សឿន សំណាង - La Reine Media

អាកាសធាតុនៅកម្ពុជានឹងចុះត្រជាក់ខ្លាំង ពិសេសនៅតំបន់ខ្ពង់រាប និងពាយព្យ នៅចុងខែនេះ

ស្ថានភាពអាកាសធាតុនៅតំបន់ខ្ពង់រាប និងតំបន់ពាយព្យរបស់កម្ពុជា នឹងចុះត្រជាក់ខ្លាំងរហូតដល់ 14 អង្សាសេ នៅចុងខែមករា 2023 នេះបើតាមប្រកាសនាព្រឹកថ្ងៃទី 27 មករា របស់ ក្រសួងធនធានទឹក និងឧតុនិយម។

យោងតាម ក្រសួងធនធានទឹក ចាប់ពីថ្ងៃនេះរហូតដល់ថ្ងៃទី 30 មករា ទ្រនុងសម្ពាធខ្ពស់ពីចិន និងខ្យល់មូសុងឦសាន្ត បន្តបង្កើនឥទ្ធិពលក្នុងកម្រិតពីបង្គួរ ទៅខ្លាំងមកលើកម្ពុជា ដែលនឹងធ្វើឱ្យអាកាសធាតុបន្តចុះត្រជាក់បន្ថែមទៀត។ សីតុណ្ហភាពនៅតាមបណ្តាខេត្តនៅតំបន់ខ្ពង់រាប និងតំបន់ភាគពាយព្យ នឹងចុះត្រជាក់ខ្លាំងជាងសព្វមួយដង ដោយអាចធ្លាក់ចុះដល់ 14 ទៅ 16 អង្សា។

នៅរាជធានីភ្នំពេញ សីតុណ្ហភាពអប្បបរមាអាចធ្លាក់ចុះដល់ 20 អង្សា ខណៈដែលបណ្តាខេត្តដទៃទៀត សីតុណ្ហភាពអប្បបរមានឹងចុះដល់ 17 ទៅ 21 អង្សាសេ។

ក្រសួងធនធានទឹក បានធ្វើការអំពាវនាវឱ្យបងប្អូនប្រជាពលរដ្ឋទាំងអស់បង្កើនការប្រុងប្រយ័ត្នចំពោះស្ថានភាពអាកាសធាតុនេះ៕

January 27, 2023

យន្តហោះ «កូនកាត់អគ្គិសនី» គ្មានមនុស្សបើកបរ មានល្បឿនដល់ 240 គីឡូម៉ែត្រ/ម៉ោង

យន្តហោះ Cento អាចផ្ទុកទំនិញបាន 45 គីឡូក្រាម និងហោះបានចម្ងាយ 1,000 គីឡូម៉ែត្រ ដោយប្រើប្រាស់ប្រព័ន្ធម៉ាស៊ីន hybrid ដ៏មានស្ថិរភាព។

ក្រុមហ៊ុនអាម៉េរិក MightyFly អភិវឌ្ឍ Cento ដែលជាយន្តហោះដឹកទំនិញគ្មានមនុស្សបើកបរ មានគ្រោងឆ្អឹងធ្វើពីសរសៃកាបូន នេះបើតាម New Atlas ចុះផ្សាយកាលពីថ្ងៃទី 25 មករា។ Cento មានទម្ងន់ 161 គីឡូក្រាម និងអាចដឹកទំនិញបាន 45 គីឡូក្រាម។ យន្តហោះនេះមានស្លាបវែងចំនួន 2, ស្លាបកង្ហារចំនួន 8 បំពាក់លើឧបករណ៍មួយគូដែលដូចទៅនឹងឈ្នាន់ឧទ្ធម្ភាគចក្រ និងស្លាបកង្ហារធំមួយនៅខាងក្រោយដើម្បីរុញច្រានឱ្យហោះទៅមុខបានលឿន។ Cento អាចហោះក្នុងល្បឿនអតិបរមា 240 គីឡូម៉ែត្រ/ម៉ោង លឿនជាងឆ្ងាយធៀបនឹងការដឹកជញ្ជូនតាមផ្លូវគោក។

យន្តហោះនេះ អាចហោះបានចម្ងាយ 1,000 គីឡូម៉ែត្រ ដោយប្រើប្រាស់ប្រព័ន្ធម៉ាស៊ីន hybrid ដ៏មានស្ថិរភាព។ ម៉ាស៊ីនរុញច្រានទាំងអស់របស់ Cento ដំណើរការដោយអគ្គិសនី ប៉ុន្តែមានម៉ាស៊ីនចំហេះក្នុងមួយគ្រឿងដែលដើរដោយថាមពល អ៊ីដ្រូកាបូន (hydrocarbon) ដើម្បីរក្សាអគ្គិសនីក្នុងថ្មផ្ទុកថាមពលឱ្យនៅពេញក្នុងអំឡុងពេលហោះហើរ។

