សឿន សំណាង - La Reine Media

(AFF Cup 2022) – សិង្ហបុរី និងវៀតណាម នៅព្រលប់នេះ តើក្រុមណាអាចឡើងដល់វគ្គពាក់កណ្ដាលផ្ដាច់ព្រ័ត្រ?

ដោយមាន 6 ពិន្ទុស្មើគ្នា តើរវាង សិង្ហបុរី និង វៀតណាម ក្រុមមួយណាជាអ្នកដណ្ដើមបានសំបុត្រឡើងទៅកាន់វគ្គពាក់កណ្ដាលផ្ដាច់ព្រ័ត្រមុនគេមួយជុំ នៅ AFF Cup 2022 ក្នុងការប្រកួតនៅព្រលប់ថ្ងៃទី 30 ធ្នូនេះ?

គ្រូបង្វឹករបស់ក្រុមវៀតណាម Park Hang-seo ប្រមូលផ្ដុំកូនសិស្សខ្លាំងៗបំផុតបានគ្រប់ចំនួន ក្នុងនោះមានទាំងខ្សែបម្រើ Nguyen Quang Hai ដែលកំពុងលេងឱ្យក្លឹប Pau FC នៅ ប្រទេសបារាំង។ ចំណែក សិង្ហបុរី វិញ មិនអាចរក្សាបាននូវថាមពលដូចកាលពី AFF Cup 2020 ជារដូវកាលមួយដែលពួកគេបានឡើងដល់វគ្គពាក់កណ្ដាលផ្ដាច់ព្រ័ត្រ ដោយសារតែពេលនេះពួកគេបាត់បង់ខ្សែប្រយុទ្ធលេខមួយ Ikhsan Fandi និងខ្សែបម្រើ Adam Swandi ព្រោះតែរងរបួស។

ក្នុងគ្រាដែលក្រុមនានាបានឆ្លងកាត់ការប្រកួតដ៏លំបាក វៀតណាម បែរជាឡើងដល់កំពូលតារាងដោយងាយ ក្រោយឈ្នះម្ចាស់ផ្ទះឡាវ 6-0 និងឈ្នះភ្ញៀវម៉ាឡេស៊ី 3-0 បើទោះជាត្រូវលេងដោយខ្វះជើង។

បើសិនជារកបាន 3 ពិន្ទុទៀតនៅក្នុងការប្រកួតលើទឹកដីរបស់ សិង្ហបុរី នៅព្រលប់នេះ ក្រុមវៀតណាម នឹងឡើងដល់វគ្គពាក់កណ្ដាលផ្ដាច់ព្រ័ត្រឆាប់ជាងគេមួយជុំ។ ក្រោយការឈ្នះលើ សិង្ហបុរី នៅម៉ោង 19 និង 30 នាទីព្រលប់នេះ វៀតណាម ងាយស្រួលគិតគូរដល់ជុំចុងក្រោយនៅពូល B ដែលត្រូវប៉ះ មីយ៉ាន់ម៉ា នៅថ្ងៃទី 03 មករា 2023 ដើម្បីរើសគូប្រកួតនៅវគ្គពាក់កណ្ដាលផ្ដាច់ព្រ័ត្រ ហើយអាចអនុញ្ញាតឱ្យកីឡាករសំខាន់ៗមួយចំនួនសម្រាកយកកម្លាំង ឬសាកល្បងវិធីថ្មីសម្រាប់ការប្រកួតវគ្គជម្រុះផ្ទាល់។

សិង្ហបុរីមានជ័យជម្នះពីរលើក ប៉ុន្តែការលេងរបស់ពួកគេមិនទាន់ធ្វើឱ្យមានទំនុកចិត្តនៅឡើយ។ ពួកគេត្រូវទាត់រហូតដល់ការប្រកួតថែមម៉ោង ទើបរកបានគ្រាប់បាល់ទីពីរដើម្បីយកឈ្នះ ឡាវ ក្នុងជុំទីពីរ។ ក្នុងការប្រកួតជុំដំបូង កូនសិស្សរបស់ Takayuki Nishigaya ការពារតំបន់គ្រោះថ្នាក់មិនបានល្អ ធ្វើឱ្យ មីយ៉ាន់ម៉ា នាំមុខ 2 គ្រាប់ ហើយត្រូវខំប្រឹងខ្លាំងទើបបានឈ្នះ 3-2 នៅលើវាលស្មៅរបស់ខ្លួន។

ចំណុចដែល សិង្ហបុរី មានប្រៀបជាង វៀតណាម គឺបានលេងនៅលើវាយស្មៅសិប្បនិម្មិត។ ប៉ុន្តែ គ្រូបង្វឹករបស់ក្រុមវៀតណាម អះអាងថា ពួកគេមិនញញើតឡើយ ព្រោះកូនសិស្សរបស់គាត់ក៏ធ្លាប់ទទួលបានបទពិសោធន៍នៅលើវាលស្មៅប្រភេទនេះ។

