សឿន សំណាង - La Reine Media

វៀតណាមកំពុងសង្គ្រោះក្មេងដែលធ្លាក់ចូលបំពង់សសរបេតុងក្រោមដីជម្រៅ 35 ម៉ែត្រ

(វៀតណាម) – ពេញមួយយប់ថ្ងៃទី 02 មករា និងវេលាទៀបភ្លឺថ្ងៃទី 03 មករា 2023 កម្លាំងសង្គ្រោះរបស់ វៀតណាម នៅតែញាប់ដៃញាប់ជើងក្នុងការជួយសង្គ្រោះក្មេងដែលបានធ្លាក់ចូលទៅក្នុងប្រហោងសសរបេតុងជម្រៅ 35 ម៉ែត្រ នៅខេត្ត Dong Thap ភាគខាងត្បូងប្រទេស។

កម្លាំងសង្គ្រោះដែលមានសមាជិកប្រហែល 350 នាក់ ចែកជាច្រើនក្រុម ធ្វើការទាំងថ្ងៃទាំងយប់ ក្នុងគោលដៅដកបំពង់សសរបេតុងដែលក្មេងម្នាក់បានធ្លាក់ចូលកាលពីថ្ងៃចុងក្រោយនៃឆ្នាំ 2022។

មកដល់ម៉ោងជិត 03 ទៀបភ្លឺ ថ្ងៃទី 03 មករា 2023 កម្លាំងសង្គ្រោះបានរៀបចំបំពង់ដែកធំសម្រាប់សកម្មភាពដកសសរបេតុងប្រហោងក្នុងចេញពីដី។

គិតចាប់តាំងពីមានហេតុការណ៍ក្មេងធ្លាក់ចូលក្នុងសសរបេតុងប្រហោងក្នុង មកដល់ម៉ោង 03 ទៀបភ្លឺថ្ងៃទី 03 មករានេះ គឺមានរយៈពេលជាង 60 ម៉ោងទៅហើយ ការជួយសង្គ្រោះមិនទាន់បានជោគជ័យនៅឡើយ។

សូមបញ្ជាក់ថា ហេតុការណ៍ធ្លាក់ក្មេងខាងលើនេះបានកើតឡើងកាលពីថ្ងៃទី 31 ធ្នូ 2022 នៅពេលជនរងគ្រោះ និងក្មេង 3 នាក់ផ្សេងទៀតបានចូលទៅក្នុងការដ្ឋានសាងសង់ស្ពានមួយកន្លែងនៅខេត្ត Dong Thap ភាគខាងត្បូងប្រទេសវៀតណាម ដើម្បីរើសអេតចាយ។ ពេលកំពុងដើរក្នុងការដ្ឋាន ក្មេងម្នាក់ក៏បានធ្លាក់ចូលទៅក្នុងបំពង់សសរបេតុងមានមុខកាត់ 25 សម ដែលបានដាំក្នុងដីជម្រៅប្រហែល 35 ម៉ែត្រ ធ្វើឱ្យមានការភ្ញាក់ផ្អើលពេញផ្ទៃប្រទេសនេះ។

កាលពីថ្ងៃទី 19 ធ្នូ 2022 ប្រទេសវៀតណាម ក៏មានករណីស្រដៀងគ្នានេះកើតឡើងម្ដងរួចហើយ ដែលហេតុការណ៍នោះបានកើតឡើងលើក្មេងស្រីអាយុ 5 ឆ្នាំម្នាក់។ ជនរងគ្រោះបានធ្លាក់ចូលទៅក្នុងរន្ធតូចមួយក្នុងការដ្ឋានសំណង់ និងជាប់ក្នុងរយៈពេលរាប់សិបនាទី មុនពេលត្រូវបានក្រុមសង្គ្រោះទាញឡើងមកបាន៕

សសរបេតុងប្រហោងក្នុងជាប្រភេទសសរដែលជនរងគ្រោះបានធ្លាក់ចូល

January 3, 2023

Cristiano Ronaldo មិនទាន់បានលេងនៅ AFC Champions League

(អារ៉ាប៊ីសាអូឌីត)- កីឡាករព័រទុយហ្គាល់ Cristiano Ronaldo មិនទាន់បានលេងនៅ AFC Champions League រដូវកាល 2022-2023 ដោយសារតែក្លឹប Al Nassr មិនមានសិទ្ធិចូលរួម។

Ronaldo បានចុះកិច្ចសន្យាជាមួយក្លឹប Al Nassr កាលពីថ្ងៃទី 30 ធ្នូ 2022។ កីឡាកររូបនេះនឹងរួមជាមួយក្លឹបថ្មី លេងនៅពានរង្វាន់ក្នុងស្រុកចំនួន 2 គឺ Saudi Pro League និង King Cup។ ក្លឹប Al Nassr មិនទាន់មានសិទ្ធិលេងនៅ AFC Champions League (AFC Champions League គឺជាពានរង្វាន់បាល់ទាត់ប្រចាំទ្វីបអាស៊ី ដែលរៀបចំឡើងដោយសហព័ន្ធកីឡាបាល់ទាត់អាស៊ី និងប្រកួតប្រជែងដោយក្លឹបបាល់ទាត់លំដាប់កំពូលរបស់ទ្វីបនេះ) ដោយសារតែជាប់ចំណាត់ថ្នាក់ទី 3 នៅ Saudi Pro League និងហាលអាវត្រឹមវគ្គ 4 គូ នៅ King Cup រដូវកាលមុន។

