សឿន សំណាង - La Reine Media

អារ៉ាប៊ីសាអូឌីត មានគម្រោងសាងសង់អគារកម្ពស់ 2 គីឡូម៉ែត្រ ដើម្បី «យកឈ្នះ» អគារ Burj Khalifa

អាជ្ញាធររបស់ អារ៉ាប៊ីសាអូឌីត កំពុងអញ្ជើញបណ្ដាក្រុមហ៊ុនស្ថាបត្យកម្មមកគូរប្លង់សម្រាប់អគារខ្ពស់បំផុតថ្មីមួយដែលគ្រោងនឹងសាងសង់នៅ រដ្ឋធានីរីយ៉ាដ។

អារ៉ាប៊ីសាអូឌីត នឹងសង់អគារកម្ពស់ 2 គីឡូម៉ែត្រនៅ រីយ៉ាដ នេះបើតាម MEED ចុះផ្សាយកាលពីថ្ងៃទី 07 ធ្នូ 2022។ អគារខ្ពស់កប់ពពកថ្មីដែលកំពុងត្រូវបានពិចារណាដោយមូលនិធិវិនិយោគសាធារណៈរបស់អារ៉ាប៊ីសាអូឌីត (PIF) នេះនឹងស្ថិតនៅក្នុងតំបន់ពង្រីកថ្មីទំហំ 18 គីឡូម៉ែត្រក្រឡានៅភាគខាងជើងនៃ រដ្ឋធានីរីយ៉ាដ។ អាជ្ញាធរកំពុងកំណត់តំបន់ដែលត្រូវបើកការដ្ឋាននៅក្បែរព្រលានយន្តហោះអន្តជាតិ King Khalid និងកំពុងធ្វើការសិក្សាលម្អិត។

អគារខ្ពស់ជាងគេបង្អស់លើពិភពលោកនាបច្ចុប្បន្នគឺ Burj Khalifa នៅទីក្រុង ឌូបៃ ដោយមានកម្ពស់ 828 ម៉ែត្រ។ យោងតាមក្រុមអ្នកម៉ៅការសំណង់ អគារទាំងឡាយណាដែលមានកម្ពស់ 2 គីឡូម៉ែត្រ ក្នុងតំបន់ នឹងត្រូវចំណាយថវិកាសាងសង់ឡើងដល់ 5 ពាន់លានដុល្លារអាម៉េរិក។

អាជ្ញាធរអារ៉ាប៊ីសាអូឌីត បានអញ្ជើញក្រុមហ៊ុនអភិវឌ្ឍសំណង់ ក្រុមហ៊ុនស្ថាបត្យកម្មសំណង់ និងក្រុមហ៊ុនគ្រប់គ្រងគម្រោងជាដើមចំនួន 8 ស្ថាប័ន ដើម្បីចូលរួមការប្រកួតប្រជែងក្នុងការរចនាអគារកប់ពពកថ្មីនេះ។

អារ៉ាប៊ីសាអូឌីត កំពុងអនុវត្តគម្រោងសាងសង់ធំៗជាច្រើន ក្នុងនោះមានដូចជា គម្រោងព្រលានយន្តហោះស្ដេច Khalid និងមហាគម្រោងទីក្រុង NEOM តម្លៃ 500 ពាន់លានដុល្លារអាម៉េរិក ក៏ដូចជាទីក្រុងបណ្ដោយត្រង់ The Line ប្រវែង 170 គីឡូម៉ែត្រជាដើម៕

December 13, 2022

គ្រោងសាងសង់ស្ពានតភ្ជាប់ពីផ្លូវជាតិលេខ 1 ទៅកាន់ស្រុកល្វាឯម ខេត្តកណ្តាល ត្រូវចំណាយទុន 200 លានដុល្លារអាម៉េរិក

នៅពេលដ៏ខ្លីខាងមុខ រាជរដ្ឋាភិបាលកម្ពុជា នឹងសាងសង់ស្ពានចំនួន 3 ថែមទៀត ក្នុងនោះ ស្ពានទី 1 ឆ្លងកាត់ទន្លេមេគង្គ ភ្ជាប់ពីក្រចេះទៅកំពង់ធំ និងស្ពាន 2 ទៀតនៅ ភ្នំពេញ និងខេត្តកណ្ដាល។

