សឿន សំណាង - La Reine Media

ប្រាក់ចំណូលបានពីប្រេងឆៅរបស់ប្រទេសរុស្ស៊ី ចាប់ផ្ដើមថយចុះ

អង្គការថាមពលអន្តរជាតិ និយាយថា ប្រាក់ចំណូលរបស់ ប្រទេសរុស្ស៊ី ដែលបានពីរ៉ែប្រេងក្នុងខែវិច្ឆិកា បានថយចុះ បើទោះជាបរិមាណប្រេងដែលបានលក់ចេញបានកើនឡើង ដែលនេះគឺជាសញ្ញាបញ្ជាក់ថា ទណ្ឌកម្មរបស់លោកខាងលិច ចាប់ផ្ដើមមានប្រសិទ្ធភាព។

យោងតាម Guardian ដែលចុះផ្សាយនាថ្ងៃនេះបានឱ្យដឹងថា អង្គការថាមពលអន្តរជាតិ (IEA) គណនាឃើញថា រុស្ស៊ី រកបានចំណូលប្រហែល 15.8 ពាន់លានដុល្លារអាម៉េរិក ពីការលក់ប្រេងនៅក្នុងខែវិច្ឆិកា 2022 ដែលនេះគឺជាកម្រិតទាបទីពីរក្នុងឆ្នាំនេះ។

ចំណែកបរិមាណប្រេងឆៅ និងផលិតផលធ្វើពីប្រេងរបស់ រុស្ស៊ី បានកើនឡើងដល់ 8.1 លានធុង/ថ្ងៃ ដែលនេះគឺជាកម្រិតខ្ពស់បំផុតរាប់ចាប់ពីខែមេសា 2022។

Guardian បានឱ្យដឹងថា នេះទំនងជាសញ្ញាបញ្ជាក់ថា ទណ្ឌកម្មពីបណ្ដាប្រទេសលោកខាងលិចដែលដាក់ទៅលើ ទីក្រុងមូស្គូ ក្នុងបំណងកាត់បន្ថយប្រាក់ចំណូលពីការនាំចេញថាមពលរបស់ រុស្ស៊ី ចាប់ផ្ដើមមានប្រសិទ្ធភាព។

សហភាពអឺរ៉ុប (EU) និង G7 កាលពីថ្ងៃទី 05 ធ្នូ បានឯកភាពគ្នាក្នុងការកំណត់តម្លៃពិតានឱ្យនៅត្រឹម 60 ដុល្លារអាម៉េរិក/ធុង ចំពោះប្រេងដែលដឹកជញ្ជូនតាមផ្លូវសមុទ្ររបស់ រុស្ស៊ី គ្រាដែលបស្ចិមលោកចង់កាត់បន្ថយប្រាក់ចំណូលរបស់ មូស្គូ ផង និងចង់គ្រប់គ្រងបញ្ហាអតិផរណាក្នុងវិស័យថាមពលផង។ ប្រេងដែលមិនមែនជារបស់ រុស្ស៊ី កាលពីថ្ងៃទី 14 ធ្នូ មានតម្លៃប្រហែល 81 ដុល្លារអាម៉េរិក/ធុង៕

December 15, 2022

កម្ពុជា រកឃើញអ្នកឆ្លងថ្មីនូវជំងឺកូវីដ-19 ចំនួន 27 នាក់ទៀត ក្នុងអំឡុង 24 ម៉ោងកន្លង

កម្ពុជា រកឃើញអ្នកឆ្លងថ្មីនូវជំងឺកូវីដ-19 ចំនួន 27 នាក់ និងជាសះស្បើយ 13 នាក់ ខណៈមិនមានអ្នកស្លាប់ នៅក្នុងអំឡុង 24 ម៉ោងនៃថ្ងៃទី 14 ធ្នូ 2022។