មុននោះ Ronaldo ក៏បានបរាជ័យក្នុងការស្វែងរកក្លឹបដែលមានសំបុត្រចូលរួមប្រកួតនៅ UEFA Champions League។ ក្នុងរដូវទិញដូរកីឡាករឆ្នាំ 2022 ក្លឹបនានាដែល CR7 បានទាក់ទង សុទ្ធតែបដិសេធការចុះកិច្ចសន្យា ក្នុងនោះមានទាំង Real Madrid, Chelsea, Bayern, Napoli, Marseille និង Frankfurt ផងដែរ។

ដើម្បីបានលេងនៅ AFC Champions League 2023-2024 Ronaldo ត្រូវតែជួយក្លឹប Al Nassr ដណ្ដើមបានពាននៅ Saudi Pro League ឬ King Cup។ អារ៉ាប៊ីសាអូឌិត មានសិទ្ធិបញ្ជូន 3 ក្រុមទៅចូលរួម AFC Champions League។ បញ្ជីឈ្មោះក្លឹបដែលនឹងទៅចូលរួមប្រកួតនៅ AFC Champions League រដូវកាលខាងមុខរួមមាន ជើងឯក Saudi Pro League 2022-2023, ជើងឯក King Cup 2022-2023 និង Al Hilal ដែលជាជើងឯក Saudi Pro League 2021-2022។

Ronaldo បានចុះកិច្ចសន្យាជាមួយក្លឹប Al Nassr កាលពីថ្ងៃទី 30 ធ្នូ 2022

Al Nassr កំពុងនាំមុខនៅ Saudi Pro League 2022-2023។ ក្រោយ 11 ប្រកួត ក្លឹបថ្មីរបស់ Ronaldo មាន 26 ពិន្ទុ ច្រើនជាង Al Shabab 1 ពិន្ទុ និង Al Ittihad 2 ពិន្ទុ ប៉ុន្តែ Al Nassr លេងច្រើនជាងក្លឹបទាំងពីរនេះ 1 ប្រកួត។

យោងតាមកិច្ចសន្យា CR7 នឹងទទួលបានប្រាក់បៀវត្សរ៍ 75 លានដុល្លារអាម៉េរិក។ ខ្សែប្រយុទ្ធវ័យ 37 ឆ្នាំនេះក៏អាចរកបានប្រាក់បន្ថែមរហូតដល់ 200 លានដុល្លារ តាមរយៈការផ្សាយឃោសនា និងសកម្មភាពពាណិជ្ជកម្ម។

Cristiano Ronaldo ចូលមកកាន់ក្លឹប Al Nassr របស់ អារ៉ាប៊ីសាអូឌីត ទៅតាមទម្រង់សេរី បន្ទាប់ពីគាត់ និង ក្លឹប Man Utd យល់ព្រមបញ្ចប់កិច្ចសន្យាចាស់៕

January 2, 2023

គម្រោងសង់ស្ពានឆ្លងទន្លេមេគង្គខេត្តក្រចេះ នឹងចំណាយពេល 3 ឆ្នាំកន្លះក្នុងការស្ថាបនា

ការដ្ឋានសាងសង់ស្ពានឆ្លងទន្លេមេគង្គនិង ផ្លូវតភ្ជាប់ក្នុងខេត្តក្រចេះ ដែលមានតម្លៃជាង 111 លានដុល្លារអាម៉េរិក ត្រូវបាន រាជរដ្ឋាភិបាលកម្ពុជា សម្ពោធបើករួចហើយ នាព្រឹកមិញនេះ។

ពិធីសម្ពោធគម្រោងសាងសង់ស្ពានឆ្លងទន្លេមេគង្គ និងផ្លូវតភ្ជាប់ដែលមានប្រវែងសរុបជាង 33 គីឡូម៉ែត្រនេះ ត្រូវបានធ្វើឡើងក្រោមអធិបតីភាពរបស់សម្តេចតេជោ ហ៊ុន សែន។

គម្រោងស្ពានឆ្លងទន្លេមេគង្គមានប្រវែង 1,761 ម៉ែត្រ និងទទឹង 13.5 ម៉ែត្រ។ ត្រើយខាងកើតរបស់ស្ពាននេះស្ថិតត្រង់ ភូមិបុស្សលាវលើ ឃុំបុសលាវ ស្រុកចិត្របុរី និងត្រើយខាងលិចត្រង់ ភូមិព្រែកព្រលូង ឃុំសោប ស្រុកព្រែកប្រសព្វ ខេត្តក្រចេះ។ រីឯផ្លូវតភ្ជាប់នឹងស្ពាននេះមានប្រវែងជាង 15 គីឡូម៉ែត្រ និងផ្លូវក្នុងក្រុងក្រចេះមានប្រវែងជាង 16 គីឡូម៉ែត្រ។

យោងតាម ក្រសួងសាធារណការ និងដឹកជញ្ជូន គម្រោងសាងសង់ស្ពាន និងផ្លូវតភ្ជាប់នេះ ចំណាយថវិកាសរុប 111.98 លានដុល្លារអាមេរិក ដែលជាហិរញ្ញប្បទានពី សាធារណរដ្ឋប្រជាមានិតចិន។ គម្រោងដែលនឹងចំណាយពេលសាងសង់ 42 ខែនេះ អនុវត្តដោយក្រុមហ៊ុនសំណង់សៀងហៃ (SCG)។

