សឿន សំណាង - La Reine Media

ករណីបាញ់សម្លាប់មនុស្សជាង 10 នាក់នៅ California៖ ចៅម្ចាស់ក្លឹបដណ្ដើមកាំភ្លើងពីជនសង្ស័យ ទប់ស្កាត់អំពើបាញ់ប្រហារទីពីរ

វីដេអូពីកាមេរ៉ាសុវត្ថិភាពបង្ហាញថា អ្នកសរសេរកម្មវិធីកុំព្យូទ័រ Brandon Tsay បានប្រទាញប្រទង់ និងដណ្ដើមបានអាវុធពីជនសង្ស័យក្នុងករណីបាញ់សម្លាប់មនុស្សនៅ California សហរដ្ឋអាម៉េរិក។

Brandon Tsay អាយុ 26 ឆ្នាំ ទទួលបានការសរសើរថាជាវីរបុរស បន្ទាប់ពីដណ្ដើមបានកាំភ្លើងរបស់ជនសង្ស័យ Huu Can Tran ដែលមុននោះបានបាញ់សម្លាប់មនុស្សយ៉ាងតិច 11 នាក់ និងបង្ករបួសដល់មនុស្ស 9 នាក់នៅក្នុងក្លឹបកំសាន្តមួយនៅ Monterey Park រដ្ឋ California។ សកម្មភាពរបស់ Tsay ត្រូវបានវាយតម្លៃថា បានទប់ស្កាត់ករណីបាញ់ប្រហារលើកទីពីរនៅក្នុងក្លឹបរាត្រី Lai Lai ក្នុងតំបន់ Alhambra ជាទីដែល Tsay ប្រឈមមុខនឹងជនសង្ស័យ។

វីដេអូដកស្រង់ពីកាមេរ៉ាសុវត្ថិភាពនៅក្នុងក្លឹបរាត្រី Lai Lai ដែលត្រូវបាន NBC News ចុះផ្សាយក្នុងថ្ងៃទី 24 មករា បង្ហាញអំពីសកម្មភាពរបស់ Tsay និងជនសង្ស័យ Huu Can Tran ប្រទាញប្រទង់គ្នានៅក្នុងកន្លែងមិនមានមនុស្សរបស់ក្លឹប Lai Lai។

Tsay ដែលមានជីតាជាម្ចាស់ក្លឹប Lai Lai មិនបានដឹងថា ជនសង្ស័យដែលខ្លួនកំពុងប្រឈមមុខ មុននោះប្រហែល 20 នាទី បានសម្លាប់មនុស្សយ៉ាងតិច 11 នាក់ និងបង្ករបួសដល់មនុស្ស 9 នាក់នៅក្នុងក្លឹបនៅឯ Monterey Park នោះឡើយ។

https://www.youtube.com/watch?v=9QF2PCn0bjA

Tsay ត្រូវបានមនុស្សម្នាកោតសរសើរថាជាវីរបុរសដែលបញ្ចេញសកម្មភាពដ៏ក្លាហាន នៅពេលប្រឈមមុខជាមួយនឹងជនសង្ស័យក្នុងករណីបាញ់រះ។ សមត្ថកិច្ចជឿថា ជនសង្ស័យមានបំណងធ្វើការបាញ់ប្រហារជាលើកទីពីរ ប៉ុន្តែ Tsay បានទប់ស្កាត់ទាន់ពេល៕

January 24, 2023

រថយន្តអគ្គិសនីកាន់កាប់10% នៃចំណែកទីផ្សាររថយន្តសរុបនៅទូទាំងសកលលោក

ឆ្នាំ 2022 បរិមាណរថយន្តអគ្គិសនីដែលបានលក់ចេញ បានក្ដោបក្ដាប់ 10% ជាលើកដំបូងនៅក្នុងទីផ្សាររថយន្តនៅទូទាំងពិភពលោក ដោយសារកំណើននៅប្រទេសចិន និងអឺរ៉ុប។

យោងតាមការស្រាវជ្រាវរបស់ LMC Automotive និង EV-Volumes.com បរិមាណរថយន្តដើរដោយអគ្គិសនីទាំងស្រុងដែលបានលក់ចេញនៅលើពិភពលោកក្នុងឆ្នាំ 2022 សម្រេចបានប្រមាណ 7.8 លានគ្រឿង កើន 68% ធៀបនឹងឆ្នាំ 2021។

បើទោះរថយន្តអគ្គិសនីនៅតែមានចំណែកតូចក្នុងចំណោមបរិមាណរថយន្តដែលបានលក់ចេញនៅសហរដ្ឋអាម៉េរិក ប៉ុន្តែទីផ្សាររបស់វាបានកើនឡើងខ្លាំងនៅអឺរ៉ុប និងប្រទេសចិន។ រថយន្តអគ្គិសនីក៏កាន់តែមានឥទ្ធិពលលើកំណើនរំពឹងទុករបស់ទីផ្សាររថយន្ត ព្រោះតែទទួលបានការគាំទ្រពីអ្នកប្រើប្រាស់។

