សឿន សំណាង - La Reine Media

មហាក្សត្រីអង់គ្លេស Elizabeth II នៃចក្រភពអង់គ្លេស យាងចូលទិវង្គតក្នុងព្រះជន្ម ៩៦ ព្រះវស្សា

យោងតាមព័ត៌មានដែលត្រូវបានប្រកាសដោយរាជវាំង Buckingham មហាក្សត្រីនៃចក្រភពអង់គ្លេស Queen Elizabeth បានយាងចូលទិវង្គតកាលពីថ្ងៃទី ០៨ កញ្ញា ក្នុងព្រះជន្មាយុ ៩៦ ព្រះវស្សា នៅវិមាន Balmoral ក្នុងតំបន់ Scotland។

មហាក្សត្រី Elizabeth បានយាងចូលទិវង្គត ២ ថ្ងៃបន្ទាប់ពីបានបំពេញរាជកិច្ចតែងតាំងនាយករដ្ឋមន្ត្រីថ្មីរបស់ អង់គ្លេស គឺលោកស្រី Liz Truss។

ប្រកាសរបស់រាជវាំង Buckingham បានបញ្ជាក់ថា «មហាក្សត្រីបានយាងចូលទិវង្គតនៅ Balmoral កាលពីល្ងាចនេះ (ពេលវេលាក្នុងស្រុក)។

មុននោះ ប្រកាសមួយពីរាជវាំង Buckingham បានឱ្យដឹងថា ក្រុមវេជ្ជបណ្ឌិតកំពុងមានការបារម្ភអំពីព្រះរាជសុខភាពរបស់មហាក្សត្រី Elizabeth II និងស្នើឱ្យមានការរក្សាការតាមដានចំពោះព្រះរាជសុខភាព។

ព្រះមហាក្សត្រី Elizabeth II ប្រសូត្រក្នុងថ្ងៃទី ២១ ខែមេសា ឆ្នាំ ១៩២៦ នៅទីក្រុងឡុងដ៍ ប្រទេសអង់គ្លេស។ មហាក្សត្រី Elizabeth II គឺជារាជបុត្រីច្បងរបស់ព្រះអង្គម្ចាស់ Albert (មហាក្សត្រ George VI) និងព្រះនាង Elizabeth Bowes – Lyon។ មហាក្សត្រី Elizabeth II បានឡើងគ្រងរាជសម្បត្តិជាផ្លូវការកាលពីថ្ងៃទី ០២ មិថុនា ១៩៥៣ នៅពេលទើបតែមានព្រះជន្ម ២៧ វស្សា បន្ទាប់ពីព្រះបិតារបស់ទ្រង់បានចូលទិវង្គត។

មហាក្សត្រី Elizabeth II និងព្រះអង្គម្ចាស់ Charles

បន្ទាប់ពី មហាក្សត្រី Elizabeth II បានយាងចូលទិវង្គត ព្រះអង្គម្ចាស់ Charles ព្រះជន្ម ៧៣ ព្រះវស្សា បានក្លាយជាមហាក្សត្ររបស់ ចក្រភពអង់គ្លេស ក៏ដូចជាមេដឹកនាំរបស់ប្រទេសចំនួន ១៤ ទៀត ដែលស្ថិតក្នុង សមាគមប្រជាជាតិខមម្មុនវែល (Commonwealth of Nation)៕

September 9, 2022

សត្វខ្ញែរសមុទ្រ (jellyfish) ជីវិតអមតៈ អាចវិវត្តពីក្មេងទៅចាស់ ពីចាស់ទៅក្មេង

សត្វខ្ញែរសមុទ្រដ៏តូចមួយប្រភេទដែលមានអង្កត់ផ្ចិតត្រឹម ៤.៥ មម អាចដំណើរការបញ្ច្រាសនូវដំណាក់កាលចាស់ជរា និងវិលត្រលប់ទៅរកដំណាក់កាលវ័យក្មេងសាជាថ្មី។

ក្នុងពេលដែលជីវិតស្ទើរតែទាំងអស់ត្រូវចាស់ និងស្លាប់ទៅតាមពេលវេលា មានសត្វមួយប្រភេទដែលមានជីវិតអមតៈ និងស្ថិតនៅក្មេងខ្ចីជានិច្ច។