សម្តេចតេជោ ហ៊ុន សែន បានថ្លែងអំពីគម្រោងខាងលើនៅ ប្រទេសប៊ែលហ្ស៉ិក ក្នុងឱកាសអញ្ជើញសំណេះសំណាលជាមួយបងប្អូនខ្មែរនៅ អឺរ៉ុប កាលពីយប់ថ្ងៃទី 12 ធ្នូ 2022។

យោងតាមសម្ដេចតេជោ ស្ពានទាំងនេះរួមមាន ៖ ស្ពានទីមួយ ៖ ស្ពានឆ្លងកាត់ទន្លេមេគង្គ ត្រង់ខេត្តក្រចេះ ដែលតភ្ជាប់ពី ខេត្តក្រចេះ ឆ្ពោះទៅខេត្តកំពង់ធំ ហើយនឹងត្រូវបើកការដ្ឋាននៅដើមខែមករា 2023។ ស្ពានទីពីរ ៖ ស្ពានមិត្តភាពកម្ពុជា-សាធារណរដ្ឋកូរ៉េ ដែលភ្ជាប់ពីផ្សាររាត្រី-ជ្រោយចង្វារ និងពីជ្រោយចង្វារ-អរិយក្សត្រ។

ស្ពានទីបី ៖ ស្ពានភ្ជាប់ពីផ្លូវជាតិលេខ 1 ទៅកាន់ស្រុកល្វាឯម ខេត្តកណ្តាល ដែលត្រូវចំណាយទឹកប្រាក់ប្រមាណ 200 លានដុល្លារអាម៉េរិក។

December 13, 2022

កម្ពុជា រកឃើញអ្នកឆ្លងថ្មីនូវជំងឺកូវីដ-19 ចំនួន 26 នាក់ទៀត ក្នុងអំឡុង 24 ម៉ោងកន្លង

កម្ពុជា រកឃើញអ្នកឆ្លងថ្មីនូវជំងឺកូវីដ-19 ចំនួន 26 នាក់ និងជាសះស្បើយ 23 នាក់ ខណៈមិនមានអ្នកស្លាប់ នៅក្នុងអំឡុង 24 ម៉ោងនៃថ្ងៃទី 12 ធ្នូ 2022។

គិតត្រឹមព្រឹក ថ្ងៃទី 13 ខែធ្នូ 2022 កម្ពុជា មានអ្នកឆ្លងកូវីដ-19 សរុប 138,302 នាក់, អ្នកជាសះស្បើយ 135,130 នាក់ និងអ្នកស្លាប់សរុប 3,056 នាក់។

December 13, 2022

របបអាហារពិសេសដែលអាចជួយដាស់ «ហ្សែនចម្រើនអាយុ»

(សហរដ្ឋអាម៉េរិក)- ការសិក្សាស្រាវជ្រាវបង្ហាញថា របបអាហារដែលសម្បូរធញ្ញជាតិ បន្លែ សណ្ដែកសៀង និងមានខ្លាញ់តិច នឹងជួយជំរុញដំណើរការរបស់ហ្សែន FOX03 ដែលជួយឱ្យមនុស្សមានអាយុវែង។

លទ្ធផលនៃការស្រាវជ្រាវពី វិទ្យាស្ថានស្រាវជ្រាវអាយុ Kuakini Hawaii បានបង្ហាញថា ក្នុងចំណោមផ្នែកតំណពូជដែលទាក់ទងនឹងអាយុ គេឃើញថា ហ្សែន FOX03 គឺមានសារសំខាន់ជាងគេ។ វេជ្ជបណ្ឌិត Bradley Willcox ប្រធានក្រុមសិក្សាស្រាវជ្រាវខាងលើបានឱ្យដឹងថា គ្រប់គ្នាអាចដាស់ហ្សែន FOX03 តាមរយៈរបបអាហារ។

«សូម្បីតែនៅពេលអ្នកមិនមានហ្សែន FOX03 ពិសេសដែលទាក់ទងនឹងអាយុ ក៏នៅមានវិធីដើម្បីដាស់ហ្សែន បង្កើនទ្វេដងនូវសមត្ថភាពរស់បានយូរ» វេជ្ជបណ្ឌិត Bradley Willcox កាលពីថ្ងៃទី 07 ធ្នូ 2022 និយាយដូច្នេះ។

