សឿន សំណាង - La Reine Media

រ៉ូបូតឆ្លាតវៃជួយប្រមូលផលផ្លែឈើជំនួសកម្លាំងមនុស្ស

ក្រុមហ៊ុនធុរកិច្ចថ្មីរបស់ អ៊ីស្រាអែល បានទទួលជោគជ័យក្នុងការអភិវឌ្ឍរ៉ូបូតហោះមួយប្រភេទដែលមានសមត្ថភាពបេះផ្លែឈើជំនួសមនុស្ស។

នៅក្នុងតំបន់មួយចំនួនរបស់ពិភពលោក ឱ្យតែដល់រដូវប្រមូលផលផ្លែឈើ កសិករតែងតែជួបបញ្ហាខ្វះកម្លាំង។ ដើម្បីដោះស្រាយបញ្ហានេះ ក្រុមហ៊ុនបច្ចេកវិទ្យា Tevel របស់ អ៊ីស្រាអែល ក៏បានអភិវឌ្ឍរ៉ូបូតហោះដែលមានជំនាញក្នុងការបេះផ្លែឈើ។

រ៉ូបូតនេះហោះក្បែរពីលើ ឬពីខាងដើមឈើ ដើម្បីពិនិត្យ និងបេះផ្លែដែលដល់ពេលត្រូវប្រមូលផល។ ពួកវាប្រើប្រាស់ដៃដែលអាចស្រូបទាញផ្លែឈើ ហើយទម្លាក់ចូលទៅក្នុងធុងដោយការប្រុងប្រយ័ត្ន។

យោង Yaniv Maor នាយកប្រតិបត្តិ និងជាស្ថាបនិករបស់ក្រុមហ៊ុន Tevel បានឱ្យដឹងថា «រ៉ូបូតហោះដែលយើងអភិវឌ្ឍ មានរូបរាងតូច លឿន និងសន្សំសំច័យប្រាក់»។

រ៉ូបូតនេះបំពាក់កាមេរ៉ាដែលអនុញ្ញាតឱ្យវាដឹងថា ផ្លែណាត្រូវបេះ ផ្លែណាមិនទាន់ដល់ពេលត្រូវបេះ។ វាក៏បំពាក់ប្រព័ន្ធពិសេសដែលជួយឱ្យដំណើរការបន្តបន្ទាប់ដោយមិនខ្លាចអស់ថាមពលអគ្គិសនី និងអាចធ្វើការគ្រប់កាលៈទេសៈ។

បច្ចុប្បន្ន រ៉ូបូតរបស់ Tevel អាចបេះផ្លែឈើមួយចំនួនមានដូចជា ប៉ោម សារី ស្វាយ ប៊ឺរ និងជម្ពូ។ ក្រៅពី អ៊ីស្រាអែល រ៉ូបូតនេះក៏ត្រូវបានប្រើប្រាស់នៅ សហរដ្ឋអាម៉េរិក និងបណ្ដាប្រទេសនៅ អឺរ៉ុប។ ប៉ុន្តែ ក្រុមហ៊ុន Tevel ឱ្យដឹងថា កំពុងមានគម្រោងវាយលុកទីផ្សារចិន និងជប៉ុន ផងដែរ៕

December 17, 2022

ឥណ្ឌូណេស៊ី ផ្ដល់ជំនួយសម្រាប់ពលរដ្ឋដែលប្រើប្រាស់យានយន្តអគ្គិសនី

ការផ្ដល់ជំនួយសម្រាប់ពលរដ្ឋដែលប្រើប្រាស់យានយន្តអគ្គិសនីនេះ គឺជាផ្នែកមួយក្នុងគម្រោងកាត់បន្ថយការបំភាយឧស្ម័នកាបូនរបស់ប្រទេសអាស៊ីអាគ្នេយ៍មួយនេះ។

ដើម្បីលើកទឹកចិត្ត ក៏ដូចជាជំរុញឱ្យប្រជាពលរដ្ឋងាកទៅប្រើប្រាស់យានយន្តអគ្គិសនី រដ្ឋាភិបាលឥណ្ឌូណេស៊ី កំពុងមានផែនការផ្ដល់ជំនួយដល់អ្នកទាំងឡាយណាដែលទិញម៉ូតូអគ្គិសនីថ្មី និងរថយន្តអគ្គិសនីថ្មី។

