Author: សឿន សំណាង

កំពូលរថយន្ត SUV ដែលកំពុងផ្ទុះការចាប់អារម្មណ៍ខ្លាំងនៅប្រទេសកម្ពុជា !
[ភ្នំពេញ: ថ្ងៃទី១៧ ខែកុម្ភៈ ឆ្នាំ២០២៣] ថ្មីៗនេះគេសង្កេតឃើញថា មានកំពូលរថយន្ត SUV មួយប្រភេទដែលត្រូវបាននាំចូលមកក្នុងទីផ្សារប្រទេសកម្ពុជាដោយក្រុមហ៊ុន អ អិម អេ ខេមបូឌា កំពុងទទួលបានការចាប់អារម្មណ៍យ៉ាងខ្លាំងពីសំណាក់អតិថិជន តាំងពីមិនទាន់មានវត្តមាននៅលើទីផ្សារប្រទេសកម្ពុជាមកម្លេះ នោះគឺរថយន្ត Ford Territory ស៊េរីឆ្នាំ 2023។ រថយន្តនេះត្រូវបានធ្វើការផ្លាស់ប្តូររូបរាងថ្មីទាំងស្រុង រួមជាមួយនឹងបច្ចេកវិទ្យាទំនើបៗជំនាន់ចុងក្រោយទាំងអស់នេះ ធ្វើអោយរថយន្ត Ford Territory ស៊េរីឆ្នាំ 2023 នេះ ទទួលបានការគាំទ្រ យ៉ាងពេញទំហឹងពីសំណាក់អតិថិជន Ford ហើយវត្តមានរបស់រថយន្តនេះក៏ចាប់ផ្តើមចរាចរណ៍ពាសពេញដងវិថីនៃទីក្រុងភ្នំពេញ ក៏ដូចជាតាមបណ្តាខេត្តនានាក្នុងប្រទេសកម្ពុជាផងដែរ។
រថយន្ត Ford Territory ស៊េរីឆ្នាំ 2023 បំពាក់មកជាមួយនូវម៉ាស៊ីន សាំងជំនាន់ថ្មី ៤ស៊ីឡាំង ចំណុះ 1.5L EcoBoost ដែលអាចផលិតកម្លាំងសេះដល់ទៅ 163 PS និងកម្លាំងរមួល 250 nm ជាមួយនឹងប្រអប់លេខ ៧ វគ្គអូតូ ។
ការរចនារូបរាងផ្នែកខាងក្រៅរបស់រថយន្ត Ford Territory ស៊េរីឆ្នាំ 2023 នេះ បានផ្តោតសំខាន់ទៅលើភាពទំនើប ទាន់សម័យ ដោយប៉ាណា ផ្នែកខាងមុខនៃរថយន្តនេះ រចនាម៉ូតបែបសំណាញ់ពណ៌ខ្មៅរលោង ថ្មី ប្លែក បង្ហាញពីភាពអង់អាច អមជាមួយនឹងចង្កៀងខាងមុខដែលបំពាក់មកជាមួយនូវអំពូលបំភ្លឺពេលថ្ងៃ (Day time running light) និងមានអំពូលកាត់អ័ព្ទនិងចង្កៀងហ្វាកូដអូតូជាមួយមុខងារ Follow Me Home នៅផ្នែកខាងក្រោម ដែលជួយអោយការបើកបរកាន់តែមានសុវត្ថិភាពមិនថាពេលយប់ឬពេលថ្ងៃ។ ផ្នែកខាងក្រោយនៃរថយន្តនេះវិញ ត្រូវបានបំពាក់មកជាមួយនូវចង្កៀងប្រភេទLED មានពន្លឺភ្លឺច្បាស់ល្អ ដែលត្រូវបានរចនាបែបផុស 3D រាងអក្សរ L ជាមួយនឹងស៊ីញ៉ូប្រដេញ ធ្វើអោយផ្នែកខាងក្រោយនៃរថយន្តកាន់តែមានភាពទាក់ទាញថែមទៀតផង។
មិនតែប៉ុណ្ណោះ រថយន្ត Ford Territory ស៊េរីឆ្នាំ 2023 នេះ កាន់តែផ្តល់ភាពងាយស្រួលដល់អ្នកដែលមានសមាជិកគ្រួសារច្រើន ដោយសារតែឃ្លុបក្រោយរបស់រថយន្តនេះធំ ទូលាយជាងមុន ដែលផ្តល់កន្លែងដាក់សម្ភារបានកាន់តែច្រើន។
ក្រឡេកមកមើល ផ្នែកខាងក្នុងនៃរថយន្ត Ford Territory ស៊េរីឆ្នាំ 2023 នេះវិញ បានភ្ជាប់មកជាមួយនូវ កៅអីស្បែកថ្មី ពណ៌ខៀវខ្ចី និងតាមឡូស្បែកលាយឈើប្រណិតមួយជុំវិញរថយន្តដែលរំលេចនូវភាពថ្លៃថ្នូរ ទំនើប ទាន់សម័យ ធ្វើអោយការបើកបរកាន់តែមានភាពស៊ីវីល័យ។
មិនតែប៉ុណ្ណោះ រថយន្តនេះក៏បានភ្ជាប់មកជាមួយនូវ ប្រព័ន្ធកៅអីត្រជាក់ផ្នែកខាងមុខ សាកសមពិសេសសម្រាប់ការបើកបរក្នុងអាកាសធាតុក្តៅ និងជួយមិនអោយអ្នកបើកបរមានអារម្មណ៍ថានឿយហត់មិនថាការបើកបរផ្លូវជិតឬឆ្ងាយ។
មិនតែប៉ុណ្ណោះ អ្នកបើកបរនឹងមានអារម្មណ៍កាន់តែអស្ចារ្យ ជាមួយនឹងចង្កូតអេឡិចត្រូនិចរាងអក្សរ D ធូរងាយស្រួលប្រើ កុងទ័រឌីជីថល ទំហំ 12.3 អ៊ីញ ដែលអាចប្តូរបានដល់ទៅពីរ Style រួមមាន Classic និង Sport ហើយអាចប្តូរប្រព័ន្ធគ្រប់គ្រងការបើកបរបានដល់ទៅ៤ម៉ូត គឺ ផ្លូវធម្មតា (Normal) សន្សំសំចៃប្រេង (Eco) ស្ព័រ (Sport) និង ឧបសគ្គ (Mountain)។
