Author: សឿន សំណាង

AFF Cup 2022 – វៀតណាមឈ្នះដាច់លើឡាវនៅជុំដំបូងនៃវគ្គសន្សំពិន្ទុ
(ឡាវ)- នៅជុំដំបូងនៃវគ្គសន្សំពិន្ទុរបស់ពាន់រង្វាន់បាល់ទាត់ AFF Cup 2022 (AFF Mitsubishi Electric Cup) កាលពីថ្ងៃទី 21 ធ្នូ វៀតណាម យកឈ្នះឡាវ 6-0 បានដោយងាយ។
ការប្រកួតរវាង ឡាវ និងវៀតណាម នេះ ហាក់មិនមានឈុតឆាកគួរឱ្យភ្ញាក់ផ្អើលណាមួយដែលបង្កើតឡើងដោយ ក្រុមជម្រើសជាតិឡាវ។ វៀតណាម គ្រប់គ្រងបាល់បាន 70% ក្នុងនោះ មានការស៊ុតផ្ដាច់ 27 លើក និងរកបាន 6 គ្រាប់ ហើយនាំមុខគេក្នុងពូល B ក្រោយការប្រកួតជុំទីមួយ។
ខុសពីការអះអាងរបស់គ្រូបង្វឹក Michael Weiss ក្រុមឡាវ ជ្រើសរើសការការពារជាជាងការវាយលុក។ ប៉ុន្តែ យុទ្ធសាស្ត្រនេះត្រូវបានកែប្រែនៅនាទីទី 15 បន្ទាប់ពី ខ្សែប្រយុទ្ធកណ្ដាលរបស់ វៀតណាម Nguyen Tien Linh តែតបញ្ចូលទីរកបាន 1 គ្រាប់ដំបូង។
នាទីទី 43 វៀតណាម រកបាន 1 គ្រាប់ទៀត មុនពេល ស៊ុត 2 គ្រាប់នៅនាទីទី 56 និង 58 នាំឱ្យ វៀតណាម នាំមុខ 3-0 ហើយរកបានគ្រាប់បាល់ឈ្នះបន្តបន្ទាប់ រហូតដល់ ឡាវ ត្រូវចាញ់ 0-6។
ជ័យជម្នះនេះបានជួយឱ្យ វៀតណាម នាំមុខគេនៅពូល B ក្នុងវគ្គសន្សំពិន្ទុ ខណៈ ម៉ាឡេស៊ី ឈរលំដាប់ទីពីរ។ វៀតណាម នឹងប៉ះ ម៉ាឡេស៊ី នៅជុំទីបីដែលប្រកួតនៅថ្ងៃទី 27 ធ្នូខាងមុខ៕
December 22, 2022
(AFF Cup 2022)- ម៉ាឡេស៊ី វិះស្មើនឹង មីយ៉ាន់ម៉ា នៅជុំដំបូងនៃវគ្គសន្សំពិន្ទុ
ត្រូវរងការពិន័យនៅនាទីទី 90 ប៉ុន្តែ ម៉ាឡេស៊ី អាចរក្សាបានជ័យជម្នះលើ មីយ៉ាន់ម៉ា 1-0 នៅក្នុងជុំដំបូងនៃវគ្គសន្សំពិន្ទុក្នុងពូល A នៅ AFF Cup 2022 (AFF Mitsubishi Electric Cup) កាលពីរសៀលថ្ងៃទី 21 ធ្នូ។
ការប្រកួតនៅលើកីឡដ្ឋាន Thuwunna មានសារសំខាន់ ព្រោះថា ក្រុមដែលឈ្នះនឹងមានឱកាសដណ្ដើមបានសំបុត្រឡើងទៅវគ្គពាក់កណ្ដាលផ្ដាច់ព្រ័ត្រជាមួយនឹង សិង្ហបុរី និង វៀតណាម។
ថ្វីបើការប្រកួតមានភាពខ្លាំងក្លា និងបង្កគ្រោះថ្នាក់ដល់សំណាញ់ភាគីទាំងសងខាង ប៉ុន្តែឱកាសច្បាស់ៗមិនបានកើតឡើងច្រើននោះទេ។
នាទីទី 52 ក្រោយការវាយលុករហ័ស Rasid គ្រប់គ្រងបាល់ពីចំហៀង បាញ់ទៅឱ្យ Faisal Halim ស៊ុតផ្ដាច់ប៉ើងសំណាញ់របស់ មីយ៉ានម៉ា។
ក្រោយត្រូវបាននាំមុខ 1-0 ក្រុមម្ចាស់ផ្ទះមីយ៉ាន់ម៉ា ក៏ចាប់ផ្ដើមឡោមព័ទ្ធតំបន់គ្រោះថ្នាក់របស់គូប្រកួត ប៉ុន្តែ មិនអាចទម្លុះខ្សែការពាររបស់ ម៉ាឡេស៊ី។ បន្ទាប់មក មីយ៉ានម៉ា ក៏ងាកទៅស៊ុតផ្ដាច់ពីចម្ងាយ ប៉ុន្តែ ក៏មិនមានអ្វីកើតឡើង។