ឥណ្ឌូណេស៊ី នឹងផ្ដល់ជំនួយ 80 លានរូពៀ ប្រហែលនឹង 5,000 ដុល្លារអាម៉េរិក សម្រាប់ពលរដ្ឋដែលទិញរថយន្តអគ្គិសនី, 40 លានរូពៀ ប្រហែលនឹង 2,500 ដុល្លារអាម៉េរិក សម្រាប់អ្នកទិញរថយន្តកូនកាត់ (អគ្គិសនី + សាំង) និង 8 លានរូពៀ ប្រហែលនឹង 500 ដុល្លារអាម៉េរិក សម្រាប់អ្នកទិញម៉ូតូអគ្គិសនី។

ក្រៅបីនេះ ឥណ្ឌូណេស៊ី ក៏នឹងផ្ដល់ជំនួយ 5 លានរូពៀ ប្រហែល 320 ដុល្លារអាម៉េរិក សម្រាប់អ្នកដែលព្រមប្ដូរម៉ូតូម៉ាស៊ីនចំហេះក្នុង ទៅជាម៉ូតូអគ្គិសនីផងដែរ។

កម្មវិធីខាងលើនេះអាចត្រូវបានចាប់ផ្ដើមអនុវត្តពីឆ្នាំ 2023។ ឥណ្ឌូណេស៊ី បានកំណត់គោលដៅមានម៉ូតូអគ្គិសនីយ៉ាងតិច 1.2 លានគ្រឿង និងរថយន្តអគ្គិសនី 35 ពាន់គ្រឿងនៅឆ្នាំ 2024៕

December 17, 2022

ក្រសួងសាធារណការ ប្រកាសពីវឌ្ឍនភាពនៃគម្រោងស្តារឡើងវិញកំណាត់ផ្លូវជាតិលេខ 8 ចាប់ពីគីឡូម៉ែត្រ 25+820 ដល់គីឡូម៉ែត្រ 29+300

រដ្ឋលេខាធិការក្រសួងសារធារណការ និងដឹកជញ្ជូន កាលពីថ្ងៃទី 15 ធ្នូ បានអញ្ជើញដឹកនាំក្រុមការងាររបស់ក្រសួង ចុះពិនិត្យការដ្ឋានគម្រោងស្ដារឡើងវិញកំណាត់ផ្លូវជាតិលេខ 8 ចាប់ពីគីឡូម៉ែត្រ 25+820 ដល់គីឡូម៉ែត្រ 29+300។

ឯកឧត្តម នូ សុវត្ថិ រដ្ឋលេខាធិការក្រសួងសារធារណការ និងដឹកជញ្ជូន បានណែនាំឱ្យក្រុមវិស្វកម្មដែលទទួលអនុវត្តគម្រោង ត្រូវអនុវត្តឱ្យបានត្រឹមត្រូវតាមកិច្ចសន្យា និងត្រូវជួយសម្រួលដល់ការធ្វើដំណើររបស់បងប្អូនប្រជាពលរដ្ឋ នេះបើតាម ក្រសួងសាធារណការ និងដឹកជញ្ជូន។

គម្រោងស្ដារឡើងវិញកំណាត់ផ្លូវជាតិខាងលើ មានប្រវែងសរុប 2,480 ម៉ែត្រ និងទទឹង 24.51 ម៉ែត្រ ក្នុងនោះក៏មានសួនច្បារទទឹង 3 ម៉ែត្រនៅកណ្ដាលទ្រូងផ្លូវ ព្រមទាំងមានលូបង្ហូរទឹកភ្លៀងនៅសងខាងផ្លូវ និងមានបំពាក់បង្គោលភ្លើង និងភ្លើងបំភ្លឺពេលយប់ផងដែរ។

យោងតាមក្រសួងសាធារណការ និងដឹកជញ្ជូន គិតមកដល់បច្ចុប្បន្ន គម្រោងដែលត្រូវបានអនុវត្តដោយកងវិស្វកម្មសម្តេចតេជោសៀមរាប (ក្រុម ក) នេះ សម្រេចបាន 50% រួចហើយ៕