វេជ្ជបណ្ឌិត Bradley Willcox បាននិយាយដល់របបអាហារដែលមានឈ្មោះថា Okinawan។ ជារួម នេះគឺជារបបអាហារដែលមានកាឡូរី និងខ្លាញ់តិច ប៉ុន្តែសម្បូរ កាបូអ៊ីដ្រាត (carbohydrates) ក្នុងនោះមានដូចជា បន្លែ និងផលិតផលពីសណ្ដែកសៀង ហើយប្រើប្រាស់ដំឡូងជ្វាជាប្រភពផ្គត់ផ្គង់កាឡូរីចម្បង។

នៅក្នុងរបបអាហារ Okinawan អ្នកនឹងបរិភោគបន្លែពី 50 ទៅ 58% ដែលរួមមាន ដំឡូងជ្វា, សារាយសមុទ្រ ទំពាំង មើមស្ពៃ (ឆាយថៅ) ការ៉ុត ពោតបារាំង, ម្រះ ស្ពៃក្ដោប ល្ពៅ ល្ហុងខ្ចី។ របបអាហារនេះក៏មានគ្រាប់ធញ្ញជាតិ (ស្រូវអង្ករសាលីជាដើម) 33%, អាហារធ្វើពីសណ្ដែកសៀង 5% និង 1% ទៀត រួមមាន ស្រា តែ ទឹក គ្រឿងទេស។ គ្រឿងផ្សំពីរមុខដែលសម្បូរសារជាតិប្រឆាំងអុកស៊ីតកម្មដែលអាចបរិភោគតាមចិត្តក្នុងរបបអាហារ Okinawan គឺតែផ្កាម្លិះ និងរមៀត។

យោងតាម វេជ្ជបណ្ឌិត Bradley Willcox អាហារទាំងឡាយខាងលើសុទ្ធតែផ្ទុកសារជាតិចិញ្ចឹមខ្លាំងដែលត្រូវបានរកឃើញភាគច្រើននៅក្នុងរុក្ខជាតិសមុទ្រគឺ astaxanthin។ Astaxanthin ថែមទាំងជួយប្រឆាំងនឹងបញ្ហារលាកដំបៅទ្រង់ទ្រាយធំផងដែរ។

ការស្រាវជ្រាវបញ្ជាក់ថា astaxanthin គឺល្អសម្រាប់អ្នកមានជំងឺរលាក ដូចជា រលាកសន្លាក់ជាដើម។ ឆ្នាំ 2017 ក្រុមអ្នកវិទ្យាសាស្ត្រអាម៉េរិក នៅ សាកលវិទ្យាល័យ Hawaii ក៏បានរកឃើញថា astaxanthin អាចដាស់ «ហ្សែនចម្រើនអាយុ» FOX03 នៅលើសត្វកណ្ដុរ។

លទ្ធផលនៃការស្រាវជ្រាវដែលបានចុះផ្សាយលើទស្សនាវដ្ដី Nature Communications ក៏បានបង្ហាញថា FOX03 ក៏អាចរក្សាសមត្ថភាពបង្កបង្កើតខួរក្បាលឡើងវិញ តាមរយៈការរារាំងកោសិកាដើមមិនឱ្យបំបែកខ្លួនរហូតដល់ពេលបរិស្ថានមានអំណោយផលសម្រាប់ជីវិតរបស់កោសិកាថ្មី។

យោងតាម Daily Express កោសិកាដើម រួមផ្សំជាមួយហ្សែនប្រឆាំងភាពចាស់ បង្កើតបានជាខែលការពារ ប្រឆាំងនឹងឥទ្ធិពលនៃវ័យចាស់៕

December 13, 2022

(World Cup 2022) – Top 5 កីឡាករឆ្នើមបំផុតគិតត្រឹមមុនវគ្គពាក់កណ្ដាលផ្ដាច់ព្រ័ត្រ

ទំព័រ Goal បានជ្រើសរើសកីឡាករ 5 រូបដែលត្រូវបានចាត់ទុកថា ឆ្នើមជាងគេ គិតត្រឹមមុនវគ្គពាក់កណ្ដាលផ្ដាច់ព្រ័ត្ររបស់ World Cup 2022។

