សឿន សំណាង - La Reine Media

ទិដ្ឋភាពស៊ុតបញ្ចូលទីទាំង 10 គ្រាប់ដែលអស្ចារ្យបំផុតនៅ World Cup 2022

ក្នុងចំណោមការស៊ុតបញ្ចូលទី 10 គ្រាប់ល្អមើលបំផុតនៅ World Cup 2022 ដែលត្រូវបានជ្រើសរើសដោយ FIFA គេឃើញថា Richarlison របស់ ប្រេស៊ីល មាន 2 គ្រាប់ ចំណែក Lionel Messi វិញ «អវត្តមាន»។

សូមសង្កេតមើលទិដ្ឋភាពស្ដីពីឈុតឆាកស៊ុតប៉ើងសំណាញ់ដ៏អស្ចារ្យបំផុតនៅ World Cup 2022 ៖

1- Al-Dawasri របស់ អារ៉ាប៊ីសាអូឌីត

Al-Dawasri ក្នុងពេលទាត់ផ្ដាច់ 1 គ្រាប់ចុងក្រោយក្នុងការប្រកួតវគ្គសន្សំពិន្ទុក្នុងពូល C ជួយឱ្យ អារ៉ាប៊ីសាអូឌីត ឈ្នះ អាហ្សង់ទីន 2-1 នៅលើទីលាន Lusail កាលពីថ្ងៃទី 22 វិច្ឆិកា 2022។

2- Richarlison របស់ ប្រេស៊ីល

ក្នុងការប្រកួតជុំដំបូងនៅពូល G កីឡាករ Richarlison រកបាន 2 គ្រាប់ឱ្យ ប្រេស៊ីល ហើយ ស៊ែប៊ី ក៏ត្រូវចាញ់ 0-2។

3- Cody Gakpo របស់ ហូឡង់

Gakpo រកបាន 1 គ្រាប់ដំបូងនៅក្នុងការប្រកួតដែលមានលទ្ធផល 1-1 រវាង ហូឡង់ និង អេក្វាទ័រ ក្នុងជុំទីពីរនៃវគ្គសន្សំពិន្ទុនៅពូល A លើទីលាន Khalifa កាលពីថ្ងៃទី 25 វិច្ឆិកា 2022។

4- Enzo Fernandez របស់ អាហ្សង់ទីន

Enzo Fernandez បានបញ្ចប់ការប្រកួតជុំទីពីរវគ្គសន្សំពិន្ទុនៅពូល C ក្នុងកីឡដ្ឋាន Lusail កាលពីថ្ងៃទី 26 វិច្ឆិកា 2022 ដោយ ម៉ិកស៊ិក ត្រូវចាញ់ 2-0។

5- Vincent Aboubakar របស់ កាមេរូន

Vincent Aboubakar ទាត់បាល់រំលងអ្នកចាំទី Vanja Milinkovic-Savic (សែប៊ី) ក្នុងការប្រកួតជុំទីពីរនៅពូល G លើទីលាន Al Janoub កាលពីថ្ងៃទី 28 វិច្ឆិកា 2022 រួមចំណែកជួយឱ្យលទ្ធផលឡើងទៅ 3-3។

6- Luis Chavez របស់ ម៉ិកស៊ិក

ក្នុងប្រកួតដែលបានឈ្នះ អារ៉ាប៊ីសាអូឌីត 2-1 នៅក្នុងជុំចុងក្រោយរបស់ពូល C កីឡាករ Luis Chavez រកបាន 1 គ្រាប់ នៅនាទីទី 52 ដោយការស៊ុតបាល់ពិន័យ 30 ម៉ែត្រ។

7- Mbappe របស់ បារាំង

ក្នុងប្រកួតដែល បារាំង ឈ្នះ ប៉ូឡូញ 3-1 នៅវគ្គ 1/8 Mbappe ស៊ុតបញ្ចូលទីបាន 2 គ្រាប់។ គ្រាប់ទី 2 របស់គាត់គឺជាទិដ្ឋភាពដ៏អស្ចារ្យ។

8- Richarlison របស់ ប្រេស៊ីល

Richarlison យកឈ្នះលើអ្នកចាំទី Kim Seunggyu ក្នុងឈុតឆាកប្រឈមមុខដាក់គ្នាលើវាលស្មៅ 974 កាលពីថ្ងៃទី 05 វិច្ឆិកា ដែល ប្រេស៊ីល បានឈ្នះ កូរ៉េខាងត្បូង 4-1 នៅវគ្គ 1/8។

9- Paik Seung-ho របស់ កូរ៉េខាងត្បូង

ក្នុងប្រកួតដែល កូរ៉េខាងត្បូង ចាញ់ ប្រេស៊ីល 1-4 នៅវគ្គ 1/8 លើទីលាន 974 ខ្សែប្រយុទ្ធ Paik Seung-ho បានស៊ុតផ្ដាច់ ត្រង់ដូចបន្ទាត់ពីចម្ងាយ 25 ម៉ែត្រ ប៉ើងសំណាក់របស់ Alisson។

10- Neymar របស់ ប្រេស៊ីល

Neymar បំប៉ើងទីរបស់ ក្រូអាត នៅនាទីទី 105+1 ក្នុងប្រកួតវគ្គ 1/8។ បើសិន ក្រូអាត រកមិនបានគ្រាប់បាល់ស្មើនៅនាទីទី 117 នោះទេ ប្រេស៊ីល បានឡើងទៅវគ្គពាក់កណ្ដាលផ្ដាច់ព្រ័ត្របាត់ទៅហើយ៕

December 23, 2022

តាលីបង់ លើកមូលហេតុនៃ «ការហាមសិស្សស្រីរៀនមហាវិទ្យាល័យ»

មន្ត្រីរបស់របបតាលីបង់ បានឱ្យដឹងថា សិស្សស្រីនៅ អាហ្វហ្គានីស្ថាន ត្រូវបានហាមសិក្សានៅមហាវិទ្យាល័យគឺដោយសារពួកគេមិនគោរពតាមការណែនាំ ក្នុងនោះក៏មានការកំណត់អំពីសម្លៀកបំពាក់សមស្របផងដែរ។

