សឿន សំណាង - La Reine Media

ក្រុមហ៊ុនតៃវ៉ាន់ Foxconn ផលិតរថយន្តអគ្គិសនីនៅ ឥណ្ឌូណេស៊ី

ក្រុមហ៊ុនបច្ចេកវិទ្យា Hon Hai របស់ តៃវ៉ាន់ បានឱ្យដឹងថា ពួកគេបានបង្កើតក្រុមហ៊ុនបណ្ដាក់ទុនរួមជាមួយ PT Mitra Motor Group (MMG) ដែលជាក្រុមហ៊ុនបុត្រសម្ព័ន្ធមួយរបស់ Indonesia PT Indika Energy ដើម្បីផលិតរថយន្តអគ្គិសនី និងថ្មផ្ទុកថាមពលនៅ ប្រទេសឥណ្ឌូណេស៊ី។

Hon Hai ឬហៅជាលក្ខណៈអន្តរជាតិថា Foxconn បង្ហើបឱ្យដឹងថា កិច្ចព្រមព្រៀងត្រូវបានចុះហត្ថលេខាដោយក្រុមហ៊ុនបុត្រសម្ព័ន្ធរបស់ពួកគេគឺ Foxteq Singapore។ ក្រុមហ៊ុនបណ្ដាក់ទុនរួមគ្នាថ្មី គឺ PT Foxconn Indika Motor (FIM) នឹងទទួលបានវិញ្ញាបនបត្រផ្នែកបច្ចេកវិទ្យាផលិតរថយន្តអគ្គិសនីពីក្រុមហ៊ុនមេនៅ តៃវ៉ាន់ (Foxconn)។

មេដឹកនាំផ្នែកយុទ្ធសាស្ត្រទទួលបន្ទុកថ្មផ្ទុកថាមពលរបស់ Foxconn លោក Troy Wu បាននិយាយនៅក្នុងប្រកាសមួយកាលពីពេលថ្មីៗនេះថា «ឥណ្ឌូណេស៊ី ដែលជាខឿនសេដ្ឋកិច្ចធំជាងគេនៅ អាស៊ីអាគ្នេយ៍ បានសន្យាទាក់ទងនឹងគោលដៅមិនបញ្ចេញឧស្ម័នប្រកបដោយមហិច្ឆតា។ ក្រុមហ៊ុនបណ្ដាក់ទុនរួមនេះសង្កត់ធ្ងន់ចំពោះការសន្យារបស់ Foxconn ក្នុងការគាំទ្រដៃគូរបស់យើងនៅ ឥណ្ឌូណេស៊ី សម្រាប់គោលដៅរួមរបស់យើង គឺការស្ថាបនាបណ្ដាញប្រកបដោយស្ថិរភាព»។

រដ្ឋាភិបាលឥណ្ឌូណេស៊ី បានកំណត់គោលដៅដល់ឆ្នាំ ២០៣០ នឹងមានរថយន្តអគ្គិសនីចំនួន ២ លានគ្រឿង និងម៉ូតូអគ្គិសនីចំនួន ១៣ លានគ្រឿងដែលប្រើប្រាស់ក្នុងប្រទេសនេះ។

ប្រធានផ្នែកវិនិយោគរបស់ Indika Energy លោក Purbaja Pantja អះអាងថា «យើងមើលឃើញ សក្ដានុពលធំធេងសម្រាប់ការអភិវឌ្ឍរថយន្តអគ្គិសនីនៅ ឥណ្ឌូណេស៊ី»។ លោកបន្ថែមថា កិច្ចសហការរវាង MMG និង Foxteq Singapore នឹងជួយជំរុញឱ្យ ឥណ្ឌូណេស៊ី ក្លាយជាអ្នកអភិវឌ្ឍបណ្ដាញរថយន្តអគ្គិសនី និងថ្មផ្ទុកថាមពលលំដាប់កំពូលរបស់ពិភពលោក៕

September 30, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ៣០ ខែកញ្ញា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៧ នាក់ ក្នុងអំឡុង ២៤ ម៉ោង នៃថ្ងៃទី ២៩ ខែកញ្ញា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០៥ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

September 30, 2022

កម្ពុជា អនុម័តគម្រោងអភិវឌ្ឍកោះ រោងចក្រ និងមន្ទីរពេទ្យថ្មីចំនួន ៨ គម្រោងទៀត ដែលមានទុនសរុបជិត ៩០ លានដុល្លារ