Ralf Brandstatter ប្រធានផ្នែកពាណិជ្ជកម្មនៅប្រទេសចិនរបស់ក្រុមហ៊ុនផលិតរថយន្ត Volkswagen បានឱ្យដឹងថា ទីផ្សាររថយន្តអគ្គិសនីនឹងបន្តរីកចម្រើនយ៉ាងឆាប់រហ័ស ហើយបរិមាណលក់ចេញនៃរថយន្តសាំងនៅប្រទេសចិននឹងចាប់ផ្ដើមធ្លាក់ចុះឆាប់ៗនេះ និងជារៀងរហូត គ្រាដែលចំណែកទីផ្សាររបស់រថយន្តអគ្គិសនីចេះតែរីកមាឌ។

«កាលពីឆ្នាំកន្លង ជាមធ្យម ក្នុងចំណោមរថយន្ត 4 គ្រឿងដែលយើងបានលក់នៅប្រទេសចិនគឺមាន 1 គ្រឿងជារថយន្តអគ្គិសនី ហើយឆ្នាំនេះ អត្រានេះគឺ 3:1។ យើងមិនទាន់សម្រេចបានដល់ចំណុចផ្ទុះនៅឡើយ ប៉ុន្តែសង្ឃឹមថានឹងកើតឡើងឆាប់ៗនេះ ក្នុងអំឡុងពេលពី 2025 ដល់ 2030» លោក Ralf Brandstatter អះអាងដូច្នេះ។

យោងតាម LMC Automotive ក្នុងឆ្នាំ 2022 រថយន្តអគ្គិសនីរួមចំណែក 11% ក្នុងបរិមាណរថយន្តសរុបដែលបានលក់ចេញនៅអឺរ៉ុប និង 19% នៅប្រទេសចិន។ រថយន្ត hybrid និងរថយន្តអគ្គិសនីទាំងស្រុងដែលបានលក់ចេញនៅអឺរ៉ុប គឺមានចំណែក 20.3% ក្នុងចំណោមរថយន្តថ្មីដែលបានលក់ចេញកាលពីឆ្នាំកន្លង នេះបើតាម EV-Volume.com។

សហរដ្ឋអាម៉េរិក អន់ថយជាងធៀបនឹងចិន និងអឺរ៉ុប ក្នុងការប្រើប្រាស់រថយន្តអគ្គិសនី។ ប៉ុន្តែ នៅទីផ្សារនេះមានរថយន្តអគ្គិសនីជាង 807,000 គ្រឿងត្រូវបានលក់ចេញនៅសហរដ្ឋអាម៉េរិកក្នុងឆ្នាំកន្លង ស្មើនឹង 5.8% ក្នុងចំណោមរថយន្តសរុបដែលបានលក់ចេញ៕

January 23, 2023

«ចំណតកង់ក្រោមទឹក» ជួយដោះស្រាយបញ្ហាធំសម្រាប់រាជធានីអាំស្ទែដាំ

(ហូឡង់) – អាជ្ញាធររាជធានីអាំស្ទែដាំ កំពុងព្យាយាមរំដោះកន្លែងចតកង់សាធារណៈដ៏ស្អេកស្កះដោយចំណតក្រោមទឹកទន្លេដែលមានតម្លៃទាប។

ក្រោមទឹកថ្លាឆ្វង់ក្បែរស្ថានីយរថភ្លើងនៅកណ្ដាលរាជធានីអាំស្ទែដាំ គឺជាចំណតកង់ដែលអាចដាក់បាន 7,000 គ្រឿង។ តាមគម្រោង ចំណត់កង់ដែលនឹងត្រូវសម្ពោធដាក់ឱ្យប្រើប្រាស់នៅថ្ងៃទី 26 មករា 2023 នេះ គឺជាសមិទ្ធផលដែលមានតម្លៃ 60 លានអឺរ៉ូ (ជិត 65 លានដុល្លារអាម៉េរិក) ដែលចាប់ផ្ដើមស្ថាបនាតាំងពី 4 ឆ្នាំមុន។

គោលដៅរបស់គម្រោងនេះគឺការរៀបចំសម្អាតកន្លែងចតកង់ខូចដែលអ្នកធ្វើដំណើរទុកចោល ដើម្បីសាងសង់ចំណតថ្មីដែលមានរបៀបរៀបរយ ស្អាត សុវត្ថិភាព និងស្ថិតនៅក្រោមទឹក។ អ្នកជិះកង់អាចចតដោយមិនគិតថ្លៃក្នុងរយៈពេល 24 ម៉ោង និងបង់ 1.46 ដុល្លារអាម៉េរិកសម្រាប់ 24 បន្ទាប់។

ជណ្ដើរយន្តមួយនឹងនាំភ្ញៀវឡើងទៅកាន់ចំណតរថភ្លើងនៅក្បែរនោះ ជាទីដែលមានរថភ្លើងទៅមកជាង 200,000 ជើងជារៀងរាល់ថ្ងៃ។ ចំណត់កង់មួយកន្លែងផ្សេងទៀតក៏ទើបត្រូវបានសាងសង់រួចរាល់នៅក្បែរកំពង់ផែ IJ ដោយខ្ទង់ប្រាក់វិនិយោគ 27 លានដុល្លារអាម៉េរិក និងអាចដាក់កង់បានជាង 4,000 គ្រឿង។

ចំណត់កង់ខាងលើត្រូវបានគ្រប់គ្រងដោយប្រព័ន្ធឆ្លាតវៃ អាចឱ្យម្ចាស់កង់ដឹងថា ទីតាំងណានៅសល់កន្លែងចតចំនួនប៉ុន្មាន។

