សឿន សំណាង - La Reine Media

កីឡាករ Olivier Giroud បំបែកឯតទគ្គកម្មទាត់បញ្ចូលទីជូនប្រទេសបារាំង

(កាតា)- Olivier Giroud គឺជាកីឡាករដែលរកបានគ្រាប់បាល់ច្រើនជាងគេក្នុងប្រវត្តិសាស្ត្ររបស់ក្រុមជម្រើសជាតិបារាំង ក្រោយការស៊ុតបញ្ចូលទីរបស់ ប៉ូឡូញ រកបាន 1 គ្រាប់ដំបូងនៅវគ្គ 1/8 នៃ World Cup 2022។

ជាមួយនឹងការរកបាន 1 គ្រាប់នៅនាទីទី 44 កីឡាករ Giroud បានបំបែកឯតទគ្គកម្ម 51 គ្រាប់របស់ Thierry Henry ជូនប្រទេសបារាំង។ ក្នុង 52 គ្រាប់ដែលរកបានក្នុង 117 ប្រកួតរបស់ Giroud មាន 28 គ្រាប់រកបាននៅក្នុងការប្រកួតមិត្តភាព និង 24 គ្រាប់នៅការប្រកួតដណ្ដើមពានរង្វាន់ផ្លូវការ។

នៅក្នុងវ័យ 36 ឆ្នាំ 2 ខែ និង 4 ថ្ងៃ Giroud ក៏ជាកីឡាករវ័យចំណាស់ជាងគេដែលរកបាន 3 គ្រាប់ឡើងទៅនៅក្នុងមួយរដូវកាល World Cup។

Giroud បង្ហាញសញ្ញា (52) ដែលប្រាប់ថា ជាគ្រាប់បាល់ទី 52 របស់ខ្លួន

មុនការប្រកួតជាមួយក្រុមជម្រើសជាតិរបស់ ប៉ូឡូញ កីឡាករ Olivier Giroud របស់ បារាំង រកបាន 2 គ្រាប់នៅវគ្គចែកពូល ពេលប៉ះនឹងក្រុមរបស់ អូស្ត្រាលី៕

December 5, 2022

Messi ថា «អាហ្សង់ទីន គឺជាបេក្ខភាពជើងឯក World Cup 2022»

(កាតា)- ខ្សែប្រយុទ្ធ និងប្រធានក្រុម Lionel Messi បាននិយាយថា អាហ្សង់ទីន គឺជាបេក្ខភាពមួយក្នុងចំណោមបេក្ខភាពដែលស័ក្ដិសមសម្រាប់តំណែងជើងឯក World Cup 2022។

«អាហ្សង់ទីន គឺជាបេក្ខភាពមួយក្នុងចំណោមបេក្ខភាព។ អាហ្សង់ទីន គឺជាប្រទេសមហាអំណាចមួយ និងតែងតែជាក្រុមជម្រើសជាតិមួយដែលខ្លាំងបំផុត។ យើងដឹងថា ខ្លួនគឺជាបេក្ខភាពមួយក្នុងចំណោមបេក្ខភាពទាំងឡាយ។ ប៉ុន្តែ យើងត្រូវបង្ហាញអំពីប្រការនោះនៅលើទីលាន ហើយធ្វើបានប្រការនោះនៅចំពោះមុខ អូស្ត្រាលីរួចហើយ» ទំព័រសារព័ត៌មានរបស់ អេស្ប៉ាញ Marca ដកស្រង់ និងចុះផ្សាយសម្ដីអះអាងរបស់ Messi កាលពីថ្ងៃទី 04 ធ្នូ មួយថ្ងៃបន្ទាប់ពី អាហ្សង់ទីន យកឈ្នះ អូស្ត្រាលី 2-1 នៅវគ្គ 1/8។

នៅលើទីលាន Ahmad bin Ali កាលពីថ្ងៃទី 03 ធ្នូ អាហ្សង់ទីន មិនបានបង្កឱកាសច្រើននៅចំពោះមុខខ្សែការពារដ៏រឹងមាំរបស់ អូស្ត្រាលី ប៉ុន្តែ រកបាន 2 គ្រាប់ដោយសារថ្វីជើង «បែកបុគ្គល»។ នាទីទី 35 Messi ស៊ុតបញ្ចូលទី រកបាន 1 គ្រាប់សម្រាប់ អាហ្សង់ទីន។ នាទីទី 57 Julian Alvarez ដណ្ដើមបានបាល់ពីអ្នកចាំទី Matt Ryan ក្នុងតំបន់គ្រោះថ្នាក់ ហើយស៊ុតប៉ើងសំណាញ់របស់ អូស្ត្រាលី 1 គ្រាប់ទៀត។

អូស្ត្រាលី ផ្ដើមការវាយលុកចាប់ពីពាក់កណ្ដាលចុងតង់ទីពីរ និងរកបាន 1 គ្រាប់ដោយសារថ្វីជើងរបស់ Enzo Fernandez។ បញ្ចប់ការប្រកួត អាហ្សង់ទីន នាំមុខ អូស្ត្រាលី 2-1។

