សឿន សំណាង - La Reine Media

មហាក្សត្រអង់គ្លេស និងមហេសី ត្រូវគេគប់នឹងស៊ុតនៅកណ្ដាលដងផ្លូវ

មហាក្សត្រអង់គ្លេស ព្រះអង្គម្ចាស់ Charles ទីបី និងមហេសី Camilla ត្រូវបានគេគប់នឹងស៊ុត ពេលទ្រង់កំពុងយាងចូលរួមពិធីប្រពៃណីនៅតំបន់ York។

វីដេអូដែលត្រូវបានគេចែករំលែកលើបណ្ដាញសង្គមកាលពីថ្ងៃទី 09 វិច្ឆិកា បង្ហាញថា ស៊ុតចំនួន 4 គ្រាប់ត្រូវបានគប់សំដៅលើមហាក្សត្រ Charles ទីបី ដែលមានព្រះជន្ម 73 វស្សា និងមហេសី Camilla ព្រះជន្ម 75 វង្សា នៅពេលទ្រង់កំពុងយាងចូលរួមពិធីប្រពៃណីមួយនៅតំបន់ York ភាគខាងជើងប្រទេស។

មហាក្សត្រអង់គ្លេស និងមហេសី ហាក់មិនបានរងផលប៉ះពាល់នៅក្នុងហេតុការណ៍នេះ ដោយទ្រង់នៅតែបន្តសន្ទនាជាមួយប្រជាពលរដ្ឋ។ ប៉ុន្តែ អង្គរក្សបានបាំងការពារ និងយាងទ្រង់ចូលទៅខាងក្នុង។ មនុស្សម្នានៅជុំវិញក៏បានស្រែកឡើង ប្រឆាំងនឹងសកម្មភាពគប់ស៊ុតនេះ។

ប៉ូលិសបានឱ្យដឹងថា កំលោះវ័យ 23 ឆ្នាំម្នាក់ត្រូវបានចាប់ខ្លួនព្រោះជាប់សង្ស័យពីបទបំពានការកំណត់អំពីសណ្ដាប់ធ្នាប់សាធារណៈ។ រាជវាំងអង់គ្លេស មិនទាន់បញ្ចេញប្រតិកម្មចំពោះហេតុការណ៍នេះនៅឡើយ។

នេះមិនមែនជាលើកទីមួយឡើយដែលសមាជិករាជវង្សអង់គ្លេស រងការប្រឆាំងជាសាធារណៈពីប្រជាពលរដ្ឋ។ ក្នុងឆ្នាំ 2022 នេះ រថយន្តរបស់មហាក្សត្រី Elizabeth ក៏ធ្លាប់ត្រូវគេគប់នឹងស៊ុត នៅពេលទ្រង់យាងធ្វើទស្សនកិច្ចនៅ Nottingham ផងដែរ៕

November 10, 2022

ស្ថានភាពវីរុសកូវីដ-19 នៅ កម្ពុជា ក្នុងអំឡុង 24 ម៉ោងកន្លង

កម្ពុជា បានរកឃើញអ្នកឆ្លងកូវីដ-19 ករណីថ្មី ចំនួន 01 នាក់ ក្នុងអំឡុង 24 ម៉ោង នៃថ្ងៃទី 04 ខែវិច្ឆិកា ឆ្នាំ 2022។

ក្នុងអំឡុងពេលដដែល ក៏មានអ្នកជំងឺកូវីដ-19 ចំនួន 0 នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី 05 ខែវិច្ឆិកា ឆ្នាំ 2022 កម្ពុជា មានអ្នកឆ្លងកូវីដ-១៩ សរុប ៖ 137,996 នាក់, អ្នកជាសះស្បើយសរុប ៖ 134,933 នាក់ និងអ្នកស្លាប់សរុប ៖ 3,056 នាក់។

November 5, 2022

មហាសេដ្ឋី អ៊ីឡុន ម៉ាស ៖ ប្រាក់ចំណូលរបស់ Twitter ថយចុះខ្លាំង «ព្រោះអតិថិជនផ្អាកការផ្សាយពាណិជ្ជកម្ម»

លោក អ៊ីឡុន ម៉ាស ដែលជាម្ចាស់ថ្មីរបស់បណ្ដាញសង្គម Twitter កាលពីថ្ងៃទី 04 វិច្ឆិកា បានឱ្យដឹងថា បណ្ដាញសង្គមនេះកំពុងរង «ការបាត់បង់ប្រាក់ចំណូលយ៉ាងច្រើន» ប៉ុន្តែមិនបានបង្ហាញតួលេខជាក់ស្ដែង។