នាទីទី 90 មីយ៉ាន់ម៉ា បានទទួលគ្រាប់បាល់ពិន័យ ប៉ុន្តែ ពីចម្ងាយ 11 ម៉ែត្រ ខ្សែប្រយុទ្ធ Win Naing Tun ស៊ុតស្រាលខ្លាំងពេក នាំឱ្យអ្នកចាំទីរបស់ ម៉ាឡេស៊ី រារាំងទាន់ពេល។ ការប្រកួតនេះត្រូវថែមម៉ោង 8 នាទី ប៉ុន្តែការប្រឹងប្រែងរបស់ក្រុមម្ចាស់ផ្ទះ សុទ្ធតែមិនមានប្រសិទ្ធផាព។
នៅជុំបន្ទាប់ ថ្ងៃទី 24 ធ្នូ 2022 មីយ៉ាន់ម៉ា នឹងធ្វើជាភ្ញៀវនៅ សិង្ហបុរី ចំណែក ម៉ាឡេស៊ី ត្រលប់ទៅធ្វើជាម្ចាស់ផ្ទះ ប្រកួតជាមួយ ឡាវ៕
December 22, 2022
ស្ថានីយវារីអគ្គិសនីធំជាងគេលំដាប់ទីពីរលើពិភពលោក ចាប់ផ្ដើមដំណើរការពេញលេញ
(ប្រទេសចិន)- ស្ថានីយវារីអគ្គិសនី Baihetan កម្លាំង 16 GW នៅខេត្ត Sichuan និង Yunna ភាគនិរតីប្រទេសចិន បានចាប់ផ្ដើមដំណើរការពេញលេញតាំងពីថ្ងៃទី 20 ធ្នូ 2022។
ស្ថានីយវារីអគ្គិសនី Baihetan ដែលស្ថិតនៅលើទន្លេ Jinsha ជាដៃទន្លេផ្នែកខាងលើរបស់ទន្លេ Yangtze ជួយបញ្ជូនអគ្គិសនីពីតំបន់ភាគខាងលិចដែលសម្បូរធនធានធម្មជាតិ ទៅកាន់តំបន់ភាគខាងកើតរបស់ ប្រទេសចិន ដែលក្រីក្រធនធានធម្មជាតិ។ Baihetan គឺជាស្ថានីយវារីអគ្គិសនីធំជាងគេលំដាប់ទីពីរលើពិភពលោក បន្ទាប់ពី Three Gorges នៅ Hubei។
ដោយមានម៉ាស៊ីនវារីអគ្គិសនីចំនួន 16 ដែលស្ថិតក្នុងប្រភេទធំជាងគេលើពិភពលោក ស្ថានីយវារីអគ្គិសនី Baihetan អាចផលិតអគ្គិសនីបាន 62,400 gigawatt ម៉ោង/ឆ្នាំ គ្រប់គ្រាន់សម្រាប់តម្រូវការប្រើប្រាស់របស់មនុស្ស 75 លាននាក់ នេះបើតាម CGTN។
December 21, 2022
(AFF Cup 2022) – ការប្រកួតដំបូង ឡាវនឹងមិនទុកឱ្យវៀតណាមឈ្នះដោយងាយឡើយ!
(ឡាវ)- យោងតាមគ្រូបង្វឹករបស់ក្រុមជម្រើសជាតិឡាវ Michael Weiss ក្រុមវៀតណាមខ្លាំងជាងឆ្ងាយ ប៉ុន្តែ ឡាវ ក៏នឹងមិនអនុញ្ញាតឱ្យវៀតណាមគ្រប់គ្រងបាល់ទាំងស្រុងនៅក្នុងការប្រកួតនៅម៉ោង 07 កន្លះយប់នេះដែរ។
«មិនបាច់និយាយច្រើន គ្រប់គ្នាក៏បានដឹងហើយថា វៀតណាម មានឱកាសច្រើនក្នុងការយកឈ្នះនៅក្នុងការប្រកួតនៅថ្ងៃស្អែក។ ពួកគេថែមទាំងជាបេក្ខភាពសម្រាប់តំណែងជើងឯក AFF Cup ឆ្នាំនេះ» គ្រូបង្វឹករបស់ ឡាវ Michael Weiss និយាយក្នុងសន្និសីទសារព័ត៌មាននៅ វៀងចន្ទន៍ កាលពីម្សិលមិញដូច្នេះ។
កន្លងមក ឡាវ មិនធ្លាប់បានឈ្នះ វៀតណាម ម្ដងណាឡើយ ក្នុងនោះបានចាញ់ 10 ប្រកួតចុងក្រោយ និងធ្លាប់រកបានតែ 1 គ្រាប់គត់កាលពីឆ្នាំ 1998។ ឡាវ មិនធ្លាប់ឆ្លងផុតវគ្គចែកពូល AFF Cup ខណៈដែល វៀតណាម បានក្លាយជាជើងឯក 2 លើកមកហើយ គឺនៅឆ្នាំ 1998 និង 2018។