នៅពេល អាហ្សង់ទីន ប៉ះនឹង ហូឡង់ នៅវគ្គ 8 ក្រុមនៅលើកីឡដ្ឋាន Lusail នាថ្ងៃទី 09 ធ្នូខាងមុខ Messi មានគោលដៅផ្ដោតទៅលើឯតទគ្គកម្មស៊ុតបញ្ចូលទី 10 គ្រាប់នៅ World Cup របស់ Gabriel Batistuta ក្រោយពីឆ្លងផុតសមិទ្ធផលរបស់អតីតកំពូលតារាបាល់ទាត់ Diego Maradona របស់ អាហ្សង់ទីន៕

December 5, 2022

ត្រឹមតែ៣ថ្ងៃប៉ុណ្ណោះ កម្មវិធី Ford Adventure 2022 ទទួលបានអ្នកចុះឈ្មោះចូលរួមយ៉ាងច្រើនលើសលប់!

ភ្នំពេញ ថ្ងៃទី០៣ ខែធ្នូ ឆ្នាំ២០២២ — ក្រុមហ៊ុន អ អិម អេ ខេមបូឌា (RMA Cambodia) ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ប្រចាំព្រះរាជាណាចក្រកម្ពុជា បានរៀបចំសន្និសីទសារព័ត៌មានប្រកាសពីកម្មវិធីដំណើរកំសាន្ត Ford Adventure ឆ្នាំ 2022 លើកទី១៥ ឆ្ពោះទៅកាន់ ខេត្តកោះកុង ប្រទេសកម្ពុជា និងទីកុ្រងប៉ាតាយ៉ា ប្រទេសថៃ នៅក្នុងខែធ្នូ នាពេលឆាប់ៗខាងមុខនេះ ជាមួយនឹងក្បួនរថយន្ត Ford ចូលរួមប្រមាណជាង២០០គ្រឿង។

ដំណើរកំសាន្ត FORD Adventure ឆ្នាំ២០២២ នេះ រៀបចំឡើងដោយផ្នែករថយន្តFord នៃក្រុមហ៊ុន អ អិម អេ ខេមបូឌា (RMA Cambodia) និងចូលរួមសហការឧបត្ថម្ភកម្មវិធីធំដោយក្រុមហ៊ុនប្រេងឥន្ធនៈ ភីធីធី ខេមបូឌា (PTT Cambodia) ដែលជាក្រុមហ៊ុនប្រេងឥន្ធនៈឈានមុខគេនៅក្នុងប្រទេសកម្ពុជា ក្រុមហ៊ុនធានារ៉ាប់រងអាយុជីវិត FWD ធនាគារ ឯកទេស KB Daehan និងស្រាបៀរ ហនុមាន (Hanuman Beer)។ ក្រៅពីនេះ ក៏មានការចូលរួមពីសំណាក់ដៃគូសហការឧបត្ថម្ភកម្មវិធីដូចជា ក្រុមហ៊ុន LINE-X Cambodia ក្រុមហ៊ុន EFG (Express Food Group) ដែលរួមមាន The Pizza Company, BAR.B.Q Plaza, ការ៉េម Dairy Queen, ការ៉េម Swensen’s, Krispy Kreme Doughnuts, The Coffee Club, Boost Juice, តែគុជ Kamu-Kamu, បាយ ភូមិ (Bay Phum), So Bento, eat together, HungryApp^TM។ បន្ថែមពីនេះ ក៏មានការសហការឧបត្ថម្ភពីសំណាក់ ហាងនំបុ័ងបាយ័នផងដែរ។

គួរបញ្ចាក់ផងដែរថា ដំណើរកំសាន្ត Ford Adventure ដ៏អស្ចារ្យលើកទី ១៥ នេះមានរយៈពេល ៤ថ្ងៃ ៣យប់ គឺចាប់ពីថ្ងៃទី ១៥ ដល់ថ្ងៃទី ១៨ ខែធ្នូ ឆ្នាំ២០២២ ជាមួយនឹងអ្នកចូលរួមប្រមាណ១០០០នាក់ ធ្វើដំណើរជាក្បួន គយគន់ទេសភាពព្រៃភ្នំនៅតាមដងផ្លូវក្នុងទឹកដីខេត្តកោះកុង រួមជាមួយនឹងបទពិសោធន៍បោះជំរំដ៏អស្ចារ្យនៅលើវាលស្មៅ និងឆ្នេរខ្សាច់ដ៏ស្រស់ត្រកាលក្បែរមាត់សមុទ្រនៃខេត្តរ៉ាក់យ៉ង ប្រទេសថៃ។ លើសពីនេះទៅទៀត អ្នកចូលរួមទាំងអស់នឹងមានឱកាសចូលលេងសួនកម្សាន្ត និងដើរទិញទំនិញជាច្រើនសម្បូរបែបក្នុងតម្លៃសមរម្យក្នុងផ្សារទំនើបនៅទីក្រុងប៉ាតាយ៉ា ប្រទេសថៃទៀតផង។

