ០២ ខែកញ្ញា ឆ្នាំ ២០២២។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ១២ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
Author: សឿន សំណាង
វិស័យទេសចរណ៍ថៃ គ្រោងនឹងរកចំណូលបាន ១១ ពាន់លានដុល្លារក្នុងពាក់កណ្ដាលចុងឆ្នាំនេះ
វិស័យទេសចរណ៍នៅ ប្រទេសថៃ កំពុងតែងើបឡើងវិញ ក្នុងនោះ មួយភាគធំគឺដោយសារភ្ញៀវបរទេស ក្រោយពីវិធានការទប់ស្កាត់កូវីដ-១៩ ត្រូវបានដកចេញ។
យោងតាម Bloomberg វិស័យទេសចរណ៍របស់ ប្រទេសថៃ គ្រោងនឹងរកចំណូលបានប្រហែល ៤០០ ពាន់លានបាត ដែលប្រហាក់ប្រហែលនឹង ១១ ពាន់លានដុល្លារអាម៉េរិក ក្នុងនោះ ភ្ញៀវបរទេសគឺជាប្រភពចំណូលធំជាងគេរបស់វិស័យនេះ ក្រោយពីវិធានការទប់ស្កាត់កូវីដ-១៩ ត្រូវបានដកចេញ។
តំណាងអ្នកនាំពាក្យរបស់ រាជរដ្ឋាភិបាលថៃ លោក Rachada Dhnadirek បានឱ្យដឹងថា ទេសចរអន្តរជាតិប្រហែល ៧.៥ លាននាក់ នឹងមកទស្សនាតំបន់ទេសចរណ៍ល្បីឈ្មោះនានារបស់ ប្រទេសថៃ អំឡុងពេលពីខែកក្កដា ដល់ខែធ្នូ ២០២២ ដែលតួលេខនេះកើនឡើង ១,៨៤០% ធៀបនឹងមួយឆ្នាំកន្លង។ ប្រការនេះនឹងជួយឱ្យចំនួនទេសចរសរុបដែលមកកាន់ ប្រទេសថៃ ក្នុងឆ្នាំ ២០២២ ឡើងដល់ ១០ លាននាក់ ហើយនឹងនាំមកនូវប្រាក់ចំណូលប្រមាណ ១.២៧ ទ្រីលានបាត (ប្រហែល ៣៥.៧ ពាន់លានដុល្លារអាម៉េរិក)។
មុននោះ ក្រសួងទេសចរណ៍ និងកីឡាថៃ បានព្យាករថា ចាប់ពីពេលនេះរហូតដល់ចុងខែកញ្ញា ២០២២ ចំនួនភ្ញៀវអន្តរជាតិដែលមកលេងប្រទេសនេះ នឹងមានចំនួនប្រហែល ២.៧ លានលើក។ ដល់ត្រីមាសទី ៤ ឆ្នាំ ២០២២ ប្រទេសថៃនឹងទទួលភ្ញៀវបរទេសបានប្រហែល ៤.៥ លាននាក់។
ថៃ គឺជាប្រទេសមួយដែលពឹងផ្អែកច្រើនទៅលើវិស័យទេសចរណ៍។ មុនពេលកូវីដ-១៩ ចូលមកដល់ វិស័យទេសចរណ៍បានរួមចំណែកប្រហែល ១២% ទៅក្នុងផលិតផលក្នុងស្រុកសរុប (GDP) និង ២០% ក្នុងចំណោមការងារនៅប្រទេសនេះ។ នៅក្នុងឆ្នាំ ២០១៩ ភ្ញៀវបរទេសជិត ៤០ លាននាក់ បានចូលទស្សនាប្រទេសថៃ នេះបើតាម ធនាគារជាតិរបស់ ប្រទេសថៃ។ រដ្ឋាភិបាលថៃ មានបំណងលើកកម្ពស់ការរួមចំណែករបស់វិស័យទេសចរណ៍ក្នុង GDP របស់ប្រទេសនេះ ឱ្យបានដល់ ៣០% នៅក្នុងឆ្នាំ ២០៣០៕
