សឿន សំណាង - La Reine Media

ប្រទេសឡាវ ផលិតសាំងជីវសាស្ត្រដើម្បីកាត់បន្ថយការនាំចូលឥន្ធនៈពីបរទេស

រដ្ឋាភិបាលឡាវ កំពុងមានផែនការផលិតជីវឥន្ធនៈដើម្បីរួមចំណែកក្នុងការកាត់បន្ថយការនាំចូលប្រេងសាំងពីបរទេស។

ថ្មីៗនេះ ក្រុមហ៊ុនឥន្ធនៈរដ្ឋឡាវ បានចុះកិច្ចព្រមព្រៀងជាមួយក្រុមហ៊ុន GAIA Petro របស់ កូរ៉េខាងត្បូង ដើម្បីចាប់ផ្ដើមអនុវត្តគម្រោងផលិតឥន្ធនៈជីវសាស្ត្រ (biofuel production project) ដែលមានតម្លៃ 20 លានដុល្លារអាម៉េរិក នៅ ប្រទេសឡាវ។

គម្រោងនេះនឹងមានរោងចក្រមួយសាងសង់នៅតំបន់ Dongphosy ក្នុងខណ្ឌ Hadxayfong នៃ រដ្ឋធានីវៀងចន្ទន៍។

ក្រុមហ៊ុនកូរ៉េខាងត្បូង AGIA Petro កាន់កាប់ភាគហ៊ុន 55% របស់គម្រោងនេះ ខណៈដែល 22.5% គ្រប់គ្រងដោយក្រុមហ៊ុនឥន្ធនៈរដ្ឋឡាវ និង 22.5% ផ្សេងទៀតគឺជាកម្មសិទ្ធិរបស់ក្រុមអ្នកវិនិយោគក្នុងស្រុក។

ក្រុមហ៊ុនបណ្ដាក់ទុនរួមគ្នាខាងលើនេះ បានកំណត់គោលដៅថា នឹងផលិតសាំងជីវសាស្ត្រឱ្យបាន 500,000 លីត្រ/ថ្ងៃ។

តាមផែនការ ឆ្នាំដំបូងក្រុមហ៊ុនខាងលើអាចផ្គត់ផ្គង់សាំងប្រភេទនេះប្រមាណ 10 លានលីត្រជារៀងរាល់ខែ។ បរិមាណសាំងជីវសាស្ត្រនឹងកើនឡើង 20% ជារៀងរាល់ឆ្នាំ ចាប់ពីឆ្នាំទីពីរ។

ឥន្ធនៈជីវសាស្ត្រ ឬជីវឥន្ធនៈ គឺជាឥន្ធនៈដែលត្រូវបានផលិតឡើងដោយប្រើពេលខ្លី ពីជីវម៉ាស ជំនួសឱ្យដំណើរការតាមធម្មជាតិដែលស៊ីពេលយូរមុននឹងបង្កើតបានជាឥន្ធនៈហ្វូស៊ីល មានដូចជាប្រេងរ៉ែជាដើម៕

November 3, 2022

ករណីបាក់ស្ពានយោលសម្លាប់មនុស្សជាងរយនាក់នៅ ឥណ្ឌា ៖ ក្រុមហ៊ុនជួសជុលត្រូវបានចោទប្រកាន់

ក្រុមមន្ត្រីឥណ្ឌា បានចោទថា ក្រុមហ៊ុនជំនាញខាងផលិតនាឡិកា Oreva ដែលទទួលបានសិទ្ធិជួសជុលស្ពានយោល Morbi ត្រូវតែទទួលខុសត្រូវក្នុងករណីបាក់ស្ពានដែលបានបណ្ដាលឱ្យមនុស្ស 135 នាក់បាត់បង់ជីវិត។

«Oreva បានជួលក្រុមហ៊ុនម៉ៅការដែលមិនមានសមត្ថភាពគ្រប់គ្រាន់។ ខ្សែកាបសំខាន់ជាងគេរបស់ស្ពានមិនត្រូវបានផ្លាស់ប្ដូរនៅក្នុងការជួសជុល» រដ្ឋអាជ្ញាតុលាការឥណ្ឌា Harshendu Panchal បានប្រាប់ក្រុមអ្នកយកព័ត៌មានក្រោយសវនាការកាលពីថ្ងៃទី 01 វិច្ឆិកា និងបានឱ្យដឹងថា ខ្សែកាបសំខាន់បំផុតរបស់ស្ពាន Morbi ត្រូវច្រែះស៊ីទៅហើយ។