លោក មីលី ហ្គុដមែន ប្រធានគ្រប់គ្រងជាន់ខ្ពស់ផ្នែកទីផ្សាររថយន្តFord នៃក្រុមហ៊ុន អ អិម អេ ខេមបូឌា (RMA Cambodia) បានមានប្រសាសន៍ថា៖ “កម្មវិធី Ford Adventure នេះជាកម្មវិធីធំជាងគេប្រចាំឆ្នាំរបស់ Ford Cambodia ដែលកម្មវិធីនេះរៀបចំឡើង គឺដើម្បីអោយអតិថិជនFord បានជួបជុំគ្នាកម្សាន្តជាមួយបងប្អូន មិត្តភក្តិ និងក្រុមគ្រួសារនាពេលចុងឆ្នាំ ដើម្បីបង្កើតមិត្តភាព ទំនាក់ទំនង ផ្លាស់ប្តូរបទពិសោធន៍ និងផ្សារភ្ជាប់ទំនាក់ទំនងធុរៈកិច្ចជាមួយគ្នាទៅវិញទៅមក ជាពិសេសគឺដើម្បីទទួលបានបទពិសោធន៍នៃការបោះជំរំដ៏អស្ចារ្យ។ ក្រៅពីកម្មវិធីដំណើរកម្សាន្ត អតិថិជន Ford និងក្រុមហ៊ុន នឹងមានសកម្មភាពសប្បុរសធម៌រួមគ្នានោះគឺ ការចែកអំណោយដល់ប្រជាពលរដ្ឋក្រីក្រ ចំនួន២០០គ្រួសារនៅក្នុងខេត្តកោះកុងផ្ទាល់ផងដែរ”។

ជាងនេះទៅទៀត លោកក៏បានបន្ថែមទៀតថា “អ្វីដែលធ្វើអោយកម្មវិធី Ford Adventure ឆ្នាំនេះពិសេសជាងឆ្នាំមុនៗនោះគឺ ត្រឹមតែរយៈពេល៣ថ្ងៃតែប៉ុណ្ណោះ កម្មវិធីនេះទទួលបានអ្នកចុះឈ្មោះចូលរួមយ៉ាងច្រើនលើសលប់ ដែលធ្វើឲ្យចំនួនរថយន្តដែលចូលរួមក្នុងកម្មវិធីនេះ កើនឡើងរហូតដល់ជាង២០០ឡាន លើសពីឆ្នាំមុនៗ។

លោក នុបផាប៉ាដុល ប្រៈចាំថែន (Nopphapadol Prajamthaen) ជំនួយការអគ្គនាយករង នៃក្រុមហ៊ុនប្រេងឥន្ធនៈ ភីធីធី ខេមបូឌា (PTT Cambodia) បានមានប្រសាសន៍ថា៖ «ខ្ញុំពិតជាមានសេចក្តីសោមនស្សរីករាយក្រៃលែង និងសូមថ្លែងអំណរគុណដល់ក្រុមហ៊ុន RMA Cambodia ដែលជឿជាក់លើផលិតផល និងសេវាកម្មរបស់ក្រុមហ៊ុន PTT Cambodia សម្រាប់កម្មវិធីដំណើរកម្សាន្ត Ford Adventure 2022 នេះ។ ស្ថានីយប្រេងឥន្ទនៈ PTT បានត្រៀមខ្លួនរួចជាស្រេចក្នុងការផ្តល់នូវប្រេងឥន្ទនៈ ក៏ដូចជាសេវាកម្មផ្សេងៗដែលបំពេញនូវតម្រូវការរបស់ អតិថិជន Ford ដើម្បីផ្តល់នូវភាពសប្បាយរីករាយក្នុងដំណើរកម្សាន្ត Ford Adventure នេះ»។

កញ្ញា ហ៊ាង សុខណា ប្រធានគ្រប់គ្រងផ្នែកយុទ្ធសាស្ត្រ នៃក្រុមហ៊ុនធានារ៉ាប់រងអាយុជីវិត FWD បានមានប្រសាសន៍ថា៖ «សព្វថ្ងៃនេះយើងមិនសូវមានពេលវេលាជាមួយគ្រួសារ ទទួលទានអាហារជុំគ្នា ឬបោះជំរំទេ ហើយកម្មវិធី Ford Adventure នេះជាឱកាសដ៏ល្អសម្រាប់អតិថិជន Ford ទាំងអស់ដើម្បីបំពេញនូវចំនុចខ្វះខាតទាំងអស់នេះ»។ ឆ្លៀតក្នុងឱកាសនេះដែរ កញ្ញាក៏បានធ្វើការលើកឡើងត្រួសៗពីប្រវត្តិ ផលិតផល សេវាកម្ម និងកម្មវិធីប្រ៉ូម៉ូសិនពិសេសៗរបស់ក្រុមហ៊ុន FWD ដើម្បីធ្វើការណែនាំ ក៏ដូចជាផ្តល់ជាជម្រើសជូនទៅដល់អតិថិជន Ford Adventure ផងដែរ។