January 2, 2023

AFF Cup 2022 – គ្រូបង្វឹករបស់ថៃ ៖ «មិនអាចធ្វេសប្រហែសបាននឹងក្រុមកម្ពុជា»

គ្រូបង្វឹក Mano Polking មិនចង់ឃើញកីឡាករក្រុមជម្រើសជាតិរបស់ ថៃ ភ្លេចខ្លួនព្រោះតែត្រូវបានវាយតម្លៃខ្ពស់ជាងក្រុមរបស់ កម្ពុជា នៅពេលប៉ះគ្នាក្នុងជុំចុងក្រោយនៃពូល A នៅ AFF Cup 2022 នាព្រលប់នេះ។

ក្រុមជម្រើសជាតិថៃ បច្ចុប្បន្ន នាំមុខគេនៅ ពូល A ដោយមាន 7 ពិន្ទុ ក្រោយទាត់បាន 3 ប្រកួត ស្មើនឹង ឥណ្ឌូណេស៊ី ប៉ុន្តែត្រូវនៅពីលើ ដោយសារគ្រាប់បាល់ចំណេញ (goal difference) របស់ ថៃ +9 ចំណែក ឥណ្ឌូណេស៊ី +8។ នៅជុំចុងក្រោយដែលត្រូវប្រកួតនៅម៉ោង 19 និង 30 នាទីថ្ងៃនេះ កម្ពុជា ដែលជាក្រុមនៅ មានឱកាសឡើងទៅវគ្គពាក់កណ្ដាលផ្ដាច់ព្រ័ត្រ ដោយឈរលំដាប់ទី 3 និងមាន 6 ពិន្ទុ នឹងត្រូវធ្វើជាភ្ញៀវនៅទីលានរបស់ថៃ។

«គ្រប់គ្នាគិតថា យើងនឹងយកឈ្នះលើ កម្ពុជា ប៉ុន្តែ ថៃ មិនត្រូវធ្វេសប្រហែសឡើយ។ កម្ពុជា កំពុងលេងបានល្អពីមួយថ្ងៃទៅមួយថ្ងៃ ក្រោមការដឹកនាំរបស់ Keisuke Honda» គ្រូបង្វឹករបស់ ថៃ Polking ថ្លែងដូច្នេះ។

លោក Polking បន្តថា ក្រុមកីឡាករថៃ មានប្រៀបដោយសារជាម្ចាស់ផ្ទះ ហើយកីឡាករមានភាពជឿជាក់ និងត្រៀមយកឈ្នះលើ កម្ពុជា។

គ្រូបង្វឹក Mano Polking របស់ក្រុមកីឡាករបាល់ទាត់ជម្រើសជាតិថៃ

នៅក្នុងម៉ោងដូចគ្នានេះដែរ ឥណ្ឌូណេស៊ី នឹងធ្វើជាភ្ញៀវរបស់ ហ្វ៊ីលីពីន។ ក្រុមដែលដណ្ដើមបានតំណែងកំពូលតារាងទំនងជានឹងអាចគេចបានពីការប្រកួតនឹង វៀតណាម នៅវគ្គពាក់កណ្ដាលផ្ដាច់ព្រ័ត្រ៕

January 2, 2023

ក្រុមហ៊ុន NanoFlowcell ផលិតរថយន្តអគ្គិសនី «មិនត្រូវការថ្មផ្ទុកថាមពល»

7 ឆ្នាំកន្លងផុតទៅ រាប់ចាប់ពីក្រុមហ៊ុន NanoFlowcell ប្រកាសពីរថយន្តមិនត្រូវការថ្មផ្ទុកថាមពល QUANTiNO ពេលនេះ ម៉ូដែលរថយន្តនេះបានត្រៀមរួចរាល់ហើយសម្រាប់ការផលិត។

ដំបូងឡើយ រថយន្តអគ្គិសនីមិនត្រូវការថ្ម ឬអាគុយ QUANTiNO ត្រូវបានបង្ហាញក្នុងទម្រង់គំរូ (concept) នៅក្នុងពិព័រណ៍រថយន្ត Geneva 2015។ បច្ចុប្បន្ន ក្រុមហ៊ុន NanoFlowcell កំពុងពង្រីកសកម្មភាពទៅកាន់ សហរដ្ឋអាម៉េរិក ដោយសារតែគោលនយោបាយលើកស្ទួយយានយន្តអគ្គិសនីរបស់ រដ្ឋាភិបាលប្រទេសនេះ។

រថយន្តអគ្គិសនីរបស់ក្រុមហ៊ុននេះប្រើប្រាស់យន្តការមួយដែលហៅថា bi-ION ដោយដំណើរការនេះបង្កើតអគ្គិសនីតាមរយៈអន្តរកម្មរបស់ អេឡិចត្រូលីត (electrolyte) ដែលជាបន្ទុកអគ្គិសនីវិជ្ជមាន និងសារធាតុ anolyte ដែលជាបន្ទុកអគ្គិសនីអវិជ្ជមាននៅក្នុងស្រទាប់ចម្រាញ់ជ្រើសរើសអ៊ីយ៉ុង។