«ស្ថានីយរថភ្លើងកណ្ដាលក្រុងគឺជាទីតាំងមមាញឹកបំផុតនៅអាំស្ទែដាំ» Pieter Visser ប្រធានគម្រោងចំណតកង់របស់រាជធានីនិយាយដូច្នេះ។ «មនុស្សជាច្រើនយកទីសាធារណៈធ្វើជាកន្លែងចតកង់។ រាជធានីចង់ធ្វើចំណតកង់ក្រោមដីដើម្បីទុកផ្លូវសាធារណៈសម្រាប់អ្នកថ្មើរជើង ទេសចរ និងជនពិការ»។

យោងតាម BOVAG និង RAI ដែលជាអង្គការស្រាវជ្រាវលើយានយន្ត បច្ចុប្បន្នហូឡង់មានកង់ជាង 23.4 លានគ្រឿង បើទោះមានប្រជាជនតែ 17.8 លាននាក់។ កង់គឺជាមធ្យោបាយធ្វើដំណើរពេញនិយមបំផុតនៅហូឡង់ ពិសេសគឺរាជធានីអាំស្ទែដាំ។

នៅហូឡង់ សូម្បីតែស្ត្រីមានផ្ទៃពោះក៏ចូលចិត្តជិះកង់ដែរ

ចំពោះវិស័យផ្លូវដែក គម្រោងស្ថានីយកង់ក្រោមទឹកបឹង ក៏ជួយឱ្យការធ្វើដំណើរដោយរថភ្លើងអគ្គិសនីរបស់ប្រជាជន មានភាពងាយស្រួល និងទាក់ទាញជាងមុន។

ចំណតកង់ក្រោមដី

ប្រជាជននៅអាំស្ទែដាំបានសម្ដែងការសប្បាយរីករាយនៅពេលគម្រោងចំណតកង់ជិតត្រូវបានដាក់ឱ្យប្រើប្រាស់។ Marco te Brommelstroet ប្រធានវិទ្យាស្ថានកង់ទីក្រុងនៅសាកលវិទ្យាល័យអាំស្ទែដាំ បានឱ្យដឹងថា គន្លឹះជោគជ័យរបស់គមនាគមន៍សាធារណៈគឺការតភ្ជាប់បណ្ដាប្រភេទមធ្យោបាយធ្វើដំណើរជាមួយគ្នា។

សកម្មភាពសាងសង់ចំណតកង់ក្រោមទឹកនៅអាំស្ទែដាំ ប្រទេសហូឡង់

ចំណែក Lucas Snaije ប្រធានផ្នែកស្រាវជ្រាវ និងតស៊ូមតិរបស់អង្គការគាំទ្រការជិះកង់ BYCS ឱ្យដឹងថា គម្រោងខាងលើអាចជាគំរូសម្រាប់បណ្ដាប្រទេសយកទៅអនុវត្តតាមដើម្បីលើកទឹកចិត្តប្រជាជនឱ្យនាំគ្នាងាកមកជិះកង់៕

January 23, 2023

យន្តហោះប្រើ «ម៉ាស៊ីនអ៊ីដ្រូសែន» ធំជាងគេលើពិភពលោក ហោះហើរជាលើកដំបូង

យន្តហោះ Dornier 228 មានកៅអីចំនួន 19 របស់ក្រុមហ៊ុន ZeroAvia ធ្វើការហោះហើរសាកល្បងដំបូងនៅប្រទេសអង់គ្លេស កាលពីថ្ងៃទី 20 មករា 2023។

ការហោះហើរសាកល្បងនេះជួយឱ្យគេដឹងពីស្ថានភាពបច្ចេកវិទ្យាអាកាសចរណ៍ស្អាតរបស់ ZeroAvia ដែលប្រើប្រាស់ប្រព័ន្ធអ៊ីដ្រូសែន-អគ្គិសនីមិនបំភាយឧស្ម័នពុល ហើយគ្រោងនឹងសុំអាជ្ញាប័ណ្ណ និងហោះហើរពាណិជ្ជកម្មនៅឆ្នាំ 2025។

បន្ទាប់ពីត្រូវបានប្រកាសកាលពីឆ្នាំ 2021 កម្មវិធី HyFlyer II បន្តការប្រឹងប្រែងរបស់ ZeroAvia ក្នុងបំណងបញ្ជាក់ថា អ៊ីដ្រូសែន គឺជាអនាគតរបស់វិស័យអាកាសចរណ៍។ កម្មវិធី HyFlyer បានចាប់ផ្ដើមដំបូងដោយការហោះហើររបស់យន្តហោះ 6 កៅអី កាលពីឆ្នាំ 2020។ នោះគឺជាយន្តហោះដែលដំណើរការដោយអ៊ីដ្រូសែនធំជាងគេដែលធ្លាប់ហោះហើរនៅពេលនោះ។ បច្ចុប្បន្ន យន្តហោះគំរូនេះ ហោះហើរបានជាង 30 ជើងរួចហើយ។