អ្នកស្រី Miranda Lowe អ្នកវិទ្យាសាស្ត្រមកពីសារមន្ទីរប្រវត្តិវិទ្យាក្រុងឡុងដ៍ បាននិយាយថា ខ្ញែរសមុទ្រជីវិតអមតៈ (Turritopsis dohrnii) ដែលមានរូបរាងតូចល្អិត គឺជាសត្វមួយប្រភេទក្នុងចំណោមសត្វដែលអាចត្រូវបានចាត់ទុកថា ពិតជាមានជីវិតអមតៈ។

ខ្ញែរសមុទ្រ តែងតែឆ្លងកាត់វដ្ដនៃជីវិតដែលចាប់ផ្ដើមពីពងមួយគ្រាប់ ក្រោយមកពងនេះចាប់ផ្ដើមរីកចម្រើនបន្តិចម្ដងៗទៅជាកូនដង្កូវ។ ដង្កូវនេះតោងជាប់ទៅនឹងថ្ម ឬផ្ទៃអ្វីមួយដែលរឹង ហើយបន្តរីកចម្រើន និងក្លាយជា polyp ដែលជាសត្វមួយប្រភេទមានរូបរាងដូចបង្គោល និងមានមួក។

នៅពេល polyp នេះធំល្មម កូនខ្ញែរសមុទ្រចាប់ផ្ដើមបំបែកខ្លួនចេញដោយឡែក។ ពេលខ្ញែរសមុទ្រធំពេញវ័យ ដែលគេហៅថា medusa នឹងហែលរកចំណី។

ក្នុងករណីរបស់ខ្ញែរសមុទ្រជីវិតអមតៈ នៅពេលវារីកចម្រើនដល់ដំណាក់កាលពេញវ័យ វាអាចវិលត្រលប់មកដំណាក់កាល polyp ហើយក្រោយមកក៏រីកចម្រើនជាខ្ញែរពេញវ័យម្ដងទៀត។ ការវិវត្តនេះ ចេះតែកើតឡើងសាចុះ សាឡើងមិនឈប់ឈរ ជួយឱ្យខ្ញែរសមុទ្រមិនងាប់ដោយសារចាស់ជរា៕

September 8, 2022

មនុស្សយ៉ាងហោច ១០ នាក់បានស្លាប់នៅក្នុងរដូវបុណ្យប្រណាំងសត្វខ្ទីង នៅ អេស្ប៉ាញ នាឆ្នាំនេះ

រដូវបុណ្យប្រកួតប្រណាំងជាមួយសត្វខ្ទីងឆ្នាំនេះនៅ អេស្ប៉ាញ បានធ្វើឱ្យកក្រើកសាធារណមតិ នៅពេលមនុស្ស ១០ នាក់បានបាត់បង់ជីវិតដោយសារត្រូវសត្វនេះវ័ធ។

ការរត់ប្រណាំង ប្រជែងជាមួយនឹងសត្វខ្ទីងគឺជាពិធីបុណ្យប្រពៃណីនៅ អេស្ប៉ាញ សម្រាប់មនុស្សគ្រប់គ្នា និងត្រូវបានប្រារព្ធឡើងនៅក្នុងតំបន់ជាច្រើននៃប្រទេសនេះ។ ការប្រកួតនឹងសត្វខ្ទីងត្រូវបានចាត់ទុកថាជាពិធីសំខាន់បំផុតនៅក្នុងរដូវបុណ្យនារដូវក្ដៅនៅទូទាំងប្រទេស។

ក៏ប៉ុន្តែ បុណ្យប្រណាំងសត្វខ្ទីងដែលបានចាប់ផ្ដើមពីរដូវក្ដៅឆ្នាំនេះ កំពុងតែបង្កឱ្យមានភាពចម្រូងចម្រាសនៅក្នុងសង្គម ដោយសារតែមនុស្សយ៉ាងតិច ១០ ត្រូវបានសត្វខ្ទីងវ័ធរហូតដល់ស្លាប់។

ក្នុងពិធីបុណ្យប្រណាំងនឹងសត្វខ្ទីង គណៈកម្មការបុណ្យតែងតែលែងសត្វខ្ទីងមួយហ្វូងយ៉ាងតិច ៦ ក្បាល ឱ្យរត់លើដងផ្លូវមួយនៅក្នុងក្រុងដែលត្រូវបានរៀបចំរួចជាស្រេច។ ក្រុមអ្នកចូលរួមការប្រកួតនេះ នឹងរត់ពីមុខសត្វខ្ទីង និង «បញ្ឆេះកំហឹង» ដាក់ខ្ទីង ដើម្បីឱ្យវាដេញវ័ធពីក្រោយ ក្នុងបំណងបង្ហាញពី «ភាពក្លាហាន» របស់ពួកគេ។