ក្នុងប្រកាសមួយនាពេលថ្មីៗនេះ ក្រុមហ៊ុន NanoFlowcell ដែលមានទីស្នាក់ការកណ្ដាលនៅ ក្រុងឡុងដ៍ បានឱ្យដឹងនូវគោលបំណងផលិតរថយន្តអគ្គិសនី QUANT E និងសាងសង់រោងចក្រផលិតសារធាតុគីមី និងឧបករណ៍ bi-ION ក្នុងទ្រង់ទ្រាយធំដើម្បីផ្គត់ផ្គង់គីមី bi-ION សម្រាប់ឧបករណ៍ដទៃទៀតរបស់ខ្លួន។ ប្រកាសនេះត្រូវបានលើកឡើងអមជាមួយនឹងគម្រោងវាយលុកទីផ្សារអាម៉េរិកផងដែរ។

ក្រុមហ៊ុន NanoFlowcell បានបង្ហើបឱ្យដឹងអំពីកំណែពិសេសរបស់រថយន្តអគ្គិសនីមិនប្រើប្រាស់ថ្ម QUANTiNO ដែលមានឈ្មោះថា 25។ រថយន្តនេះមានដំបូលដែលអាចដោះចេញបាន និងប្រើប្រាស់ម៉ូទ័រអគ្គិសនី កម្លាំង 320 សេះ។

យោងតាមក្រុមហ៊ុនខាងលើ ធាតុរាវអេឡិចត្រូលីត bi-ION 1 ធុង 250 លីត្រ របស់រថយន្តនេះអាចបើកបរបាន 2,000 គីឡូម៉ែត្រ។ ដើម្បីចាក់ឥន្ធនៈនេះ គេត្រូវការហេដ្ឋារចនាសម្ព័ន្ធដែលប្រើប្រាស់ដំណោះស្រាយ bi-ION របស់ក្រុមហ៊ុន NanoFlowcell។

ធាតុរាវអេឡិចត្រូលីត bi-ION 12.5 លីត្រ អាចឱ្យរថយន្តរបស់ NanoFlowcell បរបាន 100 គីឡូម៉ែត្រ។ ថ្វីបើមិនប្រៀបស្មើនឹងរថយន្តប្រើប្រេងសាំង ប៉ុន្តែ យើងត្រូវដឹងថា ធាតុរាវអេឡិចត្រូលីតមិនបង្កគ្រោះថ្នាក់ មិនងាយឆេះ និងមិនបំភាយឧស្ម័នផ្ទះកញ្ចក់ ដែលជាឧស្ម័នធ្វើឱ្យផែនដីឡើងកម្ដៅ៕

January 2, 2023

ប្រទេសចិន ដាក់ដំណើរការស្ថានីយផលិតអគ្គិសនីដើរដោយថាមពលខ្យល់លើសមុទ្រកម្លាំង 1.743 kWh

គម្រោងស្ថានីយផលិតអគ្គិសនីដើរដោយកម្លាំងខ្យល់សមុទ្រ Shenquan ដំណាក់កាលទីពីរដែលទួរប៊ីនទោលមានកម្លាំងខ្លាំងបំផុតនៅ ប្រទេសចិន ត្រូវបានតភ្ជាប់នឹងបណ្ដាញអគ្គិសនីពេញលេញរួចហើយ។

អគ្គិសនីបានមកពីស្ថានីខាងលើដែលផ្ដោតទៅលើគោលដៅពាណិជ្ជកម្មត្រូវបានតភ្ជាប់ជាមួយនឹងបណ្ដាញអគ្គិសនីនៅ ក្វាងទុង កាលពីចុងខែកន្លង។ យោងតាមក្រុមហ៊ុនវិនិយោគអគ្គិសនីរដ្ឋចិន (SPIC) អគ្គិសនីដែលត្រូវបានបង្កើតឡើងដោយទួរប៊ីនខ្យល់ចំនួន 34 គ្រឿងនៅលើសមុទ្ររបស់ទីក្រុង Jieyang ត្រូវបានភ្ជាប់ទៅនឹងបណ្ដាញអគ្គិសនីតាមរយៈខ្សែភ្លើងក្រោមសមុទ្រ។

គម្រោងស្ថានីយផលិតអគ្គិសនីដើរដោយកម្លាំងខ្យល់សមុទ្រ Shenquan ដំណាក់កាលទីពីរមានកម្លាំងសរុប 502,000 kW។

ប្រធានក្រុមហ៊ុនអគ្គិសនីដើរដោយថាមពលខ្យល់ Qiangzhan របស់ SPIC លោក Liu Ming បានឱ្យដឹងថា នៅពេលវិស័យផលិតអគ្គិសនីដើរដោយកម្លាំងខ្យល់លើសមុទ្របន្តរីកច្រើននៅ ប្រទេសចិន តម្រូវការថ្មីចំពោះការសាងសង់ស្ថានីយផលិតអគ្គិសនីលើផ្ទៃសមុទ្រកម្លាំងខ្លាំង និងប្រសិទ្ធភាពខ្ពស់ក៏បានកើនឡើង។

លោក Liu Ming បន្ថែមថា ស្ថានីយផលិតអគ្គិសនីដើរដោយកម្លាំងខ្យល់នៅសមុទ្រ Shenquan ដំណាក់កាលទីពីរអាចផ្គត់ផ្គង់ថាមពលស្អាតជិត 1,743 ពាន់លាន kWh ជារៀងរាល់ឆ្នាំ ជួយសំច័យធ្យូងថ្មប្រភេទស្ដង់ដា បានជិត 530,000 តោន និងកាត់បន្ថយឧស្ម័នកាបូនឌីអុកស៊ីតបានប្រហែល 1.4 លានតោន។