រថយន្ត Ford Territory ស៊េរីឆ្នាំ 2023 នេះ ក៏បានបំពាក់មកជាមួយនូវ អេក្រង់កម្សាន្ត Touch Screen ទំហំ 12 អ៊ីញ ដែលភ្ជាប់មកជាមួយបច្ចេកវិទ្យាជំនាន់ថ្មី អាចភ្ជាប់ជាមួយ Apple CarPlay និង Android Auto ដោយមិនចាំបាច់ប្រើខ្សែផងដែរ។ រថយន្តនេះក៏បានបំពាក់មកជាមួយនូវ ចង្កឹះលេខអេឡិចត្រូនិច (Rotary E-shifter) និងប្រព័ន្ធសាកថ្មទូរស័ព្ទឥតខ្សែរដែលធ្វើអោយផ្នែកខាងក្នុងកាន់តែមានភាព ទូលាយ និង ប្រណិតភាព។
បន្ថែមលើនេះទៅទៀត ការបើកបរកាន់តែមានផាសុកភាព ជាមួយនឹងប្រព័ន្ធបន្សុតខ្យល់ PM2.5 និងម៉ាស៊ីនត្រជាក់ Doul Zone Auto ដែលអាចគ្រប់គ្រងសីតុណ្ហភាពដោយស្វ័យប្រវត្តផ្នែកខាងមុខ និង ដំបូលកញ្ចក់ Panoramic ធំអាចបើក បិទ ស្រូបយកពន្លឺព្រះអាទិត្យ ឬខ្យល់អាកាសធម្មជាតិ ធ្វើអោយការបើកបរកាន់តែមានភាពស្រស់ស្រាយ។
រថយន្ត Ford Territory ស៊េរីឆ្នាំ 2023 មានការផ្លាស់ប្តូរទាំងស្រុង មិនថារូបរាង បច្ចេកវិទ្យា ដែលបានបំពាក់ជាមួយនឹងប្រព័ន្ធសុវត្ថិភាពទំនើបៗ ដែលជាជំនាន់ចុងក្រោយ សាកសម្យឥតខ្ចោះ ជាកំពូលរយន្ត SUV នៅក្នុងប្រទេសកម្ពុជា ដូចជា៖
- ប្រព័ន្ធជំនួយលើចង្កូត និងរំលឹកអ្នកបើកបរបើកក្នុងគន្លងត្រឹមត្រូវ
- ប្រព័ន្ធផ្តល់សញ្ញាគ្រោះថ្នាក់ផ្នែកចំហៀងរថយន្ត
- ប្រព័ន្ធជំនួយចូលចតដោយស្វ័យប្រវត្តបែបអក្សរ (P) និងបែបអក្សរ (T) ប្រព័ន្ធជំនួយចាកចេញពីចំណត និងប្រព័ន្ធថយក្រោយស្វ័យប្រវត្តតាមគន្លងដើម (Reversing) ជាមួយនឹងសេនស័រចំនួន១២គ្រាប់
- ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើជើងឆ្លងកាត់ និងប្រព័ន្ធចាប់ហ្វ្រាំងបន្ទាន់ដោយស្វ័យប្រវត្ត
- ប្រព័ន្ធបន្ថយល្បឿន រក្សាគម្លាតសុវត្ថិភាព ឈប់និងទៅមុខដោយស្វ័យប្រវត្តតាមរថយន្តខាងមុខ
- ប្រព័ន្ធផ្តល់សញ្ញាគ្រោះថ្នាក់ពេលបើកទ្វារថយន្ត
- ប្រព័ន្ធកាម៉េរាសុវត្ថិភាព 360 ដឺក្រេកំរឹតខ្ពស់មួយជុំវិញរថយន្ត
- ប្រព័ន្ធបិទ/បើកឃ្លុបក្រោយដោយស្វ័យប្រវត្ត ដោយគ្រាន់តែគ្រវាសជើង
- ប្រព័ន្ធទប់លំនឹងពេលឡើងនិងចុះចំណោត
- ប្រព័ន្ធហ្វ្រាំង ABS និងប្រព័ន្ធ ESP
- ប្រព័ន្ធទប់លំនឹងរថយន្តពេលបើកបរលើផ្លូវកោងនិងរអិល (Traction Control)
រថយន្ត Ford Territory ស៊េរីឆ្នាំ 2023 ផ្តល់ជូនជម្រើសពណ៌ដល់ទៅ ៦ សម្រាប់អតិថិជនធ្វើការជ្រើសរើសរួមមាន៖ ពណ៌ខៀវខ្ចី ពណ៌ស ពណ៌ខ្មៅ ពណ៌សូកូឡា ពណ៌ទឹកមាស និងពណ៌ក្រហម ជាមួយនឹងតម្លៃដ៏សមរម្យ ដែលមានលក់នៅលើទីផ្សារប្រទេសកម្ពុជាត្រឹមតែ 48,900 ដុល្លារតែប៉ុណ្ណោះ។
លើសពីនេះទៅទៀត រាល់ការទិញនូវរថយន្ត Ford អតិថិជននឹងទទួលបាននូវ ការធានា ៣ ឆ្នាំ ឬ ១០ ម៉ឺនគ.ម ពី Ford Cambodia សេវាថែទាំឥតគិតថ្លៃពីក្រុមហ៊ុន 1 ឆ្នាំ ឬ 20,000 km ព្រមទាំងមានសេវាកម្មជួសជុលចល័ត ២៤ ម៉ោង សេវាបង់រំលស់ឆាប់រហ័ស និងប្រកបដោយទំនុងចិត្ត ២៥ ខេត្តក្រុង គ្រឿងបន្លាស់ Original ពីរោងចក្រ សេវាកម្មយករថយន្តចាស់ផ្លាស់ប្តូរយករថយន្តថ្មី(Ford Trade-In Service) ផងដែរ ។
February 20, 2023
ចាកចេញពី PSG កំពូលកីឡាករបារាំង Mbappe នឹងអូសកំពូលថ្វីជើងមួយរូបទៅជាមួយ?
