សឿន សំណាង - La Reine Media

ក្រសួងហិរញ្ញវត្ថុអង់គ្លេស បង្កកទ្រព្យតម្លៃជាង 20 ពាន់លានដុល្លាររបស់ រុស្ស៊ី

ចាប់ពីខែកុម្ភៈដល់ខែតុលា 2022 ប្រាក់ជាង 18 ពាន់លានផោនអង់គ្លេស នៅក្នុងបណ្ដាមូលនិធិដែលត្រូវបានបង្កកដោយ ក្រសួងហិរញ្ញវត្ថុអង់គ្លេស គឺជាកម្មសិទ្ធិ ឬតំណាងរបស់ក្រុមជនជាតិរុស្ស៊ី ដែលមានឈ្មោះនៅក្នុងបញ្ជីទណ្ឌកម្ម។

យោងតាម Sputniknews កាលពីថ្ងៃទី 10 វិច្ឆិកា ការិយាល័យអនុវត្តទណ្ឌកម្មផ្នែកហិរញ្ញវត្ថុរបស់ ក្រសួងហិរញ្ញវត្ថុអង់គ្លេស (OFSI) បានបញ្ជាក់ថា ប្រទេសនេះបានបង្កបទ្រព្យតម្លៃ 18.39 ពាន់លានផោនអង់គ្លេស (21 ពាន់លានដុល្លារអាម៉េរិក) របស់ រុស្ស៊ី ក្នុងដំណាក់កាលពីខែកុម្ភៈដល់តុលា 2022 ដើម្បីឆ្លើយតបនឹងយុទ្ធនាការយោធារបស់ ទីក្រុងមូស្គូ នៅ អ៊ុយក្រែន។

របាយការណ៍វាយតម្លៃប្រចាំឆ្នាំរបស់ OFSI ដែលបានប្រកាសកាលពីម្សិលមិញ មានឃ្លាសរសេរថា «ចាប់ពីថ្ងៃទី 22 កុម្ភៈដល់ថ្ងៃទី 20 តុលា 2022 ប្រាក់ចំនួន 18.39 ពាន់លានផោនអង់គ្លេស នៅក្នុងបណ្ដាមូលនិធិដែលត្រូវបានបង្កក ត្រូវបានរាយការណ៍ឱ្យ OFSI ថា ជាកម្មសិទ្ធិ ឬតំណាងរបស់ក្រុមជនជាតិរុស្ស៊ី ដែលមានឈ្មោះនៅក្នុងបញ្ជីទណ្ឌកម្ម»។

ទិន្នន័យដែលទើបត្រូវបានលើកឡើងនេះ បង្ហាញអំពីការកើនឡើងយ៉ាងខ្ពស់នៃទ្រព្យសម្បត្តិរបស់ រុស្ស៊ី ដែលត្រូវបាន អង់គ្លេស បង្កក រាប់ចាប់ពីខែកញ្ញា 2021 ដែលមុននោះ មានតែ 44.5 លានផោនប៉ុណ្ណោះ។

OFSI ក៏បានបន្ថែម ជនជាតិរុស្ស៊ី ចំនួន 1,271 នាក់ ទៅក្នុងបញ្ជីទណ្ឌកម្ម ចាប់ពីថ្ងៃទី 22 កុម្ភៈដល់ 24 សីហា 2022។ មនុស្សតែ 11 នាក់ប៉ុណ្ណោះដែលត្រូវបានដកចេញពីបញ្ជីទណ្ឌកម្មនៅក្នុងពេលដំណាលគ្នានេះ៕

November 11, 2022

អ៊ីរ៉ង់ ប្រកាសថា ផលិតបានមីស៊ីលល្បឿនលឿនជាងសំឡេងលើសពី 5 ដង

ឆ្មាំបដិវត្តន៍អ៊ីស្លាមអ៊ីរ៉ង់ បានប្រកាសថា ពួកគេផលិតបានមីស៊ីលល្បឿនលឿនជាងសំឡេងប្រភេទ Hypersonic និងវាយតម្លៃថា នេះគឺជាជំហានដ៏ធំមួយនៅក្នុងវិស័យការពារជាតិរបស់ប្រទេសនេះ។

«មីស៊ីលនេះមានល្បឿនលឿនខ្លាំង អាចចល័តនៅក្នុង និងក្រៅបរិយាកាស។ វាគឺជាជំហានដ៏ធំនៅក្នុងវិស័យមីស៊ីល ដែលត្រូវបានអភិវឌ្ឍដើម្បីសំដៅលើខែលការពារមីស៊ីលរបស់សត្រូវ» មេបញ្ជាការកងកម្លាំងអវកាសនៃឆ្មាំបដិវត្តន៍អ៊ីស្លាមអ៊ីរ៉ង់ (IRGC) លោក Amir Ali Hajizadeh បានឱ្យដឹងដូច្នេះនៅថ្ងៃនេះ បន្ទាប់ពីបានប្រកាសថា ប្រទេសនេះផលិតបានមីស៊ីលល្បឿនលឿនជាងសំឡេងប្រភេទ Hypersonic។

