កម្ពុជា រកឃើញអ្នកឆ្លងថ្មីនូវជំងឺកូវីដ-19 ចំនួន 32 នាក់ និងជាសះស្បើយ 17 នាក់ ខណៈមិនមានអ្នកស្លាប់ នៅក្នុងអំឡុង 24 ម៉ោងនៃថ្ងៃទី 18 ធ្នូ 2022។
គិតត្រឹមព្រឹក ថ្ងៃទី 19 ខែធ្នូ 2022 កម្ពុជា មានអ្នកឆ្លងកូវីដ-19 សរុប 138,419 នាក់, អ្នកជាសះស្បើយ 135,224 នាក់ និងអ្នកស្លាប់សរុប 3,056 នាក់។
តារាម៉ូដែល Antonela Roccuzzo ភរិយារបស់កំពូលតារាបាល់ទាត់អាហ្សង់ទីន Lionel Messi ធ្វើឱ្យមនុស្សរាប់លាននាក់រំជួលចិត្តនៅពេលនាងសប្បាយចិត្តរហួតដល់យំនៅពីមុខស្វាមី បន្ទាប់ពីក្រុមជម្រើសជាតិរបស់ អាហ្សង់ទីន បានយកឈ្នះលើក្រុមរបស់បារាំងនៅ World Cup 2022។
កាលពីយប់ថ្ងៃទី 18 ធ្នូ នៅពេល ក្រុមអាហ្សង់ទីន បានយកឈ្នះលើ បារាំង ក្នុងវគ្គផ្ដាច់ព្រ័ត្ររបស់ World Cup 2022 នៅ ប្រទេសកាតា Antonela Roccuzzo បានបង្ហោះរូបថតនៅក្បែរស្វាមី និងកូនៗថា «អរគុណបងដែលបានឱ្យអូនដឹងថា អ្វីទៅជាការមិនចុះចាញ់ អ្វីទៅជាការប្រយុទ្ធដល់ទីបញ្ចប់»។
រូបថតនានាដែលបង្ហាញពីសកម្មភាព Antonela Roccuzzo នៅក្បែរស្វាមី ទាក់ទាញបានរាប់លានមតិនៅលើបណ្ដាញសង្គម និងវេទិកានានា។ មនុស្សជាច្រើនបានឱ្យដឹងថា ពួកគេរំជួលចិត្ត និងកក់ក្ដៅជាខ្លាំងព្រោះតែរឿងរ៉ាវស្នេហារបស់តារាម៉ូដែល និងកំពូលតារាបាល់ទាត់រូបនេះ។
Antonela Roccuzzo និងកូនៗតែងមានវត្តមាននៅលើកៅអីទស្សនិកជននៅពេល Messi ចូលប្រកួតនៅ World Cup។ ទំព័រ TN បានផ្សាយថា តារាម៉ូដែលរូបនេះទាក់ទាញបានចំណាប់អារម្មណ៍ច្រើនពេលទៅដល់ រាជធានីដូហា ប្រទេសកាតា។ អ្នកស្រីតែងមានគេសុំថតរូបជាមួយនៅពេលចូលទៅក្នុងហាង ឬដើរលេងក្នុងក្រុង។ អ្នកម្ដាយកូន 3 រូបនេះក៏ទទួលបានការសរសេរថា រួសរាយ ស្លៀកពាក់ទាន់សម័យ និងពេញដោយថាមពល៕
រាល់ផ្ទះថ្មីនៅ រាជធានីតូក្យូ ប្រទេសជប៉ុន ដែលសាងសង់ដោយក្រុមហ៊ុនធំៗ ក្រោយខែមេសា 2025 ត្រូវតែបំពាក់ផ្ទាំងសូឡាដើម្បីកាត់បន្ថយបរិមាណឧស្ម័នកាបូនរបស់គ្រួសារនានា។
នេះគឺជាខ្លឹមសារនៅក្នុងសេចក្ដីកំណត់ថ្មីដែលត្រូវបានក្រុមប្រឹក្សាភិបាលរាជធានីរបស់ ជប៉ុន អនុម័តកាលពីថ្ងៃទី 15 ធ្នូ 2022។
