សឿន សំណាង - La Reine Media

ក្មេងស្រីអាយុ 8 ឆ្នាំ លះបង់មរតករាប់សិបលានដុល្លារអាម៉េរិកដើម្បីទៅសាងផ្នួស

(ឥណ្ឌា) – ក្មេងស្រីវ័យ 8 ឆ្នាំមួយរូប ដែលជាអ្នកស្នងមរតកក្រុមហ៊ុនពេជ្រតម្លៃរាប់សិបលានដុល្លារអាម៉េរិក បានសម្រេចចិត្តលះបង់ទ្រព្យសម្បត្តិដើម្បីទៅសាងផ្នួសលាងបាប និងរក្សាសីល។

Devanshi Sanghvi កាលពីសប្ដាហ៍កន្លងនៅតែជាអ្នកស្នងមរតកក្រុមហ៊ុនលក់គ្រឿងអលង្ការ Sanghvi & Sons នៅទីក្រុង Surat ជាទីដែលត្រូវបានគេហៅថា «ទីក្រុងពេជ្រ» ដោយសារតែមានភាពល្បីល្បាញក្នុងវិស័យពាណិជ្ជកម្មត្បូងពេជ្រនៅទូទាំងសកលលោក។

គ្រួសាររបស់ក្មេងស្រីនេះគឺជាសមាជិករបស់ Jain ដែលជាសាសនាបុរាណតូចមួយរបស់ឥណ្ឌា ដែលប្រឆាំងនឹងអំពើហិង្សា ស្នើឱ្យសាសនិកហូបអាហារបួសយ៉ាងតឹងរឹង និងផ្ដល់ក្ដីស្រលាញ់ដល់សព្វសត្វ។ សប្ដាហ៍នេះ Devanshi Sanghvi មានពិធីបុណ្យមួយដែលអូសបន្លាយពេល 4 ថ្ងៃ ដើម្បីប្រកាសដំណឹងស្ដីពីការសម្រេចចិត្តទៅបួស។

Devanshi Sanghvi បានចូលវិហារកាលពីម្សិលមិញ និងបានប្ដូរទៅស្លៀកពាក់ឈុតពណ៌សយ៉ាងសាមញ្ញ ក្រោយពីបានកោរសក់រួចរាល់។ សាក្សីម្នាក់បានឱ្យដឹងថា Devanshi Sanghvi គឺជាក្មេងស្រីល្អ និងរាប់អានសាសនា Jain តាំងតែពីតូច។

Devanshi Sanghvi គឺជាមនុស្សម្នាក់ក្នុងចំណោមមនុស្សដែលមានវ័យនៅក្មេងជាងគេដែលបានបោះបង់ទ្រព្យសម្បត្តិដើម្បីទៅសាងផ្នួសក្នុងសាសនា Jain។ ឪពុកម្ដាយរបស់ Devanshi Sanghvi ឱ្យដឹងថា កូនស្រីរបស់ពួកគាត់ចង់ទៅសាងផ្នួសតាំងពីយូរមកហើយ។

មុខជំនួញរបស់គ្រួសារ Devanshi Sanghvi ត្រូវបានបង្កើតឡើងកាលពីឆ្នាំ 1981 ហើយបច្ចុប្បន្នមានតម្លៃ 61 លានដុល្លារអាម៉េរិក នេះបើតាម ICRA ដែលជាទីភ្នាក់ងារផ្តល់ចំណាត់ថ្នាក់ឥណទានរបស់ប្រទេសឥណ្ឌា។ សាសនា Jain មានបរិស័ទជាង 4 លាននាក់នៅឥណ្ឌា ក្នុងនោះមានទាំងក្រុមគ្រួសារមកពីសហគមន៍អ្នកជំនួញធំៗផងដែរ។

ក៏ប៉ុន្តែ កន្លងមក សាសនានេះត្រូវរងការរិះគន់មួយចំនួនទាក់ទិននឹងការតបមអាហារដ៏តឹងរឹង។ សាសនិកខ្លះត្រូវបង្ខំចិត្តយកក្រណាត់មកបិទមាត់ដើម្បីចៀសវាងការដកដង្ហើមលេបចំសត្វល្អិត។ កាលពីឆ្នាំ 2016 ក្មេងស្រីអាយុ 13 ឆ្នាំមួយរូបនៅ Hyderabad បានសន្លប់ និងបាត់បង់ជីវិតក្នុងពេលធ្វើការអត់អាហារពីរខែដើម្បីលាងបាប ដោយផឹកតែទឹកក្ដៅឧណ្ហឧណ្ហពីរដងក្នុងមួយថ្ងៃ។ ឪពុកម្ដាយរបស់ក្មេងស្រីនេះត្រូវបានចោទប្រកាន់ពីបទសម្លាប់មនុស្សដោយអចេតនា៕

January 19, 2023

រថយន្តអគ្គិសនី Tesla Cybertruck បានត្រៀមខ្លួនរួចរាល់ហើយសម្រាប់ការផលិត

Franz von Holzhausen ដែលជាប្រធានផ្នែករចនារបស់ Tesla បានបញ្ជាក់ថា រថយន្តអគ្គិសនីប្រភេទទ្រុង (pickup) Tesla Cybertruck ត្រូវបានរចនារួចរាល់ទាំងស្រុងហើយសម្រាប់ការផលិតនៅឯរោងចក្រ Giga Texas ក្នុងឆ្នាំនេះ។