លោក Amir Ali Hajizadeh មិនបានបង្ហើបព័ត៌មានលម្អិតស្ដីពីមីស៊ីលល្បឿនលឿនជាងសំឡេង (hypersonic missile) នេះ ក៏ដូចជាមិនទាន់មានដំណឹងទាក់ទិននឹងការសាកល្បងអាវុធប្រភេទនេះរបស់ អ៊ីរ៉ង់ នៅឡើយ។

មីស៊ីល Hypersonic គឺជាអាវុធមានល្បឿនលឿនជាងសំឡេងយ៉ាងតិច 5 ដង ដែលប្រហែលជាង 6,200 គីឡូម៉ែត្រ/ម៉ោង។ ល្បឿននេះ រួមនឹងគន្លងគោចរស្មុគស្មាញ ធ្វើឱ្យអាវុធប្រភេទនេះហាក់មិនអាចត្រូវបានបាញ់ទម្លាក់ដោយខែលការពារមីស៊ីលនាបច្ចុប្បន្ន៕

November 10, 2022

អ្នកវិទ្យាសាស្ត្ររកឃើញប្រហោងខ្មៅ (Black Hole) នៅក្បែរផែនដីបំផុត

ក្រុមអ្នកវិទ្យាសាស្ត្របានរកឃើញប្រព័ន្ធចម្លែកមួយដែលមានប្រហោងខ្មៅ និងផ្កាយដូចព្រះអាទិត្យ វិលជុំវិញគ្នានៅខាងក្នុងកញ្ចុំផ្កាយ Ophiuchus។

យោងតាមការស្រាវជ្រាវដែលបានចុះផ្សាយលើទស្សនាវដ្ដី Monthly Notices of the Royal Astronomical Society កាលពីសប្ដាហ៍កន្លង ប្រហោងខ្មៅថ្មី (ឈ្មោះ Gaia BH1) មានម៉ាសធំជាងព្រះអាទិត្យប្រហែល 10 ដង និងមានចម្ងាយពីផែនដីប្រហែល 1,566 ឆ្នាំពន្លឺ ស្ថិតនៅក្នុងកញ្ចុំផ្កាយ Ophiuchus។ ប្រការនេះធ្វើឱ្យ Gaia BH1 ក្លាយជាប្រហោងខ្មៅដែលស្ថិតនៅជិតផែនដីបំផុតដែលមនុស្សធ្លាប់បានរកឃើញ ពោលគឺជិតជាងទ្វេដងធៀបនឹងប្រហោងខ្មៅដែលកាន់កាប់កំណត់ត្រាមុននោះ។

ប្រហោងខ្មៅ Gaia BH1 ពិសេសខ្លាំងណាស់ ដោយសារតែវាមាន «មិត្តរួមដំណើរ» ដែលជាផ្កាយមួយដួងដូចព្រះអាទិត្យ (មានទម្ងន់ធ្ងន់ជាង 0.93 ដង ធៀបនឹងព្រះអាទិត្យ និងមានកម្ដៅប្រហែល 5,580 អង្សាសេ)។ វត្ថុអវកាសទាំងពីរនេះវិលជុំវិញគ្នាក្នុងវដ្ដនៃគន្លងគោចរដែលមានរយៈពេល 185.59 ថ្ងៃ និងមានគម្លាតប្រហាក់ប្រហែលពីផែនដីទៅព្រះអាទិត្យ។

ប្រធានក្រុមស្រាវជ្រាវ Kareem El-Badry ដែលជាអ្នកវិទ្យាសាស្ត្រនៃមជ្ឈមណ្ឌល Harvard-Smithsonian នៅ សហរដ្ឋអាម៉េរិក និយាយថា នេះគឺជាប្រព័ន្ធដំបូងស្ថិតក្នុងប្រភេទនេះដែលធ្លាប់ត្រូវបានរកឃើញនៅក្នុងកាឡាក់ស៊ីមីលគីវ៉េ។