យោងតាមអាជ្ញាធរជប៉ុន ការកំណត់ថ្មីនេះតម្រូវឱ្យបណ្ដាក្រុមហ៊ុនសំណង់ធំៗប្រហែល 50 ស្ថាប័ន បំពាក់ប្រភពថាមពលកកើតឡើងវិញ (ភាគច្រើនគឺផ្ទាំងសូឡា) ទៅលើដំបូលផ្ទះ អគារថ្មីដែលមានទំហំចាប់ពី 2,000 ម៉ែត្រក្រឡា។
អភិបាលក្រុងតូក្យូ លោកស្រី Koike Yuriko បានឱ្យដឹងថា អាជ្ញាធរកំណត់គោលដៅកាត់បន្ថយការបំភាយឧស្ម័នផ្ទះកញ្ចក់ឱ្យបានពាក់កណ្ដាលនៅឆ្នាំ 2030 ធៀបនឹងឆ្នាំ 2020។
ជប៉ុន ដែលជាប្រទេសបំភាយឧស្ម័នកាបូនច្រើនជាងគេលំដាប់ទី 5 លើពិភពលោក បានសន្យាថា នឹងសម្រេចឱ្យបាននូវអព្យាក្រឹតភាពកាបូននៅឆ្នាំ 2050៕
ប្រធានាធិបតីបារាំង លោក ម៉ាក្រុង ចុះទៅកាន់ទីលានប្រកួតនៅ កាតា ដើម្បីលើកទឹកចិត្តខ្សែប្រយុទ្ធ Mbappe បន្ទាប់ពី បារាំង ចាញ់ អាហ្សង់ទីន ក្នុងការប្រកួតទាត់ប៉េណាំងទី នៅវគ្គផ្ដាច់ព្រ័ត្ររបស់ World Cup 2022។
លោក អេម៉ានុយអែល ម៉ាក្រុង កាលពីថ្ងៃទី 18 ធ្នូ 2022 បានធ្វើដំណើរទៅកាន់កីឡដ្ឋាន Lusail Iconic ប្រទេសកាតា ដើម្បីតាមដានការប្រកួតវគ្គផ្ដាច់ព្រ័ត្រ World Cup 2022 រវាងក្រុមជម្រើសជាតិរបស់ បារាំង និង អាហ្សង់ទីន។ នៅលើជួរកៅអីពិសេស លោក ម៉ាក្រុង បានសម្ដែងការសប្បាយរីករាយនៅពេលក្រុមរបស់ បារាំង រកបានគ្រាប់បាល់ស្មើនៅក្នុង 2 តង់ដំបូង ក៏ដូចជាតង់ថែមម៉ោងបន្ទាប់។
ប៉ុន្តែ នៅក្នុងការប្រកួតស៊ុតប៉េណាំងទីដើម្បីកំណត់អ្នកឈ្នះ ភាពអស្ចារ្យរបស់អ្នកចាំទី Emiliano Martinez បានជួយឱ្យ អាហ្សង់ទីន យកឈ្នះលើ បារាំង និងដណ្ដើមបានពានរង្វាន់ជើងឯក។ ក្រុមកីឡាកររបស់ បារាំង តួចចិត្ត អស់សង្ឃឹម ក្នុងនោះ ខ្សែប្រយុទ្ធ Kylian Mbappe ដែលរកបាន 3 គ្រាប់មុននឹងត្រូវទាត់ប៉េណាំងទី មិនសប្បាយចិត្តសោះ។
ប្រធានាធិបតីបារាំង បានចុះទៅកាន់ទីលានប្រកួត លើកទឹកចិត្ត Mbappe ដែលលេងបានល្អក្នុងការប្រកួត ប៉ុន្តែនៅតែមិនអាចជួយឱ្យ បារាំង ដណ្ដើមបានជើងឯក។ លោក ម៉ាក្រុង ដាក់ដៃលើស្មារបស់ Mbappe និងនិយាយលើកទឹកចិត្ត។ ប៉ុន្តែ Mbappe មិនអាចសប្បាយចិត្តបាន នៅពេលមើលទៅកាន់ទិដ្ឋភាពក្រុមរបស់ អាហ្សង់ទីន កំពុងអបអរជ័យជម្នះ។