ក្នុងសារនៅលើគណនី Twitter ផ្ទាល់ខ្លួន អ្នកមានជាងគេក្នុងពិភពលោកបានទម្លាក់កំហុសទៅលើ «ក្រុមសកម្មជនដែលបង្កសម្ពាធលើបណ្ដាក្រុមហ៊ុន» ធ្វើឱ្យពួកគេឈប់ផ្សាយពាណិជ្ជកម្មលើ Twitter។ លោក ម៉ាស អះអាងថា បណ្ដាញសង្គមនេះមិនទាន់ប្ដូរផ្លាស់យុទ្ធសាស្ត្រចាប់ពិរុទ្ធខ្លឹមសារ ហើយ Twitter បានធ្វើ «រឿងគ្រប់យ៉ាងដែលអាចបំពេញចិត្តក្រុមសកម្មជន» ប៉ុន្តែមិនបានសម្រេច។

ទោះជាយ៉ាងនេះក្ដី មហាសេដ្ឋីអាម៉េរិករូបនេះ មិនបានលើកឡើងនូវតួលេខជាក់លាក់អំពីប្រាក់ចំណូលដែល Twitter បានបាត់បង់នោះទេ ហើយក៏មិនបានបង្ហាញភស្ដុតាងដែលថា ការដកខ្លួនរបស់ក្រុមអ្នកផ្សាយពាណិជ្ជកម្មគឺដោយសារការដាក់សម្ពាធពីក្រុមសកម្មជននោះដែរ។

ចាប់តាំងពីម្ចាស់ Tesla បានចូលមកគ្រប់គ្រង Twitter កាលពីថ្ងៃទី 28 តុលា បណ្ដាញសង្គមនេះបានបញ្ឈប់បុគ្គលិកប្រមាណជា 50%។ ប៉ុន្មានថ្ងៃកន្លងទៅនេះ ក្រុមហ៊ុនជាច្រើនបានប្រកាសផ្អាកការផ្សាយពាណិជ្ជកម្មនៅលើ Twitter ដើម្បីវាយតម្លៃចំពោះការផ្លាស់ប្ដូរនៅពេលលោក ម៉ាស ចូលគ្រប់គ្រង។

យោងតាមទិន្នន័យរបស់ MediaRadar ចំនួនអតិថិជនដែលផ្សាយពាណិជ្ជកម្មលើបណ្ដាញសង្គមនេះបានថយពី 3,900 ស្ថាប័នក្នុងខែឧសភា ចុះមកនៅត្រឹម 2,300 ស្ថាប័នក្នុងខែសីហា។ ឈានចូលខែកញ្ញា តួលេខនេះបែរជាកើនឡើង 2,900 ស្ថាប័ន៕

November 5, 2022

ក្រោយរញ្ជួយដីជាង 40 លើកក្នុងអំឡុង 24 ម៉ោង ក្វាតេម៉ាឡា ស្នើឱ្យប្រជាជន «ត្រៀមបង្វេចសម្រាប់ជម្លៀស»

ក្នុងរង្វង់ 24 ម៉ោងកន្លង ប្រទេសក្វាតេម៉ាឡា (Guatemala) មានគ្រោះរញ្ជូនធរណីជាង 40 លើក ធ្វើឱ្យអាជ្ញាធរព្រួយបារម្ភអំពីគ្រោះមហន្តរាយបន្ទាប់។

ប្រភពព័ត៌មាននៅ អាម៉េរិកកណ្ដាល បានរាយការណ៍ថា វិទ្យាស្ថានស្រាវជ្រាវរញ្ជួយដី ភ្នំភ្លើង និងឧតុនិយមជាតិក្វាតាម៉ាឡា បានកត់ត្រាអំពីគ្រោះរញ្ជូយដីជាង 40 លើក ក្នុងរយៈពេល 24 ម៉ោងកន្លងនៅក្នុងប្រទេសការ៉ាបៀនមួយនេះ។