ការប៉ះគ្នាកន្លងមក ក៏ធ្វើឱ្យ សង្ហបុរី មានអារម្មណ៍មិនសូវល្អ។ ក្រោមការដឹកនាំរបស់គ្រូបង្វឹកជនជាតិកូរ៉េខាងត្បូង ក្រុមជម្រើសជាតិវៀតណាម សុទ្ធតែបានឈ្នះលើ ក្រុមសិង្ហបុរី។

ក៏ប៉ុន្តែ សិង្ហបុរី ទំនងជានឹងប្រើយុទ្ធសាស្ត្រការពារកម្រិតខ្ពស់ ដើម្បីធានាសុវត្ថិភាពសម្រាប់សំណាញ់ទីរបស់ពួកគេ មុនពេលរង់ចាំឱកាសវាយបកនៅពេល វៀតណាម បាត់បង់អំណត់ និងភ្លេចខ្លួន៕

December 30, 2022

ការនាំចេញរថយន្តអគ្គិសនីរបស់ចិន កើនឡើងខ្ពស់ខ្លាំង ដោយសារតម្រូវការនៅអឺរ៉ុប

ការនាំចេញរថយន្តអគ្គិសនីរបស់ចិន បានបង្កើតឯតទគ្គកម្មថ្មី ដោយកើនជាងទ្វេដងក្នុងខែវិច្ឆិកា ធៀបនឹងដំណាក់កាលដូចគ្នាកាលពីឆ្នាំកន្លង មួយផ្នែកគឺដោយសារអ្នកផលិតរថយន្តរបស់ អឺរ៉ុប ងាកមកផលិតនៅ ប្រទេសចិន។

ក្រុមអ្នកផលិតរថយន្តនៅ ប្រទេសចិន បាននាំចេញរថយន្តអគ្គិសីសរុបតម្លៃ 3.2 ពាន់លានដុល្លារអាម៉េរិក ក្នុងខែវិច្ឆិកា 2022 នេះបើតាមទិន្នន័យពីអគ្គនាយកពន្ធដារចិន។ បណ្ដាប្រទេសអឺរ៉ុប មានដូចជា អង់គ្លេស និង បែលហ្ស៊ិក ជាដើម គឺជាអ្នកនាំចូលរថយន្តអគ្គិសនីពី ប្រទេសចិន ច្រើនជាងគេ ដោយមានចំណែកជិត 70%។

ការនាំចេញរថយន្តអគ្គិសនីរួមចំណែកជាងពាក់កណ្ដាលនៅក្នុងចំណោមបរិមាណរថយន្តដែល ចិន បាននាំចេញក្នុង 2 ខែបន្តបន្ទាប់ ក្នុងនោះ ខែវិច្ឆិកា លក់បាន 6 ពាន់លានដុល្លារអាម៉េរិក។

តួលេខទាំងនេះត្រូវបានលើកឡើងក្នុងគ្រាដែលក្រុមអ្នកផលិតរថយន្តរបស់ អឺរ៉ុប មានដូចជា Volkswagen និង BMW ជាដើម បានកំណត់គោលដៅផលិតគ្រឿងបន្លាស់ និងរថយន្តនៅ ប្រទេសចិន ដោយសារតែលទ្ធភាពនៃការផលិតរថយន្តអគ្គិសនីនៅក្នុងស្រុកនៅមានកំណត់។

ក្រុមហ៊ុនចិន SAIC Motor ដែលជាអ្នកគ្រប់គ្រង MG Motors ក៏បានពង្រីកបណ្ដាញចែកចាយដើម្បីលក់រថយន្តអគ្គិសនីនៅ អឺរ៉ុប តាមរយៈការនាំចូលពី ប្រទេសចិន។

Tesla បាននាំចេញរថយន្តជាង 37,000 គ្រឿងពី ប្រទេសចិន ទៅកាន់ អឺរ៉ុប កាលពីខែកន្លង ក្រោយពីបាននាំចេញតែ 60 គ្រឿងនៅក្នុងខែមីនា និងមិនបាននាំចេញក្នុងខែមេសា នៅពេលក្រុមហ៊ុននេះផ្អាកការដំឡើង ដោយសារកូវីដ-19 នៅ សៀងហៃ៕

December 30, 2022

អ្នកដំណើរចិនជិតពាក់កណ្ដាលលើយន្តហោះពីរជើងទៅកាន់អ៊ីតាលី វិជ្ជមាននឹងកូវីដ-19

ក្នុងចំណោមអ្នកដំណើរ 212 នាក់នៅលើយន្តហោះពីរគ្រឿងធ្វើដំណើរពី ប្រទេសចិន ទៅកាន់ Milan ក្នុងសប្ដាហ៍នេះ មាន 97 នាក់វិជ្ជមាននឹងកូវីដ-19 ធ្វើឱ្យ អ៊ីតាលី ត្រូវរឹតបន្តឹងការធ្វើតេស្ត។

