សឿន សំណាង - La Reine Media

Jeep បង្ហាញរថយន្តអគ្គិសនីដំបូងនៅ ប៉ារីស និងគ្រោងលក់តែរថយន្តអគ្គិសនីសុទ្ធនៅ អឺរ៉ុប ចាប់ពីឆ្នាំ ២០៣០

យីហោរថយន្ត Jeep មានផែនការសម្រេចគោលដៅលក់រថយន្តអគ្គិសនីឱ្យបាន ១០០% នៅចុងទសវត្សរ៍នេះ ក្នុងនោះ រថយន្តអគ្គិសនីដំបូងរបស់ Jeep គឺ Jeep Avenger នឹងត្រូវបានបង្ហាញនៅក្នុងព្រឹត្តិការណ៍ពិព័រណ៍ពិភពរថយន្តប៉ារីស Mondial de L’Automobile នៅសប្ដាហ៍ក្រោយ។

Jeep Avenger ដែលជារថយន្តអគ្គិសនីដំបូងរបស់ Jeep អាចបរបាន ៤០០ គីឡូម៉ែត្រ បន្ទាប់ពីបានបញ្ចូលថាមពលរួច។ Jeep Avenger នឹងត្រូវបានផលិតដោយយោងទៅលើថ្នាល STLA Small។ រថយន្តអគ្គិសនីប្រភេទ SUV ខ្នាតតូចរបស់ Jeep នេះ នឹងមានសមត្ថភាព «មិនរើសសណ្ឋានផ្លូវឡើយ» នេះបើតាម Antonella Bruno មេដឹកនាំរបស់ Jeep អឺរ៉ុប នៃក្រុមហ៊ុន Stellantis។

រថយន្តអគ្គិសនី Jeep Avenger នឹងត្រូវបានផលិតនៅ ប៉ូឡូញ និងមានគម្រោងប្រគល់ដល់ដៃអតិថិជននៅ អឺរ៉ុប នៅដើមឆ្នាំ ២០២៣ មុនពេលបានទៅដល់ដៃអតិថិជននៅ ជប៉ុន និង កូរ៉េខាងត្បូង។ល។

Jeep មានគម្រោងបង្ហាញរថយន្តអគ្គិសនីច្រើនម៉ូដែលបន្ថែមទៀតនៅឆ្នាំ ២០២៥ និងកំណត់គោលដៅថា រថយន្ត Jeep ដែលត្រូវបានលក់នៅ អឺរ៉ុប ចាប់ពីឆ្នាំ ២០៣០ នឹងសុទ្ធតែជារថយន្តអគ្គិសនី។ រថយន្តអគ្គិសនីម៉ូដែលបន្តបន្ទាប់របស់ Jeep រួមមាន Jeep Wagoneer S និង Jeep Recon។

October 13, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ១៣ ខែតុលា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ១១ នាក់ ក្នុងអំឡុង ២៤ ម៉ោង នៃថ្ងៃទី ១២ ខែតុលា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០៤ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី ១៣ ខែតុលា ឆ្នាំ ២០២២ កម្ពុជា មាន អ្នកឆ្លងកូវីដ-១៩ សរុប ៖ ១៣៧,៩៥២ នាក់, អ្នកជាសះស្បើយសរុប ៖ ១៣៤,៨១៦ នាក់ និងអ្នកស្លាប់សរុប ៖ ៣,០៥៦ នាក់៕

October 13, 2022

មហាសន្និបាតអង្គការសហប្រជាជាតិ ថ្កោលទោសរុស្ស៊ី ករណីរឹបអូស ៤ ខេត្តរបស់ អ៊ុយក្រែន

មហាសន្និបាតអង្គការសហប្រជាជាតិ អនុម័តសេចក្ដីសម្រេចថ្កោលទោសចំពោះ រុស្ស៊ី ដែលបានច្របាច់បញ្ចូលទឹកដី ៤ ខេត្តរបស់ អ៊ុយក្រែន ទៅក្នុងប្រទេសខ្លួន ដែលនេះគឺជាការសម្រេចដែល ប្រធានាធិបតីអាម៉េរិក អធិប្បាយថា ជាការផ្ញើ «សារយ៉ាងច្បាស់» ដល់ ទីក្រុងមូស្គូ។