«និស្សិតស្រីដែលដើរពីផ្ទះទៅកាន់សាកលវិទ្យាល័យក៏មិនបានគោរពតាមការណែនាំទាក់ទងនឹងកន្សែងគ្របក្បាលហ៊ីចាប (Hijab)។ ពួកគេស្លៀកពាក់ដូចទៅពិធីជប់លៀងមង្គលការ» រដ្ឋមន្ត្រីក្រសួងអប់រំមហាវិទ្យាល័យរបស់របបតាលីបង់ Neda Mohammad Nadeem ថ្លែងនៅលើកញ្ចក់ទូរទស្សន៍កាលពីថ្ងៃទី 22 ធ្នូ 2022។

យោងតាម Nadeem និស្សិតស្រីមិនបានអើពើជាមួយនឹងការកំណត់របស់សាសនាអ៊ីស្លាម ក្នុងនោះបានកំណត់ថាត្រូវស្លៀកពា់កអ្វី ឬដើរជាមួយសាច់ញាតិជាបុរសនៅពេលចេញទៅក្រៅ។

«…14 ខែបានកន្លងផុតទៅ ប៉ុន្តែ ការណែនាំរបស់ក្រសួងអប់រំមហាវិទ្យាល័យស្ដីពីការអប់រំស្ត្រី មិនត្រូវបានគេធ្វើតាម» Nadeem បញ្ជាក់ដូច្នេះ។

Nadeem ក៏បានឱ្យដឹងថា មុខវិជ្ជាមួយចំនួនមិនសមស្របនឹងស្ត្រីភេទ។ «បច្ចេកទេសកសិកម្ម និងមុខវិជ្ជាមួយចំនួនផ្សេងទៀត មិនសមស្របនឹងសេចក្តីថ្លៃថ្នូរ និងកិត្តិយសរបស់និស្សិតស្រី ក៏ដូចជាវប្បធម៌របស់ អាហ្វហ្គានីស្ថាន» រដ្ឋមន្ត្រីក្រសួងអប់រំរបស់ តាលីបង់ អះអាងដូច្នេះ និងបន្តថា អាជ្ញាធរក៏បានបិទសាលាដែលបង្រៀនតែនិស្សិតស្រីក្នុងករណីមួយចំនួនផងដែរ។

អាជ្ញាធរតាលីបង់ កាលពីថ្ងៃទី 20 ធ្នូ បានដាក់បម្រាមមិនកំណត់ពេលចំពោះនិស្សិតស្រីអាហ្វហ្គានីស្ថាន រៀននៅមហាវិទ្យាល័យ បន្ទាប់ពីជិត 3 ខែដែលសិស្សស្រី និងស្ត្រីរាប់ពាន់នាក់នៅប្រទេសនេះ ចូលរួមប្រលងចូលមហាវិទ្យាល័យ។

តាលីបង់ ក៏បានឱ្យដឹងថា សាលាមធ្យមសិក្សាសម្រាប់សិស្សស្រីស្ទើរតែទាំងអស់នៅ អាហ្វហ្គានីស្ថាន ក៏ត្រូវបានបិទទ្វារបណ្ដោះអាសន្នក្នុងរយៈពេលជាងមួយឆ្នាំ។

ក្រុមប្រទេស G7 មានប្រតិកម្មខ្លាំងក្លាទៅនឹងបទបញ្ជាខាងលើរបស់ តាលីបង់ និងបានស្នើឱ្យអាជ្ញាធរនៅ អាហ្វហ្គានីស្ថាន លុបចោលបម្រាមនេះ។ អារ៉ាប៊ីសាអូឌីត ក៏បានសម្ដែងការភ្ញាក់ផ្អើល និងសោកស្ដាយ ព្រមទាំងជំរុញឱ្យ តាលីបង់ ដកបម្រាមនេះផងដែរ។ ប៉ុន្តែ Nadeem និយាយថា សហគមន៍អន្តរជាតិមិនគួរលូកដៃចូលក្នុងកិច្ចការផ្ទៃក្នុងរបស់ អាហ្វហ្គានីស្ថាន។

អាជ្ញាធរតាលីបង់ ថែមទាំងបានដាក់ការកំណត់យ៉ាងតឹងរឹងនៅពេលហាមស្ត្រីទៅឧទ្យាន ពិព័រណ៍ បន្ទប់ហាត់ប្រាណ ក៏ដូចជាបន្ទប់ងូតទឹកសាធារណៈ។

តាលីបង់ បានប្រកាសថា បានផ្លាស់ប្ដូរច្រើនធៀបនឹងកាលពីសម័យជាង 20 ឆ្នាំមុន និងបានអះអាងថា កំពុងអនុញ្ញាតឱ្យស្ត្រីទទួលបានសិទ្ធិនានាទៅតាមច្បាប់សាសនាអ៊ីស្លាម និងវប្បធម៌អាហ្វហ្គានីស្ថាន។ ប៉ុន្តែ ការសម្រេចចិត្តក្នុងប៉ុន្មានខែចុងក្រោយនេះ នាំឱ្យរបបនេះរងការរិះគន់ និងសង្ស័យ៕

December 23, 2022

គ្រូបង្វឹកក្រុមបាល់ទាត់ជម្រើសជាតិកម្ពុជា ចោទថា ឥណ្ឌូណេស៊ី «ប្រើល្បិចមិនល្អ»

គ្រូបង្វឹក Keisuke Honda ឱ្យដឹងថា គាត់ត្រូវបានគេរំខានដំណេកដោយការស៊ីញូទូរស័ព្ទកាលពីវេលាទៀបភ្លឺថ្ងៃទី 22 ធ្នូ មួយថ្ងៃមុនការប្រកួតរវាង កម្ពុជា និង ឥណ្ឌូណេស៊ី ក្នុងជុំទីពីររបស់ពូល A នៅ AFF Cup 2022។