Cento មានទំហំ 4 ម x 5 ម តូចជាងបន្តិចធៀបនឹងរថយន្តពីរគ្រឿង។ ដូច្នេះ នៅពេលយន្តហោះនេះត្រូវបានដាក់ឱ្យប្រើប្រាស់ អតិថិជនត្រូវការតែចំណតតូចមួយដើម្បីទទួលទំនិញ។ ម្ចាស់ទំនិញក៏នឹងមិនចាំបាច់បើកទ្វារយន្តហោះដោយខ្លួនឯង ព្រោះថា Cento នឹងបំពាក់ប្រព័ន្ធទ្វារបើកបិទស្វ័យប្រវត្តដើម្បីជួយឱ្យការលើកដាក់ទំនិញមានភាពងាយស្រួល។

ក្រុមហ៊ុន MightyFly បានឱ្យដឹងថា Cento បានចាប់ផ្ដើមសាកល្បងហោះហើរតាំងពីខែធ្នូ 2022។ រដ្ឋបាលអាកាសចរណ៍អាម៉េរិក (FAA) បានផ្ដល់អាជ្ញាប័ណ្ណសម្រាប់ការហោះហើរសាកល្បង ប៉ុន្តែមិនទាន់អនុញ្ញាតឱ្យដឹកទំនិញបែបពាណិជ្ជកម្ម។

MightyFly មិនទាន់ប្រកាសពេលវេលាដែល Cento នឹងត្រូវដាក់ឱ្យដំណើរការពាណិជ្ជកម្មនៅឡើយ។ ក្រុមហ៊ុននេះក៏កំពុងអភិវឌ្ឍយន្តហោះមួយប្រភេទទៀតដែលអាចដឹកទំនិញឡើងដល់ 227 គីឡូក្រាម៕

January 27, 2023

Ronaldo ជួបបរាជ័យលើកដំបូងនៅក្នុងក្លឹប Al Nassr របស់អារ៉ាប៊ីសាអូឌីត

ខ្សែប្រយុទ្ធ Cristiano Ronaldo បានឆ្លងកាត់ការប្រកួតមួយដ៏លំបាក និងខកចិត្ត នៅពេល Al Nassr ដែលជាក្រុមថ្មីរបស់គាត់ត្រូវ Al Ittihad ជម្រុះចេញពី Saudi Super Cup។

វេលាទៀបភ្លឺថ្ងៃទី 27 មករា (ម៉ោងនៅកម្ពុជា) នៅក្នុងការប្រកួតទីពីរសម្រាប់ក្លឹបថ្មីរាប់ចាប់តាំងពីពេលបានចាកចេញពីក្លឹប Manchester United ខ្សែប្រយុទ្ធ Cristiano Ronaldo ជាថ្មីម្ដងទៀតបានក្លាយជាប្រធានក្រុមកីឡាកររបស់ក្លឹប Al Nassr ក្នុងវគ្គពាក់កណ្ដាលផ្ដាច់ព្រ័ត្រនៅពានរង្វាន់បាល់ទាត់កំពូលរបស់អារ៉ាប៊ីសាអូឌីត (Saudi Super Cup)។ ប៉ុន្តែ កំពូលកីឡាកររូបនេះបានជួបការលំបាកនៅពេលបាត់បង់ឱកាសមាសក្នុងការរកបានគ្រាប់បាល់ស្មើ បន្ទាប់ពី Romarinho ជួយឱ្យក្លឹប Al Ittihad នាំមុខមុន។

ក្រុម Al Ittihad រកបានគ្រាប់ទីពីរដោយថ្វីជើងរបស់កីឡាករ Abderrazak Hamdallah មុនពេល Aderson Talisca ជួយឱ្យ Al Nassr រកបាន 1 គ្រាប់នៅក្នុងតង់ទីពីរ។ ប៉ុន្តែ កីឡាករ Muhannad Shanqeeti បានដកហូតក្ដីសង្ឃឹមរបស់ Al Nassr ដោយគ្រាប់បាល់ទីបីរបស់ Al Ittihad និងបានជម្រុះ Al Nassr របស់ Ronaldo ចេញពី Saudi Super Cup ក្នុងលទ្ធផល 3-1។

2 ឆ្នាំកន្លង រាប់ចាប់ពីលើកចុងក្រោយដែល Ronaldo ដណ្ដើមបានពានធំមួយ នោះគឺ Coppa Italia ខ្សែប្រយុទ្ធរូបនេះមិនបានលើកពានប្រាក់ណាមួយទៀត នៅពេលចូលទាត់ជាលើកទីពីរឱ្យ Manchester United។ យ៉ាងណាក៏ដោយ នៅក្នុងក្លឹប Al Nassr ដែលជាក្លឹបកំពូលមួយនៅអារ៉ាប៊ីសាអូឌីត CR7 ត្រូវបានគេមើលឃើញថា អាចមានឱកាសច្រើនដើម្បីស្វែងរកពានបន្ថែម។ ក៏ប៉ុន្តែ ក្ដីសង្ឃឹមនេះបានរលត់បាត់ យ៉ាងហោចក៏នៅក្នុងដំណាក់កាលបច្ចុប្បន្ន។