យោងតាមអ្នកវិទ្យាសាស្ត្រ ប្រហោងខ្មៅ Gaia BH1 ទំនងជាកកើតពីផ្កាយមួយដួងដែលមានទម្ងន់ធ្ងន់ជាង 20 ដង ធៀបនឹងព្រះអាទិត្យ។ តាមធម្មតា ផ្កាយខ្នាតយក្សដូចនេះនឹងរីកមាឌចេញទៅក្រៅនៅក្នុងដំណាក់កាលចុងក្រោយនៃជីវិតរបស់វា ហើយដុតកម្ទេចគ្រប់យ៉ាងដែលស្ថិតក្នុងគន្លងរបស់វា មុនពេលបែកធ្លាយដល់ខាងក្នុង បង្កើតបានជាប្រហោងខ្មៅ។

អ្នកវិទ្យាសាស្ត្រយល់ថា ដំណើរការនេះគួរណាស់តែលេបត្របាក់ទាំងផ្កាយមួយដួងដែលជាមិត្តរួមដំណើររបស់ប្រហោងខ្មៅ ឬយ៉ាងហោចក៏អូសវាទៅក្នុងគន្លងគោចរមួយដែលជិតជាងនេះ ប៉ុន្តែ ផ្កាយនេះបែរជាស្ថិតនៅក្នុងទ្រង់ទ្រាយដើមយ៉ាងអាថ៌កំបាំង និងវិលជុំវិញប្រហោងខ្មៅក្នុងគម្លាតយ៉ាងឆ្ងាយ។

ឧបសគ្គបន្ទាប់ដែលក្រុមអ្នកវិទ្យាសាស្ត្រខាងលើត្រូវដោះស្រាយ នោះគឺការស្វែងយល់អំពីមូលហេតុដែលនាំឱ្យកើតមានករណីថ្មីបំផុតនេះ៕

November 10, 2022

តើម្ចាស់ជើងឯក World Cup 2022 នឹងទទួលបានប្រាក់រង្វាន់ប៉ុន្មានលានដុល្លារអាម៉េរិក?

(កាតា)- ម្ចាស់ជើងឯក World Cup 2022 នឹងទទួលបាន 42 លានដុល្លារអាម៉េរិក ច្រើនជាង 4 លានដុល្លារធៀបនឹងប្រាក់រង្វាន់ដែល បារាំង បានទទួលពី FIFA កាលពីឆ្នាំ 2018។

FIFA បានព្យាករថា ប្រាក់ចំណូលក្នុងឆ្នាំ 2022 នឹងមានចំនួន 4.6 ពាន់លានដុល្លារអាម៉េរិក ក្នុងនោះ ប្រាក់ដែលបានពីការលក់សិទ្ធិផ្សាយបន្តតាមទូរទស្សន៍បាននាំមកនូវចំណូលឱ្យពួកគេ 2.6 ពាន់លានដុល្លារ។ កាលពីខែមេសា 2022 ស្ថាប័ន FIFA កំណត់យក 440 លានដុល្លារសម្រាប់មូលនិធិប្រាក់រង្វាន់ World Cup 2022 កើន 40 លានដុល្លារបើធៀបនឹងឆ្នាំ 2018។ World Cup 2014 នៅ ប្រេស៊ីល ប្រាក់រង្វាន់សរុបគឺ 358 លានដុល្លារ។ ប្រការនេះមានន័យថា ប្រាក់រង្វាន់ World Cup បានកើន 23% ក្នុងរយៈពេល 2 រដូវកាល។

ក្រុមបាល់ទាត់ដែលឈ្នះនៅ World Cup 2022 នឹងទទួលបានប្រាក់រង្វាន់ 42 លានដុល្លារ ខណៈដែលក្រុមម្ចាស់ជើងឯកចំនួន 3 ចុងក្រោយបង្អស់គឺ បារាំង បានទទួល 38 លានដុល្លារ, អាល្លឺម៉ង់ បានទទួល 35 លានដុល្លារ និង អេស្ប៉ាញ បានទទួល 30 លានដុល្លារ។ មុននោះ ម្ចាស់ជើងឯកអ៊ីតាលី បានទទួល 20 លានដុល្លារ ក្នុងឆ្នាំ 2006, ប្រេស៊ីល បានទទួល 8 លានដុល្លារ ក្នុងឆ្នាំ 2020។ ក្រោយរយៈពេល 20 ឆ្នាំ ប្រាក់រង្វាន់សម្រាប់ម្ចាស់ជើងឯក World Cup បានកើនឡើងខ្ពស់ជាងមុនជាង 5 ដង។