កាលពីឆ្នាំ 2021 យន្តហោះមួយគ្រឿងមានកៅអី 2 របស់ក្រុមហ៊ុនខាងលើបានជួបបញ្ហា ប៉ុន្តែមិនមែនដោយសារប្រព័ន្ធដែលទាក់ទិននឹងអ៊ីដ្រូសែនឡើយ។ មួយក្នុងចំណោមយន្តហោះគំរូ 9 កៅអីរបស់ ZeroAvia បានឈានចូលដល់ដំណាក់កាលសាកល្បងជាលើកដំបូង។ ZeroAvia បំពាក់ម៉ាស៊ីនចំហេះក្នុង Honeywell TPE-331 នៅស្លាបខាងស្ដាំង និងម៉ូទ័រអគ្គិសនី 600 គីឡូវ៉ាត់នៅស្លាបខាងឆ្វេង។

ZeroAvia សង្ឃឹមថា ពួកគេនឹងអាចដាក់ពាក្យស្នើសុំអាជ្ញាប័ណ្ណនៅចុងឆ្នាំនេះ ហើយថាប្រព័ន្ធរុញច្រាន 600 គីឡូវ៉ាត់នេះនឹងទទួលបានអាជ្ញាប័ណ្ណ និងបម្រើដល់វិស័យពាណិជ្ជកម្មលើយន្តហោះ 9-19 កៅអីនៅឆ្នាំ 2025។

យន្តហោះ Dornier 228 មានកៅអីចំនួន 19 របស់ក្រុមហ៊ុន ZeroAvia ធ្វើការហោះហើរសាកល្បងដំបូងនៅប្រទេសអង់គ្លេស កាលពីថ្ងៃទី 20 មករា 2023

សូមបញ្ជាក់ថា «អ៊ីដ្រូសែនគឺជាថាមពលបៃតង» ពីព្រោះថា ម៉ូទ័រដែលប្រើថាមពលអ៊ីដ្រូសែនបញ្ចេញកាកសំណល់មកវិញជាចំហាយទឹកសុទ្ធសាធ ដោយមិនបំភាយឧស្ម័នកាបូនដូចជាថាមពលហ្វូស៊ីល នេះបើសិនមិននិយាយដល់ដំណាក់កាលផលិតអ៊ីដ្រូសែន៕

January 23, 2023

ការប្រកួតដំបូងរបស់ Ronaldo ក្នុងអាវ Al Nassr ពេលប៉ះ Al Ettifaq នៅ Saudi Pro League 2022-2023

Ronaldo បានទាត់ក្នុងការប្រកួតដំបូងរបស់ខ្លួននៅក្នុងអាវរបស់ក្លឹប Al Nassr នៅអារ៉ាប៊ីសាអូឌីត ប៉ុន្តែវត្តមានរបស់គាត់មិនអាចទាក់ទាញចំណាប់អារម្មណ៍ពីទស្សនិកជនបានទាំងអស់នោះឡើយ។

ក្រោយការបញ្ចប់ការប្រកួតមិត្តភាពជាប្រវត្តិសាស្ត្រជាមួយនឹង PSG កំពូលតារាបាល់ទាត់ Cristiano Ronaldo ក៏បានឈានចូលដល់ការប្រកួតដំបូងក្នុងអាវរបស់ Al Nassr ហើយគូប្រជែងរបស់ CR7 និង Al Nassr គឺក្រុម Al Ettifaq។ គ្រាប់បាល់តែមួយគ្រាប់ដែល Al Nassr រកបានក្រោមថ្វីជើងរបស Talisca បានជួយឱ្យ Al Nassr បន្តរក្សាបានតំណែងកំពូលតារាងចំណាត់ថ្នាក់របស់ពានរង្វាន់ជើងឯកថ្នាក់ជាតិនៅអារ៉ាប៊ីសាអូឌីត។

ការប្រកួតដែលមានវត្តមានដំបូងរបស់ Ronaldo ធ្វើឱ្យក្រុមអ្នកគាំទ្ររបស់ Al Nassr មានការត្រេកអរ និងអបអរសាទរយ៉ាងខ្លាំងក្លា។ ប៉ុន្តែ នៅមានកីឡាករមួយរូបទៀតរបស់ Al Nassr ដែលបានទាក់ទាញចំណាប់អារម្មណ៍ខ្លាំងផងដែរនៅក្នុងការប្រកួតនេះ។

ជាក់ស្ដែង អ្នកគាំទ្រមួយក្រុមបានបង្ហោះប៉ោងប៉ោងដែលមានចងអាវរបស់អ្នកចាំទី David Ospina។ ក្នងរដូវកាលនេះ Ospina គឺជាមូលហេតុសំខាន់ដែលជួយឱ្យ Al Nassr ស្ថិតនៅលើកំពូលតារាងចំណាត់ថ្នាក់ នៅពេលរក្សាទីបានស្អាតនៅក្នុង 7/14 ប្រកួត។

ចំណែក Ronaldo វិញ បើទោះរកគ្រាប់បាល់មិនទាន់បាន ប៉ុន្តែក៏ទទួលបានជោគជ័យក្នុងការប្រកួតដំបូងរបស់ Al Nassr។ បាល់ដែលគ្រោះថ្នាក់បំផុតរបស់ Ronaldo គឺការស៊ុតពិន័យពីចម្ងាយ 25 ម៉ែត្រ។ Ronaldo ក៏ប្លោងគ្រាប់បាល់ឱ្យមិត្តរួមក្រុមទាត់ក្បាច់វូឡេ ប៉ុន្តែខ្ពស់ហួសទី និងឈុតស៊ុតប៉ើងអ្នកចាំទីប៉ុន្តែមិនបានសម្រេច។