ដោយមានការបញ្ជាទិញជាមុនជាង 1.6 លានលើក Cybertruck គឺជាយានយន្តមួយក្នុងចំណោមរថយន្តដែលត្រូវបានសាធារណជនទន្ទឹងរង់ចាំបំផុតនៅសហរដ្ឋអាម៉េរិក។ យោងតាម Franz von Holzhausen រថយន្តអគ្គិសនី Tesla Cybertruck នឹងត្រូវបានបំពាក់ដៃចង្កូតរាងជ្រុងៗដូចមេអំពៅ។

Tesla បានទទួលម៉ាស៊ីនកៀប Giga 9,000 តោន ដែលនឹងត្រូវបានប្រើប្រាស់ក្នុងការផលិតរថយន្តអគ្គិសនី Tesla Cybertruck។ ប្រការនេះបង្ហាញថា ការផលិតនឹងចាប់ផ្ដើមក្នុងពេលឆាប់ៗនេះ ទំនងជានៅក្នុងខែមិថុនា 2023 ក្រោយពីបានពន្យារពេលអស់ជាច្រើនលើក។

Cybertruck នឹងក្លាយជារថយន្តអគ្គិសនីដំបូងគេរបស់ Tesla ដែលមានប្រព័ន្ធអគ្គិសនី 1,000 វ៉ុល អនុញ្ញាតឱ្យបញ្ចូលថាមពលបានលឿនជាងបច្ចុប្បន្ន។ រយៈចម្ងាយមធ្យមដែល Tesla Cybertruck បរបានបន្ទាប់ពីបញ្ចូលអគ្គិសនីមួយពេញគឺ 800 គីឡូម៉ែត្រ ទៅតាមស្ដង់ដា EPA៕

January 19, 2023

គ្រាប់បែកប្រល័យលោកផ្ទុះ តើគួរលាក់ខ្លួននៅទីណាទើបមានសុវត្ថិភាពបំផុត?

(ប្រទេសស៊ីប) – យោងទៅតាមការបង្ហាញត្រាប់លើកុំព្យូទ័រ ក្រុមអ្នកជំនាញកំណត់បានទីកន្លែងដែលបង្កគ្រោះថ្នាក់ និងសុវត្ថិភាពបំផុតចំពោះមនុស្សនៅក្នុងផ្ទះដែលស្ថិតនៅមិនឆ្ងាយពីកន្លែងផ្ទុះគ្រាប់បែកនុយក្លេអែរ។

ពេលគ្រាប់បែកប្រល័យលោកផ្ទុះ គ្រប់យ៉ាងដែលនៅក្បែរនឹងត្រូវបាត់ខ្លួនភ្លាមៗ។ វិទ្យុសកម្មអាចប៉ះពាល់ដល់សុខភាពមនុស្ស ទោះជាស្ថិតនៅឆ្ងាយ។ គ្រោះថ្នាក់ធំមួយទៀតសម្រាប់អ្នកស្ថិតនៅក្នុងរយៈចម្ងាយមធ្យមពីកន្លែងផ្ទុះ នោះគឺរលកខ្យល់កញ្ឆក់ដែលមានកម្លាំងខ្លាំង និងរហ័ស អាចបក់បំប៉ើងមនុស្សទៅលើអាកាស។

ក្រុមអ្នកស្រាវជ្រាវនៅសាកលវិទ្យាល័យ Nicosia ប្រទេសស៊ីប (Cyprus) បានធ្វើការបង្ហាញត្រាប់លើកុំព្យូទ័រករណីផ្ទុះគ្រាប់បែកនុយក្លេអែរមួយគ្រាប់ដែលបំពាក់លើមីស៊ីលអន្តរទ្វីប និងរលកកញ្ឆក់ដែលកើតឡើងពីការផ្ទុះ ហើយវាយតម្លៃផលប៉ះពាល់ដល់មនុស្សដែលលាក់ខ្លួនក្នុងផ្ទះ។ លទ្ធផលនៃការវិភាគថ្មីនេះត្រូវបានចុះផ្សាយលើទស្សនាវដ្ដី Physics of Fluids កាលពីថ្ងៃទី 17 មករា។

នៅក្នុងតំបន់រងការខូចខាតកម្រិតមធ្យម រលកខ្យល់កញ្ឆក់មានកម្លាំងអាចកម្ទេចផ្ទះមួយចំនួន និងបង្កគ្រោះថ្នាក់ដល់មនុស្សនៅខាងក្រៅ ប៉ុន្តែ អគាររឹងមាំដែលសាងសង់ពីបេតុងជាដើម អាចទប់ទល់បាន។ យោងតាមការពិសោធថ្មីនេះ ការលាក់ខ្លួនក្នុងផ្ទះរឹងមាំនៅតែមិនទាន់គ្រប់គ្រាន់ក្នុងការរក្សាជីវិត។ បន្ទប់ដែលចង្អៀតអាចបង្កើនល្បឿនរបស់ខ្យល់ ហើយនៅពេលមានរលកកញ្ឆក់ ខ្យល់នឹងជះត្រលប់ពីជញ្ជាំង និងអាចបង្កើតបានជាកម្លាំងមួយដែលប្រហាក់ប្រហែលនឹងទម្ងន់របស់មនុស្ស 18 នាក់។