មិនត្រឹមតែចង់ចាកចេញពីក្លឹប PSG ទៅកាន់គោលដៅក្នុងក្ដីស្រមៃនោះទេ ប៉ុន្តែខ្សែប្រយុទ្ធ Kylian Mbappe ថែមទាំងចង់អូសសហការីស្និទ្ធស្នាលមួយរូបនៅបារីសទៅជាមួយខ្លួនទៀតផង។
កាលពីរដូវក្ដៅឆ្នាំមុន Mbappe បង្កឱ្យមានការកក្រើនវិស័យបាល់ទាត់នៅពេលបោះបង់ឱកាសទាត់ឱ្យ Real Madrid ដើម្បីនៅជាមួយ PSG។ ប៉ុន្តែនេះមិនមែនមានន័យថា Mbappe និង Real Madrid បានផ្ដាច់ទំនាក់ទំនងឡើយ។
យោងតាម Football Espana កំពូលតារាបាល់ទាត់បារាំង Mbappe ចង់ទៅកាន់ Real Madrid នៅរដូវក្ដៅឆ្នាំនេះ ដោយហេតុថា ស្ថានការណ៍នៅ PSG ពេលនេះមានអស្ថិរភាព ក្នុងនោះមានទាំងបញ្ហាផ្ទៃក្នុង លទ្ធផលនៃការប្រកួតមិនល្អ បរាជ័យក្នុងផែនការទិញដូរកីឡាករជាដើម។ បញ្ហាទាំងនេះបានធ្វើឱ្យ Mbappe មានការសង្ស័យអំពីលទ្ធភាពដែលគាត់អាចរីកចម្រើន បើសិនបន្តនៅជាមួយ PSG។
Mbappe និង Hakimi
ខ្សែប្រយុទ្ធវ័យ 24 ឆ្នាំរូបនេះយល់ថា មានតែទៅចូលរួមជាមួយ Real Madrid នោះទេ ទើបគាត់អាចឆ្ពោះទៅក្បែរពានរង្វាន់ Champions League និងគ្រាប់បាល់មាស។
ក៏ប៉ុន្តែ Mbappe នឹងមិនចង់ចាកចេញទៅម្នាក់ឯងឡើយ។ យោងតាម Football Espana ដដែល កីឡាករនេះនឹងអូសទាញមិត្តជិតស្និទ្ធរបស់ខ្លួនគឺ Achraf Hakimi ទៅជាមួយ។
Mbappe និង Hakimi
កីឡាករ Achraf Hakimi ជាជនជាតិម៉ារ៉ុក និងត្រូវបានបណ្ដុះបណ្ដាលពីក្លឹប Los Blancos (Real Madrid) និងបានឡើងដល់ក្រុមទីមួយក្នុងឆ្នាំ 2017 មុនពេលទៅកាន់ Dortmund និង Inter។
ការដែលមាន Hakimi ទៅជាមួយនៅពេលលេងឱ្យ Real នឹងជួយឱ្យ Mbappe សម្របខ្លួននឹងជីវភាពនៅអេស្ប៉ាញបានឆាប់រហ័ស។ ជាងនេះទៀត Real ក៏ត្រូវបានគេជឿថា កំពុងស្វែងរកខ្សែការពារម្នាក់ដើម្បីជំនួស Dani Carvajal ខណៈដែល Hakimi ក៏ត្រូវបានទាក់ទងឡើងវិញ។
ការទិញដូរកីឡាករដ៏ធំខាងលើនេះពិតជាអាចកើតឡើងនៅក្នុងរដូវក្ដៅឆ្នាំនេះ ដោយតម្លៃសរុបអាចឡើងដល់ 250 លានអឺរ៉ូ (180 លានសម្រាប់ Mbappe និង 70 លានសម្រាប់ Hakimi)៕
February 20, 2023
(រញ្ជួយដីនៅតួកគី) – ក្មេងជំទង់ថតវីដេអូផ្ដាំផ្ញើចុងក្រោយ ពេលកំពុងជាប់ក្រោមគំនរបាក់បែក
ក្នុងពេលជាប់នៅខាងក្រោមផ្ទះដែលបានបាក់រលំដោយសារគ្រោះរញ្ជួយដី Taha Erdem អាយុ 17 ឆ្នាំ បានថតវីដេអូផ្ដាំផ្ញើពាក្យសម្ដីចុងក្រោយ និយាយអំពីការស្ដាយក្រោយ និងកិច្ចការដែលនឹងធ្វើ បើសិនជានៅមានជីវិត។
Taha Erdem និងក្រុមគ្រួសារកំពុងគេងលក់ពេលរញ្ជួយដីកម្លាំង 7.8 រិចទ័រកើតឡើងនៅក្នុងទីក្រុង Adiyaman កាលពីវេលាទៀបភ្លឺ ថ្ងៃទី 06 កុម្ភៈ 2023។
Taha Erdem បានភ្ញាក់ដឹងខ្លួនព្រោះតែរញ្ជួយដី។ ក្នុងរង្វង់ 10 វិនាទី អគារកម្ពស់ 4 ជាន់ក៏បានបាក់រលំសង្កត់លើ Taha រួមទាំងម្ដាយ ឪពុក និងប្អូនប្រុស ប្អូនស្រីរបស់គាត់។ ពេលត្រូវជាប់ក្រោមថ្ម និងដែក និងមិនឃើញឪពុកម្ដាយ Taha ក៏យកទូរស័ព្ទថតវីដេអូដើម្បីផ្ដាំផ្ញើពាក្យសម្ដីចុងក្រោយ ដោយសង្ឃឹមថា មានគេរកឃើញនៅពេលគាត់បានស្លាប់។
«ខ្ញុំគិតថា នេះគឺជាវីដេអូចុងក្រោយដែលខ្ញុំបានថត» Taha និយាយពេលកំពុងស្ថិតក្នុងគំនរបាក់បែក ខណៈគ្រោះរញ្ជួយដីនៅតែកើតឡើង។
Taha Erdem និងឪពុកម្ដាយ ក្រោយពីត្រូវបានជួយសង្គ្រោះ
Taha រៀបរាប់អំពីរបួសរបស់គាត់ និងវិប្បដិសារី ក៏ដូចជាប្រការដែលគាត់ចង់ធ្វើ បើសិនជានៅមានជីវិត។ ក្នុងវីដេអូនេះក៏មានសំឡេងស្រែករបស់ជនរងគ្រោះដទៃទៀតដែរ។