សេចក្ដីសម្រេច «ថ្កោលទោសចំពោះការដែល សហព័ន្ធរុស្ស៊ី ប្រារព្ធអ្វីដែលហៅថា ប្រជាមតិខាងក្នុងព្រំដែនដែលទទួលស្គាល់ដោយអន្តរជាតិរបស់ អ៊ុយក្រែន» ទទួលបានសំឡេងគាំទ្រចំនួន ១៤៣ និងសំឡេងប្រឆាំងចំនួន ៥ ក្នុងការបោះឆ្នោតនៃ មហាសន្និបាតអង្គការសហប្រជាជាតិ កាលពីថ្ងៃទី ១២ តុលា ២០២២។

ក្នុងចំណោមប្រទេសចំនួន ៣៥ ដែលបានបោះឆ្នោតអនុបវាទ ក៏មាន ប្រទេសចិន ឥណ្ឌា អាហ្វ្រិកខាងត្បូង និង ប៉ាគីស្ថាន ផងដែរ។ ចំណែក ៥ ប្រទេសដែលបានបោះឆ្នោតប្រឆាំងនឹងសេចក្ដីសម្រេចថ្កោលទោសលើ រុស្ស៊ី រួមមាន រុស្ស៊ី បេឡារុស កូរ៉េខាងជើង ស៊ីរី និង នីការ៉ាហ្កា។

សេចក្ដីសម្រេចថ្កោលទោសខាងលើ អំពាវនាវដល់គ្រប់ស្ថាប័នរបស់ អង្គការសហប្រជាជាតិ និងអន្តរជាតិ មិនទទួលស្គាល់រាល់ការប្រែប្រួលដែល រុស្ស៊ី បានប្រកាស ស្ដីពីព្រំដែន និងស្នើឱ្យ ទីក្រុងមូស្គូ «ធ្វើបញ្ច្រាសជាបន្ទាន់ដោយគ្មានលក្ខខណ្ឌ» ចំពោះការសម្រេចរបស់ខ្លួន។

ថ្មីៗនេះ រុស្ស៊ី បានរឹបអូសទឹកដី ៤ ខេត្តរបស់ អ៊ុយក្រែន រួមមាន Donetsk, Lugansk, Kherson និង Zaporizhzhia តាមរយៈការវាយចូលកាន់កាប់ និងការធ្វើប្រជាមតិ។ អ៊ុយក្រែន និងសម្ព័ន្ធមិត្ត បានថ្កោលទោសទង្វើនេះរបស់ រុស្ស៊ី មុននឹង សហរដ្ឋអាម៉េរិក និង អាល់បានី ដាក់សេចក្ដីព្រាងសេចក្ដីសម្រេចថ្កោលទោសឡើងទៅកាន់ ក្រុមប្រឹក្សាសន្តិសុខអង្គការសហប្រជាជាតិ។

October 13, 2022

ទិដ្ឋភាពកសិដ្ឋានផ្ទះកញ្ចក់ទំនើបទំហំ ២៨០ ហិកតារបស់ កូរ៉េខាងជើង

កសិដ្ឋានផ្ទះកញ្ចក់ទំនើបទំហំ ២៨០ ហិកតា ដែលស្ថិតនៅលើអតីតទីតាំងសម្រាប់ការសាកល្បងមីស៊ីល គឺជាគំនិតផ្ដួចផ្ដើមរបស់ អាជ្ញាធរកូរ៉េខាងជើង។

កសិដ្ឋានផ្ទះកញ្ចក់ទំនើប Ryonpho ស្ថិតនៅក្នុងស្រុក Hamju ភាគខាងកើតប្រទេស ត្រូវបានសម្ពោធបើកដំណើរការកាលពីថ្ងៃទី ១០ តុលា ក្នុងឱកាសទិវាបង្កើតបក្សពលករកូរ៉េខាងជើង។

បក្សពលករ របស់ កូរ៉េខាងជើង កំពុងរៀងផែនការ «ម្ចាស់ការ និងខិតខំជំរុញការអភិវឌ្ឍជនបទ ដោយមានផ្ទះកញ្ចក់ Ryonpho ជានិមិត្តរូប» លោក គីម ជុងអុន ថ្លែងដូច្នេះ។