យោងតាមស្ថាប័នខាងលើ ករណីរញ្ជួយដីកម្រិតធំជាងគេគឺចាប់ពី 4.1 ទៅ 5.4 រិចទ័រ។ ចំណែកអាជ្ញាធរសម្របសម្រួលជាតិដើម្បីការកាត់បន្ថយគ្រោះមហន្តរាយ និងបណ្ដាអង្គភាពជួយសង្គ្រោះ បានឱ្យដឹងថា ពុំមានករណីស្លាប់នៅក្នុងហេតុការណ៍រញ្ជួយធរណីខាងលើនោះទេ។

ក៏ប៉ុន្តែ នៅចំពោះហានិភ័យកើតមានគ្រោះរញ្ជួយដីដែលអាចនឹងមានកម្រិតធ្ងន់ជាងនេះ ក្រុមមន្ត្រីរបស់ ក្វាតាម៉ាឡា បានណែនាំឱ្យប្រជាពលរដ្ឋរៀបផែនការសម្រាប់ជម្រៀស។

ប្រជាពលរដ្ឋត្រូវត្រៀម «បង្វេច 72 ម៉ោង» ដែលក្នុងនោះមានទឹកផឹក អាហារដែលអាចទុកបានយូរ លិខិតស្នាមផ្ទាល់ខ្លួន ថ្នាំពេទ្យ សម្លៀកបំពាក់ ពិល វិទ្យុដើរដោយថ្មផ្ទុកអគ្គិសនី។ល។

November 5, 2022

សេតវិមានបញ្ចេញកញ្ចប់ថវិកា 185 ពាន់លានដុល្លារ ដើម្បីវិនិយោគលើការស្ដារហេដ្ឋារចនាសម្ព័ន្ធ

អ្នកសម្របសម្រួលផ្នែកហេដ្ឋារចនាសម្ព័ន្ធរបស់ សេតវិមាន បានលើកឡើងថា រដ្ឋាភិបាលអាម៉េរិក បានកំណត់យកគម្រោងចំនួន 6,200 ដែលត្រូវការដើមទុន សម្រាប់ការស្ដារហេដ្ឋារចនាសម្ព័ន្ធ។

ប្រកាសកាលពីថ្ងៃទី 04 វិច្ឆិការបស់ សេតវិមាន បានឱ្យដឹងថា សហរដ្ឋអាម៉េរិក ទើបតែបញ្ចេញប្រាក់ 185 ពាន់លានដុល្លារពីច្បាប់ហេដ្ឋារចនាសម្ព័ន្ធតម្លៃជាង 1 ទ្រីលាន (1,000,000,000,000.00) ដុល្លារអាម៉េរិក ដើម្បីវិនិយោគទៅលើការជួសជុលផ្លូវ ពង្រីកបណ្ដាញអ៊ីនធើណិត ប្ដូរបំពង់បង្ហូរស្អាត និងស្ដារបណ្ដាញអគ្គិសនី។

នៅចំពោះមុខក្រុមអ្នកយកព័ត៌មាន អ្នកសម្របសម្រួលផ្នែកហេដ្ឋារចនាសម្ព័ន្ធរបស់ សេតវិមាន Mitch Landrieu លើកឡើងថា រដ្ឋាភិបាលអាម៉េរិក បានកំណត់យកគម្រោងចំនួន 6,200 ដែលត្រូវការដើមទុន និងជួលបុគ្គលិករដ្ឋថ្មីជាង 3,000 នាក់ ដើម្បីតាមដានការចំណាយសម្រាប់គម្រោងទាំងនេះ។

លោក Mitch Landrieu បានអះអាងថា «រដ្ឋាភិបាលបានបញ្ចេញប្រាក់ប្រហែល 1/5 (នៃកញ្ចប់ថវិកាសម្រាប់ហេដ្ឋារចនាសម្ព័ន្ធតម្លៃជាង 1 ទ្រីលាន) នៅក្នុងឆ្នាំដំបូង»។

សេចក្ដីព្រាងច្បាប់ហេដ្ឋារចនាសម្ព័ន្ធតម្លៃជាង 1 ទ្រីលានដុល្លារ ត្រូវបាន ប្រធានាធិបតី ចូ បៃដិន ចុះហត្ថលេខាកាលពីខែវិច្ឆិកា 2021។ នេះគឺជាច្បាប់ដែលត្រូវបានអនុម័តដើម្បីស្ដារហេដ្ឋារចនាសម្ព័ន្ធទ្រង់ទ្រាយធំបំផុតរបស់ សហរដ្ឋអាម៉េរិក ក្នុងរង្វង់ជាងកន្លះសតវត្សរ៍កន្លងមកនេះ។ ច្បាប់នេះអនុញ្ញាតឱ្យរដ្ឋវិនិយោគទៅលើបណ្ដាញផ្លូវថ្នល់ ស្ពាន ផ្លូវដែក ប្ដូរបំពង់បង្ហូរទឹកស្អាត បង្កើតបណ្ដាញបញ្ចូលថាមពលថ្មសម្រាប់យានយន្តអគ្គិសនី និងពង្រីកប្រព័ន្ធអ៊ីនធើណិត៕