ទួរប៊ីនខ្យល់ 11 MW ដែលត្រូវបានប្រើប្រាស់ក្នុងគម្រោងនេះគឺជាប្រភេទកម្លាំងខ្លាំងបំផុតដែលបម្រើដល់គោលដៅពាណិជ្ជកម្មនៅ ប្រទេសចិន។

ដោយស្លាបកង្ហារមានអង្កត់ផ្ចិតប្រវែង 208 ម៉ែត្រ ទំហំផ្ទៃបរិយាកាសដែលទួរប៊ីនខ្យល់នេះវិលគឺស្មើនឹងទីលានបាល់ទាត់ស្ដង់ដាចំនួន 4.7 ទីលាន។ ទួរប៊ីននីមួយៗ អាចផ្ដល់អគ្គិសនីស្អាតបានប្រហែល 38.2 លាន kWh ជារៀងរាល់ឆ្នាំ ស្មើនឹងការប្រើប្រាស់អគ្គិសនីប្រចាំឆ្នាំរបស់គ្រួសារចំនួន 20,000 គ្រួ៕

January 2, 2023

ក្រោយពី Cristiano Ronaldo ចាកចេញ តើបណ្ដាក្លឹបមានស្ថានភាពបែបណាខ្លះ?

Real ជួបបញ្ហានៅឯខ្សែប្រយុទ្ធ ខណៈ Juventus យល់ថា ការប្រកួតមានសាមគ្គីភាពជាងមុន ចំណែក Man Utd មិនអាចការពារតំណែងជើងឯក លីគកំពូលអង់គ្លេស (English Premier League) បន្ទាប់ពីខ្សែប្រយុទ្ធ Cristiano Ronaldo បានចាកចេញ។

ក្លឹប Sporting Lisbon

Cristiano Ronaldo មានភាពលេចធ្លោនៅពេលបង្ហាញខ្លួននៅក្លឹបក្នុងស្រុក Sporting នារដូវកាល 2002-2003។ គាត់រកបាន 5 គ្រាប់ ក្នុង 31 ប្រកួតនៅក្នុងរដូវកាលអាជីពដំបូង ធ្វើឱ្យមានការចាប់អារម្មណ៍ពីបណ្ដាក្លឹប រួមមានជាអាទិ៍ Liverpool, Arsenal, Barca និងក្លឹបជាច្រើនផ្សេងទៀត។ ក្រោយការចាកចេញរបស់ Ronaldo ក្លឹប Sporting ក៏អន់ថយជាបន្តបន្ទាប់។

ក្លឹប Man Utd

Ronaldo បានក្លាយជាកីឡាករជនជាតិព័រទុយហ្គាល់ ដំបូងគេរបស់ក្លឹប Man Utd ពេលបង្ហាញខ្លួនលើទីលាន Old Trafford កាលពីរដូវក្ដៅ 2003។ គាត់ក៏ជាកីឡាករវ័យក្មេងមានតម្លៃខ្លួនខ្ពស់ជាងគេបំផុតក្នុងប្រវត្តិសាស្ត្របាល់ទាត់របស់ អង់គ្លេស នាពេលនោះ។

បន្ទាប់មក Ronaldo ក៏បានក្លាយជាផ្នែកមួយដែលមិនអាចខ្វះបាននៅក្នុងដំណើរការនាំ Man Utd ឱ្យក្លាយជាមហាអំណាចគ្រប់គ្រងលិគកំពូលអង់គ្លេស ក៏ដូចជាការប្រកួតប្រជែងនៅ Champions League។ Ronaldo ទទួលបានគ្រាប់បាល់មាសជាលើកដំបូង នៅពេលគាត់ជួយឱ្យ Man Utd ដណ្ដើមបានពាន់រង្វាន់ជើងឯក English Premier League និង Champions League អំឡុងឆ្នាំ 2007-2008។

ជាសរុប Ronaldo រកគ្រាប់បាល់បាន 118 គ្រាប់ ក្នុង 292 ប្រកួត ពេលទាត់ឱ្យ Man Utd ជាលើកដំបូង ដោយបានជួយឱ្យក្លឹបនេះដណ្ដើមបានពាន់រង្វាន់ជើងឯក English Premier League 3 លើក, Cup FA 1 លើក, EFL Cup 2 លើក, FA Community Shield 2 លើក, Champions League 1 លើក និង FIFA Club World Cup 1 លើក។

ក៏ប៉ុន្តែ ចុងក្រោយ ដោយមានការយល់ព្រមពី Alex Ferguson (អតីតប្រធានសមាគមបាល់ទាត់ស្កុតឡែន) Ronaldo ក៏បានចាកចេញដោយមានការដោះដូរក្នុងតម្លៃជិត 100 លានដុល្លារអាម៉េរិក។ ករណីលក់ Ronaldo ឱ្យ Real Madrid កាលពីឆ្នាំ 2009 បានធ្វើឱ្យក្លឹប Man Utd បរាជ័យនៅរដូវកាល 2009-2010 ដោយត្រូវបាត់បង់តំណែងជើងឯកលិគកំពូលអង់គ្លេស ទៅលើដៃ Chelsea ហើយក៏អន់ថយបន្តបន្ទាប់ តែមិនបានអូសបន្លាយពេលយូរ។