លោក Keisuke Honda បង្ហោះសារនៅលើ Twitter ថា គាត់បានទទួលទូរស័ព្ទពីរដងនៅក្នុងសណ្ឋាគារនៅវេលាទៀបភ្លឺ។ «ពេលនោះគឺម៉ោង 4 ទៀបភ្លឺ» គ្រូបង្វឹករបស់ក្រុមកម្ពុជា សរសេរដូច្នេះ។ «មុនពេលខ្ញុំលើកទូរស័ព្ទ ខ្សែម្ខាងទៀតក៏បានបិទ»។

អតីតកំពូលកីឡាករបាល់ទាត់ជប៉ុន រូបនេះ ទំនងជាចង់និយាយថា ក្រុមម្ចាស់ផ្ទះឥណ្ឌូណេស៊ី មានចេតនារំខានមុនការប្រកួត។ ទន្ទឹមនឹងនេះ គាត់ក៏បារម្ភថា កីឡាករកម្ពុជា ក៏អាចត្រូវបានគេរំខានដូច្នេះដែរ។ លោក Keisuke Honda បន្តថា «ខ្ញុំនឹងនិយាយជាមួយកីឡាករអំពីវិធីសាស្ត្រទប់ទល់មួយចំនួន»។

យោងតាមអតីតកីឡាកររបស់ AC Milan រូបនេះ ករណីបែបនេះនៅតែកើតឡើងនៅមុនពេលមានការប្រកួតសំខាន់។ កម្ពុជា នឹងត្រូវប៉ះ ក្រុមម្ចាស់ផ្ទះឥណ្ឌូណេស៊ី នៅវេលាម៉ោង 16 និង 30 នាទី ថ្ងៃទី 23 ធ្នូ 2022។

កម្ពុជា បានចាប់ផ្ដើមប្រកួតនៅ AFF Cup 2022 (AFF Mitsubishi Electric Cup) យ៉ាងរលូន តាមរយៈជ័យជម្នះ 3-2 លើ ហ្វ៊ីលីពីន ក្នុងការប្រកួតជុំដំបូង។ ចំណែកការប្រកួតនៅរសៀលថ្ងៃទី 23 ធ្នូ ជាមួយ កម្ពុជា ទើបជាការចាប់ផ្ដើមដំបូងរបស់ ឥណ្ឌូណេស៊ី។ ក្រុមជម្រើសជាតិឥណ្ឌូណេស៊ី សង្ឃឹមថា នឹងដណ្ដើមបានតំណែងជើងឯក AFF Cup លើកនេះ។

ក្រុមបាល់ទាត់ជម្រើសជាតិកម្ពុជា ចាប់ផ្ដើមដោយរលូននៅ AFF Cup 2022

គ្រូបង្វឹករបស់ កម្ពុជា ឱ្យដឹងថា «ការប្រកួតនេះពិតជាសំខាន់ខ្លាំងណាស់ ហើយបង្កប់ដោយការលំបាក ភាពតានតឹង។ យើងនឹងត្រៀមឱ្យបានល្អបំផុតសម្រាប់ការប៉ះគ្នានេះ»។ ជាក់ស្ដែង ក្នុងការប្រកួត 17 លើកកន្លងមក ឥណ្ឌូណេស៊ី ឈ្នះ 16 ប្រកួត និងស្មើ 1 ប្រកួត។ នៅ AFF Cup 2021 ឥណ្ឌូណេស៊ី បានឈ្នះ កម្ពុជា 4-2។

AFF Cup 2022 គឺជារដូវកាលទីបីបន្តបន្ទាប់ដែល Honda ធ្វើការជាមួយក្រុមជម្រើសជាតិកម្ពុជា។ មុនការប្រកួត គ្រូបង្វឹកជនជាតិជប៉ុនរូបនេះក៏ធ្លាប់បានរិះគន់ថា កាលបរិច្ឆេទប្រកួតរបស់ កម្ពុជា គឺជាអម្រែកធ្ងន់ ហើយការប្រកួត 3 ថ្ងៃម្ដងគឺជារឿងមិនសមស្រប។

គ្រូបង្វឹក Keisuke Honda កើតឆ្នាំ 1986 ធ្លាប់ចូលរួមប្រកួតនៅ World Cup ចំនួន 3 លើក ចាប់ពីឆ្នាំ 2010 និង 2018 និងធ្លាប់ដឹកនាំក្រុមជម្រើសជាតិដណ្ដើមបានតំណែងជើងឯក Asian Cup 2021។ លោក Honda ក៏ធ្លាប់ធ្វើឱ្យមានការសាទរនៅពេលប្រកួតឱ្យ CSKA Moscow (រុស្ស៊ី) និង AC Milan (អ៊ីតាលី) នៅ អឺរ៉ុប ផងដែរ។ ឆ្នាំ 2018 លោក Honda បានសម្រេចចិត្តធ្វើការជាមួយកម្ពុជា ដើម្បីជួយដល់វិស័យបាល់ទាត់នៅទីនេះ៕

December 23, 2022

អាហ្សង់ទីន នឹងចាប់ផ្ដើមការពារតំណែងជើងឯក World Cup នៅពេលណា?