November 5, 2022

ប៊ុលហ្ការី ចំណាយ 1.32 ពាន់លានដុល្លារ ទិញយន្តហោះចម្បាំងរបស់ សហរដ្ឋអាម៉េរិក

សភាប៊ុលហ្គារី បានយល់ព្រមទិញយន្តហោះចម្បាំង F-16V របស់ សហរដ្ឋអាម៉េរិក ចំនួន 8 គ្រឿងបន្ថែមទៀត អមជាមួយនឹងអាវុធ ដែលទាំងអស់នេះមានតម្លៃសរុប 1.32 ពាន់លានដុល្លារអាម៉េរិក។

ក្រោយការបោះឆ្នោតកាលពីថ្ងៃទី 04 វិច្ឆិកា ដែលទទួលបានសន្លឹកឆ្នោតគាំទ្រ 162 សំឡេង, ប្រឆាំង 49 សំឡេង និងអនុបវាទ 11 សំឡេង សភាប៊ុលហ្គារី យល់ព្រមទិញយន្តហោះចម្បាំង F-16V របស់ក្រុមហ៊ុនអាម៉េរិក Lockheed Martin ចំនួន 8 គ្រឿង។

ប៊ុលហ្គារី មុននោះបានចំណាយប្រាក់ 1.67 ពាន់លានដុល្លារក្នុងការទិញយន្តហោះចម្បាំង F-16V ចំនួន 8 គ្រឿងរួចហើយ ដោយ Lockheed Martin សន្យាថា នឹងប្រគល់ចាប់ពីឆ្នាំ 2023។

ប៊ុលហ្គារី បានចូលជាសមាជិកណាតូ កាលពីឆ្នាំ 2004។ បច្ចុប្បន្នប្រទេសនេះកំពុងរកវិធីទិញយន្តហោះមកជំនួសក្រុមហោះហើរ MiG-29 ដែលមានតាំងពីសម័យសូវៀត។ ប៊ុលហ្គារី កំពុងប្រើប្រាស់យន្តហោះ MiG-29UB ចំនួន 11 គ្រឿង ក្នុងនោះមាន 2 គ្រឿងទុកសម្រាប់ការហ្វឹកហ្វឺន។

ក្រោយពីសង្គ្រោះនៅ អ៊ុយក្រែន បានផ្ទុះឡើង ប៊ុលហ្គារី ក៏មិនអាចទិញគ្រឿងបន្លាស់ និងម៉ាស៊ីនសម្រាប់ MiG-29 របស់ខ្លួនពី រុស្ស៊ី។ ប៊ុលហ្គារី កំពុងចរចាទិញម៉ាស៊ីន MiG-29 ពី ប៉ូឡូញ និងបញ្ជូនយន្តហោះចម្បាំង 6 គ្រឿងទៅកាន់ប្រទេសនេះដើម្បីជួសជុល។

ដើម្បីការពារដែនអាកាស ប៊ុលហ្គារី កំពុងរកវិធីជួល ឬទិញយន្តហោះចម្បាំងមួយទឹកពី ស៊ុយអែត ឬ បារាំង ខណៈដែលយន្តហោះយោធារបស់ អេស្ប៉ាញ ប៉ូឡូញ និង សហរដ្ឋអាម៉េរិក ផ្លាស់វេនគ្នាជួយការពារដែនអាកាសរបស់ ប៊ុលហ្គារី។ តាមផែនការ នៅពាក់កណ្ដាលខែវិច្ឆិកាខាងមុខ យន្តហោះចម្បាំង Eurofighter ចំនួន 6 គ្រឿង រួមនឹងទាហាន 130 នាក់របស់ ណាតូ នឹងទៅបំពេញបេសកកម្មថ្មីនៅ ប៊ុលហ្គារី។