យោងតាមទំព័រ Goal កីឡាករ Lionel Mess របស់ អាហ្សង់ទីន កំពុងនាំមុខគេនៅក្នុងបញ្ជីចំណាត់ថ្នាក់ Top 5 ខាងលើ។ គិតមកដល់បច្ចុប្បន្ន តារាបាល់ទាត់វ័យ 35 ឆ្នាំរូបនេះ រកបាន 4 គ្រាប់ និងបង្កឱកាសស៊ុតបញ្ចូលទីជោគជ័យបាន 2 គ្រាប់។

ឈរលំដាប់ទីពីរគឺ Mbappe របស់ ក្រុមជម្រើសជាតិបារាំង។ ក្នុង 5 ប្រកួតកន្លងមក កីឡាករកើតឆ្នាំ 1998 នេះ រកបាន 5 គ្រាប់ ដែលនាំឱ្យគាត់ឈរលើកំពូលតារាងចំណាត់ថ្នាក់ស្ដីពីស្ដេចកម្ទេចសំណាក់។

លំដាប់បន្ទាប់បានទៅលើខ្សែប្រយុទ្ធ Antoine Griezmann (បារាំង), អ្នកចាំទី Donminik Livakovic (ក្រូអាត) និងខ្សែការពារ Achraf Hakimi (ម៉ារ៉ុក)៕

December 13, 2022

(World Cup 2022) – នេះជាក្រុមដែលត្រូវបានព្យាករថា អាចក្លាយជាម្ចាស់ជើងឯកក្នុងអត្រាខ្ពស់បំផុត

ស្ថិតិរបស់ Five Thirty Eight បានបង្ហាញអំពីអត្រានៃឱកាសដណ្ដើមបានពានរង្វាន់ជើងឯករបស់ 4 ក្រុមដែលមានវត្តមានក្នុងវគ្គពាក់កណ្ដាលផ្ដាច់ព្រ័ត្រនៅ World Cup 2022។

ការវិភាគដែលយោងទៅតាម «សន្ទស្សន៍កម្លាំងបាល់ទាត់» (SPI) របស់ Five Thirty Eight បានបង្ហាញថា អាហ្សង់ទីន គឺជាក្រុមនាំមុខគេស្ដីពីសមត្ថភាពនៃការដណ្ដើមបានពានរង្វាន់ជើងឯក World Cup 2022 ក្នុងអត្រា 37%។

SPI គឺជាពាក្យតំណាងការគណនាតាមរយៈការដាក់ពិន្ទុលើសមត្ថភាពវាយលុក និងការពាររបស់បណ្ដាក្រុមបាល់ទាត់ជម្រើសជាតិ។ ចំណែក Five Thirty Eight គឺជា គេហទំព័ររបស់ អាម៉េរិក ដែលផ្ដោតលើការសិក្សាស្រាវជ្រាវ ការស្ទង់មតិ ការស្រង់ស្ថិតិក្នុងវិស័យនយោបាយ កីឡា និងសេដ្ឋកិច្ច។

កន្លងមក មុនពេលគ្រាប់បាល់ World Cup 2022 ចាប់ផ្ដើមរមៀល ក្រុមអាហ្សង់ទីន ឈរត្រឹមលំដាប់ទី 4 ប៉ុណ្ណោះ ក្នុងចំណោមបេក្ខភាពសម្រាប់តំណែងជើងឯក ដោយមានអត្រា 8%។ ដំណាក់កាលនោះ Five Thirty Eight វាយតម្លៃថា ប្រេស៊ីល គឺជាក្រុមដែលមានឱកាសដណ្ដើមបានពានរង្វាន់ជើងឯកខ្ពស់បំផុត ក្នុង អត្រា 22%។ បន្ទាប់ពី ប្រេស៊ីល គឺក្រុមរបស់ អេស្ប៉ាញ (11%) និង បារាំង (9%)។