ដោយរកបាន 8 គ្រាប់នៅ World Cup លើកនេះ Mbappe ទទួលបានស្បែកជើងមាស និងក្លាយជាកីឡាករដែលរកបាន 3 គ្រាប់ដំបូងគេក្នុងវគ្គផ្ដាច់ព្រ័ត្រនៅ World Cup រាប់ចាប់ពីឆ្នាំ 1966៕
មេដឹកនាំប្រទេសមួយចំនួនបានចូលរួមអបអរសាទរភ្លាមៗចំពោះ អាហ្សង់ទីន ដែលដណ្ដើមបានជ័យជម្នះនៅក្នុងការប្រកួតបាល់ទាត់ពិភពលោក World Cup នៅ កាតា និងលើកពានជើងឯក បន្ទាប់ពីបានយកឈ្នះ បារាំង។
«ប្រធានាធិបតី វ្ល៉ាឌីមៀ ពូទីន ទើបតែបានពិភាក្សាតាមទូរស័ព្ទជាមួយនឹង ប្រធានាធិបតីអាហ្សង់ទីន Alberto Fernandez និងអបអរសាទរដល់លោក នៅពេលក្រុមជម្រើសជាតិអាហ្សង់ទីន ក្លាយជាជើងឯក FIFA World Cup» អ្នកនាំពាក្យវិមានក្រឹមឡាំង Dmitry Peskov បានឱ្យដឹងដូច្នេះកាលពីថ្ងៃទី 18 ធ្នូ ក្នុងប្រកាសស្ដីពីការហៅទូរស័ព្ទទៅអបអររបស់ ប្រធានាធិបតីរុស្ស៊ី ចំពោះសមភាគីអាហ្សង់ទីន។
នាយករដ្ឋមន្ត្រីឥណ្ឌា Narendra Modi ក៏បាន tag ប្រធានាធិបតីអាហ្សង់ទីន Fernandez ទៅក្នុងសារអបអរសាទរនៅលើ Twitter ផងដែរ។ «…អបអរសាទរ អាហ្សង់ទីន ដែលបានក្លាយជាជើងឯក! …ពលរដ្ឋឥណ្ឌា រាប់លាននាក់ដែលជាអ្នកគាំទ្រ អាហ្សង់ទីន និង Messi សុទ្ធតែសប្បាយរីករាយជាមួយនឹងជ័យជម្នះដ៏អស្ចារ្យនេះ» លោក Modi សរសេរដូច្នេះ។
ប្រធានាធិបតីតួកគឺ Recep Tayyip Erdogan ក៏សម្ដែងការអបអរសាទរដល់ប្រជាជន និងក្រុមបាល់ទាត់ជម្រើសជាតិរបស់ អាហ្សង់ទីន។ លោកបានហៅការប្រកួតរវាង អាហ្សង់ទីន និង បារាំង ថាជា «ការប្រកួតវគ្គផ្ដាច់ព្រ័ត្រមួយដែលតានតឹងបំផុតក្នុងប្រវត្តិសាស្ត្រ»។
លោក Erdogan បានទៅទស្សនាការប្រកួតនេះដោយផ្ទាល់ តាមការអញ្ជើញរបស់ មហាក្សត្រកាតា។ លោក Erdogan អង្គុយទស្សនាការប្រកួតជាមួយនឹងក្សត្រា al-Thani, ប្រធានាធិបតីបារាំង Macron និងប្រធាន FIFA Gianni Infantino។
