សឿន សំណាង - La Reine Media

សម្រស់របស់ស្រីស្អាតដែលទើបបាន «គ្រងមកុដបវរកញ្ញាឯកចក្រវាល 2022»

R’bonney Gabriel ដណ្ដើមបានជ័យជម្នះប្រកបដោយភាពស័ក្ដិសមនៅឯព្រឹត្តិការណ៍ប្រលងបវរកញ្ញាចក្រវាល 2022 (Miss Universe 2022) ដែលបានជួយឱ្យសហរដ្ឋអាម៉េរិករក្សាបាននូវកេរ្តិ៍ឈ្មោះជាប្រទេសគ្រប់គ្រងតំណែងបវរកញ្ញាចក្រវាលច្រើនជាងគេបំផុតលើពិភពលោក។

វគ្គផ្ដាច់ព្រ័ត្រនៃការប្រលងបវរកញ្ញាចក្រវាល 2022 ត្រូវបានធ្វើឡើងកាលពីថ្ងៃទី 14 មករា (ថ្ងៃទី 15 នៅកម្ពុជា)។ ជ័យជម្នះបានទៅលើ R’bonney Gabriel តំណាងរបស់សហរដ្ឋអាម៉េរិក ដែលជាម្ចាស់ផ្ទះ។ ស្រីស្អាត R’bonney Gabriel បានគ្រងមកុដដោយមានការពេញចិត្តខ្លាំងពីអ្នកគាំទ្រ។ តំណែងបវរកញ្ញាលំដាប់រងទីមួយបានទៅលើស្រីស្អាតរបស់វេណេស៊ុយអែឡា និងលំដាប់រងទីពីរបានទៅលើស្រីស្អាតរបស់សាធារណរដ្ឋដូមីនីក។

ក្រោយរយៈពេល 10 ឆ្នាំ រាប់ចាប់តាំងពី Olivia Culpo (បច្ចុប្បន្នគឺជាពិធីការិនីនៅ Miss Universe ឆ្នាំនេះ) បានគ្រងមកុដបវរកញ្ញាចក្រវាល ស្រីស្អាតដើមកំណើតហ្វ៊ីលីពីន R’bonney Gabriel បានជួយឱ្យសហរដ្ឋអាម៉េរិករកបានមកុដមួយទៀត។ នេះគឺជាលើកទី 9 ហើយដែលសហរដ្ឋអាម៉េរិកដណ្ដើមបានមកុដបវរកញ្ញាឯកចក្រវាល ច្រើនជាងឆ្ងាយធៀបនឹង 7 លើករបស់វេណេស៊ូយអេឡា។ ស្រីស្អាត R’bonney Gabriel ដណ្ដើមបានជ័យជម្នះដោយសារវគ្គសួរ-ឆ្លើយស្ដីពីសិទ្ធិរបស់ស្ត្រី។

ក្នុងវគ្គសួរ-ឆ្លើយ R’bonney Gabriel និយាយថា «ខ្ញុំនៅទីនេះដើម្បីដឹកនាំ។ អស់រយៈពេល 13 ឆ្នាំកន្លង ខ្ញុំធ្វើជាអ្នកច្នៃម៉ូដ និងប្រើប្រាស់ម៉ូដសម្លៀកបំពាក់សម្រាប់គោលដៅដ៏ថ្លៃថ្លា។ ខ្ញុំបង្កើតថ្នាក់រៀនជំនាញសម្រាប់ស្ត្រីដែលរងគ្រោះដោយសារអំពើហិង្សាក្នុងគ្រួសារ ស្ត្រីរងគ្រោះក្នុងអំពើជួញដូរមនុស្ស។ បងប្អូនស្ត្រី ចូរប្រើប្រាស់ទេពកោសល្យដ៏កម្រដើម្បីបង្កើតភាពខុសគ្នា និងការផ្លាស់ប្ដូរ»។

R’bonney Gabriel ឆ្នាំនេះអាយុ 28 គឺជាតារាម៉ូដែល និងជាអ្នករចនាម៉ូដសម្លៀកបំពាក់។ នាងមកកាន់ Miss Universe ជាមួយនឹងរឿងរ៉ាវស្ដីពីម៉ូដសម្លៀកបំពាក់ប្រកបដោយនិរន្តភាព និងការពារបរិស្ថាន។ ក្រុមហ៊ុនសម្លៀកបំពាក់ផ្ទាល់ខ្លួនរបស់ R’bonney Gabriel ជំនាញក្នុងការផលិតសម្លៀកបំពាក់ដែល «ស្និទ្ធស្នាល» នឹងបរិស្ថាន ដោយសារប្រើប្រាស់វត្ថុធាតុអាចកែច្នៃឡើងវិញបាន៕

