សឿន សំណាង - La Reine Media

«រថយន្តអគ្គិសនីវៀតណាម VF8 ជួបបញ្ហាធ្ងន់ធ្ងរ»! Youtuber Tom Peng បើកកកាយអំពីកំហុសទាំងនេះ

ជារថយន្តអគ្គិសនីផលិតនៅ វៀតណាម VinFast VF8 ទទួលបានការសាទរពីអ្នកប្រើប្រាស់ ប៉ុន្តែ មិនយូរប៉ុន្មាន ម៉ូដែលនេះជួបបញ្ហាជាច្រើនដែលបង្កការរំខានរបស់ម្ចាស់រថយន្ត។

បញ្ហាមួយចំនួនដែលកើតមាននៅលើ VinFast VF8 រួមមានដូចជា «កំពុងបើកបរក៏ស្រាប់តែម៉ូទ័រអគ្គិសនីឈប់ដើរ», «អំពូលភ្លើងផ្ដល់សញ្ញា និងអំពូលភ្លើងហ្វាបិទដោយឯកឯង» , «បញ្ហាផ្នែកទន់ (សហ្វវ៉ែរ)», «បញ្ហា ផ្ដល់សញ្ញាមិនត្រឹមត្រូវ» ជាដើម។ល។ ហើយកំហុសដែលជួបជាញឹកញាប់គឺ «បញ្ហាបញ្ចូលថាមពលអាគុយ 12V», «បញ្ហាប្រព័ន្ធ BEV»។ អ្នកប្រើប្រាស់ជាច្រើនក៏បានរាយការណ៍អំពីបញ្ហាទាំងនេះ។ អ្នកខ្លះនៅតែជួបបញ្ហាដដែល បើទោះបានធ្វើបច្ចុប្បន្នភាពផ្នែកទន់ថ្មី។

Youtuber Tom Peng គឺជាអ្នកចូលចិត្តក្រុមហ៊ុនផលិតរថយន្តអគ្គិសនីវៀតណាម VinFast ហើយ VinFast VF8 គឺជារថយន្តដែល Tom ជិះរាល់ថ្ងៃ ប៉ុន្តែ កំហុសខាងលើកើតមានកាន់តែញឹកញាប់ បង្កការរំខាន និងខាតពេលវេលាច្រើន។ ក្នុងវីដេអូនៅលើ Youtube លោក Tom Peng បានថតអំពីបញ្ហាទាំងឡាយដែលគាត់បានជួបប្រទះពេលប្រើប្រាស់រថយន្ត VinFast VF8។

ក្រោយពីវីដេអូត្រូវបានបង្ហោះលើបណ្ដាញសង្គម លោក Tom Peng នៅតែមិនទាន់ឱ្យដឹងថា កំហុសទាំងនេះត្រូវបានដោះស្រាយទាំងស្រុងហើយ ឬនៅ។

Tom Peng គឺជាអ្នកជំនួញដើមកំណើតអាស៊ី សញ្ជាតិកាណាដា។ បច្ចុប្បន្ន Tom Peng រកស៊ីនៅ វៀតណាម និងមានរថយន្តអគ្គិសនី VinFast 2 គ្រឿង គឺ VF E34 និង VF8។ ក្រៅពីនេះ លោក Tom Peng ក៏មានរថយន្តទំនើប និងរថយន្តប្រណិតផ្សេងទៀត ដូចជា Mercedes និង Bentley ផងដែរ។

December 27, 2022

កូនស្រីវ័យ 36 ឆ្នាំរបស់លោក Thaksin នាំមុខគេក្នុងចំណោមបេក្ខភាពនាយករដ្ឋមន្ត្រីថៃ

កូនស្រីពៅ Paetongtarn របស់លោក Thaksin កំពុងនាំមុខគេនៅក្នុងការស្ទង់មតិសាធារណៈស្ដីពីបេក្ខភាពនាយករដ្ឋមន្ត្រីថៃ មុនពេលប្រទេសនេះរៀបចំការបោះឆ្នោតនៅខែឧសភា 2023។

សារព័ត៌មាន Reuters កាលពីថ្ងៃទី 26 ធ្នូ បានឱ្យដឹងថា លទ្ធផលនៃការស្ទង់មតិពី វិទ្យាស្ថានជាតិគ្រប់គ្រងការអភិវឌ្ឍថៃ (NIDA) បង្ហាញថា Paetongtarn Shinawatra វ័យ 36 ឆ្នាំ ដែលជាកូនស្រីពៅរបស់អតីតនាយករដ្ឋមន្ត្រីថៃ លោក Thaksin Shinawatra កំពុងនាំមុខគេសម្រាប់កៅអីនាយករដ្ឋមន្ត្រីនាពេលអនាគត ដោយទទួលបានការគាំទ្រ 34%។