ប្រធានរដ្ឋកូរ៉េខាងជើង បានអំពាវនាវឱ្យសាងសង់កសិដ្ឋានធំៗជាច្រើនទៀត និងបង្កើនចំនួនប្រភេទបន្លែបង្ការ ធានាការផលិត គ្រប់គ្រងបែបវិទ្យាសាស្ត្រ និងប្រើប្រាស់បច្ចេកវិទ្យាទំនើបនៅតាមកសិដ្ឋាន។

Jungphyong ដែលជាកសិដ្ឋានដូចទៅនឹង Ryonpho ប៉ុន្តែមានទំហំតូចជាង និងស្ថិតក្នុងស្រុក Kyonsong ភាគឦសានប្រទេស គឺជាទម្រង់ផ្ទះកញ្ចក់ដំបូងដែល កូរ៉េខាងជើង បង្កើតឡើងកាលពីឆ្នាំ ២០១៩ ក្នុងកិច្ចប្រឹងប្រែង «ខ្លួនទីពឹងខ្លួន» នៅចំពោះមុខទណ្ឌកម្មអន្តរជាតិទាក់ទិននឹងកម្មវិធីអាវុធនុយក្លេអែរ របស់ ទីក្រុងព្យុងយ៉ាង។

ក្នុងកិច្ចប្រជុំកំណត់គោលនយោបាយសំខាន់កាលពីខែធ្នូ ២០២១ បក្សពលករកូរ៉េខាងជើង បានប្រកាសផែនការកែប្រែមូលដ្ឋានទ័ពអាកាស Ryonpho ឱ្យទៅជា «កសិដ្ឋានស្វ័យប្រវត្តកម្រិតខ្ពស់» អមជាមួយនឹងគំរូជនបទថ្មី ដោយចាត់ទុកថា ទាំងនេះគឺជាអាទិភាពដំបូងដែលជួយលើកកម្ពស់ជីវភាពប្រជាជន។

លោក គីម ជុងអុន គឺជាអ្នកផ្ដួចផ្ដើមគំនិតក្នុងការអភិវឌ្ឍកសិដ្ឋានទំនើបនេះ ក្នុងបំណងបង្កើនប្រភពផ្គត់ផ្គង់បន្លែបង្ការ។ ក្នុងថ្ងៃធ្វើទស្សនកិច្ច លោក គីម បានកោតសរសើរចំពោះទាហាន និងកម្មករដែលសម្រេចបានលទ្ធផលល្អក្នុងការសាងសង់កសិដ្ឋាន Ryonpho ដោយប្រើពេលតែប៉ុន្មានខែប៉ុណ្ណោះ។

តំបន់កសិដ្ឋាន Ryonpho ធ្លាប់ជាទីលានបាញ់សាកល្បងមីស៊ីលប្លោងរយៈចម្ងាយខ្លី ក្នុងនោះក៏មាន KN-25 ដែលបានសាកល្បងកាលពីខែវិច្ឆិកា ២០១៩ និង KN-23 សាកល្បងកាលពីឆ្នាំ ២០២១។ ក្រៅពីកសិដ្ឋានផ្ទះកញ្ចក់ តំបន់ខាងលើនេះក៏មានផ្ទះស្នាក់នៅ សាលារៀន មជ្ឈមណ្ឌលវប្បធម៌ និងសេវាកម្មចំនួន ១,០០០ ខ្នងផងដែរ៕