ក្រុមបាល់ទាត់ចំនួន 32 ក្រុមដែលចូលរួមប្រកួតនៅ World Cup 2022 នឹងត្រលប់ទៅវិញជាមួយនឹងប្រាក់រង្វាន់រាប់លានដុល្លារ អាស្រ័យលើសមិទ្ធផលរបស់ពួកគេ។ ក្រុមដែលចាញ់នៅក្នុងវគ្គចែកពូលនឹងទទួលបាន 9 លានដុល្លារ, វគ្គ 1/8 នឹងបានទទួល 13 លានដុល្លារ និងវគ្គ 8 ក្រុមចុងក្រោយ (quarter-final) នឹងទទួលបាន 17 លានដុល្លារ។ ក្រុមដែលជាប់ចំណាត់ថ្នាក់លេខ 4 នឹងទទួលបានប្រាក់រង្វាន់ 25 លានដុល្លារ, ក្រុមជាប់លេខ 3 នឹងទទួលបាន 27 លានដុល្លារ ខណៈដែលក្រុមជាប់លេខ 2 នឹងទទួលបាន 30 លានដុល្លារ៕

November 10, 2022

គម្រោងសាងសង់អគារភ្លោះកប់ពពកដែលមានដាំរុក្ខជាតិ 30,000 ដើម

(អារ៉ាប់រួម)-អគារភ្លោះរាងអក្សរ V កម្ពស់ 190 ម៉ែត្រ និង 150 ម៉ែត្រនេះនឹងនាំមកនូវអត្ថប្រយោជន៍របស់ព្រៃក្នុងទីក្រុង មានដូចជា ការស្រូបយកធូលីល្អិត និងបញ្ចុះកម្ដៅបរិយាកាសក្នុងទីក្រុងជាដើម។

ក្រុមហ៊ុនអ៊ីតាលី Stefano Boeri Architetti បានបង្ហើបអំពីផែនការបន្ថែមពណ៌បៃតងដល់ ទីក្រុងឌូបៃ របស់ អេមីរ៉ាតអារ៉ាប់រួម ដោយប្រើប្រាស់គម្រោង «តំបន់ព្រៃបញ្ឈរត្រង់»។ គម្រោងនេះរួមមានអគារភ្លោះកប់ពពកដែលគ្របដណ្ដប់ដោយដើមឈើរាប់ពាន់ដើម និងមានរចនាបថបែបចីរភាពដើម្បីជួយកាត់បន្ថយតម្រូវការប្រើប្រាស់បណ្ដាញអគ្គិសនី នេះបើតាម Nes Atlas ចុះផ្សាយកាលពីថ្ងៃទី 09 វិច្ឆិកា 2022។

អគារភ្លោះនេះមានរាងជាអក្សរ V និងតភ្ជាប់ជាមួយគ្នាដោយខឿនរួម។ ពួកវាមានកម្ពស់ 190 ម៉ែត្រ និង 150 ម៉ែត្រ ហើយគ្រោងនឹងដាំដើមឈើជាង 2,600 ដើម និងរុក្ខជាតិប្រភេទគុម្ពចំនួន 27,000 គុម្ពនៅខាងក្រៅ និងមានផ្ទះកញ្ចក់ និងសួនអ៊ីដ្រូប៉ូនិច (សួនដាំរុក្ខជាតិលើទឹក) ជាច្រើនទៀត។ ក្រៅពីនេះ អគារទាំងនេះក៏នឹងមានយ៉រ និងទីលានលើដំបូលជាច្រើនផងដែរ។

គម្រោងនេះផ្ដោតសំខាន់ទៅលើការរក្សាទឹក ដោយសារថា ឌូបៃ តែងតែរាំងស្ងួត។ ប្រព័ន្ធបន្សាបជាតិប្រៃនឹងត្រូវបានដំឡើងជាមួយនឹងប្រព័ន្ធកែច្នៃទឹកកខ្វក់ដែលបញ្ចេញពីសកម្មភាពមួយចំនួនដូចជា ការគក់ខោអាវជាដើម។ ទន្ទឹមនឹងនេះ អគារទាំងនេះក៏នឹងកាត់បន្ថយការប្រើប្រាស់បណ្ដាញខ្សែភ្លើង តាមរយៈការបំពាក់ប្រព័ន្ធអគ្គិសនីដើរដោយថាមពលព្រះអាទិត្យដែលអាចផលិតអគ្គិសនីបាន 5,100 kWh។

គម្រោងខាងលើនេះត្រូវបានប្រកាសនៅក្នុងកិច្ចប្រជុំស្ដីពីបម្រែបម្រួលអាកាសធាតុ COP27 ដែលធ្វើឡើងចាប់ពីថ្ងៃទី 06 ដល់ 18 វិច្ឆិកា នៅ Sharm El Sheikh ប្រទេសអេហ្ស៊ីប។ ក្រុមហ៊ុន Stefano Boeri Architetti បានឱ្យដឹងថា ខ្លួនកំពុងសិក្សាបន្ថែមអំពីរចនាបថ និងចីរភាពទាំងមូលរបស់គម្រោង។ បច្ចុប្បន្ន មិនទាន់មានព័ត៌មានអំពីពេលវេលានៃការសាងសង់រួចរាល់នៅឡើយ៕