ឆ្នាំ 2021 Ronaldo ក៏បានត្រលប់មកកាន់ Man Utd ទៅតាមកិច្ចសន្យា 2 ឆ្នាំ ក្រោយការលេងឱ្យ Juventus បាន 4 ឆ្នាំ។ ប៉ុន្តែ លើកនេះ Ronaldo នៅបានតែ 1 ឆ្នាំកន្លះ និងរកបាន 27 គ្រាប់ ក្នុង 54 ប្រកួត ហើយមិនដណ្ដើមបានតំណែងជើងឯកណាមួយ។ Ronaldo បានចាកចេញពី Man Utd ព្រោះតែកិច្ចសម្ភាសដែលបានបង្កភាពចម្រូងចម្រាសនៅលើ Piers Morgan Uncensored។

ក្លឹប Real Madrid

ក្នុង 9 រដូវកាលដែលបានប្រកួតនៅ Bernabeu កីឡាករ Ronaldo បានក្លាយជាអ្នករកគ្រាប់បាល់បានច្រើនជាងគេក្នុងប្រវត្តិសាស្ត្ររបស់ក្លឹប ដោយរកបាន 450 គ្រាប់ ក្នុង 438 ប្រកួត ស្មើនឹងជាង 1 គ្រាប់ក្នុង 1 ប្រកួត។ Ronaldo ដណ្ដើមបានពាន់រង្វាន់ចំនួន 15 នៅ Champions League, La Liga, Copa del Rey, Spanish Super Cup, UEFA Super Cup និងនៅ FIFA Club World Cup។

វត្តមានរបស់ Ronaldo បានជួយស្ដារមុខមាត់របស់ Real Madrid នៅ អឺរ៉ុប ក្នុងអំឡុងពេលដែលកីឡាករនេះដណ្ដើមបានគ្រាប់បាល់មាសចំនួន 4 បន្ថែមទៀត ត្រឹមឆ្នាំ 2018។ Real Madrid សម្រេចចិត្តលក់ Ronaldo ឱ្យ Juventus ក៏ព្រោះតែបញ្ហាហិរញ្ញវត្ថុ។

ក្រោយការចាកចេញរបស់ Ronaldo ក្លឹប Real Madrid ដាំក្បាលចុះជាបន្តបន្ទាប់។ ក៏ប៉ុន្តែ ឆ្លងកាត់មួយរយៈពេលយូរ Real ក៏ងើបឡើងជាបន្តបន្ទាប់។

ក្លឹប Juventus

Ronaldo បញ្ចប់ការទាត់ 9 ឆ្នាំឱ្យ Real ដើម្បីចូលរួមជាមួយ Juventus ក្នុងតម្លៃខ្លួន 120 លានដុល្លារកាលពីឆ្នាំ 2018។ ក្នុង 3 ឆ្នាំ Ronaldo រកបាន 101 គ្រាប់ក្នុង 133 ប្រកួត ជួយឱ្យក្លឹបនេះដណ្ដើមបានពាន់រង្វាន់ 1 នៅ Cup Italy។ ប៉ុន្តែ Ronaldo មិនអាចជួយឱ្យ Juventus ដណ្ដើមបានពាននៅ Champions League។

ក្រោយការចាកចេញរបស់ Ronaldo ក្លឹប Juventus ចេះតែដាំក្បាលចុះ។ ក៏ប៉ុន្តែ ការចាកចេញរបស់ Ronaldo ក៏បានជួយស្ដារសាមគ្គីភាពនៅក្នុងបន្ទប់ផ្លាស់សម្លៀកបំពាក់របស់ក្លឹបនេះ។ គ្រូបង្វឹក Max Allegri ធ្លាប់និយាយបញ្ឆិតបញ្ឆៀងថា Juventus ប្រកួតមានលក្ខណៈដូចក្រុមកីឡាករបាល់ទាត់ពេញលេញ ដោយសារតែលែងផ្ដល់អាទិភាពឱ្យកីឡាករពិសេស៕

January 2, 2023

អ៊ីឡុន ម៉ាស ក្លាយជាមនុស្សដំបូងគេលើលោកដែលបាត់បង់ប្រាក់ 200 ពាន់លានដុល្លារ

មហាសេដ្ឋី អ៊ីឡុន ម៉ាស (Elon Musk) ឈានចូលឆ្នាំថ្មីជាមួយនឹងទ្រព្យ 137 ពាន់លានដុល្លារអាម៉េរិក ថយចុះជាង 200 ពាន់លានដុល្លារ ធៀបនឹងមួយឆ្នាំមុននោះ។

យោងតាមទីភ្នាក់ងារសារព័ត៌មាន Bloomberg ដែលបានផ្សាយកាលពីថ្ងៃទី 31 ធ្នូ 2022 មហាសេដ្ឋី អ៊ីឡុន ម៉ាស មានទ្រព្យតម្លៃ 137 ពាន់លានដុល្លារ ថយចុះ 203 ពាន់លានដុល្លារ បើធៀបនឹង 340 ពាន់លានដុល្លារកាលពីខែវិច្ឆិកា 2021។ ប្រការនេះធ្វើឱ្យលោកក្លាយជាមនុស្សដំបូងគេលើពិភពលោកដែលបាត់បង់ទ្រព្យជាង 200 ពាន់លានដុល្លារ។