Lionel Messi និងសមាជិកក្រុមកីឡាករបាល់ទាត់ជម្រើសជាតិអាហ្សង់ទីន នឹងចាប់ផ្ដើមយុទ្ធនាការការពារតំណែងជើងឯក World Cup របស់ខ្លួននៅពេលវគ្គជម្រុះរបស់ World Cup 2026 តំបន់អាម៉េរិកខាងត្បូង ផ្ដើម ការប្រកួតចាប់ពីឆ្នាំ 2023។

ឆ្នាំ 1938 គឺជារដូវកាលដំបូងដែលម្ចាស់ជើងឯក World Cup (អ៊ីតាលី) មានសិទ្ធិដោយស្វ័យប្រវត្តនៅក្នុងការចូលរួមប្រកួតនៅ World Cup រដូវកាលបន្ទាប់ រហូតដល់ច្បាប់នេះត្រូវបានបោះបង់ត្រឹម World Cup 2010។ ដូច្នេះ ក្រោយពីដណ្ដើមបានតំណែងជើងឯក World Cup 2022 អាហ្សង់ទីន នៅតែត្រូវទាត់ក្នុងវគ្គជម្រុះតាមតំបន់ដើម្បីរកសំបុត្រចូលទៅប្រកួតនៅ World Cup រដូវកាលបន្ទាប់ (2026)។

វគ្គជម្រុះនៅ អាម៉េរិកខាងត្បូង មុនពេលបានឡើងទៅប្រកួតនៅ World Cup 2026 នឹងចាប់ផ្ដើមប្រកួតពីខែមីនា 2023 និងបញ្ចប់នៅខែតុលា 2025។ CONMEBOL ដែលជាស្ថាប័នទទួលខុសត្រូវក្នុងការរៀបចំ និងគ្រប់គ្រងការប្រកួតអន្តរជាតិសំខាន់ៗរបស់សហព័ន្ធបាល់ទាត់អាមេរិកខាងត្បូង នឹងចាប់ឆ្នោត និងកំណត់កាលបរិច្ឆេទការប្រកួតលម្អិតនៅដើមឆ្នាំក្រោយ។

World Cup 2026 នឹងត្រូវបានប្រារព្ធដំណាលគ្នានៅក្នុង 16 ទីក្រុងរបស់ 3 ប្រទេសនៅ អាម៉េរិកខាងជើង គឺ កាណាដា ម៉ិកស៊ិក និង សហរដ្ឋអាម៉េរិក។ នោះជាលើកដំបូងដែល World Cup ត្រូវបានប្រារព្ធឡើងក្នុង 3 ដំណាលគ្នា។ មុននេះ កាលពីឆ្នាំ 2002 ជប៉ុន និង កូរ៉េខាងត្បូង គឺជាប្រទេស 2 ដែលធ្វើជាម្ចាស់ផ្ទះ World Cup ក្នុងពេលតែមួយ។

World Cup 2026 នឹងមាន 80 ប្រកួត ច្រើនជាងឆ្ងាយធៀបនឹង 64 ប្រកួតក្នុងឆ្នាំ 2022 ដោយសារតែកាលពីឆ្នាំ 2017 FIFA បានអនុម័តឱ្យបន្ថែមក្រុមជម្រើសជាតិពី 32 ឡើងទៅជា 48 ក្រុម សម្រាប់ World Cup 2026។ ប៉ុន្តែ ក្រុមនីមួយៗនឹងទាត់ច្រើនបំផុត 7 ប្រកួត ដូចទៅនឹងកំណែ 32 ក្រុម។ 60 ប្រកួតរបស់ World Cup 2026 រួមមានវគ្គ 1/8, វគ្គពាក់កណ្ដាល់ផ្ដាច់ព្រ័ត្រ និងវគ្គផ្ដាច់ព្រ័ត្រ នឹងធ្វើឡើងនៅ សហរដ្ឋអាម៉េរិក។ ក្រៅពីនេះគឺធ្វើឡើងនៅ កាដាណា និង ម៉ិកស៊ិក៕

December 22, 2022

គម្រោងសាងសង់អាកាសយានដ្ឋានធំជាងគេនៅវៀតណាម មានហានិភ័យត្រូវពន្យារពេល

កញ្ចប់ដេញថ្លៃសម្រាប់ការស្ថាបនាស្ថានីយអ្នកដំណើរដែលមានតម្លៃ 35 ទ្រីលានដុង ត្រូវបានលុបចោល ធ្វើឱ្យវឌ្ឍនភាពនៃគម្រោងអាកាសយានដ្ឋានធំជាងគេរបស់ ប្រទេសវៀតណាម មានហានិភ័យត្រូវយឺតយ៉ាវ ធៀបនឹងផែនការដំបូង។

គម្រោងអាកាសយានដ្ឋាន Long Thanh ដែលបានបើកការដ្ឋានកាលពីដើមឆ្នាំ 2021 និងគ្រោងសាងសង់រួចរាល់ដំណាក់កាលទីមួយនៅឆ្នាំ 2025 មកដល់បច្ចុប្បន្ន តំបន់សម្រាប់សាងសង់ស្ថានីយអ្នកដំណើរ (កញ្ចប់ដេញថ្លៃ 5.10) បានបញ្ចប់ការងារចាក់ដី ហើយអាចចាប់ផ្ដើមការសាងសង់ជំហានបន្ទាប់។ ប៉ុន្តែ សាជីវកម្មអាកាសចរណ៍វៀតណាម (ACV) ដែលជាម្ចាស់គម្រោង បានឱ្យដឹងថា កញ្ចប់ដេញថ្លៃ 5.10 ទាំងមូលមិនទាន់រកឃើញស្ថាប័នអនុវត្តគម្រោង ហើយត្រូវលុបចោលដើម្បីដេញថ្លៃជាថ្មី។

យោងតាម ACV កញ្ចប់ 5.10 ដែលមានទុនវិនិយោគសរុបជាង 35 ទ្រីលានដុង (1,478 លានដុល្លារអាម៉េរិក) ត្រូវបានចាត់ទុកថាជាផ្នែកសំខាន់បំផុតរបស់គម្រោងស្ថាបនាអាកាសយានដ្ឋាន Long Thanh នៅក្នុងដំណាក់កាលទីមួយ។ កញ្ចប់ 5.10 នេះគ្រោងនឹងអនុវត្តក្នុងរយៈពេល 33 ខែ រាប់ពីពេលកិច្ចសន្យាចាប់ផ្ដើមមានសុពលភាព។ ម្ចាស់គម្រោងបានអញ្ជើញស្ថាប័នពាក់ព័ន្ធមកដេញថ្លៃចាប់ពីថ្ងៃទី 24 កញ្ញា ប៉ុន្តែឯកសារដែលបានបញ្ជូនមកសុទ្ធតែមិនអាចឆ្លើយតបនឹងតម្រូវការរបស់គម្រោង។