October 13, 2022

កូរ៉េខាងជើង បាញ់សាកល្បងមីស៊ីលបំពាក់ប្រព័ន្ធនាំផ្លូវយុទ្ធសាស្ត្រ

កូរ៉េខាងជើង ប្រកាសថា បានបាញ់សាកល្បងមីស៊ីលបំពាក់ប្រព័ន្ធនាំផ្លូវរយៈចម្ងាយឆ្ងាយដែលអាចបំពាក់ក្បាលគ្រាប់នុយក្លេអែរ ក្រោមការតាមដានរបស់មេដឹកនាំ គីម ជុងអុន។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានឱ្យដឹងថា មេដឹកនាំ គីម ជុងអុន បានតាមដានដោយផ្ទាល់នូវដំណើរការបាញ់សាកល្បង «មីស៊ីលបំពាក់ប្រព័ន្ធនាំផ្លូវរយៈចម្ងាយឆ្ងាយយុទ្ធសាស្ត្រចំនួនពីរគ្រាប់» កាលពីថ្ងៃទី ១២ តុលា និងបន្ថែមថា នេះគឺជាការសាកល្បងក្នុងបំណងបញ្ជាក់អំពីភាពប្រាកដប្រជា និងសមត្ថភាពប្រយុទ្ធរបស់អាវុធនុយក្លេអែរ ដែលត្រូវបានដាក់ក្នុងជួរកងទ័ព។

មីស៊ីលពីរគ្រាប់ធ្វើដំណើរក្នុងរយៈពេល ១០,២៣៤ វិនាទី និងធ្លាក់ចំគោលដៅដែលស្ថិតនៅចម្ងាយ ២,០០០ គីឡូម៉ែត្រពីទីតាំងបាញ់សាកល្បង។

«នេះគឺជាការព្រមានច្បាស់លាស់សម្រាប់សត្រូវ។ កូរ៉េខាងជើង ត្រូវបន្តការពង្រីកសមត្ថភាពប្រយុទ្ធរបស់កងកម្លាំងដែលមានអាវុធនុយក្លេអែរ ដើម្បីកំញើញដោយការប្ដេជ្ញានៅក្នុងវិបត្តិយោធានៅគ្រប់កាលទេសៈ និងមានប្រៀបជាងទាំងស្រុង» KCNA ដកស្រង់សម្ដីរបស់លោក គីម ជុងអុន ថ្លែងក្នុងព្រឹត្តិការណ៍បាញ់សាកល្បងមីស៊ីល។

សហរដ្ឋអាម៉េរិក កូរ៉េខាងត្បូង និង ជប៉ុន មិនទាន់មានការអធិប្បាយអ្វីនៅឡើយ ទាក់ទិននឹងព័ត៌មានខាងលើ។ប៉ុន្តែ ប្រទេសទាំងនេះកម្រនឹងមានប្រតិកម្មទៅនឹងការសាកល្បងនាពេលកន្លង ដោយសារតែអាវុធប្រភេទនេះមិនត្រូវបាន អង្គការសហប្រជាជាតិហាមចំពោះ កូរ៉េខាងជើង៕

October 13, 2022

ក្មេងអាយុជាងមួយឆ្នាំម្នាក់នៅប្រទេសអេស្ប៉ាញ ក្លាយជាមនុស្សដំបូងគេក្នុងពិភពលោកដែលវះកាត់ប្ដូរពោះវៀន

ក្មេងតូចម្នាក់អាយុ ១៧ ខែនៅ ប្រទេសអេស្ប៉ាញ បានក្លាយជាមនុស្សដំបូងគេក្នុងពិភពលោកដែលបានទទួលជោគជ័យក្នុងការវះកាត់ប្ដូរពោះវៀនពីការបរិច្ចាគរបស់មនុស្សម្នាក់ដែលបានស្លាប់ដោយសារជំងឺខ្សោយបេះដូង។

ខាងលើនេះគឺជាការប្រកាសរបស់មន្ទីរពេទ្យ La Paz នៅ រាជធានីម៉ាឌ្រីដ ប្រទេសអេស្ប៉ាញ កាលពីថ្ងៃទី ១១ តុលា ២០២២។

កុមារ Emma ត្រូវបានពិនិត្យឃើញថា មានជំងឺខ្សោយពោះវៀនកាលពីពេលមានអាយុទើបតែ ១ ខែ ព្រោះតែពោះវៀនខ្លីពេក មិនអាចស្រូបយកជីវជាតិបានគ្រប់គ្រាន់ នាំឱ្យសុខភាពទ្រុឌទ្រោមយ៉ាងឆាប់រហ័ស ហើយនឹងបាត់បង់ជីវិត បើសិនមិនបានប្ដូរពោះវៀន។