អត្រានៃការគាំទ្រចំពោះ Paetongtarn កើនឡើងខ្ពស់ពី 21.6% ធៀបនឹងការស្ទង់មតិកាលពីខែកញ្ញា និងខ្ពស់ជាងទ្វេដងធៀបនឹងគូប្រជែង គឺនាយករដ្ឋមន្ត្រីថៃ លោក Prayuth Chan-ocha។

ការស្ទង់មតិត្រូវបាន NIDA ធ្វើឡើងពីថ្ងៃទី 17 ដល់ 22 ធ្នូ 2022 ទៅលើពលរដ្ឋ 2,000 នាក់ក្នុងវ័យបោះឆ្នោត។ NIDA ត្រូវបានបង្កើតឡើងកាលពីខែមេសា 1966 គឺជាស្ថាប័នមួយរបស់ ក្រសួងអប់រំថៃ ដែលបច្ចុប្បន្នគឺជាស្ថាប័នស្ទង់មតិធំជាងគេមួយនៅ ប្រទេសនេះ។

ការស្ទង់មតិខាងលើបង្ហាញថា លោក Prayuth ទទួលបានការគាំទ្រ 14.05% កើនបន្តិចធៀបនឹង 10.1% មុននោះ។ បេក្ខភាពមួយរូបផ្សេងទៀតគឺ Pita Limjaroenrat មេដឹកនាំបក្សជឿនលឿន ដោយមានអត្រាគាំទ្រ 13.25%។

គណៈកម្មការរៀបចំការបោះឆ្នោតថៃ បានឱ្យដឹងថា ប្រទេសនេះនឹងរៀបការការបោះឆ្នោតនាយករដ្ឋមន្ត្រីនៅក្នុងខែឧសភា 2023 ប៉ុន្តែមិនទាន់កំណត់ពេលវេលាជាក់លាក់នៅឡើយ។

លោក Thaksin ធ្លាប់កាន់តំណែងនាយករដ្ឋមន្ត្រីថៃ ចាប់តាំងពីឆ្នាំ 2001 ប៉ុន្តែត្រូវបានផ្ដួលរំលំដោយរដ្ឋប្រហារយោធាកាលពីឆ្នាំ 2006។ បច្ចុប្បន្ន លោក Thaksin រស់នៅនិរទេសខ្លួននៅ ឌូបៃ។ ឆ្នាំ 2011 លោកស្រី Yingluck Shinawatra ដែលជាប្អូនស្រីរបស់លោក Thaksin ក្លាយជានាយិការដ្ឋមន្ត្រីថៃ ប៉ុន្តែក៏ត្រូវបានកងទ័ពធ្វើរដ្ឋប្រហារ និងផ្ដួលរំលំកាលពីឆ្នាំ 2014៕

December 27, 2022

មហាសេដ្ឋី 5 រូបដែលរកប្រាក់បន្ថែមបានច្រើនជាងគេបង្អស់ក្នុងឆ្នាំ 2022

មហាសេដ្ឋីស្ទើរតែទាំងអស់នៅលើពិភពលោក ក្នុងឆ្នាំនេះ សុទ្ធតែបាត់បង់ប្រាក់យ៉ាងច្រើន ប៉ុន្តែ នៅតែមាន 5 រូបនៅ ទ្វីបអាស៊ី ដែល «ខុសគេ» ដោយរកប្រាក់បន្ថែមបានជិត 100 ពាន់លានដុល្លារអាម៉េរិក។

2022 គឺជាឆ្នាំដែលប្រកបដោយការប្រែប្រួលសម្រាប់ក្រុមអ្នកមានកំពូលៗរបស់ពិភពលោក។ យោងតាម Forbes មហាសេដ្ឋីទាំងឡាយ បានបាត់បង់ប្រាក់ជាង 1.9 ទ្រីលានដុល្លារអាម៉េរិក ដែលភាគច្រើនដោយសារតម្លៃភាគហ៊ុនចុះថោក ខណៈដែលអតិផរណាកើនឡើងខ្ពស់ខ្លាំង និងកំណើនសេដ្ឋកិច្ចត្រលប់ជាយឺតទៅវិញ។

ក្នុងគ្រាដែលសេដ្ឋកិច្ចពិភពលោកមានឱនភាពរួម មហាសេដ្ឋកិច្ចមួយភាគតូចបែរជា «ដើរបញ្ច្រាសទិស»។ មហាសេដ្ឋី 5 រូបដែលមានទ្រព្យកើនឡើងសរុបជាង 93 ពាន់លានដុល្លារក្នុងឆ្នាំ 2022 សុទ្ធតែជាជនជាតិអាស៊ី។