Weiss គឺជាគ្រូបង្វឹកជនជាតិអាល្លឺម៉ង់ ធ្លាប់ដឹកនាំក្រុម U23 និងក្រុមជម្រើសជាតិហ្វ៊ីលីពីន។ លោក Weiss បានចូលមកដឹកនាំក្រុមរបស់ ឡាវ កាលពីខែកុម្ភៈ 2022។ មេដឹកនាំវ័យ 57 ឆ្នាំនេះបានឱ្យដឹងថា គាត់កសាងក្រុមឡាវ ដោយការច្របាច់បញ្ចូលគ្នារវាងកីឡាករ U23 ជាមួយនឹងកីឡាករវ័យចំណាស់ដែលមានបទពិសោធន៍ច្រើនឆ្នាំ។
គ្រូបង្វឹករបស់ ឡាវ Michael Weiss
Billy Ketkeophomphone កើតឆ្នាំ 1990 នៅ ប្រទេសបារាំង គឺជាកីឡាករសំខាន់របស់ ឡាវ។ ខ្សែប្រយុទ្ធដែលមានកម្ពស់ 1.80 ម៉ែត្ររូបនេះ ត្រូវបានជ្រើសរើសឱ្យចូលក្នុង ក្រុមជម្រើសជាតិឡាវ កាលពីឆ្នាំ 2021 ដើម្បីប្រកួតនៅ AFF Cup 2022។
ការប្រកួតដំបូងនៅ AFF Cup 2022 រវាង ឡាវ និង វៀតណាម នឹងប្រព្រឹត្តទៅនៅម៉ោង 19 និង 30 នាទី ថ្ងៃទី 21 ធ្នូ 2022៕
December 21, 2022
វៀតណាមដំណើរការសាកល្បងរថភ្លើងក្នុងក្រុងដំបូងនៅព្រៃនគរ
មនុស្សប្រហែល 100 នាក់បានចូលរួមទទួលបទពិសោធន៍នៃការធ្វើដំណើរតាម Metro 1 ដែលជាខ្សែរថភ្លើងក្នុងក្រុងដំបូងនៅ ទីក្រុងហូជីមិញ ក្នុងដំណើរការរត់សាកល្បងដំបូងកាលពីព្រឹកមិញ។
ខ្សែរថភ្លើងដែលមានទូចំនួន 3 ប្រវែងជាង 61 ម៉ែត្ររបស់គម្រោងផ្លូវដែកក្នុងក្រុង Metro 1 បានដំណើរការសាកល្បងដំបូងកាលពីព្រឹកថ្ងៃទី 21 ធ្នូ ដោយរត់ឆ្លងកាត់ស្ថានីយអ្នកដំណើរចំនួន 5 នៅលើផ្លូវដែកប្រវែងជិត 9 គីឡូម៉ែត្រ នៅក្នុងក្រុងព្រៃនគរ (ហូជីមិញ)។
ទូរថភ្លើងរបស់គម្រោងផ្លូវដែក Metro 1 ត្រូវបានផលិតនៅ ប្រទេសជប៉ុន អាចរត់បាន 110 គីឡូម៉ែត្រ/ម៉ោងសម្រាប់កំណាត់ផ្លូវលើទីខ្ពស់ និង 80 គីឡូម៉ែត្រ/ម៉ោងសម្រាប់កំណាត់ផ្លូវក្រោមដី។
Metro 1 គឺជាគម្រោងផ្លូវដែកក្នុងក្រុងដំបូងនៅ ព្រៃនគរ ដែលបានចាប់ផ្ដើមស្ថាបនាកាលពី 10 ឆ្នាំមុន និងត្រូវចំណាយប្រាក់ជាង 43,700 000 000 000 ដុង (ជាង 1.8 ពាន់លានដុល្លារអាម៉េរិក)។ គម្រោងនេះមានប្រវែងសរុបជិត 20 គីឡូម៉ែត្រ និងមានស្ថានីយចំនួន 14 ក្នុងនោះមាន 3 នៅក្រោមដី និង 11 នៅលើទីខ្ពស់។ បច្ចុប្បន្ន គម្រោងនេះបានសម្រេចជាង 93% ហើយបើតាមផែនការ វានឹងត្រូវស្ថាបនារួចរាល់ជាស្ថាពរនៅចុងឆ្នាំក្រោយ៕

December 21, 2022
ស្អែកនេះ ផ្លូវខេត្តពីរខ្សែភ្ជាប់ពីស្រុកព្រៃនប់ដល់កំពង់ផែស្វយ័តក្រុងព្រះសីហនុ នឹងសម្ពោធបើកឱ្យប្រើជាផ្លូវការ
ផ្លូវខេត្តពីរខ្សែគឺផ្លូវលេខ 146B និង 148 ដែលតភ្ជាប់ពីស្រុកព្រៃនប់ ឆ្លងកាត់ស្រុកស្ទឹងហាវ និងបន្តរហូតដល់កំពង់ផែស្វយ័តក្រុងព្រះសីហនុ នឹងសម្ពោធបើកឱ្យប្រើប្រាស់ជាផ្លូវការនាថ្ងៃទី 22 ធ្នូ 2022 នេះបើតាម ក្រសួងសាធាណការ និងដឹកជញ្ជូន។