ក្រៅពីពោះវៀន Emma ក៏ទទួលបានការវះកាត់ប្ដូរថ្លើម ក្រពះ លំពែង និងផាលថ្មីផងដែរ។ បច្ចុប្បន្ន Emma ត្រូវបានអនុញ្ញាតឱ្យចេញពីពេទ្យ ដោយសារសុខភាពល្អប្រសើរឡើងវិញ។

ស្ថាប័នសុខាភិបាលបានរង់ចាំរហូតដល់កុមាររូបនេះពិតជាបានសម្របខ្លួនរស់នៅបានជាសរីរាង្គថ្មីទាំងស្រុង ទើបប្រកាសអំពីករណីវះកាត់ពិសេសនេះ។

ចំណែកអ្នកដែលបានបរិច្ចាគពោះវៀនឱ្យ Emma មុននោះត្រូវបានវេជ្ជបណ្ឌិតពិនិត្យឃើញថា បានស្លាប់ដោយសារជំងឺបេះដូង។ សរីរាង្គខាងក្នុងរបស់សប្បុរសជនរូបនេះត្រូវបានយកចេញ និងចិញ្ចឹមរក្សាទុកដោយប្រើប្រាស់ប្រព័ន្ធបេះដូង និងសួតសិប្បនិម្មិត ECMO។

អេស្ប៉ាញ គឺជាប្រទេសដែលនាំមុខគេក្នុងការវះកាត់ប្ដូរសរីរាង្គខាងក្នុងរបស់មនុស្ស ដោយមានអត្រាជាង ១០២ ករណី/ពលរដ្ឋ ១ លាននាក់៕

October 12, 2022

កម្ពុជា ឈរលំដាប់លេខ ៥ ក្នុងការព្យាករអំពីកំណើន GDP ឆ្នាំ ២០២២ នៅតំបន់ ASEAN+3

ស្ថាប័ន AMRO ព្យាករថា សេដ្ឋកិច្ចរបស់ កម្ពុជា នឹងមានកំណើន ៥% ក្នុងឆ្នាំនេះ ហើយឈរលំដាប់ទី ៥ នៅក្នុងតំបន់ ASEAN+3 ដោយនៅពីក្រោម ម៉ាឡេស៊ី វៀតណាម ហ្វ៊ីលីពីន និង ឥណ្ឌូណេស៊ី។

ការិយាល័យស្រាវជ្រាវម៉ាក្រូសេដ្ឋកិច្ច ASEAN+3 (AMRO) ថ្មីៗនេះបានប្រកាសទិន្នន័យថ្មីសម្រាប់ខែតុលា ២០២២ នៃរបាយការណ៍ស្ដីពី «ទស្សនវិស័យសេដ្ឋកិច្ចតំបន់ ASEAN+3 ឆ្នាំ ២០២២»។

យោងតាមរបាយការណ៍ខាងលើ AMRO ព្យាករថា តំបន់អាស៊ាន (ASEAN) នឹងមានកំណើន ៥.៣% ក្នុងឆ្នាំនេះ ខ្ពស់ជាងការព្យាករកាលពីខែកក្កដា ២០២២ ដែលបានចេញផ្សាយកន្លងមក។

AMRO បានដំឡើងការព្យាករអតិផរណាឆ្នាំ ២០២២ សម្រាប់តំបន់អាស៊ាន ឡើងដល់ ៧.៦% ដោយកើន ១.៤% ធៀបនឹងខែកក្កដា។ សម្រាប់ឆ្នាំ ២០២៣ កំណើនសេដ្ឋកិច្ចនឹងកើនឡើង ៤.៩% ខណៈអតិផរណាត្រូវបាន AMRO ព្យាករថា នឹងស្ថិតក្នុងអត្រា ៤%។