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនថ្មីចំនួន ៨ ទៀត ដែលនឹងបណ្ដាក់ទុនក្នុងវិស័យ មន្ទីរពេទ្យ អភិវឌ្ឍកោះត្បាល់ រោងចក្រកែច្នៃម្ហូប ផលិតគ្រឿងបន្សំស្បែកជើង ផ្គុំដំឡើងខ្សែគ្រឿងអេឡិចត្រូនិក និងកាត់ដេរសម្លៀកបំពាក់។

គម្រោងថ្មីទាំង ៨ រួមមានដូចខាងក្រោម ៖

១-“ORIENDA INTERNATIONAL HOSPITAL CO., LTD” គម្រោងសាងសង់ និងអាជីវកម្មមន្ទីរពេទ្យអន្តរជាតិ ចំនួន ១១៧ គ្រែ ដែលមានទីតាំងវិនិយោគស្ថិតនៅផ្លូវដួងងៀប២ ភូមិដំណាក់ធំ ៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ក្នុងទុនវិនិយោគចំនួន ២១ លានដុល្លារអាមេរិក និងអាចបង្កើតការងារបានចំនួន ១៧៨ កន្លែង។

២-“NEW WORLD HEART & VASCULAR HOSPITAL CO., LTD” គម្រោងសាងសង់ និងអាជីវកម្មមន្ទីរពេទ្យបេះដូងនិងសរសៃឈាម ចំនួន ៣០០ គ្រែ ដែលមានទីតាំងវិនិយោគស្ថិតនៅផ្លូវលេខ ១៩៣៤ ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ក្នុងទុនវិនិយោគចំនួន ២០ លានដុល្លារអាមេរិក និងអាចបង្កើតការងារបានចំនួន ៣៤៨ កន្លែង។

៣-“TRY PHEAP KOH TUNSAY RESORTS CO., LTD” គម្រោងអភិវឌ្ឍន៍កោះត្បាល់ ដែលមានទីតាំងវិនិយោគស្ថិតនៅភូមិកែប សង្កាត់កែប ក្រុងកែប ខេត្តកែប ក្នុងទុនវិនិយោគចំនួន ១៧ លានដុល្លារអាមេរិក និងអាចបង្កើតការងារបានចំនួន ១០៥ កន្លែង។

៤-“GLOBAL PASS BIOTECHNOLOGY CO., LTD” គម្រោងបង្កើតរោងចក្រកែច្នៃម្ហូបអាហារ ដែលមានទីតាំងវិនិយោគស្ថិតនៅភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល ក្នុងទុនវិនិយោគប្រមាណ ៧.២ លានដុល្លារអាមេរិក និងអាចបង្កើតការងារបានចំនួន ១៣២ កន្លែង។

៥-“YURA HARNESS (CAMBODIA) CO., LTD” គម្រោងបង្កើតរោងចក្រផ្គុំដំឡើងខ្សែគ្រឿងអេឡិចត្រូនិក ដែលមានទីតាំងវិនិយោគស្ថិតនៅភូមិទួលធ្នង់ សង្កាត់រការធំ ក្រុងច្បារមន ខេត្តកំពង់ស្ពឺ ក្នុងទុនវិនិយោគប្រមាណ ៦.៨ លានដុល្លារអាមេរិក និងអាចបង្កើតការងារបានចំនួន ៥១៤ កន្លែង។

៦-“RISE STEADY FOOTWEAR MATERIAL (CAMBODIA) CO., LTD” គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិតាសែន ឃុំសូទិប ស្រុកជើងព្រៃ ខេត្តកំពង់ចាម ក្នុងទុនវិនិយោគប្រមាណ ៦.៥ លានដុល្លារអាមេរិក និងអាចបង្កើតការងារបានចំនួន ៥៤៨ កន្លែង។

៧-“TWHQ GARMENTS CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ៨ ភូមិវិហារសួគ៌ជើង ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ក្នុងទុនវិនិយោគប្រមាណ ៥.៤ លានដុល្លារអាមេរិក និងអាចបង្កើតការងារបានចំនួន ១,៩៥៨ កន្លែង។

៨-“COBEST (CAMBODIA) FIRST GARMENT CO., LTD” គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិត្រពាំងទួល សង្កាត់កំបូល ខណ្ឌកំបូល រាជធានីភ្នំពេញ ក្នុងទុនវិនិយោគប្រមាណ ៥.១ លានដុល្លារអាមេរិក និងអាចបង្កើតការងារបានចំនួន ១,៦៥០ កន្លែង។