ករណីធ្វើតេស្តគ្រាប់បែកនុយក្លេអែរចុងក្រោយទាំង 5 របស់ពិភពលោក

«កន្លែងដែលគ្រោះថ្នាក់បំផុតនៅក្នុងផ្ទះដែលយើងត្រូវចៀសវាង រួមមាន បង្អួច ផ្លូវរួមក្នុងអគារ និងទ្វារចេញចូល។ ពេលស្ថិតក្នុងបន្ទប់ដែលនៅទល់មុខនឹងកន្លែងផ្ទុះ យើងនៅតែអាចមានសុវត្ថិភាព បើសិនលាក់ខ្លួនត្រង់ជ្រុងណាមួយក្នុងបន្ទប់» Ioannis Kokkinakis សមាជិកម្នាក់របស់ក្រុមខាងលើឱ្យដឹងដូច្នេះ។

ក្រុមអ្នកវិទ្យាសាស្ត្រសង្កត់ធ្ងន់ថា អ្នកមានពេលតែប៉ុន្មានវិនាទីប៉ុណ្ណោះក្នុងការរត់រកជម្រក បន្ទាប់ពីមានករណីផ្ទុះគ្រាប់បែកប្រល័យលោក ហើយក្នុងអគារនានាសុទ្ធតែមានប្រព័ន្ធខ្សែភ្លើង និងហ្កាសជាដើម ដូច្នេះនឹងមានអគ្គិភ័យកើតឡើង។ គ្រប់គ្នាត្រូវតែយកចិត្តទុកដាក់រាល់ហានិភ័យខាងលើ និងប្រញាប់រកដំណោះស្រាយភ្លាមៗ នេះបើតាម Drikakis។

ក្រុមអ្នកវិទ្យាសាស្ត្រសង្ឃឹមថា ការផ្ទុះគ្រាប់បែកនុយក្លេអែរនឹងមិនកើតឡើង ប៉ុន្តែពួកគេជឿថា ការយល់ដឹងអំពីផលវិបាកដែលកើតឡើងពីការផ្ទុះនេះ នឹងជួយបញ្ចៀសការស្លាប់ ឬរងរបួសធ្ងន់ និងបង្កភាពងាយស្រួលដល់ការជួយសង្គ្រោះ៕

January 19, 2023

Mbappe នៅតែទាក់ទង Real Madrid ខណៈ Messi មិនទាន់ចង់ចរចាជាមួយក្លឹបនៅអារ៉ាប់

កីឡាករបារាំង Kylian Mbappe បង្កើនការទាក់ទងជាមួយ Real Madrid ដោយស្ងាត់ៗ និងប្រុងប្រយ័ត្ន គ្រាដែល Lionel Messi មានពាក្យចរាមអារ៉ាមថា ចង់ទៅចូលរួមជាមួយក្លឹប Al Hilal នៅអារ៉ាប៊ីសាអូឌីត។

Kylian Mbappe នៅតែទាក់ទង Real Madrid

យោងតាម Mario Cortegana របស់សារព័ត៌មាន The Athletic បើទោះជាបានបដិសេធឱកាសចូលរួមជាមួយ Real Madrid កាលពីរដូវក្ដៅឆ្នាំកន្លង ប៉ុន្តែ Mbappe មិនដែលបោះបង់ក្ដីស្រមៃក្នុងការពាក់អាវរបស់ក្លឹបនេះ។

ភាគីក្លឹប Real Madrid និងកីឡាករបារាំង Mbappe ត្រូវបានគេជឿថា នៅតែរក្សាទំនាក់ទំនង និងបង្កើនការទាក់ទងនឹងគ្នាចាប់ពីក្រោយ World Cup 2022 ប៉ុន្តែ ត្រូវបានធ្វើឡើងដោយស្ងាត់ៗ និងប្រុងប្រយ័ត្ន។

គោលជំហររបស់ Real Madrid គឺច្បាស់លាស់ណាស់ ឱ្យតែ Mbappe ពិតជាចង់ចាកចេញពី PSG ពួកគេនឹងអាចចូលតុចរចា។

Lionel Messi មិនទាន់ចង់ចរចាជាមួយក្លឹបនៅអារ៉ាប់

យោងតាម Goal កំពូលកីឡាករអាហ្សង់ទីន Lionel Messi បានត្រៀមខ្លួនពន្យារសុពលភាពនៃកិច្ចសន្យាជាមួយក្លឹប PSG ក្នុងគ្រាដែលមានព័ត៌មានចរាមអារ៉ាមថា គាត់មានបំណងទៅចូលរួមជាមួយក្លឹប Al Hilal នៅអារ៉ាប៊ីសាអូឌីត។

កិច្ចសន្យាបច្ចុប្បន្នរវាង Messi និង PSG នឹងអស់សុពលភាពនៅខែមិថុនាខាងមុខ ប៉ុន្តែ គាត់ប្រាកដណាស់ថា នឹងនៅជាមួយក្លឹបនេះយ៉ាងតិចក៏មួយរដូវកាលទៀតដែរ។