January 16, 2023

សារព័ត៌មានកូរ៉េខាងត្បូងសង្ឃឹមថា «វៀតណាមនឹងឈ្នះថៃ» នៅវគ្គផ្ដាច់ព្រ័ត្រ

នៅមុនការប្រកួតជើងទីពីរនៃវគ្គផ្ដាច់ព្រ័ត្ររបស់ AFF Cup 2022 សារព័ត៌មាន Chosun របស់កូរ៉េខាងត្បូង ជឿជាក់ថា គ្រូបង្វឹក Park Hang-seo អាចជួយឱ្យវៀតណាមឈ្នះថៃ មុនពេលលាកូនសិស្ស និងអ្នកគាំទ្រនៅប្រទេសវៀតណាម។

«សកម្មភាពចុងក្រោយរបស់គ្រូបង្វឹក Park Hang-seo ក្នុងវិស័យបាល់ទាត់វៀតណាមពេលនេះគឺនៅសល់តែការប្រកួតវគ្គផ្ដាច់ព្រ័ត្រជើងទីពីររបស់ AFF Cup 2022 ប៉ុណ្ណោះ» សារព័ត៌មានខាងលើសរសេរដូច្នេះ។ «អ្នកគាំទ្រសុទ្ធតែចង់ដឹងថា តើគ្រូបង្វឹក Park អាចបញ្ចប់ដំណើរលើកនេះដោយស្នាមញញឹកដែរ ឬយ៉ាងណា»។

ការប្រកួតលើទីលាន My Dinh វៀតណាម និងថៃរកបាន 2 គ្រាប់ដូច្នេះ។ ដោយសារតែ AFF Cup អនុវត្តលក្ខន្តិកៈ «គ្រាប់បាល់ក្រៅទឹកដី» (Away Goals Rule) ដើម្បីជ្រើសរើសក្រុមឈ្នះក្នុងករណីក្រុមទាំងពីររកបានគ្រាប់បាល់ស្មើគ្នាក្រោយការប្រកួតពីរជើងនៅវគ្គផ្ដាច់ព្រ័ត្រ វៀតណាម ត្រូវការឈ្នះ ឬស្មើចាប់ពី 3-3 ឡើងទៅ ទើបអាចដណ្ដើមបានជើងឯក។ ចប់ការប្រកួតជើងទីពីរនៃវគ្គផ្ដាច់ព្រ័ត្រ បើសិនលទ្ធផលស្មើ 2-2 វៀតណាម និងថៃត្រូវប្រកួតតង់បន្ថែម។ នេះមិនមែនជាគោលដៅងាយស្រួលឡើយសម្រាប់គ្រូបង្វឹកជនជាតិកូរ៉េខាងត្បូងលោក Park Hang-seo ក៏ដូចជាក្រុមវៀតណាម ព្រោះថា ថៃកំពុងបង្ហាញថា ពួកគេខ្លាំងក្លា។

ប៉ុន្តែសារព័ត៌មាន Chosun របស់កូរ៉េខាងត្បូង សរសេរថា ទោះជាយ៉ាងនេះក៏ដោយ គ្រូបង្វឹក Park ស័ក្ដិសមទទួលបានការគោរព ព្រោះតែការរួមចំណែករបស់លោកនៅក្នុងវិស័យបាល់ទាត់របស់វៀតណាម ចាប់តាំងពីឆ្នាំ 2017។

សារព័ត៌មានកូរ៉េខាងត្បូងខ្លះ បានហៅ AFF Cup ថាជា World Cup របស់អាស៊ីអាគ្នេយ៍ ហើយប្រការនេះក៏ទំនងជាមិនមែនគ្មានហេតុផលនោះដែរ។ ព្រោះថា មានជនជាតិកូរ៉េខាងត្បូង 3 រូបដែលធ្លាប់ចូលប្រកួតនៅ World Cup កំពុងបំពេញបេសកកម្មជាគ្រូបង្វឹកនៅអាស៊ីអាគ្នេយ៍ រួមមាន គ្រូបង្វឹក Shin Tae-yong របស់ក្រុមឥណ្ឌូណេស៊ី, ជំនួយការក្រុមជម្រើសជាតិវៀតណាម Lee Young-jin និងគ្រូបង្វឹក Park Hang-seo របស់ក្រុមវៀតណាម។ ចំណែកមូលហេតុដែលនាំឱ្យសារព័ត៌មានកូរ៉េខាងត្បូង សង្ឃឹមថា វៀតណាមនឹងឈ្នះថៃនោះក៏ដោយសារថា មកដល់វគ្គផ្ដាច់ព្រ័ត្រនេះនៅសល់តែវៀតណាមប៉ុណ្ណោះដែលមានគ្រូបង្វឹកជាជនជាតិកូរ៉េខាងត្បូង៕