គិតត្រឹមព្រឹក ថ្ងៃទី 15 ខែធ្នូ 2022 កម្ពុជា មានអ្នកឆ្លងកូវីដ-19 សរុប 138,347 នាក់, អ្នកជាសះស្បើយ 135,158 នាក់ និងអ្នកស្លាប់សរុប 3,056 នាក់។

December 15, 2022

ពិព័រណ៍ផលិតផលខ្មែរ និងទំនិញនាំចេញ-នាំចូល លើកទី 15 ចាប់ផ្ដើមទទួលភ្ញៀវ

(ភ្នំពេញ)- ពិព័រណ៍ផលិតផលខ្មែរ និងទំនិញនាំចេញ-នាំចូលលើកទី 15 ត្រូវបានសម្ពោធបើកទទួលភ្ញៀវឡើងវិញនៅមជ្ឈមណ្ឌលសន្និបាត និងពិព័រណ៍កោះពេជ្រ ក្រោយការផ្អាក 2 ឆ្នាំ ដោយសារជំងឺរាតត្បាត។

ពិព័រណ៍ផលិតផលខ្មែរ និងទំនិញនាំចេញ-នាំចូល លើកទី 15 នេះ នឹងធ្វើឡើងក្នុងរយៈពេល 4 ថ្ងៃ រាប់ចាប់ពីថ្ងៃទី 15 ដល់ 18 ធ្នូ 2022 នេះបើតាមក្រុមអ្នករៀបចំកម្មវិធី។ ពិព័រណ៍នេះមានស្តង់សរុបចំនួន 268 ស្តង់ ដែលមានដូចជា ស្តង់របស់ សហព័ន្ធស្រូវអង្ករ អង្គការ សមាគមអាជីវកម្ម ក្រុមហ៊ុន សហគ្រាសក្នុងស្រុក និងក្រុមហ៊ុនមកពីបរទេស និងស្ដង់របស់អាជ្ញាធរកម្ពុជាជាដើម។

ក្នុងពិព័រណ៍នេះមានការចូលរួមតាំងបង្ហាញរបស់ស្ថាប័នមកពីប្រទេសមួយចំនួន មានដូចជា ប្រទេសថៃ វៀតណាម ឡាវ ឥណ្ឌូណេស៊ី សិង្ហបុរី កូរ៉េខាងត្បូង ជប៉ុន ចិន ឥណ្ឌា ប៉ាគីស្ថាន អ៊ីតាលី តួកគី និងសហរដ្ឋអាម៉េរិក ផងដែរ។

យោងតាមអ្នករៀបចំពិព័រណ៍ បណ្ដាផលិតដែលដាក់តាំងបង្ហាញក្នុងឱកាសនេះគឺផ្ដោតសំខាន់ទៅលើផលិតផលកសិកម្ម មានដូចជាបន្លែ ផ្លែឈើ ផលិតផលកែច្នៃពីកសិផល ម្ហូបអាហារ ភេសជ្ជៈ ក៏ដូចជាគ្រឿងអលង្ការ និងគ្រឿងសំអាងជាដើម។ល។

December 15, 2022

(World Cup 2022)- គ្រូបង្វឹករបស់ ម៉ារ៉ុក ៖ «ខ្ញុំចង់ឱ្យ បារាំង លើកពានជើងឯក»

លោក Walid Regragui សង្ឃឹមថា បារាំង ដណ្ដើមបានជោគជ័យនៅវគ្គផ្ដាច់ព្រ័ត្រ ដើម្បីឱ្យ ម៉ារ៉ុក អាចមានមោទកភាព ព្រោះចាញ់តែម្ចាស់ពានជើងឯក World Cup 2022។

