សឿន សំណាង - La Reine Media

អាជ្ញាធរចិនអនុញ្ញាតឱ្យគូស្វាមីភរិយាទើបរៀបការ «សម្រាកការងារ 30 ថ្ងៃ»

ខេត្តមួយចំនួនរបស់ប្រទេសចិនអនុញ្ញាតឱ្យគូស្វាមីភរិយាដែលទើបរៀបការរួច ឈប់សម្រាកពីការងារដោយមានប្រាក់បៀវត្សក្នុងរយៈពេល 30 ថ្ងៃ ក្នុងបំណងលើកទឹកចិត្តដល់យុវវ័យរៀបការដើម្បីបង្កើនអត្រាចាប់កំណើតរបស់ទារក។

ពេលវេលាសម្រាកជាអប្បបរមាដែលទទួលបានប្រាក់បៀវត្សបន្ទាប់ពីបានរៀបការនៅប្រទេសចិនគឺ 3 ថ្ងៃ ប៉ុន្តែខេត្តមួយចំនួនអាចដាក់ចេញគោលការណ៍ដោយឡែកអំពីរបបសម្រាកការងារសម្រាប់ប្ដីប្រពន្ធទើបរៀបការ ចាប់ពីខែកុម្ភៈ 2023 នេះតទៅ។

ខេត្ត Gansu និងខេត្ត Shanxi បច្ចុប្បន្នអនុញ្ញាតឱ្យប្រជាពលរដ្ឋសម្រាកការងារដោយទទួលបានប្រាក់បៀវត្សរហូតដល់ 30 ថ្ងៃ បន្ទាប់ពីបានរៀបការ ខណៈដែលទីក្រុង Shanghai ឱ្យសម្រាក 10 ថ្ងៃ និង Sichuan នៅតែរក្សាគោលការណ៍ 3 ថ្ងៃ។

«ការអូសបន្លាយពេលវេលាឈប់សម្រាកក្រោយរៀបការគឺជាវិធីមួយដែលមានប្រសិទ្ធភាពដើម្បីបង្កើនអត្រាបង្កើតកូន» Yang Haiyang ប្រធានវិទ្យាស្ថានស្រាវជ្រាវការអភិវឌ្ឍសង្គមរបស់សាកលវិទ្យាល័យហិរញ្ញវត្ថុ និងសេដ្ឋកិច្ចភាគនិរតី (Southwestern University of Finance and Economics) ថ្លែងដូច្នេះ និងបន្ត «គោលនយោបាយនេះភាគច្រើនផ្ដោតលើបណ្ដាខេត្តដែលមានសេដ្ឋកិច្ចរីកចម្រើនយឺត»។

លោក Yang ឱ្យដឹងថា ក្រៅពីពេលវេលាឈប់សម្រាកការងារ អាជ្ញាធរក្នុងតំបន់ក៏គួរបន្ថែមគោលការណ៍ផ្ដល់ជំនួយ មានដូចជាផ្ទះស្នាក់នៅ និងសម្រាកមានប្រាក់បៀវត្សសម្រាប់បុរសក្នុងពេលភរិយាសម្រាលកូនជាដើម។

កំណើនប្រជាជនចិនកាលពីឆ្នាំកន្លងបានថយចុះជាលើកដំបូងក្នុងរង្វង់ 6 ទសវត្សរ៍មកនេះ។ ក្រុមអ្នកជំនាញយល់ថា នេះអាចជាការចាប់ផ្ដើមនៃយុគសម័យកំណើនប្រជាជនថយចុះរយៈពេលយូររបស់ប្រទេសនេះ។ កាលពីឆ្នាំមុន ប្រទេសចិនមានអត្រានៃការបង្កើតកូនទាបបំផុត ដោយមានទារកចាប់កំណើតតែ 6.77 នាក់ប៉ុណ្ណោះនៅក្នុងចំណោមប្រជាជន 1,000 នាក់។

មូលហេតុដែលនាំឱ្យកំណើនប្រជាជនថយចុះនេះត្រូវបានអ្នកស្រាវជ្រាវជឿថា បណ្ដាលមកពី «គោលនយោបាយកូនមួយ» ដ៏តឹងរឹងដែលអាជ្ញាធរចិនបានអនុវត្តចាប់ពីទសវត្សរ៍ឆ្នាំ 1980 ដល់ 2015។ ការចំណាយសម្រាប់ការអប់រំកើនឡើងខ្ពស់ក៏ធ្វើឱ្យប្ដីប្រពន្ធវ័យក្មេងនៅប្រទេសចិនមិនចង់មានកូនទីពីរ ហើយលើសពីនេះក៏មានមនុស្សមួយចំនួនមិនចង់បង្កើតកូនតែម្ដង៕

February 22, 2023

អ៊ីនធើណិតផ្កាយរណបរបស់ Elon Musk ពង្រីកសេវាទូទាំងសកលលោក

សេវាកម្មអ៊ីនធើណិតថ្មី Starlink អនុញ្ញាតឱ្យប្រើប្រាស់ដោយភ្ជាប់ជាមួយនឹងផ្កាយរណបនៅស្ទើរតែគ្រប់តំបន់លើពិភពលោក ដោយលក់ក្នុងតម្លៃ 200 ដុល្លារអាម៉េរិក/ខែ។