ក្រសួងការបរទេសអាម៉េរិក សម្រេចលក់អាវុធតម្លៃ ១.១ ពាន់លានដុល្លារ ឱ្យ កោះតៃវ៉ាន់
ក្រសួងការបរទេសអាម៉េរិក បានអនុម័តការលក់មីស៊ីលអាកាសប្រឆាំងអាកាសចំនួន ១០០ គ្រាប់ រួមនឹងអាវុធជាច្រើនផ្សេងទៀត ក្នុងតម្លៃ ១.១ ពាន់លានដុល្លារអាម៉េរិក ទៅ ឱ្យ កោះតៃវ៉ាន់។
ការិយាល័យសហប្រតិបត្តិការសន្តិសុខការពារជាតិ (DSCA) របស់ មន្ទីរបញ្ចកោណ កាលពីថ្ងៃទី ០២ កញ្ញា បានប្រកាសថា ក្រសួងការបរទេសអាម៉េរិក បានអនុម័តការលក់អាវុធ និងឧបករណ៍យោធាតម្លៃ ១.១ ពាន់លានដុល្លារ ទៅឱ្យ កោះតៃវ៉ាន់។
កញ្ចប់អាវុធនេះរួមមាន មីស៊ីល AIM-9 Sidewinder ចំនួន ១០០ គ្រាប់ តម្លៃប្រហែល ៨៥.៦ លានដុល្លារ, មីស៊ីលប្រឆាំងនាវាពិឃាត Harpoon ចំនួន ៦០ គ្រាប់ តម្លៃប្រហែល ៣៥៥ លានដុល្លារ រួមនឹងប្រព័ន្ធគាំទ្រសម្រាប់រ៉ាដា តម្លៃប្រហែល ៦៦៥.៤ លានដុល្លារ។
សភាអាម៉េរិក នឹងពិនិត្យអនុម័តលើការលក់អាវុធរបស់ ក្រសួងការបរទេសអាម៉េរិក ខាងលើនេះ ប៉ុន្តែ មន្ត្រីជាច្រើនរូបរបស់ សហរដ្ឋអាម៉េរិក បានអះអាងថា កញ្ចប់អាវុធតម្លៃ ១.១ ពាន់លានដុល្លារនេះ ប្រាកដជាមិនជួបការរាំងខ្ទប់នៅ សភាអាម៉េរិក ឡើយ ព្រោះថា ទាំងបក្សប្រជាធិបតេយ្យ ទាំងបក្សសាធារណរដ្ឋ សុទ្ធតែមិនមានការប្រឆាំង។
អ្នកនាំពាក្យរបស់ ស្ថានទូតចិន នៅ សហរដ្ឋអាម៉េរិក លោក Liu Pengyu បានអំពាវនាវឱ្យ សហរដ្ឋអាម៉េរិក «ដកហូត» ការសម្រេចលក់អាវុធឱ្យ កោះតៃវ៉ាន់ នេះ ជាបន្ទាន់។ «ប្រការនេះកំពុងតែបញ្ជូនសារមិនត្រឹមត្រូវទៅឱ្យ ក្រុមទាមទារឯករាជ្យនៅ កោះតៃវ៉ាន់ និងបង្កគ្រោះថ្នាក់ដល់ទំនាក់ទំនងរវាង ចិន និង អាម៉េរិក ក៏ដូចជាសន្តិភាព ស្ថិរភាពនៅ ច្រកសមុទ្រតៃវ៉ាន់» លោក Liu Pengyu បញ្ជាក់ដូច្នេះ៕
អតីតប្រធានាធិបតីស្រីលង្កា លោក Rajapaksa បានវិលត្រលប់ចូលមកមាតុប្រទេស