«ខ្ញុំជូនពរប្រទេសបារាំង។ យើងនឹងគាំទ្រពួកគេ» លោក Regragui ដែលជាជនជាតិម៉ារ៉ុក កើតនៅ ប្រទេសបារាំង ប៉ុន្តែក្រោយមកក៏បានលេង និងដឹកនាំក្រុមជម្រើសជាតិរបស់ ម៉ារ៉ុក ថ្លែងដូច្នេះ បន្ទាប់ពីការប្រកួតនៅវគ្គពាក់កណ្ដាលផ្ដាច់ព្រ័ត្រកាលពីយប់ថ្ងៃទី 14 ធ្នូ។

លោក Regragui បន្ថែមថា «យើងចង់ឱ្យ បារាំង ដណ្ដើមបានជោគជ័យនៅវគ្គផ្ដាច់ព្រ័ត្រ ដើម្បីអាចនិយាយបានថា យើងខ្ញុំចាញ់តែម្ចាស់ជើងឯកពិភពលោក។ ប្រការនោះអាចនឹងល្អសម្រាប់ពួកយើង»។

នៅវគ្គផ្ដាច់ព្រ័ត្រ បារាំង នឹងត្រូវប៉ះ អាហ្សង់ទីន នៅយប់ថ្ងៃទី 18 ធ្នូ។ ចំណែក ម៉ារ៉ុក នឹងត្រូវជួប ក្រូអាត ក្នុងការប្រកួតដណ្ដើមពានរង្វាន់លេខ 3 មុននោះមួយថ្ងៃ។ យោងតាមលោក Regragui ឱកាសសម្រាប់ក្រុមទាំងពីរនេះគឺ 50-50។ «បើសិនជា បារាំង ឈ្នះការប្រកួតផ្ដាច់ព្រ័ត្រម្ដងទៀត នោះនឹងជាជ័យជម្នះពីរលើកផ្ទួនៗក្នុងប្រវត្តិសាស្ត្រ។ ពួកគេគឺក្រុមជម្រើសជាតិឆ្នើមបំផុតលើពិភពលោកក្នុងរយៈពេលច្រើនឆ្នាំកន្លង» លោក Regragui អះអាងដូច្នេះ។

លោក Walid Regragui គ្រូបង្វឹករបស់ ក្រុមបាល់ទាត់ជម្រើសជាតិម៉ារ៉ុក

ក្នុងប្រវត្តិសាស្ត្រ មានតែ អ៊ីតាលី (ឆ្នាំ 1934, 1938) និង ប្រេស៊ីល (ឆ្នាំ 1958, 1962) ប៉ុណ្ណោះ ដែលជាក្រុមជម្រើសជាតិដណ្ដើមបានពាន់រង្វាន់ជើងឯក 2 លើកបន្តបន្ទាប់៕

December 15, 2022

(World Cup 2022)- អ្នកគាំទ្រម៉ារ៉ុក ប៉ះទង្គិចជាមួយប៉ូលិសនៅ បែលហ្ស៊ិក

អ្នកគាំទ្រប្រហែល 100 នាក់ ក្នុងនោះមានទាំងអ្នកចងទង់របស់ ប្រទេសម៉ារ៉ុក បានប៉ះទង្គិចជាមួយប៉ូលិសនៅ ព្រុចសែល បន្ទាប់ពីក្រុមបាល់ទាត់ជម្រើសជាតិរបស់ ម៉ារ៉ុក ចាញ់ ក្រុមបារាំង នៅវគ្គពាក់កណ្ដាលផ្ដាច់ព្រ័ត្រ។

ក្រុមអ្នកគាំទ្រម៉ារ៉ុក កាលពីយប់ថ្ងៃទី 14 ធ្នូ បានប្រមូលផ្ដុំគ្នានៅក្បែរស្ថានីយរថភ្លើង Brussels South និងបាននាំគ្នាបាញ់កាំជ្រួច និងគប់វត្ថុផ្សេងៗទៅលើក្រុមប៉ូលិសប្រឆាំងកុបកម្ម ព្រមទាំងបានដុតធុងក្រដាស និងថង់សំរាមផងដែរ។ ប៉ូលិសក៏បានប្រើប្រាស់រថយន្តពន្លត់អគ្គិភ័យបាញ់ទឹក និងបាញ់ផ្សែងបង្ហូរទឹកភ្នែកដើម្បីរំសាយហ្វូងមនុស្ស។