January 16, 2023

គយគន់សម្រស់មិត្តស្រី និងភរិយារបស់ក្រុមកីឡាករជម្រើសជាតិថៃ

ក្រុមកីឡាករបាល់ទាត់ជម្រើសជាតិថៃ កំពុងតែទទួលបានជោគជ័យច្រើននៅ AFF Cup 2022 ហើយជ័យជម្នះទាំងឡាយដែលពួកដណ្ដើមបាន ប្រាកដជាមានការរួមចំណែកពីភរិយា និងមិត្តស្រីដ៏ស្រស់ស្អាតរបស់ពួកគេ។

ស្រីស្អាត Phusitta Phonrak ភរិយារបស់ Teerasil Dangda

1- ខ្សែប្រយុទ្ធសំខាន់ជាងគេ Teerasil Dangda និងស្រីស្អាត Phusitta Phonrak មានទំនាក់ទំនងស្នេហានឹងគ្នាតាំងពីឆ្នាំ 2010 …

…ពួកគេមានសុភមង្គល និងមិនមានរឿងអាស្រូវអ្វីឡើយ។

ស្រីស្អាត Phusitta Phonrak ត្រូវគេដឹងថា តែងតែដើរតាម Dangda ចាប់តាំងពីគាត់លេងនៅប្រទេសថៃ រហូតដល់លេងឱ្យក្លឹបអង់គ្លេស និងជប៉ុន។

2- ចំណែកខ្សែបម្រើ Sanrawat Dechmitr វិញ បែរជាមានជីវភាពហ៊ឺរហាជាងគេនៅក្នុងការរស់នៅ។

ក្រោយពីមានទំនាក់ទំនងជាមួយស្រីស្អាតល្បីឈ្មោះមួយចំនួននៅប្រទេសថៃ កីឡាករវ័យ 33 ឆ្នាំ Sanrawat Dechmitr ក៏រកបានដៃគូជីវិត នោះគឺតារាម៉ូដែលល្បីឈ្មោះ Nanya Benchachokanan។

Nanya Benchachokanan ធ្លាប់បង្ហាញខ្លួននៅក្នុងទស្សនាវដ្ដីល្បីៗ មានដូចជា Playboy, A’Lure និង Mars Magazine ជាដើម។

3- ដោយឡែក ខ្សែប្រយុទ្ធ Adisak វិញ ក៏ស្រលាញ់តារាសិល្បៈមួយរូបផងដែរ។

កីឡាកររូបនេះកំពុង «ផ្ញើបេះដូង» ទៅឱ្យ Pattaraphon Sirisapchanan ដែលជាតារាសម្ដែង និងតារាចម្រៀងនៅប្រទេសថៃ។

Pattaraphon Sirisapchanan ធ្លាប់សម្ដែងក្នុងខ្សែភាពយន្តទូរទស្សន៍មួយចំនួន…

… ហើយឈ្មោះរបស់នាងកាន់តែល្បីបន្ទាប់ពីមានទំនាក់ទំនងជាមួយ Adisak។

4- ខុសពីមិត្តរួមក្រុមដទៃ Bunmathan ជ្រើសយកជីវភាពស្ងាត់ស្ងៀមជាមួយនឹងភរិយាមួយរូប។

តាំងពីបានរៀបការ ភរិយារបស់ Bunmathan បានថយទៅ «ក្រោយឆាក»…

… ធ្វើកិច្ចការដើម្បីគាំទ្រដល់ស្វាមី។

January 16, 2023

អាម៉េរិកសាកល្បងយន្តហោះដែលមានស្លាបវែងជាងទីលានបាល់ទាត់

(សហរដ្ឋអាម៉េរិក) – យន្តហោះធំជាងគេលើពិភពលោក Roc របស់ក្រុមហ៊ុន Stratolaunch បំបែកកំណត់ត្រាថ្មីក្នុងជើងហោះហើរសាកល្បងលើកទីពីរដោយនាំយកយានល្បឿនលឿនជាងសំឡេងទៅជាមួយ។

Roc បានហោះឡើងពីព្រលានអវកាសចរណ៍ Mofave នៅ California ខាងកើត និងចុះចតនៅកន្លែងដដែលបន្ទាប់ពីហោះហើរបាន 6 ម៉ោង កាលពីថ្ងៃទី 14 មករា ម៉ោងនៅកម្ពុជា។ តំណាងក្រុមហ៊ុន Stratolaunch ឱ្យដឹងថា យន្តហោះនេះបានហោះឡើងដល់កម្ពស់ 6,860 ម៉ែត្រ។

ក្រៅពីការក្លាយជាជើងហោះហើរយូរជាងគេបំផុតរបស់ Roc ការសាកល្បងហោះហើរនេះក៏ជាលើកដំបូងដែលយន្តហោះនេះផ្សងគ្រោះថ្នាក់ហោះចេញទៅខាងក្រៅសមុទ្រខ្សាច់ Mojave ផងដែរ នេះបើតាម Stratolaunch។