Al Nassr រកបាន 1 គ្រាប់នៅនាទីទី 31 នាំឱ្យ Al Nassr ឈ្នះ Al Ettifaq 1-0។ បន្ទាប់ពី Ronaldo តែតខុសបាល់ពិន័យពីស្លាបខាងឆ្វេង Anderson Talisca ក៏តែតបន្តបានជោគជ័យ។ នេះគឺជាគ្រាប់បាល់ទី 12 របស់ Talisca រាប់ចាប់ពីដើមរដូវកាល Saudi Pro League 2022-2023។

Al Nassr បន្តនាំមុខគេក្រោយពីបានឈ្នះ Al Ettifaq។ ពាន់រង្វាន់បាល់ទាត់ Saudi Pro League មាន 16 ក្រុមចូលរួម និងត្រូវទាត់ 30 ជុំ។

ថ្ងៃទី 26 មករា Al Nassr នឹងត្រូវប៉ះ Al-Ittihad នៅវគ្គពាក់កណ្ដាលផ្ដាច់ព្រ័ត្ររបស់ Saudi Super Cup។ Al Hilal នឹងប៉ះ Al Fayha ក្នុងគូដែលនៅសល់របស់វគ្គពាក់កណ្ដាលផ្ដាច់ព្រ័ត្រ។ វគ្គផ្ដាច់ព្រ័ត្រនឹងធ្វើឡើងនៅថ្ងៃទី 29 មកា 2023។

https://www.youtube.com/watch?v=-gGN8kl_9Es

ក្រុម Al Nassr រកបាន 1 គ្រាប់ដែលមិនមែនជាថ្វីជើងរបស់ Ronaldo នៅនាទីទី 31 នាំឱ្យ Al Nassr ឈ្នះ Al Ettifaq 1-0 នៅ Saudi Pro League កាលពីថ្ងៃទី 22 មករា 2023

ក្នុងរដូវកាល 2022-2023 Al Nassr ក៏ចូលរួមប្រកួតនៅ King Cup ផងដែរ។ ពួកគេនឹងប៉ះ Abha ក្នុងវគ្គ 4 ក្រុមចុងក្រោយនៅថ្ងៃទី 14 មីនា។ បើសិនដណ្ដើមបានពានជើងឯក Saudi Pro League ឬ King Cup ក្រុមរបស់ Ronaldo នឹងបានឡើងទៅប្រកួតដណ្ដើមពានរង្វាន់ AFC Champions League រដូវកាលក្រោយ៕

January 23, 2023

មនុស្សទីពីរដែលបានដើរលើដីឋានព្រះចន្ទ រៀបការក្នុងវ័យជាង 90 ឆ្នាំ

អវកាសចរ Edwin Aldrin ដែលជាមនុស្សទីពីរបានដើរលើដីឋានព្រះចន្ទកាលពីឆ្នាំ 1969 បានរៀបការក្នុងថ្ងៃខួបកំណើតលើកទី 93 ជាមួយនឹងកូនក្រមុំវ័យ 64 ឆ្នាំ។

«នៅក្នុងថ្ងៃខួបកំណើតលើកទី 93 របស់ខ្ញុំ និងជាថ្ងៃដែលខ្ញុំបានទទួលពានរង្វាន់ Living Legends of Aviation ខ្ញុំរីករាយ និងសូមប្រកាសថា ខ្ញុំ និងគូស្នេហ៍យូរឆ្នាំ Anca Faur បានរៀងការ» អតីតអ្នកអវកាស Edwin “Buzz” Aldrin ប្រកាសលើ Twitter ស្ដីពីអាពាហ៍ពិពាហ៍កាលពីថ្ងៃទី 20 មករា 2023។

«យើងបានធ្វើពិធីរៀបមង្គលការដ៏ឧត្ដុង្គឧត្ដម ប៉ុន្តែមានលក្ខណៈជាឯកជននៅ Los Angeles និងមានការរំភើបដូចយុវវ័យដទៃ» លោក Edwin Aldrin បន្ថែមដូច្នេះ។

ក្នុងសំណេរ លោក Edwin Aldrin ក៏បង្ហោះអមជាមួយនឹងរូបថតដែលគាត់ស្លៀកពាក់ឈុត tuxedo ហើយកូនក្រមុំ Faur ក្នុងឈុតរ៉ូបដៃវែងផងដែរ។

អតីតអវកាសចរ Edwin Aldrin និងគូស្នេហ៍យូរឆ្នាំ Anca Faur

កើតឆ្នាំ 1959 អ្នកស្រី Anca Faur គឺជាប្រធានគម្រោងរបស់ក្រុមហ៊ុនវិទ្យាសាស្ត្រ និងគីមី Johnson Matthey។ អ្នកស្រី ក៏ជាអនុប្រធានរបស់ក្រុមហ៊ុន Buzz Aldrin Venture ចាប់ពីឆ្នាំ 2019។

លោក Edwin Aldrin បានរៀបការជាលើកដំបូងកាលពីឆ្នាំ 1954 ជាមួយនឹង Joan Archer។ អ្នកទាំងពីរមានកូនជាមួយគ្នា 3 នាក់ មុនពេលលែងលះកាលពីឆ្នាំ 1974។ ក្រោយមក Edwin Aldrin ក៏បានរៀបការជាមួយ Beverly Van Zile កាលពីឆ្នាំ 1975 និងរស់នៅជាមួយគ្នាបាន 3 ឆ្នាំ។ បន្ទាប់មកទៀត លោក Edwin Aldrin