មនុស្សជាច្រើនបាននាំគ្នាប្រឆាំងនឹងភាពគ្រោះថ្នាក់នៃពិធីបុណ្យនេះ បង្កឱ្យមានមតិចម្រូងចម្រាសគ្នានៅក្នុងសង្គម។ រាប់ចាប់ពីឆ្នាំ ២០១៥ មនុស្សប្រហែល ៣០ នាក់បានស្លាប់នៅក្នុងព្រឹត្តិការណ៍ប្រណាំងជាមួយសត្វខ្ទីងនៅទីក្រុង Valencia របស់ អេស្ប៉ាញ។

ការជជែកគ្នាជុំវិញបញ្ហានៃពិធីបុណ្យដ៏ពេញនិយមនេះ ត្រូវបានគេយកចិត្តទុកដាក់រហូតដល់ក្លាយជាកត្តាសំខាន់ដែលអាចកំណត់ការឈ្នះចាញ់នៅក្នុងការបោះឆ្នោតនៅ អេស្ប៉ាញ។ ប៉ុន្តែ German Zaragoza ដែលជាប្រធានសហព័ន្ធក្លឹបប្រណាំងសត្វខ្ទីង បានបញ្ជាក់ថា ទង្វើណាមួយដែលប្រឆាំងនឹងពិធីបុណ្យប្រពៃណីនេះ នឹងត្រូវរងប្រតិកម្មយ៉ាងខ្លាំងក្លា៕

September 8, 2022

កំពូលភ្នំថ្ម កំពុង «បង្កើត» ពពកសក្បុស និងយ៉ាងស្រស់ស្អាត (វីដេអូ)

ពពកដ៏ចម្លែក ទំនងជាបាញ់ចេញពីកំពូលភ្នំ Gibraltar នៅក្នុងវីដេអូមួយដែលត្រូវបានថត និងបង្ហោះដោយស្ថាប័នឧតុនិយម Gibraltar។

ស្ថាប័នឧតុនិយម Gibraltar បានចែករំលែកវីដេអូ time-lapse ដែលថតបានកាលពីថ្ងៃទី ២៤ សីហា ពីផ្លូវរត់ក្នុងព្រលានយន្តហោះអន្តរជាតិ Gibraltar នៅលើទំព័រ Twitter។ ក្នុងវីដេអូដែលត្រូវបានខាល់ល្បឿន ពពកសក្បុស ហាក់ដូចជាត្រូវបានបង្កើតឡើងពីស្រទាប់ឧស្ម័នស្ដើងព័ទ្ធជុំវិញកំពូលភ្នំ Gibraltar ដែលមានកម្ពស់ជាង ៤០០ ម៉ែត្រ ជាទីដែលមានហ្វូងស្វាព្រៃ Barbary ប្រមាណ ៣០០ ក្បាលកំពុងរស់នៅ។

ពពកចម្លែកនេះត្រូវបានហៅថា ពពក banner ជាប្រភេទពពកនៅលើកំពូលភ្នំ។ ពពក banner កើតឡើងនៅពេលមានខ្យល់កម្លាំងខ្លាំងបក់បោកទៅលើបរិយាកាសដែលមានកម្រិតសំណើមខ្ពស់នៅលើភ្នំ ធ្វើឱ្យបរិយាកាសនោះហោះទៅលើកំពូលភ្នំ។ នៅពេលឡើងទៅដល់កំពូលភ្នំ បរិយាកាសនោះក៏ចុះត្រជាក់ នាំឱ្យចំហាយទឹកប្រមូលផ្ដុំទៅជាពពកអណ្ដែតជុំវិញកំពូលភ្នំ ឬត្រូវខ្យល់បក់ឱ្យហោះដូចទិដ្ឋភាពក្នុងវីដេអូនេះ។