December 17, 2022

កូរ៉េខាងត្បូង សាងសង់ព្រលានយន្តហោះអណ្ដែតលើសមុទ្រនៅ Busan

ទីក្រុង Busan របស់ កូរ៉េខាងត្បូង ថ្មីៗនេះបានដាក់សំណើស្ដីពីគម្រោងសាងសង់ព្រលានយន្តហោះអណ្ដែតលើសមុទ្រមួយកន្លែងដែលគ្រោងស្ថាបនារួចរាល់នៅឆ្នាំ 2029។

គម្រោងសាងសង់ព្រលានយន្តហោះអណ្ដែតលើទឹកត្រូវបានលើកឡើងដើម្បីជំរុញដំណើរការក្នុងការស្ថាបនាព្រលានយន្តហោះថ្មី Gadeok។ ព្រលានយន្តហោះ Gadeok នេះនឹងមានស្ថានីយអ្នកដំណើរនៅលើដីគោក ខណៈដែលផ្លូវរត់របស់យន្តហោះនឹងសាងសង់លើផ្ទៃសមុទ្រ។

យោងតាមអាជ្ញាធរក្រុង Busan ការសាងសង់ផ្លូវរត់របស់យន្តហោះក្នុងទម្រង់អណ្ដែតលើទឹកនេះ ស៊ីពេលតិចជាង ធៀបនឹងការដែលត្រូវកែលំអដីក្នុងការស្ថាបនាលើដីគោក។ វិធីថ្មីនេះក៏មិនសូវប៉ះពាល់បរិស្ថាន និងងាយពង្រីកបន្ថែម។

ក៏ប៉ុន្តែ ការសាងសង់ព្រលានយន្តហោះលើផ្ទៃទឹកនឹងត្រូវចំណាយប្រាក់ច្រើន ដែលអាចឡើងដល់ 11 ពាន់លានដុល្លារអាម៉េរិក និងអាចប្រឈមនឹងបញ្ហាមួយចំនួនទាក់ទងនឹងសុវត្ថិភាព ក្នុងនោះមានដូចជាសមត្ថភាពនៃការទប់ទល់នឹងខ្យល់ព្យុះជាដើម៕

December 17, 2022

អាងតាំងបង្ហាញត្រីខ្នាតយក្សនៅ បែរឡាំង ផ្ទុះបែក បណ្ដាលឱ្យត្រីរាប់ពាន់ក្បាលលោតពេញផ្លូវ

អាងត្រីកម្ពស់ 14 ម៉ែត្រ និងមានត្រីកម្រប្រហែល 1,500 ក្បាលនៅ រដ្ឋធានីបែរឡាំង ប្រទេសអាល្លឺម៉ង់ បានបែកខ្ទេចកាលពីព្រឹកថ្ងៃទី 16 ធ្នូ ធ្វើឱ្យមនុស្សច្រើននាក់រងរបួស នេះបើតាមមន្ត្រីប៉ូលិស និងបុគ្គលិកពន្លត់អគ្គិភ័យនៅ បែរឡាំង។

អាងតាំងបង្ហាញត្រី AquaDom ស្ថិតនៅបរិវេណខាងមុខរបស់សណ្ឋាគារ Radisson Collection ក្នុងតំបន់កំសាន្ត និងពាណិជ្ជកម្ម DomAquaree។ ប៉ូលិសបានឱ្យដឹងថា ហេតុការណ៍នេះបានបណ្ដាលឱ្យមនុស្សយ៉ាងតិច 2 នាក់ត្រូវរងរបួស។

អង្គភាពពន្លត់អគ្គិភ័យរបស់សាលាក្រុង បានបង្ហោះនៅលើ Twitter ថា បុគ្គលិកពន្លត់អគ្គិភ័យ 100 នាក់ ត្រូវបានបញ្ជូនទៅកាន់កន្លែងកើតហេតុ។ ចំណែកអភិបាលក្រុងបែរឡាំង Franziska Giffey ក៏ឱ្យដឹងដែរថា ទឹកប្រហែល 1 លានលីត្រ បានខ្ចាយពីអាងត្រីនេះ។