ការប៉ះទង្គិចគ្នារវាងប៉ូលិស និងអ្នកគាំទ្រម៉ារ៉ុក បានកើតឡើងក្នុងរយៈពេលខ្លី និងមិនបង្កឱ្យមានការខូចខាតធ្ងន់ធ្ងរនោះទេ។ ប៉ូលិសក៏បានចាប់ខ្លួនមនុស្សមួយចំនួន។

យោងតាម Mirror ការប៉ះទង្គិចបែបនេះក៏បានកើតឡើងក្នុងតំបន់មួយចំនួននៅ ប្រទេសបារាំង ផងដែរ។ ប៉ូលិសប្រឆាំងកុបកម្មត្រូវបានដាក់ពង្រាយនៅតំបន់មួយចំនួនរបស់ រដ្ឋធានីប៉ារីស ដើម្បីបំបែកហ្វូងមនុស្សដែលគាំទ្រ ម៉ារ៉ុក និង បារាំង។ រូបភាពលើបណ្ដាញសង្គមបង្ហាញថា មានមនុស្សមួយចំនួនពាក់មួកជិតក្បាលដេញតាមអ្នកគាំទ្រម៉ារ៉ុក។

អ្នកគាំទ្រម៉ារ៉ុក និងអ្នកគាំទ្របារាំង ក៏បានប៉ះទង្គិចគ្នានៅ Place de la Comedie ទីក្រុង Montpellier ក្នុងនោះមានអ្នកខ្លះបាញ់កាំជ្រួចសំដៅលើគូបដិបក្ខ ខណៈដែលសំឡេងស្រែកដាក់គ្នាលាន់ឮកងរំពង មុនពេលប៉ូលិសចូលធ្វើអន្តរាគមន៍។

https://www.youtube.com/watch?v=UTu4Te79NA4

ក្រុមជម្រើសជាតិម៉ារ៉ុក កាលពីថ្ងៃទី 14 ធ្នូ បានចាញ់ក្រុមរបស់ បារាំង 0-2 ក្នុងវគ្គពាក់កណ្ដាលផ្ដាច់ព្រ័ត្រនៅ World Cup 2022។ ម៉ារ៉ុក លើកនេះបានយកឈ្នះលើក្រុមធំៗជាច្រើន ហើយក៏បានក្លាយជាតំណាងទ្វីបអាហ្វ្រិកដំបូងគេដែលបានឡើងដល់វគ្គពាក់កណ្ដាលផ្ដាច់ព្រ័ត្រនៅ World Cup។

ក្រុមជម្រើសជាតិបារាំង នឹងប៉ះក្រុមរបស់ អាហ្សង់ទីន ក្នុងវគ្គផ្ដាច់ព្រ័ត្រដែលនឹងធ្វើឡើងនៅថ្ងៃទី 18 ធ្នូ ខណៈដែល ម៉ារ៉ុក ត្រូវជួប ក្រូអាត ក្នុងការប្រកួតដណ្ដើមពានរង្វាន់លេខ 3 មុននោះមួយថ្ងៃ៕

December 15, 2022

(World Cup 2022)- រកឃើញមូលហេតុដែលជួយឱ្យ ម៉ារ៉ុក ឡើងដល់វគ្គពាក់កណ្ដាលផ្ដាច់ព្រ័ត្រ

ដោយសារតែមានកម្លាំងពីពលរដ្ឋនៅបរទេស ក្រុមបាល់ទាត់ជម្រើសជាតិរបស់ ម៉ារ៉ុក បាន និងកំពុងតែមានអំណាចខ្លាំងនៅ World Cup 2022។