Messi ក៏នឹងមិនត្រលប់ទៅកាន់ Barca ឬសហរដ្ឋអាម៉េរិក ហើយគាត់ និង Al Hilal ក៏មិនមានការចរចាណាមួយ បើទោះជា Al Hilal ចង់ចុះកិច្ចសន្យាជាមួយគាត់៕

January 19, 2023

«មន្ទីរពេទ្យជាតិតេជោសន្ដិភាព» នឹងក្លាយជាមន្ទីរពេទ្យធំជាងគេនៅកម្ពុជា

ប្រមុខរាជរដ្ឋាភិបាលកម្ពុជា ថ្លែងថា នៅពេលសាងសង់រួចរាល់ «មន្ទីរពេទ្យជាតិតេជោសន្ដិភាព» នឹងក្លាយជាមន្ទីរពេទ្យធំជាងគេនៅកម្ពុជា ដោយមានគ្រែសម្រាកព្យាបាលជិតមួយម៉ឺនគ្រែ។

ប្រសាសន៍ខាងលើរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ត្រូវបានលើកឡើងនាព្រឹកថ្ងៃទី 19 មករា 2023 ក្នុងឱកាសអញ្ជើញពិនិត្យវឌ្ឍនភាពនៃការសាងសង់ «មន្ទីរពេទ្យជាតិ តេជោសន្ដិភាព» ដែលមានទីតាំងស្ថិតនៅ សង្កាត់គោករកា ខណ្ឌព្រែកព្នៅ រាជធានីភ្នំពេញ។

ក្នុងឱកាសសំណេះសំណាលជាមួយកម្មករសំណង់ជាងមួយពាន់នាក់នៅក្នុងការដ្ឋានមន្ទីរពេទ្យខាងលើ សម្ដេចតេជោ បានឱ្យដឹងថា មកដល់បច្ចុប្បន្ន ការសាងសង់មន្ទីរពេទ្យនេះសម្រេចបានប្រមាណ 80% និងគ្រោងបញ្ចប់នៅក្នុងខែមិថុនាខាងមុខ។ សម្ដេចបន្ថែមថា មន្ទីរពេទ្យនេះអាចមានគ្រែឡើងដល់ជិត 1 ម៉ឺនគ្រែ ដែលអាចចាត់ទុកថា ជាមន្ទីរពេទ្យធំជាងគេបង្អស់នៅកម្ពុជា។

យោងតាមក្រសួងព័ត៌មាន «មន្ទីរពេទ្យជាតិតេជោសន្ដិភាព» មានអគារចំនួន 11 ក្នុងនោះមានអគារព្យាបាល និងសង្គ្រោះបន្ទាន់, អគារព្យាបាលកម្រិតធ្ងន់, អគារព្យាបាលកម្រិតស្រាល, អគារបច្ចេកទេស, អគារផ្គត់ផ្គង់និងព័ត៌មាន និងអគារស្នាក់នៅសម្រាប់បុគ្គលិក។ មន្ទីរពេទ្យនេះមានចំណតរថយន្តអាចចតបានជាង 200 គ្រឿង និងមានសួនច្បារពណ៌បៃតងផងដែរ។

«មន្ទីរពេទ្យជាតិតេជោសន្ដិភាព» ត្រូវបានសាងសង់ដោយក្រុមហ៊ុន ស៊ីជេអ៊ីស៊ី (CJEC) សហការជាមួយសាលារាជធានីភ្នំពេញ និងបានបើកការដ្ឋានសាងសង់កាលពីថ្ងៃទី 14 កុម្ភៈ 2022 ហើយគ្រោងដាក់ឱ្យដំណើរការចាប់ពីខែមិថុនា 2023៕

January 19, 2023

Messi និង Ronaldo បង្កឱ្យមានរលកនៃការគាំទ្រខ្លាំងមិនធ្លាប់មាននៅអារ៉ាប៊ីសាអូឌីត

បើទោះជាការប្រកួតរវាង PSG និង Al Nassr & Al Hilal មិនទាន់កើតឡើង ប៉ុន្តែនៅឯប្រទេសអារ៉ាប៊ីសាអូឌីត រលកនៃការគាំទ្រត្រូវបានរុញឡើងខ្ពស់ជាងពេលណាៗទាំងអស់។

ការប្រកួតខាងលើគឺជាការចាប់ផ្ដើមរបស់ Ronaldo នៅឯក្លឹប Al Nassr របស់អារាប៊ីសាអូឌីត បន្ទាប់ពីចាកចេញពី Man United។ ការទិញដូរ Ronaldo របស់ក្លឹប Al Nassr បានធ្វើឱ្យកក្រើកតំបន់អាស៊ី ដោយសារ CR7 នាំមកនូវឥទ្ធិពលពិសេស ហើយប្រាក់បៀវត្សរ៍របស់កំពូលតារាបាល់ទាត់ជនជាតិព័រទុយហ្កាលនេះក៏ស្ថិតក្នុងលំដាប់កំពូលបំផុតរបស់ពិភពលោក ដោយទទួលបាន 200 លានដុល្លារ/រដូវកាល។