មកដល់បច្ចុប្បន្ន Roc ហោះហើរបាន 9 ជើងរួចហើយ ប៉ុន្តែនេះទើបតែជាលើកទីពីរដែលយន្តហោះនេះបានដឹកយានល្បឿនលឿនជាងសំឡេង 5 ដង Talon-A។ ជើងហោះហើរសាកល្បងដំបូងរបស់ Roc ត្រូវបានធ្វើឡើងកាលពីឆ្នាំ 2021 ដែលកាលណោះវាហោះក្នុងរយៈពេល 5 ម៉ោង និងកម្ពស់ 7,000 ម៉ែត្រ។

ការសាកល្បងរបស់ Talon-A កំពុងក្លាយជាគ្រឹះសម្រាប់ការបាញ់បង្ហោះយានល្បឿនលឿនជាងសំឡេងពីលើអាកាសរបស់ Stratolaunch ដែលគ្រោងចាប់ផ្ដើមនៅចុងឆ្នាំនេះ។

Stratolaunch ត្រូវបានបង្កើតឡើងកាលពីឆ្នាំ 2011 ដោយសហស្ថាបនិករបស់ Microsoft លោក Paul Allen ដើម្បីបាញ់បង្ហោះយានពីអាកាសទៅកាន់អវកាស។ ក្រុមហ៊ុននេះកំពុងអភិវឌ្ឍយាន Talon គំរូជាច្រើនដើម្បីសាកល្បងហោះហើរក្នុងល្បឿនលឿនជាងសំឡេងរហូតដល់កម្រិត Mach 6 (7.408 គីឡូម៉ែត្រ/ម៉ោង)។

Talon-A មានបណ្ដោយ 8.5 ម៉ែត្រ និងទម្ងន់ 2,700 គីឡូក្រាម អាចហោះឡើងពីព្រលានយន្តហោះ ឬបាញ់បង្ហោះពីអាកាសតាមរយៈយន្តហោះដឹកជញ្ជូន Roc។ Roc គឺជាយន្តហោះធំជាងគេបង្អស់លើពិភពលោក ដោយមានស្លាបប្រវែងឡើងដល់ 117 ម៉ែត្រ វែងជាងទីលានបាល់ទាត់ទៅទៀត៕

January 16, 2023

AFF Cup 2022 – ខ្សែប្រយុទ្ធលេខមួយរបស់ថៃ ពិបាកចូលប្រកួតវគ្គផ្ដាច់ព្រ័ត្រជើងទីពីរ

(ប្រទេសថៃ) – Teerasil Dangda បន្តហាត់ដាច់ដោយឡែកកាលពីល្ងាចថ្ងៃទី 15 មករា ហើយទំនងជាពិបាកនឹងអាចចូលរួមប្រកួតជើងទីពីរនៃវគ្គផ្ដាច់ព្រ័ត្រនៅ AFF Cup 2022 ដែលថៃត្រូវប៉ះវៀតណាមនៅថ្ងៃទី 16 មករានេះ។

ក្រុមកីឡាករជម្រើសជាតិថៃ បានចូលហាត់នៅវេលាម៉ោង 17 និង 10 នាទី កាលពីម្សិលមិញ យឺតជាង 10 នាទីធៀបនឹងការគ្រោងទុកដំបូង។ ក្រុមកីឡាករចាប់ផ្ដើមដោយការរត់លើទីលាននៅកីឡដ្ឋាន Thammasat ប៉ុន្តែ Teerasil បែរជាដើរជាមួយបុគ្គលិកសុខាភិបាលទៅវិញ។

កីឡាករលេខមួយរបស់ថៃ បានរងរបួសត្រង់កំភួនជើងនៅក្នុងការប្រកួតដែលបានឈ្នះក្រុមម៉ាឡេស៊ី 3-0 នៅវគ្គពាក់កណ្ដាលផ្ដាច់ព្រ័ត្រជើងទីពីរ និងមិនបានចូលទាត់វគ្គផ្ដាច់ព្រ័ត្រជើងទីមួយនៅវៀតណាម។ កាលពីថ្ងៃទី 14 មករា Teerasil ក៏មិនបានចូលហាត់ ប៉ុន្តែបានទៅមន្ទីរពេទ្យ។ កីឡាកររូបនេះប្រហែលជាមិនអាចចូលរួមប្រកួតជើងទីពីរនៃវគ្គផ្ដាច់ព្រ័ត្រនៅ AFF Cup 2022 ដែលថៃត្រូវប៉ះវៀតណាមនៅល្ងាចថ្ងៃទី 16 មករានេះទេ។

Teerasil Dangda រកបាន 6 គ្រាប់ស្មើនឹង Tien Linh របស់ក្រុមវៀតណាម ដែលបច្ចុប្បន្នពួកគេកំពុងនាំមុខក្នុងតារាងចំណាត់ថ្នាក់ស្ដេចកម្ទេចទីនៅ AFF Cup 2022។ ខ្សែប្រយុទ្ធកើតឆ្នាំ 1988 នេះធ្លាប់ដណ្ដើមបានតំណែងស្ដេចកម្ទេចសំណាញ់ទីចំនួន 4 លើក នៅ AFF Cup ហើយបច្ចុប្បន្នគឺជាកំពូលថ្វីជើងលំដាប់ទីមួយរបស់ពានរង្វាន់នេះ ដោយរកបាន 25 គ្រាប់។