អតីតប្រធានាធិបតីស្រីលង្កា លោក Rajapaksa ត្រលប់ចូលប្រទេសវិញ ក្រោយរយៈពេល ៧ សប្ដាហ៍ដែលបាននិរទេសខ្លួនក្នុងអំឡុងប្រទេសនេះធ្លាក់នៅក្នុងវិបត្តិសេដ្ឋកិច្ច និងនយោបាយ។
មន្ត្រីអាកាសយានដ្ឋាននៅ ស្រីលង្កា បានឱ្យដឹងថា អតីតប្រធានាធិបតី Gotabaya Rajapaksa ត្រូវបានក្រុមរដ្ឋមន្ត្រី និងក្រុមអ្នកនយោបាយរបស់ប្រទេសនេះចេញមកទទួលនៅព្រលានយន្តហោះកាលពីថ្ងៃទី ០២ កញ្ញា។
លោក Rajapaksa វ័យ ៧៣ ឆ្នាំ បានត្រលប់មកប្រទេសវិញ ក្រោយរយៈពេល ៥២ ថ្ងៃដែលបានរស់នៅនិរទេសខ្លួនចាប់តាំងពីបានរត់គេចទៅបរទេស នៅពេលប្រឈមនឹងបាតុកម្ម កាលពីថ្ងៃទី ១៣ កក្កដា។ លោក Rajapaksa មុននោះ បានផ្ញើលិខិតលាលែងពីតំណែង និងត្រូវបានសភាយល់ព្រម។
មន្ត្រីការពារជាតិមួយរូបរបស់ ស្រីលង្កា បានឱ្យដឹងថា លោក Rajapaksa រស់នៅក្នុងសណ្ឋាគារមួយនៅ ប្រទេសថៃ «មិនខុសអ្វីទៅនឹងអ្នកទោស» និងមានបំណងវិលត្រលប់មកប្រទេសវិញ។
«អង្គភាពសន្តិសុខមួយទើបតែត្រូវបានបង្កើតឡើងដើម្បីការពារសុវត្ថិភាពរបស់លោក Rajapaksa ក្រោយពីលោកបានត្រលប់មកប្រទេស ក្នុងនោះមានសមាជិកមកពីជួរកងទ័ព និងប៉ូលិសពិសេស» មន្ត្រីការពារជាតិខាងលើបន្ថែមដូច្នេះ។
យោងតាមរដ្ឋធម្មនុញ្ញរបស់ ស្រីលង្កា អតីតប្រធានាធិបតីទាំងឡាយរបស់ប្រទេសនេះ នឹងទទួលបានការការពារពីក្រុមអង្គរក្ស ផ្ទះស្នាក់នៅ និងយានជំនិះមួយគ្រឿង។
អតីតប្រធានាធិបតីស្រីលង្កា លោក Rajapaksa បានក្លាយជាចំណុចកណ្ដាលនៃការរិះគន់របស់ហ្វូងបាតុករនៅ ស្រីលង្កា នៅពេលប្រទេសនេះធ្លាក់ទៅក្នុងវិបត្តិសេដ្ឋកិច្ច។ ក្រុមបាតុករយល់ថា លោក Rajapaksa បានធ្វើឱ្យមានកំហុសជាច្រើនដែលនាំឱ្យប្រទេសជាតិធ្លាក់ទៅក្នុងវិបត្តិសេដ្ឋកិច្ច អតិផរណាកើនឡើងខ្ពស់ខ្លាំង និងអស់ទុនបម្រុងជារូបិយប័ណ្ណបរទេស៕
ជនរងគ្រោះដែលត្រូវឃ្មុំទិចប្រហែល ២០,០០០ ទ្រនិច បានដឹកខ្លួនឡើងវិញហើយ
(សហរដ្ឋអាម៉េរិក)-Bellamy រស់នៅក្នុងរដ្ឋ Ohio បានដឹងខ្លួនឡើងវិញ ក្រោយពីសន្លប់បាត់ស្មារតីដោយសារតែត្រូវឃ្មុំពិឃាតអាហ្វ្រិក ទិច ២ ម៉ឺនទ្រនិច នៅពេលកំពុងឆ្ការមែកឈើ។