លោក Panchal ក៏បាននិយាយថា ប៉ូលិសបានរកឃើញថា ក្រុមហ៊ុនដំឡើងបន្ទះអាលុយមីញូម 4 ជាន់នៅលើស្ពាន Morbi ធ្វើឱ្យទម្ងន់របស់ផ្ទៃស្ពានត្រូវធ្ងន់ថែមមួយកម្រិតទៀត ដែលនេះនាំឱ្យស្ពានត្រូវបាក់នៅពេលមានមនុស្សច្រើននៅពីលើ។

ស្ពានយោល Morbi ប្រវែង 230 ម៉ែត្រ ដែលជាទីតាំងទាក់ទាញទេសចរខ្លាំងនៅទីរួមស្រុក Morbi ក្នុងរដ្ឋ Gujarat គឺជាស្ពានដែលសាងសង់កាលពីសម័យអាណានិគមអង់គ្លេស ហើយបានបើកដំណើរការឡើងវិញបន្ទាប់ពីការជួសជុលជិត 7 ខែ។

Deepak Parekh អ្នកគ្រប់គ្រងក្រុមហ៊ុន Oreva បានប្រាប់តុលាការថា ករណីបាក់ស្ពានយោល Morbi គឺកើតឡើងដោយសារ «បំណងរបស់ព្រះ»។ Parekh រួមនឹងមនុស្ស 8 នាក់ផ្សេងទៀត ក្នុងនោះរួមមាន អ្នកម៉ៅការ 2 នាក់, បុគ្គលិកលក់សំបុត្រ 5 នាក់ និងសន្តិសុខការពារស្ពាន Morbi 1 នាក់ ត្រូវបានប៉ូលិសចាប់ខ្លួនដើម្បីបម្រើឱ្យការស៊ើបអង្កេត៕

November 3, 2022

សេតវិមាននិយាយថា កូរ៉េខាងជើង កំពុងជញ្ជូនគ្រាប់កាំភ្លើងធំឱ្យ រុស្ស៊ី

សេតវិមាន បានឱ្យដឹងថា កូរ៉េខាងជើង កំពុងជញ្ជូនគ្រាប់កាំភ្លើងធំយ៉ាងច្រើនទៅឱ្យ រុស្ស៊ី ដើម្បីប្រើប្រាស់នៅ អ៊ុយក្រែន ដោយដាក់ក្នុងប្រអប់ទំនិញទៅកាន់ មជ្ឈិមបូព៌ា ឬ ទ្វីបអាហ្វ្រិក។

«សហរដ្ឋអាម៉េរិក ទទួលបានព័ត៌មានថា កូរ៉េខាងជើង កំពុងផ្គត់ផ្គង់ដោយសម្ងាត់នូវគ្រាប់កាំភ្លើងធំក្នុងបរិមាណច្រើនសម្រាប់យុទ្ធនាការយោធារបស់ រុស្ស៊ី នៅ អ៊ុយក្រែន ដោយលាក់គោលដៅតាមរយៈការបង្កើតប្រអប់ដែលនិយាយថា ពួកវាកំពុងត្រូវបានដឹកទៅកាន់ មជ្ឈិមបូព៌ា ឬ អាហ្វ្រិកខាងជើង» អ្នកនាំពាក្យរបស់ ក្រុមប្រឹក្សាសន្តិសុខជាតិអាម៉េរិក John Kirby ឱ្យដឹងកាលពីថ្ងៃទី 02 វិច្ឆិកា។

ក្រុមមន្ត្រីអាម៉េរិក មិនប្រាកដថា រុស្ស៊ី បានទទួលទំនិញនេះហើយ ឬនៅ និងកំពុងតាមដានសភាពការណ៍ ហើយថា នឹងពិភាក្សាជាមួយសម្ព័ន្ធមិត្ត និងដៃគូ ពិសេសគឺនៅ អង្គការសហប្រជាជាតិ ដើម្បីមានវិធានការទប់ទល់។

អ្នកនាំពាក្យក្រសួងការបរទេសអាម៉េរិក Ned Price យល់ថា ប្រទេសនេះអាចនឹងដាក់ទណ្ឌកម្មបន្ថែមដូចទៅនឹងករណី អ៊ីរ៉ង់ ផ្ដល់អាវុធឱ្យ រុស្ស៊ី បើទោះជា ក្រុងតេហេរ៉ង់ និង មូស្គូ សុទ្ធតែបានច្រានចោលការចោទប្រកាន់។

ភាគីខាង រុស្ស៊ី និង កូរ៉េខាងជើង មិនទាន់មានការអធិប្បាយឆ្លើយតបនឹងការចោទប្រកាន់នេះនៅឡើយ។