យោងតាមស្ថិតិរបស់ Guardian កីឡាកររបស់ក្រុមជម្រើសជាតិម៉ារ៉ុក ចំនួន 14 នាក់ ក្នុងចំណោម 26 នាក់ គឺជាពលរដ្ឋកើតនៅបរទេស។ ពួកគេគឺជាកូនចៅរបស់គ្រួសារជនជាតិម៉ារ៉ុក ដែលទៅរស់នៅឯប្រទេសដទៃ។ ក្នុងចំណោមកីឡាករជម្រើសជាតិម៉ារ៉ុក 14 នាក់ដែលកើតនៅបរទេស មាន 4 នាក់កើតនៅ ហូឡង់, 4 នាក់កើតនៅ បែលហ្ស៊ិក, 2 នាក់កើតនៅ បារាំង, 2 នាក់កើតនៅ អេស្ប៉ាញ, 1 នាក់កើតនៅ អ៊ីតាលី និង 1 នាក់កើតនៅ កាណាដា។

កីឡាករភាគច្រើនក្នុងចំណោម 14 នាក់ខាងលើ កំពុងលេងក្នុងនាមជាកីឡាករជម្រើសដំបូង (មិនមែនបម្រុង) ដែលនេះបាន និងកំពុងជួយឱ្យ ម៉ារ៉ុក ឡើងដល់វគ្គពាក់កណ្ដាលផ្ដាច់ព្រ័ត្រនៅ World Cup 2022។ ក្នុងការប្រកួតដែលបានជម្រុះ អេស្ប៉ាញ នៅវគ្គ 1/8 ក្រុមជម្រើសជាតិម៉ារ៉ុក បានបញ្ចេញ «កីឡាករអានិកជន» រហូតដល់ 8 នាក់ ដែលទាត់ក្នុងនាមជាកីឡាករជម្រើសដំបូង ក្នុងនោះមានទាំងអ្នកចាំទីផងដែរ។

ប្រធានក្រុមគ្រូបង្វឹករបស់ ក្រុមបាល់ទាត់ជម្រើសជាតិម៉ារ៉ុក លោក Walid Regragui ក៏ជា «អានិកជនម៉ារ៉ុកនៅបរទេស»។ លោក Walid កើតនៅ Corbeil-Essonnes ជាតំបន់ជាយក្រុងបារីស ប្រទេសបារាំង៕

ការប្រកួតចុងក្រោយនៃវគ្គពាក់កណ្ដាលផ្ដាច់ព្រ័ត្ររបស់ World Cup 2022 រវាង បារាំង និង ម៉ារ៉ុក នឹងចាប់ផ្ដើមនៅម៉ោង 02 ទៀបភ្លឺ ថ្ងៃទី 15 ធ្នូ 2022 (យប់នេះ)។ មួយក្នុងចំណោម 2 ក្រុមនេះនឹងត្រូវឡើងទៅប្រកួតជាមួយក្រុមជម្រើសជាតិរបស់ អាហ្សង់ទីន ដែលកំពុងរង់ចាំជាស្រេច៕

December 14, 2022

គម្រោងប្រព័ន្ធផ្លូវនាវាចរណ៍ និងប្រព័ន្ធភ័ស្តុភារកម្មទន្លេបាសាក់ ឈានចូលដល់ដំណាក់កាលថ្មី

គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ មកដល់បច្ចុប្បន្ន ស្ថិតនៅក្នុងដំណាក់កាលទីពីរនៃការសិក្សាសមិទ្ធិលទ្ធភាព នេះបើតាម ក្រសួងសាធារណការ និងដឹកជញ្ជូន។