លោក Do Tat Binh អគ្គនាយករងរបស់ ACV ដែលជាប្រធានគណៈគ្រប់គ្រងគម្រោងអាកាសយានដ្ឋាន Long Thanh បញ្ជាក់ថា កញ្ចប់ 5.10 ត្រូវដេញថ្លៃជាថ្មី ធ្វើឱ្យវឌ្ឍនភាពរួមរបស់គម្រោងត្រូវយឺតយ៉ាវធៀបនឹងផែនការដែលបានកំណត់។ ACV មិនទាន់លើកឡើងច្បាស់អំពីភាពយឺតយ៉ាវនេះនៅឡើយ ប៉ុន្តែថានឹងដេញថ្លៃឡើងវិញក្នុងខែធ្នូ ឬដើមឆ្នាំក្រោយ។

គម្រោងអាកាសយានដ្ឋាន Long Thanh មានទុនវិនិយោគសរុបប្រហែល 336.63 ទ្រីលានដុង (ជាង 14.2 ពាន់លានដុល្លារអាម៉េរិក) និងចែកចេញជា 3 ដំណាក់កាល ក្នុងនោះ ដំណាក់កាលទីមួយ ក្រោយដាក់ឱ្យដំណើរការនឹងអាចទទួលភ្ញៀវបាន 25 លាននាក់/ឆ្នាំ ខណៈដែលដំណាក់កាលទីពីរនឹងអាចទទួលបាន 50 លាននាក់/ឆ្នាំ និងដំណាក់កាលទីបី អាចទទួលបាន 100 លាននាក់/ឆ្នាំ៕

រចនាបថរបស់ស្ថានីយអ្នកដំណើរក្នុងគម្រោងអាកាសយានដ្ឋានធំជាងគេនៅវៀតណាម

ការដ្ឋានសាងសង់ស្ថានីយអ្នកដំណើរក្នុងគម្រោងអាកាសយានដ្ឋានធំជាងគេនៅវៀតណាម

December 22, 2022

IDA ផ្ដល់កម្ចីជាង 270 លានដុល្លារដល់កម្ពុជា គ្រាដែលភាពក្រីក្រកើនឡើងជិត 3%

សមាគមអភិវឌ្ឍន៍អន្តរជាតិ (IDA) ដែលជាមូលនិធិរបស់ ធនាគារពិភពលោក (WB) សម្រាប់ជួយដល់ប្រទេសក្រីក្រ ផ្តល់ឥណទានចំនួន 274 លានដុល្លារអាមេរិកបន្ថែមទៀតដល់ កម្ពុជា ដើម្បីចូលរួមស្តារសេដ្ឋកិច្ច ក្រោយវិបត្តិកូវីដ និងវិបត្តិអតិផរណា។

សេចក្តីប្រកាសពត៌មានរបស់ធនាគារពិភពលោកកាលពីថ្ងៃទី 20 ធ្នូ 2022 បានឱ្យដឹងថា ឥណទាន នេះគឺជាការបន្ថែមទៅលើហិរញ្ញប្បទាន 200 លានដុល្លារអាមេរិក ដែល WB ធ្លាប់បានផ្តល់ឱ្យ កម្ពុជា កាលពីឆ្នាំកន្លង។

ការសម្រេចចិត្តខាងលើនេះត្រូវបានធ្វើឡើងបន្ទាប់ពីមានទិន្នន័យបង្ហាញថា ផលិតផលក្នុងស្រុកសរុប (GDP) របស់ កម្ពុជា បានធ្លាក់ចុះដល់ -3.1% ក្នុងឆ្នាំ 2020 ដែលជាការធ្លាក់ចុះដ៏ខ្លាំងជាងគេក្នុងរយៈពេល 30 ឆ្នាំចុងក្រោយនេះ ដោយសារតែកូវីដ-19។ មិនត្រឹមតែរងផលប៉ះពាល់ធ្ងន់ធ្ងរដោយសារជំងឺរាតត្បាតសកលនោះទេ ប៉ុន្តែ សេដ្ឋកិច្ចកម្ពុជា ក៏រងឥទ្ធិពលអវិជ្ជមានពីសង្គ្រាមនៅ អ៊ុយក្រែន ផងដែរ នេះបើតាម WB។

ការថយចុះនៃកំណើនសេដ្ឋកិច្ចខាងលើ បាននាំឱ្យអត្រានៃភាពក្រីក្រនៅ កម្ពុជា កើនឡើងចំនួន 2.8% ដោយមនុស្សប្រហែល 4.6 សែននាក់ ត្រូវធ្លាក់ទៅក្នុងភាពក្រីក្រជាថ្មី។

យោងតាម WB ឥណទានថ្មីនេះ នឹងជួយលើកកម្ពស់លទ្ធភាពទទួលបានហិរញ្ញវត្ថុ លទ្ធភាពនៃការប្រកួតប្រជែង សម្រាប់សហគ្រាសធុនតូច និងមធ្យម ក៏ដូចជាជួយដល់គ្រួសាររងគ្រោះបានទាន់ពេលវេលាផងដែរ៕

December 22, 2022

ផ្លូវដែកល្បឿនលឿននឹងមានវត្តមាននៅ កម្ពុជា នាពេលខាងមុខ

អនាគត កម្ពុជានឹងស្ថាបនាផ្លូវដែកល្បឿនលឿនពី ភ្នំពេញ ទៅ ខេត្តព្រះសីហនុ និងពីភ្នំពេញ ទៅកាន់ខេត្តពោធិ៍សាត់ នេះបើតាមប្រសាសន៍របស់ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន។

ការអះអាងរបស់ សម្រេចតេជោ ខាងលើ ត្រូវបានលើកឡើងនៅក្នុងពិធីសម្ពោធដាក់ឱ្យប្រើប្រាស់ផ្លូវខេត្តលេខ 146B ដែតភ្ជាប់ទៅផ្លូវលេខ148 ក្នុងខេត្តព្រះសីហនុ កាលពីព្រឹកមិញ។