ក៏ប៉ុន្តែ អ្នកគាំទ្រមិនទាន់បានឃើញ Ronaldo ទាត់ក្នុងឈុតសម្លៀកបំពាក់ថ្មីនៅឡើយ ដោយសារតែមូលហេតុដែលទាក់ទងនឹងការពិន័យមុននោះ ព្រោះកីឡាកររូបនេះបានបោកទូរស័ព្ទអ្នកគាំទ្ររបស់ Everton កាលពីទាត់ឱ្យ Man United។

ក្រោយការរង់ចាំអស់ច្រើនថ្ងៃ ចុងក្រោយអ្នកគាំទ្រក៏នឹងបានទស្សនាការប្រកួតរបស់ Ronaldo។ អ្វីដែលពិសេសជាងនេះគឺថា គូប្រកួតរបស់ CR7 គឺ Lionel Messi និងក្លឹប PSG។ តាំងពីយូរមកហើយ កំពូលកីឡាករទាំងពីររូបនេះមិនដែលបានជួបគ្នា ដូច្នេះការប្រកួតនាពេលខាងមុខ បើទោះគ្រាន់តែជាមិត្តភាព ប៉ុន្តែកម្លាំងទាក់ទាញរបស់វាគឺពិតជាមិនអាចបដិសេធបាន។ Ronaldo និង Messi សុទ្ធតែមានអាយុជាង 35 ឆ្នាំ ដូច្នេះ នេះអាចជាការប៉ះគ្នាលើកចុងក្រោយបង្អស់របស់ពួកគេ។

កំពូលតារាបាល់ទាត់ជនជាតិអាហ្សង់ទីន Messi និងក្រុម PSG បានធ្វើដំណើរទៅកាន់រាជធានីរីយ៉ាដ ប្រទេសអារ៉ាប៊ីសាអូឌីត។ យោងតាមទំព័រ L’Equipe ដើម្បីទទួលបានការយល់ព្រមរបស់ Messi និង PSG មកប្រកួតមិត្តភាពនៅអារ៉ាប៊ីសាអូឌីត ក្លឹប Al Nassr និង Al Hilal បានចំណាយប្រាក់អស់ 10 លានអឺរ៉ូឯណោះ។

គិតមកដល់ថ្ងៃនេះ ចំនួនសំបុត្រចូលទស្សនាការប្រកួតខាងលើដែលត្រូវបានទិញតាមអនឡាញ បានឡើងដល់ជាង 350,000 សំបុត្រទៅហើយ ខណៈកីឡដ្ឋាន King Fahd អាចដាក់មនុស្សបានប្រហែលតែ 68,000 នាក់ប៉ុណ្ណោះ៕

January 19, 2023

ដំរីព្រៃចេញស្ទាក់ឡានដឹកទំនិញ «ប្លន់» យកអំពៅតាមដងផ្លូវ (វីដេអូ)

ជំនួសឱ្យការដើរត្រាច់ចរស្វែងរកអាហារនៅក្នុងព្រៃ ដំរីព្រៃជាច្រើនក្បាលនៅប្រទេសថៃ បានសម្រួលវិធីចិញ្ចឹមជីវិតរបស់ពួកគេដោយការស្ទាក់ឡានដឹកទំនិញនៅតាមដងផ្លូវដើម្បី «ប្លន់» យកអំពៅ។

សកម្មភាពក្នុងវីដេអូដែលត្រូវបានគេចែករំលែកកាលពីថ្ងៃទី 16 មករា បង្ហាញថា ដំរីអាស៊ីពេញវ័យមួយក្បាលឈរក្បែរផ្លូវនៅក្នុងខេត្ត Chachoengsao ប្រទេសថៃ រង់ចាំរថយន្តបរឆ្លងកាត់ដើម្បីប្លន់យកអាហារ។ កំណាត់ផ្លូវនេះតែងតែមានរថយន្តដឹកអំពៅធ្វើដំណើរពីចំការនៅក្បែរនោះ ទៅកាន់រោងចក្រផលិតស្ករ។

យោងតាមអ្នកស្រុកនៅ Au Wanapin ដំរីធំមួយក្បាលនេះមានរហ័សនាមថា «អាកន្ធាត់» ព្រោះតែបានប្លន់ អំពៅជាច្រើនយកទៅស៊ី។ វាគឺជាដំរីឈ្មោល អាយុប្រហែល 35 ឆ្នាំ និងមិនមានភ្លុក។ បើទោះវាជាសត្វព្រៃ ប៉ុន្តែវាតែងចេញពីព្រៃដើម្បីស្ទាក់រថយន្តដឹកអំពៅដែលបរលើដងផ្លូវ។ នេះមិនមែនជាដំរីតែមួយក្បាលឡើយដែលមានទម្លាប់ «ប្លន់អាហារ»។

ដំរីធំមួយក្បាលនេះមានរហ័សនាមថា «អាកន្ធាត់»

ប្រទេសថៃបានរកឃើញថា មានដំរីព្រៃអាស៊ីប្រហែល 2,000 ក្បាលកំពុងរស់នៅក្នុងតំបន់ព្រៃនានាដែលត្រូវបានការពារ។ ខុសពីដំរីព្រៃអាហ្វ្រិក ដំរីឈ្មោលអាស៊ីតែងដើរម្នាក់ឯងនៅពេលមានអាយុជាង 10 ឆ្នាំ ខណៈដែលដំរីញីនៅជាមួយហ្វូង។