ជើងយន្តហោះចំនួន 2 ដែលដឹកអ្នកដំណើរពី ប្រទេសចិន កាលពីថ្ងៃទី 26 ធ្នូ បានចុះចតនៅព្រលានយន្តហោះ Malpensa ក្នុងទីក្រុង Milan ភាគខាងជើងប្រទេសអ៊ីតាលី។ ក្នុងជើងយន្តហោះដំបូង មាន 35 នាក់វិជ្ជមាននឹងកូវីដ-19 ក្នុងចំណោមអ្នកដំណើរទាំង 92 នាក់។ ចំណែកនៅក្នុងជើងយន្តហោះទីពីរ មាន 62 នាក់វិជ្ជមានក្នុងចំណោមអ្នកដំណើរ 120 នាក់ នេះបើតាម Guido Bertolaso មេដឹកនាំផ្នែកសុខាភិបាលនៅតំបន់ Lombardy។

អ្នកដំណើរដែលវិជ្ជមាននឹងកូវីដ-19 ត្រូវបានដាក់ឱ្យធ្វើចត្តាឡីស័ក ខណៈអាជ្ញាធរអ៊ីតាលី កំពុងបង្កើនការស្រាវជ្រាវរកអ្នកដែលបានប៉ះពាល់ផ្ទាល់ និងប្រយោល។ កាលពីថ្ងៃទី 28 ធ្នូ រដ្ឋមន្ត្រីក្រសួងសុខាភិបាលអ៊ីតាលី បានប្រកាសថា «អ្នកដំណើរគ្រប់រូបដែលមកពី ប្រទេសចិន និងឆ្លងកាត់ ប្រទេសអ៊ីតាលី» ត្រូវតែធ្វើតេស្តរកកូវីដ-19។

ក្រៅពី អ៊ីតាលី ប្រទេសមួយចំនួនដូចជា សហរដ្ឋអាម៉េរិក ជប៉ុន ឥណ្ឌា និង ម៉ាឡេស៊ី ជាដើម ក៏តម្រូវឱ្យធ្វើតេស្តចំពោះអ្នកដំណើរមកពីប្រទេសចិន។

ករណីខាងលើបានកើតឡើងក្រោយពី អាជ្ញាធរចិន កាលពីថ្ងៃទី 26 ធ្នូ សម្រេចទម្លាក់កម្រិតនៃការគ្រប់គ្រងកូវីដ-19 ដោយលើកលែងការធ្វើចត្តាឡីស័កជាដើម ចំពោះអ្នកដំណើរមកពីបរទេស និងកាត់បន្ថយវិធានការទប់ស្កាត់កូវីដ-19 ផ្សេងទៀត ដើម្បីអនុញ្ញាតឱ្យ ពលរដ្ឋចិន ចេញទៅបរទេសបានងាយស្រួលជាងមុន៕

December 30, 2022

«កម្ពុជាត្រូវតែឈ្នះថៃ» នៅថ្ងៃទី 02 មករា 2023 ទើបបានឡើងទៅវគ្គពាក់កណ្ដាលផ្ដាច់ព្រ័ត្រ

ដោយមានកម្លាំងខ្លាំងក្លា កម្ពុជា បានយកឈ្នះលើ ព្រុយណេ 5-1 នៅក្នុងការប្រកួតជុំទីបួនក្នុងពូល A នៅ AFF Cup 2022 កាលពីម្សិលមិញ។

ជ័យជម្នះខាងលើនេះជួយឱ្យកូនសិស្ស និងគ្រូបង្វឹក Honda ជឿជាក់ជាងមុន នៅពេលត្រូវប្រកួតជាមួយក្រុមរបស់ ថៃ នៅថ្ងៃទី 02 មករា 2023។

ក្នុង 3 ប្រកួតដំបូងៗនាពេលកន្លងនៅ AFF Cup 2022 (AFF Mistubishi Electric Cup 2022) ក្រុមជម្រើសជាតិកម្ពុជា បានឈ្នះ ហ្វីលីពីន 3-2, ចាញ់ឥណ្ឌូណេស៊ី 1-2 និងឈ្នះព្រុយណេ 5-1។

កម្ពុជា នៅសល់ 1 ប្រកួតទៀតដែលត្រូវប៉ះនឹង ថៃ នៅថ្ងៃទី 02 មករា 2023 ដោយកម្ពុជាធ្វើជាភ្ញៀវ។ ដើម្បីមានសិទ្ធិឡើងទៅប្រកួតនៅវគ្គពាក់កណ្ដាលផ្ដាច់ព្រ័ត្រ កម្ពុជា ត្រូវតែយកឈ្នះលើ ថៃ នៅក្នុងការប្រកួតនេះ។

កាលពីម្សិលមិញ AFF Cup 2022 មានការប្រកួតរវាង ក្រុមថៃ និងឥណ្ឌូណេស៊ី ដោយទទួលបានលទ្ធផល 1-1 ជួយឱ្យពួកគេមាន 7 ពិន្ទុដូចគ្នា ចំណែក កម្ពុជា តិចជាងនេះ 1 ពិន្ទុ។