ជាសរុប ទុនវិនិយោគសម្រាប់បណ្ដាគម្រោងខាងលើនេះមានចំនួនជិត ៩០ លានដុល្លារអាម៉េរិក និងបង្កើតការងារចំនួនជាង ៥,០០០ កន្លែង។

September 30, 2022

ក្រុមប្រឹក្សាសន្តិសុខជាតិអ៊ុយក្រែន កោះប្រជុំបន្ទាន់ ខណៈពិធីចុះហត្ថលេខាលើការរឹបអូសទឹកដី ៤ តំបន់របស់ អ៊ុយក្រែន ជិតមកដល់

ប្រធានាធិបតីអ៊ុយក្រែន លោក ហ្សេឡែនស្គី កោះប្រជុំក្រុមប្រឹក្សាសន្តិសុខជាតិជាបន្ទាន់ ក្រោយពី រុស្ស៊ី ប្រកាសអំពីពេលវេលាចុះហត្ថលេខាលើការច្របាច់បញ្ចូលទឹកដី ៤ តំបន់របស់ អ៊ុយក្រែន ទៅក្នុង ប្រទេសរុស្ស៊ី។

«ប្រធានាធិបតី វ៉ូឡូឌីមៀ ហ្សេឡែនស្គី នឹងកោះប្រជុំបន្ទាន់ជាមួយក្រុមប្រឹក្សាការពារជាតិ និងសន្តិសុខជាតិអ៊ុយក្រែន នៅថ្ងៃស្អែក» Serhii Nykyforov លេខាផ្នែកសារព័ត៌មានរបស់ប្រធានាធិបតីអ៊ុយក្រែន បានឱ្យដឹងដូច្នេះកាលពីថ្ងៃទី ២៩ កញ្ញា និងបានបន្ថែមថា ខ្លឹមសារលម្អិតនៃកិច្ចប្រជុំនឹងត្រូវបានប្រកាសនៅពេលក្រោយ ។

ក្រុមប្រឹក្សាការពារជាតិ និងសន្តិសុខជាតិអ៊ុយក្រែន រួមមាន អគ្គមេបញ្ជាការកងទ័ព, រដ្ឋមន្ត្រីក្រសួងការពារជាតិ រដ្ឋមន្ត្រីការបរទេស នាយករដ្ឋមន្ត្រី មេដឹកនាំស្ថាប័នសន្តិសុខជាតិអ៊ុយក្រែន និងសមាជិក សមាជិកាផ្សេងទៀត។ ក្រុមប្រឹក្សានេះមានតួនាទីធ្វើការជាមួយប្រធានាធិបតីទាក់ទងនឹងការអភិវឌ្ឍ និងចាត់ចែងគោលនយោបាយសន្តិសុខជាតិ។

ប្រកាសអំពីកិច្ចប្រជុំបន្ទាន់របស់ ក្រុមប្រឹក្សាការពារជាតិ និងសន្តិសុខជាតិអ៊ុយក្រែន ត្រូវបានលើកឡើងបន្ទាប់ពី វិមានក្រឹមឡាំង ប្រកាសថា ពិធីចុះហត្ថលេខាដើម្បីច្របាច់បញ្ចូលទឹកដីរបស់ អ៊ុយក្រែន គឺ Kherson, Zaporizhzhia, Donetsk និង Luganks ទៅក្នុង ប្រទេសរុស្ស៊ី នឹងត្រូវធ្វើឡើងនៅម៉ោង ១៥ ថ្ងៃទី ៣០ កញ្ញា ហើយ ប្រធានាធិបតី វ្ល៉ាឌីមៀ ពូទីន នឹងមានសេចក្ដីថ្លែងការណ៍សំខាន់៕

September 30, 2022

អគ្គលេខាធិការនៃអង្គការសហប្រជាជាតិ ថ្កោលទោសរុស្ស៊ី ក្នុងរឿងរឹបអូសទឹកដីរបស់ អ៊ុយក្រែន

អគ្គលេខាធិការនៃអង្គការសហប្រជាជាតិ លោក Antonio Guterres ព្រមានថា រុស្ស៊ី កំពុងតែ «បង្កើនគ្រោះថ្នាក់» ដោយការរឹបអូសទឹកដីរបស់ អ៊ុយក្រែន រំលោភលើធម្មនុញ្ញនៃអង្គការសហប្រជាជាតិ។