ក៏ប៉ុន្តែ នៅពេលវគ្គ 1/8 បានបញ្ចប់ ក្នុង top 4 នៃបេក្ខភាពជើងឯកដែលត្រូវបានព្យាករថា មានឱកាសច្រើនជាងគេ នៅសល់តែ អាហ្សង់ទីន និង បារាំង។ មុននោះ នៅពេល ប្រេស៊ីល ត្រូវបានជម្រុះពីវគ្គ 1/8 ដោយសារតែចាញ់ ក្រូអាត ក្នុងការប្រកួតទាត់ប៉េណាំងទី អេស្ប៉ាញ ឯណោះវិញក៏បានចាញ់ ម៉ារ៉ុក ហើយក៏ត្រូវហាលអាវត្រឹមវគ្គនេះ។

សម្រាប់វគ្គពាក់កណ្ដាលផ្ដាច់ព្រ័ត្រ ក្រុមដែលឈរលំដាប់បន្ទាប់ពី អាហ្សង់ទីន ស្ដីពីដែលដែលឱកាសដណ្ដើមបានពាន់រង្វាន់ជើងឯក World Cup 2022 គឺក្រុមរបស់ បារាំង ដោយមានអត្រា 35%។ បន្ទាប់ពី បារាំង គឺក្រុមរបស់ ក្រូអាត ដោយមាន 16% និងឈរក្រោយគេគឺ ម៉ារ៉ុក ដោយមាន 13%។

នៅវគ្គពាក់កណ្ដាលផ្ដាច់ព្រ័ត្រ អាហ្សង់ទីន នឹងប៉ះ ក្រូអាត នៅម៉ោង 2 ថ្ងៃទី 14 ធ្នូ។ មួយថ្ងៃក្រោយមក នឹងមានការប្រកួតរវាង បារាំង និង ម៉ារ៉ុក៕

December 13, 2022

រូបថត 10 សន្លឹកដ៏អស្ចារ្យបំផុតនៅក្នុងបេសកកម្មទៅកាន់ឋានព្រះចន្ទ Artemis 1

បេសកកម្មដំបូងនៅក្នុងកម្មវិធី Artemis របស់ ណាសា (NASA) បានបញ្ចប់ដោយជោគជ័យ ក្នុងនោះមានរូបថតច្រើនសន្លឹកដែលស្ដែងឱ្យឃើញភាពអស្ចារ្យនៃបេសកកម្មវិទ្យាសាស្ត្រនេះ។

(រូបខាងលើ) 9 ថ្ងៃមុនពេលចាប់ផ្ដើមការហោះហើររបស់ Artemis 1 ប្រព័ន្ធបាញ់បង្ហោះ SLS របស់ ណាសា ក្នុងមជ្ឈមណ្ឌលអវកាស Kennedy នៅ Florida បានត្រៀមខ្លួនរួចរាល់។

នេះជារូបភាពនៅប៉ុន្មានវិនាទីក្រោយពីរ៉ុក្កែតត្រូវបានបញ្ឆេះម៉ាស៊ីន ចាប់ផ្ដើមការហោះហើរទៅកាន់ឋានព្រះចន្ទកាលពីថ្ងៃទី 16 វិច្ឆិកា 2022។

រូបភាពបង្ហាញពី SLS បន្ទាប់ពីបានចាប់ផ្ដើមហោះឡើងបានមួយនាទី ។ SLS គឺជារ៉ុក្កែតកម្លាំងខ្លាំងបំផុតរបស់ពិភពលោក។

ថ្ងៃទី 16 វិច្ឆិកា 2022 ដែលជាថ្ងៃដំបូងនៃបេសកកម្ម Artemis 1 យានអវកាស Orion ថតរូបរបស់ផែនដីពីទីអវកាសដែលមានចម្ងាយប្រហែល 91,732 គីឡូម៉ែត្រ ក្នុងពេលហោះហើរទៅឋានព្រះចន្ទ។

នៅថ្ងៃទី 13 នៃបេសកកម្ម យាន Orion ហោះទៅដល់តំបន់ឆ្ងាយពីផែនដីបំផុត (432,210 គីឡូម៉ែត្រ)។