«ខ្ញុំនៅមានការសោកស្ដាយជាច្រើនប្រការ។ សូមព្រះអម្ចាស់លើកលែងទោសដល់ខ្ញុំ… នៅតែមានរញ្ជួយដី។ មិនមែនដៃខ្ញុំញ័រទេ ប៉ុន្តែវាជារញ្ជួយដី» Taha បន្ថែម។ Taha គិតថា សមាជិកទាំងអស់របស់គ្រួសារគាត់បានស្លាប់ ហើយគាត់នឹងបានទៅជួបពួកគេឆាប់ៗនេះ។
ក៏ប៉ុន្តែ Taha គឺជាម្នាក់ក្នុងចំណោមជនរងគ្រោះដែលត្រូវបានសង្គ្រោះដំបូង។ Taha ត្រូវបានអ្នកភូមិទាញចេញពីគំនរបាក់បែកក្រោយពីបានជាប់ប្រហែលពីរម៉ោង។ ប្រហែល 10 ម៉ោងក្រោយពីមានគ្រោះរញ្ជួយដី ឪពុកម្ដាយ និងប្អូនពីរនាក់របស់ Taha ក៏ត្រូវបានជួយសង្គ្រោះដោយអ្នកភូមិ។
គិតមកដល់វេលាម៉ោង 10 ថ្ងៃទី 20 កុម្ភៈ ចំនួនមនុស្សស្លាប់នៅក្នុងគ្រោះរញ្ជួយដីនៅតួកគី និងស៊ីរី កាលពីថ្ងៃទី 06 កុម្ភៈ បានកើនឡើងដល់ជាង 46,000 នាក់៕
February 20, 2023
ការទិញក្លឹប Man United៖ មហាសេដ្ឋីកាតាទទួលបានការគាំទ្រពី Bank of America
ប្រធានធនាគារអ៊ីស្លាមកាតា ទទួលបានការគាំទ្របន្ថែមពី Bank of America នៅក្នុងការដណ្ដើមទិញក្លឹបបាល់ទាត់ Manchester United។
យោងតាម Bloomberg ធនាគារ Bank of America ត្រូវបានជ្រើសរើសជាស្ថាប័នគាំទ្រ ទីប្រឹក្សារបស់លោក Sheikh Jassim Bin Hamad Al Thani ជាអ្នកវិនិយោគដែលបានស្នើទិញក្លឹប Man United កាលពីពេលថ្មីៗនេះ។
លោក Sheikh Jassim Bin Hamad Al Thani គឺជាកូនប្រុសរបស់អតីតនាយករដ្ឋមន្ត្រីកាតា Hamad bin Jassim bin Jaber Al Thani។ តំណាងអ្នកនាំពាក្យរបស់លោក Sheikh Jassim Bin Hamad Al Thani បានបញ្ជាក់អំពីការជ្រើសរើស Bank of America ធ្វើជាទីប្រឹក្សា គាំទ្រដល់លោក Sheikh Jassim ក្នុងការទិញដូរខាងលើ។
លោក Sheikh Jassim បច្ចុប្បន្នជាប្រធានធនាគារអ៊ីស្លាមកាតា និងជាអតីតសមាជិកក្រុមប្រឹក្សាភិបាលរបស់ Credit Suisse Group AG។ មុននេះ លោក Sheikh Jassim បានស្នើទិញក្លឹប MU ក្នុងតម្លៃប្រហែល 5 ពាន់លានផោន (ប្រហែល 6 ពាន់លានដុល្លារអាម៉េរិក)។
ក្នុងការដណ្ដើមទិញ MU លោក Sheikh Jassim នឹងត្រូវប្រកួតប្រជែងជាមួយមហាសេដ្ឋី Jim Ratcliffe ដែលទទួលបានការគាំទ្រពីធនាគារ Goldman Sachs៕
February 20, 2023
Facebook លក់សញ្ញាធិកពណ៌ខៀវ តម្លៃចាប់ពី 12 ដុល្លារឡើងទៅ
សេវាកម្ម Meta Verified អនុញ្ញាតឱ្យអ្នកប្រើប្រាស់ Facebook ទិញសញ្ញាធិកពណ៌ខៀវដើម្បីបញ្ជាក់អំពីគណនីជាកម្មសិទ្ធិពិតប្រាកដ ដូចទៅនឹង Twitter Blue របស់ Elon Musk។
កាលពីថ្ងៃទី 19 កុម្ភៈ Mark Zuckerberg ដែលជា CEO របស់ Meta (ក្រុមហ៊ុនមេរបស់ Facebook) បានប្រកាសថា ក្រុមហ៊ុននឹងលក់សញ្ញាធិកពណ៌ខៀវនៅលើ Facebook និង Instagram។ សេវាកម្មថ្មីនេះនឹងមានឈ្មោះថា Meta Verified និងមានតម្លៃ 11.99 ដុល្លារអាម៉េរិក/ខែ បើសិនចុះឈ្មោះលើគេហទំព័រ។ ប៉ុន្តែ បើចុះឈ្មោះតាមរយៈកម្មវិធី Facebook ឬ Instagram លើឧបករណ៍ iOS អ្នកប្រើប្រាស់នឹងត្រូវចំណាយ 14.99 ដុល្លារ/ខែ។
Meta Verified នឹងត្រូវដាក់ឱ្យដំណើរការដំបូងគេនៅអូស្ត្រាលី និងនូវែលសេឡង់ក្នុងសប្ដាហ៍នេះ ហើយក្រោយមកនឹងបន្តលក់នៅក្នុងប្រទេសដទៃ។ ដើម្បីបញ្ជាក់ថា គណនីណាមួយជារបស់ខ្លួន អ្នកប្រើប្រាស់ត្រូវបង្ហាញលិខិតមួយចំនួនមានដូចជា លិខិតឆ្លងដែន អត្តសញ្ញាណប័ណ្ណ ឬបណ្ណបើកបរជាដើម។
February 20, 2023
«Ant-Man 3» ៖ មហាសង្គ្រាមនៅក្នុងពិភពល្អិត «កង់ទិច»
«Ant-Man and the Wasp: Quantumania» (Ant-Man 3) ត្រូវបានប្រដូចទៅនឹងកំណែ «Star Wars» របស់ពិភពភាពយន្ត Marvel។