សភាប៊ុលហ្គារី កាលពីថ្ងៃទី 03 វិច្ឆកា បានស្នើឱ្យរដ្ឋាភិបាលប្រទេសនេះ ពិនិត្យលទ្ធភាពក្នុងការបញ្ជូនឧបករណ៍យោធាទៅកាន់ អ៊ុយក្រែន។ រដ្ឋាភិបាលប៊ុលហ្គារី នឹងមានពេល 1 ខែដើម្បីលើកជាសំណើមកកាន់សភាស្ដីពីឧបករណ៍យោធាដែលអាចបញ្ជូនឱ្យ អ៊ុយក្រែន ដោយមិនប៉ះពាល់ដល់សមត្ថភាពការពារជាតិរបស់ខ្លួន៕

November 5, 2022

ក្រុមហ៊ុនចិន បញ្ជាទិញយន្តហោះ Airbus 140 គ្រឿង តម្លៃ 17 ពាន់លានដុល្លារ

ក្រុមហ៊ុនផលិតយន្តហោះ Airbus បានឱ្យដឹងថា យន្តហោះ 140 គ្រឿងនេះសុទ្ធតែស្ថិតក្នុងការសន្យាទិញដែលមានពីមុន និងស្ថិតក្នុងការបញ្ជាទិញ 292 គ្រឿងដែលបានប្រកាសកាលពីដើមឆ្នាំ។

ក្រុមហ៊ុន China Aviation Supply (CAS) Holding របស់ ប្រទេសចិន បានចុះហត្ថលេខាទិញយន្តហោះ 140 គ្រឿងរបស់ Airbus (បារាំង) ក្នុងតម្លៃប្រហែល 17 ពាន់លានដុល្លារអាម៉េរិក កាលពីថ្ងៃទី 04 វិច្ឆិកា 2022។

ក្រុមហ៊ុនផលិតយន្តហោះ Airbus បានឱ្យដឹងថា យន្តហោះទាំងនេះសុទ្ធតែស្ថិតក្នុងការសន្យាទិញដែលមានពីមុន ហើយមួយចំនួនស្ថិតក្នុងការបញ្ជាទិញយន្តហោះប្រតិកម្ម 292 គ្រឿងដែលបានប្រកាសកាលពីដើមឆ្នាំ 2022។ ការចុះហត្ថលេខាលើកិច្ចព្រមព្រៀងកាលពីម្សិលមិញនេះ ត្រូវបានធ្វើឡើងស្របពេលដែលមានដំណើរទស្សនកិច្ចនៅ ប្រទេសចិន របស់ នាយករដ្ឋមន្ត្រីអាល្លឺម៉ង់ Olaf Scholz។

ក្រុមហ៊ុនអាកាសចរណ៍ធំៗចំនួន 3 របស់ រដ្ឋចិន រួមមាន Air China, China Eastern និង China Southern កាលពីខែកក្កដា បានសន្យាថាទិញយន្តហោះប្រតិកម្មសរុបចំនួន 292 គ្រឿងរបស់ Airbus ដែលនេះគឺជាការបញ្ជាទិញធំជាងគេនាអំឡុងពេលនោះរបស់ ប្រទេសចិន រាប់ចាប់តាំងពីវិបត្តិកូវីដបានផ្ទុះឡើង។

CAS បានឱ្យដឹងថា កិច្ចព្រមព្រៀងទិញយន្តហោះកាលពីម្សិលមិញ រួមមានយន្តហោះស៊េរី A320 ចំនួន 132 គ្រឿង និង យន្តហោះស៊េរី A350 ចំនួន 8 គ្រឿង៕

November 5, 2022

ប្រទេសចិន សាងសង់ផ្លូវដែកល្បឿនលឿនប្រវែង 76 គីឡូម៉ែត្រឆ្លងកាត់សមុទ្រ

ផ្លូវដែកល្បឿនលឿនថ្មីដែលនឹងមានស្ពានទំហំធំ និងមធ្យមចំនួន 36 កន្លែង, រូងក្រោមដី 17 កន្លែង និងអាចបើកបរក្នុងល្បឿន 250 គីឡូម៉ែត្រ/ម៉ោង ត្រូវបានសម្ពោធបើកការដ្ឋានកាលពីថ្ងៃទី 03 វិច្ឆិកា 2022។

ផ្លូវដែកល្បឿនលឿនឆ្លងកាត់សមុទ្រ Yong-Zhou នឹងតភ្ជាប់បណ្ដាទីក្រុង Ningbo និង Zhoushan នៅក្នុងខេត្ត Zhejiang នេះបើតាមក្រុមហ៊ុនសិក្សា និងស្ថាបត្យកម្មផ្លូវដែកចិន Siyuan។