កំលោះជនជាតិអាម៉េរិក ឈ្មោះ Austin Bellamy កាលពីថ្ងៃទី ០២ កញ្ញា បានដឹងខ្លួនឡើងវិញ ក្រោយពីបានសន្លប់កាលពីព្រលប់ថ្ងៃទី ៣០ សីហា។ ប៉ុន្តែ Bellamy នៅមានបញ្ហាផ្លូវដង្ហើម និងមិនទាន់ងើបដើរបានដូចធម្មតានៅឡើយ បើទោះរបួសបានធូរស្រាលបន្តិចហើយក៏ដោយ។
Austin Bellamy ត្រូវឃ្មុំទិចនៅពេលកាប់ចំមែនឈើដែលមានសំបុកឃ្មុំពិឃាតអាហ្វ្រិក ពេលកំពុងត្រួសមែនឈើនៅក្បែរផ្ទះ ក្នុងតំបន់ Cincinnati រដ្ឋ Ohio សហរដ្ឋអាម៉េរិក ភ្លាមនោះស្រាប់តែត្រូវហ្វូងឃ្មុំឡោមព័ទ្ធ និងទិចយ៉ាងដំណំកាលពីល្ងាចថ្ងៃទី ៣០ សីហា។
អ្នកផ្ទះរបស់ Austin Bellamy ដែលនៅខាងក្រោមដើមឈើ មិនអាចជួយជនរងគ្រោះបាន ព្រោះថា ពួកគេក៏ត្រូវឃ្មុំទិចដូចគ្នា។
អ្នកស្រី Carters បានឱ្យដឹងថា Bellamy ត្រូវឃ្មុំទិចប្រហែល ២ ម៉ឺនទ្រនិច ក្នុងនោះមានប្រហែល ៣០ ទ្រនិចនៅក្នុងមាត់ ធ្វើឱ្យក្រុមវេជ្ជបណ្ឌិតត្រូវចំណាយពេលពេញ ១ ថ្ងៃ ទើបដកយកទ្រនិចចេញអស់។
ឃ្មុំពិឃាតអាហ្វ្រិក គឺជាប្រភេទឃ្មុំល្បីឈ្មោះនៅ សហរដ្ឋអាម៉េរិក ដោយសារតែ «ចរិតកោងកាច» របស់ពួកវា។ នៅពេលសំបុករបស់ពួកវារងការគំរាមកំហែង ហ្វូងឃ្មុំនៅក្នុងសំបុក និងនៅក្រៅសំបុក នឹងហោះសម្រុកចេញវាយប្រហារលើអ្នកឈ្លានពាន៕
ក្រុមហ៊ុនធុរកិច្ចថ្មីមួយដែលអភិវឌ្ឍរថយន្តអគ្គិសនីប្រណិត មានបំណងប្រមូលទុន ៨ ពាន់លានដុល្លារ
Lucid Group ដែលជាអ្នកផលិតរថយន្តអគ្គិសនីលំដាប់ប្រណិត កំពុងតែធ្វើការប្រមូលទុនឱ្យបានដល់ ៨ ពាន់លានដុល្លារអាម៉េរិក។
ក្រុមហ៊ុនផលិតរថយន្តអគ្គិសនីទំនើបដែលមានទីស្នាក់ការកណ្ដាលនៅ Newark រដ្ឋ California នេះ បានចាប់ផ្ដើមប្រគល់រថយន្តម៉ូដែល Air ប្រភេទសេដាន់ដំបូងៗរបស់ខ្លួនទៅឱ្យអតិថិជននៅក្នុងឆ្នាំនេះ។ ក្រុមហ៊ុននេះបានដាក់ឯកសារឡើងទៅកាន់ SEC (គណៈកម្មការមូលបត្រអាម៉េរិក) កាលពីដើមសប្ដាហ៍ ដើម្បីជូនដំណឹងអំពីការប្រមូលទុនរបស់ខ្លួន។ ការប្រមូលទុន គ្រោងនឹងត្រូវធ្វើឡើងនៅក្នុងអំឡុង ៣ ឆ្នាំខាងមុខ។