ក្រុមមន្ត្រីអភិរក្សសត្វព្រៃនិយាយថា មូលហេតុដែលដំរីទាំងនោះចេញមក «ប្លន់អាហារ» មិនមែនដោយសារពួកវាឃ្លាននោះទេ ប៉ុន្តែដោយសាររថយន្តទាំងនោះដឹកអាហារដែលឆ្ងាញ់ជាងអ្វីដែលពួកវារកបាននៅក្នុងព្រៃ៕

January 19, 2023

យន្តហោះគ្មានស្លាបកង្ហារ អាចហោះក្នុងល្បឿនជិត 1,000 គីឡម៉ែត្រ/ម៉ោង

(សហរដ្ឋអាម៉េរិក) – ក្រុមហ៊ុន Jetoptera អភិវឌ្ឍគំរូយន្តហោះដែលហោះបានលឿនជាងបណ្ដាយន្តហោះប្រតិកម្មរហ័សដឹកអ្នកដំណើរទៅទៀត ដោយសារតែមានស្លាបយ៉ាងពិសេស។

Jetoptera ដែលជាគំរូយន្តហោះប្រភេទអាចហោះឡើង និងចុះចតដោយត្រង់ (VTOL) មិនមានស្លាបកង្ហាររបស់ក្រុមហ៊ុន Jetoptera នៅ សហរដ្ឋអាម៉េរិក បានបង្ហាញសមត្ថភាពហោះហើរក្នុងល្បឿន 988 គីឡូម៉ែត្រ/ម៉ោង នៅក្នុងពេលសាកល្បង ដែលនេះគឺលឿនជាង Boeing Dreamliner និងលឿនជាងទ្វេដងធៀបនឹងយន្តហោះមានស្លាបផ្អៀង។

ក្រុមហ៊ុន Jetoptera បានបញ្ចេញព័ត៌មានខាងលើបន្ទាប់ពីបានសម្រេចកិច្ចព្រមព្រៀងស្ដីពីការស្រាវជ្រាវច្នៃប្រឌិតអាជីវកម្មខ្នាតតូច (SBIR) លើកទីបួនជាមួយនឹងទ័ពអាកាសអាម៉េរិក នេះបើតាម Interesting Engineering ចុះផ្សាយកាលពីថ្ងៃទី 17 មករា។

ជំនួសឱ្យការប្រើប្រាស់ម៉ាស៊ីនបង្ហាប់អគ្គិសនី Jetoptera ប្រើប្រាស់ទួរប៊ីនឧស្ម័ន នាំឧស្ម័នដែលបំភាយចេញតាមរយៈប្រព័ន្ធរុញច្រានធាតុរាវ (FPS)។ ខ្យល់ដែលបានបង្ហាប់ត្រូវបាននាំចេញតាមប្រហោងតូចៗនៅជុំវិញផ្ទៃខាងក្នុងរបស់ឧបករណ៍ប្រហោងក្នុង។ យោងតាម Jetoptera ប្រព័ន្ធនេះផ្ដល់កម្លាំងរុញច្រានខ្លាំងជាង 10% និងប្រើប្រាស់ឧស្ម័នតិចជាង 50% ធៀបនឹងម៉ូទ័រទួរប៊ីនប្រតិកម្មខ្នាតតូច។ បើធៀបនឹងម៉ូទ័រទួរប៊ីនប្រតិកម្មមានស្លាបកង្ហារ ប្រព័ន្ធរបស់ Jetoptera ស្រាលជាង 30% និងមិនសូវស្មុគស្មាញ។ គ្រឿងម៉ាស៊ីនរបស់ Jetoptera ក៏មានស្ងាត់ជាងរហូតដល់ 25% ធៀបនឹងម៉ាស៊ីនរុញច្រានដែលមានទំហំប្រហាក់ប្រហែល។

Jetoptera បានឱ្យដឹងថា ក្រុមហ៊ុនបានបង្កើតគំរូយន្តហោះខ្នាតតូចរបស់យន្តហោះខាងលើ នៅក្នុងកម្មវិធី AFWERX HSVTOL។ កម្មវិធីនេះមានក្រុមហ៊ុនចំនួន 11 ចូលរួមរចនាយន្តហោះយោធា VTOL ជំនាន់ថ្មីដែលមានប្រសិទ្ធភាពខ្ពស់ជាងឆ្ងាយធៀបនឹងយន្តហោះដែលមាននៅលើទីផ្សារបច្ចុប្បន្ន។ គំរូយន្តហោះខ្នាតតូចរបស់ Jetoptera កំពុងត្រូវបានសាកល្បងនៅក្នុងផ្លូវរូងខ្យល់ក្រោមដី និងមានល្បឿនឡើងដល់កម្រិត Mach 0.8 (988 គីឡូម៉ែត្រ/ម៉ោង)។

រចនារូបរាងរបស់យន្តហោះខាងលើនឹងត្រូវបានវាយតម្លៃក្នុងរង្វង់ 6 ខែទៀត។ ក្រុមហ៊ុន Jetoptera សង្ឃឹមថា នឹងអាចដំណើរការកំណែសាកល្បងនៅក្នុងឆ្នាំ 2025៕