នៅក្នុងពិធីសម្ពោធនេះ ប្រមុខរាជរដ្ឋាភិបាលកម្ពុជា ក៏បានបញ្ជាក់ថា ផ្លូវដែកបច្ចុប្បន្នមិនទាន់មានសមត្ថភាពគ្រប់គ្រាន់ក្នុងការបម្រើដល់សេចក្តីត្រូវការផ្នែកសេដ្ឋកិច្ចរបស់ កម្ពុជា ដែលត្រូវការការអភិវឌ្ឍបន្ថែមទៀត នៅឡើយ។ អនាគត កម្ពុជានឹងស្ថាបនាផ្លូវដែកល្បឿនលឿនពី ភ្នំពេញ ទៅ ខេត្តព្រះសីហនុ និងពីភ្នំពេញ ទៅកាន់ខេត្តពោធិ៍សាត់ រួមនឹងផ្លូវដែកល្បឿនលឿនផ្សេងៗទៀត។

រថភ្លើង និងផ្លូវដែករបស់ កម្ពុជា នាបច្ចុប្បន្ន

កម្ពុជាត្រូវការ ការតភ្ជាប់ផ្ទៃក្នុងដើម្បីកាត់បន្ថយការលំបាករបស់ប្រជាជនកាត់បន្ថយភាពក្រីក្រ និងបង្កើនប្រាក់ចំណូលសម្រាប់ប្រជាជនកម្ពុជា នេះបើតាម សម្ដេចតេជោ ហ៊ុន សែន៕

December 22, 2022

EU អនុម័តគម្រោងថាមពលកកើតឡើងវិញតម្លៃជាង 29 ពាន់លានដុល្លារអាម៉េរិក របស់ អាល្លឺម៉ង់

គម្រោងជំនួយតម្លៃ 28 ពាន់លានអឺរ៉ូ របស់ អាល្លឺម៉ង់ មានបំណងផលិតអគ្គិសនី 80% ពីបណ្ដាប្រភពកកើតឡើងវិញចាប់ពីឆ្នាំ 2030។

គណៈកម្មការអឺរ៉ុប (EC) កាលពីថ្ងៃទី 21 ធ្នូ ប្រកាសថា ស្ថាប័ននេះបានអនុម័តគម្រោងដែលមានតម្លៃ 28 ពាន់លានអឺរ៉ូ (29.69 ពាន់លានដុល្លារអាម៉េរិក) របស់ រដ្ឋាភិបាលអាល្លឺម៉ង់ ដើម្បីផ្ដល់ជំនួយដល់បណ្ដាគម្រោងថាមពលកកើតឡើងវិញ ក្នុងបំណងពង្រឹងការពង្រីកការប្រើប្រាស់ថាមពលខ្យល់ និងថាមពលព្រះអាទិត្យ។

គម្រោងនេះនឹងអូសបន្លាយរហូតដល់ឆ្នាំ 2026 ជាមួយនឹងគោលដៅផលិតអគ្គិសនី 80% ពីបណ្ដាប្រភពថាមពលកកើតឡើងវិញ ចាប់ពីឆ្នាំ 2030។ EC ឱ្យដឹងថា គម្រោងនេះគឺចាំបាច់ និងសមស្របដើម្បីជំរុញការប្រើប្រាស់ថាមពលកកើតឡើងវិញ ក៏ដូចជាការកាត់បន្ថយបរិមាណឧស្ម័នផ្ទះកញ្ចក់ដែលកំពុងធ្វើឱ្យផែនដីឡើងកម្ដៅជាបន្តបន្ទាប់។

គម្រោងខាងលើក៏នឹងរួមចំណែកក្នុងការជួយឱ្យ អាល្លឺម៉ង់ សម្រេចបានគោលដៅលុបបំបាត់ឧស្ម័នផ្ទះកញ្ចក់នៅឆ្នាំ 2045 និងជួយដោះស្រាយបញ្ហាខ្វះថាមពលនៅប្រទេសនេះ ដែលកើតឡើងដោយសារតែសង្គ្រាមរវាង រុស្ស៊ី និងអ៊ុយក្រែន៕

December 22, 2022

អាវុធដែលជួយឱ្យ Bill Gates «មិនធ្វើអ្វីសោះ» ក៏នៅតែមានប្រាក់ចំណូលខ្ពស់

ក្នុងរយៈពេលជិត 30 ឆ្នាំកន្លង មហាសេដ្ឋីអាម៉េរិក Bill Gates មិនធ្លាប់មានការបារម្ភអំពីការគ្រប់គ្រងប្រាក់យ៉ាងច្រើនរបស់គាត់ ហើយថែមទាំង «អង្គុយកេះក្រចកដៃ» ក៏នៅតែមានឡើងៗ។

លោក Bill Gates គឺជាមហាសេដ្ឋីដែលទំនងជាល្បីឈ្មោះខ្លាំងបំផុតនៅជ្រលង Silicon មិនត្រឹមតែក្នុងនាមជាសហស្ថាបនិក និងជាអតីត CEO របស់ Microsoft នោះទេ ប៉ុន្តែ ក៏ព្រោះតែការរួមចំណែករបស់គាត់នៅក្នុងសកម្មភាពមនុស្សធម៌។

បច្ចុប្បន្ន មហាសេដ្ឋី Bill Gates មានទ្រព្យប្រមាណ 111 ពាន់លានដុល្លារអាម៉េរិក និងជាអ្នកមានជាងគេលំដាប់ទី 4 ក្នុងពិភពលោក។ បើទោះបានបរិច្ចាគប្រាក់រាប់សិបពាន់លានដុល្លារ ប៉ុន្តែ សប្បុរសជនវ័យ 67 ឆ្នាំរូបនេះ នៅតែអាចរក្សាបាននូវភាពមានបានដដែល។ ជាក់ស្ដែង ក្នុងរយៈពេលជិត 30 ឆ្នាំកន្លង មហាសេដ្ឋីអាម៉េរិក Bill Gates មិនធ្លាប់មានការបារម្ភអំពីការគ្រប់គ្រងប្រាក់ដ៏សម្បើមរបស់គាត់ ហើយថែមទាំង «អង្គុយកេះក្រចកដៃ» ក៏នៅតែមានឡើងៗ។