គម្រោងតភ្ជាប់ផ្លូវទាំងពីរខ្សែនេះមានប្រវែងសរុបប្រមាណ 43.02 គីឡូម៉ែត្រ និងមានទទឹងតួផ្លូវ 11 ម៉ែត្រ។ យោងតាម ក្រសួងសាធារណការ ក្នុងគម្រោងនេះក៏មានសាងសង់សំណង់សិល្បការ្យផ្សេងៗដូចជា ស្ពានថ្មីចំ1 កន្លែង និងពង្រីកស្ពានចាស់ចំនួន 17 កន្លែង។ល។
ផ្លូវខេត្តទាំងពីរខ្សែនេះ នឹងដើរតួនាទីសំខាន់ក្នុងការជំរុញកំណើនសកម្មភាពសេដ្ឋកិច្ច ពាណិជ្ជកម្ម ទេសចរណ៍ ក៏ដូចជាលើកកម្ពស់ការតភ្ជាប់ខេត្តភាគនិរតីនេះ ឱ្យកាន់តែមានភាពប្រទាក់ក្រឡា។
គម្រោងដែលបានបើកការដ្ឋានសាងសង់កាលពីខែមេសា 2020 និងបានបញ្ចប់ជាស្ថាពរនៅខែសីហា 2022 ខាងលើ ត្រូវបានសាងសង់ដោយក្រុមហ៊ុនសាជីវកម្មស្ពាននិងថ្នល់ចិន (CRBC) និងត្រូវចំណាយថវិកាជាង 76 លានដុល្លារអាម៉េរិក៕
December 21, 2022
ពាន់រង្វាន់បាល់ទាត់ AFF 2022 ៖ 14 ប្រការដែលគួរដឹងអំពីស្ថានភាព
AFF Championship 2022 គឺជាពានរង្វាន់បាល់ទាត់នៃក្រុមជម្រើសជាតិដែលមានទំនាក់ទំនងជាមួយសហព័ន្ធកីឡាបាល់ទាត់អាស៊ាន។ «ហេតុអ្វី AFF Championship 2022 ត្រូវបានផ្សាយផ្ទាល់នៅ កូរ៉េខាងត្បូង» និង «ហេតុអ្វីនៅតែមិនមាន អូស្ត្រាលី ចូលរួម» ទាំងនេះគឺជារឿងដែលគួរដឹងអំពីរដូវកាលទី 14 របស់ពានរង្វាន់បាល់ទាត់អាស៊ីអាគ្នេយ៍ AFF 2022។
-ការប្ដូរផ្លាស់ឈ្មោះ ៖ ពានរង្វាន់ដែលមាន 11 ក្រុមជម្រើសជាតិនៅ អាស៊ីអាគ្នេយ៍ ឆ្នាំនេះ នឹងមានឈ្មោះថា AFF Mitsubishi Electric Cup 2022 ព្រោះតែកត្តាពាណិជ្ជកម្ម។ នេះគឺជាម្ចាស់ឧបត្ថម្ភាទី 3 ដែលភ្ជាប់ជាមួយនឹងឈ្មោះរបស់ពានរង្វាន់បាល់ទាត់នៅក្នុងប្រវត្តិសាស្ត្រ។ ចាប់ពីឆ្នាំ 1996 ដល់ 2004 ពានរង្វាន់បាល់ទាត់អាស៊ីអាគ្នេយ៍នេះមានឈ្មោះថា Tiger Cup ចំណែកពីឆ្នាំ 2008 ដល់ 2020 មានឈ្មោះថា AFF Suzuki Cup។
-អូស្ត្រាលី នៅតែមិនបានចូលរួម ៖ ចាប់ពីបានក្លាយជាសមាជិក AFC (សហព័ន្ធកីឡាបាល់ទាត់អាស៊ី) កាលពីឆ្នាំ 2007 អូស្ត្រាលី មានសិទ្ធិចូលរួមប្រកួតដណ្ដើមពានរង្វាន់ក្នុងទ្វីបអាស៊ី។ ដោយសារកត្តាភូមិសាស្ត្រ អូស្ត្រាលី ក៏បានចូលជាសមាជិកសហព័ន្ធបាល់ទាត់អាស៊ីអាគ្នេយ៍ (AFF) កាលពីឆ្នាំ 2013។ ប៉ុន្តែ ប្រទេសនេះមិនធ្លាប់បានចូលរួម AFF Cup ដោយសារតែមានកម្រិតខុសគ្នា។ ឆ្នាំ 2020 ប្រទេសនេះធ្លាប់ដាក់ពាក្យសុំចូលរួមប្រកួត ប៉ុន្តែត្រូវបានបដិសេធ។ បច្ចុប្បន្ន អូស្ត្រាលី ចូលរួមរាល់ការប្រកួតដណ្ដើមពានរង្វាន់ថ្នាក់ក្មេងនៅ អាស៊ីអាគ្នេយ៍ លើកលែងតែថ្នាក់ជម្រើសជាតិ។
-ត្រូវបានផ្ដាយផ្ទាល់នៅ កូរ៉េខាងត្បូង ៖ ថ្វីបើជាពានរង្វាន់របស់តំបន់អាស៊ីអាគ្នេយ៍ ប៉ុន្តែ AFF Cup នៅតែមានភាពទាក់ទាញនៅ កូរ៉េខាងត្បូង។ ទូរទស្សន៍ SBS របស់ កូរ៉េខាងត្បូង បានទិញសិទ្ធិផ្សាយផ្ទាល់ AFF Cup នៅប្រទេសនេះ។ ប៉ុន្តែ SBS នឹងផ្សាយតែការប្រកួតណាដែលមាន ឥណ្ឌូណេស៊ី ម៉ាឡេស៊ី និង វៀតណាម ដោយសារតែក្រុមជម្រើសជាតិទាំងនេះត្រូវបានដឹកនាំដោយគ្រូបង្វឹកជនជាតិកូរ៉េ។