ស្នាដៃភាពយន្តនេះគឺជាវគ្គដោយឡែកទីបីស្ដីពីកំពូលវីរបុរសមនុស្សស្រមោចរបស់ Marvel បន្ទាប់ពីជោគជ័យផ្នែកហិរញ្ញវត្ថុរបស់វគ្គ Ant-Man (2015) និង Ant-Man and the Wasp (2018)។ សាច់រឿងក្នុងខ្សែភាពយន្តដែលយកតាមទិដ្ឋភាពក្រោយមហាសង្គ្រាមជាមួយ Thanos ក្នុងរឿង Avengers: Endgame (2019) Scott Lang (សម្ដែងដោយ Paul Rudd) បណ្ដែតបណ្ដោយការងារជាមហាវីរបុរស ហើយផ្ដោតលើការអភិវឌ្ឍអាជីពសរសេរសៀវភៅ និយាយអំពីស្នាដៃរបស់ខ្លួនក្នុងអតីតកាល។ ចំណែក Cassie ដែលជាកូនស្រីរបស់គាត់ ក្លាយជាសកម្មជនសង្គមដែលជួបបញ្ហាជាញឹកញាប់។
ក្នុងពេលមួយដែលបានទៅជួបកូនស្រី Scott Lang ក៏បានដឹងថា Cassie កំពុងអភិវឌ្ឍឧបករណ៍មួយដែលអាចតភ្ជាប់ជាមួយនឹងពិភពល្អិត Quantum Realm។ ក្នុងពេលនោះ បញ្ហាមួយបានកើតឡើង និងធ្វើឱ្យក្រុម Scott Lang, Cassie, Hope, ប្ដីប្រពន្ធ Hank – Janet (ឪពុកម្ដាយរបស់ Hope) ធ្លាក់ទៅក្នុងពិភពល្អិតរបស់ ចក្រវាលភាពយន្ត Marvel (Marvel Cinematic Universe)។ ពួកគេត្រូវបានបំបែកជាពីរក្រុម។ ឪពុក និងកូនមនុស្សស្រមោចត្រូវបានអ្នកស្រុកមួយក្រុមចាប់យកទៅសួរចម្លើយ។ ចំណែក Janet (អ្នកដែលធ្លាប់បានជាប់គាំងច្រើនឆ្នាំក្នុងពិភពល្អិត Quantum Realm) នាំស្វាមី និងកូន Hope ស្វែងរកមិត្តចាស់នៅទីនេះដើម្បីសុំជំនួយ។
«Ant-Man 3» ពង្រីកចក្រវាលភាពយន្ត Marvel នាំទស្សនិកជនទៅកាន់ពិភពល្អិត ជាតំបន់ដែលមិនទាន់ត្រូវបានបង្ហាញច្រើនក្នុងវគ្គមុនៗ។
នេះគឺជាពិភពដោយឡែកដែលមានសត្វ និងអរិយធម៌ច្រើនប្រភេទ។ ក៏ប៉ុន្តែ គ្រប់យ៉ាងបានកែប្រែនៅពេលកំណែមួយរបស់ Kang the Conqueror (សម្ដែងដោយ Janathan Majors) ត្រូវបាននិរទេសមកដល់ទីនេះ។ ជននេះបានយកកម្លាំងមកវិញបន្តិចម្ដងៗ និងដណ្ដើមបានពិភពល្អិតទាំងមូល ហើយរង់ចាំត្រលប់ទៅកាន់ពិភពធម្មតាដើម្បីបន្តសង្គ្រាមឈ្លានពាន បំផ្លាញពេលវេលា។
ឈុតដកស្រង់សំខាន់ៗរបស់ខ្សែភាពយន្តរឿង Ant-Man and the Wasp: Quantumania (Ant-Man 3)
Kang អាចផ្លាស់ទីទៅកាន់បន្ទាត់ពេលវេលាផ្សេងៗគ្នាដើម្បីបង្កើតឡើងវិញនូវផែនការគ្រប់គ្រងពិភពលោករបស់ខ្លួន។ តួអង្គនេះបានបង្ហាញខ្លួនលើកដំបូងក្នុងអេក្រង់ទូរទស្សន៍នៅក្នុងរដូវទីមួយ ស៊េរី Loki (2021) ដែលសម្ដែងដោយ Jonathan Majors។ Kang ក៏គ្រោងនឹងបង្ហាញខ្លួនជាថ្មីនៅក្នុងវគ្គ Avengers: The Kang Dynasty (2025) និង Avengers: Secret Wars (2026)។ Kang ប្រហែលនឹងក្លាយជាតួអង្គអាក្រក់សំខាន់បំផុតរបស់ Marvel Cinematic Universe (MCU) នៅក្នុងដំណាក់កាលបន្ទាប់ ក្រោយពីការចាកចេញរបស់ Thanos។
វត្តមានរបស់ Kang និងតំបន់ Quantum Realm គឺជាទិដ្ឋភាពទាក់ទាញបំផុតសម្រាប់អ្នកគាំទ្ររបស់ Marvel នៅក្នុងរឿង Ant-Man and the Wasp: Quantumania (Ant-Man 3)។ Ant-Man 3 ខ្សែភាពយន្តនេះក្លាយជាគ្រឹះសំខាន់ដើម្បីអភិវឌ្ឍសាច់រឿងរបស់យីហោភាពយន្តនេះ ហើយក៏ជាស្នាដៃដំបូងនៅក្នុងដំណាក់កាលទី 5 របស់ MCU។
ទិដ្ឋភាពប្រយុទ្ធរវាងក្រុម Scott Lang និងក្រុមកំណាច Kang ត្រូវបានទំព័រសារព័ត៌មានភាពយន្ត Variety និង Rotten Tomatoes ជាដើម បញ្ចេញមតិថា ធ្វើឱ្យទស្សនិកជនស្រមៃដល់ខ្សែភាពយន្តមួយចំនួនរបស់យីហោ Star Wars។