ក៏បានរៀបការជាមួយនឹង Lois Driggs Cannon ក្នុងឆ្នាំ 1988 និងរស់នៅជាមួយគ្នាបាន 24 ឆ្នាំ មុនពេលលែងលះ។

(ពីឆ្វេងទៅស្ដាំ) លោក Neil Armstrong, Michael Collins និង Buzz Aldrin

កាលពីខែកក្កដា 1969 យានអវកាស Apollo 11 រួមនឹងអវកាសចរ 3 រូប ដែលរួមមានលោក Neil Armstrong, Buzz Aldrin និងពីឡុត Michael Collins បានធ្វើដំណើរទៅកាន់ឋានព្រះចន្ទ។ ពួកគេចំណាយពេល 4 ថ្ងៃដើម្បីបញ្ចប់ដំណើរហោះហើរក្នុងរយៈចម្ងាយជាង 400,000 គីឡូម៉ែត្រ។

លោក Armstrong បានស្ថិតនៅលើដីរបស់ព្រះចន្ទក្នុងរយៈពេល 2 ម៉ោង និង 32 នាទី ខណៈលោក Aldrin តិចជាងនេះប្រហែល 15 នាទី។ អវកាសចរទាំងពីរបានដោតទង់ជាតិអាម៉េរិក រើសយកសំណាកដុំថ្ម និងធ្វើការពិសោធមុនពេលត្រលប់មកកាន់យានអវកាស។ អវកាសចរទាំង 3 រូបខាងលើរបស់ក្រុម Apollo 11 បានត្រលប់មកកាន់ផែនដីវិញដោយសុវត្ថិភាព និងត្រូវបានទទួលយ៉ាងគគ្រឹកគគ្រេងដូចទៅនឹងវីរបុរស៕

January 23, 2023

ករណីបាញ់ប្រហារក្នុងថ្ងៃចូលឆ្នាំថ្មីនៅ Los Angeles សម្លាប់មនុស្ស 10 នាក់ ៖ ប៉ូលិសរកឃើញជនសង្ស័យ

មនុស្សយ៉ាងហោច 10 នាក់បានស្លាប់ និង 10 នាក់រងរបួសនៅក្នុងហេតុការណ៍បាញ់ប្រហារកាលពីយប់ថ្ងៃទី 21 មករា នៅឯក្លឹបមួយក្នុងពិធីអំណរបុណ្យចូលឆ្នាំចន្ទគតិនៅទីប្រជុំជន Monterey Park នៃទីក្រុង Los Angeles រដ្ឋ California សហរដ្ឋអាម៉េរិក។

សមត្ថកិច្ចបានឱ្យដឹងថា ករណីបាញ់ប្រហារនៅឯឧទ្យាន Monterey នេះកើតឡើងពេលប្រជាជនកំពុងធ្វើពិធី អំណរបុណ្យឆ្នាំថ្មីចន្ទគតិ។ មនុស្សយ៉ាងហោច 10 នាក់ត្រូវបានបាញ់សម្លាប់ និងប្រហែល 10 នាក់ផ្សេងទៀតបានរងរបួស និងត្រូវបានបញ្ជូនទៅកាន់មន្ទីរពេទ្យ។

ថ្មីៗនេះ ប៉ូលិសក្នុងតំបន់បានឱ្យដឹងថា បានរកឃើញរថយន្តពណ៌សមួយគ្រឿងនៅ Torrance រដ្ឋ California ដែលមានសាកសពមនុស្សម្នាក់នៅខាងក្នុង។ សមត្ថកិច្ចជឿថា រថយន្តនេះជាប់ទាក់ទិននឹងករណីបាញ់ប្រហារ ប៉ុន្តែមិនទាន់ប្រាកដថា អ្នកបើកបរដែលបានស្លាប់នោះគឺជាជនសង្ស័យ ឬយ៉ាងណានៅឡើយ។

ពិធីបុណ្យខាងលើតែងត្រូវបានប្រារព្ធឡើងរៀងរាល់ឆ្នាំ និងមានមនុស្សចូលរួមប្រហែល 100,000 នាក់រៀងរាល់ថ្ងៃ។ តំបន់ Monterey មានប្រជាជនដើមកំណើតអាស៊ីប្រហែល 65%។

ពិធីអំណរបុណ្យចូលឆ្នាំថ្មីចន្ទគតិកាលពីថ្ងៃទី 22 មករា 2023 ខាងលើត្រូវបានលុបចោលក្រោយពីមានហេតុការណ៍បាញ់ប្រហារនេះ៕

ប៉ូលិសរកឃើញសាកសពមនុស្សម្នាក់ក្នុងរថយន្តពណ៌សមួយគ្រឿង

January 23, 2023

គ្រូបង្វឹកថ្មីរបស់ក្រុមបាល់ទាត់ជម្រើសជាតិព័រទុយហ្កាល់ ទៅជួប Cristiano Ronaldo

សារព័ត៌មានអង់គ្លេស ថ្មីៗនេះបានផ្សាយថា គ្រូបង្វឹក Roberto Martinez របស់ក្រុមបាល់ទាត់ជម្រើសជាតិព័រទុយហ្កាល់ បានទៅជួប Ronaldo នៅអារ៉ាប៊ីសាអូឌីត ដើម្បីពិភាក្សាអំពីអនាគតរបស់ CR7 នៅក្នុងក្រុមជម្រើសជាតិ។