Cascade គឺជា «អាវុធ» រកប្រាក់ដ៏សម្ងាត់របស់ Bill Gates

ទាំងអស់ស្ថិតនៅលើ «អាវុធ» សម្ងាត់មានឈ្មោះថា Cascade Investment ជាមូលនិធិឯកជនដែលលោក Gates បានបង្កើតឡើងកាលពីឆ្នាំ 1995 និងប្រគល់ឱ្យ Michael Larson ជាអ្នកគ្រប់គ្រង។

Larson ត្រូវបានចាត់ទុកថាជាបុគ្គលម្នាក់ក្នុងចំណោមបុរសមានអំណាច និងស្ងាត់ស្ងៀមបំផុតក្នុងស្រទាប់អ្នកគ្រប់គ្រងទ្រព្យសម្បត្តិនៅ សហរដ្ឋអាម៉េរិក។ ដោយសារ Larson និងមួយផ្នែកដោយសារតម្លៃភាគហ៊ុនរបស់ Microsoft កើនឡើងខ្ពស់ ទ្រព្យសម្បត្តិរបស់លោក Gates ក៏បានកើនពី 5 ពាន់លានដុល្លារ ឡើងដល់ជាង 100 ពាន់លានដុល្លារអាម៉េរិក។

ដោយសារតែ Cascade មិនមែនជាក្រុមហ៊ុនមហាជន និងស្ងាត់ស្ងៀម ដូច្នេះពិបាកក្នុងការដឹងបានអំពីខ្ទង់វិនិយោគសំខាន់ៗរបស់ពួកគេ។ ប៉ុន្តែ យោងតាម Wall Street Journal លោក Larson បានវិនិយោគប្រាក់របស់លោក Gates ទៅលើដីកសិកម្ម សណ្ឋាគារ មូលបត្រ និងទីតាំងកីឡាជាដើម។

Cascade វិនិយោគទៅលើសណ្ឋាគារ Four Seasons កាលពីឆ្នាំ 1997 ហើយបច្ចុប្បន្ន Gates មានភាគហ៊ុនជាង 71% នៅក្នុងក្រុមហ៊ុនដែលមានតម្លៃ 10 ពាន់លានដុល្លារនេះ។ នៅក្នុងក្រុមហ៊ុនគ្រប់គ្រងវត្ថុធាតុសំណល់ Republic Services តម្លៃ 40 ពាន់លានដុល្លារ លោក Gates កាន់កាប់ភាគហ៊ុនជាង 34%។ ក្រៅពីនេះ លោក Gates ក៏ជាភាគហ៊ុនិកធំជាងគេរបស់ក្រុមហ៊ុនខ្នាតយក្ស Ecolab ផងដែរ។

អំពីលោក Michael Larson

លោក Michael Larson កើតឆ្នាំ 1959 នៅ California សហរដ្ឋអាម៉េរិក។ ឆ្នាំអាយុ 16 ក្រោយពីបញ្ចប់ការសិក្សាកម្រិតទី 3 លោក Michael Larson ក៏បន្តរៀននៅសាកលវិទ្យាល័យ Claremont McKenna ផ្នែកហិរញ្ញវត្ថុ។ អាយុ 21 ឆ្នាំ គាត់បញ្ចប់ថ្នាក់អនុបណ្ឌិតពាណិជ្ជកម្មនៅ សាកលវិទ្យាល័យ Chicago។

ក្រោយមក Larson ធ្វើការក្នុងផ្នែកទិញដូរក្រុមហ៊ុនរបស់ ARCO មុនពេលងាកទៅធ្វើការឱ្យមូលនិធិវិនិយោគ Putman និងបង្កើតក្រុមហ៊ុនវិនិយោគផ្ទាល់ខ្លួន។ ឆ្នាំ 1994 Larson ក៏បានទទួលយកការអញ្ជើញឱ្យចូលធ្វើការឱ្យលោក Bill Gates ដែលកាលណោះគឺជាអ្នកមានជាងគេបង្អស់លើពិភពលោក។ លោក Larson ទទួលបានការជឿជាក់ពីលោក Gates និងទទួលបានសិទ្ធិមួយភាគធំក្នុងការសម្រេចចិត្តលើគម្រោងវិនិយោគនានារបស់ Cascade។

បច្ចុប្បន្ន លោក Michael Larson នៅបន្តធ្វើជាអ្នកគ្រប់គ្រងទ្រព្យសម្បត្តិរបស់មហាសេដ្ឋីអាម៉េរិក Bill Gates៕

December 22, 2022

អាហ្សង់ទីន ចែកប្រាក់រង្វាន់ World Cup 2022 ដោយរបៀបណា?

ប្រាក់រង្វាន់សម្រាប់តំណែងជើងឯក World Cup 2022 របស់ អាហ្សង់ទីន គឺ 42 លានដុល្លារអាម៉េរិក ប៉ុន្តែ ខ្ទង់ប្រាក់នេះនឹងត្រូវកាត់ប្រាក់ពិន័យ និងពន្ធផ្សេងៗមួយចំនួន។

អាហ្សង់ទីន ដណ្ដើមបានជ័យជម្នះលើ បារាំង ក្នុងវគ្គផ្ដាច់ព្រ័ត្រនៅ World Cup 2022 កាលពីថ្ងៃទី 18 ធ្នូ 2022 ដោយការប្រកួតទាត់បាល់ប៉េណាំងទី។ នេះជាលើកទីបីហើយដែល អាហ្សង់ទីន បានក្លាយជាជើងឯក World Cup និងរកបានប្រាក់រង្វាន់ 42 លានដុល្លារអាម៉េរិក ឱ្យ សហព័ន្ធបាល់ទាត់អាហ្សង់ទីន (AFA)។