ក៏ប៉ុន្តែ «Ant-Man and the Wasp: Quantumania» ទទួលបានពិន្ទុ «ស្រស់» ត្រឹម 48% ប៉ុណ្ណោះ ក្នុងចំណោមអត្ថបទវាយតម្លៃចំនួន 289 នេះបើតាម Rotten Tomatoes។ ទំព័រ BBC បានហៅ Ant-Man 3 ថាជាគម្រោងអន់បំផុតរបស់ Marvel គិតត្រឹមបច្ចុប្បន្ន។ យ៉ាងណាក៏ដោយ ខ្សែភាពយន្តនេះក៏ទទួលបានការសរសើរច្រើនផងដែរ ពិសេសគឺតារាសម្ដែងជាតួអង្គចិត្តអាក្រក់ Janathan Majors៕
February 20, 2023
ប្រព័ន្ធសាងសង់អគារខ្ពស់កប់ពពកនៅប្រទេសចិន ដំណើរការយ៉ាងដូចម្ដេច? (វីដេអូ)
ប្រព័ន្ធម៉ាស៊ីនដ៏ធំសម្បើមគឺជាឧបករណ៍ដ៏អស្ចារ្យជួយឱ្យកម្មករធ្វើការបានងាយស្រួលនៅលើអគារខ្ពស់កប់ពពក និងអាចទប់ទល់នឹងព្យុះធំ។
ក្នុងវីដេអូននេះគឺជាមួយក្នុងចំណោមប្រព័ន្ធម៉ាស៊ីនសាងសង់អគារខ្ពស់កប់ពពករបស់ប្រទេសចិន។ ប្រព័ន្ធម៉ាស៊ីនដែលស្ថិតនៅក្នុងទីក្រុង Wuhan ខេត្ត Hubei ភាគកណ្ដាលប្រទេសចិនមួយនេះ អាចសង់អគារមួយជាន់របស់ការដ្ឋានដោយប្រើពេលតែ 4 ថ្ងៃ។
សព្វថ្ងៃ តម្រូវការសាងសង់អគារកំពុងកើនឡើងខ្ពស់ ទន្ទឹមគ្នានឹងដំណាក់កាលនគរូបនីយកម្ម។ ប្រទេសចិនបានរកឃើញ និងផលិតបានគ្រឿងម៉ាស៊ីនសម្រាប់ការសាងសង់អគារខ្ពស់កប់ពពក ដែលប្រើប្រាស់បច្ចេកវិទ្យាទំនើបលំដាប់កំពូលលើពិភពលោក។
ប្រព័ន្ធម៉ាស៊ីនសាងសង់អគារខ្ពស់កប់ពពកគឺជាថ្នាលបច្ចេកទេស និងបច្ចេកវិទ្យាដែលមានទម្ងន់ស្រាល ផ្ដល់កន្លែងធ្វើការនៅក្នុងរចនាសម្ព័ន្ធមួយដែលធ្វើពីដែកថែបនៅខាងលើបង្អស់របស់អគារដែលកំពុងត្រូវបានសាងសង់។ ឧបករណ៍ និងមធ្យោបាយមួយចំនួនត្រូវបានដំឡើងនៅក្នុងថ្នាលដ៏ធំសម្បើមនេះ ក្នុងនោះមានទាំងបន្ទប់ទឹក បង្គន់ ម៉ាស៊ីនពង្រាយបេតុង ជណ្ដើរយន្ត និងឧបករណ៍ពន្លត់អគ្គិភ័យជាដើម។
យោងតាម Xinhua ប្រព័ន្ធម៉ាស៊ីនដ៏ស្មុគស្មាញនេះត្រូវបានទ្រដោយសសរចំនួន 12 ដែលជួយបង្កើនសមត្ថភាពនៃកម្លាំងទ្រ។ ប្រព័ន្ធនេះផ្ដល់កន្លែងធ្វើការប្រកបដោយសុវត្ថិភាព និងស្ថិរភាពនៅលើទីខ្ពស់។ វាអាចទប់ទល់នឹងខ្យល់ព្យុះដែលមានកម្លាំងកម្រិតទី 10។
ធៀបនឹងបណ្ដាគម្រោងសំណង់ដែលសង់តាមរបៀបប្រពៃណី ការសាងសង់ដែលប្រើប្រាស់ប្រព័ន្ធម៉ាស៊ីនខាងលើនេះអាចបង្កើនល្បឿនបានជាង 20%។ ប្រព័ន្ធម៉ាស៊ីននេះធ្វើពីវត្ថុធាតុស្រាលៗ ហើយពេលបញ្ចប់គម្រោងនីមួយៗ វានឹងត្រូវបានដឹកទៅកាន់គម្រោងបន្ទាប់។ ការសាងសង់ដោយប្រើប្រព័ន្ធម៉ាស៊ីននេះពិតជាមានប្រសិទ្ធភាពខ្ពស់ និងកាត់បន្ថយការចំណាយបានច្រើន៕
February 20, 2023
កំពូលកីឡាករបាល់ទាត់ Messi រកបានលើសពី 60 គ្រាប់ ពីការទាត់បាល់ពិន័យ Free Kick
(បារាំង)- Lionel Messi យកឈ្នះលើគេឯងចំពោះគ្រាប់បាល់ឈ្នះពីការទាត់បាល់ពិន័យសេរី (Free Kick) និងស៊ុតបាល់ពីចម្ងាយនៅអឺរ៉ុប ក្នុងអំឡុងប្រហែល 6 ខែកន្លង ដោយថ្វីជើងដ៏អស្ចារ្យកាលពីថ្ងៃទី 19 កុម្ភៈ 2023។
នាទីទី 5 នៃការថែមម៉ោងក្នុងតង់ទីពីរពេលប្រកួតជាមួយ Lille នៅក្នុងវគ្គ 24 Ligue 1 កីឡាករ Messi ទាត់បាល់ពិន័យចម្ងាយប្រហែល 20 ម៉ែត្រ ហើយបាល់ក៏ហោះចំបង្គោល និងខ្ទាតចូលទី ជួយឱ្យក្លឹប PSG ឈ្នះ 4-3។ នេះគឺជាគ្រាប់បាល់ទី 61 របស់ Messi ដែលរកបានពីការទាត់បាល់ពិន័យសេរី (Free Kick) នៅក្នុងអាជីព ហើយក៏ជាកីឡាករទី 8 ដែលធ្វើបានដូច្នេះ បន្ទាប់ពី Juninho, Pele, Victor Legrottaglie, Ronaldinho, David Beckham, Diego Maradona និង Zico។ ប៉ុន្តែ Messi នៅតែចាញ់ឯតទគ្គកម្មរបស់ Juninho រហូតដល់ 16 គ្រាប់។