ក្រុម Al Ittihad ពេលនេះបានឡើងទៅវគ្គផ្ដាច់ព្រ័ត្រ Saudi Super Cup ដោយនឹងត្រូវប៉ះក្រុម Al Feiha។ នេះមានន័យថា ឱកាសមាសសម្រាប់ Ronaldo សម្រាប់ការលើកពាននៅ Saudi Super Cup បានកន្លងផុតទៅក្នុងភាពទុក្ខព្រួយ៕

January 27, 2023

សហរដ្ឋអាម៉េរិក វាយឆ្មក់ កម្ទេចមេដឹកនាំក្រុមភេរវកររដ្ឋអ៊ីស្លាម (IS)

កងទ័ពអាម៉េរិកធ្វើការវាយឆ្មក់នៅសូម៉ាលី ទៅតាមបញ្ជារបស់ប្រធានាធិបតី បៃដិន កម្ចាត់បានមេដឹកនាំតំបន់សំខាន់របស់ក្រុមភេរវកររដ្ឋអ៊ីស្លាម (IS) Bilal al-Sudani។

ក្រុមមន្ត្រីអាម៉េរិក កាលពីថ្ងៃទី 26 មករា បានឱ្យដឹងថា Sudani ត្រូវបានសម្លាប់ក្នុងការប្រយុទ្ធ បន្ទាប់ពីកងទ័ពអាម៉េរិកសម្រុកចូលតំបន់រូងភ្នំនៅភាគខាងជើងប្រទេសសូម៉ាលី ដើម្បីចាប់ខ្លួនមេដឹកនាំរដ្ឋអ៊ីស្លាម (IS)។ សមាជិកប្រហែល 10 នាក់របស់ក្រុមភេរវកររដ្ឋអ៊ីស្លាមសូដង់ បានបាត់បង់ជីវិតនៅកន្លែងកើតហេតុ ប៉ុន្តែភាគីអាម៉េរិក មិនមានអ្នកស្លាប់ និងរបួសនោះទេ។

«កាលពីថ្ងៃទី 25 មករា ដោយអនុវត្តតាមបទបញ្ជារបស់ប្រធានាធិបតី កងទ័ពអាម៉េរិកបានធ្វើយុទ្ធនាការវាយប្រហារនៅភាគខាងជើងប្រទេសសូម៉ាលី បណ្ដាលឱ្យសមាជិកមួយចំនួនរបស់ IS ត្រូវបាត់បង់ជីវិត រួមទាំង Bilal al-Sudani ផងដែរ» រដ្ឋមន្ត្រីការពារជាតិអាម៉េរិក Lloyd Austin បានឱ្យដឹងដូច្នេះនៅក្នុងប្រកាសនាពេលថ្មី ៗនេះ។

«Al-Sudani ទទួលបន្ទុកក្នុងការជំរុញវត្តមានកាន់តែច្រើនរបស់ IS នៅទ្វីបអាហ្វ្រិក និងផ្ដល់ជំនួយដល់បណ្ដាសកម្មភាពរបស់ក្រុមនេះនៅទូទាំងពិភពលោក ក្នុងនោះក៏មានអាហ្វហ្កានីស្ថាន» លោក Austin បន្ថែម។

ពីមូលដ្ឋានលើភ្នំនៅភាគខាងជើងប្រទេសសូម៉ាលី Al-Sudani បានបែងចែក និងផ្ដល់ជំនួយដល់បណ្ដាសាខារបស់ IS មិនត្រឹមតែនៅទ្វីបអាហ្វ្រិកនោះទេ តែក៏នៅរដ្ឋអ៊ីស្លាម Khorasan ដែលជាសាខារបស់ IS នៅអាហ្វហ្កានីស្ថានទៀតផង នេះបើតាមមន្ត្រីអាម៉េរិកមួយរូបដែលសុំមិនបញ្ចេញឈ្មោះ។

កាលពី 10 ឆ្នាំមុន មុនពេលចូលក្រុម IS Sudani បានចូលរួមជ្រើសរើស និងបង្វឹកក្រុមខ្មាន់កាំភ្លើងសម្រាប់ចលនាជ្រុលនិយម al-Shabaab នៅសូម៉ាលី។

«Sudani មានតួនាទីសំខាន់ក្នុងផ្នែកហិរញ្ញវត្ថុ និងសកម្មភាព ដោយមានជំនាញខ្ពស់ ធ្វើឱ្យគាត់ក្លាយជាគោលដៅសំខាន់នៅក្នុងសកម្មភាពប្រឆាំងអំពើភេរវកម្មរបស់សហរដ្ឋអាម៉េរិក» មន្ត្រីអាម៉េរិកខាងលើនិយាយបន្ថែម។