ក្រោយបរាជ័យនៅ World Cup 2022 ពេលត្រូវចាញ់ម៉ារ៉ុកត្រឹមវគ្គ ¼ ក្រុមជម្រើសជាតិព័រទុយហ្កាល់បានឆ្លងកាត់ការប្រែប្រួលច្រើនបន្ទាប់ពីគ្រូបង្វឹក Fernando Santos ត្រូវបានបញ្ឈប់ពីតួនាទីក្រោយពីបានប្រឹងប្រែងជាមួយក្រុមអស់ជាច្រើនឆ្នាំ។ ចំណែកអនាគតរបស់ Cristiano Ronaldo ក៏បានជួបនឹងកាលៈទេសៈលំបាកច្រើនផងដែរ ក្រោយពីលេងមិនបានល្អនៅ World Cup 2022 ដែលដើមហេតុអាចបណ្ដាលមកពីមានទំនាក់ទំនងមិនសូវល្អជាមួយនឹងគ្រូបង្វឹក Fernando Santos។

ក្រោយការចាកចេញរបស់គ្រូបង្វឹក Fernando Santos ក្រុមជម្រើសជាតិព័រទុយហ្កាល់ក៏រកបានមនុស្សមកជំនួសភ្លាម នោះគឺ Roberto Martinez ដែលជាគ្រូបង្វឹកបានចាកចេញពីក្រុមជម្រើសជាតិបែលហ្ស៊ិក បន្ទាប់ពីបរាជ័យនៅកាតាកាលពីឆ្នាំ 2022។

គ្រូបង្វឹក Roberto Martinez ចូលមកដឹកនាំក្រុមជម្រើសជាតិ ក្រោយពីគ្រូបង្វឹក Fernando Santos ត្រូវបានបញ្ឈប់ពីតួនាទី បន្ទាប់ពីព័រទុយហ្កាល់បានបរាជ័យនៅ World Cup 2022

បច្ចុប្បន្ន Ronaldo បានចាកចេញពី Man United និងកំពុងលេងឱ្យ Al Nassr របស់អារ៉ាប៊ីសាអូឌីត ហើយទើបតែបានប៉ះ Messi និង Mbappe របស់ PSG កាលពីម្សិលមិញ។ Daily Mail បង្ហើបឱ្យដឹងថា មុនការប្រកួតនេះ Ronaldo បានជួបពិភាក្សាជាមួយគ្រូបង្វឹករបស់ព័រទុយហ្កាល់។

ក្នុងជំនួបនោះ គ្រូបង្វឹក Roberto Martinez បានបញ្ជាក់អំពីលទ្ធភាពដែល Ronaldo អាចចូលរួមប្រកួតនៅ Euro 2024 ដែលពេលនោះនឹងគាត់មានអាយុ 41 ឆ្នាំ។ គ្រូបង្វឹករូបនេះចង់ឱ្យ Ronaldo បន្តកាន់តួនាទីជាប្រធានក្រុមកីឡាករជម្រើសជាតិនៅវគ្គជម្រុះរបស់ Euro 2024 ហើយបើ Ronaldo បានបង្ហាញសមត្ថភាពល្អ គាត់ប្រាកដជាបានទៅចូលរួមប្រកួតនៅ Euro 2024 មិនខាន៕

January 21, 2023

នាយករដ្ឋមន្ត្រីអង់គ្លេសត្រូវប៉ូលិសចរាចរណ៍ផាកពិន័យព្រោះមិនដាក់ខ្សែក្រវាត់សុវត្ថិភាព

នាយករដ្ឋមន្ត្រី Rishi Sunak អាចត្រូវបានផាកពិន័យឡើងដល់ 620 ដុល្លារអាម៉េរិក ដោយសារមិនបានដាក់ខ្សែក្រវាត់សុវត្ថិភាពនៅពេលអង្គុយក្នុងរថយន្តកំពុងផ្លាស់ទី។

«ថ្ងៃនេះ យើងបានប្រកាសពីការផាកពិន័យថេរចំពោះបុរសម្នាក់អាយុ 42 ឆ្នាំ មកពីទីក្រុងឡុងដ៍» ប៉ូលិសស្រុក Lancashire នៅភាគពាយព្យប្រទេសអង់គ្លេសបានឱ្យដឹងដូច្នេះនៅលើ Twitter កាលពីថ្ងៃទី 20 មករា 2023 ដែលចង់រម្លឹកដល់ករណីនាយករដ្ឋមន្ត្រី Rishi Sunak។

ប្រកាសស្ដីពីការផាកពិន័យថេរគឺមានន័យថា លោក Sunak អាចបង់ប្រាក់ពិន័យដើម្បីបញ្ចៀសការឡើងតុលាការ។ ចំណែកអ្នកនាំពាក្យរបស់ការិយាល័យនាយករដ្ឋមន្ត្រីអង់គ្លេសបានប្រាប់ថា មេដឹកនាំអង់គ្លេស «សារភាពថា បានបង្កឱ្យមានកំហុស»។