សហព័ន្ធបាល់ទាត់ពិភពលោក (FIFA) នឹងផ្ទេរប្រាក់រង្វាន់ទៅ ឱ្យ AFA ក្នុងរង្វង់ 90 ថ្ងៃ ក្រោយការប្រកួតវគ្គផ្ដាច់ព្រ័ត្រ ពោលគឺប្រហែលពីពាក់កណ្ដាលខែមីនា ដល់ដើមខែមេសា ឆ្នាំ 2023។

ក៏ប៉ុន្តែ អាហ្សង់ទីន នឹងមិនទទួលបានប្រាក់រង្វាន់ពេញ 42 លានដុល្លារឡើយ ព្រោះ FIFA នឹងកាត់ពន្ធ និងការពិន័យចំពោះក្រុមបាល់ទាត់នេះ។ អាហ្សង់ទីន ទំនងជានឹងត្រូវពិន័យធ្ងន់ធ្ងរ ពិសេសគឺនៅក្រោយវគ្គ 1/8 ដែលត្រូវប៉ះនឹង ហូឡង់ ដោយសារតែមានការទះទង្គិចគ្នា ការជជែកតតាំង និងការប្រវាយប្រតប់គ្នា ធ្វើឱ្យអាជ្ញាកណ្ដាលត្រូវបញ្ចេញកាត់លឿងចំនួន 18 លើក។

ក្រុមមន្ត្រីបាល់ទាត់គណនីឃើញថា ទឹកប្រាក់ប្រហែល 4 លានដុល្លារនឹងត្រូវ FIFA កាត់ចេញពីប្រាក់រង្វាន់របស់ អាហ្សង់ទីន។

ប្រាក់ដែលនៅសល់នឹងត្រូវចែកឱ្យកីឡាករ និងសមាជិកក្រុមគ្រូបង្វឹក បន្ទាប់ពីបានបង់ពន្ធនានាទៅឱ្យ អាជ្ញាធរអាហ្សង់ទីន។ ក៏ប៉ុន្តែ AFA កំពុងតែជួបបញ្ហាទាក់ទងនឹងការប្ដូរប្រាក់ចែកឱ្យក្រុមជម្រើសជាតិ ព្រោះថា រូបិយបណ្ណរបស់ អាហ្សង់ទីន កំពុងធ្លាក់ថ្លៃ។

ក្រោយពីទទួលបានប្រាក់រង្វាន់ពី FIFA តាមច្បាប់របស់ អាហ្សង់ទីន ក្នុងរង្វង់ 5 ថ្ងៃ AFA ត្រូវតែប្ដូរប្រាក់ពីដុល្លារអាម៉េរិក ទៅជាប្រាក់ប៉េសូទៅតាមអត្រាប្ដូរប្រាក់ផ្លូវការ 172.7 ប៉េសូ/ដុល្លារអាម៉េរិក ស្មើនឹងពាក់កណ្ដាលធៀបនឹងអត្រាប្ដូរប្រាក់ដែលកំពុងត្រូវបានអនុវត្តជាក់ស្ដែងនៅក្នុងប្រទេសនេះ។ តម្លៃរបស់ប្រាក់ប៉េសូអាហ្សង់ទីន នៅលើទីផ្សារបច្ចុប្បន្នគឺ 324 ប៉េសូ/ដុល្លារអាម៉េរិក។

ប្រាក់រង្វាន់ដែលកីឡាករអាហ្សង់ទីនទទួលបានពីតំណែងជើងឯក World Cup 2022 ទាបជាងប្រាក់បៀវត្សរ៍ មួយសប្ដាហ៍របស់ Lionel Messi នៅក្លឹប PSG របស់ បារាំង ទៅទៀត

ក្រោយការកាត់ប្រាក់ពិន័យរបស់ FIFA ការប្ដូរប្រាក់ និងការបង់ពន្ធ 7.25% ជូនរដ្ឋ (អាហ្សង់ទីន) ប្រាក់រង្វាន់ដែលនៅសល់របស់ក្រុមជម្រើសជាតិអាហ្សង់ទីន គឺប្រហែល 6.1 ពាន់លានប៉េសូ។

ប្រាក់ខាងលើនេះនឹងត្រូវយកទៅចែកឱ្យកីឡាករអាហ្សង់ទីន 26 នាក់ និងសមាជិក 6 នាក់នៅក្នុងក្រុមគ្រូបង្វឹក ប៉ុន្តែ អាចនឹងចែកឱ្យក្រុមជំនួយការផងដែរ។ បើសិនចែកស្មើឱ្យសមាជិក 32 នាក់របស់ក្រុម នោះម្នាក់ៗនឹងទទួលបានប្រហែល 190 លានប៉េសូ។

ក៏ប៉ុន្តែ 190 លានប៉េសូនេះនឹងត្រូវកាត់ពន្ធ 0.6% ដែលស្មើនឹង 1.1 លានប៉េសូ។ ពេលពួកគេដកប្រាក់ ខ្ទង់ប្រាក់ពន្ធនេះនឹងត្រូវអនុវត្តជាលើកទីពីរ ជួយឱ្យ រតនាគារជាតិអាហ្សង់ទីន រកបានសរុប 2.2 លានប៉េសូ ពីសមាជិកម្នាក់ៗរបស់ក្រុមជម្រើសជាតិ ចំណែកកីឡាករម្នាក់ៗទទួលបានប្រហែល 187.8 លានប៉េសូ ប្រហែលនឹង 1.08 លានដុល្លារអាម៉េរិក។ ប្រាក់រង្វាន់នេះទាបជាងប្រាក់បៀវត្សរ៍ 1.16 លានដុល្លារ/សប្ដាហ៍របស់ Lionel Messi នៅក្លឹប PSG របស់ បារាំង ទៅទៀត៕

December 22, 2022

Author: សឿន សំណាង