ប្រធានាធិបតិទើបជាប់ឆ្នោតរបស់ ប្រេស៊ីល Luiz Inacio Lula da Silva ក៏បានចូលរួមអបអរសាទរជ័យជម្នះរបស់ អាហ្សង់ទីន។ ចំណែក ប្រធានាធិបតីបារាំង វិញ ថ្វីបើស្រពោនចិត្តព្រោះតែ បារាំង ចាញ់ ប៉ុន្តែក៏បានអបអរសាទរចំពោះ អាហ្សង់ទីន ផងដែរ។
ក្រុមបាល់ទាត់ជម្រើសជាតិអាហ្សង់ទីន បានលើកពានជើងឯក World Cup 2022 ដោយបានយកឈ្នះលើ បារាំង 4-2 ក្នុងការប្រកួតទាត់ប៉េណាំងទី បន្ទាប់ពីមានលទ្ធផល 3-3 ក្នុង 2 តង់នៅវគ្គផ្ដាច់ព្រ័ត្រកាលពីយប់មិញ (18 ធ្នូ 2022)។ នេះគឺជាពានជើងឯកទីបីដែល អាហ្សង់ទីន ដណ្ដើមបាន បន្ទាប់ពីបានក្លាយជាជើងឯក World Cup 1978 និង 1986៕
(កាតា)- កំពូលតារាបាល់ទាត់វ័យ 35 ឆ្នាំ Lionel Messi ពាក់អាវធំក្រៅដែលមហាក្សត្រកាតា ប្រទាន នៅពេលលើកពាន World Cup ជាលើកដំបូងក្នុងអាជីព ជាមួយនឹងក្រុមជម្រើសជាតិអាហ្សង់ទីន។
ក្រោយការប្រកួតវគ្គផ្ដាច់ព្រ័ត្រ World Cup 2014 នៅ ប្រេស៊ីល Lionel Messi បានលើកពានបាល់មាស World Cup ប៉ុន្តែ បានត្រឹមតែសម្លឹងមើលពានជើងឯក World Cup ពីចម្ងាយជាមួយនឹងទឹកមុខមិនសូវសប្បាយចិត្ត។ ក៏ប៉ុន្តែ ក្រោយការប្រកួតផ្ដាច់ព្រ័ត្រកាលពីយប់មិញ (18 ធ្នូ 2022) នៅ កាតា ប្រធានក្រុមជម្រើសជាតិអាហ្សង់ទីន លើកនេះដណ្ដើមបានទាំងពាន់ជើងឯក World Cup បានទាំងពានបាល់មាស។
Messi រកបាន 2 គ្រាប់ ជួយឱ្យ អាហ្សង់ទីន ស្មើនឹង បារាំង 3-3 នៅវគ្គផ្ដាច់ព្រ័ត្រ មុនពេលស៊ុតបានជោគជ័យជាមួយនឹងលទ្ធផល 4-2 នៅក្នុងការប្រកួតទាត់បាល់ប៉េណាំងទី។ កំពូលកីឡាកររូបនេះតំណាងឱ្យ អាហ្សង់ទីន ឡើងទទួលពានមាស World Cup ពីមហាក្សត្ររបស់ កាតា ព្រះអង្គម្ចាស់ Tamim bin Hamad Al Thani និងប្រធាន FIFA លោក Gianni Infantino។
មុនពេលប្រគល់ពានមាស ព្រះអង្គម្ចាស់ Al Thani បានប្រទានអាវធំក្រៅ bisht ពណ៌ខ្មៅទៅឱ្យ Messi ដើម្បីសម្ដែងការកោតសរសើរ។ អាវ bisht ត្រូវបានប្រើប្រាស់សម្រាប់តែមេដឹកនាំសាសនាអ៊ីស្លាម ឬមន្ត្រីរដ្ឋាភិបាល នៅក្នុងព្រឹត្តិការណ៍ពិសេសប៉ុណ្ណោះ។