អ្នកដែលនាំមុខគេនៅក្នុងបញ្ជីនេះគឺ មហាសេដ្ឋីឥណ្ឌា លោក Gautam Adani។ គាត់គឺជាប្រធានក្រុមហ៊ុន Adani ដែលរកស៊ីក្នុងពហុវិស័យ។ កាលពីខែកុម្ភៈ លោក Adani បានក្លាយជាអ្នកមានជាងគេនៅ អាស៊ី និងទី 10 លើពិភពលោក ដោយមានទ្រព្យសរុប 90.1 ពាន់លានដុល្លារអាម៉េរិក។ យោងតាម Forbes ថ្ងៃទី 09 ធ្នូ 2022 លោក Adani រកបានប្រាក់ 55 ពាន់លានដុល្លារថែមទៀត ធៀបនឹងដើមឆ្នាំ។

Low Tuck Kwong គឺជាមហាសេដ្ឋីដែលមានទ្រព្យកើនឡើងខ្ពស់លំដាប់ទីពីរ (16 ពាន់លានដុល្លារ) ក្នុងឆ្នាំនេះ។ ដោយសារទ្រព្យថ្មី មហាសេដ្ឋីជាពលរដ្ឋឥណ្ឌូណេស៊ី នេះ កំពុងមានទ្រព្យ 18.6 ពាន់លានដុល្លារអាម៉េរិក។ លោក Low ក៏ត្រូវបានចាត់ទុកថាជាស្ដេចរ៉ែធ្យូងថ្មនៅ ឥណ្ឌូណេស៊ី ផងដែរ។

Colin Zheng Huang (ជនជាតិចិន) ស្ថាបនិករបស់ផ្សារអនឡាញ Pinduoduo រកបានជាង 11 ពាន់លានដុល្លារបន្ថែមទៀតក្នុងឆ្នាំនេះ។ ភាគហ៊ុនរបស់ Pinduoduo ឡើងថ្លៃ 35% ចាប់ពីឆ្នាំដើម។ បច្ចុប្បន្ន Huang មានទ្រព្យ 31.6 ពាន់លានដុល្លារ។

ទ្រព្យរបស់ Wu Yiling (ជនជាតិចិន) ផ្សារភ្ជាប់ជាមួយនឹង Lianhua Qingwen ជារុក្ខជាតិឱសថបុរាណមួយប្រភេទជួយព្យាបាលកូវីដ-19 របស់ក្រុមហ៊ុន Shijianzhuang Yiling Pharmaceutical ដែលមានទីស្នាក់ការកណ្ដាលនៅប្រទេសចិន។ Wu គឺជាប្រធានក្រុមហ៊ុននេះ។ ឆ្នាំ 2022 លោក Wu រកបានប្រាក់ 4.1 ពាន់លានដុល្លារបន្ថែមទៀត បន្ទាប់ពីតម្លៃភាគហ៊ុន Shijiazhuang Yiling កើន 61%។

មហាសេដ្ឋីចុងក្រោយក្នុងបញ្ជី top 5 របស់ Forbes នេះ គឺអ្នកមានក្នុងវិស័យភេសជ្ជៈនៅ ឥណ្ឌា Ravi Jaipuria។ ឆ្នាំនេះ ប្រធានក្រុមហ៊ុន RJ Corp រកបាន 3.9 ពាន់លានដុល្លារបន្ថែមទៀត។ Varun Beverages គឺជាអ្នកវេចខ្ចប់ធំបំផុតរបស់ PepsiCo នៅលើពិភពលោក។ តម្លៃភាគហ៊ុនរបស់ក្រុមហ៊ុនផ្សេងទៀតរបស់ Jaipuria គឺ Devyani International ក៏កើន 12%។ ក្រុមហ៊ុននេះកំពុងដំណើរការអាហារដ្ឋានមួយចំនួនដូចជា KFC, Pizza Hut និង Costa Coffee ជាដើម នៅ ឥណ្ឌា៕

December 27, 2022

គោលនយោបាយការបរទេសរបស់ ប្រទេសចិន សម្រាប់ឆ្នាំក្រោយ

ឆ្នាំ 2023 ប្រទេសចិន នឹងស្ដារទំនាក់ទំនងជាមួយនឹង ប្រទេសរុស្ស៊ី ផ្សះផ្សាការប្រេះឆាជាមួយនឹង អឺរ៉ុប អាស៊ី ទន្ទឹមនឹងការប្រកួតប្រជែងជាមួយនឹង សហរដ្ឋអាម៉េរិក និងបង្កើនឥទ្ធិពលនៅទូទាំងសកលលោក។