ភ្នំ Gibraltar ជាទីកន្លែងសមស្របដើម្បីឱ្យពពក banner កកើត ព្រោះថា តំបន់ភ្នំនេះតែងមានខ្យល់ Levant ជាប្រភេទខ្យល់ដែលបក់ទៅទិសខាងលិច តាមច្រកសមុទ្រ Gibraltar នៅសមុទ្រភាគខាងត្បូងនៃ ប្រទេសអេស្ប៉ាញ។ ដូច្នេះ អ្នកស្រុកក្នុងតំបន់នេះក៏ហៅពពក banner នេះថា «Levanter»។

Gibraltar គឺជាទឹកដីឯនាយសមុទ្ររបស់ ចក្រភពអង់គ្លេស មានទីតាំងស្ថិតនៅជាប់នឹង ប្រទេសអេស្ប៉ាញ នៅភាគនិរតី៕

September 8, 2022

ក្រុមហ៊ុនចំនួន ៥ ទៀត គ្រោងនឹងបោះទុនវិនិយោគជាង ៤៣.៦ លានដុល្លារអាម៉េរិក នៅ កម្ពុជា

នាថ្ងៃទី ០៨ កញ្ញា ២០២២ គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានបានប្រកាសថា បានសម្រេចចេញវិញ្ញាបនបត្រចុះបញ្ជីជាគម្រោងវិនិយោគ ជូនដល់ក្រុមហ៊ុនចំនួន ៥ ដែលមានដូចខាងក្រោម៖

១- “Toyota Tsusho Manufacturing (Cambodia) Co., Ltd.” គម្រោងបង្កើតរោងចក្រផ្គុំ និងតម្លើងរថយន្តតូយ៉ូតា ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ៣៦.៧ លានដុល្លារអាមេរិក និងបង្កើតការងារបានចំនួនប្រមាណ ១៥០ នាក់។

២- “WCFO (Cambodia) Co., Ltd.” គម្រោងបង្កើតរោងចក្រផលិតប្រអប់ និងគ្រឿងបង្គុំផ្សេងៗធ្វើពីលោហៈ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ៣.៨ លានដុល្លារអាមេរិក និងបង្កើតការងារបានចំនួនប្រមាណ ១៥០ នាក់។

៣- “Thirty Three Apparels (Cambodia) Co., Ltd.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ២.១ លានដុល្លារអាមេរិក និងបង្កើតការងារបានចំនួនប្រមាណ ៤៥០ នាក់។

៤- “A & M Clothing Co., Ltd.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, មានទុនវិនិយោគចំនួន ១ លានដុល្លារអាមេរិក និងបង្កើតការងារបានចំនួនប្រមាណ ១០០ នាក់។

៥- “WCFO ASAMA Co., Ltd.” គម្រោងបង្កើតរោងចក្រផលិតគ្រឿងបន្ទាប់បន្សំ សម្រាប់ឧបករណ៍បញ្ជូនទិន្នន័យធ្វើពីប្លាស្ទិក ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, រាជធានីភ្នំពេញ, មានទុនវិនិយោគចំនួន ៨០៥ ពាន់ដុល្លារអាមេរិក និងបង្កើតការងារបានចំនួនប្រមាណ ១០០ នាក់។

គិតជាសរុប ការវិនិយោគខាងលើមានតម្លៃប្រមាណជាង ៤៣.៦ លានដុល្លារអាម៉េរិក និងបង្កើតការងារជាង ៩៥០ នាក់៕

September 8, 2022

ការនាំចេញ-នាំចូលទំនិញក្នុងឆ្នាំ ២០២២ របស់ វៀតណាម អាចនឹងសម្រេចបាន ៧៥០ ពាន់លានដុល្លារអាម៉េរិក

រយៈពេល ៨ ខែដើមឆ្នាំនេះ ជាធម្យមក្នុងមួយខែ ការនាំចេញ-នាំចូលទូទាំងប្រទេសរបស់ វៀតណាម សម្រេចបានជាង ៦២ ពាន់លានដុល្លារអាម៉េរិក។