យុទ្ធនាការវាយឆ្មក់នេះត្រូវបានរៀបផែនការក្នុងរយៈពេលច្រើនខែ ដោយមានការហាត់ស៊ាំនៅលើទីតាំងដែលត្រូវបានសាងសង់ឡើងដើម្បីត្រាប់តាមកន្លែងលាក់ខ្លួនរបស់ Sudani។ លោក បៃដិន កាលពីដើមសប្ដាហ៍នេះ បានអនុញ្ញាតឱ្យធ្វើការវាយប្រហារ ក្រោយពីបានពិភាក្សាជាមួយក្រុមមន្ត្រីកំពូលៗនៅក្រសួងការពារជាតិ ចារកម្ម និងសន្តិសុខ។

កងកម្លាំងអាម៉េរិក បាន និងកំពុងធ្វើសកម្មភាពនៅសូម៉ាលី ដោយមានការសហការ និងការជំនួសមុខឱ្យរដ្ឋាភិបាលទាំងពីរ។ ទ័ពអាម៉េរិក តែងវាយប្រហារតាមអាកាសដើម្បីគាំទ្រដល់កម្លាំងរបស់រដ្ឋាភិបាលសូម៉ាលី ក្នុងការប្រយុទ្ធប្រឆាំងនឹងកងទ័ពបះបោរ Shabaab៕

January 27, 2023

តារាក្បាច់គុន ដូនី យ៉េន ថា «អាយុ 60 ឆ្នាំ ក៏មិនមានបញ្ហា» ពេលកំពុងឃោសនាឱ្យរឿង “Dragon Babu: The Legend of Qiao Feng”

កំពូលតារាក្បាច់គុនហុងកុងលោក ដូនី យ៉េន និយាយថា មិនបារម្ភចំពោះបញ្ហាអាយុធ្វើឱ្យប៉ះពាល់ដល់ការច្នៃប្រឌិតឡើយ ហើយតែងតែភ្លេចថា ខ្លួនមានអាយុ 60 ឆ្នាំ។

នៅលើប៉ុស្តិ៍ HK01 កំពូលតារាសម្ដែងផ្នែកក្បាច់គុន ដូនី យ៉េន បានឱ្យដឹងថា មិនធ្លាប់មានការបារម្ភនៅពេលឆ្នាំនេះឈានចូលដល់វ័យ 60 ដែលត្រូវបន្ថយការសម្ដែង។ តារាសម្ដែងរូបនេះបង្ហើបឱ្យដឹងថា ភរិយារបស់គាត់ដែលមានអាយុប្អូនគាត់ 18 ឆ្នាំ តែងប្រាប់ថា គាត់ដូចទៅនឹងកំលោះម្នាក់ ចូលចិត្តចង់ដឹង ចង់ស្វែងយល់។

«ក្នុងវិស័យភាពយន្ត គេត្រូវការស្មារតីស្រាវជ្រាវ ទទួលយកឧបសគ្គ។ អ្នកដឹងហើយថា Tom Cruise អាយុ 60 ឆ្នាំហើយ នៅតែប្រថុយតោងខ្សែចេញពីយន្តហោះនៅលើអាកាស នៅតែស្ថិតនៅចំណុចកំពូលដូច្នេះ» ដូនី យ៉េន បកស្រាយដូច្នេះ និងបន្ថែមថា ពេលសម្ដែង គាត់អាចប្រើប្រាស់បទពិសោធន៍ដើម្បីប៉ះប៉ូវឱ្យចំណុចខ្សោយរបស់កម្លាំងរាងកាយ។

ទោះយ៉ាងណាក៏ដោយ តារាសម្ដែងរូបនេះបានឱ្យដឹងថា មានគម្រោងកាត់បន្ថយការថតភាពយន្ត ដោយចង់សម្ដែងតែក្នុងរឿងដែលមានឧបសគ្គកម្រិតខ្ពស់។ គាត់មានបំណងផ្ដោតទៅលើវិស័យផលិត និងដឹកនាំរឿងជំនួសឱ្យការសម្ដែង ក្នុងប៉ុន្មានឆ្នាំខាងមុខ។

បច្ចុប្បន្ន ដូនី យ៉េន កំពុងឃោសនាឱ្យភាពយន្តរឿង “Dragon Babu: The Legend of Qiao Feng” ដែលគាត់ជាអ្នកដឹកនាំរឿង អ្នកផលិត និងអ្នកសម្ដែងជាតួអង្គឯក។ ខ្សែភាពយន្តនេះត្រូវបានចាក់បញ្ចាំងក្នុងរោងកុននៅហុងកុង សិង្ហបុរី ម៉ាឡេស៊ី និងបញ្ចាំងតាមអនឡាញនៅទីផ្សារចិនដីគោក និងកូរ៉េខាងត្បូង។ល។