លោក លាង ម៉ារឌី នាយក នាយកដ្ឋានអាជីវកម្ម និងផ្នែកលក់ នៃធនាគារឯកទេស KB Daehan បានមានប្រសាសន៍នៅក្នុងកម្មវិធីនេះ ដោយធ្វើការចែករំលែកនូវចំណេះដឹង បទពិសោធន៍ ភាពសប្បាយរីករាយ និងអនុស្សាវរីយ៍ល្អៗដែលលោកបានឆ្លងកាត់ក្នុងកម្មវីធី Ford Adventure ក្នុងឆ្នាំមុនៗ ទៅកាន់អតិថិជន Ford ដែលទើបតែចូលរួមលើកទីមួយក្នុងកម្មវិធីនេះ។ ក្រៅពីនេះ លោកក៏បានធ្វើការប្តេជ្ញាចិត្តក្នុងនាមជាធនាគារដៃគូសហការជាមួយ Ford ដើម្បីធ្វើការផ្តល់ជូននូវសេវាកម្មផ្តល់ប្រាក់កម្ចីសំរាប់ទិញរថយន្តមួយដែលប្រកបដោយទំនុកចិត្ត និងឆាប់រហ័សជូនដល់អតិថិជន Ford ទាំងអស់ដែលមានតម្រូវការសេវាកម្មនេះពីធនាគារឯកទេស KB Daehan៕

December 4, 2022

សហរដ្ឋអាម៉េរិក បញ្ចេញ «ឃាតករបំបាំងកាយ» ជំនាន់ទី 6 «B-21»

ក្រុមហ៊ុន Northrop Grumman បង្ហាញយន្តហោះ B-21 ដែលមានរហ័សនាមថា «ឃាតករបំបាំងកាយ» ដែលជាយន្តហោះទម្លាក់គ្រាប់បែកថ្មីដំបូងរបស់ សហរដ្ឋអាម៉េរិក ក្នុងរយៈពេលជាង 30 ឆ្នាំកន្លងមកនេះ។

ក្រុមហ៊ុនការពារជាតិអាម៉េរិក Northrop Grumman កាលពីយប់ថ្ងៃទី 02 ធ្នូ 2022 បានបង្ហាញយន្តហោះទម្លាក់គ្រាប់បែកបំបាំងកាយ B-21 Raider នៅក្នុងពិធីមួយនៅឯរោងចក្រលេខ 42 ក្នុងតំបន់ Palmdale រដ្ឋ California។ យន្តហោះដែលត្រូវបានបង្ហាញក្នុងព្រឹត្តិការណ៍នេះមានឈ្មោះកូដថា T1។ វាកំពុងស្ថិតក្នុងដំណាក់កាលសាកល្បងលើដី ហើយគ្រោងនឹងហោះហើរសាកល្បងដំបូងនៅឆ្នាំក្រោយ។ យ៉ាងហោចក៏មានយន្តហោះ 5 គ្រឿងទៀតក៏កំពុងស្ថិតក្នុងដំណាក់កាលផលិត។

នេះគឺជាម៉ូដែលយន្តហោះទម្លាក់គ្រាប់បែកថ្មីដំបូងរបស់ សហរដ្ឋអាម៉េរិក រាប់ចាប់តាំងពីទសវត្សរ៍ឆ្នាំ 1980 ជាពេលវេលាដែល B-2 Spirit ត្រូវបានដាក់ឱ្យប្រើក្នុងជួរកងទ័ព។ ក្រុមហ៊ុន Northrop Grumman ប្រកាសថា នេះគឺជា «យន្តហោះទម្លាក់គ្រាប់បែកបំបាំងកាយជំនាន់ទី 6 ត្រូវតាមអត្ថន័យពិតដំបូងគេលើពិភពលោក»។

ទ័ពអាកាសអាម៉េរិក គ្រោងបញ្ជាទិញ B-21 ប្រហែល 100 គ្រឿង ដើម្បីជំនួសយន្តហោះទម្លាក់គ្រាប់បែកយុទ្ធសាស្ត្រ B-1B Lancer និង B-2 Spirit នៅច្រើនសិបឆ្នាំខាងមុខ។ B-21 មួយគ្រឿងមានតម្លៃជិត 700 លានដុល្លារ ដោយមិនទាន់គិតដល់ថ្លៃស្រាវជ្រាវ និងផលិត ខណៈដែលគម្រោងទាំងមូលមានតម្លៃប្រហែល 203 ពាន់លានដុល្លារអាម៉េរិក៕