សេដ្ឋកិច្ចរបស់ កម្ពុជា ត្រូវបាន AMRO ព្យាករថា នឹងមានកំណើន ៥% ក្នុងឆ្នាំ ២០២២ ឈរលំដាប់ទី ៥ ក្នុងតំបន់ ASEAN+3 (ASEAN+3 រួមមាន ម៉ាឡេស៊ី វៀតណាម ហ្វ៊ីលីពីន ឥណ្ឌូណេស៊ី កម្ពុជា ឡាវ ចិន ថៃ សិង្ហបុរី កូរ៉េខាងត្បូង ជប៉ុន មីយ៉ានម៉ា និង ព្រុយណេ) ដោយស្ថិតនៅពីក្រោម ម៉ាឡេស៊ី វៀតណាម ហ្វ៊ីលីពីន និង ឥណ្ឌូណេស៊ី៕

October 12, 2022

អាជ្ញាធរតំបន់របស់ វៀតណាម ស្នើបង្កើតអាកាសយានដ្ឋានអន្តរជាតិមួយទៀតនៅភាគខាងត្បូងប្រទេស

ដល់ឆ្នាំ ២០៣០ ព្រលានយន្តហោះ Lien Khuong ក្នុងខេត្ត Lam Dong នៅភាគខាងត្បូងប្រទេសវៀតណាម ត្រូវបានស្នើឱ្យមានការអភិវឌ្ឍទៅជាអាកាសយានដ្ឋានអន្តរជាតិ និងស្ថាបនាអគារដែលអាចទទួលអ្នកដំណើរបាន ៥ លាននាក់/ឆ្នាំ។

ការិយាល័យអាកាសចរណ៍វៀតណាម ទើបតែមានរបាយការណ៍ដំបូងស្ដីពីការកែប្រែផែនការសម្រាប់ព្រលានយន្តហោះ Lien Khuong (ខេត្ត Lam Dong) នៅភាគខាងត្បូងប្រទេសនេះ ក្នុងដំណាក់កាលដល់ឆ្នាំ ២០៣០ ក្នុងទស្សនវិស័យដល់ឆ្នាំ ២០៥០។

យោងតាមការវាយតម្លៃរបស់ស្ថាប័នជំនាញ Lam Dong គឺជាខេត្តក្នុងតំបន់ភ្នំដែលមានសក្ដានុពលសម្រាប់ការអភិវឌ្ឍវិស័យទេសចរណ៍ និងកសិផលតម្លៃខ្ពស់។ នេះគឺជាកត្តាសំខាន់សម្រាប់ការអភិវឌ្ឍអាកាសចរណ៍។

អាកាសយានដ្ឋានខាងលើត្រូវបានវិនិយោគជាមូលដ្ឋានទៅតាមការផែនការដែលបានសម្រេចកាលពីឆ្នាំ ២០០៦ ប៉ុន្តែ តំបន់អាកាសចរណ៍ស៊ីវិលរបស់អាកាសយានដ្ឋាននេះត្រូវការពង្រីកបន្ថែមដើម្បីឱ្យសមស្របនឹងស្ថានភាព។

យោងតាមការព្យាករ នៅក្នុងឆ្នាំ ២០៣០ អាកាសយានដ្ឋាន Lieng Khuong នឹងអាចទទួលអ្នកដំណើរក្នុងស្រុកបានជាង ៤.៣ លាននាក់ និងអ្នកដំណើរអន្តរជាតិជិត ៧ សែននាក់ និងទំនិញជាង ១៨,០០០ តោន។

ក្រោយពីបានវាយតម្លៃស្ថានភាពជាថ្មីទាក់ទងនឹងចំនួនអ្នកដំណើរ និងទំហំទំនិញជាដើម ស្ថាប័នប្រឹក្សាយោបល់បានស្នើឱ្យកែប្រែផែនការ ដើម្បីពង្រីកព្រលានយន្តហោះ Lieng Khuong ខាងលើឱ្យទៅជាអាកាសយានដ្ឋានអន្តរជាតិ លំដាប់ 4E ដូចទៅនឹង អាកាសយានដ្ឋានអន្តរជាតិខេត្តព្រះសីហនុ៕

October 12, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ១២ ខែតុលា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៤ នាក់ ក្នុងអំឡុង ២៤ ម៉ោង នៃថ្ងៃទី ១១ ខែតុលា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០១ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី ១០ ខែតុលា ឆ្នាំ ២០២២ កម្ពុជា មាន អ្នកឆ្លងកូវីដ-១៩ សរុប ៖ ១៣៧,៩៤១ នាក់, អ្នកជាសះស្បើយសរុប ៖ ១៣៤,៨១២ នាក់ និងអ្នកស្លាប់សរុប ៖ ៣,០៥៦ នាក់។