យោងតាមព័ត៌មានពីអគ្គនាយកដ្ឋានគយវៀតណាម ក្នុងខែសីហា ២០២២ ការនាំចេញ-នាំចូលទំនិញរបស់ វៀតណាម សម្រេចបាន ៦៥.៩៨ ពាន់លានដុល្លារអាម៉េរិក កើន ៧.៩% (ស្មើនឹង ៤.៨៤ ពាន់លានដុល្លារ) ធៀបនឹងខែកក្កដា។ ក្នុងនោះ ការនាំចេញទំនិញ សម្រេចបាន ៣៤.៩២ ពាន់លានដុល្លារ កើន ១៤.១% (ស្មើនឹង ៤.៣១ ពាន់លានដុល្លារ) និងការនាំចូលសម្រេចបាន ៣១.០៦ ពាន់លានដុល្លារ កើន ១.៧% (ស្មើនឹង ៥២៦ លានដុល្លារ)។

គិតជារួម ក្នុងរយៈពេល ៨ ខែដើមឆ្នាំ ២០២២ ការនាំចេញ-នាំចូលរបស់ វៀតណាម សម្រេចបាន ៤៩៩.៧១ ពាន់លានដុល្លារ កើន ១៥.៩% (ស្មើនឹង ៦៨.៦៩ ពាន់លានដុល្លារ) ធៀបនឹងដំណាក់កាលដូចគ្នាក្នុងឆ្នាំ ២០២១។ ក្នុងនោះ ការនាំចេញសម្រេចបាន ២៥២.៦០ ពាន់លានដុល្លារ កើន ១៨.២% (ស្មើនឹង ៣៨.៨៥ ពាន់លានដុល្លារ) និងការនាំចូលសម្រេចបាន ២៤៧.១១ ពាន់លានដុល្លារ កើន ១៣.៧% (ស្មើនឹង ២៩.៨៤ ពាន់លានដុល្លារ)។

ក្នុងខែសីហាកន្លងទៅ អតិរេកពាណិជ្ជកម្មរបស់ វៀតណាម សម្រេចបាន ៣.៨៦ ពាន់លានដុល្លារអាម៉េរិក។ គិតជារួម ចាប់ពីដើមឆ្នាំដល់ដំណាក់ខែសីហា ២០២២ វៀតណាម សម្រេចបាន អតិរេកពាណិជ្ជកម្ម ចំនួន ៥.៤៩ ពាន់លានដុល្លារ។

ដូច្នេះ ក្នុង ៨ ខែដើមឆ្នាំនេះ ជាមធ្យម ការនាំចេញ-នាំចូលរបស់ វៀតណាម សម្រេចបាន ៦២.៥ ពាន់លានដុល្លារ/ខែ។ បើសិនជានៅតែរក្សាបានកម្រិតធម្យមនេះ ពេញមួយឆ្នាំ ២០២២ ការនាំចេញ-នាំចូលទំនិញរបស់ វៀតណាម នឹងឡើងដល់ ៧៥០ ពាន់លានដុល្លារអាម៉េរិក កើន ៨១ ពាន់លានដុល្លារ ធៀបនឹងឆ្នាំ ២០២១៕

September 8, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ០៨ ខែកញ្ញា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០២ នាក់ ក្នុងអំឡុង ២៤ ម៉ោង នៃថ្ងៃទី ០៧ ខែកញ្ញា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ១១ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតមកដល់បច្ចុប្បន្ន កម្ពុជាមានករណីឆ្លងជំងឺកូវីដ-១៩ សរុបចំនួន ១៣៧,៦៨៩ នាក់, សះស្បើយសរុបចំនួន ១៣៤,៥៥៣ នាក់ និងករណីស្លាប់សរុបចំនួន ៣,០៥៦ នាក់។

September 8, 2022

កម្ពុជា ទើបតែទទួលបានពានរង្វាន់ពិភពលោកចំនួន ២ ទាក់ទងនឹងវិស័យទេសចរណ៍

កម្ពុជា ទទួលបានពានរង្វាន់ពិភពលោកចំនួន ២ ពីស្ថាប័ន World Travel Awards ទាក់ទងនឹងវិស័យទេសចរណ៍ ឆ្នាំ ២០២២ ដែលពិធីប្រគល់ពានរង្វាន់ត្រូវបានធ្វើឡើងនៅទីក្រុងព្រៃនគរ។

ស្ថាប័ន World Travel Awards បានប្រគល់ពានរង្វាន់ទាក់ទងនឹងវិស័យទេសចរណ៍ចំនួន ២ ដល់ កម្ពុជា ក្នុងនោះរួមមាន ពានរង្វាន់ «គោលដៅវប្បធម៌ឈានមុខគេក្នុងទ្វីបអាស៊ីឆ្នាំ ២០២២ (Asia’s Leading Culture Destination 2022)» និងពានរង្វាន់ «គោលដៅទេសចរណ៍យុវជនឈានមុខគេក្នុងទ្វីបអាស៊ីឆ្នាំ ២០២២ (Asia’s Leading Youth Travel Destination 2022)»។