December 3, 2022

កីឡាករអ៊ុយរូហ្កាយ ដាល់រំលំអេក្រង់ VAR នៅ World Cup 2022 បន្ទាប់ពីត្រូវជម្រុះ

ខ្សែប្រយុទ្ធ Edinson Cavani របស់ អ៊ុយរូហ្កាយ ដាល់រំលំអេក្រង់ត្រួតពិនិត្យ VAR របស់អាជ្ញាកណ្ដាល ក្រោយពីក្រុមជម្រើសជាតិប្រទេសនេះត្រូវបានជម្រុះចេញពី World Cup នៅ កាតា។

វីដេអូដែលត្រូវបានបង្ហោះលើបណ្ដាញសង្គមក្រោយការប្រកួតរវាង អ៊ុយរូហ្កាយ និង ហ្កាណា កាលពីយប់ថ្ងៃទី 02 ធ្នូ បង្ហាញថា កីឡាករ Edinson Cavani របស់ក្រុមជម្រើសជាតិមកពី អាម៉េរិកខាងត្បូង បានដាល់រំលំអេក្រង់បច្ចេកវិទ្យាវីដេអូ ជាជំនួយសម្រាប់អាជ្ញាកណ្ដាល (VAR) នៅពេលគាត់កំពុងដើរចេញពីទីលានប្រកួតទៅកាន់បន្ទប់ផ្លាស់សម្លៀកបំពាក់។ បន្ទាប់មក ខ្សែប្រយុទ្ធវ័យ 35 ឆ្នាំ Cavani ក៏ដើរបន្តទៅមុខ ដោយមិនខ្ចីអើពើចមពោះអេក្រង់ VAR ដែលបានដួលរលំ។

បច្ចុប្បន្ន មិនទាន់ដឹងច្បាស់ថា អេក្រង់នេះរងការខូចខាត ឬយ៉ាងណានៅឡើយ។ ប៉ុន្តែ សកម្មភាពរបស់ Cavani ទទួលរងការរិះមួយចំនួន។

Cavani ចូលប្រកួតជំនួស Luis Suarez នៅនាទីទី 65 នៃការប្រកួត ដែលពេលនោះ អ៊ុយរូហ្កាយ កំពុងនាំមុខ ហ្កាណា 2-0 ហើយនេះក៏ជាលទ្ធផលចុងក្រោយនៃការប្រកួត។ ជ័យជម្នះនេះ គួរណាស់តែអាចឱ្យ អ៊ុយរូហ្កាយ ដើរទៅមុខបន្តទៀត ប៉ុន្តែ សំណាងមិនល្អ កូរ៉េខាងត្បូង បានយកឈ្នះ 2-1 លើ ព័រទុយហ្កាល់។

កូរ៉េខាងត្បូង និង អ៊ុយរូហ្កាយ មាន 4 ពិន្ទុដូចគ្នា និងមានគ្រាប់បាល់ចំណេញ (goal difference) ស្មើ 0 ដូចគ្នា ប៉ុន្តែ កូរ៉េខាងត្បូង ត្រូវជាប់ចំណាត់ថ្នាក់ទីពីរ ដោយសារតែមានគ្រាប់បាល់ឈ្នះច្រើនជាង។ ដូច្នេះ អ៊ុយរូហ្កាយ ត្រូវហាលអាវត្រឹមវគ្គដំបូងនេះ។

ចំពោះមូលហេតុដែលនាំឱ្យ Cavani ដាល់រំលំអេក្រង់ VAR ត្រូវបានគេជឿថា ព្រោះតែអាជ្ញាកណ្ដាលមិនបានផ្លុំកញ្ចែពិន័យប៉េណាំងទី នៅក្នុងពេល Edinson Cavani ដួលនៅក្នុងតំបន់គ្រោះថ្នាក់នៅនាទីថែមម៉ោងទីបី៕

December 3, 2022

ខ្សែប្រយុទ្ធ Suarez របស់ក្រុម អ៊ុយរូហ្កាយ យំដូចកូនក្មេងពេលដឹងថា កូរ៉េខាងត្បូង ឈ្នះ ព័រទុយហ្កាល

ខ្សែប្រយុទ្ធ Luis Suarez យំហើយយំទៀតនៅចុងការប្រកួតឈ្នះ ហ្កាណា 2-0 នៅ World Cup 2022 កាលពីយប់ថ្ងៃទី 02 ធ្នូ នៅពេលបានដឹងថា លទ្ធផលនេះមិនអាចជួយឱ្យ អ៊ុយរូហ្កាយ ឡើងទៅកាន់វគ្គ 8 ក្រុម។

Luis Suarez ចាកចេញពីទីលានប្រកួតនៅនាទីទី 66 ពេលដែល អ៊ុយរូហ្កាយ នាំមុខ ហ្កាណា 2-0។ គាត់មើលការប្រកួតនេះពីកន្លែងអង្គុយសម្រាប់កីឡាករបម្រុង និងតាមដានលទ្ធផលនៃការប្រកួតក្នុងម៉ោងដូចគ្នារវាង កូរ៉េខាងត្បូង និង ព័រទុយហ្កាល់។