កិច្ចប្រជុំស្ដីពីគម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ ដែលត្រូវបានធ្វើឡើងនាថ្ងៃទី 14 ធ្នូ នៅទីស្ដីការក្រសួងសាធារណការ ក្រោមអធិបតីភាព ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ត្រូវបានធ្វើឡើងក្នុងបំណងពិនិត្យ និងពិភាក្សាលើវឌ្ឍនភាពការងារ និងលទ្ធផលមួយចំនួនដែលក្រុមហ៊ុនសាជីវកម្មស្ពានថ្នល់ចិន(CRBC) និងក្រុមហ៊ុន CCCC Water Transportation Consultants Co., Ltd សម្រេចបាននាពេលកន្លង និងដើម្បីពិនិត្យផែនការសកម្មភាពសម្រាប់ជំហានបន្ទាប់។

យោងតាម ក្រសួងសាធារណការ គិតមកដល់ពេលនេះ គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់នេះ កំពុងស្ថិតនៅក្នុងដំណាក់កាលទីពីរនៃការសិក្សាសមិទ្ធិលទ្ធភាព បន្ទាប់ពីទទួលបានចំណារឯកភាព ពីប្រមុខរាជរដ្ឋាភិបាលកម្ពុជា កាលពីថ្ងៃទី 08 មេសា 2022។ តាមផែនការ គម្រោងសិក្សាលម្អិតនេះ គ្រោងនឹងបញ្ចប់ឱ្យបានរួចរាល់នៅដំណាច់ខែមករា 2023។

ក្រសួងបានឱ្យដឹងថា នៅពេលត្រូវបានដាក់ឱ្យដំណើរការ គម្រោងនេះ នឹងជំរុញវិស័យដឹកជញ្ជូនតាមផ្លូវទឹករបស់កម្ពុជាឱ្យមានសន្ទុះកើនឡើង មានប្រសិទ្ធភាពខ្ពស់ កាត់បន្ថយការចំណាយលើថ្លៃដឹកជញ្ជូន និងមានគុណភាពជាងមុន ក៏ដូចជាកាត់បន្ថយសម្ពាធនៃការដឹកជញ្ជូនតាមផ្លូវថ្នល់ និងងាយស្រួលធ្វើសមាហរណកម្មផ្ទៃក្នុងប្រទេស ជួយពង្រឹង និងពង្រីកការតភ្ជាប់ជាមួយតំបន់ និងអន្តរជាតិ៕

December 14, 2022

(World Cup 2022) – កីឡាការិនីស្រស់ស្អាតបំផុតលើពិភពលោក លើកទឹកចិត្ត ក្រូអាត

សាររបស់កីឡាការិនីខ្សែប្រយុទ្ធ Ana Maria Markovic ដែលបានបង្ហោះលើបណ្ដាញសង្គមដើម្បីលើកទឹកចិត្តក្រុមជម្រើសជាតិក្រូអាត បន្ទាប់ពីចាញ់ អាហ្សង់ទីន 0-3 ក្នុងវគ្គពាក់កណ្ដាលផ្ដាច់ព្រ័ត្រនៅ World Cup 2022 កំពុងតែទាក់ទាញចំណាប់អារម្មណ៍លើ Instagram។

ថ្វីបើកំពុងសម្រាកលំហែកាយនៅ ម៉ិកស៊ិក ប៉ុន្តែ Ana Maria Markovic ដែលត្រូវបានគេដាក់រហ័សនាមថា កីឡាការិនីស្អាតបំផុតលើពិភពលោក នៅតែតាមដានសកម្មភាពរបស់ក្រុមជម្រើសជាតិក្រូអាត នៅ World Cup។