ការទទួលបានពានរង្វាន់ទាំងនេះ គឺកើតឡើងដោយសារមានការគាំទ្រពីសំណាក់ទេសចរប្រមាណ ២ លាននាក់មកពីជុំវិញពិភពលោក ដែលបានចូលរួមបោះឆ្នោតជ្រើសរើស កម្ពុជា ជាគោលដៅទេសចរណ៍វប្បធម៌ និង គោលដៅទេសចរណ៍យុវជនឈានមុខគេ ក្នុងទ្វីបអាស៊ីឆ្នាំ ២០២២។

ពិធីប្រគល់ និងទទួលពានរង្វាន់ខាងលើ ត្រូវបានប្រារព្ធឡើង នៅទីក្រុងហូជីមិញ (ព្រៃនគរ) ប្រទេសវៀតណាម កាលពីថ្ងៃទី ០៧ ខែកញ្ញាកន្លងទៅ នៅក្នុងព្រឹត្តិការណ៍ពិព័រណ៍ទេសចរណ៍អន្តរជាតិ ITE HCMC 2022។

ក្នុងនាមជាតំណាងរាជរដ្ឋាភិបាល និងប្រជាជនកម្ពុជា លោក ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ បានអញ្ជើញទៅទទួលពានរង្វាន់ទាំងនេះ៕

September 8, 2022

អាម៉េរិក-កូរ៉េខាងត្បូង យល់ព្រមបើកការសន្ទនាថ្នាក់ខ្ពស់ស្ដីពីច្បាប់ដែលគាំពារក្រុមហ៊ុនអាម៉េរិក

កូរ៉េខាងត្បូង និង សហរដ្ឋអាម៉េរិក បានឯកភាពគ្នាក្នុងការបើកកិច្ចចរចាថ្នាក់ខ្ពស់ក្នុងពេលឆាប់ៗខាងមុខ ស្ដីអំពីវិធានការកាត់បន្ថយផលប៉ះពាល់ដោយសារច្បាប់កាត់បន្ថយអតិផរណា (IRA) ចំពោះបណ្ដាក្រុមហ៊ុនផលិតរថយន្តរបស់ កូរ៉េខាងត្បូង។

រដ្ឋមន្ត្រីពាណិជ្ជកម្មកូរ៉េខាងត្បូង Ahn Duk-geun កាលពីថ្ងៃទី ០៧ កញ្ញាប្រកាសថា ប្រទេសនេះ និង សហរដ្ឋអាម៉េរិក បានយល់ព្រមប្រញាប់បើកកិច្ចចរចាថ្នាក់រដ្ឋមន្ត្រី ស្ដីពីវិធានការកាត់បន្ថយផលប៉ះពាល់ដោយសារច្បាប់កាត់បន្ថយអតិផរណា ចំពោះក្រុមហ៊ុនផលិតរថយន្តរបស់ កូរ៉េខាងត្បូង។

ក្រោយជំនួបជាមួយតំណាងពាណិជ្ជកម្មអាម៉េរិក (USTR) លោកស្រី Katherine Tai មន្ត្រីកូរ៉េខាងត្បូង បានឱ្យដឹងថា «យើងនឹងពិភាក្សាអំពីពេលវេលាជាក់លាក់ និងរឿងលម្អិតផ្សេងទៀត (ទាក់ទិននឹងគម្រោងបើកកិច្ចចរចា) កាន់តែឆាប់ កាន់តែល្អ ប៉ុន្តែ ខ្ញុំគ្រោងនឹងជួបលោកស្រី Katherine Tai ជារៀងរាល់សប្ដាហ៍ ចាប់ពីសប្ដាហ៍ក្រោយ និងសប្ដាហ៍បន្ទាប់»។