ក្នុងការវាយតម្លៃអំពីសកម្មភាពការទូតរបស់ ប្រទេសចិន ក្នុងឆ្នាំ 2022 រដ្ឋមន្ត្រីក្រសួងការបរទេសចិន Wang Yi កាលពីថ្ងៃទី 25 ធ្នូ បានអធិប្បាយថា 2022 គឺជាឆ្នាំដែលសម្រេចបានសមិទ្ធិផលប្រវត្តិសាស្ត្រជាច្រើន ហើយប្រទេសនេះបានឆ្លងកាត់ឧបសគ្គធំៗនៅក្នុងបរិស្ថានសកល។

លោក Wang Yi ប្រកាសថា ក្នុងឆ្នាំ 2023 ប្រទេសចិន នឹងបង្កើនទំនាក់ទំនងជាដៃគូយុទ្ធសាស្ត្រដែល «រឹងមាំ» ជាមួយនឹង ប្រទេសរុស្ស៊ី ផ្សះផ្សាទំនាក់ទំនងជាមួយ អឺរ៉ុប និងបណ្ដាប្រទេសជិតខាងនៅ អាស៊ី ទន្ទឹមនឹងនេះ ចិន ក៏នឹងបន្តរក្សា «ស្មារតីប្រយុទ្ធ» នៅចំពោះមុខឥរិយាបថ «ឡោមព័ទ្ធ កៀបសង្កត់ និងបង្កហេតុ» ដែលនាំមុខដោយ សហរដ្ឋអាម៉េរិក។

រដ្ឋមន្ត្រីការបរទេសចិន ក៏បានបង្ហើបឱ្យដឹងថា ប្រទេសនេះនឹងបន្ធូរបន្ថយវិធានការទប់ស្កាត់កូវីដ-19 ដើម្បីបង្កភាពងាយស្រួលដល់លំហូរកម្លាំងពលកម្ម និងជួយស្ដារសេដ្ឋកិច្ចទូទាំងសកលលោក។

ប្រកាសរបស់ រដ្ឋមន្ត្រីការបរទេសចិន នេះ ត្រូវបានលើកឡើងនៅក្នុងកិច្ចប្រជុំរបស់ក្រុមអ្នកជំនាញផ្នែកគោលនយោបាយនៅ ប៉េកាំង ក្នុងគ្រាដែលទំនាក់ទំនងរវាង ប្រទេសចិន និង សហរដ្ឋអាម៉េរិក ជប៉ុន អូស្ត្រាលី និងបណ្ដាប្រទេសមហាអំណាចនៅ អឺរ៉ុប កំពុងមានសញ្ញាធូរស្រាលបន្តិច ក្រោយការប្រឈមមុខដាក់គ្នាអស់មួយរយៈពេលយូរ ទាក់ទិននឹងបញ្ហាធំៗមួយចំនួន មានដូចជា កោះតៃវ៉ាន់ ស៊ីនជាំង ហុងកុង និងសង្គ្រាមរុស្ស៊ី-អ៊ុយក្រែន ជាដើម។

រដ្ឋមន្ត្រីការបរទេសអាម៉េរិក Antony Blinken គ្រោងនឹងធ្វើទស្សនកិច្ចនៅ ប៉េកាំង នៅដើមឆ្នាំក្រោយ ប៉ុន្តែ ទំនាក់ទំនងរវាង អាម៉េរិក និង ចិន ក្នុងឆ្នាំ 2023 ត្រូវបានគេព្យាករថា នៅប្រឈមនឹងឧបសគ្គជាច្រើនបន្តទៀត៕

December 27, 2022

កម្ពុជា បើកការប្រកួតដណ្ដើមពានរង្វាន់ជើងឯកកីឡាទោចក្រយានថ្នាក់ជាតិឆ្នាំ 2022 ដើម្បីត្រៀមសម្រាប់ស៊ីហ្គេម 2023

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន បានប្រកាសបើកការប្រកួតកីឡាទោចក្រយាន ដើម្បីជ្រើសរើសជើងឯកថ្នាក់ជាតិ ប្រចាំឆ្នាំ 2022 ដែលធ្វើឡើងនៅ ខេត្តសៀមរាប នាព្រឹកថ្ងៃទី 27 ធ្នូនេះ។

ក្នុងពិធីបើកការប្រកួតដែលមានការចូលរួមពីក្រុមមន្ត្រីរបស់ ក្រសួងពាណិជ្ជកម្ម ថ្នាក់ដឹកនាំខេត្តសៀមរាប ក៏ដូចជាតំណាងក្រុមហ៊ុនឯកជននានា ក្រុមកីឡាករ កីឡាការិនី និងភ្ញៀវជាតិ-អន្តរជាតិ ឯកឧត្តម ប៉ាន សូរស័ក្តិ បានណែនាំឱ្យកីឡាករ-កីឡាការិនីទាំងអស់ត្រូវឈរលើស្មារតីកីឡា ដើម្បីសុខភាព សន្តិភាព មិត្តភាព សាមគ្គីភាព និងបង្កើនគុណផលបច្ចេកទេស។