ក្រោយពីក្រុមជម្រើសជាតិក្រូអាត របស់នាងបានចាញ់ អាហ្សង់ទីន 0-3 ក្នុងវគ្គពាក់កណ្ដាលផ្ដាច់ព្រ័ត្រកាលពីយប់ថ្ងៃទី 13 ធ្នូ កីឡាការិនីខ្សែប្រយុទ្ធវ័យ 23 ឆ្នាំរូបនេះ បានបង្ហោះរូបថតដែលនាងស្ថិតក្នុងឈុតសម្លៀកបំពាក់របស់ក្រុមជម្រើសជាតិក្រូអាត អមនឹងខ្លឹមសារថា «ទោះជាយ៉ាងណាក៏ដោយ ខ្ញុំនៅតែមានមោទកភាពចំពោះបង» រួមនឹងរូបបេះដូង និងឈ្មោះសរសេរកាត់របស់ ក្រុមជម្រើសជាតិក្រូអាត នៅលើ Instagram។

ក្រោយការបង្ហោះបាន 9 ម៉ោង សារខាងលើរបស់ Markovic ក៏ទទួលបានចំណាប់អារម្មណ៍យ៉ាងច្រើនលើ Instagram ដោយទទួលបានមេដៃជិត 333,000 លើក និងមតិជិត 3,500 លើក។

Markovic មានម្ដាយជាជនជាតិក្រូអាត និងបានចាប់កំណើតនៅ Split ដែលជាទីក្រុងធំជាងគេលំដាប់ទីពីររបស់ ក្រូអាត។ នាងរួមនឹងគ្រួសារបានរើទៅរស់នៅក្នុង ប្រទេសស្វ៊ីស ពេលនាងមានអាយុ 12 ឆ្នាំ។

Markovic ចាប់ផ្ដើមលេងបាល់ពីអាយុ 14 ឆ្នាំ និងបានក្លាយជាកីឡាការិនីខ្សែប្រយុទ្ធ ដែលធ្លាប់រកបាល់បាន 7 គ្រាប់នៅក្នុង 26 ប្រកួត ជូនក្រុម U21 FC Zurich អំឡុងឆ្នាំ 2017 ដល់ 2019។ ក្រោយពីទៅចូលរួមជាមួយក្រុម Grasshopper Zurich ឆ្នាំ 2020 នាងក៏រកបាន 15 គ្រាប់ក្នុង 55 ប្រកួត ហើយត្រូវបានជ្រើសរើសជាក្រុមជម្រើសជាតិរបស់ ក្រូអាត កាលពីឆ្នាំ 2021៕

December 14, 2022

ម៉ូដែលរថយន្តអគ្គិសនីចិន ខ្នាតល្អិត មានរូបរាងឃ្យូត និងតម្លៃទាប

កាលពីថ្ងៃទី 12 ធ្នូ 2022 ក្រុមហ៊ុនចិន Geely បានបង្ហាញរថយន្តអគ្គិសនីដ៏តូចច្រឡឹងដែលមានឈ្មោះថា Panda Mini EV។

យោងតាមគម្រោងដំបូង រថយន្តនេះនឹងប្រើប្រាស់យីហោ Geometry (ដែលជាក្រុមហ៊ុនបុត្រសម្ព័ន្ធរបស់ Geely) ប៉ុន្តែ បច្ចុប្បន្ន ក្រុមប្រឹក្សាភិបាល Geely បានប្ដូរផែនការ ហើយរថយន្តអគ្គិសនី Mini EV នេះ នឹងស្ថិតក្រោមយីហោ Geely ដោយផ្ទាល់។

Geely Panda Mini ដែលមានរូបរាងយកតាមលំនាំខ្លាឃ្មុំ Panda នឹងប្រកួតប្រជែងជាមួយនឹងរថយន្ត Wuling Mini EV នៅក្នុងទីផ្សារប្រទេសចិន។

រថយន្តអគ្គិសនី Geely Panda Mini ត្រូវបានដាក់បង្ហាញជាលើកដំបូងនៅទីក្រុង Hangzhou ប្រទេសចិន។ រថយន្តដែលអាចដាក់មនុស្សបាន 4 នាក់នេះមានបណ្ដោយ 3,065 មម, ទទឹង 1,522 មម និងកម្ពស់ 1,600 មម។