«ធម្មនុញ្ញនៃអង្គការសហប្រជាជាតិ លើកឡើងច្បាស់ថា រាល់ការច្របាច់បញ្ចូលទឹកដីរបស់ប្រទេសមួយ ទៅក្នុងប្រទេសមួយទៀត បើសិនជាលទ្ធផលនៃការគំរាមកំហែង ឬប្រើប្រាស់កម្លាំងបាយ នោះនឹងជាសកម្មភាពរំលោភគោលការណ៍ច្បាប់របស់ ធម្មនុញ្ញអង្គការសហប្រជាជាតិ និងច្បាប់អន្តរជាតិ» អគ្គលេខាធិការនៃអង្គការសហប្រជាជាតិ លោក Antonio Guterres កាលពីថ្ងៃទី ២៩ កញ្ញា បានថ្លែងនៅក្នុងសន្និសីទសារព័ត៌មាននៅឯទីស្នាក់ការកណ្ដាលនៅ New York សហរដ្ឋអាម៉េរិក។

លោក Antonio Guterres បញ្ជាក់ជាថ្មីថា ផែនការច្របាច់ទឹកដីរបស់ អ៊ុយក្រែន ទៅក្នុងទឹកដីរបស់ រុស្ស៊ី គឺជាសកម្មភាព «មិនសមស្របទៅនឹងក្របខណ្ឌនៃច្បាប់អន្តរជាតិ» និងដើរផ្ទុយពីតម្លៃរបស់សហគមន៍អន្តរជាតិ។

អង្គការសហប្រជាជាតិ កាលពីថ្ងៃទី ២៧ កញ្ញា បានសន្មតថា ការបោះឆ្នោតប្រជាមតិកន្លងមកនៅក្នុង ៤ តំបន់ដែល រុស្ស៊ី កំពុងគ្រប់គ្រងនៅលើទឹកដី របស់ អ៊ុយក្រែន គឺជាទង្វើខុសច្បាប់។

អគ្គលេខាធិការនៃអង្គការសហប្រជាជាតិ លោក Antonio Guterres បន្ថែមថា «ទង្វើនេះគឺជាការប្រមាថចំពោះគោលដៅ និងគោលការណ៍របស់ អង្គការសហប្រជាជាតិ។ នេះគឺជាជំហានដែលបង្កភាពតានតឹងដ៏គ្រោះថ្នាក់។ វាមិនអាចមានវត្តមាននៅក្នុងពិភពលោកសម័យថ្មី ហើយយើងមិនអាចទទួលយកបាន»។

តាមរយៈការរឹបអូសតំបន់ Donetsk, Lugansk, Kherson និង Zaporizhzhia រុស្ស៊ី កំពុងតែគំរាមកំហែងដល់ក្ដីរំពឹងអំពីសន្តិភាព នេះបើតាមលោក Antonio Guterres។ លោកបន្ថែមថា មូស្គូ នឹងអូសបន្លាយផលប៉ះពាល់ធ្ងន់ធ្ងន់ដល់សេដ្ឋកិច្ចសកល ពិសេសគឺបណ្ដាប្រទេសកំពុងអភិវឌ្ឍ ទន្ទឹមនឹងការរារាំងសកម្មភាពជំនួយមនុស្សធម៌នៅ អ៊ុយក្រែន និងតំបន់ជាច្រើនផ្សេងទៀត។

ប្រតិភូរបស់ រុស្ស៊ី ប្រចាំ អង្គការសហប្រជាជាតិ ក្រោយមកក៏បានជំទាស់នឹងសាររបស់លោក Antonio Guterres ដោយបានលើកឡើងថា សម្ដីរបស់ អគ្គលេខាធិការនៃអង្គការសហប្រជាជាតិ មានភាពលម្អៀងទៅរកលោកខាងលិច៕

September 30, 2022

សភាអាម៉េរិក អនុម័តកញ្ចប់ជំនួយថ្មីតម្លៃ ១២ ពាន់លានដុល្លារ សម្រាប់ អ៊ុយក្រែន

កាលពីថ្ងៃទី ២៩ កញ្ញា សភាជាន់ខ្ពស់អាម៉េរិក បានអនុម័តកញ្ចប់ជំនួយសេដ្ឋកិច្ច និងយោធាថ្មី តម្លៃ ១២ ពាន់លានដុល្លារអាម៉េរិក សម្រាប់ជួយដល់ ប្រទេសអ៊ុយក្រែន។