អ្នកនាំពាក្យរបស់អង្គភាពពន្លត់អគ្គិភ័យ Adrian Wentzel និយាយថា ហេតុការណ៍ខាងលើបានកើតឡើងនៅវេលាម៉ោងជិត 06 ថ្ងៃទី 16 ធ្នូ 2022 (ម៉ោងក្នុងស្រុក)។

December 17, 2022

បារាំង ពង្រាយប៉ូលិសរាប់ម៉ឺននាក់ដើម្បីធានាសន្តិសុខសម្រាប់វគ្គផ្ដាច់ព្រ័ត្រ World Cup

អាជ្ញាធរបារាំង បានប្រកាសថា ប៉ូលិសប្រហែល 14,000 នាក់ នឹងធ្វើសកម្មភាពនៅទូទាំងប្រទេសដើម្បីធានាសន្តិសុខនៅក្នុងថ្ងៃប្រកួតបាល់ទាត់ពិភពលោក វគ្គផ្ដាច់ព្រ័ត្រ។

យោងតាមផែនការដែលត្រូវបានលើកឡើងនៅចំពោះមុខរដ្ឋមន្ត្រីក្រសួងមហាផ្ទៃបារាំង Gerald Darmanin កាលពីថ្ងៃទី 16 ធ្នូ កងកម្លាំងនេះនឹងចូលរួមរក្សាសន្តិសុខនៅ រដ្ឋធានីបារីស ជាទីដែលត្រូវបានព្យាករថា នឹងមានការជួបជុំមនុស្សម្នាទ្រង់ទ្រាយធំ ក្នុងករណី បារាំង ដណ្ដើមបានជ័យជម្នះ។

មហាវិថី Champs-Elysees គឺជាកន្លែងដែលធ្លាប់មានព្រឹត្តិការណ៍អបអរធំៗនៅក្នុងពេលដែល បារាំង ដណ្ដើមបានជើងឯក World Cup នៅក្នុងឆ្នាំ 1998 និង 2018។ មនុស្សប្រហែល 600,000 នាក់ បានប្រមូលផ្ដុំគ្នានៅទីនេះ ដើម្បីចូលរួមអបអរសាទរកាលពី 4 ឆ្នាំមុន។ មហាវិថីនេះនឹងហាមយានជំនិះនៅថ្ងៃទី 18 ធ្នូ ហើយកម្លាំងសមត្ថកិច្ច 2,750 នាក់ នឹងយាមល្បាតនៅក្បែរៗនោះ។

កាលពីថ្ងៃទី 14 ធ្នូ មនុស្សប្រហែល 40 នាក់ត្រូវបានប៉ូលិសបារាំងចាប់ខ្លួន នៅពេលព្យាយាមចូលរួមជាមួយនឹងក្រុមមនុស្សដែលកំពុងជប់លៀងជ័យជម្នះ ក្រោយពី ក្រុមជម្រើសជាតិបារាំង បានយកឈ្នះលើ ម៉ារ៉ុក ក្នុងវគ្គពាក់កណ្ដាលផ្ដាច់ព្រ័ត្រ។ «ពួកគេទៅចូលរួមដើម្បីបង្កហេតុ» នេះបើតាមរដ្ឋមន្ត្រី Darmanin និយាយអំពីក្រុមមនុស្សខាងលើ។

មុននោះ ក៏មានការប៉ះទង្គិចគ្នានៅ បារាំង បន្ទាប់ពី ក្រុមបាល់ទាត់ជម្រើសជាតិប្រទេសនេះ បានផ្ដួល ក្រុមម៉ារ៉ុក នៅក្នុងវគ្គ 1/8។ សមត្ថកិច្ចបារាំង បានបាញ់ផ្សែងបង្ហូរទឹកភ្នែកដើម្បីរំសាយក្រុមមនុស្ស៕