November 10, 2022

ទាហាន 36,000 នាក់របស់ អាម៉េរិក និង ជប៉ុន ធ្វើសមយុទ្ធការពារកោះជួរមុខ

កងទ័ពអាម៉េរិក និង ជប៉ុន បញ្ជូនទាហាន 36,000 នាក់ រួមនឹងគ្រឿងសព្វាវុធធុនធ្ងន់ជាច្រើនទៅចូលរួមធ្វើសមយុទ្ធយោធាការពារបណ្ដាកោះនៅជួរមុខរបស់ ជប៉ុន។

ក្រសួងការពារជាតិជប៉ុន នៅថ្ងៃទី 10 វិច្ឆិកា 2022 ប្រកាសចាប់ផ្ដើមសមយុទ្ធរួមជាមួយនឹង សហរដ្ឋអាម៉េរិក ដែលមានឈ្មោះថា Keen Sword គ្រោងធ្វើឡើងនៅថ្ងៃទី 19 វិច្ឆិកា។ សមាជិកប្រហែល 26,000 នាក់របស់កងកម្លាំងស្វ័យការពារជប៉ុន (JSDF) និង ទាហាន 10,000 នាក់របស់ សហរដ្ឋអាម៉េរិក នឹងចូលរួមសមយុទ្ធនេះ។

សមយុទ្ធបង្ហាញត្រាប់ការការពារកោះជួរមុខរបស់ ជប៉ុន នឹងធ្វើឡើងនៅលើកោះ Tokunoshima នៃខេត្ត Kagoshima ភាគនិរតីនៃ ប្រទេសជប៉ុន។ កងទ័ពអាម៉េរិក និង ជប៉ុន បានដាក់ពង្រាយឧទ្ធម្ភាគចក្រ V-22 Osprey នៅលើកោះ Tokunoshima ដើម្បីត្រៀមសម្រាប់សមយុទ្ធ។

ជប៉ុន បញ្ចេញនាវាយោធាប្រហែល 20 គ្រឿង និងយន្តហោះ 250 គ្រឿងចូលរួមធ្វើសមយុទ្ធ ខណៈដែល សហរដ្ឋអាម៉េរិក បញ្ចេញនាវា 10 គ្រឿង និងយន្តហោះ 120 គ្រឿង។ នាវាចម្បាំង 4 គ្រឿង និងយន្តហោះ 2 គ្រឿងរបស់ កងទ័ពអូស្ត្រាលី កាណាដា និង អង់គ្លេស ក៏ចូលរួម Keen Sword។ ទាហានរបស់ ណាតូ ចូលរួមសមយុទ្ធរវាង អាម៉េរិក-ជប៉ុន ក្នុងនាមជាអ្នកសង្កេតការណ៍។

ក្រសួងការពារជាតិជប៉ុន បានឱ្យដឹងថា សមយុទ្ធនេះធ្វើឡើងដើម្បី «បង្កើនសមត្ថភាពកំញើញ និងប្រតិកម្មរបស់ JSDF រួមនឹង សហរដ្ឋអាម៉េរិក ក្នុងការទប់ទល់នឹងស្ថានការណ៍បន្ទាន់»។

Keen Sword ក៏មានសកម្មភាពហ្វឹកហាត់ទប់ទល់នឹងមីស៊ីលប្លោង ការប្រយុទ្ធក្នុងបរិស្ថានថ្មីដូចជា អវកាស និងប្រព័ន្ធអ៊ីនធើណិតជាដើម។ល។

November 10, 2022

ប្រទេសកាតា អាចរកចំណូលបាន 17 ពាន់លានដុល្លារពី World Cup 2022

World Cup ត្រូវបានគេរំពឹងថា នឹងក្លាយជាកត្តាជំរុញសេដ្ឋកិច្ចដ៏ធំសម្រាប់ ប្រទេសកាតា ក្នុងនោះ ភាគច្រើនស្ថិតក្នុងវិស័យសំណង់ និងទេសចរណ៍។

Nasser AI Khater ប្រធាន FIFA World Cup Qatar 2022 បានប្រាប់ Bloomberg ថា ប្រទេសកាតា គ្រោងនឹងទាក់ទាញភ្ញៀវបានពី 1 ទៅ 1.5 លាននាក់នៅក្នុងរដូវ World Cup ឆ្នាំនេះ។ ដូច្នេះ ព្រឹត្តិការណ៍ប្រកួតបាល់ទាត់ធំជាងគេក្នុងពិភពលោកនេះ អាចនាំមកនូវប្រាក់ចំណូលឱ្យ កាតា 17 ពាន់លានដុល្លារអាម៉េរិក (ទាបជាងបន្តិច ធៀបនឹងការព្យាករ 20 ពាន់លានដុល្លារមុននោះ)។