ខ្សែប្រយុទ្ធវ័យ 35 ឆ្នាំខាងលើមិនអាចទប់ទឹកភ្នែកបាននៅពេលបានដឹងថា កូរ៉េខាងត្បូង នាំមុខ ព័រទុយហ្កាល់ 2-1 នៅនាទីដំបូងក្នុងការថែមម៉ោង។ ព្រោះថា លទ្ធផលនេះមានន័យថា អ៊ុយរូហ្កាយ នឹងត្រូវជម្រុះបើសិនមិនរកបានគ្រាប់បាល់បន្ថែម។

បើសិនជាលទ្ធផល កូរ៉េខាងត្បូង ឈ្នះ ព័រទុយហ្កាល់ 2-1 និង អ៊ុយរូហ្កាយ ឈ្នះ ហ្កាណា 2-0 មិនប្រែប្រួល នោះ កូរ៉េខាងត្បូង និង អ៊ុយរូហ្កាយ មាន 4 ពិន្ទុដូចគ្នា និងមានគ្រាប់បាល់ចំណេញ (goal difference) ស្មើ 0 ដូចគ្នា ប៉ុន្តែ កូរ៉េខាងត្បូង ត្រូវជាប់ចំណាត់ថ្នាក់ទីពីរ ដោយសារតែមានគ្រាប់បាល់ឈ្នះច្រើនជាង។

ពេលនោះ អ៊ុយរូហ្កាយ មាន 13 នាទីដើម្បីរកគ្រាប់បាល់បន្ថែមទៀត ដោយសារមានការពន្យារការប្រកួតថែម 8 នាទី។ បើទោះជាដាក់សម្ពាធយ៉ាងខ្លាំងក្លាទៅលើ ហ្កាណា នៅប៉ុន្មាននាទីចុងក្រោយ ប៉ុន្តែពុំមានអ្វីកើតឡើងសោះ។

ចប់ការប្រកួត Suarez នៅតែយំមិនឈប់ ខណៈដែលមិត្តរួមក្រុមរបស់គាត់ឡោមព័ទ្ធអាជ្ញាកណ្ដាល ដោយសារតែមិនបានផ្លុំកញ្ចែប៉េណាំងទី នៅក្នុងពេល Edinson Cavani ដួលនៅក្នុងតំបន់គ្រោះថ្នាក់នៅនាទីថែមម៉ោងទីបី៕

December 3, 2022

កីឡាករឆ្នើមរបស់ អាល្លឺម៉ង់ ឡើងទទួលពាន តែមុខក្រៀមដូច «ត្រូវគេកាត់អស់ប្រាក់ខែ»

កីឡាករខ្សែប្រយុទ្ធរបស់ អាល្លឺម៉ង់ ត្រូវបានគេចំអកលែបខាយ ព្រោះតែទឹកមុខដ៏ក្រៀមក្រំនៅពេលឡើងទទួលពាន់រង្វាន់កីឡាករឆ្នើមបំផុតក្នុងការប្រកួតជាមួយ កូស្តារីកា កាលពីពេលថ្មីៗនេះ។

ខ្សែប្រយុទ្ធ Kai Havertz របស់ក្រុមបាល់ទាត់ជម្រើសជាតិអាល្លឺម៉ង់ បង្ហាញទឹកមុខយ៉ាងក្រៀមក្រំបំផុត ពេលឡើងទទួលបានពានរង្វាន់កីឡាករឆ្នើមបំផុតនៅក្នុងការប្រកួតឈ្នះ កូស្តារីកា 4-2 ក្នុងជុំចុងក្រោយនៃវគ្គចែកពូលនៅ World Cup 2022។ ប្រការនេះធ្វើឱ្យអ្នកលេងបណ្ដាញសង្គមខ្លះឡកឡាយបញ្ចើចបញ្ចើ។

«បុរសដែលក្រៀមក្រំបំផុតលើពិភពលោក» គណនី Twitter មួយសរសេរដូច្នេះ។ គណនីមួយទៀតសរសេរថា «តើដូចទៅនឹងពេលវេលាដ៏ល្អរបស់ជីវិតគាត់ដែរទេ»។ «មើលទៅគាត់ដូចជាសប្បាយហើយតើ» ម្នាក់ទៀតសរសេរអមនឹងរូបតំណាងមុខញញឹម។

https://www.youtube.com/watch?v=-RAD0HeJ4Ws

កីឡាករ Havertz រកបាន 2 គ្រាប់នៅក្នុងការប្រកួតរវាង អាល្លឺម៉ង់ និង កូស្តារីកា ជួយឱ្យក្រុមជម្រើសជាតិប្រទេសនេះឈ្នះជាលើកដំបូងនៅ World Cup 2022 ក្រោយពីត្រូវគេនាំមុខ 1-2។ ប៉ុន្តែ ជ័យជម្នះនេះមិនគ្រប់គ្រាន់ដើម្បីឱ្យ Havertz និងក្រុមរបស់គាត់ធ្វើដំណើរបន្តឡើងទៅវគ្គ 1/8 បានឡើយ។ ប្រហែលជាដោយសារមូលហេតុនេះហើយ បានជាទឹកមុខរបស់ Havertz មិនរីកទាល់តែសោះនៅពេលឡើងទទួលពានកីឡាករឆ្នើមបំផុត៕