December 17, 2022

អាជ្ញាធរថៃ បំបែកសំបុកទទួលចាក់ភ្នាល់បាល់ទាត់ រឹបអូសបានប្រាក់រាប់លានដុល្លារ

ប៉ូលិសថៃ បានចាប់ខ្លួនមនុស្ស 31 នាក់ ដោយចោទថា គ្រប់គ្រងបណ្ដាគេហទំព័រចាក់ភ្នាល់បាល់ទាត់ឱ្យបណ្ដាញឧក្រិដ្ឋជនធំ ដោយមានប្រាក់ភ្នាល់ឡើងដល់ 1.2 ពាន់លានបាត។

អង្គភាពបង្ក្រាបឧក្រិដ្ឋកម្មបច្ចេកវិទ្យា (TCSD) នៃការិយាល័យជាតិស៊ើបអង្កេតរបស់ ប្រទេសថៃ បានឆែកឆេរទីតាំងចំនួន 2 នៅ បាងកក និង 5 ទីតាំងទៀតនៅខេត្តចន្ទបុរី បន្ទាប់ពីបានទទួលព័ត៌មានថា ទីតាំងទាំងនេះជាប់ពាក់ព័ន្ធនឹងបណ្ដាញចាក់ភ្នាល់បាល់ទាត់ខាងលើ។

មនុស្សចំនួន 31 នាក់ ក្នុងនោះមាន 22 នាក់ជាបុរស និង 9 នាក់ជាស្ត្រី ត្រូវបានចាប់ខ្លួននៅក្នុងការបង្ក្រាបរបស់អាជ្ញាធរនៅខណ្ឌ Bang Khen រាជធានីបាងកក និងស្រុក Muang របស់ខេត្តចន្ទបុរី។

ក្រុមមន្ត្រីថៃ បានឱ្យដឹងថា ក្រុមជនជាប់សង្ស័យខាងលើបានគ្រប់គ្រងគេហទំព័រទទួលចាក់ភ្នាល់បាល់ទាត់ខុសច្បាប់ចំនួន 20។ ប៉ូលិសក៏បានរឹបអូសកុំព្យូទ័រជាង 50 គ្រឿង និងរថយន្ត 3 គ្រឿង និងសាច់ប្រាក់ប្រហែល 70 លានបាត (ជាង 2 លានដុល្លារអាម៉េរិក)។

December 16, 2022

ស្ថានភាពអាសន្នផ្នែកសុខាភិបាលនៅទូទាំងសកលលោកដោយសារកូវីដ-19 អាចបញ្ចប់នៅឆ្នាំក្រោយ

នេះគឺជាប្រកាសដែលទើបត្រូវបានអង្គការសុខភាពពិភពលោកលើកឡើង នៅពេលជិតឈានចូលដល់ 3 ឆ្នាំ ដែលពិភពលោកបានប្រឈមនឹងការផ្ទុះឆ្លងរាលដាលជំងឺរលាកសួតកូវីដ-19 ដែលបង្កឡើងដោយវីរុស SARS-CoV-2។

ក្នុងសន្និសីទសារព័ត៌មានកាលពីម្សិលមិញនៅ ហ្សឺណែវ ប្រធានអង្គការសុខភាពពិភពលោក (WHO) លោក Tedros បានឱ្យដឹងថា តួលេខអ្នកស្លាប់ដោយសារកូវីដ-19 ប្រចាំសប្ដាហ៍ បើទោះជាស្ថិតនៅក្នុងកម្រិតខ្ពស់ ប៉ុន្តែ ស្មើនឹង 1/5 ប៉ុណ្ណោះ ធៀបនឹងមួយឆ្នាំមុន។ ប្រធាន WHO សង្ឃឹមថា អាចប្រកាសបញ្ចប់ស្ថានភាពអាសន្នផ្នែកសុខាភិបាលទូទាំងពិភពលោកដោយសារកូវីដ-19 នៅឆ្នាំក្រោយ។

តាមផែនការ គណៈកម្មាធិការគ្រាអាសន្នស្ដីពីកូវីដ-19 របស់ WHO នឹងពិភាក្សាអំពីគោលការណ៍ដើម្បីប្រកាសបញ្ចប់ស្ថានភាពអាសន្ននៅក្នុងកិច្ចប្រជុំរបស់ស្ថាប័ននេះនៅខែមករា 2023។