កូរ៉េខាងជើង នៅតែរក្សាទំនាក់ទំនងល្អជាមួយ រុស្ស៊ី ក្នុងគ្រាដែលបណ្ដាប្រទេសលោកខាងលិច ដាក់ទណ្ឌកម្មលើ ទីក្រុងមូស្គូ ដោយសារតែការចូលឈ្លានពាន អ៊ុយក្រែន។ ទីក្រុងព្យុងយ៉ាង ក៏បានចោទថា សហរដ្ឋអាម៉េរិក គឺជាដើមហេតុបង្កឱ្យមានវិបត្តិនៅ អ៊ុយក្រែន និងបានហៅគោលនយោបាយ «អនុត្តរភាព» របស់បស្ចិមលោក ថាជាមូលហេតុដែលនាំឱ្យ រុស្ស៊ី ត្រូវបើកយុទ្ធនាការយោធាដើម្បីការពារខ្លួន៕

November 3, 2022

កូរ៉េខាងជើង បាញ់មីស៊ីលប្លោង ធ្វើឱ្យ ជប៉ុន ប្រកាសជម្លៀសប្រជាជន

កូរ៉េខាងជើង បាញ់មីស៊ីលប្លោងចំនួន 2 គ្រាប់ ក្នុងនោះមាន 1 គ្រាប់ជាប្រភេទរយៈចម្ងាយឆ្ងាយ បណ្ដាលឱ្យ ជប៉ុន ត្រូវប្រកាសឱ្យឈ្លៀសប្រជាជនក្នុងខេត្តចំនួន 3 នៅភាគកណ្ដាល។

«កូរ៉េខាងជើង ទំនងជាបានបាញ់មីស៊ីល។ ចូរស្វែងរកជម្រកសុវត្ថិភាពនៅក្នុងផ្ទះ ឬបន្ទប់ក្រោមដី។ បទបញ្ជាជម្លៀសត្រូវអនុវត្តសម្រាប់បណ្ដាខេត្តនៅភាគកណ្ដាល Miyagi, Niigata និង Yamagata» រាជរដ្ឋាភិបាលជប៉ុន បានឱ្យដឹងដូច្នេះនៅក្នុងសេចក្ដីប្រកាសជូនដល់ប្រជាជនកាលពីម៉ោង 7 និង 50 នាទីថ្ងៃនេះ ត្រូវនឹងម៉ោង 5 និង 50 នាទីនៅ កម្ពុជា។

អាជ្ញាធរជប៉ុន បានឱ្យដឹងថា មីស៊ីលមិនត្រូវបានបាញ់ស្កាត់ និងបានធ្លាក់ទៅក្នុងមហាសមុទ្រប៉ាស៊ីហ្វិក។ នេះគឺជាលើកទីពីរហើយដែល កូរ៉េខាងជើង បានបាញ់មីស៊ីល និងបង្ខំឱ្យ ជប៉ុន ប្រកាសជម្លៀសប្រជាជននៅក្នុងរង្វង់ 1 ខែកន្លងមកនេះ។

ក្រសួងការពារជាតិជប៉ុន ក្រោយមកបាននិយាយថា មីស៊ីលមិនបានហោះឆ្លងកាត់ទឹកដីប្រទេសនេះដូចការព្រមាន និងបានប្រកាសថា កូរ៉េខាងជើង បានបាញ់មីស៊ីលប្លោងចំនួន 2 គ្រាប់បន្ថែមទៀត។ រដ្ឋមន្ត្រីក្រសួងការពារជាតិជប៉ុន Yasukazu Hamada ទទួលស្គាល់ថា ព័ត៌មានដំបូងគឺជាការយល់ច្រឡំ ដោយសារតែប្រទេសនេះ «បាត់ដានរបស់មីស៊ីល នៅពេលវាហោះឆ្លងកាត់សមុទ្រជប៉ុន»។

អាជ្ញាធរកូរ៉េខាងជើង មិនទាន់មានប្រតិកម្មណាមួយឆ្លើយតបនឹងព័ត៌មានខាងលើនៅឡើយ។

ករណីបាញ់មីស៊ីលខាងលើកើតឡើងមួយថ្ងៃបន្ទាប់ពី កូរ៉េខាងជើង បានបាញ់មីស៊ីលច្រើនប្រភេទយ៉ាងតិច 23 គ្រាប់កាលពីថ្ងៃទី 02 វិច្ឆិកា ដែលនេះគឺជាតួលេខច្រើនមិនធ្លាប់មានពីមុនមក។