មុននោះ លោក Ahn បានទៅដល់ វ៉ាស៊ីងតោន កាលពីថ្ងៃទី ០៥ កញ្ញា ដើម្បីចរចាអំពីច្បាប់ថ្មីរបស់ សហរដ្ឋអាម៉េរិក ដែលកំណត់ថា នឹងមានកម្មវិធីលើកទឹកចិត្តផ្នែកពន្ធតម្លៃឡើងដល់ ៧,៥០០ ដុល្លារ សម្រាប់ពលរដ្ឋអាម៉េរិក ទិញរថយន្តអគ្គិសនីដែលដំឡើងនៅ សហរដ្ឋអាម៉េរិក លើកលែងតែរថយន្តដែលផលិតដោយក្រុមហ៊ុនកូរ៉េខាងត្បូង។

ទីក្រុងសេអ៊ូល យល់ថា IRA បំពានលើកិច្ចព្រមព្រៀងពាណិជ្ជកម្មសេរី (FTA) កូរ៉េខាងត្បូង-សហរដ្ឋអាម៉េរិក ដែលក្នុងនោះ តម្រូវឱ្យប្រទេសនីមួយៗប្រព្រឹត្តចំពោះផលិតរបស់គូភាគីក្នុងកិច្ចព្រមព្រៀង ឬបណ្ដាប្រទេសដែលទទួលបានអត្ថប្រយោជន៍ពី ប្រព័ន្ធអនុគ្រោះពន្ធ MFN ឱ្យដូចទៅនឹងផលិតផលក្នុងស្រុក៕

September 8, 2022

សហរដ្ឋអាម៉េរិក បាញ់សាកល្បងមីស៊ីលអន្តរទ្វីប Minuteman III

កងទ័ពអាម៉េរិក ឱ្យដឹងថា បានបាញ់មីស៊ីលអន្តរទ្វីបកាលពីថ្ងៃទី ០៧ កញ្ញា និងបានជូនដំណឹងជាមុនដល់ រុស្ស៊ី អំពីការសាកល្បងនេះ។

«អង្គភាពវាយប្រហារទូទាំងពិភពលោកនៃទ័ពអាកាសអាម៉េរិក បានបាញ់មីស៊ីលអន្តរទ្វីប (ICBM) Minuteman III មិនបំពាក់អាវុធ ពីមូលដ្ឋាននៅ California» ទ័ពអាកាសអាម៉េរិក ប្រកាសដូច្នេះ។

នេះគឺជាលើកទីពីរក្នុងរយៈពេលមិនដល់មួយខែ ដែល សហរដ្ឋអាម៉េរិក បានសាកល្បង ICBM។ ទីក្រុងវ៉ាស៊ីងតោន បញ្ជាក់ថា បានជូនដំណឹងជាមុនដល់ រុស្ស៊ី អំពីករណីធ្វើតេស្តនេះ។ ការជូនដំណឹងជាមុននេះ ទំនងជាក្នុងបំណងទប់ស្កាត់ភាពតានតឹងរវាងប្រទេសទាំងពីរដែលកំពុងកើនឡើងស្រាប់។

ទ័ពអាកាសអាម៉េរិក សង្កត់ធ្ងន់ថា «ករណីសាកល្បងនេះមិនមែនជាលទ្ធផលកើតចេញពីព្រឹត្តិការណ៍នានានៅលើពិភពលោកនាបច្ចុប្បន្នឡើយ»។

ទ័ពអាកាសអាម៉េរិក កាលពីថ្ងៃទី ១៦ សីហា បានបាញ់សាកល្បងមីស៊ីលអន្តរទ្វីប Minuteman III ដោយជោគជ័យ ក្រោយការពន្យារពេលអស់ ២ សប្ដាហ៍ ដើម្បីបញ្ចៀសភាពតានតឹងទាក់ទងនឹងបញ្ហា អ៊ុយក្រែន និង កោះតៃវ៉ាន់។

Minuteman III ដែលជាមីស៊ីលអាចបំពាក់ក្បាលគ្រាប់នុយក្លេអែរ ផលិតដោយ Boeing គឺជាផ្នែកសំខាន់បំផុតនៅក្នុងឃ្លាំងអាវុធយុទ្ធសាស្ត្ររបស់ សហរដ្ឋអាម៉េរិក។ មីស៊ីលនេះបាញ់បានរយៈចម្ងាយជាង ៩,៦០០ គីឡូម៉ែត្រ និងមានល្បឿនប្រមាណ ២៤,០០០ គីឡូម៉ែត្រ/ម៉ោង៕

September 8, 2022

Author: សឿន សំណាង