យោងតាម WHO បើទោះជាលទ្ធភាពនៃការផ្ទុះឆ្លងអាចនៅមានបន្ត ប៉ុន្តែ ជំងឺរាតត្បាតនេះនឹងមិនដូចគ្រាដំបូងទៀតឡើយ ដោយសារតែចំនួនអ្នកជំងឺត្រូវចូលពេទ្យ និងស្លាប់មានកម្រិតទាបជាងឆ្ងាយ៕

December 16, 2022

Sialkot គឺជាប្រភពផលិត និងផ្គត់ផ្គង់បាល់ទាត់ដ៏ធំរបស់ពិភពលោក

ទីក្រុងភាគឦសានរបស់ ប៉ាគីស្ថាន រួមចំណែក 70% ក្នុងប្រភពផ្គត់ផ្គង់បាល់ទាត់នៅលើពិភពលោក បូករួមទាំងបាល់ទាត់ Al Rihla នៅ World Cup 2022។

រាប់ទាំងវគ្គផ្ដាច់ព្រ័ត្រនៅ World Cup 2022 នេះ FIFA បានប្រើប្រាស់បាល់ Al Rihla និង Al Hilm ដែលផ្គត់ផ្គង់ដោយក្រុមហ៊ុន Adidas យ៉ាងតិច 300,000 គ្រាប់។ ការផលិតបាល់ប្រភេទនេះត្រូវបាន Adidas ប្រគល់ឱ្យក្រុមហ៊ុនចិន និងក្រុមហ៊ុនប៉ាគីស្ថាន Forward Sport ដោយមានរោងចក្រធំជាងគេនៅ Sialkot ប្រទេសប៉ាគីស្ថាន។

តំណាងរបស់រោងចក្រខាងលើបានឱ្យដឹងថា ពួកគេរួមចំណែក 33% នៃបរិមាណសរុបរបស់បាល់ Al Rihla។ នេះគឺជារដូវកាលទីបីបន្តបន្ទាប់ដែល Forward Sports បាន និងកំពុងផ្គត់ផ្គង់បាល់សម្រាប់ World Cup។ World Cup រុស្ស៊ី 2018 Forward Sports បានផ្គត់ផ្គង់បាល់ដែលមានឈ្មោះថា Telstar 18 ចំណែក World Cup ប្រេស៊ីល 2014 រោងចក្រនេះផ្គត់ផ្គង់បាល់ឈ្មោះ Brazuca។ World Cup 2022 ក្រុមហ៊ុន Forward Sports បានផលិតបាល់ Al Rihla ដោយប្រើបច្ចេកវិទ្យាដែលពួកគេបានអភិវឌ្ឍតាំងពីឆ្នាំ 2007។

ក៏ប៉ុន្តែ បើគិតជារួម Forward Sports គ្រាន់តែជាផ្នែកមួយប៉ុណ្ណោះនៅក្នុងភាពល្បីល្បាញរបស់ទីក្រុង Sialkot ក្នុងវិស័យផលិតឧបករណ៍កីឡាអន្តរជាតិ។ ក្នុងវិស័យបាល់ទាត់ ទីក្រុងនេះមានរោងចក្រប្រហែល 1,000 ដែលមានកម្មករធ្វើការសរុបប្រហែល 60,000 នាក់ (ស្មើនឹង 8% នៃចំនួនប្រជាជនសរុបរបស់ទីក្រុងនេះ)។

ដោយមានហេដ្ឋារចនាសម្ព័ន្ធ និងធនធានមនុស្សនេះ Sialkot ត្រូវបានគេប្រដូចទៅនឹងរោងចក្រផលិតបាល់ទាត់ដែលដេរដោយដៃធំបំផុតលើពិភពលោក ដោយរួមចំណែក 70% នៃប្រភពផ្គត់ផ្គង់ និង 80% នៃបរិមាណបាល់ទាត់ដែលដេរដោយដៃ។