ឯកឧត្តមប្រធានសហព័ន្ធ ក៏បានស្នើដល់មន្ត្រីគណៈកម្មការបច្ចេកទេសសហព័ន្ធខ្មែរកីឡាទោចក្រយាន ត្រូវខិតខំប្រឹងប្រែងយកអស់កម្លាំងកាយចិត្ត ប្រកបដោយស្មារតីទទួលខុសត្រូវខ្ពស់ក្នុងការរៀបចំព្រឹត្តិការណ៍នេះ។

យោងតាម ប្រធានសហព័ន្ធខ្មែរកីឡាទោចក្រយាន នេះជាការប្រកួតប្រចាំឆ្នាំចុងក្រោយហើយ មុននឹងដល់ពេលដែល កម្ពុជា ត្រូវធ្វើជាម្ចាស់ផ្ទះ រៀបចំការប្រកួតកីឡាស៊ីហ្គេមលើកទី 32 ឆ្នាំ 2023។

ក្រសួងពាណិជ្ជកម្ម ឱ្យដឹងថា ក្រោមគម្រោងថវិកាគាំទ្ររបស់ក្រសួងអប់រំ យុវជន និងកីឡា សហព័ន្ធខ្មែរកីឡាទោចក្រយាន សហការជាមួយរដ្ឋបាលខេត្តសៀមរាប រៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិ ប្រចាំឆ្នាំ 2022 ដើម្បីជ្រើសរើសកីឡាករ-កីឡាការិនីឆ្នើមប្រចាំឆ្នាំ សម្រាប់ហ្វឹកហាត់បំប៉នសមត្ថភាព ត្រៀមចូលរួមការប្រកួតកីឡាស៊ីហ្គេម លើកទី 32 ឆ្នាំ 2023៕

December 27, 2022

ក្រុមជម្រើសជាតិថៃ ឈរលើកំពូលតារាងនៅ AFF Cup 2022 ក្រោយប៉ះ ហ្វ៊ីលីពីន កាលពីម្សិលមិញ

(ប្រទេសថៃ)- Teerasil Dangda រកបាន 2 គ្រាប់ និងបង្កឱកាសបាន 1 គ្រាប់ ជួយឱ្យ ក្រុមជម្រើសជាតិថៃ យកឈ្នះ ហ្វ៊ីលីពីន 4-0 ក្នុងពូល A នៅ AFF Cup 2022 កាលពីថ្ងៃទី 26 ធ្នូ 2022។

ក្រោយ 2 ប្រកួតដែលប៉ះនឹង ព្រុយណេ និង ហ្វ៊ីលីពីន ក្រុមបាល់ទាត់ជម្រើសជាតិថៃ បានស៊ុតផ្ដាច់រហូតដល់ 60 ដង ក្នុងនោះមាន 28 គ្រាប់ហោះចំទី ជួយឱ្យ ពួកគេរកបាន 9 គ្រាប់ និងមាន 6 ពិន្ទុ ដែលនាំឱ្យ ថៃ នាំមុខគេនៅពូល A ដោយសារតែ គ្រាប់បាល់ចំណេញ (goal difference) ច្រើនជាង ឥណ្ឌូណេស៊ី។

ក្រុមជម្រើសជាតិថៃ រក្សាសមាជិកក្រុមដដែល ធៀបនឹងការប្រកួតជាមួយ ព្រុយណេ ដែលនេះនាំឱ្យ ថៃ មិនពិបាកក្នុងការផ្ដួល ហ្វ៊ីលីពីន នៅលើទីលាន Thammasat នៅប្រទេសថៃ។

ក្រោយឈ្នះ ហ្វ៊ីលីពីន កាលពីម្សិលមិញ ក្រុមជម្រើសជាតិថៃ ដណ្ដើមបានតំណែងនាំមុខពូល A ពីដៃ ឥណ្ឌូណេស៊ី។ ហ្វ៊ីលីពីន ដែលបានបរាជ័យលើកទីពីរក្រោយ 3 ប្រកួត ទំនងជានឹងត្រូវជម្រុះ។ នៅជុំបន្ទាប់ ថៃ នឹងធ្វើជាភ្ញៀវនៅលើទីលានរបស់ ឥណ្ឌូណេស៊ី នៅថ្ងៃទី 29 ធ្នូ ចំណែក ហ្វ៊ីលីពីន វិញ បានសម្រាក។ ក្រុមហ្វ៊ីលីពីន នឹងប៉ះ ឥណ្ឌូណេស៊ី នៅជុំចុងក្រោយ ដែលត្រូវធ្វើឡើងនៅថ្ងៃទី 02 មករា 2023។