January 26, 2023

មុខរបរប៉ះភ្ជាប់ក្រដាសប្រាក់ដុល្លារអាម៉េរិកដាច់រហែលនៅស៊ីមបាវ៉េ

Cuthbert Gudza កាន់ក្រដាសប្រាក់ដុល្លារមកមើល រួចវាយតម្លៃកន្លែងរហែក ហើយចាប់ផ្ដើមលាបកាវយ៉ាងប្រុងប្រយ័ត្ន និងហាលថ្ងៃ មុនពេលប្រកាសថា «វាបានដូចថ្មី»។

ក្រដាសប្រាក់ដុល្លារអាម៉េរិកដែលចាស់ រហែក កំពុងត្រូវបានកែប្រែឱ្យអាចចាយវិញបាន នៅលើដងផ្លូវក្នុងរដ្ឋធានីហារ៉ារ៉េរបស់ប្រទេសស៊ីមបាវ៉េ ជាទីដែលវាត្រូវបាន «ជួសជុល» និងលក់យកចំណេញ ក្នុងកាលៈទេសៈដែលប្រជាជននៅប្រទេសនេះស្វែងរកគ្រប់មធ្យោបាយដើម្បីរស់នៅក្នុងវិបត្តិហិរញ្ញវត្ថុ។

ប្រជាជនក្នុងស្រុកនៅស៊ីមបាវ៉េ ត្រូវប្រើប្រាស់ប្រាក់ដុល្លារអាម៉េរិកសម្រាប់ការទិញដូរប្រចាំថ្ងៃ រាប់ចាប់ពីពេលប្រាក់ដុល្លារស៊ីមបាវ៉េបាត់បង់តម្លៃក្នុងឆ្នាំ 2009 ដោយសារអតិផរណាកើនឡើងខ្ពស់ខ្លាំង។ ក្រដាសប្រាក់ដុល្លារអាម៉េរិកដែលដាច់រហែកត្រូវបានយកមកបិទភ្ជាប់ក្នុងគ្រាដែលប្រភពផ្គត់ផ្គង់ប្រាក់មានកំណត់បំផុត។

ក្រដាសប្រាក់រហែកតែងត្រូវបានផ្សារទំនើប និងស្ថាប័នជំនួញផ្នែកហិរញ្ញវត្ថុផ្លូវការបដិសេធ។ វាត្រូវបានយកទៅកាន់កន្លែងរបស់មនុស្សដូច Gudza ដែលជាជាងជួញដូរប្រាក់ក្នុងទីផ្សារងងឹតនៅតំបន់ពាណិជ្ជកម្មមួយក្នុងទីរួមស្រុក Kuwadzana មានចម្ងាយពីរដ្ឋធានីហារ៉ារ៉េ ប្រហែល 15 គីឡូម៉ែត្រទៅទិសខាងលិច។

បណ្ដាធនាគារនៅស៊ីមបាវ៉េ ទទួលយកក្រដាសប្រាក់ចាស់ ដាច់រហែក ប៉ុន្តែប្រជាជនបានបាត់បង់ទំនុកចិត្តលើប្រព័ន្ធហិរញ្ញវត្ថុ ក្រោយពីបានបាត់បង់ខ្ទង់ប្រាក់សន្សំដោយសារអតិផរណា។ ប្រការនេះធ្វើឱ្យពួកគេចូលចិត្តដោះដូរជាមួយអ្នកទិញលក់ប្រាក់នៅក្នុងទីផ្សារងងឹតជាជាងធនាគារ។

«យើងទទួលទិញប្រាក់ដុល្លារដាច់រហែកក្នុងតម្លៃសមរម្យ សូមអញ្ជើញចូល» នេះជាសំឡេងស្រែកពពាយនាយពីឧបករណ៍បំពងសំឡេងចល័តនៅក្នុងតំបន់ពាណិជ្ជកម្មនៅ Kuwadzana។

Gudza អាយុ 33 ឆ្នាំ មានកូន 3 នាក់ និយាយថា «លក្ខខណ្ឌទិញដូរគឺថា លេខស៊េរីនៅលើក្រដាសប្រាក់ត្រូវតែអាចមើលឃើញ។ មុខរបរសំខាន់របស់ខ្ញុំគឺលក់ដំឡូងបារាំង ប៉ុន្តែខ្ញុំទិញដូរប្រាក់ដុល្លារចាស់ ដាច់រហែកក៏ព្រោះតែមើលឃើញឱកាសរកស៊ី។ ក្រដាសប្រាក់ទាំងនេះត្រូវផ្សារទំនើបបដិសេធ ប៉ុន្តែខ្ញុំទិញដើម្បីលក់យកចំណេញ»។