ក្រោយពីទទួលបានលទ្ធផល 2-2 ពេលប៉ះវៀតណាមក្នុងវគ្គផ្ដាច់ព្រ័ត្រជើងទីមួយនៅកីឡដ្ឋាន My Dinh ក្រុមថៃកាន់តែមានការជឿជាក់នៅពេលធ្វើជាម្ចាស់ផ្ទះ។ នៅកីឡដ្ឋាន Thammasat ថៃទើបតែត្រូវប៉ើងសំណាញ់ទីមួយគ្រាប់ប៉ុណ្ណោះ ពេលបានឈ្នះកម្ពុជា 3-1។

ការប្រកួតរវាងថៃ និងវៀតណាម នឹងចាប់ផ្ដើមនៅវេលាម៉ោង 19 និង 30 នាទី ថ្ងៃទី 16 មករា 2023។ ក្រុមដែលដណ្ដើមបានតំណែងជើងឯកនឹងត្រូវបានប្រធាន FIFA លោក Gianni Infantino ប្រគល់ពានរង្វាន់ដោយផ្ទាល់៕

January 16, 2023

នេប៉ាល់ប្រកាសកាន់ទុក្ខ ក្រោយហេតុការណ៍ធ្លាក់យន្តហោះកាលពីម្សិលមិញ

ប្រទេសនេប៉ាល់ប្រកាសកាន់ទុក្ខមួយថ្ងៃក្រោយពីមានហេតុការណ៍ធ្លាក់យន្តហោះដឹកមនុស្ស 72 នាក់ពេលកំពុងត្រៀមចុះចតនៅឯព្រលានយន្តហោះ Pokhara។

ឧបនាយករដ្ឋមន្ត្រីនេប៉ាល់ Bishnu Poudel បានឱ្យដឹងថា ថ្ងៃនេះប្រទេសនេប៉ាល់កាន់ទុក្ខដើម្បីរម្លឹកដល់វិញ្ញាណក្ខន្ធជនរងគ្រោះយ៉ាងតិច 68 នាក់ ដែលបានស្លាប់ក្នុងហេតុការណ៍ធ្លាក់យន្តហោះរបស់ក្រុមហ៊ុន Yeti Airlines កាលពីថ្ងៃទី 15 មករា 2023។

ក្រសួងមហាផ្ទៃនេប៉ាល់ ប្រកាសថា នឹងបង្ហូតទង់ជាតិពាក់កណ្ដាលដងដើម្បីរម្លឹកដល់វិញ្ញាណក្ខន្ធជនរងគ្រោះក្នុងហេតុការណ៍ដ៏សោកសៅនេះ។ រដ្ឋាភិបាលនេប៉ាល់ ក៏បានសម្រេចផ្អាករាល់សេវាកម្មសាធារណៈ លើកលែងតែសេវាកម្មចាំបាច់ និងពន្យារពេលរាល់កម្មវិធីដែលបានគ្រោងទុក នេះបើតាមអ្នកនាំពាក្យក្រសួងមហាផ្ទៃ Phadindra Mani Pokharel។

ចំណែកក្រុមហ៊ុនអាកាសចរណ៍ Yeti Airlines ក៏បានផ្អាករាល់ជើងហោះហើរដែលត្រូវបានកំណត់រួចហើយ ក្រោយពីមានហេតុការណ៍នៅ Pokhara។

យន្តហោះ ATR-72 របស់ Yeti Airlines បានជួបគ្រោះថ្នាក់ពេលកំពុងរងវិធីចុះចតលើព្រលានយន្តហោះអន្តរជាតិ Pokhara នៅភាគកណ្ដាលប្រទេសនេប៉ាល់។ អាជ្ញាធរនេប៉ាល់បានឱ្យដឹងថា បានរកឃើញសាកសពជនរងគ្រោះ 68 នាក់នៅកន្លែងកើតហេតុ។

វីដេអូដែលត្រូវបានបង្ហោះលើបណ្ដាញសង្គមបង្ហាញថា យន្តហោះ ATR-72 កំពុងហោះលើកម្ពស់ទាបខាងលើផ្ទះរបស់ប្រជាជនក៏ស្រាប់តែផ្អៀង 90 អង្សាទៅខាងឆ្វេង។ ក្រោយមកយន្តហោះនោះក៏បាត់ខ្លួនពីអេក្រង់ ប៉ុន្តែ នៅតែឮសំឡេងម៉ាស៊ីន និងសំឡេងប៉ះទង្គិចដ៏ខ្លាំង ដែលទំនងជាសំឡេងយន្តហោះធ្លាក់ដល់ដី។