ការសម្រេចខាងលើ ត្រូវបានគាំទ្រដោយក្រុមតំណាងរាស្ត្ររបស់ បក្សសាធារណរដ្ឋ និង បក្សប្រជាធិបតេយ្យ និងអនុញ្ញាតឱ្យ ប្រធានាធិបតី ចូ បៃដិន យកអាវុធ និងសម្ភារៈយោធាតម្លៃ ៣.៧ ពាន់លានដុល្លារ ពីឃ្លាំងរបស់ កងទ័ពអាម៉េរិក ដើម្បីផ្គត់ផ្គង់ដល់ អ៊ុយក្រែន។ ទន្ទឹមនឹងនេះ ក៏មានខ្ទង់ប្រាក់ជំនួយ ៣ ពាន់លានដុល្លារសម្រាប់ទិញអាវុធ សម្ភារៈ និងផ្ដល់ជាប្រាក់ខែដល់ទាហានរបស់ អ៊ុយក្រែន រួមនឹង ៤.៥ ពាន់លានដុល្លារទៀត សម្រាប់ជួយឱ្យ ទីក្រុងកៀវ ពង្រឹងសេដ្ឋកិច្ចរបស់ប្រទេសនេះ ក៏ដូចជាទ្រទ្រង់រដ្ឋាភិបាល និងផ្ដល់សេវាសាធារណៈដល់ប្រជាប្រជននៅ អ៊ុយក្រែន។

មុននោះ កាលពីថ្ងៃទី ២៨ កញ្ញា សហរដ្ឋអាម៉េរិក បានប្រកាសអំពីកញ្ចប់ជំនួយយោធាថ្មី រួមមានអាវុធ និងសម្ភារៈយោធាសម្រាប់ អ៊ុយក្រែន ដែលមានតម្លៃ ១.១ ពាន់លានដុល្លារ ដើម្បីស្ដារកម្លាំងទ័ពអ៊ុយក្រែន ក្នុងរយៈពេលវែង និងមធ្យម។

យោងតាមមន្ត្រីជាន់ខ្ពស់មួយរូបរបស់ សហរដ្ឋអាម៉េរិក ដំណាក់កាលផ្គត់ផ្គង់អាវុធថ្មីនឹងត្រូវការពេលពី ៦ ទៅ ២ ឆ្នាំ ដើម្បីរៀបចំ និងប្រគល់ ដោយផ្ដោតទៅលើហេដ្ឋារចនាសម្ព័ន្ធការពារជាតិយូរអង្វែងរបស់ អ៊ុយក្រែន ខណៈដែលសម្ព័ន្ធមិត្ត និងដៃគូសហការ បង្កើនល្បឿនក្នុងការផ្គត់ផ្គង់សម្ភារៈយោធា និងគ្រាប់រំសេវសមស្របសម្រាប់តម្រូវការបន្ទាន់បំផុត។ មន្ត្រីខាងលើនិយាយថា ប្រព័ន្ធមីស៊ីលចល័ត HIMARS តំណាងឱ្យ «ផ្នែកសំខាន់បំផុតនៃកងកម្លាំងប្រយុទ្ធរបស់ អ៊ុយក្រែន នាពេលអនាគត»។

ព័ត៌មានខាងលើលេចឡើងនៅក្នុងពេលដែល រុស្ស៊ី បានចេញបទបញ្ជាកែនទ័ពប្រមាណ ៣ លាននាក់ ដើម្បីពង្រឹងកម្លាំងរបស់ខ្លួននៅក្នុង ប្រទេសអ៊ុយក្រែន៕

September 30, 2022

គម្រោងបង្កើតរោងចក្រថ្មីចំនួន ៤ ទៀត ទទួលបានការអនុម័តពី ក្រុមប្រឹក្សាអភិវឌ្ឍន៍កម្ពុជា

គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគថ្មីចំនួន ៤ ទៀត ដែលមានតម្លៃសរុបប្រមាណជិត ២៤ លានដុល្លារអាម៉េរិក។

គម្រោងបង្កើតរោងចក្រថ្មីចំនួន ៤ ដែលនឹងបង្កើតការងារបានជិត ៣,០០០ កន្លែងនេះ នឹងដាក់ទីតាំងនៅ ខេត្តស្វាយរៀង ចំនួន ៣ រោងចក្រ និងរោងចក្រ ១ ទៀតនៅក្នុង ក្រុងព្រះសីហនុ។