ក្នុងថ្ងៃទី 05 ធ្នូ 2022 ដែលជាថ្ងៃទី 20 របស់បេសកកម្ម Artemis 1 យាន Orion ថតរូបភាពផ្ទៃរបស់ព្រះចន្ទពីអវកាសកម្រិតទាប។

ថ្ងៃទី 21 នៃបេសកកម្ម (ថ្ងៃទី 05 ធ្នូ) យាន Orion បែរទៅក្រោយមើលព្រះចន្ទ បន្ទាប់ពីបានហោះជុំវិញឋាននេះ និងចាប់ផ្ដើមដំណើរត្រលប់មកកាន់ផែនដី។

ឧបករណ៍នានារបស់ ណាសា ដែលនៅក្នុងយាន Orion ក្នុងនោះមានទាំងតុក្កតារូបសុនក Snoopy ក្នុងឈុតអ្នកអវកាស កំពុងអណ្ដែតដោយសារគ្មានកម្លាំងទំនាញ។

ប៉ុន្មាននាទីមុនពេលយាន Orion ទម្លាក់ខ្លួនចូលបរិយាកាសផែនដីក្នុងល្បឿន 40,000 គីឡូម៉ែត្រ/ម៉ោង វាក៏ថតរូបចុងក្រោយរបស់ផែនដីពីទីអវកាស។ ខែលការពារកម្ដៅរបស់យាន Orion អាចស៊ូតនឹងសីតុណ្ហភាព 2,800 អង្សាសេ ពេលកំពុងធ្លាក់ឆ្លងកាត់បរិយាកាស ដែលកម្ដៅនេះជិតស្មើនឹងពាក់កណ្ដាលនៃកម្ដៅរបស់ផ្ទៃព្រះអាទិត្យ។

នៅវេលាម៉ោង 00 និង 40 នាទី ថ្ងៃទី 12 ធ្នូ 2022 ម៉ោងនៅ កម្ពុជា យាន Orion បានចុះចតលើមហាសមុទ្រប៉ាស៊ីហ្វិក ក្នុងតំបន់ដែលមានចម្ងាយ 9.3 គីឡូម៉ែត្រពីកប៉ាល់ស្រង់ USS Portland របស់ទ័ពជើងទឹកអាម៉េរិក៕

December 12, 2022

គម្រោងសាងសង់ស្ពានឆ្លងកាត់ទន្លេមេគង្គ-ខេត្តក្រចេះ នឹងប្រកាសបើកការដ្ឋាននាពេលឆាបៗ

«គម្រោងសាងសង់ស្ពានឆ្លងកាត់ទន្លេមេគង្គ-ខេត្តក្រចេះ» និង «គម្រោងលើកកម្ពស់គុណភាពផ្លូវជាតិ លេខ 7 (ពីទីប្រជុំជនស្គន់ ដល់ក្រុងកំពង់ចាម)» គ្រោងនឹងរៀបចំកម្មវិធីប្រកាសបើកការដ្ឋាននាដើមខែមករា ឆ្នាំ 2023 នេះបើតាម ក្រសួងសាធារណការ និងដឹកជញ្ជូន។

ព័ត៌មានខាងលើត្រូវបានលើកឡើងនៅ ទីស្តីការក្រសួងសាធារណការ និងដឹកជញ្ជូន នាព្រឹកថ្ងៃទី 12 ធ្នូ 2022 ក្នុងកិច្ចប្រជុំស្ដីពីការរៀបចំកម្មវិធីប្រកាសបើកការដ្ឋានគម្រោងសាងសង់ហេដ្ឋារចនាសម្ព័ន្ធខាងលើ ដែលគ្រោងនឹងធ្វើឡើងនៅខែមករា 2023 ខាងមុខ។

យោងតាមក្រសួងសាធារណការ គម្រោងទាំងនេះទទួលបានហិរញ្ញប្បទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន៕

December 12, 2022

មកស្វែងយល់អំពី Oulu ដែលជា «ទីក្រុងកង់រដូវរងា» នៅទ្វីបអឺរ៉ុប

(ហ្វាំងឡង់)- សីតុណ្ហភាពចុះដល់ -25 អង្សាសេក៏មិនអាចរារាំងអ្នកជិះកង់នៅទីក្រុង Oulu ជាកន្លែងដែលហៅខ្លួនឯងថា «ទីក្រុងកង់រដូវរងា» បានឡើយ។