នៅតាមបណ្ដោយផ្លូវដែកប្រវែងជាង 76 គីឡូម៉ែត្រនេះ នឹងមានស្ពានធំ និងមធ្យមចំនួន 36 ស្ពាន រួមនឹងរូងក្រោមដីចំនួន 17 កន្លែង។ បណ្ដាស្ពាន និងរូងក្រោមដីនឹងមានចំណែករហូតដល់ជាង 90% នៃប្រវែងសរុបរបស់ផ្លូវដែក។ ផ្លូវដែកល្បឿន 250 គីឡូម៉ែត្រ/ម៉ោង និងមានស្ថានីយចំនួន 7 នេះ នឹងត្រូវបានសាងសង់ឆ្លងកាត់ផ្លូវទឹកចំនួន 4 រួមមាននៅតំបន់ Jintang, Xihoumen, Taoyaomen និង Fuchimen។

តាមគម្រោង ផ្លូវដែកនេះនឹងមានរូងក្រោមសមុទ្រប្រវែងជាង 16 គីឡូម៉ែត្រនៅត្រង់កំណាត់ផ្លូវក្រោមទឹក Jintang។ នៅឯកំណត់ផ្លូវក្រោមទឹកនៅ Xihoumen ក្រុមហ៊ុននឹងសាងសង់ស្ពានថ្មើរជើង-ផ្លូវដែកប្រវែងជាង 1.5 គីឡូម៉ែត្រ។ ហេដ្ឋារចនាសម្ព័ន្ធនៃគម្រោងទាំងមូលគ្រោងនឹងស្ថាបនារួចរាល់ក្នុងរយៈពេល 6 ឆ្នាំទៀត។

នៅពេលសាងសង់រួចរាល់ ផ្លូវដែកល្បឿនលឿននេះនឹងជួយកាត់បន្ថយពេលវេលានៃការធ្វើដំណើររវាង Ningbo និង Zhoushan ចុះមកនៅត្រឹម 30 នាទី ដែលប្រហាក់ប្រហែលនឹង 1/3 នៃពេលវេលាធ្វើដំណើរនាបច្ចុប្បន្ន។ ចំណែកការធ្វើដំណើរ 4.5 ម៉ោងតាមឡានក្រុង ឬ 2.5 ម៉ោងតាមឡានផ្ទាល់ខ្លួន រវាងក្រុងរដ្ឋបាល Hangzhou របស់ខេត្ត Zhejiang និងក្រុង Zhoushan ក៏ត្រូវចុះមកនៅត្រឹម 80 នាទី។

យោងតាម CGTN ផ្លូវដែក Yong-Zhou ដែលស្ថិតក្នុងផែនការសាងសង់ «រង្វង់ចរាចរណ៍ផ្លូវដែកល្បឿនលឿនមួយម៉ោង» នៅក្នុងខេត្ត Zhejiang នេះក៏នឹងជួយពន្លឿនដំណើរការបញ្ចូល Zhoushan និង Ningbo ទៅក្នុងខ្សែក្រវាត់សេដ្ឋកិច្ចទន្លេ Yangtze របស់ ប្រទេសចិន ផងដែរ៕

November 5, 2022

បាតុភូតចន្ទគ្រាសទាំងមូលលើកចុងក្រោយក្នុងឆ្នាំនេះនឹងកើតឡើងសប្ដាហ៍ក្រោយ

ចន្ទគ្រាសមួយផ្នែកនឹងចាប់ផ្ដើមកើតឡើងនៅវេលាម៉ោង 16 និង 09 នាទី ថ្ងៃទី 08 វិច្ឆិកា 2022 (ម៉ោងនៅ ភ្នំពេញ) និងបាតុភូតចន្ទគ្រាសទាំងមូលនឹងកើតឡើងនៅម៉ោង 17 និង 17 នាទី ហើយអូសបន្លាយពេលប្រហែល 85 នាទី។

ចន្ទគ្រាសមួយផ្នែកនៅថ្ងៃទី 08 វិច្ឆិកា អាចមើលឃើញពី អ៊ីស្លង់ បណ្ដាតំបន់នៅ អាម៉េរិកខាងត្បូង អាស៊ីខាងត្បូង អាស៊ីកណ្ដាល និង រុស្ស៊ី។ ចំណែកចន្ទគ្រាសទាំងមូលនឹងអាចមើលឃើញនៅតំបន់ អាម៉េរិកខាងជើង និងតំបន់ជាច្រើននៅ អាម៉េរិកខាងត្បូង ទ្វីបអាស៊ី អូស្ត្រាលី និង នូវែលសេឡង់។