តួលេខដែលប្រធាន FIFA World Cup Qatar 2022 បានលើកឡើងគឺប្រហាក់ប្រហែលនឹង 10% នៃ GDP ឆ្នាំ 2021 របស់ កាតា។ Hassan AI Thawadi ដែលជាអគ្គលេខាធិការនៃគណៈកម្មការទទួលបន្ទុកសាងសង់ហេដ្ឋារចនាសម្ព័ន្ធសម្រាប់ World Cup 2022 បាននិយាយថា ការគណនាខាងលើគឺជាលទ្ធផលមួយនៃ «ការស្រាវជ្រាវជាន់ខ្ពស់»។ ក៏ប៉ុន្តែ ការព្យាករលម្អិតនឹងពិបាកប៉ានស្មាននាបច្ចុប្បន្ន។

World Cup ត្រូវបានគេរំពឹងថា នឹងក្លាយជាកត្តាជំរុញសេដ្ឋកិច្ចដ៏ធំសម្រាប់ ប្រទេសកាតា ក្នុងនោះ ភាគច្រើនស្ថិតក្នុងវិស័យសំណង់ និងទេសចរណ៍។ លោក Hassan AI Thawadi ឱ្យដឹងថា World Cup «នឹងដើរតួជាក្បាលម៉ាស៊ីនជំរុញ និងពន្លឿនសម្រាប់គំនិតផ្ដួចផ្ដើមដែលរដ្ឋាភិបាលបានសន្យាអនុវត្ត និងបានរៀបផែនការពីមុន ទោះជាការអភិវឌ្ឍទីក្រុង ឬពិពិធកម្មសេដ្ឋកិច្ច»។

កាតា ចង់ប្រើប្រាស់ព្រឹត្តិការណ៍ World Cup 2022 ដើម្បីឃោសនាប្រទេសរបស់ខ្លួន ក្នុងបំណងជំរុញកំណើនសេដ្ឋកិច្ច ក្នុងនោះ ការទាក់ទាញភ្ញៀវបរទេសដែលជាអ្នកគាំទ្រវិស័យបាល់ទាត់ត្រូវបានយកចិត្តទុកដាក់ជាងគេ។

កីឡដ្ឋានបាល់ទាត់ Ahmed bin ali នៅ ប្រទេសកាតា

បន្ទប់រាប់ពាន់ក្នុងបណ្ដាសណ្ឋាគារលំដាប់ខ្ពស់ត្រូវបានទុកសម្រាប់តែក្រុមមន្ត្រី FIFA និងកីឡាករបាល់ទាត់។ លោក AI Khater បានឱ្យដឹងថា ប្រទេសកាតា ក៏នឹងបង្កើនចំនួនបន្ទប់សម្រាប់ទេសចរផងដែរ។ ជាសរុប កាតា បានចំណាយប្រហែល 200 ពាន់លានដុល្លារសម្រាប់ស្ថាបនាហេដ្ឋារចនាសម្ព័ន្ធ បណ្ដាគម្រោងដទៃ រាប់ចាប់តាំងពីដណ្ដើមបានសិទ្ធិធ្វើជាម្ចាស់ផ្ទះការប្រកួតបាល់ទាត់ពិភពលោក (World Cup)។

ក៏ប៉ុន្តែ មនុស្សជាច្រើនមានការបារម្ភថា World Cup នៅ កាតា នឹងមិនសូវ «គគ្រឹកគគ្រេង» ព្រោះតែវិន័យសាសនាអ៊ីស្លាម ដែលប្រកាន់តឹងតាំងពីការស្លៀកពាក់ រហូតដល់ភេសជ្ជមានជាតិអាល់កុល។

ទោះជាយ៉ាងណាក៏ដោយ លោក Al Thawadi បានបញ្ជាក់ថា វិស័យឯកជននឹងមានសិទ្ធិសម្រេចលើការផ្ដល់សម្លៀកបំពាក់ដល់អតិថិជន។ ចំណែកស្រាក៏នឹងត្រូវបានអនុញ្ញាតឱ្យប្រើប្រាស់នៅក្នុងទីតាំងដែលបានកំណត់ ដូចជាទីតាំងសម្រាប់អ្នកគាំទ្របាល់ទាត់ជាដើម៕

November 10, 2022

ការដោះដូរពាណិជ្ជកម្មរបស់កម្ពុជាក្នុងអាស៊ាន និងអាស៊ានជាមួយពិភពលោក កើនឡើងជាបន្តបន្ទាប់