សូមទស្សនាឡើងវិញ «កម្ពុជា ឈ្នះ ព្រុយណេ 5-1 ក្នុងការប្រកួតជុំទីបួនក្នុងពូល A នៅ AFF Cup 2022 កាលពីម្សិលមិញ» ៖

December 30, 2022

ទំហំពាណិជ្ជកម្មរវាង កម្ពុជា-ចិន កើនឡើងដល់ជាង 14 ពាន់លានដុល្លារ ក្នុងឆ្នាំ 2022

(កំពត)- ទំហំពាណិជ្ជកម្មកម្ពុជា-ចិន នៅឆ្នាំ 2022 នេះ មានរហូតដល់ 14,500 លានដុល្លារអាម៉េរិក កើនជាង19% ហើយសង្ឃឹមថា នឹងកើនឡើងថែមទៀត នេះបើតាមប្រសាសន៍របស់ប្រមុខរាជរដ្ឋាភិបាលកម្ពុជា ថ្លែងក្នុងពិធីបើកការដ្ឋានស្តារ និងលើកកម្រិតគុណភាពភាពផ្លូវជាតិលេខ 31 និង 33 នៅព្រឹកថ្ងៃទី 30 ធ្នូ 2022។

មូលហេតុដែលធ្វើឱ្យទំហំ ពាណិជ្ជកម្មកើនឡើងនេះ ត្រូវបានសម្ដេចតេជោ ហ៊ុន សែន អះអាងថា ដោយសារ ប្រទេសទាំងពីរមានកិច្ចព្រមព្រៀងពាណិជ្ជកម្មសេរី ដែលជួយឱ្យកម្ពុជា អាចនាំចេញទំនិញទៅ ប្រទេសចិន បានច្រើនជាងមុន។

ក្នុងពិធីសម្ពោធបើកការដ្ឋានខាងលើ ប្រមុខរាជរដ្ឋាភិបាលបានមានប្រសាសន៍ថា «ឆ្នាំនេះទំហំពាណិជ្ជកម្មកម្ពុជា-ចិន មានចំនួនរហូតដល់ 14,500 លានដុល្លារអាម៉េរិក មានកំណើនដល់ជាង 19% ហើយនៅពេលខាងមុខ ខ្ញុំសង្ឃឹមថា នឹងមានសមត្ថភាពនាំទំនិញទៅកាន់ទីផ្សារប្រទេសចិន កាន់តែច្រើន តាមរយៈកិច្ចព្រមព្រៀងពាណិជ្ជកម្មសេរី ដែលចិន ផ្តល់អាទិភាពខ្ពស់ អនុគ្រោះពន្ធរហូតដល់ 97.43%»។

ទំហំពាណិជ្ជកម្មរវាងកម្ពុជា និងចិន កាលពីឆ្នាំកន្លង បានឡើងដល់ជាង 11 ពាន់លានដុល្លារអាម៉េរិក ខណៈឆ្នាំនេះ គ្រោងនឹងបង្កើនទំហំពាណិជ្ជកម្មទ្វេភាគីឱ្យបានឡើងដល់ 15 ពាន់លានដុល្លារអាម៉េរិក៕

December 30, 2022

សាស្ត្រាចារ្យអាហ្វហ្គានីស្ថាន ហែកសញ្ញាបត្របណ្ឌិត ដើម្បីប្រឆាំងនឹង តាលីបង់

នៅក្នុងពេលទឹកភ្នែករៀបនឹងស្រក់ ដៃញ័រៗដោយការខឹងខ្លាំង សាស្ត្រាចារ្យ Mashal ក៏ហែកចោលសញ្ញាបត្របណ្ឌិតរបស់ខ្លួននៅពេលសម្ភាសលើកញ្ចក់ទូរទស្សន៍ ដើម្បីប្រឆាំងនឹងបទបញ្ជារបស់ របបតាលីបង់ ដែលហាមនិស្សិតស្រីរៀននៅមហាវិទ្យាល័យ។

«ចាប់ពីពេលនេះ ខ្ញុំលែងត្រូវការសញ្ញាបត្រទាំងនេះទៀតហើយ ព្រោះថា ប្រទេសនេះមិនមែនជាកន្លែងសម្រាប់ការអប់រំ។ ខ្ញុំមិនទទួលស្គាល់ថ្នាលអប់រំនេះបើសិនប្អូនស្រី និងម្ដាយរបស់ខ្ញុំមិនអាចទៅរៀន» សាស្ត្រាចារ្យ Ismail Mashal ស្ថាបនិករបស់សាកលវិទ្យាល័យឯកជន Mashal និងបង្រៀននៅសាកលវិទ្យាល័យកាប៊ុល ថ្លែងនៅក្នុងកិច្ចសម្ភាសជាមួយនឹង Tolo News កាលពីដើមសប្ដាហ៍នេះ។