-ឥណ្ឌូណេស៊ី មិនធ្លាប់ជាជើងឯក ៖ បើទោះជាធ្លាប់បានឡើងដល់វគ្គផ្ដាច់ព្រ័ត្ររហូតដល់ 6 ដង នៅឆ្នាំ 2000, 2002, 2004, 2010, 2016 និង 2020 ប៉ុន្តែ ឥណ្ឌូណេស៊ី មិនធ្លាប់ដណ្ដើមបានពានរង្វាន់ជើងឯក AFF ម្ដងណា ឡើយ។ ឥណ្ឌូណេស៊ី វិះបានក្លាយជាជើងឯកនៅឆ្នាំ 2002 ដែលពេលនោះ ការប្រកួតផ្ដាច់ព្រ័ត្រជាមួយ ថៃ ទទួលបានលទ្ធផល 2-2 ក្នុងរយៈពេល 120 នាទី ប៉ុន្តែត្រូវចាញ់ 2-4 ក្នុងការប្រកួតទាត់បាល់ប៉េណាំងទី។
ក្រៅពីព័ត៌មានខាងលើ នៅមានប្រការជាច្រើនទៀតដែលគួរដឹងអំពី AFF Cup មានដូចខាងក្រោម៖
ថេឡូរ នីកូឡាស់ ឌឿង ឬ Nick Taylor/Nicolas Taylor (កម្ពុជា) ដែលទាក់ឱ្យក្លឹប Orlando City (អាម៉េរិក)
-ព្រុយណេ, កម្ពុជា, ឡាវ និងទីម័រខាងកើត មិនធ្លាប់បានឡើងផុតពីវគ្គចែកពូល
-ខ្សែប្រយុទ្ធថៃ Teerasil Dangda រកបានគ្រាប់បាល់ច្រើនជាងគេ
-កីឡាករថៃ Chanathip Songkrasin កាន់កាប់ឯតទគ្គកម្ម 3 ដង ជាកីឡាករឆ្នើមបំផុត
-កីឡដ្ឋាន Senayan របស់ ឥណ្ឌូណេស៊ី ធំជាងគេ ប៉ុន្តែ AFF Cup លើកនេះ ឥណ្ឌូណេស៊ី ទាត់ដោយគ្មានអ្នកមើល ព្រោះតែកីឡដ្ឋាននេះត្រូវកែលំអ ក្រោយពីមានហេតុការណ៍បណ្ដាលឱ្យមនុស្ស 123 ស្លាប់
-កីឡាករ 5 រូបកំពុងទាត់ឱ្យក្រុមនៅក្រៅទ្វីបអាស៊ី ៖ ក្នុងនោះក៏មាន ថេឡូរ នីកូឡាស់ ឌឿង ឬ Nick Taylor/Nicolas Taylor (កម្ពុជា) ដែលទាក់ឱ្យក្លឹប Orlando City (អាម៉េរិក)
-ក្រុមឥណ្ឌូណេស៊ី មានកីឡាករអាយុមធ្យមក្មេងជាងគេ
-មិនមានក្រុមជម្រើសជាតិណាដែលមានគ្រូបង្វឹកក្នុងស្រុក
-គ្រូបង្វឹកជនជាតិកូរ៉េ មានដល់ទៅ 3 រូប
-4 ក្រុមដែលធ្លាប់ដណ្ដើមបានជើងឯក AFF Cup ៖ ក្រុមជម្រើសជាតិថៃ (6 លើក), សិង្ហបុរី (4 លើក), វៀតណាម (2 លើក) និង ម៉ាឡេស៊ី (1 លើក)៕
December 21, 2022
តម្លៃលក់រាយប្រេងឥន្ធនៈថ្មី អនុវត្តចាប់ពីថ្ងៃទី 21 ដល់ 31 ធ្នូ 2022
ក្រសួងពាណិជ្ជកម្ម ព្រឹកនេះ បានចេញសេចក្តីជូនដំណឹងស្ដីពី «តម្លៃលក់រាយប្រេងឥន្ធនៈថ្មី ដែលត្រូវអនុវត្តចាប់ពីថ្ងៃទី 21 ដល់ថ្ងៃទី 31 ខែធ្នូ 2022។
តម្លៃថ្មីរបស់សាំងគឺ 4,050 រៀល/លីត្រ ថយចុះ 50 រៀល និងប្រេងម៉ាស៊ូតតម្លៃ 4,500 រៀល/លីត្រ ឡើង 50 រៀល បើធៀបនឹងតម្លៃប្រេងឥន្ធនៈដែលដាក់ឱ្យអនុវត្តមុនថ្ងៃទី 21 ធ្នូ 2022។

December 21, 2022