ក្រោយមក Messi ទទួលពានមាសពី ព្រះអង្គម្ចាស់ Al Thani និងលោក Infantino។ Messi ឆ្លៀតថើបពានជើងឯកជាលើកដំបូងក្នុងអាជីពរបស់ខ្លួន។ នេះក៏ត្រូវបានចាត់ទុកថាជារង្វាន់ពិសេស និងមានតម្លៃបំផុតចំពោះអាជីពជាកីឡាករមួយរូប ហើយក៏ជាពានជើងឯកទីបីដែលបានទៅលើ អាហ្សង់ទីន បន្ទាប់ពីឆ្នាំ 1978 និង 1986។
អាហ្សង់ទីន និង បារាំង រកបាន 3 គ្រាប់ដូចគ្នាក្នុង 2 តង់នៃវគ្គផ្ដាច់ព្រ័ត្រ មុនពេលយកឆ្នះ 4-2 ក្នុងការស៊ុតប៉េណាំងទី ដែលនាំឱ្យ អាហ្សង់ទីន បានក្លាយជាជើងឯក World Cup 2022 នៅយប់ថ្ងៃទី 18 ឈានចូលវេលាទាបភ្លឺថ្ងៃទី 19 ធ្នូ 2022។
នៅក្នុងតង់ទីមួយ អាហ្សង់ទីន នាំមុខ 2-0 ក្នុងនោះ មានការស៊ុតផ្ដាច់ 6 ដង។ បារាំង មិនបានស៊ុតផ្ដាច់ម្ដងណាឡើយនៅក្នុង 45 នាទីដំបូងនៃវគ្គផ្ដាច់ព្រ័ត្រនេះ។
ចូលដល់តង់ទីពីរ នាទីទី 80 ខ្សែបម្រើអាហ្សង់ទីន បង្កកំហុស និងត្រូវរងបាល់ពិន័យប៉េណាំងទី។ Mbappe ស៊ុតបញ្ចូលទី ជួយឱ្យ បារាំងរកបាន 1-2។ នាទីទី 82 Messi បណ្ដោយឱ្យបាត់បាល់ នាំឱ្យ បារាំងវាយលុក។ Mbappe គ្រប់គ្រងបាល់ និងស៊ុតផ្ដាច់បានជោគជ័យ ជួយឱ្យបារាំងរកបាន 2-2។
នាទីទី 109 Messi រកបាន 1 គ្រាប់ទៀត ជួយឱ្យ អាហ្សង់ទីន នាំមុខ 3-2។ ប៉ុន្តែ នាទីទី 118 Mbappe របស់ បារាំង រកបានគ្រាប់បាល់ hattrick ជួយឱ្យលទ្ធផលបាន 3-3។
នាទីទី 120+3 ត្រូវបានបញ្ចប់ ដោយលទ្ធផល 3-3។ ដូច្នេះ ការប្រកួតដោយទាត់ប៉េណាំងទី ត្រូវបានប្រើប្រាស់ដើម្បីជម្រើសរើសម្ចាស់ជើងឯក។
អាហ្សង់ទីន ឈ្នះ 4-2 ក្នុងវគ្គទាត់ប៉េណាំងទី ហើយក៏បានក្លាយជាម្ចាស់ពានរង្វាន់ជើងឯក World Cup 2022៕
តង់ទីពីរបានចាប់ផ្ដើម…
Messi បន្តសម្រុកទៅមុខ និងបញ្ជូនបាល់ទៅកាន់ស្លាបខាងស្ដាំដើម្បីឱ្យ Di Maria ប្លោងល្មម ហើយ De Paul ស៊ុតផ្ដាច់។ Rabiot បានទទួលកាតលឿង បន្ទាប់ពីបង្កកំហុសច្រើនដងលើ De Paul។
ខ្សែប្រយុទ្ធអាហ្សង់ទីន ស៊ុតផ្ដាច់សំដៅទីដោយជើងឆ្វេង ប៉ុន្តែមិនអាចយកឈ្នះអ្នកចាំទីរបស់បារាំង កីឡាករ Lloris។