សម្មភាពយោធារបស់ភាគីនានា កំពុងតែធ្វើឱ្យ ឧបទ្វីបកូរ៉េ «ឡើងកម្ដៅ» នាប៉ុន្មានខែចុងក្រោយនេះ។ កូរ៉េខាងជើង បានបាញ់ប្លោងមីស៊ីលជាច្រើនលើក ដោយលើកមូលហេតុថា ដើម្បីឆ្លើយតបនឹងសមយុទ្ធយោធារបស់ អាម៉េរិក កូរ៉េខាងត្បូង និងជប៉ុន។ ចំណែក សហរដ្ឋអាម៉េរិក និងសម្ព័ន្ធមិត្ត ក៏បានថ្កោលទោសករណីបាញ់ប្លោងមីស៊ីលរបស់ ព្យុងយ៉ាង ដោយចាត់ទុកថា នោះគឺជាសកម្មភាពបង្កហេតុ និងនាំឱ្យមានអស្ថិរភាព ព្រមទាំងបង្កើនការធ្វើសមយុទ្ធរួម៕

November 3, 2022

ក្រុមហ៊ុនរបស់ កូរ៉េខាងត្បូង បើករោងចក្រផលិតម៉ូតូអគ្គិសនីនៅ វៀតណាម

ក្រុមហ៊ុនផលិតម៉ូតូអគ្គិសនី Zio Motors របស់ កូរ៉េខាងត្បូង កាលពីថ្ងៃទី 31 តុលា បានសម្ពោធរោងចក្រមួយនៅ វៀតណាម ដែលអាចផលិតម៉ូតូអគ្គិសនីបានប្រហែល 12,000 គ្រឿងក្នុងមួយឆ្នាំនៅដំណាក់កាលដំបូង។

តាមផែនការ ក្នុងដំណាក់កាលទីមួយ រោងចក្រ Zio Motors ដែលមានទីតាំងនៅក្បែរ រដ្ឋធានីហាណូយ នេះ នឹងអាចផលិតម៉ូតូអគ្គិសនីបាន 12,000 គ្រឿង/ឆ្នាំ ស្មើនឹង 1,000 គ្រឿង/ខែ។ ក្នុងដំណាក់កាលទីពីរ ឆ្នាំ 2025 រោងចក្រនេះគ្រោងនឹងផលិតឱ្យបានចាប់ពី 300,000 ដល់ 400,000 គ្រឿង/ឆ្នាំ។

ភ្ញៀវដែលបានអញ្ជើញឱ្យចូលរួមក្នុងពិធីសម្ពោធខាងលើ ត្រូវបានអនុញ្ញាតឱ្យបើកបរសាកល្បងម៉ូតូអគ្គិសនីច្រើនម៉ូដែលដែលប្រើប្រាស់បច្ចេកវិទ្យាចុងក្រោយរបស់ កូរ៉េខាងត្បូង ហើយគ្រោងនឹងដាក់លក់ក្នុងទីផ្សារប្រទេសវៀតណាម នាពេលខាងមុខ។

យោងតាមគម្រោង នៅចុងឆ្នាំនេះ ក្រុមហ៊ុន Zio នឹងដាក់លក់ម៉ូតូអគ្គិសនីឆ្លាតវៃគុណភាពខ្ពស់ ដើម្បីឆ្លើយតបទាន់ពេលវេលាទៅតាមតម្រូវការទីផ្សារ៕

November 2, 2022

ក្រុមហ៊ុន Yamaha គ្រោងនឹងដាក់លក់ម៉ូតូអគ្គិសនី Yamaha E01 នៅឆ្នាំក្រោយ

ក្រោយពីបានបង្ហាញនៅក្នុង ពិព័រណ៍ម៉ូតូអន្តរជាតិឥណ្ឌូណេស៊ី (IMOS) 2022 កាលពីខែមេសា 2021 ក្រុមហ៊ុន Yamaha ក៏បានរៀបផែនការដាក់ធ្វើតេស្តម៉ូតូលេខអូតូអគ្គិសនី Yamaha E01 មុននឹងដាក់លក់នៅឆ្នាំក្រោយ។

លទ្ធផលនៃការសាកល្បងបើកបរដំបូងៗរបស់ក្រុម Tribunnews បានបង្ហាញថា ម៉ូតូអគ្គិសនី Yamaha E01 នេះពិតជាគួរឱ្យចាប់អារម្មណ៍។