លោក ម៉ាស កាលពីខែមករា 2021 បានក្លាយជាមនុស្សទីពីរលើពិភពលោកដែលមានទ្រព្យជាង 200 ពាន់លានដុល្លារ បន្ទាប់ពីម្ចាស់ Amazon លោក ជេហ្វបេហ្សូស (Jeff Bezos) ឡើងដល់ចំណុចនេះបានមួយខែ។ លោក ម៉ាស បានឈរលើកំពូលតារាងចំណាត់ថ្នាក់ស្ដីពីអ្នកមានជាងគេលើពិភពលោក ស្ទើរពេញមួយឆ្នាំ 2022 ប៉ុន្តែ បានធ្លាក់មកនៅលំដាប់ទីពីរកាលពីខែធ្នូ 2022។

ទ្រព្យសម្បត្តិភាគច្រើនរបស់លោក ម៉ាស គឺបានមកពីភាគហ៊ុនរបស់ក្រុមហ៊ុនផលិតរថយន្តអគ្គិសនី Tesla ជាក្រុមហ៊ុនដែលមានតម្លៃមូលធនទីផ្សារឡើងដល់ជាង 1 ទ្រីលានដុល្លារ កាលពីខែវិច្ឆិកា 2021 ស្មើមុខមាត់ជាមួយនឹងបណ្ដាក្រុមហ៊ុនបច្ចេកវិទ្យាធំៗលើពិភពលោក មានដូចជា Apple, Microsoft, Amazon និង Google ជាដើម។

ក៏ប៉ុន្តែ ភាគហ៊ុន Tesla បានបាត់បង់តម្លៃជិត 70% ក្នុងឆ្នាំ 2022 ដោយសារតែមូលហេតុដែលត្រូវបានគេគិតថា ជាប់ទាក់ទិននឹងករណីទិញបណ្ដាញសង្គម Twitter នាំឱ្យមហាសេដ្ឋីអាម៉េរិករូបនេះបាត់បង់ទ្រព្យអស់ជាង 100 លានដុល្លារ។

ការណ៍ដែលភាគហ៊ុន Tesla ចុះថោក និងការលក់ភាគហ៊ុនដើម្បីយកប្រាក់ទៅទិញ Twitter បានធ្វើឱ្យ Tesla លែងនៅជាក្រុមហ៊ុនធំជាងគេរបស់លោក ម៉ាស។ លោក ម៉ាស កំពុងកាន់កាប់ភាគហ៊ុន 42.2% របស់ក្រុមហ៊ុនផលិតរ៉ុក្កែត SpaceX ដែលស្មើនឹង 44.8 ពាន់លានដុល្លារ ខណៈនៅ Tesla លោក ម៉ាស កាន់កាប់ 44 ពាន់លានដុល្លារ។

មហាសេដ្ឋីអាម៉េរិកដើមកំណើតអាហ្វ្រិកខាងត្បូង បានច្រានចោលការព្រួយបារម្ភនានាអំពី Tesla និងបានរិះគន់ចំពោះ ធនាគារកណ្ដាលអាម៉េរិក ដែលបានដំឡើងការប្រាក់ជាបន្តបន្ទាប់។ «Tesla កំពុងដំណើរការល្អជាងពេលណាៗទាំងអស់។ យើងមិនគ្រប់គ្រង ធនាគារកណ្ដាលអាម៉េរិក នោះទើបជាបញ្ហាពិតប្រាកដ» លោក អ៊ីឡុន ម៉ាស សរសេរលើ Twitter កាលពីពាក់កណ្ដាលខែធ្នូ 2022 ដូច្នេះ៕

January 2, 2023

ភាពយន្ត «Avatar 2» រកចំណូលបានជាង 1,000 លានដុល្លារអាម៉េរិក

ប្រាក់ចំណូលបានមកពីកំពូលខ្សែភាពយន្តរឿង «Avatar: The Way of Water» បានឡើងដល់ 1.03 ពាន់លានដុល្លារអាម៉េរិក ក្រោយការបញ្ចាំងបាន 14 ថ្ងៃ។

យោងតាម Deadline គិតត្រឹមដំណាច់ថ្ងៃទី 27 ធ្នូ 2022 «Avatar 2» ឬ «Avatar: The Way of Water» រកប្រាក់ចំណូលពីទីផ្សារក្នុងស្រុកបាន 317.1 លានដុល្លារ និងពីទីផ្សារបរទេសបាន 712.7 លានដុល្លារ។

បណ្ដាប្រទេសដែលខ្សែភាពយន្តនេះរកចំណូលបានច្រើនជាងគេរួមមាន ប្រទេសចិន (108.7 លានដុល្លារ), បារាំង (68 លានដុល្លារ), កូរ៉េខាងត្បូង (58.2 លានដុល្លារ), អាល្លឺម៉ង់ (47 លានដុល្លារ), ឥណ្ឌា (40.50 លានដុល្លារ)។

មុននោះ ប្រាក់ចំណូលរបស់ «Avatar វគ្គ 1» (2009) រកចំណូលបានខ្ទង់ពាន់លានដុល្លារ ក្រោយការបញ្ចាំងបាន 19 ថ្ងៃ។