នាទីទី 60 Messi វិះរកបានមួយគ្រាប់ទៀត បន្ទាប់ពី Di Maria បញ្ជូនបាល់ពីស្លាបខាងឆ្វេងទៅកាន់តំបន់គ្រោះថ្នាក់។ De Paul ទទួលបាន រួចបញ្ជូនឱ្យ Messi។ កីឡាករពាក់អាវលេខ 10 មានឱកាសស៊ុតផ្ដាច់ ប៉ុន្តែ មិនបានសម្រេច ដោយសារយឺតជាងខ្សែការពាររបស់ បារាំង។
នាទីទី 64 Di Maria របស់ អាហ្សង់ទីន ត្រូវបានប្ដូរចេញ ទុកកន្លែងឱ្យ Acuna។
នាទីទី 71 បារាំង បានស៊ុតផ្ដាច់លើកដំបូង ដោយ Mbappe ប៉ុន្តែមិនបានជោគជ័យ។ នាទីទី 72 Hernandez និង Griezmann របស់ បារាំង ត្រូវបានប្ដូរចេញ ដើម្បីឱ្យ Camavinga និង Coman ចូលជំនួស។
បារាំង បានទាត់បាល់ពិន័យប៉េណាំងទី។ នាទីទី 80 ខ្សែបម្រើអាហ្សង់ទីន បង្កកំហុស និងត្រូវរងបាល់ពិន័យប៉េណាំងទី។ Mbappe ស៊ុតបញ្ចូលទី ជួយឱ្យ បារាំងរកបាន 1-2។
នាទីទី 82 Messi បណ្ដោយឱ្យបាត់បាល់ នាំឱ្យ បារាំងវាយលុក។ Mbappe គ្រប់គ្រងបាល់ និងស៊ុតផ្ដាច់បានជោគជ័យ ជួយឱ្យបារាំងរកបាន 2-2។
តង់ទីពីរ ថែមម៉ោង 8 នាទី។
នាទីទី 90+3 Kylian Mbappe សម្រុកចូលពីស្លាបខាងឆ្វេងទៅកាន់ចំណុចកណ្ដាល ហើយក៏ស៊ុតផ្ដាច់ ប៉ុន្តែបរាជ័យ។
នាទីទី 90+5 បារាំងវិះរកបានមួយគ្រាប់ទៀត ពេលទាត់បាល់ពិន័យ។
នាទីទី 90+7 Messi ស៊ុតផ្ដាច់ ប៉ុន្តែបាល់បានហោះចាំអ្នកចាំទី។
Acuna ទទួលកាត់លឿងនៅនាទីចុងក្រោយ។
ក្រោយការប្រកួតពីរតង់ លទ្ធផល 2-2។
នាទីទី 91 តង់បន្ថែមទីមួយចាប់ផ្ដើម
នាទីទី 94 Rabiot របស់ បារាំង ត្រូវបានប្ដូរចេញ ហើយ Fofana ចូលមកជំនួស។
នាទីទី 100 បារាំងមានប្រៀបជាង
នាទីទី 102 De Paul និង Alvarez របស់ អាហ្សង់ទីន ត្រូវបានប្ដូរចេញ និងជំនួសដោយ Paredes និង Lautaro Martinez។
នាទីទី 105 Messi បញ្ជូនបាល់ទៅមកជាមួយនឹងកីឡាករអាហ្សង់ទីន មុនពេលបញ្ជូនឱ្យ Lautaro Martinez ប្រឈមមុខនឹង Lloris ប៉ុន្តែ មិនអាចធ្វើអ្វិបាល។
នាទីទី 105+1 តង់បន្ថែមទីមួយបានបញ្ចប់ដោយ 2-2 បន្ទាប់ពី Lautaro Martinez ធ្វើឱ្យបាត់បង់ឱកាសទីពីរ។
នាទីទី 108 Messi ស៊ុតពីចម្ងាយ ប៉ុន្តែ មិនអាចកម្ទេចសំណាញ់របស់ Lloris ដដែល។
នាទីទី 109 Messi រកបាន 1 គ្រាប់ទៀត។