ATR-72 គឺជាប្រភេទយន្តហោះដឹកអ្នកដំណើរខ្នាតតូច ដែលត្រូវបានដាក់ឱ្យប្រើប្រាស់តាំងពីឆ្នាំ 1988 និងអាចដឹកមនុស្សបាន 78 នាក់។ យន្តហោះ ATR-72 ជាង 400 គ្រឿងត្រូវបានផលិត និងលក់ឱ្យក្រុមហ៊ុនអាកាសចរណ៍នានានៅលើពិភពលោក។

មុននោះ ប្រទេសនេប៉ាល់ក៏ធ្លាប់មានគ្រោះថ្នាក់ធ្លាក់យន្តហោះដ៏មហារន្ធត់មួយកាលពីឆ្នាំ 1992 ដែលបានសម្លាប់មនុស្ស 167 នាក់។ យន្តហោះដែលជាកម្មសិទ្ធិរបស់ក្រុមហ៊ុនអាកាសចរណ៍អន្តរជាតិប៉ាគីស្ថាននោះ ជួបឧបទ្ទវហេតុនៅពេលព្យាយាមចុះចតនៅរដ្ឋធានីកដ្ឋមណ្ឌូ (Kathmandu)៕

January 16, 2023

កូនក្រមុំក្លាហាន អញ្ជើញ «អតីតសង្សារច្រើននាក់» មកអង្គុយរួមតុក្នុងពិធីជប់លៀងមង្គលការរបស់ខ្លួន

(ប្រទេសចិន) – ទិដ្ឋភាពបុរស 5 នាក់ដែលអង្គុយជុំវិញតុមួយដែលមានដាក់អក្សរថា «តុអតីតមិត្តប្រុស» នៅក្នុងពិធីជប់លៀងមង្គលការមួយនៅខេត្ត Hubei បានធ្វើឱ្យមានការជជែកគ្នាច្រើនលើបណ្ដាញសង្គម។

ពិធីរៀបការកាលពីថ្ងៃទី 08 មករា 2023 នៅខេត្ត Hubei ត្រូវបានអ្នកលេងបណ្ដាញសង្គមហៅថា «ពិធីជប់លៀងមង្គលការដែលពិបាកយល់បំផុត»។ នៅក្នុងវីដេអូ បុរស 5 នាក់អង្គុយជុំវិញតុអាហារដែលមានដាក់អក្សរថា «តុអតីតមិត្តប្រុស» បានបង្ហាញអារម្មណ៍អៀនប្រៀនជាខ្លាំងក្នុងបរិយាកាសអ៊ូអររបស់ពិធីជប់លៀងមង្គលការ នេះបើតាម SCMP ចុះផ្សាយកាលពីថ្ងៃទី 13 មករា 2023។

មនុស្សមួយចំនួនគិតថា ស្ត្រី 2 នាក់ដែលអង្គុយរួមតុនោះគឺជាមិត្តស្រីរបស់បុរស 2 នាក់ក្នុងចំណោម 5 នាក់ដែលជា «អតីតមិត្តប្រុស» របស់កូនក្រមុំ។ អ្នកលេងបណ្ដាញសង្គមអស់សំណើចជាខ្លាំង នៅពេលបានឃើញពួកគេបង្ហាញទឹកមុខអៀនប្រៀន។

អ្នកលេងបណ្ដាញសង្គមខ្លះថា «ពិតជាក្លាហានណាស់ ហ៊ានអញ្ជើញសង្សារចាស់មកចូលរួមពិធីជប់លៀងមង្គលការរបស់ខ្លួនផង»។ អ្នកខ្លះទៀតក៏ថា «ហ៊ានណាស់! ហ៊ានហៅសង្សារមកចូលរួមជប់លៀងមង្គលការរបស់អតីតសង្សារ»…។

មនុស្សមួយចំនួនជឿថា នេះគ្រាន់តែជាការប្រឌិត លេងសើចរបស់បងប្អូនកូនកំលោះ និងកូនក្រមុំប៉ុណ្ណោះ។ ហើយនេះក៏មិនមែនជាករណីដំបូងឡើយនៅប្រទេសចិន កាលពីខែឧសភា 2022 ក៏មានករណីស្រដៀងគ្នានេះដែរ៕

January 14, 2023

ចិនបង្កើតបណ្ដាញឧទ្យានជាតិ «ធំជាងគេបង្អស់លើពិភពលោក»

ប្រទេសចិននឹងមានបណ្ដាញឧទ្យានជាតិធំជាងគេបង្អស់លើពិភពលោកបើគិតអំពីផ្ទៃក្រឡាដែលត្រូវបានការពារ បើសិនស្ថាបនានៅលើតំបន់សក្ដានុពលទាំង 49 របស់ប្រទេសនេះ។