ក៏ប៉ុន្តែ ក្រុមហ៊ុនជប៉ុន មួយនេះ នឹងមិនប្រញាប់ដាក់លក់ Yamaha E01 ក្នុងទីផ្សារនោះទេ ព្រោះថា ម៉ូតូអគ្គិសនីនេះនឹងត្រូវឆ្លងកាត់ការពិសោធជាច្រើនទៀតនៅ ឥណ្ឌូណេស៊ី ក្នុងរយៈពេលមួយឆ្នាំពេញ។

ក្នុងការពិសោធខាងលើ Yamaha នឹងប្រមូលមតិពីសាធារណជនដែលធ្លាប់សាកល្បងបើកបរ Yamaha E01 មុនពេលផលិតទ្រង់ទ្រាយធំ និងលក់ក្នុងទីផ្សារ។

ចំណុចសំខាន់ៗរបស់ ម៉ូតូលេខអូតូអគ្គិសនី Yamaha E01 រួមមាន រូបរាងបែបអនាគត, ល្បឿន 100 គម/ម៉ោង, ការបើកបរមាន 3 ទម្រង់ (Power, Standard និង Eco), កម្លាំង 8.1 kW, ថ្មមានថាមពល 4.9 kWh, មានទម្រង់បើកបរថយក្រោយ, ការបញ្ចូលថាមពលមាន 3 ជម្រើស (លឿន, ធម្មតា និងចល័ត) ។ល។

November 2, 2022

ឡាវ បង្កើនចំណេះដឹងសម្រាប់ការងាកទៅរកថាមពលកកើតឡើងវិញ ជំនួសថាមពលបំភាយកាបូន

កាលពីថ្ងៃទី 31 តុលា 2022 នៅ រដ្ឋធានីវៀងចន្ទន៍ ក្រសួងថាមពលនិងរ៉ែ បានបើកវគ្គបណ្ដុះបណ្ដាលរយៈពេលខ្លីក្រោមប្រធានបទ «ការតភ្ជាប់ថាមពលជំនួសទៅក្នុងបណ្ដាញបញ្ជូន» (Grid Integration of Renewable Energy) ចាប់ពីថ្ងៃទី 31 តុល ដល់ 30 វិច្ឆិកា 2022។

ពិធីបើកវគ្គខាងលើ មានការចូលរួមរបស់ប្រធាននាយកដ្ឋានផែនការ និងសហប្រតិបត្តិការរបស់ ក្រសួងថាមពលនិងរ៉ែឡាវ និងលោក Dan Heldon ឯកអគ្គរដ្ឋទូតរងអូស្ត្រាលីប្រចាំប្រទេសឡាវ រួមនឹង មន្ត្រីឡាវជាង 40 នាក់ផ្សេងទៀត។

កម្មវិធីបណ្ដុះបណ្ដាលនេះទទួលបានការឧបត្ថម្ភពី រដ្ឋាភិបាលអូស្ត្រាលី សហការជាមួយ សាកលវិទ្យាល័យជាតិអូស្ត្រាលី។ ការបណ្ដុះបណ្ដាលនេះត្រូវបានធ្វើឡើងដើម្បីផ្ដល់ចំណេះដឹង និងបច្ចេកទេសនៅក្នុងការប្ដូរផ្លាស់បន្តិចម្ដងៗទៅរកថាមពលដែលមិនបំភាយឧស្ម័នកាបូន គោលនយោបាយតភ្ជាប់ថាមពលជំនួសទៅក្នុងបណ្ដាញអគ្គិសនី និងគោលនយោបាយកាត់បន្ថយការបំភាយឧស្ម័នក្នុងគ្រប់វិស័យ។

វគ្គបណ្ដុះបណ្ដាលនេះនឹងរួមចំណែកក្នុងការលើកកម្ពស់ប្រភពធនធានមនុស្សសម្រាប់ការអភិវឌ្ឍ និងការប្រើប្រាស់ថាមពលស្អាតដើម្បីសម្រេចបានគោលដៅមិនបំភាយឧស្ម័នកាបូន Net-zero នៅឆ្នាំ 2050៕

November 2, 2022

ហេតុការណ៍ប្រជ្រៀតគ្នាស្លាប់នៅ កូរ៉េខាងត្បូង ៖ សណ្ឋាគារក្បែរ «ផ្លូវមរណៈ» ពង្រីកផ្ទៃដីដោយខុសច្បាប់