កីឡាករថៃ Teerasil Dangda អបអរជ័យជម្នះលើ ហ្វ៊ីលីពីន កាលពីថ្ងៃទី 26 ធ្នូ

AFF Cup 2022 (AFF Mitsubishi Electric Cup 2022) ថ្ងៃនេះនឹងមានការប្រកួតរវាង ឡាវ និង សិង្ហបុរី នៅម៉ោង 17 ល្ងាច ខណៈ វៀតណាម និង ម៉ាឡេស៊ី ប៉ះគ្នានៅម៉ោង 19 និង 30 នាទី។ ដោយឡែក កម្ពុជា វិញ នឹងជួបក្រុម ព្រុយណេ នៅថ្ងៃទី 29 ធ្នូខាងមុខ៕

December 27, 2022

មនុស្សជិតម្ភៃនាក់បានស្លាប់ព្រោះតែព្រឹលធ្លាក់ខ្លាំងនៅ New York

(សហរដ្ឋអាម៉េរិក)- ចំនួនមនុស្សស្លាប់ដោយសារតែព្យុះព្រឹលនៅរដ្ឋ New York បានកើនដល់ 27 នាក់ បន្ទាប់ពីអាជ្ញាធររកឃើញជនរងគ្រោះ 14 នាក់ទៀតនៅក្នុងទីក្រុង Buffalo នៅក្នុងមួយថ្ងៃ។

Buffalo ដែលជាទីក្រុងធំជាងគេលំដាប់ទីពីររបស់រដ្ឋ New York គឺជាតំបន់មួយដែលរងគ្រោះធ្ងន់ធ្ងរជាងគេនៅក្នុងរដូវព្យុះព្រឹលដែលកំពុងវាយប្រហារពាសពេញទឹកដីអាម៉េរិក។

អាជ្ញាធរមូលដ្ឋានបានប្រកាសថា ចំនួនមនុស្សស្លាប់គិតត្រឹមថ្ងៃទី 26 ធ្នូ បានឡើងដល់ 27 នាក់ កើន 14 នាក់ធៀបនឹងស្ថិតិកាលពីយប់កន្លង។ ជនរងគ្រោះភាគច្រើនគឺជាអ្នកជាប់គាំងក្នុងរថយន្ត ជាប់នៅខាងក្រៅផ្ទះ ឬអ្នកមានបញ្ហាបេះដូងនៅពេលសម្អាតព្រឹល។

ចាប់តាំងពីព្យុះព្រឹលបានវាយលុក Buffalo តំបន់មួយចំនួនរបស់ទីក្រុងនេះត្រូវបានកប់ក្រោមស្រទាប់ព្រឹលកម្រាស់ជាង 1.2 ម៉ែត្រ។ អភិបាលរដ្ឋ New York Kathy Hochul អះអាងថា នេះគឺជាគ្រោះមហន្តរាយអាកាសធាតុ «រយឆ្នាំមានម្ដង» សម្រាប់ប្រជាជននៅភាគខាងលិចរដ្ឋនេះ។

អាជ្ញាធរ New York ឱ្យដឹងថា នេះគឺជាព្យុះព្រឹលអាក្រក់បំផុតរាប់ចាប់តាំងពីគ្រោះធម្មជាតិកាលពីឆ្នាំ 1977 នៅ Buffalo ដែលកាលណោះទីក្រុងនេះមានមនុស្សស្លាប់ជិត 30 នាក់។

ព្យុះព្រឹលបានចាប់ផ្ដើមពីបាតុភូត «គ្រាប់បែកព្រឹល» ដែលកកើតឡើងនៅតំបន់សម្ពាធទាបខាងលើ Five Great Leaks បានសម្លាប់មនុស្សយ៉ាងតិច 60 នាក់ នៅទូទាំងសហរដ្ឋអាម៉េរិក នេះបើតាម NBC៕

December 27, 2022

Man Utd ត្រូវតែបំបែកឯតទគ្គកម្ម បើចង់ទិញកីឡាករវ័យក្មេងឆ្នើមបំផុតនៅ World Cup

ក្លឹប Man Utd និង Liverpool នឹងត្រូវបំបែកឯតទគ្គកម្មស្ដីពីតម្លៃនៃការដោះដូរ បើសិនជាចង់ទិញខ្សែបម្រើរបស់ អាហ្សង់ទីន Enzo Fernandez ពី Benfica។