នាទីទី 113 បារាំង ប្ដុរកីឡាករ ដោយ Konate ចូលជំនួស Varane។
នាទីទី 114 Paredes របស់ អាហ្សង់ទីន ត្រូវបានពិន័យកាតលឿង។
នាទីទី 118 Mbappe របស់ បារាំង រកបានគ្រាប់បាល់ hattrick ជួយឱ្យលទ្ធផលបាន 3-3។
នាទីទី 120 តង់បន្ថែមទីពីរ ថែមម៉ោង 3 នាទី។
នាទីទី 120+3 ត្រូវបានបញ្ចប់ ដោយលទ្ធផល 3-3។ ដូច្នេះ ការប្រកួតដោយទាត់ប៉េណាំងទី ត្រូវបានប្រើប្រាស់ដើម្បីជម្រើសរើសម្ចាស់ជើងឯក។
ការទាត់ប៉េណាំងទី ចាប់ផ្ដើម ដោយ បារាំង ទាត់មុន។ Mbappe ស៊ុតបានជោគជ័យលើ Martinez របស់ អាហ្សង់ទីន ចំណែក Messi ក៏បានឈ្នះ Lloris របស់ បារាំង។
ប៉េណាំងទីជុំទីពីរ Emiliano Martinez កម្ចាត់បាល់របស់ Coman បានជោគជ័យ ហើយ អាហ្សង់ទីន ក៏រកបាន 1 គ្រាប់ទៀត។
ជុំទីបី Tchouameni ទាត់ចេញក្រៅ ចំណែក Paredes យកឈ្នះលើ Lloris។ អាហ្សង់ទីននាំមុខ 3-1 ក្នុងការទាត់ប៉េណាំងទី។
ជុំទីបួន Kolo Muani យកឈ្នះលើ Martinez ធ្វើឱ្យ បារាំងបរាជ័យ ខណៈ អាហ្សង់ទីន បានជោគជ័យ។
អាហ្សង់ទីន ឈ្នះ 4-2 ក្នុងវគ្គទាត់ប៉េណាំងទី។ Messi ដណ្ដើមបានតំណែងជើងឯក World Cup ជាលើកដំបូងក្នុងអាជីព៕
បារាំង ក្នុងឈុតអាវពណ៌ខៀវ ជាអ្នកទាត់បាល់មុន ខណៈ អាហ្សង់ទីន ពណ៌ខៀវខ្ចីលាយស និងខោពណ៌ស។
កីឡាករទាំងពីក្រុមបានបង្កកំហុសលើគ្នា និងបង្កើតឱកាសស៊ុតជាបន្តបន្ទាប់តាំងពីដើមទី ប៉ុន្តែក៏មិនមានភាគីណារកបានគ្រាប់បាល់ រហូតដល់មានការពិន័យប៉េណាំងទី ក្រោយពី Dembele បានបង្កកំហុសលើកីឡាករខ្សែប្រយុទ្ធ Di Maria របស់ អាហ្សង់ទីន នៅតំបន់គ្រោះថ្នាក់។
ពីចម្ងាយ 11 ម៉ែត្រ Messi ស៊ុតបាល់ប៉េណាំងទីបានជោគជ័យ។ នេះគឺជាគ្រាប់បាល់ទី 6 របស់ Messi នៅ World Cup 2022, ទី 12 នៅ World Cup និងទី 97 នៅក្នុងក្រុមជម្រើសជាតិអាហ្សង់ទីន។
ជាង 30 នាទីដំបូងនៃការប្រកួត ក្រុមអាហ្សង់ទីន គ្រប់គ្រងបាល់បាន 60%, ស៊ុតផ្ដាច់បាន 5 ដង ក្នុងនោះមាន 2 ដងទាត់ចំទិសអ្នកចាំទី។ បារាំងមិនទាន់បានស៊ុតផ្ដាច់ម្ដងណានៅឡើយក្នុងអំឡុងពេលនេះ។