ដំណើរកម្សាន្តលើកទី15 នៃមហាគ្រួសារអតិថិជនរថយន្ត FORD ប្រចាំឆ្នាំ2022 កាន់តែអស្ចារ្យ កាន់តែធំជាងមុន ដំណើរកម្សាន្តឆ្ពោះទៅកាន់ខេត្តប៉ាតាយ៉ា ប្រទេសថៃ
នេះគឺជាលើកទី15ហើយ ដែលក្រុមហ៊ុន អ អិម អេ ខេមបូឌា (RMA Cambodia) ដែលជាក្រុមហ៊ុននាំចូលផ្តាច់មុខរថយន្ត FORD មកកាន់ទីផ្សារប្រទេសកម្ពុជាបានរៀបចំឡើងនូវដំណើរកម្សាន្តបោះជំរុំរបស់មហាគ្រួសារអតិថិជនរថយន្ត FORD ហើយអ្វីដែលកាន់តែអស្ចារ្យនោះគឺ ដំណើរកម្សាន្តនៃមហាគ្រួសារអតិថិជនរថយន្ត FORD ពីមួយឆ្នាំទៅមួយឆ្នាំ គឺកាន់តែធំជាងមុន ដោយដំណើរកម្សាន្តមហាគ្រួសារអតិថិជនរថយន្ត FORD ក្នុងឆ្នាំ2022នេះ ក្រុមហ៊ុនបានបំបែកឯកត្តកម្មថ្មីតែម្តង គឺមានរថយន្ត FORD គ្រប់ម៉ូដែលចូលរួមនៅក្នុងដំណើរកម្សាន្តលើកទី15នេះរហូតដល់ជាង200គ្រឿង ដែលសរុបអ្នកចូលរួមទាំងអស់ប្រមាណជាជាង1000នាក់ ដោយធ្វើដំណើរជាក្បួនដ៏ឱឡារិកពីរាជធានីភ្នំពេញឆ្ពោះទៅកាន់ខេត្តប៉ាតាយ៉ា ប្រទេសថៃ ដែលមានរយៈពេល3យប់4ថ្ងៃ គឺពីថ្ងៃទី15ដល់ថ្ងៃទី18 ខែធ្នូ ឆ្នាំ2022។ ដំណើរកម្សាន្តជាលក្ខណៈមហាគ្រួសារមួយនេះបានចេញដំណើរពីរាជធានីភ្នំពេញនាព្រឹកព្រលឹមថ្ងៃព្រហស្បតិ៍ ទី15 ខែធ្នូនេះ ឆ្ពោះទៅខេត្តកោះកុង ដោយបោះជំរុំស្នាក់នៅក្នុងខេត្តកោះកុងរយៈពេល1យប់ រួចក្បួនរថយន្ត FORD ដ៏ច្រើនឥតគណនានេះក៏បានបន្តដំណើរឆ្ពោះទៅកាន់ខេត្តរ៉ាក់យ៉ង និងខេត្តប៉ាតាយ៉ា ប្រទេសថៃ ដោយបោះជំរុំស្នាក់នៅទីនោះរយៈពេល2យប់។
ដំណើរកម្សាន្តដ៏រីករាយនេះបានរៀបចំឡើងដោយក្រុមហ៊ុន អ អិម អេ ខេមបូឌា (RMA Cambodia) ដោយសហការជាមួយធនាគារ KB Daehan (KB Daehan Specialized Bank Plc) ជាធនាគារដែលផ្តល់នូវសេវាហិរញ្ញវត្ថុដ៏ល្អនៅក្នុងប្រទេសកម្ពុជា ជាពិសេសឥណទានទិញរថយន្តថ្មី ក្រុមហ៊ុនធានារ៉ាប់រង FWD ស្រាបៀរហនុមាន ព្រមទាំងក្រុមហ៊ុនប្រេងឥន្ទៈ PTT ផងដែរ។ នៅក្នុងឆ្នាំនេះ ក្រុមហ៊ុនមានគោលបំណងរៀបចំកម្មវិធីនេះឡើងដើម្បីជាការថ្លែងអំណរគុណទៅដល់អតិថិជនរថយន្ត FORD ទាំងអស់ ដែលតែងតែគាំទ្រដល់ក្រុមហ៊ុន ហើយក្រុមហ៊ុនក៏ចង់ឱ្យអ្នកចូលរួមទាំងអស់ដែលជាសមាជិកគ្រួសាររថយន្ត FORD បានជួបជុំគ្នាជាលក្ខណៈគ្រួសារធំ បានស្គាល់គ្នា និងអាចផ្លាស់ប្តូរធួរកិច្ចគ្នាទៅវិញទៅមក ព្រមទាំងទទួលបាននូវបទពិសោធន៍ធ្វើដំណើរជាក្បួនរថយន្តជាច្រើនរហូតដល់ជាង200គ្រឿង និងបទពិសោធន៍នៃការបោះជំរុំគេងជុំគ្នា។