គម្រោងបង្កើតរោងចក្រថ្មីទាំងនេះរួមមានដូចខាងក្រោម ៖

១- “HOME STYLE LIVING CO., LTD.” គម្រោងបង្កើតរោងចក្រផលិតគ្រឿងសង្ហារឹម និងពូកគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស៊ីន បាវិត, ខេត្តស្វាយរៀង, ក្នុងទុនវិនិយោគចំនួន ៦.៦ លានដុល្លារអាមេរិក និងអាចបង្កើតការងារបានចំនួនប្រមាណ ៣៨០ កន្លែង។

២- “MCL HANDBAG FACTORY (CAMBODIA) COMPANY LIMITED.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, ក្នុងទុនវិនិយោគចំនួន ៦.៥ លានដុល្លារអាមេរិក និងអាចបង្កើតការងារបានចំនួនប្រមាណ ៨៥០ កន្លែង។

៣- “GREEN LINK ELECTRIC CO., LTD.” គម្រោងបង្កើតរោងចក្រផលិតអំពូលភ្លើងគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ហាយ ផាក, ខេត្តស្វាយរៀង, ក្នុងទុនវិនិយោគចំនួន ៥.៥ លានដុល្លារអាមេរិក និងអាចបង្កើតការងារបានចំនួនប្រមាណ ១,៥០០ កន្លែង។

៤- “RAINBOW LIGHTING CO., LTD.” គម្រោងបង្កើតរោងចក្រផលិតអំពូលភ្លើង អំពូលភ្លើងលម្អរ និងគ្រឿងបង្គុំអំពូលភ្លើង ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ហាយ ផាក, ខេត្តស្វាយរៀង, ក្នុងទុនវិនិយោគចំនួន ៥.៣ លានដុល្លារអាមេរិក និងអាចបង្កើតការងារបានចំនួនប្រមាណ ១៧០ កន្លែង។

September 30, 2022

បេក្ខភាពអាម៉េរិក យកឈ្នះលើគូប្រជែងមកពី រុស្ស៊ី ក្នុងការបោះឆ្នោតនៅ អង្គការសហប្រជាជាតិ

ក្នុងការក្នុងការបោះឆ្នោតជ្រើសរើសមេដឹកនាំសហភាពទូរគមនាគមន៍អន្តរជាតិ (ITU) របស់ អង្គការសហប្រជាជាតិ សម្រាប់អាណត្តិ ៤ ឆ្នាំខាងមុខ បេក្ខភាពអាម៉េរិក បានយកឈ្នះលើគូប្រជែងមកពី រុស្ស៊ី។

Doreen Bogdan-Martin ជាបេក្ខភាពមកពី សហរដ្ឋអាម៉េរិក នៅថ្ងៃទី ២៩ កញ្ញានេះ បានយកឈ្នះលើ Rashid Ismailov មកពី រុស្ស៊ី នៅក្នុងការបោះឆ្នោតជ្រើសរើសមេដឹកនាំនៃ សហភាពទូរគមនាគមន៍អន្តរជាតិ (International Telecommunication Union) របស់ អង្គការសហប្រជាជាតិ ដោយទទួលបានសន្លឹកឆ្នោតគាំទ្រ ១៣៩ សន្លឹក ក្នុងចំណោមសន្លឹកឆ្នោត ១៧២ សន្លឹកនៅក្នុងការបោះឆ្នោតនៅ Bucharest នៃ ប្រទេសរូម៉ានី។

លោកស្រី Bogdan-Martin អាយុ ៥៦ ឆ្នាំ បានក្លាយជាមេដឹកជាស្ត្រីភេទដំបូងបង្អស់របស់ ITU ស្ថាប័នដែលមានមូលដ្ឋាននៅ ទីក្រុងហ្សឺណែវ ប្រទេសស្វ៊ីស។ លោកស្រីធ្លាប់កាន់តំណែងជាមេដឹកនាំស្ថាប័នអភិវឌ្ឍទូរគមនាគមន៍របស់ ITU។

លទ្ធផលនៃការបោះឆ្នោតនេះត្រូវបានវាយតម្លៃថាជាសញ្ញាវិជ្ជមានសំខាន់មួយដែលបង្ហាញថា ការប្រឹងប្រែងរបស់ អឺរ៉ុប ក្នុងការដាក់ រុស្ស៊ី ឱ្យនៅឯកាផ្នែកការទូត នៅ អង្គការសហប្រជាជាតិ ទាក់ទិននឹងសង្គ្រាមនៅ អ៊ុយក្រែន មានប្រសិទ្ធភាព។