«ខ្ញុំជិះកង់ពេញមួយឆ្នាំ។ ខ្ញុំថែមទាំងគ្មានរថយន្ត» Ari Karjalainen ឱ្យដឹងដូច្នេះនៅពេលត្រលប់ទៅផ្ទះក្រោយពីបានទិញគ្រឿងទេសកាលពីថ្ងៃទី 01 ធ្នូ។

Oulu ដែលជាទីក្រុងនៅភាគខាងជើងប្រទេសហ្វាំងឡង់ មានចម្ងាយពីតំបន់អាកទិក ឬហៅថាប៉ូលខាងជើងប្រហែល 160 គីឡូម៉ែត្រទៅទិសខាងត្បូង។ បើទោះជាមេឃធ្លាក់ព្រឹល ទីតាំងចតកង់នៅតែពេញណែន។ ប្រជាជនក្នុងតំបន់ស្ទើរតែគ្រប់រូប ចូលចិត្តជិះកង់ មិនថា ក្ដៅ ឬត្រជាក់។

«ឱ្យតែស្លៀកពាក់កក់ក្ដៅ» Mimmi Kahkonen អាយុ 22 ឆ្នាំ ឆ្លើយតបដូច្នេះនៅពេលត្រូវបានសួរថា ធ្វើយ៉ាងណាដើម្បីជិះកង់ក្នុងអាកាសធាតុត្រជាក់បែបនេះ។

មនុស្សមួយចំនួនជិះកង់ដែលប្រើប្រាស់សម្បកកង់ពិសេសមិនរអិលសម្រាប់រដូវរងា ប៉ុន្តែអ្នកខ្លះក៏នៅតែប្រើប្រាស់សម្បកកង់ធម្មតា។

«ពួកយើងបានស៊ាំនឹងរដូវត្រជាក់ទៅហើយ ដូច្នេះមិនគិតថានេះគឺជាឧបសគ្គធំឡើយ» Harri Vaarala វិស្វករផ្នែកគមនាគមន៍របស់ទីក្រុង ថ្លែងដូច្នេះ។

ទីក្រុងឆ្នេរសមុទ្រ Oulu ជាមធ្យមធ្លាក់ព្រឹល 5 ខែ និងសីតុណ្ហភាពក្រោម 0 អង្សាសេ ពេញមួយឆ្នាំ។ កង់គឺជាមធ្យោបាយធ្វើដំណើរដែលរួមចំណែក 1/5 នៃចរាចរណ៍សរុបតាមដងផ្លូវ។ Harri Vaarala ពន្យល់ថា កត្តាសំខាន់មួយដែលធ្វើឱ្យកង់ទទួលបានការពេញនិយមគឺថា ទីក្រុងមានគន្លងផ្លូវសម្រាប់កង់ ដែលទទួលបានអាទិភាពក្នុងការឈូសឆាយ និងថែទាំជាពិសេសនៅពេលមានព្រឹលធ្លាក់។

សាលា Metsokangas មានសិស្ស 1,200 នាក់ ក្នុងនោះមានប្រហែល 1,000 នាក់ជិះកង់ទៅរៀនពេញមួយរដូវរងា។ ប៉ុន្មានឆ្នាំមកនេះ ទីក្រុងបានបើកឱ្យប្រើប្រាស់គន្លង «ផ្លូវល្បឿនលឿនសម្រាប់កង់» ដែលមានទទឹង 6 ម៉ែត្រ។

យោងតាម Harri Vaarala នៅតំបន់មួយចំនួន សាលាក្រុងថែមទាំងផ្ដល់អាទិភាពដល់កង់ច្រើនជាងរថយន្ត ហើយកន្លែងខ្លះទៀតក៏ប្ដូរគន្លងសម្រាប់រថយន្តមកជាគន្លងសម្រាប់កង់ទៀតផង ដោយផ្អែកទៅលើតម្លៃ និងអត្ថប្រយោជន៍ជាក់ស្ដែង។

សាលាក្រុង Oulu មានក្រុមការងារតាមដានគន្លងផ្លូវសម្រាប់កង់ ដើម្បីធានាថា មិនមានព្រឹល ឬឧបសគ្គដែលអាចបង្កផលប៉ះពាល់ដល់អ្នកជិះកង់៕