នៅក្នុងការផ្សាយផ្ទាល់ខាងលើ លោក Mashal បង្ហាញសញ្ញាបត្រជាច្រើនរបស់លោក ក្នុងនោះមានសញ្ញាបត្រថ្នាក់អនុបណ្ឌិត ថ្នាក់បណ្ឌិត និងវិញ្ញាបនបត្រគរុកោសល្យ ហើយហែកពួកវាជាពីរ ក្នុងពេលដៃរបស់លោកញ័រ និងទឹកភ្នែករលីងរលោង។

វីដេអូខាងលើទទួលបានការចាប់អារម្មណ៍យ៉ាងខ្លាំងនៅពេលត្រូវបាន Sabnam Nasimi អតីតទីប្រឹក្សាគោលនយោបាយនៅក្នុង អតីតរដ្ឋាភិបាលអាហ្វហ្គានីស្ថាន ចែករំលែកលើបណ្ដាញសង្គម។

អាជ្ញាធរតាលីបង់ កាលពីថ្ងៃទី 20 ធ្នូ បានចេញបទបញ្ជាមិនកំណត់ពេលវេលា ហាមសិស្សស្ត្រីអាហ្វហ្គានីស្ថាន រៀននៅមហាវិទ្យាល័យ ក្រោយរយៈពេលប្រហែល 9 ខែដែលពួកគេបានហាមកុមារីទៅរៀននៅមធ្យមសិក្សា។ បទបញ្ជារបស់ តាលីបង់ បានធ្វើឱ្យក្ដីស្រមៃក្នុងការសិក្សារបស់ស្ត្រី និងក្មេងស្រីនៅ អាហ្វហ្គានីស្ថាន ត្រូវរលាយអស់គ្មានសល់។

តាលីបង់ ថែមទាំងបានហាមស្ត្រីទៅកាន់ឧទ្យាន ព្រឹត្តិការណ៍ពិព័រណ៍ កន្លែងហាត់ប្រាណ ក៏ដូចជាបន្ទប់ងូតទឹកសាធារណៈទៀតផង៕

December 30, 2022

លោក បៃដិន អនុម័តកញ្ចប់ថវិកាជាតិតម្លៃ 1.7 ទ្រីលានដុល្លារ ដើម្បីទប់ស្កាត់បញ្ហារដ្ឋាភិបាលជាប់គាំង

ច្បាប់ថវិកាតម្លៃ 1.7 ទ្រីលានដុល្លារដែលត្រូវបានបញ្ជូនតាមយន្តហោះទៅឱ្យប្រធានាធិបតី ចូ បៃដិន ចុះហត្ថលេខាសម្រេចនេះ ត្រូវបានបង្កើតឡើងដើម្បីទប់ស្កាត់សេណារីយ៉ោស្ដីពី រដ្ឋាភិបាលអាម៉េរិក ត្រូវបិទទ្វារនៅឆ្នាំក្រោយ។

ច្បាប់ថវិកាខាងលើដែលត្រូវបានសភាជាន់ទាបអាម៉េរិក អនុម័តរួចហើយ ត្រូវបានបញ្ជូនឡើងទៅកាន់សេតវិមាន នៅរសៀលថ្ងៃទី 28 ធ្នូ ដើម្បីប្រធានាធិបតី ចូ បៃដិន ចុះហត្ថលេខាចុងក្រោយ ប៉ុន្តែពេលនោះ លោក បៃដិន និងគ្រួសារកំពុងឈប់សម្រាកនៅ St. Croix លើប្រជុំកោះ Virgin របស់ អាម៉េរិក ក្បែរតំបន់សមុទ្រ ការ៉ាប៊ី។

បុគ្គលិករបស់ សេតវិមាន បាននាំយកឯកសារកម្រាស់ 4,000 ទំព័រនេះទៅជូនដល់ដៃប្រធានាធិបតីនៅ St. Croix ហើយក៏ត្រូវបានចុះហត្ថាលេខាកាលពីថ្ងៃទី 29 ធ្នូ 2022។ បើសិនមិនត្រូវបានលោក បៃដិន ចុះហត្ថលេខាយឺតបំផុតត្រឹមថ្ងៃទី 31 ធ្នូនោះទេ រដ្ឋាភិបាលអាម៉េរិក នឹងត្រូវបិទទ្វារ ខណៈត្រូវរង់ចាំការចាត់ចែងថវិកាជាតិសម្រាប់ឆ្នាំក្រោយ។

នេះគឺជាលើកទីពីរហើយនៅក្នុងឆ្នាំនេះ ដែលលោក បៃដិន ទទួលឯកសារសំខាន់ដែលត្រូវការចុះហត្ថលេខាតាមផ្លូវអាកាស។ កាលពីខែឧសភា ពេលលោក បៃដិន ស្ថិតនៅ អាស៊ី ជំនួយការរបស់លោកក៏បាននាំយកសេចក្ដីព្រាងច្បាប់ដែលសភាជាន់ទាបទើបតែបានអនុម័ត ស្ដីពីកញ្ចប់ជំនួយសម្រាប់ អ៊ុយក្រែន ដែលមានតម្លៃ 40 ពាន់លានដុល្លារអាម៉េរិក ទៅជូនលោកដើម្បីចុះហត្ថលេខា។