នាទីទី 36 អាហ្សង់ទីន រកបានមួយគ្រាប់ទៀត នាំឱ្យក្រុមនេះនាំមុខ បារាំង 2-0។
Lionel Messi និង Angel Di Maria គឺជាអ្នករកបាន 2 គ្រាប់ឱ្យ អាហ្សង់ទីន នៅក្នុងតង់ទីមួយនៃវគ្គផ្ដាច់ព្រ័ត្ររបស់ World Cup 2022 នាយប់ថ្ងៃទី 18 ធ្នូ 2022។
នៅក្នុងតង់ទីមួយ អាហ្សង់ទីន ស៊ុតផ្ដាច់ 6 ដង ក្នុងនោះ 3 គ្រាប់ហោះចំទិសអ្នកចាំទី។ បារាំង មិនបានស៊ុតផ្ដាច់ម្ដងណាឡើយនៅក្នុង 45 នាទីដំបូងនៃវគ្គផ្ដាច់ព្រ័ត្រនេះ។
ការបញ្ជាទិញរថយន្តអគ្គិសនី 5,800 គ្រឿងនៅក្នុងពិព័រណ៍រថយន្តអន្តរជាតិប្រទេសថៃ កំពុងរួមចំណែកលើកទឹកចិត្តដល់កិច្ចខិតខំរបស់រដ្ឋាភិបាលថៃ ក្នុងបំណងអភិវឌ្ឍវិស័យឧស្សាហកម្មរថយន្តអគ្គិសនីនៅប្រទេសនេះ។
អ្នកគ្រប់គ្រងពិព័រណ៍នេះបានឱ្យដឹងថា រថយន្តអគ្គិសនីសរុប 15% ស្ថិតក្នុងចំណោមរថយន្ត 36,679 គ្រឿង ត្រូវបានបញ្ជាទិញជាមុន នៅក្នុងរយៈពេល 12 ថ្ងៃនៃពិព័រណ៍ដែលបានបញ្ចប់កាលពីថ្ងៃទី 12 ធ្នូកន្លងទៅ។
រដ្ឋមន្ត្រីក្រសួងឧស្សាហកម្មថៃ Suriya Juangroongruangkit ថ្លែងថា រថយន្តអគ្គិសនីរបស់ ប្រទេសចិន ទទួលបានការពេញនិយមជាងគេ។ «ទីផ្សាររថយន្តអគ្គិសនីនៅ ប្រទេសថៃ បានរីកចម្រើនយ៉ាងឆាប់រហ័ស ចាប់តាំងពីរដ្ឋាភិបាលផ្ដល់កញ្ចប់ជំនួយដែលមានតម្លៃជាង 57 លានដុល្លារអាម៉េរិក» រដ្ឋមន្ត្រីឧស្សាហកម្មថៃ អះអាងដូច្នេះ។
កាលពីខែកុម្ភៈកន្លងទៅ រដ្ឋាភិបាលថៃ បានអនុម័តខ្ទង់ប្រាក់ជំនួយពី 2,000 ដល់ 4,300 ដុល្លារ អាស្រ័យលើប្រភេទ និងម៉ូដែលរថយន្ត សម្រាប់ការទិញរថយន្តអគ្គិសនីមួយគ្រឿង ដើម្បីជំរុញតម្រូវការប្រើប្រាស់ចំពោះរថយន្តអគ្គិសនីដែលផលិតពីឆ្នាំ 2022 ដល់ 2023។
ប្រធានក្រុមហ៊ុន Inter-Media Consultant លោក Kwanchai Paphatphong ថ្លែងថា «ក្នុងអំឡុងពិព័រណ៍ BYD បានទទួលការបញ្ជាទិញជាមុនច្រើនជាងគេ ដោយមាន 2,714 គ្រឿងត្រូវបានកក់។ បន្ទាប់មកគឺរថយន្តអគ្គិសនី Ora Good Cat របស់ GWM (1,212 គ្រឿង), រថយន្តអគ្គិសនីរបស់ក្រុមហ៊ុន Neta (827 គ្រឿង) និងក្រុមហ៊ុនអង់គ្លេស MG (ជាង 600 គ្រឿង)៕