យោងតាមសារព័ត៌មានអង់គ្លេស Sunsport ក្លឹប Benfica មិនមានចេតនាលក់ Fernandez ក្នុងតម្លៃ «ទាបជាង 1 សេន» ធៀបនឹងលក្ខខណ្ឌតម្លៃ 127 លានដុល្លារអាម៉េរិក។ ខ្សែបម្រើវ័យ 21 ឆ្នាំនេះ ទើបតែបានចូលរួមជាមួយក្លឹបរបស់ ព័រទុយហ្កាល់ កាលពីរដូវក្ដៅឆ្នាំនេះ ហើយកិច្ចសន្យានៅសល់រហូតដល់ឆ្នាំ 2027។

ដូច្នេះ Man Utd នឹងត្រូវបំបែកឯតទគ្គកម្មក្នុងការដោះដូររបស់ក្លឹប បើសិនចង់ទិញ Fernandez នៅខែមករា 2023។ ឯតទគ្គកម្មបច្ចុប្បន្នរបស់ Man Utd នៅតែជាករណីទិញដូរតម្លៃ 107 លានដុល្លារអាម៉េរិក ដែលបាននាំយកខ្សែបម្រើ Paul Pogba ត្រលប់ទៅកាន់ទីលាន Old Trafford កាលពីឆ្នាំ 2016។

ដូចគ្នានេះដែរ Liverpool ក៏ត្រូវបំបែកកំណត់ត្រា 102 លានដុល្លាររបស់ Darwin Nunez ពី Benfica នៅរដូវដោះដូរកីឡាករឆ្នាំ 2022 បើចង់ចុះកិច្ចសន្យាជាមួយ Fernandez នាពេលខាងមុខ។

ក្លឹប Newcastle ត្រូវបានគេជឿថា ជា «ចំណត» ថ្មីដែលមានសក្ដានុពលរបស់ Fernandez ប៉ុន្តែ គ្រូបង្វឹក Eddie Howe ទទួលស្គាល់ថា ថ្លៃដោះដូរកីឡាករនេះគឺខ្ពស់ណាស់។

ពី អេស្ប៉ាញ Real Madrid ក៏កំពុងស្រាវជ្រាវរកវិធីដើម្បីទិញ Fernandez ក្នុងករណីមិនអាចទិញ Jede Bellingham របស់ ក្រុមជម្រើសជាតិអង់គ្លេស។

Fernandez ទទួលបានការសាទរខ្លាំងនៅពេលបណ្ដើរបាល់ និងស៊ុតបាល់ហោះកោងខ្ពស់សំដៅទី ជួយឱ្យ អាហ្សង់ទីន ឈ្នះ ម៉ិកស៊ិក 2-0 ក្នុងការប្រកួតជុំទីពីរនៃវគ្គសន្សំពិន្ទុរបស់ World Cup 2022។ ក្រោយរកបាន 1 គ្រាប់នេះ Fernandez ក៏ក្លាយជាកីឡាករជម្រើសដំបូង ហើយត្រូវបានជ្រើសរើសជាកីឡាករវ័យក្មេងឆ្នើមបំផុតនៅ World Cup 2022។

Fernandez មានតម្លៃខ្លួនស្មើនឹងខ្សែបម្រើ Cristian Romero របស់ Tottenham ហើយក៏ជាកីឡាករដែលមានតម្លៃខ្លួនខ្ពស់ជាងគេលំដាប់ទីពីរក្នុង ក្រុមជម្រើសជាតិអាហ្សង់ទីន បន្ទាប់ពី Lautaro Martinez៕

December 26, 2022

ព្រលានយន្តហោះលើកម្ពស់ជាង 3,000 ម៉ែត្រ នៅភាគខាងលិចបំផុតរបស់ចិន ចាប់ផ្ដើមដំណើរការ

ប្រទេសចិន កាលពីថ្ងៃទី 23 ធ្នូ បានសម្ពោធដាក់ឱ្យដំណើរការព្រលានយន្តហោះក្នុងតំបន់ខ្ពង់រាបដំបូងនៅតំបន់ស្វយ័ត Xinjiang ក្រោយការសាងសង់ 2 ឆ្នាំ។

ការចេញដំណើរពីទីក្រុង Urumqi ដែលជាទីក្រុងរដ្ឋបាលរបស់តំបន់ស្វយ័ត Xinjiang នៅវេលាម៉ោង 08 និង 57 នាទីព្រឹក ថ្ងៃទី 23 ធ្នូ 2022 (ម៉ោងនៅ ប៉េកាំង) ជើងហោះហើរ CZ5193 របស់ China Southern Airlines បានចុះចតលើព្រលានយន្តហោះ Tashkurgan Khunjerab ក្នុងស្រុក Tajik Taxkorgan របស់ Xinjiang នៅម៉ោង 10 និង 59 ព្រឹកក្នុងថ្ងៃដដែល គឺជាជើងហោះហើរដំបូងដែលបញ្ជាក់អំពីការសម្ពោធព្រលានយន្តហោះថ្មីស្ថិតនៅលើទីខ្ពស់ដំបូងរបស់តំបន់នេះ។