កញ្ចប់ថវិកាជាតិសម្រាប់ឆ្នាំ 2023 ខាងលើចែងថា ប្រាក់ជាង 772 ពាន់លានដុល្លារនឹងចំណាយសម្រាប់កម្មវិធីក្រៅវិស័យការពារជាតិ និងប្រហែល 858 ពាន់លានដុល្លារសម្រាប់វិស័យការពារជាតិ។ ច្បាប់នេះក៏ហាមការប្រើប្រាស់ TikTok នៅលើឧបករណ៍របស់ស្ថាប័នរដ្ឋផងដែរ។

កញ្ចប់ថវិកាជាតិលើកនេះក៏បន្ថែមប្រហែល 45 ពាន់លានដុល្លារសម្រាប់ជាជំនួយបន្ទាន់ដល់ អ៊ុយក្រែន និងសម្ព័ន្ធមិត្តណាតូ។ ទន្ទឹមនឹងនេះក៏មានខ្ទង់ថវិកាសម្រាប់លើកកម្ពស់ប្រព័ន្ធបោះឆ្នោត ការពារស្ត្រីមានផ្ទៃពោះ និងកែសម្រួលច្បាប់សន្សំសំច័យសម្រាប់ការចូលនិវត្តន៍។

រដ្ឋាភិបាលរបស់លោក បៃដិន ក៏បង្កើនការចំណាយសម្រាប់ដោះស្រាយបញ្ហាគ្រោះធម្មជាតិ ការអប់រំនៅមហាវិទ្យាល័យ ថែទាំកុមារ សុខភាពផ្លូវចិត្ត អាហារសម្រាប់អ្នកក្រីក្រ និងបង្កើនការចំណាយសម្រាប់ប៉ូលិសនៅរដ្ឋធានីផងដែរ៕

December 30, 2022

កុមារនៅ អ៊ូសបេគីស្ថាន 18 នាក់បានស្លាប់ ក្រោយពីផឹកថ្នាំស៊ីរ៉ូក្អករបស់ ឥណ្ឌា

កាលពីថ្ងៃទី 29 ធ្នូ ក្រសួងសុខាភិបាលរបស់ អ៊ូសបេគីស្ថាន បានឱ្យដឹងថា កុមារ 18 នាក់របស់ប្រទេសនេះបានស្លាប់ ក្រោយពីផឹកស៊ីរ៉ូព្យាបាលអាការក្អក ដែលផលិតដោយក្រុមហ៊ុនឥណ្ឌា Marion Biotech។

ឱសថខាងលើមានឈ្មោះថា Doc-1 Max ត្រូវបាននាំចូល អ៊ូសបេគីស្ថាន តាមរយៈក្រុមហ៊ុន Quramax Medical។ ថ្នាំនេះត្រូវបានផ្សាយថា អាចព្យាបាលជំងឺផ្ដាសាយ។

យោងតាម ក្រសួងសុខាភិបាលអ៊ូសបេគីស្ថាន ស៊ីរ៉ូក្អកមានផ្ទុក ethylene glycol ជាសារធាតុពុលម្យ៉ាង។ Ethylene glycol តែងស្ថិតនៅជាទម្រង់រាវមិនមានក្លិន មិនមានពណ៌ មានរសជាតិផ្អែម និងតែងរកឃើញនៅក្នុងសារធាតុប្រឆាំងការកក។

«ក្មេងៗបានស្លាប់ ក្រោយពីផឹកស៊ីរ៉ូក្អកដោយមិនមានវេជ្ជបញ្ជារបស់វេជ្ជបណ្ឌិត។ អាណាព្យាបាលរបស់ពួកគេតែងសុំយោបល់ពីឱសថការី ឬអ្នកលក់ថ្នាំ និងបានឱ្យកូនផឹកលើសពីការណែនាំ» អ្នកនាំពាក្យរបស់ ក្រសួងសុខាភិបាលអ៊ូសបេគីស្ថាន ឱ្យដឹងដូច្នេះ។

ក្រុមហ៊ុនឱសថ Marion Biotech, ក្រុមហ៊ុន Quramax Medical និង ក្រសួងសុខាភិបាលឥណ្ឌា មិនទាន់ឆ្លើយតបនឹងសំណើសុំបកស្រាយរបស់ទីភ្នាក់ងារសារព័ត៌មាន Reuters នៅឡើយ។ ប្រភពព័ត៌មានពី រដ្ឋាភិបាលឥណ្ឌា បានឱ្យដឹងថា ក្រសួងសុខាភិបាលឥណ្ឌា កំពុងពិនិត្យលើបញ្ហានេះ។