December 2, 2022

ប្រទេសថៃ មានឱកាសល្អដើម្បីជំរុញពាណិជ្ជកម្មវិស័យកសិផល វាយលុកទីផ្សារប្រទេសចិន

ការនាំចេញបន្លែ ផ្លែឈើរបស់ ប្រទេសថៃ ទៅកាន់ទីផ្សារភាគខាងត្បូងប្រទេសចិន នឹងកើនឡើងបន្តទៀត បន្ទាប់ពី ប្រទេសចិន បើកស្ថានីយត្រួតពិនិត្យជំងឺរាតត្បាតនៅក្នុងស្ថានីយរថភ្លើងល្បឿនលឿន Mohan។

រដ្ឋមន្ត្រីក្រសួងពាណិជ្ជកម្មថៃ Jurin Laksanawisit ឱ្យដឹងថា អគ្គនាយកដ្ឋានគយចិន កាលពីថ្ងៃទី 30 វិច្ឆិកា បានបញ្ចប់ការត្រួតពិនិត្យចំពោះស្ថានីយគ្រប់គ្រងជំងឺឆ្លងនៅលើរុក្ខជាតិដែលមានទីតាំងនៅក្នុងស្ថានីយរថភ្លើង Mohan ដែលនេះនឹងអនុញ្ញាតឱ្យបន្លែ ផ្លែឈើរបស់ ថៃ នាំចូលទៅកាន់ ប្រទេសចិន តាមរយៈស្ថានីយនេះ។

ស្ថានីយគ្រប់គ្រងជំងឺឆ្លងលើបន្លឺផ្លែឈើនេះនឹងដំណើរការចាប់ពីថ្ងៃទី 30 ធ្នូ 2022 ចំខួបមួយឆ្នាំនៃថ្ងៃបើកដំណើរការផ្លូវរថភ្លើងល្បឿនលឿនដែលភ្ជាប់ពី ប្រទេសឡាវ ទៅកាន់ ប្រទេសចិន។

យោងតាមលោក Jurin ផ្លូវរថភ្លើងល្បឿនលឿន Mohan ដែលរត់កាត់ប្រទេសឡាវ ទៅដល់ភាគខាងត្បូង ប្រទេសចិន នេះ នឹងជួយឱ្យ ប្រទេសថៃ ដឹកជញ្ជូនទំនិញបានលឿនជាង និងមិនសូវបង់ថ្លៃដឹកជញ្ជូន ដោយឆ្លងកាត់ខេត្ត Nongkhai ជាប់នឹងព្រំដែនរបស់ ប្រទេសឡាវ។

លោក Jurin និយាយថា ការដែល ចិន អនុញ្ញាតឱ្យនាំចូលបន្លែផ្លែឈើរបស់ ប្រទេសថៃ កាត់តាមស្ថានីយខាងលើ គឺជាការបើកឱ្យមានឱកាសថ្មីសម្រាប់អ្នកនាំចេញរបស់ប្រទេសទាំងពីរ។

ខេត្ត Yunnan ប្រទេសចិន គឺជាទីផ្សារមានសក្ដានុពលខ្លាំងសម្រាប់ ប្រទេសថៃ ក្នុងវិស័យស្បៀងអាហារ និងសេវាកម្ម ព្រោះថា នេះគឺជាខេត្តដែលនៅជិត ប្រទេសថៃ បំផុត និងមានការតភ្ជាប់ផ្លូវគោក និងផ្លូវរថភ្លើងល្បឿនលឿន ជាមួយនឹង តំបន់អាស៊ីអាគ្នេយ៍៕

ផ្លែទុរេនរបស់ ប្រទេសថៃ ដែលត្រៀមនាំចូលទីផ្សារចិន

December 2, 2022

(World Cup 2022) – ខ្សែបម្រើរបស់ក្រុមបាល់ទាត់ជម្រើសជាតិជប៉ុន មានភរិយាដ៏ស្រស់ស្អាត

អ្នកនាង Erina Mano ដែលជាភរិយារបស់កីឡាករបាល់ទាត់ជប៉ុន Gaku Shibasaki ត្រូវបានគេស្គាល់ថាជាកំពូលតារាម៉ូដែលឈុតទ្រនាប់ដ៏ស្រស់សោភា។

យោងតាម Yahoo Japan ស្រីស្អាតវ័យ 31 ឆ្នាំរូបនេះ កំពុងស្ថិតនៅ ប្រទេសកាតា ដើម្បីគាំទ្រស្វាមីដែលកំពុងប្រកួតនៅ World Cup 2022។ Gaku Shibasaki អាយុ 30 ឆ្នាំ លេងឱ្យក្លឹប Leganes (អេស្ប៉ាញ)។