ITU ត្រូវបានបង្កើតឡើងកាលពីឆ្នាំ ១៩៦៥។ បច្ចុប្បន្ន ស្ថាប័ននេះទទួលខុសត្រូវក្នុងការធានាលើបណ្ដាញទំនាក់ទំនងអន្តរជាតិសម្រាប់ក្រុមហ៊ុន និងប្រជាពលរដ្ឋ ទន្ទឹមនឹងការបង្កើតបទដ្ឋានសម្រាប់បច្ចេកវិទ្យាថ្មី មានដូចជាបញ្ញាសិប្បនិម្មិត។ល។

សហរដ្ឋអាម៉េរិក ធ្លាប់កាន់កាប់តំណែងប្រធាន ITU ចន្លោះពីឆ្នាំ ១៩៦០ ដល់ឆ្នាំ ១៩៦៥ ខណៈដែល សូវៀត និង រុស្ស៊ី ពុំធ្លាប់មានតំណាងណាម្នាក់បានកាន់កាប់តំណែងនេះនៅឡើយ៕

September 29, 2022

យន្តហោះដឹកអ្នកដំណើរប្រើថាមពលអគ្គិសនីទាំងស្រុង ហោះហើរដោយជោគជ័យ

យោងតាម CNN យន្តហោះដឹកអ្នកដំណើរដែលប្រើប្រាស់អគ្គិសនីទាំងស្រុង បានហោះហើរដោយជោគជ័យនៅក្នុងជើងហោះហើររយៈពេល ៨ នាទី ក្នុងរយៈកម្ពស់ប្រហែលជាង ១,០០០ ម៉ែត្រ។

ក្រុមហ៊ុន Eviation របស់ អ៊ីស្រាអែល បានទទួលជោគជ័យក្នុងការបើកបរយន្តហោះដឹកអ្នកដំណើរប្រើប្រាស់ថាមពលអគ្គិសនីទាំងស្រុង Alice កាលពីថ្ងៃទី ២៧ កញ្ញា ដោយហោះឡើងពីព្រលានយន្តហោះអន្តរជាតិក្នុងស្រុក Grant រដ្ឋវ៉ាស៊ីងតោន សហរដ្ឋអាម៉េរិក។ យន្តហោះដែលមិនបំភាយឧស្ម័ននេះ ហោះហើរក្នុងកម្ពស់ ១,០៦៦ ម៉ែត្រ នៅក្នុងជើងហោះហើរដំបូងដែលអូសបន្លាយពេល ៨ នាទី។

«នេះគឺជាប្រវត្តិសាស្ត្រ» ប្រធានក្រុមហ៊ុន Eviation លោក Gregory Davis ថ្លែងដូច្នេះ និងបន្ថែមថា «យើងមិនធ្លាប់បានឃើញការផ្លាស់ប្ដូរគ្រឿងម៉ាស៊ីនលើយន្តហោះ ចាប់តាំងពីការប្ដូរពីម៉ាស៊ីន piston មកម៉ាស៊ីន turbine»។

ដោយប្រើប្រាស់ថ្មដែលមានបច្ចេកវិទ្យាដូចទៅនឹងថ្មរថយន្តអគ្គិសនី ឬទូរស័ព្ទ និងការបញ្ចូលថាមពលត្រឹមតែ ៣០ នាទី យន្តហោះ Alice ដែលដឹកភ្ញៀវ ៩ នាក់ អាចហោះហើរបានក្នុង ១ ម៉ោង។ យន្តហោះនេះមានល្បឿនឡើងដល់ ៤៦៣ គីឡូម៉ែត្រ/ម៉ោង។ យន្តហោះ Boeing 737 ដំណើរការដោយប្រេងសាំង មានល្បឿន ៩៤០ គីឡូម៉ែត្រ/ម៉ោង។

ក្រុមហ៊ុន Eviation ត្រូវបានបង្កើតឡើងកាលពីឆ្នាំ ២០១៥ ហើយផ្ដើមអភិវឌ្ឍយន្តហោះអគ្គិសនី Alice តាំងពីពេលនោះ។ ក្រុមហ៊ុននេះសង្ឃឹមថា ឆ្នាំ ២០២៥ នឹងទទួលបានវិញ្ញាបនបត្រពី សហរដ្ឋអាម៉េរិក ហើយសាកល្បងហោះហើររយៈពេលពី ១ ទៅ ២ ឆ្នាំ មុនពេលប្រគល់ Alice ដល់ដៃអតិថិជន៕