ក្រុមហ៊ុន Lucid បញ្ជាក់ថា ពួកគេមិនទាន់វិនិយោគទៅលើផលិតផលិតថ្មីនៅពេលនេះ ប៉ុន្តែ ត្រូវការទុនដើម្បីត្រៀមសម្រាប់គម្រោងនានាក្នុងអនាគត។
ក្រោមការដឹកនាំរបស់ CEO Peter Rawlinson ដែលជាអតីតប្រធានក្រុមវិស្វករនៃគម្រោងរថយន្តអគ្គិសនី Model S របស់ Tesla ក្រុមហ៊ុន Lucid Motor កំពុងប្រឹងប្រែងដើម្បីក្លាយទៅជាអ្នកផលិតរថយន្តអគ្គិសនីលំដាប់កំពូលនៅក្នុងទីផ្សាររថយន្តអគ្គិសនីបើកបររយៈចម្ងាយឆ្ងាយ និងកម្លាំងខ្លាំង។
បច្ចុប្បន្ន Lucid Air មានតម្លៃចាប់ពី ៨៧,៤០០ ដុល្លារ សម្រាប់ម៉ូដែល Air Pure។ ចំណែកកំណែ Air Sapphire ដែលគ្រោងនឹងត្រូវផលិតនៅឆ្នាំក្រោយ មានតម្លៃចាប់ពី ២៤៩,០០០ ដុល្លារអាម៉េរិក ដោយវាមានកម្លាំងជាង ១,២០០ សេះ អាចឱ្យបើកបរក្នុងល្បឿន ៣២១ គីឡូម៉ែត្រ/ម៉ោង៕
របកគំហើញថ្មីនេះរបស់ ក្រុមអ្នកវិទ្យាសាស្ត្រចិន អាចជាការបើកផ្លូវសម្រាប់ «ការលុបបំបាត់កូវីដ-១៩»
ក្រុមអ្នកវិទ្យាសាស្ត្រចិន អភិវឌ្ឍវត្ថុធាតុល្អិតកម្រិតណាណូ (nano) ដែលត្រូវបានហៅថា CIPS អាចស្វែងរកឃើញវីរុស SARS-CoV-2 ដែលបង្កជាជំងឺកូវីដ-១៩ ហើយកម្ចាត់ពួកវាចោល។
មិនដូចទៅនឹងឱសថប្រឆាំងកូវីដ-១៩ ដែលមាននាបច្ចុប្បន្ន វត្ថុធាតុថ្មីរបស់ ក្រុមអ្នកវិទ្យាសាស្ត្រចិន អាចគ្រប់គ្រងការឆ្លងរាលដាលរបស់វីរុសបង្កជំងឺកូវីដ-១៩ ទាំងអស់ ដែលរួមមាន Alpha, Beta, Delta និង Omicron ដោយមិនប៉ះពាល់ដល់សុខភាព។
វត្ថុធាតុល្អិតកម្រិតណាណូរបស់ ក្រុមអ្នកវិទ្យាសាស្ត្រចិន ត្រូវបានផលិតឡើងពី ទង់ដែង ស្ពាន់ធ័រ អាំងដ្យូម និង ផូស្វ័រ។ វត្ថុធាតុនេះមានទំហំស្មើនឹងវីរុស ២ គ្រាប់។
រូបភាពបង្ហាញអំពីការធ្វើអន្តរកម្មរវាង វត្ថុធាតុល្អិតកម្រិតណាណូ CIPS ជាមួយនឹងវីរុសកូវីដ-១៩ »នេះអាចជាវត្ថុធាតុដ៏មានសក្តានុពល និងត្រូវបានទន្ទឹងរង់ចាំបំផុត សម្រាប់ការប្រយុទ្ធប្រឆាំងនឹងវីរុសអនាគត» អ្នកស្រាវជ្រាវមួយរូបបានអះអាងដូច្នេះ។