Erina Mano ធ្លាប់មានសកម្មភាពលេចធ្លោក្នុងវិស័យសិល្បៈកម្សាន្តក្នុងនាមជាតារាចម្រៀង និងតារាសម្ដែង។ ក្រោយពីបានរៀបការកាលពីឆ្នាំ 2018 ស្រីស្អាតជនជាតិជប៉ុន នេះ ក៏បានកាត់បន្ថយសកម្មភាពថតកុន ព្រោះតែភាគច្រើននាងរស់នៅជាមួយស្វាមីនៅ ប្រទេសអេស្ប៉ាញ។

នាង Erina Mano ធ្លាប់ចូលរួមសម្ដែងក្នុងខ្សែភាពយន្តជាច្រើនរឿង ដូចជារឿង «There’s No Easy Job in This World», «We Married as Job Romaji» ឬ «Minna! Esper Dayo»។ល។ ប៉ុន្តែ បច្ចុប្បន្ន ការងារសំខាន់របស់នាងគឺដើរម៉ូដ។

នៅលើទំព័របណ្ដាញសង្គម Erina Mano ធ្លាប់បានឱ្យដឹងថា នាងផ្ដល់អាទិភាពឱ្យគ្រួសារជាងអាជីពផ្ទាល់ខ្លួន។ ស្រីស្អាតរូបនេះត្រូវបានគេចាត់ទុកថាជា «កំពូលតារាបង្ហាញម៉ូដឈុតទ្រនាប់» ដ៏ទាក់ទាញ។ ក៏ប៉ុន្តែ ក្រោយពីបានរៀបការ Mano ក៏លែងបង្ហោះរូបថតស៊ិចស៊ីនៅលើទំព័របណ្ដាញសង្គម៕

December 2, 2022

(World Cup 2022) – Cristiano Ronaldo មានឱកាសប្រហែល 50% សម្រាប់ការចេញទៅប្រកួតឆាប់ៗនេះ

បើទោះជាបានចេញទៅហាត់ឡើងវិញជាមួយនឹងក្រុមជម្រើសជាតិព័រទុយហ្កាល់ ប៉ុន្តែ Cristiano Ronaldo មានឱកាសប្រមាណតែ 50% ប៉ុណ្ណោះក្នុងការចូលរួមការប្រកួតនាពេលឆាប់ៗនេះ រវាង ព័រទុយហ្កាល់ និង កូរ៉េខាងត្បូង។

យោងតាម Daily Mail លទ្ធភាពនៃការចេញប្រកួតរបស់ Ronaldo ក្នុងការប្រកួតរវាង ពួរទុយហ្កាល់ និង កូរ៉េខាងត្បូង នាពេលឆាប់ៗនេះ គឺមានតែ 50% ប៉ុណ្ណោះ នេះបើតាមគ្រូបង្វឹករបស់ ក្រុមជម្រើសជាតិព័រទុយហ្កាល់។

មុនការចេញទៅហ្វឹកហាត់ឡើងវិញនេះ គ្រូបង្វឹក Fernando Santos ធ្លាប់បាននិយាយថា Ronaldo ត្រូវការរង់ចាំលទ្ធផលពិនិត្យសុខភាពទើបដឹងថា គាត់អាចចេញទៅប្រកួត ឬមិនអាច។ ប៉ុន្តែលោក Santos បញ្ជាក់ថា បានត្រៀមរួចរាល់ហើយសម្រាប់ករណីអវត្តមានរបស់ Ronaldo ក្នុងការប្រកួតនៅជុំដំបូងនៃវគ្គ 8 ក្រុមខាងមុខ។

«ចូររង់ចាំមើលថា តើ Ronaldo មានលទ្ធភាពអាចចេញទៅប្រកួត ឬទេ។ Ronaldo នឹងចេញទៅហាត់ឆាប់ៗនេះ។ ខ្ញុំមិនទាន់ដឹងច្បាស់ថា ឱកាសដែលគាត់អាចចូលប្រកួតមានដល់ 50% ដែរ ឬអត់នៅឡើយ។ 2 ប្រកួតកន្លងមក យើងបានជំនួស Ronaldo ដូច្នេះ យើងក៏មានផែនការសម្រាប់អវត្តមានរបស់គាត់» លោក Santos បញ្ជាក់មុនពេល Ronaldo ចេញទៅហាត់កាលពីពេលថ្មីៗនេះ។

Cristiano Ronaldo រកបាន 1 គ្រាប់ក្នុងការប្រកួតជាមួយ ហ្កាណា។ នៅជុំទី 2 នៃវគ្គចែកពូល គាត់ស្មានថា ខ្លួនជាអ្នករកបាន 1 គ្រាប់ទៀត ប៉ុន្តែ បច្ចេកវិទ្យាបានបញ្ជាក់ថា គ្រាប់បាល់នេះបានទៅលើ Bruno Fernandes៕

December 2, 2022

Author: សឿន សំណាង