«យើងឱ្យ 600 ដុល្លារស៊ីមបាវ៉េសម្រាប់ 1 ដុល្លារអាម៉េរិក។ អ្នកដែលមិនចង់កាន់សាច់ប្រាក់នឹងទទួលបានដំឡូងបារាំង ផ្លែក្រូច ឬប៉ោម។ បើសិនជាប្រាក់រហែកមិនអាចប៉ះបាន ខ្ញុំនឹងយកទៅកាន់ធនាគារ» Gudza ឱ្យដឹងដូច្នេះ។

ដោយដឹងពីសភាពការណ៍ ធនាគារជាតិស៊ីមបាវ៉េក៏បានស្នើឱ្យប្រជាជនប្រើប្រាស់ស្ថាប័នផ្លូវការដើម្បីប្ដូរប្រាក់ចាស់ ដាច់រហែក យកប្រាក់ថ្មី ដោយដាក់ចេញគោលការណ៍ច្បាស់លាស់។

«មុខរបរសំខាន់របស់ខ្ញុំគឺលក់ដំឡូងបារាំង ប៉ុន្តែខ្ញុំទិញដូរប្រាក់ដុល្លារចាស់ ដាច់រហែកក៏ព្រោះតែមើលឃើញឱកាសរកស៊ី» Gudza អាយុ 33 ឆ្នាំ មានកូន 3 នាក់ និយាយដូច្នេះ

Persistence Gwanyanya សមាជិកគណៈកម្មគោលនយោបាយហិរញ្ញវត្ថុរបស់ធនាគារជាតិស៊ីមបាវ៉េ បញ្ជាក់ថា «បើសិនមានបញ្ហា ធនាគារកណ្ដាលនឹងប្ដូរជូនអ្នកនូវក្រដាសប្រាក់ល្អជាង។ គ្រប់ធនាគារមានលទ្ធភាពគ្រប់គ្រាន់ក្នុងការទទួលយកក្រដាសប្រាក់ចាស់»៕

January 26, 2023

រ៉ូបូតរឹងអាចប្រែកាយជាធាតុរាវ រួច «ហែកគុក» បាន មុនពេលកាឡាខ្លួនជារូបរាងដើម

ក្នុងការពិសោធ ក្រុមអ្នកវិទ្យាសាស្ត្រអាម៉េរិក ប្រើប្រាស់ដែកឆក់ធ្វើឱ្យរ៉ូបូតរលាយទៅជាធាតុរាវ ហូរឆ្លងកាត់ចម្រឹងដែកមកខាងក្រៅ រួចកកទៅជារឹងដើម្បីត្រលប់ទៅរករូបរាងដើម។

ក្រុមអ្នកវិទ្យាសាស្ត្របង្កើតបានរ៉ូបូតតូចមួយដែលអាចរំលាយខ្លួនទៅជាធាតុរាវ រួចហើយកករឹងមកវិញទៅតាមបញ្ជា ជួយឱ្យវាងាយស្រួលចាកផុតពីទីចង្អៀត។ ដើម្បីច្នៃជារ៉ូបូតប្រែកាយនេះ ពួកគេជ្រលក់បន្ទះដែក បូរ៉ុង (boron) និងមេដែកនីអូឌីមដ៏តូចទៅក្នុងកាល្យូម (gallium) រាវ ជាលោហធាតុដែលរលាយក្នុងសីតុណ្ហភាពទាប និងទុកឱ្យវាកកមកវិញ។ លទ្ធផលនៃការពិសោធនេះត្រូវបានចុះផ្សាយលើទស្សនាវដ្ដី Matter កាលពីថ្ងៃទី 25 មករា។

សមត្ថភាពក្នុងការប្រែរូបជួយឱ្យរ៉ូបូតនេះក្លាយជាអ្នក «ហែកគុក» ដ៏ឆ្នើម។ អ្នកជំនាញប្រើប្រាស់មេដែកដើម្បី «ចេញបញ្ជា» ឱ្យរ៉ូបូតរំលាយខ្លួនជាធាតុរាវដើម្បីហូរតាមចន្លោះចម្រឹងដែករបស់ទ្រុង ហើយក្រោយមកវាប្រែកាយទៅជារូបរាងដើមនៅខាងក្រៅទ្រុងនោះ។

រ៉ូបូតរលាយទៅជាធាតុរាវ ហូរឆ្លងកាត់ចម្រឹងដែកមកខាងក្រៅ រួចកកទៅជារឹងដើម្បីត្រលប់ទៅរករូបរាងដើម

ដើម្បីធ្វើឱ្យរ៉ូបូតរលាយជាធាតុរាវ អ្នកវិទ្យាសាស្ត្រកម្ដៅវាតាមរយៈយន្តការអាំងឌុចស្យុងអេឡិចត្រូម៉ាញេទិច ដោយប្រើប្រាស់មេដែកបង្កើតជាចរន្តអគ្គិសនីខាងក្នុងរ៉ូបូត។ ចរន្តអគ្គិសនីដុតរំលាយកាល្យូម ហើយគ្រាប់ម៉ាញេទិចអណ្ដែតខាងក្នុង ធ្វើឱ្យរ៉ូបូតត្រូវឆក់ទៅខាងមេដែក។