ដំណើរកម្សាន្តមហាគ្រួសារអតិថិជនរថយន្ត FORD ឬ FORD Adventure ឆ្នាំ2022នេះ ពិតជាធំ និងមានអ្នកចូលរួមច្រើនកុះករខ្លាំងណាស់ ដោយគ្រប់អតិថិជនរបស់រថយន្ត FORD ទាំងអស់សុទ្ធតែមានសិទ្ធិក្នុងការចូលរួមនៅក្នុងកម្មវិធីដំណើរកម្សាន្តដ៏រីករាយនេះ ដោយគ្រាន់តែលោកអ្នកធ្វើការចុះឈ្មោះចូលរួមឱ្យបានទាន់ពេលវេលា នោះលោកអ្នក និងក្រុមគ្រួសារនឹងទទួលបាននូវបទពិសោធន៍ល្អៗ និងថ្មីៗជាច្រើនការបើកបររយន្ត FORD ឆ្លងប្រទេសយ៉ាងមានទំនុកចិត្ត និងមានសុវត្ថភាពជាមួយក្រុមហ៊ុន អ អិម អេ ខេមបូឌា (RMA Cambodia) ហើយលើកនេះត្រឹមរយៈពេល3ថ្ងៃប៉ុណ្ណោះមានអតិថិជនចុះឈ្មោះចូលរួមនៅក្នុងកម្មវិធីដំណើរកម្សាន្តចុងឆ្នាំនេះរហូតដល់ជាង200រថយន្ត ពិតជាអស្ចារ្យខ្លាំងណាស់។ កម្មវិធីកម្សាន្ត ដែលមាននៅក្នុងដំណើរកម្សាន្តមហាគ្រួសារអតិថិជនរថយន្ត FORD ក្នុងឆ្នាំ2022នេះមានដូចជា ការបោះជំរុំគេងជុំគ្នា ការជិះរថយន្ត FORD ជាក្បួនដ៏អស្ចារ្យឆ្លងប្រទេស ហើយតាមរយៈការធ្វើដំណើរលើកនេះ អតិថិជន FORD ទាំងអស់ក៏ទទួលបាននូវបទពិសោធថ្មីក្នុងការបើកបរលើប្រភេទផ្លូវដែលមានភាពបត់បែនច្រើន ផ្លូវគ្រួស និងជាពិសេសបទពិសោធន៍នៃការបើកបរដោយផ្ទាល់នៅក្នុងទឹកដីប្រទេសថៃ ដែលជាប្រទេសប្រកាន់ការបើកបរផ្ទុយពីប្រទេសកម្ពុជាយើង គឺការបើកបរដោយប្រកាន់ខាងឆ្វេង។ នៅក្នុងដំណើរកម្សាន្តប្រចាំឆ្នាំ2022នេះផងដែរ អ្នកចូលរួមទាំងអស់ក៏បានទៅទស្សនានៅក្នុងតំបន់ទេសចរណ៍ដ៏ល្បីនៅលើទឹកដីខេត្តប៉ាតាយ៉ា ប្រទេសថៃផងដែរ គឺសួនណុងនុច ដែលជាសួនកម្សាន្តដ៏ស្រស់ស្អាតបំផុតក្នុងចំណោមសួនកម្សាន្តដែលស្រស់ស្អាតជាងគេនៅលើពិភពលោក និងការដើរទិញទំនិញនៅក្នុងប្រទេសថៃយ៉ាងសប្បាយរីករាយ។ មិនទាន់អស់នោះទេ អ្វីដែលកាន់តែពិសេស និងជាការចងចាំមិនអាចបំភ្លេចបានរបស់សមាជិកគ្រួសារ FORD ទាំងអស់នោះគឺ កម្មវិធីកម្សាន្តជួបជុំគ្នានាពេលរាត្រី ដោយមានការច្រៀងរាំកម្សាន្តជួបជុំគ្នាយ៉ាងសប្បាយរីករាយ ពេញដោយភាពស្និតស្នាល និងពោរពេញដោយការចងចាំល្អៗមិនអាចបំភ្លេចបាន។
គួររំឭកផងដែរថា គ្រប់កម្មវិធីដំណើរកម្សាន្តមហាគ្រួសារអតិថិជនរថយន្ត FORD ជារៀងរាល់លើកគឺគ្រុមហ៊ុនមិនដែលរំលងនោះទេ ក្រុមហ៊ុនតែងតែផ្សារភ្ជាប់ជាមួយនឹងកម្មវិធីសប្បុរសធម៌ជានិច្ច ដើម្បីជាការចូលរួមជួយដល់ប្រទេសជាតិ និងជួយទៅដល់ជនទុរគត ដែលកំពុងជួបការលំបាកនៅក្នុងជីវភាពរស់នៅរបស់ពួកគេ។ ការផ្សារភ្ជាប់ភាពរីករាយនៃដំណើរកម្សាន្ត ជាមួយនឹងការងារសប្បុរធម៌បែបនេះ គឺជាការបណ្តុះគំនិតដល់យុវជនខ្មែរជំនាន់ក្រោយឱ្យចេះជួយគ្នាទៅវិញទៅមក ឱ្យមានសេចក្តីសន្តោសប្រណីដល់ជនទីទាល់ក្រ និងឱ្យពួកគេចេះស្រឡាញ់រាប់អានគ្នាដោយមិនរើសអើងឋានៈទាបខ្ពស់។