January 19, 2023

នាឡិកាប្រាប់ថ្ងៃវិនាសរបស់ផែនដីសម្រាប់ឆ្នាំ 2023 ជិតត្រូវបានបង្ហាញស្ថានភាព

នៅថ្ងៃទី 24 មករា 2023 ព័ត៌មានរបស់ក្រុមអ្នកវិទ្យាសាស្ត្រអាតូមិច នឹងបង្ហាញឱ្យដឹងអំពីស្ថានភាពរបស់ទ្រនិចនាឡិកាថ្ងៃវិនាសរបស់ផែនដី ជានិមិត្តរូបដែលបង្ហាញថា មនុស្សលោកឈានចូលទៅក្បែរហានិភ័យបំផ្លាញខ្លួនឯងដល់កម្រិតណា។

ព័ត៌មានរបស់ក្រុមអ្នកវិទ្យាសាស្ត្រអាតូមិច (BAS) នឹងត្រូវបានប្រារព្ធឡើងក្នុងកិច្ចប្រជុំតាមអនឡាញនៅម៉ោង 22 ថ្ងៃទី 24 មករា 2023 (ម៉ោងនៅកម្ពុជា) ដើម្បីប្រកាសឱ្យដឹងអំពីទីតាំងរបស់ទ្រនិចនាទីរបស់នាឡិកាថ្ងៃវិនាស សម្រាប់ឆ្នាំ 2023 (2023 Doomsday Clock)។ កិច្ចប្រជុំនោះនឹងមានវត្តមានរបស់វាគ្មិនជាច្រើនរូបមកពី BAS និងសមាជិកទាំងឡាយរបស់ Elders ដែលជាអង្គការឯករាជ្យរបស់ក្រុមមេដឹកនាំទូទាំងសកលលោក ដែលបង្កើតឡើងដោយអតីតប្រធានាធិបតីអាហ្វ្រិកខាងត្បូង Nelson Mandela ក្នុងគោលដៅសន្តិភាព យុត្តិធម៌ និងសិទ្ធិមនុស្ស។

បច្ចុប្បន្ន នាឡិកាថ្ងៃវិនាសកំពុងស្ថិតនៅត្រង់ចំណុច 100 វិនាទីមុនពាក់កណ្ដាលយប់។ នាឡិកាថ្ងៃវិនាសត្រូវបានបង្ហាញជាលើកដំបូងនៅពេលសង្គ្រាមត្រជាក់បានចាប់ផ្ដើមនៅឆ្នាំ 1947 និងស្ថិតនៅត្រង់ចំណុច 7 នាទីមុនពាក់កណ្ដាលយប់។

ជារៀងរាល់ឆ្នាំ សមាជិកទាំងឡាយរបស់ក្រុមប្រឹក្សាវិទ្យាសាស្ត្រ និងសន្តិសុខរបស់ BAS នឹងកែប្រែទ្រនិចនាឡិកាដើម្បីបង្ហាញអំពីស្ថានភាពដែលបង្កើតឡើងដោយព្រឹត្តិការណ៍នានាក្នុងឆ្នាំចាស់ ដែលបានរុញច្រានមនុស្សជាតិទៅជិត ឬឆ្ងាយពីហានិភ័យនៃការបំផ្លាញខ្លួនឯង។ បច្ចុប្បន្ន នាឡិកាថ្ងៃវិនាសត្រូវបានប្រើប្រាស់ដើម្បីព្រមានអំពីការគំរាមកំហែងដែលមានប្រភពពីគ្រប់អាវុធប្រល័យលោក ការបំផ្លិចបំផ្លាញបរិស្ថាន បម្រែបម្រួលអាកាសធាតុជាដើម ចំពោះពិភពលោក។

នាឡិកាថ្ងៃវិនាស សម្រាប់ឆ្នាំ 2023 (2023 Doomsday Clock)

លើកដំបូងដែលទ្រនិចនាឡិកាថ្ងៃវិនាសដើរដល់ចំណុចឆ្ងាយបំផុតពីចំណុចពាក់កណ្ដាលយប់ (ម៉ោង 12 យប់) គឺនៅឆ្នាំ 1991 បន្ទាប់ពី សហរដ្ឋអាម៉េរិក និងសូវៀត ចុះកិច្ចព្រមព្រៀងបន្ថយអាវុធយុទ្ធសាស្ត្រ ដើម្បីកាត់បន្ថយចំនួនក្បាលគ្រាប់នុយក្លេអែរ។ ពេលនោះ ទ្រនិចនាឡិកាត្រូវបានដាក់ឆ្ងាយពីចំណុចមុនពាក់កណ្ដាលយប់ដល់ទៅ 17 នាទី។ ចាប់ពីពេលនោះមក ទ្រនិចនាទីរបស់នាឡិកានេះក៏ផ្លាស់ទីទៅមុខជាបន្តបន្ទាប់។ ការគំរាមកំហែងពីបម្រែបម្រួលអាកាសធាតុ ត្រូវបាន BAS កំណត់ជាលើកដំបូងថាជាកត្តាកំណត់ទីតាំងរបស់ទ្រនិចនាឡិកានៅឆ្នាំ 2007 ពេលដែលទ្រនិចនាឡិកាមានចម្ងាយពីចំណុចពាក់កណ្ដាលយប់ 5 នាទី មិនមែន 7 នាទីដូចមុនៗនោះ។