ឯកសារសាងសង់បានបង្ហាញថា សណ្ឋាគារ Hamilton ដែលនៅជាប់នឹងកូនផ្លូវក្នុងហេតុការណ៍ប្រជ្រៀតជាន់គ្នាស្លាប់ជាងរយនាក់នៅ Itaewon បានពង្រីកផ្ទៃដីដោយខុសច្បាប់ បណ្ដាលឱ្យផ្លូវកាន់តែចង្អៀត។

សារព័ត៌មាន Yonhap កាលពីថ្ងៃទី 01 វិច្ឆិកា ដកស្រង់ឯកសារសាងសង់ បានឱ្យដឹងថា សណ្ឋាគារ Hamilton បានសាងសង់លម្ហទំហំ 17.2 ម៉ែត្រក្រឡានៅខាងជើងអគារធំដោយខុសច្បាប់។

បរិវេណលម្ហនេះស្ថិតនៅជាប់នឹង «ផ្លូវមរណៈ» ជាទីដែលបានកើតមានហេតុការណ៍ប្រជ្រៀតជាន់គ្នាស្លាប់យ៉ាងតិច 156 នាក់ កាលពីថ្ងៃទី 29 តុលា។ កូនផ្លូវជ្រាលដែលមានភោជនីយដ្ឋាន និងបារជាច្រើននេះ មានប្រវែងប្រហែល 45 ម៉ែត្រ ទទឹងប្រហែល 5 ម៉ែត្រត្រង់ចំណុចទួល និង 3.2 ម៉ែត្រត្រង់ចំណុចជម្រាល។

ផ្ទៃដីដែលសណ្ឋាគារ Hamilton បានពង្រីក បាននាំឱ្យកូនផ្លូវនេះកាន់តែតូចចង្អៀតបន្ថែមទៀត។ អាជ្ញាធរខណ្ឌ Yonsan បានឱ្យដឹងថា បានប្រកាសប្រាប់ខាងសណ្ឋាគារអំពីការរំលោភច្បាប់នេះ និងបានសម្រេចដាក់ពិន័យកាលពីឆ្នាំមុន ប៉ុន្តែ ពួកគេមិនមានសិទ្ធិបង្ខំឱ្យសណ្ឋាគារនេះរុះរើត្រង់ចំណុចពង្រីកខុសច្បាប់នោះឡើយ។

ក្នុងថ្ងៃដដែល អគ្គស្នងការនគរបាលជាតិកូរ៉េខាងត្បូង លោក Yoon Hee-keun បានឱ្យដឹងថា ប៉ូលិសនឹងពិនិត្យលើលទ្ធភាពនៃការរំលោភច្បាប់របស់សណ្ឋាគារ ក៏ដូចជាលទ្ធភាពដែលទាក់ទិនគ្នា រវាងផ្ទៃដីដែលសណ្ឋាគារបានពង្រីក និងហេតុការណ៍ដ៏រន្ធត់នេះ៕

November 2, 2022

អ៊ីឡុន ម៉ាស យកថ្លៃប្រើប្រាស់សេវា Twitter ព្រោះតែ «ត្រូវការទូទាត់ការចំណាយ»

បន្ទាប់ពីរងការរិះគន់ដោយសារតែការយកថ្លៃសេវា 20 ដុល្លារ/ខែ មហាសេដ្ឋី អ៊ីឡុន ម៉ាស និយាយថា លោកត្រូវការយកថ្លៃសេវា Twitter Blue ដើម្បីទូទាត់ការចំណាយ ជំនួសឱ្យការពឹងផ្អែកទៅលើតែការផ្សាយពាណិជ្ជកម្ម។

«ប្រព័ន្ធបែងចែកព្រះអម្ចាស់ និងកសិករបច្ចុប្បន្នរបស់ Twitter តាមរយៈការមាន ឬមិនមានសញ្ញាធិចពណ៌ផ្ទៃមេឃគឺជារឿងផ្ដេសផ្ដាស។ អំណាចសម្រាប់មនុស្សគ្រប់គ្នា។ ពណ៌ផ្ទៃមេឃមានតម្លៃ 8 ដុល្លារអាម៉េរិក/ខែ» លោក ម៉ាស បង្ហោះសារដូច្នេះកាលពីថ្ងៃទី 02 វិច្ឆិកា។