មុន អ៊ូសបេគីស្ថាន ប្រទេសហ្កំប៊ី ក៏មានករណីប្រហាក់ប្រហែលគ្នានេះដែរ។ ក្មេងចំនួន 70 នាក់របស់ ហ្កំប៊ី បានស្លាប់ ក្រោយពីផឹកថ្នាំស៊ីរ៉ូក្អក ដែលផលិតដោយក្រុមហ៊ុន Maiden Pharmaceuticals មានទីស្នាក់ការនៅ ប្រទេសឥណ្ឌា។ រដ្ឋាភិបាលឥណ្ឌា បានចេញបទបញ្ជាឱ្យឈប់ផលិតស៊ីរ៉ូក្អកនៅឯរោងចក្រ Maiden។

មុននោះ ប្រទេសឥណ្ឌូណេស៊ី ក៏បានរាយការណ៍ថា ក្មេងជិត 100 នាក់បានស្លាប់ព្រោះតែមានបញ្ហាតម្រងនោម ដែលជាប់ទាក់ទិននឹងថ្នាំស៊ីរ៉ូក្អកដែលផ្ទុក paracetamol នាំចូលពី ឥណ្ឌា។ ឥណ្ឌូណេស៊ី បានស្នើឱ្យផ្អាកការលក់ថ្នាំប្រភេទនេះរហូតដល់ការស្រាវជ្រាវបានបញ្ចប់។

ឥណ្ឌា ត្រូវបានចាត់ទុកថាជា «យីហោឱសថរបស់ពិភពលោក»។ យោងតាម Reuters ការនាំចេញឱសថរបស់ប្រទេសនេះបានកើនឡើងជាងទ្វេដងក្នុងទសវត្សរ៍កន្លង ដោយឡើងដល់ 24.5 ពាន់លានដុល្លារអាម៉េរិក៕

December 30, 2022

ស្ដេចបាល់ទាត់ Pele ទទួលមរណភាពហើយ!

(ប្រេស៊ីល)- និមិត្តរូបបាល់ទាត់របស់ ប្រេស៊ីល Pele ដែលជួយឱ្យប្រទេសនេះដណ្ដើមបានពានរង្វាន់ជើងឯក World Cup ចំនួន 3 លើក និងត្រូវបានចាត់ទុកថាជាកីឡាករអស្ចារ្យបំផុតគ្រប់សម័យកាល បានទទួលមរណភាពកាលពីថ្ងៃទី 29 ធ្នូ ក្នុងវ័យ 82 ឆ្នាំ។

Kely Nascimento កូនស្រីរបស់លោក Pele បានបញ្ជាក់នៅលើ Instagram ថា លោក Pele បានទទួលមរណភាពក្រោយពីការសម្រាកព្យាបាលមួយរយៈពេលនៅមន្ទីរពេទ្យ Albert Einstein ក្នុងទីក្រុង Sao Paulo ប្រទេសប្រេស៊ីល ដោយសារជំងឺមហារីកពោះវៀន ខ្សោយតម្រងនោម និងបេះដូង។

មន្ទីរពេទ្យ Albert Einstein ក៏បានឱ្យដឹងថា លោក Pele បានទទួលមរណភាពដោយសារ «ខ្សោយគ្រឿងក្នុង» ក្រោយការព្យាបាលជំងឺមហារីកមួយរយៈពេលយូរ។

កំពូលតារាបាល់ទាត់នាបច្ចុប្បន្ន ក្នុងនោះមានដូចជា Messi, Neymar, Kylian Mbappe ឬអតីតកីឡាករ Franz Beckenbauer និងប្រធានាធិបតីជាប់ឆ្នោតរបស់ ប្រេស៊ីល Luiz Inacio Lula da Silva ជាដើម សុទ្ធតែបានបង្ហោះសារចូលរួមរំលែកទុក្ខ នៅលើបណ្ដាញសង្គម។

លោក Pele កើតឆ្នាំ 1940 នៅក្នុងទីក្រុង Tres Coracoes ភាគអាគ្នេយ៍នៃប្រទេសប្រេស៊ីល និងត្រូវបានដាក់ឈ្មោះឱ្យថា Edson Arantes do Nascimento។ លោកធ្លាប់ជាអ្នកលក់សណ្ដែកដីតាមដងផ្លូវដើម្បីជួយសម្រាលទុក្ខរបស់គ្រួសារ។ លោកត្រូវបានគេដាក់រហ័សនាមថា Pele ដោយសារបញ្ចេញសំឡេងខុសពីពាក្យ Bile ដែលជាឈ្មោះរបស់អ្នកចាំទីនៅ Vasco de Sao Lourenco ជាទីដែលឪពុករបស់លោកធ្លាក់ប្រកួត។

លោក Pele មានភាពលេចធ្លោតាំងពីអាយុ 15 ឆ្នាំ នៅពេលគាត់បានទៅប្រកួតលក្ខណៈផ្លូវការជាមួយក្លឹប Santos។ លោក និងក្លឹបនេះដណ្ដើមបានពានរង្វាន់ជាច្រើន រួមទាំងពានរង្វាន់អន្តរទ្វីបកាលពីឆ្នាំ 196-1963។