ក្រុមអ្នកស្រាវជ្រាវមកពី វិទ្យាស្ថានបច្ចេកវិទ្យាទំនើប Shenzhen, មជ្ឈមណ្ឌលជាតិវិទ្យាសាស្ត្រ និងបច្ចេកវិទ្យាណាណូ, វិទ្យាស្ថានរូបវិទ្យាថាមពលខ្ពស់ និង វិទ្យាស្ថានសត្វវិទ្យា Kunming ដែលទាំងនេះសុទ្ធតែស្ថិតក្នុង បណ្ឌិត្យសភាវិទ្យាសាស្ត្រចិន បានរួមចំណែកក្នុងការស្រាវជ្រាវ និងការរកឃើញខាងលើនេះ។
លទ្ធផលនៃការសិក្សាស្រាវជ្រាវរបស់ ក្រុមអ្នកវិទ្យាសាស្ត្រចិន ត្រូវបានចុះផ្សាយកាលពីខែសីហា ២០២២ នៅលើទំព័រទស្សនាវដ្ដី Nature Nanotechnology៕
គម្រោងព្រលានយន្តហោះថ្មីរបស់ វៀតណាម នៅក្បែរព្រំដែនចិន នឹងបង្ហាញរូបរាងនាពេលឆាប់ៗ
យោងតាមសេចក្ដីសម្រេចរបស់ រដ្ឋាភិបាលវៀតណាម នៅឆ្នាំ ២០៣០ អាកាសយានដ្ឋាន Lai Chau នឹងក្លាយជាព្រលានយន្តហោះស៊ីវិលកម្រិង ៣C និងជាព្រលានយន្តហោះយោធាកម្រិត ៣។
សារព័ត៌មានវៀតណាម ដែលបានចេញផ្សាយនាពេលថ្មីៗនេះ បានឱ្យដឹងថា តាមផែនការ គម្រោងអាកាសយានដ្ឋាន Lai Chau ដែលទើបត្រូវបានកែសម្រួលចុងក្រោយនេះ បង្ហាញថា នឹងអាចទទួលអ្នកដំណើរបានកន្លះលាននាក់ក្នុង ១ ឆ្នាំៗ ដោយសាងសង់នៅលើផ្ទៃដីជាង ១១៧ ហិកតា។ គម្រោងដែលត្រូវបានគណនាឃើញថា ត្រូវការទុនវិនិយោគប្រហែល ៤.៣៥ ទ្រីលានដុង (ជាង ១៨៥ លានដុល្លារអាម៉េរិក) នេះ គ្រោងនឹងត្រូវស្ថាបនានៅក្នុងទីរួមស្រុក Tan Uyen នៃខេត្ត Lai Chau ក្បែរព្រំដែនចិនដីគោក ជាប់នឹងខេត្ត Yunnan។
មុននោះ ក្នុងសេចក្ដីសម្រេចរបស់ រដ្ឋាភិបាលវៀតណាម គម្រោងស្ថាបនាព្រលានយន្តហោះ Lai Chau គ្រោងនឹងត្រូវការទុនវិនិយោគសរុប ៨ ទ្រីលានដុង (៣៤០ លានដុល្លារអាម៉េរិក) ដោយសាងសង់នៅលើផ្ទៃដី ១៦៧ ហិកតា ហើយនៅឆ្នាំ ២០៣០ អាកាសយានដ្ឋាន Lai Chau នឹងក្លាយជាព្រលានយន្តហោះស៊ីវិលកម្រិង ៣C និងជាព្រលានយន្តហោះយោធាកម្រិត ៣។