ប្រតិកម្មរបស់លោក ម៉ាស ត្រូវបានលើកឡើងបន្ទាប់ពីមានព័ត៌មានថា Twitter គ្រោងនឹងយកថ្លៃសេវា 20 ដុល្លាររាល់ខែចំពោះគណនី Twitter Blue ដែលចុះឈ្មោះថ្មី។ Blue គឺជាគណនីត្រូវបង់ថ្លៃសម្រាប់អ្នកប្រើប្រាស់ Twitter ដែលបង្ហាញតាមរយៈអ៊ីនធើហ្វេស (interface) ពណ៌ផ្ទៃមេឃនៅពេលចូលទៅប្រើប្រាស់។ ម្ចាស់គណនីប្រភេទនេះនឹងទទួលបានសិទ្ធិបន្ថែមមួយចំនួនដូចជា ការកែប្រែសារ មើលបញ្ជីអត្ថបទដំបូងៗរបស់អ្នកដែលពួកគេតាមដាន សិទ្ធិប្រើប្រាស់ដោយមិនមានការរំខានពីការផ្សាយពាណិជ្ជកម្ម ការប្រើប្រាស់រូបសំណាង NFT ។ល។

តម្លៃសេវា 20 ដុល្លារ បានទទួលការរិះគន់ និងការមន្ទិលច្រើនពីអ្នកលេង Twitter ក្នុងនោះមានទាំងអ្នកនិពន្ធល្បីឈ្មោះ ជនជាតិអាម៉េរិក Stephen King ដែលមានអ្នកតាមដានជិត 7 លាននាក់នៅលើបណ្ដាញសង្គមនេះ។ «20 ដុល្លារអាម៉េរិកក្នុង 1 ខែ គឺគ្រាន់តែដើម្បីរក្សាសញ្ញាធិចពណ៌ផ្ទៃមេឃនៅលើគណនីរបស់ខ្ញុំ?» លោក King ដាក់ជាសំណួរដូច្នេះ។

ក្រោយមក លោក ម៉ាស បានឆ្លើយតបថា «ខ្ញុំត្រូវបានទូទាត់ការចំណាយតាមរយៈវិធីណាមួយ។ Twitter មិនអាចពឹងផ្អែកទៅលើតែការផ្សាយពាណិជ្ជកម្មនោះទេ។ ដូច្នេះ តម្លៃ 8 ដុល្លារ វាយ៉ាងណាដែរ?»។

នៅក្នុងសារជាច្រើនបន្តបន្ទាប់មកទៀតនៅក្នុងថ្ងៃទី 02 វិច្ឆិកា លោក ម៉ាស បន្តរម្លឹកដល់តម្លៃ 8 ដុល្លារ និងចែករំលែកផែនការថ្មី។ មហាសេដ្ឋីរូបនេះឱ្យដឹងថា អ្នកចុះឈ្មោះ Blue នឹងទទួលបានសិទ្ធិអាទិភាពទាក់ទងនឹងការស្វែងរក ទទួលបានជំនួយខ្លឹមសារសំឡេង និងវីដេអូខ្នាតវែងជាង ហើយការបង្ហាញខ្លឹមសារផ្សាយពាណិជ្ជកម្មមានកម្រិតតិចជាងពាក់កណ្ដាលធៀបនឹងគណនីមិនគិតថ្លៃ។ ចំណែកអ្នកធ្វើវីដេអូ អ្នកនិពន្ធដែលធ្វើការនៅលើបណ្ដាញសង្គមនេះក៏នឹងត្រូវបានបន្ធូរបន្ថយថ្លៃសេវា។ «ប្រការនេះនឹងនាំមកនូវប្រភពចំណូលមួយដើម្បីផ្ដល់រង្វាន់ដល់អ្នកផលិតខ្លឹមសារ» លោក ម៉ាស បន្ថែមដូច្នេះ។

ក្នុង tweet ថ្មីបំផុត លោក ម៉ាស ថែមទាំងបានរម្លឹកអំពីការតវ៉ានៅលើបណ្ដាញសង្គមនេះ។ យោងតាមលោក ម៉ាស គ្រប់គ្នា «អាចតវ៉ាបានគ្រប់ពេល ប៉ុន្តែនឹងត្រូវចំណាយ 8 ដុល្លារ»។ យ៉ាងនេះក្ដី លោក ម៉ាស មិនបាននិយាយច្បាស់ថា ការចំណាយនេះសម្រាប់តែការតវ៉ាម្ដង ឬច្រើនដង/ថ្ងៃ ឬប្រចាំខែនោះទេ។

យោងតាម CNN ឥរិយាបថខាងលើរបស់លោក ម៉ាស បង្ហាញថា គាត់កំពុងផ្ដោតយ៉ាងខ្លាំងទៅលើការដោះស្រាយបញ្ហាបង្កើនប្រាក់ចំណូល និងចំណេញសម្រាប់ Twitter ដែលបណ្ដាញសង្គមនេះបានខាតអស់មួយរយៈពេលមកហើយ៕