លោក Pele បង្កើតបានឯតទគ្គកម្មគ្រប់សម័យកាល ដោយរកបាន 1,281 គ្រាប់ក្នុង 1,363 ប្រកួត ឱ្យក្លឹប Santos (1956-1974), ក្រុមជម្រើសជាតិប្រេស៊ីល និង New York Cosmos (1975-1977)។

https://www.youtube.com/watch?v=f_bOy28LdXc

លោក Pele បានឡើងដល់ចំណុចកំពូលនៃភាពអស្ចារ្យនៅ World Cup 1970 នៅ ម៉ិកស៊ិក ជាទីដែលលោករួមចំណែកនៅក្នុងក្រុមដែលមនុស្សជាច្រើនចាត់ទុកថាជាក្រុមអស្ចារ្យបំផុតគ្រប់សម័យកាល ដោយមានកំពូលថ្វីជើងជាច្រើនរូប មានដូចជា Rivellino, Tostao និង Jaizinho ជាដើម

លោក Pele ធ្លាប់កាន់តំណែងរដ្ឋមន្ត្រីក្រសួងកីឡា របស់ ប្រទេសប្រេស៊ីល ពីឆ្នាំ 1995 ដល់ 1998។ Pele ក៏ត្រូវបានគេមើលឃើញថា មានភាពស្និទ្ធស្នាលជាមួយនឹង រដ្ឋាភិបាលប្រេស៊ីល ផងដែរ។

កាលពីខែកញ្ញា 2021 លោក Pele ត្រូវវះកាត់ដុំសាច់ក្នុងពោះវៀន ហើយមកដល់ខែវិច្ឆិកា 2022 លោកបានចូលពេទ្យដើម្បីវាយតម្លៃឡើងវិញអំពីវិធីព្យាបាល ប៉ុន្តែស្ថានភាពកាន់តែអាក្រក់ទៅៗ។

បើទោះស្ថិតនៅលើគ្រែពេទ្យ ប៉ុន្តែលោក Pele តែងរក្សាស្មារតីជឿជាក់។ លោកបង្ហោះសារជាញឹកញាប់នៅលើបណ្ដាញសង្គម ក្នុងពេល World Cup 2022 កំពុងប្រព្រឹត្តទៅនៅ កាតា។ លោក Pele ក៏ធ្លាប់បង្ហោះសារជូនពរ ប្រធានក្រុម Messi ផងដែរ នៅពេល អាហ្សង់ទីន ដណ្ដើមបានពានរង្វាន់ជើងឯក៕

December 30, 2022

ផ្លូវជាតិលេខ 31 និងលេខ 33 នឹងបើកការដ្ឋានស្តារ និងលើកកម្រិតគុណភាពនៅថ្ងៃស្អែក

នៅថ្ងៃទី 30 ធ្នូ 2022 ស្អែកនេះ ផ្លូវជាតិលេខ 31 និងលេខ 33 នឹងត្រូវបានសម្ពោធបើកការដ្ឋានស្តារ និងលើកកម្រិតគុណភាព នេះបើតាម ក្រសួងសាធារណការ និងដឹកជញ្ជូន ឱ្យដឹងនៅរសៀលថ្ងៃទី 29 ធ្នូ។

យោងតាមក្រសួង គម្រោងស្តារ និងលើកកម្រិតគុណភាពផ្លូវជាតិលេខ 31 នេះ មានប្រវែងជាង 53 គីឡូម៉ែត្រ រាប់ពីផ្លូវបែកគុស (ចំណុចប្រសព្វផ្លូវជាតិលេខ 3) រហូតដល់ផ្សារកំពង់ត្រាច (ចំណុចប្រសព្វផ្លូវជាតិលេខ 33) ដោយឆ្លងកាត់តាម ខេត្តតាកែវ និងខេត្តកំពត។

ចំណែកផ្លូវជាតិលេខ 33 ដែលមានប្រវែងជាង 52 គីឡូម៉ែត្រ រាប់ចាប់ពីផ្លូវជាតិលេខ 3 ត្រង់គីឡូម៉ែត្រលេខ 148+100 ស្ថិតក្នុង ខេត្តកំពត រហូតដល់ច្រកលក (ព្រំដែនកម្ពុជា-វៀតណាម)។

ផ្លូវជាតិលេខ 31 និងផ្លូវជាតិលេខ 33 នេះ ជាផ្លូវដ៏មានសារសំខាន់សម្រាប់វិស័យដឹកជញ្ជូន ទេសចរណ៍ កសិកម្ម ក៏ដូចជាសេដ្ឋកិច្ចក្នុងស្រុក និងអន្តរជាតិ។

ពិធីសម្ពោធបើកការដ្ឋានស្តារ និងលើកកម្រិតគុណភាពនៅថ្ងៃស្អែកនឹងត្រូវបានធ្វើឡើង ក្រោមអធិបតីភាពដ៏ខ្ពង់ខ្ពស់របស់ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន៕

December 29, 2022

Author: សឿន សំណាង