ក្រុមប្រឹក្សាភិបាលខេត្ត Lai Chau បានឱ្យដឹងថា បច្ចុប្បន្ន មានអ្នកវិនិយោគមួយចំនួនកំពុងចាប់អារម្មណ៍ និងកំពុងសិក្សាគម្រោងវិនិយោគលើព្រលានយន្តហោះខាងលើទៅតាមរូបមន្ត «ភាពជាដៃគូរវាងរដ្ឋ និងឯកជន (PPP-Public – Private Partnership)។
ដើម្បីសម្រួលដល់អ្នកវិនិយោគក្នុងការបំពេញឯកសារផ្លូវច្បាប់ និងការអនុវត្តគម្រោង អាជ្ញាធរខេត្ត Lai Chau ស្នើឱ្យ នាយករដ្ឋមន្ត្រីវៀតណាម ពិនិត្យ អនុម័តលើការស្ថាបនាព្រលានយន្តហោះ Lai Chau ទៅតាមរូបមន្ត PPP និងប្រគល់គម្រោងនេះមកឱ្យក្រុមប្រឹក្សាខេត្ត Lai Chau ដើម្បីគ្រប់គ្រង និងអនុវត្ត៕
គម្រោងវិនិយោគចំនួន ២ លើវិស័យ «ថាមពលកកើតឡើងវិញ» ត្រូវបាន កម្ពុជា អនុម័តក្នុងខែសីហា ២០២២
ក្នុងអំឡុងខែសីហា ឆ្នាំ ២០២២ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបចំនួន ១៧ គម្រោង ក្នុងនោះមាន ២ គម្រោងដែលស្ថិតក្នុងវិស័យថាមពលកកើតឡើងវិញ ក្នុងគ្រាដែលតម្លៃថាមពលនៅ កម្ពុជា និងពិភពលោកកំពុងតែឡើងថ្លៃខ្ពស់។
គម្រោងវិនិយោគថ្មីទាំង ១៧ មានតម្លៃសរុបជាង ១៤១ លានដុល្លារអាម៉េរិក ដែលទើបត្រូវបានអនុម័តដោយ ក្រុមប្រឹក្សាអភិវឌ្ឍន៍កម្ពុជា ក្នុងខែសីហា នឹងអាចបង្កើតការងារដល់ប្រពលរដ្ឋជិត ១០,០០០ កន្លែង។
បណ្ដាខេត្តក្រុងដែលទទួលបានគម្រោងវិនិយោគខាងលើរួមមាន រាជធានីភ្នំពេញ, ខេត្តកណ្ដាល, ខេត្តព្រះសីហានុ, ខេត្តកំពងស្ពឺ, ខេត្តកែប និងខេត្តកំពង់ធំ។
គម្រោងវិនិយោគលើវិស័យថាមពលកកើតឡើងវិញដែលទើបត្រូវបានអនុម័តក្នុងខែសីហាកន្លងទៅ រួមមាន ៖
ទីមួយ ៖ គម្រោងបង្កើតរោងចក្រផលិតបន្ទះសូឡា និងគ្រឿងបង្គុំ របស់ក្រុមហ៊ុន Solar Long PV-Tech (Cambodia) Co., Ltd. ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ។ គម្រោងនេះមានទុនវិនិយោគចំនួន ១២ លានដុល្លារអាមេរិក និងគ្រោងបង្កើតការងារបានចំនួនប្រមាណ ៥០០ នាក់។