ឧទ្យានជាតិ Sanjiangyuan, Giant Panda, North China Tiger and Leopard, Hainan Tropical Rainforest និង Wuyishan គឺជាឧទ្យានជាតិដំបូងដែលត្រូវបានបង្កើតឡើងដើម្បីការពារសត្វព្រៃ និងបរិស្ថានរស់នៅរបស់ពួកវាឱ្យបានល្អជាងមុន។

លោក Huang Jincheng ប្រធានគណៈកម្មការគ្រប់គ្រងឧទ្យានជាតិ Hainan Tropical Rainforest ថ្លែងថា ចាប់តាំងពីឧទ្យាននេះត្រូវបានបង្កើតឡើង ក្រុមការងារកែលំអរបរិស្ថានរស់នៅរបស់ទោច Hainan បានប្រហែល 267 ហិកតា និងដើមឈើដែលពួកវាចូលចិត្ត ជាង 100,000 ដើម។

លោក Fan Dexing កសិករដាំដំណាំតែមួយរូប បាននិយាយថា គោលដៅរបស់ឧទ្យានជាតិ Wuyishan គឺការថែរក្សាធម្មជាតិ។ ធម្មជាតិល្អ ពួកគាត់ក៏អាចដាំបានដំណាំតែប្រភេទល្អៗ។

ចំណែកលោក Tian Junliang អនុប្រធានឧទ្យានជាតិ Sanjiangyuan ថ្លែងថា «ការស្រុះស្រួលរវាងមនុស្ស និងធម្មជាតិគឺជាចំណុចអាទិភាពមួយរបស់ឧទ្យានជាតិ។ ប្រការនេះដើរតួនាទីសំខាន់ក្នុងការការពារភាពសម្បូរបែបរបស់វប្បធម៌ និងជីវសាស្ត្ររបស់ផែនដី និងកាត់បន្ថយផលប៉ះពាល់នៃបម្រែបម្រួលអាកាសធាតុ»។

ប្រទេសចិនបានជ្រើសរើសតំបន់ដែលមានសក្ដានុពលចំនួន 49 ដើម្បីបង្កើតជាបណ្ដាញឧទ្យានជាតិដែលមានទំហំផ្ទៃដីសរុបប្រហែល 1.1 លានគីឡូម៉ែត្រក្រឡា រួមមានតំបន់ដីគោកចំនួន 44, តំបន់សមុទ្រចំនួន 3 និងតំបន់ដីគោក-សមុទ្រចំនួន 2។

អាជ្ញាធរចិនបានឱ្យដឹងថា ប្រទេសនេះនឹងមានបណ្ដាញឧទ្យានជាតិធំជាងគេបង្អស់លើពិភពលោក បើគិតទៅលើផ្ទៃក្រឡាដែលត្រូវបានការពារ បើសិនកសាងនៅលើតំបន់សក្ដានុពលទាំង 49។ សត្វព្រៃមានឆ្អឹងជាង 5,000 ប្រភេទ និងរុក្ខជាតិ 29,000 ប្រភេទស្ថិតនៅក្នុងបណ្ដាញឧទ្យាននេះ។

បណ្ដាញឧទ្យាននេះគ្រោងនឹងមានសត្វ និងរុក្ខជាតិជាង 80% នៅក្នុងចំណោមប្រភេទដែលត្រូវបានអាជ្ញាធរចិនការពារយ៉ាងម៉ត់ចត់។ បណ្ដាញឧទ្យាននេះក៏ជួយការពារតំបន់ទាំងឡាយដែលសត្វព្រៃធ្វើដំណើរឆ្លងកាត់ផងដែរ៕

សត្វទោចនៅឧទ្យានជាតិ Hainan Tropical Rainforest

សត្វខ្លានៅក្នុងឧទ្យាន North China Tiger and Leopard

January 14, 2023

គ្រូបង្វឹក Mano Polking៖ «បានស្មើវៀតណាម 2-2 គឺជាលទ្ធផលល្អស្ទើរតែឥតខ្ចោះទៅហើយ»

(វៀតណាម) – សប្បាយចិត្តនឹងលទ្ធផល 2-2 ប៉ុន្តែគ្រូបង្វឹករបស់ថៃ លោក Mano Polking នៅតែស្ដាយ ព្រោះមិនបានផ្ដួលវៀតណាមនៅជើងទីមួយនៃវគ្គផ្ដាច់ព្រ័ត្ររបស់ AFF Cup 2022។

«កីឡាកររបស់ខ្ញុំ ក្នុងការប្រកួតលើកណាក៏ទាត់យ៉ាងសកម្ម និងដណ្ដើមបានលទ្ធផលស្ទើរតែល្អឥតខ្ចោះ ប៉ុន្តែក្រុមយើងនៅតែត្រូវការយកចិត្តទុកដាក់សម្រាប់ការប្រកួតបន្ទាប់» គ្រូបង្វឹករបស់ថៃ និយាយនៅក្នុងសន្និសីទសារព័ត៌មានបន្ទាប់ពីការប្រកួតនៅកីឡដ្ឋាន My Dinh របស់វៀតណាម បានបញ្ចប់កាលពីព្រលប់ថ្ងៃទី 13 មករានេះ។