ព្រឹត្តិការណ៍ដំណើរកម្សាន្តមហាគ្រួសារអតិថិជនរថយន្ត FORD ឬ FORD Adventure ឆ្នាំ2022នេះ គឺពិតជាអស្ចារ្យ និងធំខ្លាំងណាស់ ហើយអ្នកចូលរួមទាំងអស់ក៏ពេញចិត្តចំពោះការរៀនចំ និងការស្វាគមន៍ដ៏កក់ក្តៅរបស់ក្រុមការងារនៃក្រុមហ៊ុន អ អិម អេ ខេមបូឌា (RMA Cambodia) ជាខ្លាំងផងដែរ ទាំងកន្លែងដើរលេងកម្សាន្ត ទាំងកន្លែងស្នាក់នៅ ទាំងអាហារហូបចុក ព្រមទាំងកម្មវិធីកម្សាន្តផ្សេងៗពេញរយៈពេល4ថ្ងៃ 3យប់នេះ គឺពិតជាសប្បាយរីករាយ និងទទួលបាននូវបទពិសោធន៍ថ្មីៗជាច្រើន នេះគឺជាកាដូដ៏មានអត្ថន័យបំផុតរបស់ក្រុមហ៊ុន អ អិម អេ ខេមបូឌា (RMA Cambodia) ជូនទៅដល់អតិថិជនដែលតែងតែគាំទ្ររថយន្ត FORD ក្នុងឆ្នាំថ្មីនេះ៕

December 21, 2022
ប្រាសាទបុរាណរបស់ «អតីតប្រទេសចម្ប៉ា» នៅវៀតណាម ចាប់ផ្ដើមបើកទ្វារទទួលទេសចរ
ក្រោយការជួសជុលរយៈពេល 6 ឆ្នាំ ក្រុមអ្នកជំនាញរបស់ ឥណ្ឌា ក៏បានប្រគល់ក្រុមបាសាទ A, H និង K មកឱ្យ វៀតណាម និងបានបើកទ្វារទទួលទេសចរចាប់ពីថ្ងៃទី 20 ធ្នូ 2022។
ដំណើរការនៃជួសជុល ក្រុមរបស់ ឥណ្ឌា គឺការជម្រះស្មៅ ស្ដារប្រព័ន្ធបង្ហូរទឹកខាងក្នុង និងជុំវិញ កែលំអគ្រឹះ និងខឿនរបស់ប្រាសាទដោយប្រើប្រាស់ឥដ្ឋ និងជញ្ជាំង។ល។
វៀតណាម និងឥណ្ឌា កាលពីឆ្នាំ 2014 បានចុះអនុស្សារណៈនៃការយោគយល់ក្នុងការអនុវត្តគម្រោងអភិរក្ស និងជួសជុលក្រុមប្រាសាទ H, K និង A ដែលត្រូវចំណាយថវិកាជាង 60 ពាន់លានដុង (ជាង 2.5 លានដុល្លារអាម៉េរិក) ក្នុងនោះ ឥណ្ឌា ផ្ដល់ជំនួយ 50 ពាន់លានដុង (2.1 លានដុល្លារ)។ ឆ្នាំ 2017 ក្រុមអ្នកជំនាញមកពី វិទ្យាស្ថានបុរាណវិទ្យាឥណ្ឌា (ASI) ចាប់ផ្ដើមដំណើរការជួសជុល។
បណ្ដុំប្រាសាទមីស៊ឺន ខាងលើ ក្នុងនោះមានទាំងប្រាសាទដែលមានរូបសំណាកលិង្គ និងយោនីជាដើម គឺជាស្នាដៃស្ថាបត្យកម្មរបស់ អតីតប្រទេសចម្ប៉ា ដែលបច្ចុប្បន្នស្ថិតនៅក្នុងទឹកដីប្រទេសវៀតណាម។
លោក Subhash Prasad Gupta ឯកអគ្គរដ្ឋទូតរងឥណ្ឌាប្រចាំវៀតណាម ឱ្យដឹងថា ខាងលើគឺជាចំណុចចាប់ផ្ដើមនៃការជួសជុលបណ្ដាប្រាសាទចាមនៅ វៀតណាម។ ពេលខាងមុខ ឥណ្ឌា នឹងបន្តជួយដល់ វៀតណាម ក្នុងការជួសជុលប្រាសាទចាម ផ្សេងទៀត។
ក្រុមប្រាសាទបុរណរបស់អតីតប្រទេសចម្ប៉ា ស្ថិតនៅក្នុងខេត្តក្វាងណាំ (Quang Nam) ភាគកណ្ដាលប្រទេសវៀតណាម និងនៅមិនឆ្ងាយប៉ុន្មានធៀបនឹងតំបន់កន្ទុយនាគរបស់កម្ពុជា។ នេះគឺជាបណ្ដុំនៃប្រាសាទបុរាណរបស់ ចាម ដែលមានទីតាំងក្នុងជ្រលងភ្នំមួយដែលមានអង្កត់ផ្ចិតប្រហែល 2 គីឡូម៉ែត្រ និងព័ទ្ធជុំវិញដោយព្រៃភ្នំ។
ឆ្នាំ 1999 បណ្ដុំប្រាសាទមីស៊ឺន (My Son Sanctuary) ត្រូវបានអង្គការ UNESCO ទទួលស្គាល់ថាជាបេតិកភណ្ឌពិភពលោក៕

December 21, 2022