ឆ្នាំ 2020 ទ្រនិចនាឡិកាថ្ងៃវិនាសស្ថិតនៅត្រង់ចំណុច 100 វិនាទីមុនពាក់កណ្ដាលយប់ ជាចំណុចជិតបំផុតមិនធ្លាប់មានពីមុនមក។ «សង្គ្រាមនុយក្លេអែរដែលអាចបញ្ចប់អរិយធម៌របស់មនុស្សជាតិ គឺជារឿងដែលអាចកើតឡើង។ យើងក៏មិនអាចបដិសេធបញ្ហាបម្រែបម្រួលអាកាសធាតុដែលកំពុងកើតឡើង និងអាចបំផ្លាញពិភពផែនដីបានឡើយ» John Mecklin ដែលជាមន្ត្រីមួយរូបរបស់ BAS បានឱ្យដឹងដូច្នេះ។

ក្នុងរយៈពេលពីរឆ្នាំកន្លង ទ្រនិចនាឡិកាថ្ងៃវិនាសនៅតែស្ថិតនៅត្រង់ចំណុច 100 វិនាទីមុនពាក់កណ្ដាលយប់។ ក្រុមអ្នកជំនាញកំពុងតែរង់ចាំមើលថាតើបណ្ដាព្រឹត្តិការណ៍ក្នុងឆ្នាំកន្លង រួមមានជាអាទិ៍ ការបំភាយឧស្ម័នផ្ទះកញ្ចក់ទូទាំងពិភពលោក និងសង្គ្រាមរវាងរស្ស៊ី – អ៊ុយក្រែន អាចប៉ះពាល់ដល់ទ្រនិចនាទីរបស់នាឡិកាថ្ងៃវិនាសនេះដែរ ឬទេ៕

January 19, 2023

FIFA៖ World Cup នារី 2023 លក់សំបុត្រចូលទស្សនាបានជាង 5 សែនរួចហើយ

អ្នកគាំទ្រពីប្រទេស និងដែនដីជាង 120 លើពិភពលោក បានទិញសំបុត្រចូលទស្សនាការប្រកួត World Cup នារីលើកទី 9 ដែលនឹងត្រូវធ្វើឡើងនៅអូស្ត្រាលី និងនូវែលសេឡង់ ក្នុងខែកក្កដា និងខែសីហាខាងមុខ។

យោងតាមសហព័ន្ធបាល់ទាត់ពិភពលោក (FIFA) និងសហព័ន្ធបាល់ទាត់អូស្ត្រាលី (FA) សំបុត្រជាង 5 សែន សម្រាប់ចូលទស្សនាការប្រកួតនៅពានរង្វាន់ជើងឯកបាល់ទាត់នារីពិភពលោក 2023 (2023 FIFA Women’s World Cup) ត្រូវបានលក់ឱ្យអ្នកគាំទ្ររួចហើយ។

ទិន្នន័យដែលបានប្រកាសកាលពីថ្ងៃទី 17 មករា 2023 បង្ហាញថា អ្នកគាំទ្រពីប្រទេស និងដែនដីជាង 120 លើពិភពលោក បានទិញសំបុត្រចូលទស្សនាការប្រកួត World Cup នារីលើកទី 9 ដែលនឹងត្រូវធ្វើឡើងនៅអូស្ត្រាលី និងនូវែលសេឡង់ ក្នុងខែកក្កដា និងខែសីហាខាងមុខ។ នេះគឺជារដូវកាល World Cup នារីដំបូងដែលមាន 32 ក្រុមចូលរួមប្រកួត។

បណ្ដាប្រទេសដែលមានអ្នកគាំទ្រទិញសំបុត្រចូលទស្សនា World Cup នារី 2023 ច្រើនជាងគេរួមមាន ប្រទេសម្ចាស់ផ្ទះ នូវែសេឡង់ និងអូស្ត្រាលី, ចិន, អង់គ្លេស, កាតា, សហរដ្ឋអាម៉េរិក និងកាណាដា។

ក្នុងប្រកាសមួយ អគ្គលេខាធិការរបស់ FIFA លោកស្រី Fatma Samoura លើកឡើងថា សកម្មភាពលក់សំបុត្រសម្រាប់វគ្គផ្ដាច់ព្រ័ត្រ World Cup នារី 2023 បានចាប់ផ្ដើមយ៉ាងរលូន ក្នុងនោះមិនត្រឹមតែមានការគាំទ្រពីប្រទេសម្ចាស់ផ្ទះនោះទេ តែក៏មានការគាំទ្រច្រើនពីបណ្ដាប្រទេសជុំវិញពិភពលោកផងដែរ។ ប្រការខាងលើបង្ហាញថា មានការចាប់អារម្មណ៍កាន់តែច្រើនចំពោះបាល់ទាត់នារី។

FIFA ឱ្យដឹងថា នឹងបន្តការលក់សំបុត្រសម្រាប់ដំណាក់កាលថ្មីដើម្បីផ្ដល់ឱកាសដល់អ្នកគាំទ្របានចូលទស្សនាការប្រកួតវគ្គនានានៅ World Cup នារី 2023៕

January 18, 2023

Author: សឿន សំណាង