ដោយលទ្ធផល 2-2 នៅទីលាន My Dinh ថៃត្រូវការស្មើ 0-0 ឬ 1-1 ក្នុងជើងទីពីរនៅថ្ងៃទី 16 មករាខាងមុខ គឺគ្រប់គ្រាន់សម្រាប់តំណែងជើងឯក AFF Cup 2022។

ទិដ្ឋភាពបង្ហាញពីការរកបានគ្រាប់បាល់ឈ្នះមួយគ្រាប់ដំបូងរបស់ក្រុមថៃ

គ្រាប់ទីពីរដែលថៃរកបាន

January 14, 2023

ប្រធានក្រុមជម្រើសជាតិថៃ៖ ថៃនឹងឈ្នះវៀតណាមពេលទាត់លើទីលាននៅបាងកក

ប្រធានក្រុមកីឡាករថៃ Theerathon Bunmathan បានលើកទឹកចិត្តក្រុមរបស់ខ្លួនបន្ទាប់ពីលទ្ធផលនៃការប្រកួតស្មើ 2-2 ជាមួយវៀតណាម នៅកីឡដ្ឋាន My Dinh កាលពីព្រលប់ថ្ងៃទី 13 មករា។

ក្រោយពីការប្រកួតជើងដំបូងនៃវគ្គផ្ដាច់ព្រ័ត្រ ក្រុមកីឡាករថៃ ក៏ដើរទៅកាន់ខាងមុខតំបន់អ្នកគាំទ្ររបស់ខ្លួនដើម្បីធ្វើការអរគុណ។ ក្រុមជម្រើសជាតិថៃ ក្រោយមកក៏ឈរជារង្វង់ដើម្បីស្ដាប់ការចែករំលែករបស់ប្រធានក្រុម Theerathon។

ខ្សែការពារកើតឆ្នាំ 1990 រូបនេះនិយាយថា «…ការរកបាន 2 គ្រាប់នៅលើទីលានរបស់គូប្រកួត…គឺជាលទ្ធផលល្អ។ កុំគិតច្រើនទៅលើការចាញ់នៅនាទីចុងក្រោយ។ យើងត្រូវតែមានជំនឿចិត្ត។ ថៃនឹងដណ្ដើមបានជើងឯកនៅពេលត្រលប់ទៅទីលានម្ចាស់ផ្ទះ»។

យោងតាមលក្ខន្តិកៈ ថៃត្រូវការតែស្មើ 1-1 ឬ 0-0 ទៀតប៉ុណ្ណោះគឺក្លាយជាជើងឯក AFF Cup 2022 ខណៈដែលវៀតណាមវិញ គឺត្រូវតែឈ្នះ ឬស្មើចាប់ពី 3-3 ឡើងទៅ។ បើសិននៅតែស្មើ 2-2 ក្រោយការប្រកួត 90 នាទី ថៃ និងវៀតណាមនឹងត្រូវទាត់តង់បន្ថែម។

ដូចទៅនឹងការព្យាករ ការប្រកួតជើងទីមួយនៃវគ្គផ្ដាច់ព្រ័ត្រពិតជាគួរឱ្យទស្សនា។ វៀតណាមចាប់ផ្ដើមការប្រកួតបានយ៉ាងល្អ ដោយរកបាន 1 គ្រាប់ដំបូងនៅនាទីទី 24។ ចុងតង់ទីមួយ Theerathon ស៊ុតផ្ដាច់ចំបង្គោលទី។ ចូលដល់តង់ទីពីរ ប្រធានក្រុមរបស់ថៃ បង្កឱកាសបានពីរលើកដើម្បីឱ្យ Poramet Arjvirai និង Sarach Yooyen ស៊ុតបញ្ចូលទីនៅនាទីទី 48 និង 63។ មកដល់នាទីទី 87 ទើបវៀតណាមរកបានគ្រាប់បាល់ស្មើ 2-2 ដោយថ្វីជើងរបស់ខ្សែការពារ Vu Van Thanh។

ថៃ និងវៀតណាម នឹងត្រូវប្រកួតជើងទីពីរនៅវេលាម៉ោង 19 និង 30 នាទី ថ្ងៃទី 16 មករា លើទីលានរបស់កីឡដ្ឋាន Thammasat ក្នុងរាជធានីបាងកក៕

អានបន្ថែម៖ គ្រូបង្វឹករបស់ថៃ៖ «ស្មើវៀតណាម 2-2 ជាលទ្ធផលជិតល្អឥតខ្ចោះ»

January 14, 2023

Author: សឿន សំណាង