រ៉ូបូតថ្មីនេះត្រូវបានយកលំនាំតាម Sea cucumber (សត្វត្រសក់សមុទ្រ) ដែលមានសមត្ថភាពប្រែកាយពីរឹងទៅទន់ដើម្បីការពារខ្លួន។

ក្រុមអ្នកជំនាញយល់ថា រ៉ូបូតនេះអាចប្រើប្រាស់នៅក្នុងវិស័យបច្ចេកវិទ្យា និងសុខាភិបាល។ មកដល់ពេលនេះ វាបានឆ្លងកាត់ការពិសោធជាច្រើនមកហើយ រួមមានដូចជា ការជួសជុលគ្រឿងអេឡិចត្រូនិចតាមរយៈការផ្លាស់ទីទៅដល់គោលដី រួចប្រែរូបទៅជាវត្ថុធាតុសម្រាប់ផ្សារភ្ជាប់ ការរំលាយខ្លួនទៅជាវីស និងខ្ចៅ និងការយកវត្ថុចម្លែកចេញពីក្រពះជាដើម៕

January 26, 2023

ទ័ពជើងទឹកថៃ រៀបផែនការទិញនាវាពិឃាដទីពីរ

ទ័ពជើងទឹករបស់រាជាណាចក្រថៃ បានស្នើសុំគណៈរដ្ឋមន្ត្រីប្រទេសនេះ ផ្ដល់ថវិកា 15 ពាន់លានបាត (457 លានដុល្លារអាម៉េរិក) ក្នុងរង្វង់ 5 ឆ្នាំខាងមុខ សម្រាប់ការដំឡើងនាវាពិឃាដខ្នាតតូចថ្មីមួយគ្រឿងទៀត។

សំណើខាងលើត្រូវបានលើកឡើងដោយក្រសួងការពារជាតិថៃ នៅក្នុងសេចក្ដីព្រាងច្បាប់គម្រោងថវិកាជាតិសម្រាប់ឆ្នាំ 2024 ដែលចាប់ផ្ដើមពីថ្ងៃទី 01 តុលាឆ្នាំនេះ។

សារព័ត៌មានថៃបានឱ្យដឹងថា សំណើនេះត្រូវបានគណៈរដ្ឋមន្ត្រីពិនិត្យជាលើកដំបូងកាលពីថ្ងៃទី 24 មករា ហើយបើតាមគោលការណ៍ សំណើនេះទទួលបានការគាំទ្ររួចហើយ។

ខ្ទង់ប្រាក់ដំបូងនៃកញ្ចប់ថវិកាខាងលើសម្រាប់ឆ្នាំ 2024 គឺមានតម្លៃ 1.7 ពាន់លានបាត ដែលប្រហែលនឹង 52 លានដុល្លារអាម៉េរិក។

បច្ចុប្បន្ន គម្រោងទិញនាវាពិឃាដខ្នាតតូចរបស់ទ័ពជើងទឹកថៃ កំពុងទទួលបានចំណាប់អារម្មណ៍ពីបណ្ដាក្រុមហ៊ុនផលិតនាវានៅបរទេស មានជាអាទិ៍ ក្រុមហ៊ុននៅកូរ៉េខាងត្បូង អេស្ប៉ាញ រុស្ស៊ី និងបារាំង។

គម្រោងនាវាពិឃាដខាងលើនេះគឺជាគ្រឿងទីពីររបស់ទ័ពជើងទឹកថៃ បន្ទាប់ពី HTMS Bhumibol Adulyadej ដែលផលិតនៅកូរ៉េខាងត្បូង និងបានប្រគល់ឱ្យថៃកាលពីឆ្នាំ 2019៕

January 26, 2023

ផ្លូវដែកល្បឿនលឿនភ្នំពេញ-ហូជីមិញ អាចត្រូវបានវិនិយោគដោយក្រុមហ៊ុនបារាំង

ប្រមុខរាជរដ្ឋាភិបាលកម្ពុជា បានប្រកាសថា អនុញ្ញាតឱ្យក្រុមហ៊ុនបរទេសបណ្ដាក់ទុនវិនិយោគ 100% លើគម្រោងផ្លូវដែកសម្រាប់រថភ្លើងល្បឿនលឿនភ្នំពេញ-ហូជីមិញ។

ខ្លឹមសារខាងលើត្រូវបានសម្ដេចតេជោ ហ៊ុន សែន មានប្រសាសន៍នៅក្នុងជំនួបពិភាក្សាជាមួយប្រតិភូវិនិយោគបារាំង កាលពីថ្ងៃទី 25 មករា 2023។ យោងតាមប្រមុខរាជរដ្ឋាភិបាលកម្ពុជា ផ្លូវដែក 2 ខ្សែផ្សេងទៀតដែលមានស្រាប់ ក៏នឹងត្រូវពង្រីកដោយមានការវិនិយោគពីវិស័យឯកជនផងដែរ។