September 29, 2022

កូរ៉េខាងត្បូង មានមហិច្ឆតាក្ដោបក្ដាប់មួយភាគធំនៃទីផ្សាររថយន្តអគ្គិសនីពិភពលោក

យោងតាម Korea Times កូរ៉េខាងត្បូង កំពុងរកវិធីជំរុញសកម្មភាពផលិតរថយន្តអគ្គិសនី និងកំណត់គោលដៅបង្កើនការក្ដោបក្ដាប់ទីផ្សារឱ្យបានទ្វេដងធៀបនឹងបច្ចុប្បន្ន របស់បណ្ដាក្រុមហ៊ុនផលិតរថយន្តអគ្គិសនីរបស់ប្រទេសនេះនៅក្នុងទីផ្សារអន្តរជាតិ និងយកចំណែកទីផ្សារឱ្យបាន ១២% នៅឆ្នាំ ២០៣០។

យោងតាម ក្រសួងពាណិជ្ជកម្ម ឧស្សាហកម្ម និងថាមពលកូរ៉េខាងត្បូង រដ្ឋាភិបាលប្រទេសនេះបានសន្យាផ្ដល់ការអនុគ្រោះពន្ធ និងវិធានការគាំទ្រជាច្រើនផ្សេងទៀតដើម្បីទាក់ទាញការវិនិយោគរបស់បណ្ដាក្រុមហ៊ុនផលិតរថយន្ត ឱ្យបានដល់ ៦៦.០៣ ពាន់លានដុល្លារក្នុងឆ្នាំ ២០២៦។

ក្រុមអ្នកផលិតរថយន្តរបស់ កូរ៉េខាងត្បូង មានផែនការបង្កើនបរិមាណរថយន្តអគ្គិសនីឱ្យបានដល់ ៣.៣ លានគ្រឿងនៅឆ្នាំ ២០៣០ សម្រាប់ពិភពលោក ច្រើនជាងឆ្ងាយធៀបនឹងប្រហែល ២៥៤,០០០ គ្រឿងកាលពីឆ្នាំកន្លង ដើម្បីក្ដោបក្ដាប់ចំណែកទីផ្សាររថយន្តអគ្គិសនី ១២% នៅទូទាំងសកលលោក។ កាលពីឆ្នាំ ២០២១ ក្រុមហ៊ុនផលិតរថយន្តរបស់ កូរ៉េខាងត្បូង កាន់កាប់ ៥% នៅក្នុងទីផ្សាររថយន្តអគ្គិសនីពិភពលោក។

ដើម្បីសម្រេចបានគោលដៅ ក្រុមអ្នកផលិតរថយន្តក្នុងស្រុករបស់ កូរ៉េខាងត្បូង សន្យាថានឹងធ្វើកិច្ចការសំខាន់ៗជាច្រើន មានដូចជា ការអភិវឌ្ឍបច្ចេកវិទ្យាផ្ដាច់មុខរបស់ពួកគេសម្រាប់រថយន្តអគ្គិសនី ការបណ្ដុះបណ្ដាលធនធានមនុស្សរាប់ម៉ឺននាក់ក្នុងវិស័យរថយន្ត ក៏ដូចជាបង្កើតក្រុមហ៊ុនរាប់រយដែលមានជំនាញក្នុងការអភិវឌ្ឍកម្មវិធីបច្ចេកវិទ្យាសម្រាប់រថយន្តអគ្គិសនី ចាប់ពីពេលនេះដល់ឆ្នាំ ២០៣០។

រដ្ឋាភិបាលកូរ៉េខាងត្បូង កំពុងយកចិត្តទុកដាក់ខ្លាំងទៅលើវិស័យរថយន្តអគ្គិសនី ក្នុងនោះ បច្ចេកវិទ្យាបើកបរស្វ័យប្រវត្តសម្រាប់រថយន្តអគ្គិសនីនឹងត្រូវបានវិនិយោគ ស្រាវជ្រាវ អភិវឌ្ឍ និងផលិតចាប់ពីឆ្នាំ ២០២៤ ទន្ទឹមនឹងការជួយគាំទ្រវិស័យនេះ តាមរយៈការអនុគ្រោះពន្ធ ការជំរុញការប្រើប្រាស់រយន្តអគ្គិសនីជាដើម។ល។

September 29, 2022

Author: សឿន សំណាង