November 2, 2022

កូរ៉េខាងត្បូង បាញ់មីស៊ីលឆ្លងកាត់ដែនសមុទ្រជាមួយ កូរ៉េខាងជើង

កូរ៉េខាងត្បូង ប្រកាសថា បានបាញ់មីស៊ីល 3 គ្រាប់សំដៅទៅភាគខាងជើងនៃដែនទឹកជាមួយនឹង កូរ៉េខាងជើង ដើម្បីឆ្លើយតបទៅនឹងករណី ទីក្រុងព្យុងយ៉ាង បាញ់មីស៊ីលប្លោង 10 គ្រាប់នាពេលកន្លង។

«យន្តហោះចម្បាំង F-15K និង KF-16 របស់ កូរ៉េខាងត្បូង បានបាញ់មីស៊ីលអាកាសប្រឆាំងដីចំគោលដៅកម្រិតខ្ពស់ទៅកាន់តំបន់សមុទ្រភាគខាងជើងនៃបន្ទាត់ព្រំដែនភាគខាងជើង (NLL) ដើម្បីឆ្លើយតបទៅនឹងការដែល កូរ៉េខាងជើង បាញ់មីស៊ីប្លោងរយៈចម្ងាយជិត» អគ្គសេនាធិការរួមកូរ៉េខាងត្បូង (JCS) ឱ្យដឹងនាថ្ងៃនេះដូច្នេះ ប៉ុន្តែមិនបានបង្ហើបអំពីប្រភេទរបស់មីស៊ីលដែលទើបបានបាញ់។

មុននោះ JCS បានប្រកាសថា កូរ៉េខាងជើង នាថ្ងៃទី 02 វិច្ឆិកា បានបាញ់មីស៊ីលប្លោងជាង 10 គ្រាប់ទៅកាន់តំបន់សមុទ្រភាគខាងកើតរបស់ ឧបទ្វីបកូរ៉េ ក្នុងនោះមាន 1 គ្រាប់បានហោះរំលង NLL មុនពេលធ្លាក់ទៅក្នុងសមុទ្រ និង 1 គ្រាប់ទៀតធ្លាក់នៅក្នុងតំបន់សមុទ្រដែលមានចម្ងាយពីទីក្រុង Sokcho ប្រហែល 57 គីឡូម៉ែត្រទៅទិសអាគ្នេយ៍។

គ្រាប់មីស៊ីលទី 3 របស់ កូរ៉េខាងជើង ហោះឆ្ពោះទៅកាន់កោះ Ulleungdo មុនពេលធ្លាក់ក្នុងដែនសមុទ្រអន្តរជាតិ។ មីស៊ីល 1 គ្រាប់នេះបានធ្វើឱ្យក្រុមមន្ត្រីនៅ កូរ៉េខាងត្បូង ត្រូវប្រកាសអាសន្ន និងបញ្ជាឱ្យឈ្លៀសមនុស្សនៅលើកោះនេះ។

ទីក្រុងសេអ៊ូល បានប្រកាសថា ការបាញ់មីស៊ីលរបស់ខ្លួននេះគឺចង់បង្ហាញថា កូរ៉េខាងត្បូង មានសមត្ថភាពគ្រប់គ្រាន់ក្នុងការវាយប្រហារសងសឹកទៅលើរាល់គោលដៅនៅ កូរ៉េខាងជើង និងចំគោលដៅកម្រិតខ្ពស់បំផុត។

សម្មភាពយោធារបស់ភាគីនានា កំពុងតែធ្វើឱ្យ ឧបទ្វីបកូរ៉េ «ឡើងកម្ដៅ» នាប៉ុន្មានខែចុងក្រោយនេះ។ កូរ៉េខាងជើង បានបាញ់ប្លោងមីស៊ីលជាច្រើនលើក ដោយលើកមូលហេតុថា ដើម្បីឆ្លើយតបនឹងសមយុទ្ធយោធារបស់ អាម៉េរិក កូរ៉េខាងត្បូង និងជប៉ុន។ ចំណែក សហរដ្ឋអាម៉េរិក និងសម្ព័ន្ធមិត្ត ក៏បានថ្កោលទោសករណីបាញ់ប្លោងមីស៊ីលរបស់ ព្យុងយ៉ាង ដោយចាត់ទុកថា នោះគឺជាសកម្មភាពបង្កហេតុ និងនាំឱ្យមានអស្ថិរភាព ព្រមទាំងបង្កើនការធ្វើសមយុទ្ធរួម៕

November 2, 2022

Author: សឿន សំណាង