October 12, 2022

IMF និង WB ព្រមានអំពីហានិភ័យកើតមានវិបត្តិសេដ្ឋកិច្ចសកលនៅឆ្នាំ ២០២៣

មូលនិធិរូបិយវត្ថុអន្តរជាតិ (IMF) និង ធនាគារពិភពលោក (WB) សុទ្ធតែព្រមានថា សេដ្ឋកិច្ចសកលកំពុងមានកំណើនយឺតមកវិញ និងអាចត្រូវយឺតយ៉ាវទាំងស្រុងនៅក្នុងឆ្នាំ ២០២៣។

«ពិភពលោកទាំងមូលមានហានិភ័យខ្ពស់ប្រឈមនឹងវិបត្តិសេដ្ឋកិច្ចនៅឆ្នាំក្រោយ» RT ដកស្រង់ និងចុះផ្សាយអំពីការព្យាកររបស់ ប្រធាន WB លោក David Malpass និង អគ្គនាយក IMF លោកស្រី Kristalina Georgieva លើកឡើងនៅក្នុងកិច្ចប្រជុំមួយកាលពីថ្ងៃទី ១០ តុលា។

មេដឹកនាំស្ថាប័នទាំងពីរខាងលើសុទ្ធតែយល់ថា ការដែលធនាគារកណ្ដាលនានាបន្តដំឡើងការប្រាក់ដើម្បីគ្រប់គ្រងអតិផរណា កំពុងតែបង្កផលប៉ះពាល់បញ្ច្រាស ដោយសារល្បឿននៃកំណើនសេដ្ឋកិច្ចត្រូវបានបង្អាក់។

លោក Malpass សង្កត់ធ្ងន់ថា កំណើនសេដ្ឋកិច្ចយឺតមកវិញនៅតាមបណ្ដាប្រទេសអភិវឌ្ឍ និងនិន្នាការធ្លាក់ថ្លៃនៃរូបិយប័ណ្ណនៅក្នុងបណ្ដាប្រទេសកំពុងអភិវឌ្ឍ កំពុងតែផ្ដល់សញ្ញាអំពីស្ថានភាពវិបត្តិរបស់សេដ្ឋកិច្ចពិភពលោក។

លោកស្រី Georgieva យល់ស្របនឹងការលើកឡើងរបស់លោក Malpass និងជឿថា «ហានិភ័យវិបត្តិសេដ្ឋកិច្ចបានកើនឡើង»។ លោកស្រីបន្ថែមថា ១/៣ នៃបណ្ដាប្រទេសក្នុងពិភពលោកនឹងធ្លាក់ទៅក្នុងឱនភាពសេដ្ឋកិច្ច និងបានព្រមានថា ប្រទេសទាំងនេះអាចនឹងបានឃើញសេដ្ឋកិច្ចមានកំណើនអវិជ្ជមាននៅក្នុងត្រីមាសចុងក្រោយរបស់ឆ្នាំ ២០២២ និងត្រីមាសដំបូងនៃឆ្នាំ ២០២៣។

អគ្គនាយក IMF លោកស្រី Kristalina Georgieva

យោងតាម មូលនិធិរូបិយវត្ថុអន្តរជាតិ ការខាតបង់ទូទាំងសកលលោកដោយសារវិបត្តិសេដ្ឋកិច្ច អាចឡើងដល់ ៤ ទ្រីលាន (៤,០០០,០០០,០០០,០០០) ដុល្លារអាម៉េរិក នៅឆ្នាំ ២០២៦។ ក៏ប៉ុន្តែ លោកស្រី Georgieva ក៏បានអំពាវនាវដល់ក្រុមអ្នករៀបចំគោលនយោបាយ ឱ្យចាត់វិធានការដើម្បីកុំឱ្យអតិផរណាក្លាយជា «រថភ្លើងដែលមិនមានហ្វ្រាំង»៕

October 12, 2022

Author: សឿន សំណាង