កម្រិតនៃការផាកពិន័យចំពោះអ្នកមិនដាក់ខ្សែក្រវាត់សុវត្ថិភាពនៅលើកៅអីរថយន្តដែលកំពុងផ្លាស់ទីនៅអង់គ្លេសគឺ 100 ផោន (124 ដុល្លារអាម៉េរិក)។ បើសិនករណីនេះត្រូវបានឡើងដល់តុលាការ លោក Sunak អាចនឹងត្រូវបង់ប្រាក់ឡើងដល់ 500 ផោន (620 ដុល្លារអាម៉េរិក)។

មុននោះ កាលពីថ្ងៃទី 19 មករា នាយករដ្ឋមន្ត្រីអង់គ្លេសដើមកំណើតឥណ្ឌា លោក Rishi Sunak បានបង្ហោះវីដេអូលើបណ្ដាញសង្គម។ ក្នុងវីដេអូនេះបង្ហាញថា លោក Sunak មិនបានដាក់ខ្សែក្រវាត់សុវត្ថិភាពនៅពេលរថយន្តកំពុងផ្លាស់ទី។ ក្រោយមក លោកក៏បានសូមអភ័យទោស និងបានលុបវីដេអូនេះចេញពី Instagram។

សមត្ថកិច្ចក្នុងតំបន់ បន្ទាប់មកក៏បានប្រកាសធ្វើការស៊ើបអង្កេត និងបានបញ្ជាក់ថា នាយករដ្ឋមន្ត្រីអង់គ្លេស បានរំលោភច្បាប់ចរាចរណ៍ពិតមែន៕

January 21, 2023

លោតម៉ុងសាយក្រោមទឹកដើម្បីទទួលអំណរបុណ្យចូលឆ្នាំថ្មីប្រពៃណីចិន

(ម៉ាឡេស៊ី) – អ្នកមុជទឹកមួយក្រុមនៅឯអាងពិព័រណ៍ត្រីមួយកន្លែងក្នុងរដ្ឋធានីកូឡាឡាំពួ ស្លៀកពាក់ឈុតម៉ុងសាយ និងបំពាក់ដោយបំពង់អុកស៊ីសែន នាំគ្នាលោតសម្ដែងក្នុងទឹកអាងពិព័រណ៍ត្រី Aquaria KLCC។

«ការសម្ដែងម៉ុងសាយនៅលើគោកស្ទើរតែទាំងអស់ ទាមទារឱ្យមានភាពទន់ភ្លន់កម្រិតខ្ពស់។ យើងបង្កើតព្រឹត្តិការណ៍លោតម៉ុងសាយក្រោមទឹក ហើយនេះក៏ទាមទារឱ្យមានបច្ចេកទេសប្រហាក់ប្រហែល គ្រាន់តែខុសត្រង់ថា នៅពេលអ្នកសម្ដែងលោតឡើង ពួកគេនឹងត្រូវអណ្ដែតដោយសារស្ថិតនៅក្នុងទឹក» Daryl Foong ប្រធានអាងពិព័រណ៍ត្រី Aquaria KLCC កាលពីថ្ងៃទី 18 បានឱ្យដឹងដូច្នេះ។

អាងពិព័រណ៍ត្រី Aquaria KLCC ជួលក្រុមអ្នកមុជទឹកមកធ្វើជាអ្នកលោតម៉ុងសាយនៅឯបឹងចិញ្ចឹមត្រី និងអណ្ដើកសមុទ្រ។ ពួកគេមានក្រុមតន្ត្រីប្រគំភ្លេងកំដរនៅខាងក្រៅដើម្បីបង្កើតបរិយាកាសអ៊ឹកធឹកសម្រាប់ការសម្ដែងរបស់ក្រុមលោតម៉ុងសាយក្នុងទឹក។

ក្រុមអ្នកលោតម៉ុងសាយនេះ ប្រដាប់ដោយបំពង់អុកស៊ីសែន និងឈុតម៉ុងសាយប្រភេទស្រាលជាងធម្មតា ដើម្បីធ្វើចលនាក្នុងទឹកបានរហ័ស។ អាងពិព័រណ៍ត្រី Aquaria KLCC បានបង្កើតឱ្យមានព្រឹត្តិការណ៍អបអរចូលឆ្នាំប្រពៃណីចិនបែបនេះជាច្រើនឆ្នាំមកហើយ។

Daryl Foong ឱ្យដឹងថា ក្រុមអ្នកមុជទឹកត្រូវឆ្លងកាត់ការហ្វឹកហាត់ដើម្បីអាចសម្ដែងក្បាច់រាំទៅតាមក្បួននៃការលោតម៉ុងសាយ។

ការលោតម៉ុងសាយគឺជាទំនៀមទម្លាប់បុរាណដើម្បីទទួលអំណរបុណ្យចូលឆ្នាំថ្មីប្រពៃណីរបស់ពលរដ្ឋដើមកំណើតចិននៅម៉ាឡេស៊ី។ គិតត្រឹមឆ្នាំ 2019 ប្រទេសនេះមានប្រជាជនសរុប 32 លាននាក់ ដែលភាគច្រើនជាជនជាតិមូស្លីម និង ¼ គឺជាពលរដ្ឋដើមកំណើតចិន៕

*វីដេអូ «លោតម៉ុងសាយក្រោមទឹកដើម្បីទទួលអំណរបុណ្យចូលឆ្នាំថ្មីប្រពៃណីចិន»

January 21, 2023

Author: សឿន សំណាង