ភាគីប្រតិភូបារាំងបានថ្លែងថា គណៈប្រតិភូវិនិយោគរបស់បារាំងមានជំនឿចិត្តលើការវិនិយោគនៅកម្ពុជា និងមានបំណងស្វែងរកឱកាសវិនិយោគលើវិស័យផ្លូវដែកល្បឿនលឿន ការដឹកជញ្ជូនតាមផ្លូវទឹក ផ្លូវអាកាស និងថាមពលជាដើម។

January 26, 2023

ព្រឹល និងអាកាសធាតុត្រជាក់ខ្លាំងកំពុងវាយប្រហារលើប្រទេសជប៉ុន!

តំបន់មួយចំនួននៅប្រទេសជប៉ុន មានសីតុណ្ហភាពទាបជាងពេលណាទាំងអស់ក្នុងអំឡុងមួយទសវត្សរ៍កន្លង បណ្ដាលឱ្យស្ទះចរាចរណ៍ និងបង្កឱ្យមានមនុស្សស្លាប់យ៉ាងតិចម្នាក់ នេះបើតាមមន្ត្រីនៅស្ថាប័នឧតុនិយមជប៉ុន។

តំបន់ឆ្នេរសមុទ្រភាគខាងលិចប្រទេសជប៉ុន ទទួលរងឥទ្ធិពលធ្ងន់ធ្ងរដោយសារព្យុះព្រឹលកាលពីយប់ថ្ងៃទី 24 មករា ខណៈដែលរាជធានីតូក្យូ និងតំបន់ជុំវិញមិនមានព្រឹលធ្លាក់ ប៉ុន្តែមានសីតុណ្ហភាពចុះទាបខុសពីធម្មតា។

តំបន់មួយនៅក្នុងខេត្ត Kumamoto ភាគខាងត្បូងប្រទេសជប៉ុន មានសីតុណ្ហភាព -9 អង្សាសេ ដែលជាកម្រិតទាបបំផុតរាប់ចាប់ពីឆ្នាំ 1977។

ខាងលើគឺជាទិដ្ឋភាពរុក្ខជាតិ និងវិហារ Kinkakuji នៅអតីតរាជធានី Kyoto កាលពីថ្ងៃទី 25 មករា

(រូបខាងលើ)-ទិដ្ឋភាពនៅក្នុងទីក្រុង Toyama ក្នុងភាគកណ្ដាលប្រទេសជប៉ុនកាលពីថ្ងៃទី 24 មករា

(រូបខាងលើ)-កម្មករកំពុងសម្អាតព្រឹលនៅក្នុងទីក្រុង Yasuki ខេត្ត Shimane កាលពីថ្ងៃទី 25 មករា

(រូបខាងលើ)-ព្រឹលធ្លាក់គ្របដណ្ដប់ពេញរថយន្តនៅទីក្រុង Yonago ខេត្ត Tottori កាលពីថ្ងៃទី 25 មករា

(រូបខាងលើ)-ព្រឹលគ្របដណ្ដប់ពេញដំបូលផ្ទះ វត្តអារាម និងការដ្ឋាននៅទីក្រុង Nagano កាលពីថ្ងៃទី 25 មករា

(រូបខាងលើ)-រថយន្តដឹកទំនិញពីរជួរស្ទះបន្តកន្ទុយគ្នាព្រោះតែព្រឹលនៅលើដងផ្លូវល្បឿនលឿន Shin-meishin ក្នុងទីក្រុង Suzuka ខេត្ត Mie កាលពីម្សិលមិញ

(រូបខាងលើ)-អ្នកដំណើរត្រូវជាប់គាំង 4 ម៉ោងលើរថភ្លើងអគ្គិសនី ពេលផ្លូវដែកត្រូវរអាក់រអួលព្រោះតែអាកាសធាតុត្រជាក់ខ្លាំងនៅក្នុងខេត្ត Kyoto កាលពីថ្ងៃទី 24 មករា

(រូបខាងលើ)-កម្មករកំពុងបោសសម្អាតព្រឹលចេញពីផ្លូវនៅទីក្រុង Aomori ខេត្ត Aomori កាលពីម្សិលមិញ

(រូបខាងលើ)-អ្នកដំណើរកំពុងរង់ចាំរថយន្តក្រុងក្រោមមេឃកំពុងធ្លាក់ព្រឹលនៅ Kyoto កាលពីម្សិលមិញ

(រូបខាងលើ)-ព្រឹលគ្របដណ្ដប់ពេញកំពូលភ្នំ Kirishima ត្រង់ជួរភ្នំដែលខណ្ឌចែកទឹកដីរវាងខេត្ត Kagoshima និង Miyazaki កាលពីថ្ងៃទី 25 មករា៕

January 26, 2023

Author: សឿន សំណាង