ទីពីរ ៖ គម្រោងបង្កើតរោងចក្រផ្គុំដំឡើងបន្ទះសូឡា របស់ក្រុមហ៊ុន KITATSU SOLAR (CAMBODIA) CO., LTD ដែលមានទីតាំងវិនិយោគស្ថិតនៅផ្លូវជាតិលេខ ៥១ ភូមិត្រពាំងព្រៃភូមិ ឃុំទំនប់ធំ ស្រុកពញាឮ ខេត្តកណ្ដាល។ គម្រោងនេះមានទុនវិនិយោគប្រមាណ ២៣.៤ លានដុល្លារអាមេរិក និងអាចបង្កើតការងារបានចំនួន ៦៣៧ កន្លែង។
ភោជនីយដ្ឋាន «មកម្នាក់ឯង ហូបម្នាក់ឯង និងទៅវិញក៏ម្នាក់ឯង» ប្លែកពីគេនៅ ប្រទេសជប៉ុន
សូមស្រមៃថា អ្នកកំពុងអង្គុយម្នាក់ឯងនៅក្នុងកូនបន្ទប់ ឬកូនចញ្ចុះដ៏តូចមួយដែលព័ទ្ធជុំវិញដោយជញ្ជាំង ឬវាំងននពណ៌ខ្មៅដែលចំហាយក្លិនឈ្ងុយឈ្ងប់របស់អាហារមិនអាចត្រូវខ្យល់បក់ផាត់ទៅឆ្ងាយ ស្រាប់តែមានដៃទាំងពីរលូកចេញពីទីងងឹត នាំមកនូវអាហារដ៏ឈ្ងុយឆ្ងាញ់ ដាក់នៅលើតុរបស់អ្នក ហើយអ្នកក៏ចាប់ផ្ដើមបរិភោគក្នុងភាពស្ងប់ស្ងាត់ ស្រូបយកក្លិនឈ្ងុយ និងក្រេបរសជាតិគ្រប់អាហារ គ្រប់ភេសជ្ជៈដែលអ្នកបានហៅ ដោយមិននិយាយស្ដីមួយម៉ាត់ បែបនេះតើអ្នកនឹងមានអារម្មណ៍បែបណា?
ខាងលើនេះត្រូវបានគេហៅថា «បន្ទប់បរិភោគដែលផ្ដោតទៅលើរស់ និងក្លិន» និងមិនសម្រាប់អ្នកដែលចូលចិត្តភាពអ៊ូអរ។ បណ្ដាញភោជនីយដ្ឋាន Ichiran នៅ ប្រទេសជប៉ុន បាន «សាបព្រោះ» របៀបរបបទទួលទានអាហារតាមបែប «កាន់តែមានមនុស្សតិច កាន់តែល្អ» និងត្រូវបានគេស្គាល់ច្រើននៅប្រទេសនេះ ក៏ដូចជាប្រទេសមួយចំនួន។
ត្រូវបានបង្កើតឡើងនៅ Fukuoka កាលពីឆ្នាំ ១៩៦០ ភោជនីយដ្ឋាន Ichiran ជឿថា ការហូបចុកបែបខុសពីគេឯងនេះនឹងជួយឱ្យគ្រប់គ្នាផ្ដោតអារម្មណ៍ទៅលើរសជាតិអាហាររបស់ពួកគេបានយ៉ាងល្អ។ ទន្ទឹមនឹងមូលហេតុប្រកបដោយវិទ្យាសាស្ត្រនេះ Ichiran ក៏ជួយឱ្យភ្ញៀវមិនជួបប្រទះនឹងបញ្ហាត្រូវគេរើសអើងពីភ្ញៀវដទៃជាដើមផងដែរ។
រូបមន្តនៃភោជនីយដ្ឋាន Ichiran មិនត្រឹមតែមាននៅ ជប៉ុន ប៉ុន្តែក៏ត្រូវបាននាំទៅកាន់ សហរដ្ឋអាម៉េរិក តាំងពីឆ្នាំ ២០១៦។ ថ្វីបើមានអ្នករិះគន់ចំពោះអាហារ ក៏ដូចជាបរិយាកាសរបស់ Ichiran ប៉ុន្តែ ភោជនីយដ្ឋាននេះទទួលភ្ញៀវរាប់រយនាក់ក្នុង ១ ថ្ងៃៗ បើទោះជាមានអ្នកខ្លះចូលភោជនីយដ្ឋាននេះគ្រាន់តែដើម្បីថតរូប និងបង្ហោះលើបណ្ដាញសង្គមក៏ដោយចុះ៕