«Avatar: The Way of Water» គឺជាខ្សែភាពយន្តទីបួនដែលរកចំណូលបានខ្ទង់ពាន់លានដុល្លារក្រោយសម័យកូវីដ-19។ មុននោះ Spider-man: No Way Home (1.908 ពាន់លានដុល្លារ), Top Gun: Maverick (1.489 ពាន់លានដុល្លារ) និង Jurassic World: Dominion (1.001 ពាន់លានដុល្លារ) គឺជាខ្សែភាពយន្តដែលរកបានចំណូលខ្ទង់ពាន់លានដុល្លារ។

ក្នុងប្រវត្តិសាស្ត្ររបស់វិស័យភាពយន្ត មានតែខ្សែភាពយន្តចំនួន 6 ប៉ុណ្ណោះដែលរកចំណូលបានខ្ទង់ពាន់លានដុល្លារក្រោយការបញ្ចាំងរយៈពេល 2 សប្ដាហ៍ដំបូងនៅរោងកុន៕

December 30, 2022

អ្នកវិទ្យាសាស្ត្ររកឃើញ «សត្វល្អិតដែលចូលចិត្តចាប់វីរុសជាអាហារ»

ក្រុមអ្នកវិទ្យាសាស្ត្របានរកឃើញជាលើកដំបូងនូវសត្វល្អិត ហាល់តេរី (Halteria) មួយប្រភេទដែលយកវីរុសមកធ្វើជាចំណី។

ដោយសារតែវីរុសមានមុខនៅគ្រប់ទីកន្លែង ដូច្នេះសត្វនានាតែងលេបដោយពួកវា។ ប៉ុន្តែ អ្នកស្រាវជ្រាវ John DeLong នៅសាកលវិទ្យាល័យ Nebraska-Lincoln មានបំណងស្វែងយល់ថា តើមានសត្វល្អិតណាមួយដែលស៊ីវីរុសជាអាហារដែរ ឬទេ ហើយថា តើរបបអាហារនេះជួយដល់ការរីកលូតលាស់របស់ពួកវា ឬអត់។

«វីរុសកកើតឡើងពីអាស៊ីតនុយក្លេអ៊ីក ដោយមានអាសូត និងផូស្វ័រ» DeLong ឱ្យដឹងដូច្នេះ។ «ប្រាកដណាស់ថា មានសត្វល្អិតប្រភេទណាមួយនោះ ចេះស៊ីវីរុសរស់»។

ដើម្បីជួយដល់ទ្រីស្តីនេះ DeLong និងសហការី បានយកទឹកពីបឹង រួចបំបែកសត្វល្អិត បាក់តេរី ចេញទៅតាមប្រភេទ ហើយដាក់វីរុសក្លរ៉ូ (chlorovirus) ដែលជាវីរុសទឹកសាបមានជំនាញក្នុងការបំផ្លាញសារាយបៃតង ចូលទៅក្នុងឧបករណ៍ពិសោធន៍ដែលមានសត្វល្អិតទាំងនោះ។ ពួកគេតាមដានបរិមាណវីរុស និងបាក់តេរីផ្សេងទៀតដើម្បីឱ្យដឹងថា សត្វល្អិត ឬបាក់តេរីទាំងនោះស៊ីវីរុស ឬទេ។

រូបភាពមីក្រូទស្សន៍បង្ហាញពីវីរុសក្លរ៉ូ (chlororirus) ដែលកំពុងស៊ីសារាយ

ក្រុមអ្នកស្រាវជ្រាវខាងលើរកឃើញថា សត្វល្អិតពិសេសមួយប្រភេទហាក់ចូលចិត្តស៊ីវីរុសជាអាហារ នោះគឺសត្វល្អិតមានឈ្មោះថា ហាល់តារី (Halteria)។ ក្នុងសំណាកទឹកដែលមិនមានប្រភពអាហារផ្សេងទៀតក្រៅពីវីរុសក្លរ៉ូ គេឃើញថា បរិមាណ ហាល់តេរី កើនឡើងប្រហែល 15 ដង ក្នុង 2 ថ្ងៃ ខណៈបរិមាណវីរុសក្លរ៉ូ បែរជាថយចុះជិត 100 ដង។ ក្នុងសំណាកទឹកដែលមិនមានវីរុស ហាល់តេរី ក៏មិនរីកចម្រើន។

ជំហានបន្ទាប់ ក្រុមអ្នកវិទ្យាសាស្ត្រប្រើប្រាស់សារធាតុបញ្ចេញពន្លឺដើម្បីភ្ជាប់ទៅនឹង DNA របស់វីរុសក្លរ៉ូ។ ពួកគេឃើញថា លើហាល់តេរី មានពន្លឺ ដែលប្រការនេះជួយបញ្ជាក់ថា ហាល់តេរី ពិតជាកំពុងរំលាយវីរុសក្នុងពោះរបស់ពួកវា។

របកគំហើញខាងលើបង្ហាញថា ហាល់តេរី គឺជាសត្វល្អិតស៊ីវីរុសជាអាហារដំបូងគេដែលត្រូវបានមនុស្សរកដឹង ប៉ុន្តែនេះអាចមិនមែនជាករណីតែមួយគត់ឡើយ។ ក្រុមអ្នកស្រាវជ្រាវខាងលើកំពុងរៀបគម្រោងស្វែងយល់លម្អិត និងពង្រីកវិសាលភាពនៃការពិសោធរបស់ពួកគេ៕

December 30, 2022

Author: សឿន សំណាង