ទំហំពាណិជ្ជកម្មផ្ទៃក្នុងអាស៊ាន ក៏ដូចជា អាស៊ាន ជាមួយនឹងអន្តរជាតិ បានកើនឡើងជាបន្តបន្ទាប់រាប់ចាប់ពីឆ្នាំ 2010 ដល់ឆ្នាំ 2021។

ការដោះដូរពាណិជ្ជកម្មផ្ទៃក្នុងអាស៊ាន បានកើនពី 502.9 ពាន់លានដុល្លារអាម៉េរិក ក្នុងឆ្នាំ 2010 ឡើងដល់ 712 ពាន់លានដុល្លារនៅក្នុងឆ្នាំ 2021។ តួលេខនេះរួមចំណែកប្រមាណ 21.3% នៅក្នុងទំហំពាណិជ្ជកម្មសរុបរបស់សហគមន៍នេះ។

គិតពីឆ្នាំ 2003 ដល់ឆ្នាំ 2021 សឹង្ហបុរី ឈរលំដាប់លេខ 1 ស្ដីពីទំហំនៃការនាំចេញ-នាំចូលទំនិញផ្ទៃក្នុងរបស់ អាស៊ាន។

ទំហំនៃការនាំចេញ-នាំចូលទំនិញផ្ទៃក្នុងអាស៊ាន របស់ កម្ពុជា ក្នុងឆ្នាំ 2003 ឈរលំដាប់ទី 8 ហើយឆ្នាំ 2008, 2009 និង 2010, 2011, 2013 និង 2014 ឈរលំដាប់ចុងក្រោយគេ ខណៈដែលឆ្នាំ 2021 ឈរលំដាប់ទី 7 នៅក្នុងចំណោមសមាជិក 10 ប្រទេសរបស់ អាស៊ាន។ ទំហំពាណិជ្ជកម្មរបស់ កម្ពុជា នៅក្នុង អាស៊ាន សម្រេចបាន 1.8 ពាន់លានដុល្លារក្នុងឆ្នាំ 2003 និងកើនឡើងដល់ 12.1 ពាន់លានដុល្លារក្នុងឆ្នាំ 2021។

ទំហំពាណិជ្ជកម្មរបស់ អាស៊ាន នៅក្នុងទីផ្សារពិភពលោកក៏បានកើនពី 6.5% ក្នុងឆ្នាំ 2010 ឡើងដល់ 7.5% នៅឆ្នាំ 2021។ តួលេខនេះបង្ហាញថា កំណើនសេដ្ឋកិច្ចរបស់ អាស៊ាន កើនឡើងលឿនជាងបណ្ដាតំបន់ដទៃរបស់ពិភពលោក និងឆ្លុះបញ្ចាំងពីទិដ្ឋភាពនៃការធ្វើសមាហរណកម្មអាស៊ានទៅក្នុងពិភលោក៕

November 10, 2022

ប្រធានអាស៊ានឆ្នាំ 2022 បានកំណត់បន្ថែមគោលដៅយុទ្ធសាស្ត្រចំនួន 4 សម្រាប់សហគមន៍

(ភ្នំពេញ)៖ កម្ពុជា ក្នុងនាមជាប្រធានអាស៊ានប្តូរវេនឆ្នាំ 2022 បានកំណត់បន្ថែមនូវ «គោលដៅយុទ្ធសាស្ត្រចំនួន 4» ដើម្បីពង្រឹងការតភ្ជាប់ឌីជីថល ក៏ដូចជាការកាត់បន្ថយគម្លាតអភិវឌ្ឍន៍ ក្នុងបំណងធ្វើឱ្យការប្រកួតប្រជែងរបស់អាស៊ាន និងការអភិវឌ្ឍប្រកបដោយចីរភាព នេះបើតាមការបញ្ជាក់នៅក្នុងសុន្ទរកថារបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានប្តូរវេន ឆ្នាំ 2022 ថ្លែងក្នុងពិធីបើកកិច្ចប្រជុំកំពូលធុរកិច្ច និងវិនិយោគអាស៊ាន ឆ្នាំ 2022។

យោងតាមសុន្ទរកថារបស់ សម្តេចតេជោ ហ៊ុន សែន «គោលដៅយុទ្ធសាស្ត្រចំនួន 4» រួមមាន ទីមួយ ៖ ការពង្រឹងការតភ្ជាប់ឌីជីថល, វិទ្យាសាស្ត្រ និងបច្ចេកវិទ្យា, ទីពីរ ៖ ការកាត់បន្ថយគម្លាតអភិវឌ្ឍន៍ ដើម្បីភាពប្រកួតប្រជែងរបស់អាស៊ាន, ទីបី ៖ ការជំរុញសមាហរណកម្ម, បរិយាប័ន្ន, ភាពធន់ និងភាពប្រកួតប្រជែងអាស៊ានឱ្យខ្លាំងជាងមុន និងទីបួន ៖ អាស៊ានជាសកលសម្រាប់ភាពរីកចម្រើន និងការអភិវឌ្ឍ សំដៅជំរុញកំណើនសេដ្ឋកិច្ចឡើងវិញ ប្រកបដោយចីរភាព, បរិយាប័ន្ន និងភាពធន់ផងដែរ។