Geely Panda Mini ត្រូវបានបំពាក់ម៉ូទ័រអគ្គិសនីកម្លាំង 30kW ខណៈថ្មរបស់វាត្រូវបានផ្គត់ផ្គង់ដោយក្រុមហ៊ុន Guoxuan Hi-Tech អាចធ្វើដំណើរបានប្រហែល 150 គីឡូម៉ែត្រ ក្រោយពីបញ្ចូលថាមពលអគ្គិសនីពេញ។ រថយន្តអគ្គិសនីខ្នាតល្អិតនេះមានតម្លៃចាប់ពី 5,700 ដល់ 7,200 ដុល្លារអាម៉េរិក៕

https://www.youtube.com/watch?v=w-mLFxYhStQ

December 14, 2022

ប្រទេសចិន កំពុងសាងសង់ផ្លូវរូង 8 គន្លងក្រោមបាតសមុទ្រ ដើម្បីអភិវឌ្ឍតំបន់ Guangdong-Hongkong-Macao

គម្រោងផ្លូវគមនាគមន៍ឆ្លងកាត់សមុទ្រ Shenzhen-Zhongshan ក្នុងខេត្ត Guangdong ក៏មានផ្លូវរូងដែលមានសម្បកធ្វើអំពីដែកថែបប្រវែង 6.8 គីឡូម៉ែត្រ និងតភ្ជាប់គ្នាដោយបំពង់ផ្លូវក្រោមទឹកចំនួន 32 កំណាត់។

ការសាងសង់ស្រទាប់ធ្វើអំពីដែកថែបរបស់ផ្លូវរូងខ្នាតធំក្រោមសមុទ្រនៅ ភាគខាងត្បូងប្រទេសចិន បានរួចរាល់ជាស្ថាពរហើយ នេះបើតាមក្រុមហ៊ុនផ្សព្វផ្សាយ Guangdong ចុះផ្សាយកាលពីថ្ងៃទី 12 ធ្នូ។

ផ្លូវរូងក្រោមសមុទ្រដែលតភ្ជាប់គ្នាដោយបំពង់ផ្លូវក្រោមទឹកចំនួន 32 កំណាត់នេះគឺជាផ្នែកមួយនៃគម្រោងផ្លូវគមនាគមន៍ឆ្លងកាត់សមុទ្រ Shenzhen-Zhongshan។ ផ្លូវដែលមានប្រវែងសរុប 24 គីឡូម៉ែត្រនេះ តភ្ជាប់ទីក្រុង Shenzhen និង Zhongshan របស់ខេត្ត Guangdong។ គម្រោងនេះនឹងដើរតួនាទីយ៉ាងសំខាន់ក្នុងការអភិវឌ្ឍរបស់តំបន់មហាឈូងសមុទ្រ Guangdong-Hongkong-Macao។

គម្រោងខាងលើនេះរួមមាន ផ្លូវរូងក្រោមទឹកប្រវែង 6.8 គីឡូម៉ែត្រ និងកោះសិប្បនិម្មិតចំនួនពីរ។ ផ្លូវក្រោមទឹកនេះគឺជាផ្លូវរូងសម្បកដែកថែបក្រោមសមុទ្រដែលមានទទឹងធំជាងគេបង្អស់លើពិភពលោក ដោយមាន 8 គន្លងសម្រាប់រថយន្ត។

តាមផែនការ ផ្លូវរូងឆ្លងកាត់សមុទ្រ Shenzhen-Zhongshan នឹងត្រូវបានសម្ពោធដាក់ឱ្យប្រើប្រាស់នៅឆ្នាំ 2024។ វានឹងកាត់បន្ថយពេលវេលានៃការធ្វើដំណើររវាងទីក្រុង Shenzhen និង Zhongshan ពី 2 ម៉ោង មកនៅត្រឹម 30 នាទី៕

December 14, 2022

Author: សឿន សំណាង