December 12, 2022

ឧទ្យានផ្ទះកញ្ចក់កសិកម្មទំនើបមួយផលិតបន្លែបាន 3,600 តោនជារៀងរាល់ឆ្នាំ

Shouguang គឺជាមជ្ឈមណ្ឌលផលិត និងចែកចាយបន្លែធំជាងគេមួយនៅ ប្រទេសចិន ដោយមានចំការបន្លែផ្ទះកញ្ចក់ទំនើបជាច្រើន។

នៅឯឧទ្យានកសិកម្មទំនើបបែបថ្មីនៅទីក្រុង Shouquang ខេត្ត Shandong ប្រទេសចិន កសិករកំពុងតែញាប់ដៃញាប់ជើងក្នុងការបេះបន្លែក្នុងផ្ទះកញ្ចក់។ Ma Xiuli ជាកសិករដាំបន្លែមួយរូបនិយាយថា «យើងប្រមូលផលប្រហែល 500 គីឡូក្រាមជារៀងរាល់ថ្ងៃ។ ពេលនេះជាពេលប្រមូលផលកម្រិតខ្ពស់។ បរិមាណបន្លែក្នុងផ្ទះកញ្ចក់របស់ខ្ញុំ ជាមធ្យមពី 22,500 ដល់ 25,000 គីឡូក្រាមក្នុងមួយឆ្នាំ»។

Shouguang គឺជាមជ្ឈមណ្ឌលផលិត និងចែកចាយបន្លែធំជាងគេមួយនៅ ប្រទេសចិន។ ឧទ្យានបែបទំនើបថ្មីនេះមានផ្ទះកញ្ចក់ប្រហែល 160 ខ្នង ផ្ដល់ទិន្នផលបន្លែ 3,600 តោនជារៀងរាល់ឆ្នាំ។

«ផ្ទះកញ្ចក់របស់យើងមានសមត្ថភាពគ្រប់គ្រងសីតុណ្ហភាពបានល្អ» លោក Li Guangju មកពីមន្ទីរកសិកម្ម និងជនបទរបស់ក្រុង Shouquang ថ្លែងដូច្នេះ និងបន្តថា «នៅពេលសីតុណ្ហភាពខាងក្រៅធ្លាក់ចុះ -13 ទៅ -14 អង្សាសេ យើងនៅតែអាចកែប្រែកម្ដៅខាងក្នុងពី 13 ដល់ 14 ឬដល់ទៅ 15 អង្សាសេក៏មាន»។

លោក Li Guangju បញ្ជាក់ថា សីតុណ្ហភាពដូចខាងលើអាចធានាចំពោះការរីកលូតលាស់របស់តាសក់ផ្អរ ត្រប់ ប៉េងប៉ោះជាដើម។ យោងតាម លោក Li Guangju មជ្ឈមណ្ឌលខាងលើ មានបំពាក់ឧបករណ៍ឆ្លាតវៃ ដែលជួយបង្កើនទិន្នផល ក៏ដូចជាគុណភាពបន្លែផងដែរ។

ដោយសារតែ Shouquang គឺជាមជ្ឈមណ្ឌលផ្គត់ផ្គង់បន្លែមួយដ៏សំខាន់របស់ ប្រទេសចិន ដូច្នេះ អាជ្ញាធរ ក៏ដូចជាកសិករ បាន និងកំពុងខិតខំធានាការផ្គត់ផ្គង់បន្លែឱ្យបានទាន់ពេលសម្រាប់ទីផ្សារនានាក្នុងប្រទេស។

Zhang Linlin មកពីនាយកដ្ឋានកសិកម្ម និងជនបទរបស់ទីក្រុង Shouquang ឱ្យដឹងថា Shouquang គឺជាដែនដីកសិកម្មរបស់ ប្រទេសចិន ដោយមានផ្ទៃដីដាំដុះសរុប 40,000 ហិកតា ដែលផ្ដល់ទិន្នផលប្រចាំឆ្នាំឡើងដល់ 4.5 លានតោន៕

December 12, 2022

Author: សឿន សំណាង