សូមបញ្ជាក់ថា ពិធីបើកកិច្ចប្រជុំកំពូលធុរកិច្ច និងវិនិយោគអាស៊ានឆ្នាំ 2022 នេះ ត្រូវបានធ្វើឡើងនៅព្រឹកថ្ងៃ ទី 10 វិច្ឆិកា 2022 នាសណ្ឋាគារសូហ្វីតែលភូគីត្រាភ្នំពេញ ក្នុងគ្រាដែល កម្ពុជា ក្នុងនាមជាប្រធានអាស៊ានបន្តវេន 2022 ធ្វើជាម្ចាស់ផ្ទះសម្រាប់កិច្ចប្រជុំកំពូលអាស៊ានលើកទី 40 និង 41 ដែលប្រព្រឹត្តទៅចាប់ពីថ្ងៃទី 10 ដល់ 13 វិច្ឆិកា 2022៕

November 10, 2022

អាម៉េរិក ប្រកាសផែនការផ្ដល់ជំនួយដើម្បីបោះបង់ឥន្ធនៈហ្វូស៊ីលនៅក្នុងបណ្ដាប្រទេសកំពុងអភិវឌ្ឍ

យោងតាមផែនការពន្លឿនការផ្លាស់ប្ដូរថាមពល សហរដ្ឋអាម៉េរិក គ្រោងនឹងផ្ដល់ជំនួយដល់បណ្ដាគម្រោងថាមពលកកើតឡើងវិញ និងជំរុញការងាកទៅរកថាមពលស្អាតនៅក្នុងបណ្ដាប្រទេសកំពុងអភិវឌ្ឍ។

កាលពីថ្ងៃទី 09 វិច្ឆិកា បេសកជនពិសេសផ្នែកអាកាសធាតុរបស់ សហរដ្ឋអាម៉េរិក លោក John Kerry បានប្រកាសបង្កើតផែនការប៉ះប៉ូវកាបូន ក្នុងបំណងជួយដល់បណ្ដាប្រទេសកំពុងអភិវឌ្ឍ ដើម្បីពន្លឿនដំណើរការប្ដូរពីការប្រើប្រាស់ថាមពលហ្វូស៊ីល ទៅរកការប្រើប្រាស់ថាមពលស្អាត។

លោក Kerry ប្រកាសថា គម្រោងពន្លឿនដំណើរការប្ដូរថាមពល (ETA) នឹងជួយដល់បណ្ដាគម្រោងថាមពលកកើតឡើងវិញ និងជំរុញឱ្យប្រណាប្រទេសកំពុងអភិវឌ្ឍ ងាកទៅរកថាមពលស្អាត (ថាមពលកកើតឡើងវិញ)។

រដ្ឋាភិបាលអាម៉េរិក នឹងអភិវឌ្ឍកម្មវិធីរួមនឹងមូលនិធិ Bezos Earth និងមូលនិធិ Rockefeller ដោយមានការរួម ពីវិស័យឯកជន និងរដ្ឋ ដែលគ្រោងនឹងអនុវត្តរហូតដល់ឆ្នាំ 2030 ហើយអាចពន្យារសុពលភាពដល់ឆ្នាំ 2035។

យោងតាមលោក Kerry គោលដៅរបស់កម្មវិធីខាងលើគឺការដឹកនាំទីផ្សារកាបូនដើម្បីបញ្ចេញទុនសម្រាប់ពន្លឿនការងាកទៅរកថាមពលស្អាត ការបិទរោងចក្រអគ្គិសនីដើរដោយថាមពលធ្យូងថ្ម ហើយសាងសង់បណ្ដារោងចក្រអគ្គិសនីដែលដើរដោយថាមពលកកើតឡើងវិញ។

លោក Kerry បញ្ជាក់ថា គំនិតផ្ដួចផ្ដើមស្ដីពីទីផ្សារកាបូនរបស់ សហរដ្ឋអាម៉េរិក បានទទួលការគាំទ្រពី អគ្គលេខាធិការនៃអង្គការសហប្រជាជាតិ Antonio Guterres ក៏ដូចជាបណ្ដាស្ថាប័នហិរញ្ញវត្ថុរដ្ឋ និងឯកជនជាច្រើនផងដែរ៕

November 10, 2022

Author: សឿន សំណាង