ព្រលានយន្តហោះ Tashkurgan Khunjerab ដែលស្ថិតនៅលើកម្ពស់ 3,258 ម៉ែត្រ ធៀបនឹងផ្ទៃទឹកសមុទ្រ គឺជាព្រលានយន្តហោះដឹកជញ្ជូននៅទិសខាងលិចឆ្ងាយបំផុតរបស់ ប្រទេសចិន។ ព្រលានយន្តហោះនេះមានផ្លូវរត់មួយខ្សែដែលមានប្រវែង 3,800 ម៉ែត្រ អាចឆ្លើយតបនឹងការហោះឡើង និងចុះចត 1,900 ជើងជារៀងរាល់ឆ្នាំ ដោយអាចទទួលអ្នកដំណើរបាន 160,000 នាក់ រួមនឹងទំនិញ 400 តោន/ឆ្នាំ។

Tashkurgan Khunjerab ត្រូវបានផ្ដើមការស្ថាបនាចាប់ពីឆ្នាំ 2020 ដោយប្រើប្រាស់ទុនវិនិយោគជាង 1.6 ពាន់លានយ៉ុន ស្មើនឹង 229 លានដុល្លារអាម៉េរិក។ ការស្ថាបនាព្រលានយន្តហោះនៅលើតំបន់ខ្ពង់រាប Pamir គឺជារឿងលំបាក ដោយសារតែស្ថានភាពខ្វះអុកស៊ីសែន រួមនឹងអាកាសធាតុត្រជាក់ខ្លាំង។

កន្លងមក ការធ្វើដំណើរពីតំបន់ព្រលានយន្តហោះខាងលើទៅកាន់ ទីក្រុងប៉េកាំង ត្រូវចំណាយពេលពី 40 ទៅ 50 ម៉ោង ដោយការជិះរថយន្តក្រុង និងរថភ្លើង។ ប៉ុន្តែ ការធ្វើដំណើរតាមយន្តហោះពីព្រលានថ្មីនេះ ពេលវេលាត្រូវថយចុះមកនៅត្រឹម 8 ម៉ោងប៉ុណ្ណោះ។

យោងតាម Xinhua ការដាក់ឱ្យដំណើរការព្រលានយន្តហោះថ្មីនេះ មិនត្រឹមតែជួយកាត់បន្ថយពេលវេលានៃការធ្វើដំណើរប៉ុណ្ណោះទេ តែក៏រួមចំណែកក្នុងការអភិវឌ្ឍឧស្សាហកម្ម និងទេសចរណ៍ក្នុងតំបន់ផងដែរ៕

December 26, 2022

ក្រសួងការងារជូនដំណឹងអំពីការជ្រើសរើសបេក្ខជនសម្រាប់អាហារូបករណ៍សម្រាប់ឆ្នាំសិក្សាថ្មី

នៅក្នុងចំណោមលក្ខខណ្ឌនៃចុះឈ្មោះសុំអាហារូបករណ៍ ក្រសួងផ្ដល់អាទិភាពចំពោះបេក្ខនារីក្រីក្រនៅតំបន់ដាច់ស្រយាល និងជនជាតិភាគតិច រួមនឹងជនពិការផងដែរ។

ក្រសួងការងារ និងបណ្តុះបណ្តាលវិជ្ជាជីវៈ ប្រកាសជូនដំណឹងថា ក្នុងឆ្នាំសិក្សា 2022-2023 ក្រសួងនឹងជ្រើសរើសបេក្ខជនចំនួន 24,238 នាក់ ឱ្យទទួលអាហារូបករណ៍ចូលរៀនកម្រិតសញ្ញាបត្របច្ចេកទេស និងវិជ្ជាជីវៈ 1 (C1) 2 (C2) និង 3 (C3) កម្រិតសញ្ញាបត្រជាន់ខ្ពស់/បរិញ្ញាបត្ររង បច្ចេកទេស/ឯកទេស (HDT/S) និងកម្រិតបរិញ្ញាបត្របច្ចេកវិទ្យា/ឯកទេស/សញ្ញាបត្រវិស្វករ (BT/S/BE) ទៅតាមចំនួន ជំនាញ/មុខរបរ និងគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈដូចក្នុងសេចក្ដីជូនដំណឹងខាងក្រោម។

ព័ត៌មានផ្សេងៗទៀត បេក្ខជនអាចធ្វើការទំនាក់ទំនងផ្ទាល់ជាមួយគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈនីមួយៗដែលខ្លួនមានបំណងចូលរៀន។