ចាប់តាំងពីខែមករា 2016 Messi រកបាន 27 គ្រាប់ពីការទាត់បាល់ពិន័យសេរី (Free Kick) ហើយនេះគឺជាតួលេខច្រើនជាងគេនៅពានរង្វាន់លំដាប់កំពូលទាំង 5 នៅអឺរ៉ុប។ Messi រកបានគ្រាប់បាល់នេះច្រើនជាងឆ្ងាយធៀបនឹងកីឡាករលំដាប់ទីពីរគឺ James Ward-Prowse ដែលរកបាន 17 គ្រាប់ឱ្យ Southampton នៅក្នុងដំណាក់កាលខាងលើ។
រាប់ចាប់ពីរដូវបាល់ទាត់ឆ្នាំ 2017-2018 Messi ក៏រកបាន 40 គ្រាប់ដោយការទាត់ពីខាងក្រៅតំបន់គ្រោះថ្នាក់នៅក្នុង 5 ពានរង្វាន់ធំៗនៅអឺរ៉ុប ច្រើនជាងទ្វេដងធៀបនឹងកីឡាករលំដាប់ទីពីរ Kevin de Bruyne។
https://www.youtube.com/watch?v=4MFQi59s1Wk
PSG យកឈ្នះលើ Lille 4-3 កាលពីថ្ងៃទី 19 កុម្ភៈ 2023
បើគិតត្រឹមតែពានរង្វាន់ជើងឯកថ្នាក់ជាតិ ក្នុងអាជីព Messi រកបាន 41 គ្រាប់ពីការទាត់បាល់ពិន័យ 450 លើក ដែលស្មើនឹងអត្រា 9.1%។ អត្រានេះរបស់ Cristiano Ronaldo គឺត្រឹមតែ 6.2% ប៉ុណ្ណោះ ដោយរកបាន 33 គ្រាប់ពីការទាត់បាល់ពិន័យ 532 គ្រាប់។ នៅក្នុងអាជីពរបស់ខ្លួន Ronaldo រកបាន 58 គ្រាប់ពីការទាត់បាល់ពិន័យ។
«Messi ទាត់បាល់ពិន័យបានល្អជាងគេលើពិភពលោក។ ខ្ញុំមិនភ្ញាក់ផ្អើលទេ នៅពេលគាត់ទាត់ចូលទី» គ្រូបង្វឹក Paulo Fonseca របស់ក្លឹបបារាំង Lille ថ្លែងដូច្នេះបន្ទាប់ពីការប្រកួតចាញ់ PSG កាលពីថ្ងៃទី 19 កុម្ភៈ៕
February 20, 2023
អាម៉េរិកព្រមានអំពី «បន្ទាត់ក្រហម» បើសិនចិនផ្ដល់អាវុធឱ្យរុស្ស៊ី
ឯកអគ្គរដ្ឋទូតអាម៉េរិកប្រចាំអង្គការសហប្រជាជាតិ Thomas-Greenfield បានព្រមានថា ចិននឹងឆ្លង «បន្ទាត់ក្រហម» បើសិនផ្ដល់អាវុធទៅឱ្យរុស្ស៊ីប្រើប្រាស់នៅអ៊ុយក្រែន។
«យើងត្រូវតែយល់ច្បាស់ថា បើសិនចិន ឬប្រទេសណាមួយមានគំនិត បំណងផ្ដល់អាវុធឱ្យកម្លាំងរុស្ស៊ីប្រើប្រាស់នៅសមរភូមិអ៊ុយក្រែន នោះគឺជាប្រការដែលមិនអាចទទួលយកបាន។ នោះគឺជាបន្ទាត់ក្រហម» អគ្គរដ្ឋទូតអាម៉េរិកប្រចាំអង្គការសហប្រជាជាតិ Thomas-Greenfield បានប្រាប់ CNN កាលពីថ្ងៃទី 19 កុម្ភៈដូច្នេះ។
នៅពេលត្រូវបានសួរថា ចិននឹងត្រូវទទួលរងផលវិបាកអ្វីខ្លះ បើសិនផ្ដល់អាវុធទៅឱ្យរុស្ស៊ី លោកស្រី Thomas-Greenfield ថ្លែងថា វ៉ាស៊ីងតោនមិនប្រកាសមុនអំពីផែនការ ប៉ុន្តែបានជូនដំណឹងដល់ទីក្រុងប៉េកាំងរួចហើយ។
រដ្ឋមន្ត្រីការបរទេសអាម៉េរិក Antony Blinken មុននោះក៏បានឱ្យដឹងថា ចិនទំនងជាកំពុងពិនិត្យលទ្ធភាពផ្ដល់អាវុធទៅឱ្យរុស្ស៊ីប្រើប្រាស់ក្នុងសង្គ្រាមនៅអ៊ុយក្រែន។ លោក Antony ក៏បានព្រមានចិនថា រាល់ឥរិយាបថផ្ដល់អាវុធទៅឱ្យមូស្គូ គឺសុទ្ធតែនឹង «បង្កបញ្ហាធ្ងន់ធ្ងរ»។
ចិនមិនទាន់ប្រតិកម្មចំពោះមតិរបស់អាម៉េរិក ប៉ុន្តែទីក្រុងប៉េកាំងបានអះអាងជាច្រើនលើកមកហើយថា ខ្លួនចង់ជួយបញ្ចប់សង្គ្រាមនៅអ៊ុយក្រែនដោយសន្តិវិធី។
ចិនគឺជាខឿនសេដ្ឋកិច្ចធំជាងគេមួយលើពិភពលោកដែលមានទំនាក់ទំនងស្និទ្ធស្នាលនឹងរុស្ស៊ី ហើយជាប្រទេសដែលមិនដាក់ទណ្ឌកម្មលើទីក្រុងមូស្គូ ទាក់ទិននឹងសង្គ្រាមនៅអ៊ុយក្រែន។
ប្រទេសលោកខាងលិចជាច្រើនបានដាក់សម្ពាធដើម្បីឱ្យចិនប្រើប្រាស់ឥទ្ធិពលរបស់ខ្លួន ជំរុញឱ្យរុស្ស៊ីបញ្ចប់សង្គ្រាមនៅអ៊ុយក្រែន។ ទីក្រុងប៉េកាំងគាំទ្រដំណោះស្រាយសន្តិភាពសម្រាប់សង្គ្រាមនេះ ប៉ុន្តែក៏បានអះអាងជាច្រើនលើកអំពីទំនាក់ទំនងល្អជាមួយមូស្គូ និងមានបំណងលើកកម្ពស់ទំនាក់ទំនងនេះឱ្យឡើងដល់ចំណុចខ្ពស់ថ្មីមួយថែមទៀតផងដែរ៕
February 20, 2023
សកម្មភាពក្រៅឆាកនៃទិដ្ឋភាពគូរគំនូរអាក្រាតកាយក្នុងភាពយន្ត «Titanic»