ក្នុងបាតុភូតនេះ យើងក៏អាចមើលឃើញពិភពទី 7 គឺ អ៊ុយរ៉ានុស (Uranus) បង្ហាញខ្លួននៅក្បែរព្រះចន្ទដែលត្រូវបាំងដោយស្រមោលផែនដី។ នៅតំបន់មួយចំនួនរបស់ អាស៊ី រួមមាន ហុងកុង ជាដើម ពេលខ្លះភពអ៊ុយរ៉ានុស នឹងលាក់ខ្លួនពីក្រោយព្រះចន្ទក្នុងពេលចន្ទគ្រាសទាំងស្រុង។

នេះនឹងជាបាតុភូតចន្ទគ្រាសទីពីរ ហើយក៏ជាលើកចុងក្រោយនៅក្នុងឆ្នាំនេះ។ ចន្ទគ្រាសមុននេះបានកើតឡើងកាលពីថ្ងៃទី 16 ឧសភា។ ឆ្នាំ 2023 ក៏នឹងមានបាតុភូតចន្ទគ្រាសចំនួន 2 លើក គឺនៅក្នុងខែឧសភា និងខែតុលា។

បាតុភូតចន្ទគ្រាសកើតឡើងនៅពេលផែនដីគោចរនៅចន្លោះព្រះចន្ទ និងព្រះអាទិត្យ។ ពេលនោះ ផែនដីនឹងជះស្រមោលឡើងទៅលើព្រះចន្ទ។ ស្រមោលរបស់ផែនដីអាចបាំងទាំងមូល (ចន្ទគ្រាសទាំងមូល) ឬមួយផ្នែក (ចន្ទគ្រាសមួយផ្នែក) នៃពន្លឺរបស់ព្រះអាទិត្យ បណ្ដាលឱ្យព្រះចន្ទត្រូវងងឹត៕

November 4, 2022

គម្រោងសាងសង់រោងចក្រថ្មី ផលិតកាបូប និងកេសកាតុង នៅ ខេត្តកណ្ដាល និងកំពង់ស្ពឺ ទទួលបានការអនុញ្ញាត

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគចំនួនពីរ តាមសំណើសុំវិនិយោគរបស់ក្រុមហ៊ុន នេះបើតាមទំព័របណ្ដាញសង្គមរបស់ ក្រុមប្រឹក្សាអភិវឌ្ឍន៍កម្ពុជា ចេញផ្សាយនារសៀលថ្ងៃទី 04 វិច្ឆិកា 2022។

ក្រុមហ៊ុនវិនិយោគទាំងនេះដែលរួមមាន ក្រុមហ៊ុន «NEW SHUI YAT (CAMBODIA) CO., LTD និងក្រុមហ៊ុន KANJIN (CAMBODIA) LUGGAGE CO., LTD នេះ គ្រោងនឹងបណ្ដាក់ទុនវិនិយោគសរុប 14 លានដុល្លារអាម៉េរិក និងបង្កើតការងារសរុបជាង 2,000 កន្លែង។

ក្រុមហ៊ុន «NEW SHUI YAT (CAMBODIA) CO., LTD» គ្រោងនឹងបង្កើតរោងចក្រផលិតកេសកាតុង ថង់ប្លាស្ទិក និងអេប៉ុង ស្ថិតនៅភូមិបូរីកម្មករ សង្កាត់ច្បារមន ខេត្តកំពង់ស្ពឺ មានទុនវិនិយោគប្រមាណ 8.5 លានដុល្លារអាម៉េរិក និងអាចបង្កើតការងារបានចំនួន 358 កន្លែង។

ក្រុមហ៊ុន «KANJIN (CAMBODIA) LUGGAGE CO., LTD» គ្រោងនឹងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ21B ភូមិអន្លង់សាន្ត ឃុំព្រែកស្តី ស្រុកកោះធំ ខេត្តកណ្តាល មានទុនវិនិយោគប្រមាណ 5.5 លានដុល្លារអាម៉េរិក និងអាចបង្កើតការងារបានចំនួន 1,770 កន្លែង។

November 4, 2022

Author: សឿន សំណាង