យោងតាម Bloomberg Businessweek បាល់ដែលដេរដោយដៃមានភាពមាំមួនជាងបាល់ដែលដេរដោយម៉ាស៊ីន។ បាល់ស្ទើរតែទាំងអស់នៅ Sialkot ត្រូវបានផលិតពីស្បែកចម្រុះ (cotton, polyester និង polyurethane)។ វត្ថុធាតុដើមសម្រាប់ផលិតបាល់នេះត្រូវបាននាំចូលពីច្រើនប្រទេស។ បាល់តម្លៃទាបបំផុតគឺប្រើប្រាស់វត្ថុធាតុយកមកពី ប្រទេសចិន។ ចំណែកបាល់គុណភាពខ្ពស់ជាងនេះគឺប្រើប្រាស់វត្ថុធាតុរបស់ កូរ៉េខាងត្បូង។ ដោយឡែក បាល់សម្រាប់ទាត់នៅ អឺរ៉ុប គឺត្រូវប្រើវត្ថុធាតុរបស់ ជប៉ុន៕

December 16, 2022

កម្ពុជាលក់លេខរថយន្តពិសេស និងពិសេសផ្ទាល់ខ្លួនសរុបបានជាង 343 ពាន់លានរៀល

គិតមកដល់ខែវិច្ឆិកា 2022 ការលក់ស្លាកលេខចុះបញ្ជីរថយន្តរកបានចំណូលសរុបបានជាង 343 ពាន់លានរៀល នេះបើតាម របាយការណ៍របស់គណៈកម្មការអន្តរក្រសួង ដែលគ្រប់គ្រងការលក់លេខចុះបញ្ជីរថយន្ត។

តួលេខខាងលើត្រូវបានប្រកាសកាលពីថ្ងៃទី 15 ធ្នូ 2022 នៅក្នុងកិច្ចប្រជុំពិភាក្សាប្រចាំខែវិច្ឆិកា 2022 ស្តីពីវឌ្ឍនភាពនៃការលក់លេខចុះបញ្ជីយានយន្តរបស់ គណៈកម្មការអន្តរក្រសួង ដែលប្រព្រឹត្តទៅនៅទីស្ដីការក្រសួងសាធារណការ ក្រោមអធិបតីភាពលោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន។

របាយការណ៍របស់គណៈកម្មការអន្តរក្រសួង បានឱ្យដឹងថា គិតមកដល់ខែវិច្ឆិកា 2022 ការលក់ស្លាកលេខចុះបញ្ជីរថយន្តសម្រេចបានសរុបប្រមាណជាង 231 ពាន់លេខ រកបានចំណូលសរុបជាង 343 ពាន់លានរៀល ( 85 លានដុល្លារអាមេរិក) ក្នុងនោះ លេខពិសេសលក់បានជាង 215 ពាន់លេខ រកបានចំណូលជាង 231 ពាន់លានរៀល (57 លានដុល្លារអាម៉េរិក) និងលេខពិសេសផ្ទាល់ខ្លួនលក់បានជាង 15 ពាន់លេខ រកបានចំណូលជាង 112 ពាន់លានរៀល (28 លានដុល្លារអាមេរិក)។

ដោយឡែក ចាប់ពីខែមករា ដល់ខែវិច្ឆិកា 2022 គណៈកម្មការអន្តរក្រសួងខាងលើ រកបានចំណូលពីការលក់លេខចុះបញ្ជីពិសេស និងលេខចុះបញ្ជីពិសេសផ្ទាល់ខ្លួនសរុបជាង 78 ពាន់លានរៀល (19 លានដុល្លារអាមេរិក) កើនឡើងប្រមាណ 27% ធៀបនឹងរយៈពេលដូចគ្នាក្នុងឆ្នាំកន្លង៕

លោកជំទាវរដ្ឋលេខាធិការ ក៏បានបញ្ជាក់ថា ចំណូលមួយផ្នែកដែលបានមកពីកម្មវិធីពិព័រណ៍ការលក់លេខចុះបញ្ជីលេខពិសេសផ្ទាល់ខ្លួននាពេលខាងមុខ នឹងត្រូវយកទៅរួមចំណែកជួយដល់មន្ទីរពេទ្យគន្ធបុប្ផា៕

December 16, 2022

Author: សឿន សំណាង