លោក James Cameron សម្ដែងនៅក្នុងទិដ្ឋភាពប្រើដៃជំនួសឱ្យ DiCaprio ក្នុងឈុត Jack គូររូប Rose អាក្រាតកាយនៅលើសាឡុង ក្នុងខ្សែភាពយន្តរឿង «Titanic»។
ក្នុងឱកាសខួប 25 ឆ្នាំនៃការចាប់កំណើតរបស់ Titanic និងត្រលប់មករោងកុនក្នុងទម្រង់ 4K ចាប់ពីថ្ងៃទី 10 កុម្ភៈ 2023 អ្នកដឹកនាំរឿង James Cameron បានរៀបរាប់រឿងរ៉ាវមួយចំនួននៅក្រៅឆាករបស់ភាពយន្តល្បីឈ្មោះមួយនេះ។
ឈុតឆាកមួយដែលលោក Cameron ចូលចិត្តជាងគេគឺទិដ្ឋភាព Jack (Leonardo DiCaprio) គូររូបរបស់ Rose (Kate Winslet) ពេលនាងអាក្រាតកាយ ដោយសារវាគឺជាទិដ្ឋភាពបង្ហាញអំពីឥទ្ធិពលស្នេហាដែលយកឈ្នះលើរនាំងវណ្ណៈក្នុងសង្គម។
លោក Cameron រម្លឹកឡើងវិញអំពីអ្វីដែលបានកើតឡើងនៅកន្លែងថតកុន៖ «មានការបារម្ភខ្លះៗ មានប្រភពថាមពលមួយ និងការរារែករបស់តួសម្ដែងទាំងពីរ។ ពួកគេបានហាត់ស៊ាំ ប៉ុន្តែមិនទាន់បានថតសាកល្បងមុននោះ»។
ដោយសារតែ DiCaprio ខ្សោយខាងគំនូរ លោក Cameron ក៏ត្រូវសម្ដែងជំនួសត្រង់ឈុតប្រើដៃគូររូប។ អ្នកដឹកនាំរឿងប្រើដៃឆ្វេង ខណៈអ្នកសម្ដែង (DiCaprio) ប្រើដៃស្ដាំ ដូច្នេះ ធ្វើឱ្យក្រុមកាត់តវីដេអូត្រូវត្រលប់រូបភាព។ ឆ្នាំ 2011 ផ្ទាំងគំនូរខាងលើត្រូវបានលក់ក្នុងតម្លៃ 16,000 ដុល្លារអាម៉េរិក។
ឆ្នាំ 2012 កំណែ Titanic 3D ត្រូវបានអាជ្ញាធរចិនកាត់ចោលទិដ្ឋភាពពីដើមទ្រូងចុះដល់ជើងរបស់តួអង្គស្រី «ដោយសារតែបារម្ភថា អ្នកទស្សនានឹងអាចយកដៃប៉ះលើរូបភាព នាំឱ្យរំខានដល់អ្នកមើលដទៃទៀត»។ ការសម្រេចចិត្តរបស់អាជ្ញាធរចិន បានបណ្ដាលឱ្យទស្សនិកជននៅប្រទេសនេះមិនសប្បាយចិត្ត។
ឆ្នាំ 2017 នៅក្នុងខួប 20 ឆ្នាំរបស់ Titanic តារាសម្ដែងស្រី Kate Winslet បានឱ្យដឹងថា នាងស្លៀកពាក់ឈុតហែលទឹកប៉ុណ្ណោះ គឺមិនមែនអាក្រាតកាយឡើយនៅពេលផ្ដេកខ្លួនឱ្យអ្នកដឹកនាំរឿងគូររូប។ ផ្ទាំងគំនូរនេះបានធ្វើឱ្យគ្រួសាររបស់ Kate Winslet មានអារម្មណ៍មិនល្អអស់ជាច្រើនឆ្នាំ ព្រោះថា ធ្លាប់មានអ្នកគាំទ្រជាច្រើនបោះពុម្ពរូបគំនូរនេះ ហើយយកមកសុំហត្ថលេខា។ មានគ្រាមួយនោះ មិត្តរួមថ្នាក់កូនស្រីរបស់អ្នកស្រី Kate បាននិយាយនៅចំពោះនាងថា «ឱ ព្រះអើយ! យើងបានឃើញដើមទ្រូងរបស់ម៉ាក់ឯងហើយ!»។
ផ្ទាំងគំនូរស្ដីពី Rose អាក្រាតកាយក្នុងរឿង Titanic
អ្នកដឹកនាំរឿង James Cameron គឺជាអ្នកចូលចិត្តគូររូប។ ក្រៅពីផ្ទាំងគំនូរអាក្រាតដែលលោកបានគូររូប Kate បណ្ដារូបក្នុងកម្រងរូបគំនូរដែលតួអង្គ Jack ជូនដល់ Rose ក្នុងរឿង Titanic ក៏ជាស្នាដៃរបស់លោក Cameron។ រូបគំនូរជាច្រើនដែលលោក Cameron បានគូរចាប់តាំងពីក្មេង ក្រោយមកក៏បានក្លាយជាផ្នែកសំខាន់ជាច្រើននៅក្នុងខ្សែភាពយន្តមួយចំនួន មានដូចជា Alien និង Avatar ជាដើម។
James Cameron និង Kate Winslet
James Cameron កើតឆ្នាំ 1954 គឺជាអ្នកដឹកនាំរឿងលំដាប់កំពូលរបស់ Hollywood ដោយធ្លាប់បានដឹកនាំរឿង Piranha 2 (1984), The Terminator (1984), Aliens (1986)។ ឆ្នាំ 2009 Avatar បានយកឈ្នះលើ Titanic (សុទ្ធតែជាស្នាដៃរបស់គាត់) ក្លាយជាភាពយន្តមានទស្សនិកជនច្រើនជាងគេនៅគ្រប់សម័យកាល និងរកចំណូលបាន 2.8 ពាន់លានដុល្លារ។ ក្នុង 13 ឆ្នាំកន្លង លោក Cameron មិនបានដឹកនាំរឿងមួយណាឡើយ ប៉ុន្តែគាត់ចំណាយពេលដើម្បីស្រាវជ្រាវ អភិវឌ្ឍបច្ចេកវិទ្យា និងត្រៀមសាច់រឿងសម្រាប់វគ្គបន្ទាប់របស់ Avatar។ កាលពីចុងខែមករា 2023 ប្រាក់ចំណូលរបស់ Avatar 2 បានកើនឡើងលើសពី 2 ពាន់លានដុល្លារអាម៉េរិក៕
February 18, 2023