កាលពីថ្ងៃទី 20 កុម្ភៈ ក្រុមហ៊ុន SpaceX បានឱ្យដឹងថា ខ្លួនបានចាប់ផ្ដើមផ្គត់ផ្គង់សាកល្បងនូវប្រព័ន្ធអ៊ីនធើណិតក្នុងបណ្ដាតំបន់ដែល Starlink មិនទាន់ទៅដល់។ ក្រៅពីកញ្ចប់សេវាកម្មអ៊ីនធើណិតតម្លៃ 200 ដុល្លារ/ខែ អ្នកប្រើប្រាស់ក៏ត្រូវទិញឧបករណ៍ទទួលសញ្ញាអ៊ីនធើណិត Starlink Kit ដែលមានតម្លៃ 599 ដុល្លារអាម៉េរិក។

យោងតាម PCMag ក្រុមហ៊ុន SpaceX បានចាប់ផ្ដើមផ្ញើអ៊ីម៉េលទៅកាន់អតិថិជនគោលដៅដើម្បីអញ្ជើញឱ្យ ប្រើប្រាស់សាកល្បងសេវាអ៊ីនធើណិតថ្មីរបស់ពួកគេ។ ប៉ុន្តែបើយោងតាម The Verge ក្រុមហ៊ុនរបស់មហាសេដ្ឋីអាម៉េរិក Elon Musk មិនទាន់អធិប្បាយលំអិតអំពីអ្វីដែលពួកគេនឹងធ្វើនៅពេលផ្គត់ផ្គង់អ៊ីនធើណិតនៅទូទាំងពិភពលោកនៅឡើយ។ ចំណែកផ្កាយរណបជាច្រើនគ្រឿងរបស់ SpaceX ក៏កំពុងរង់ចាំទទួលលិខិតអនុញ្ញាតដើម្បីផ្គត់ផ្គង់សេវាកម្មនេះនៅក្នុងទីផ្សារផ្សេងៗ មានដូចជា ឥណ្ឌា និងប៉ាគីស្ថានជាដើម។

SpaceX ក៏បានឱ្យដឹងថា អ្នកប្រើប្រាស់អាចនឹងត្រូវបង់ពន្ធ ថ្លៃនាំចូលឧបករណ៍ Starlink Kit បន្ថែមពីលើថ្លៃសេវាអ៊ីនធើណិត និងថ្លៃឧបករណ៍ Starlink Kit នេះផងដែរ។

SpaceX កំពុងផ្គត់ផ្គង់សេវាអ៊ីនធើណិតជម្រើសប្ដូរតំបន់ជាមួយនឹងតម្លៃទាបជាង នោះគឺ Starlink RV ក្នុងនោះអ្នកប្រើប្រាស់ត្រូវចំណាយបន្ថែម 25 ដុល្លារ ក្រៅពីកញ្ចប់ថេរ 110 ដុល្លារ/ខែ។ ក៏ប៉ុន្តែ កញ្ចប់តម្លៃទាបនេះអនុញ្ញាតឱ្យប្រើប្រាស់តែនៅក្នុងប្រទេសដែលអតិថិជនកំពុងរស់នៅប៉ុណ្ណោះ។ ចំណែកកញ្ចប់ប្ដូរតំបន់ទូទាំងពិភពលោកគឺសម្រាប់អ្នកដែលផ្លាស់ទីឆ្លងប្រទេសជាញឹកញាប់ក្នុងរយៈពេលយូរ។

ដំណើរការរបស់ប្រព័ន្ធអ៊ីនធើណិត Starlink របស់ SpaceX

សម្រាប់បណ្ដាប្រទេសនៅក្នុងតំបន់អាស៊ីអាគ្នេយ៍ មានដូចជា ហ្វ៊ីលីពីន សិង្ហបុរី ម៉ាឡេស៊ី និងព្រុយណេ ជាដើម SpaceX គ្រោងនឹងផ្គត់ផ្គង់អ៊ីនធើណិតចាប់ពីឆ្នាំ 2023 នេះ។

យោងតាមគោលការណ៍ប្រទេសមួយចំនួន បើសិន SpaceX ចង់ផ្គត់ផ្គង់អ៊ីនធើណិតនៅប្រទេសណាមួយ ពួកគេនឹងត្រូវមានកិច្ចព្រមព្រៀងពាណិជ្ជកម្មជាមួយក្រុមហ៊ុនណាមួយដែលបានទទួលការអនុញ្ញាតឱ្យផ្ដល់សេវាទូរគមនាគមន៍ក្នុងប្រទេសនោះជាមុន រួមនឹងគោលការណ៍មួយចំនួនផ្សេងទៀត។

គិតត្រឹមពាក់កណ្ដាលឆ្នាំ 2022 SpaceX មានផ្កាយរណប Starlink ប្រហែល 3,500 គ្រឿងកំពុងដំណើរការនៅលើគន្លងគោចរផែនដី និងផ្គត់ផ្គង់អ៊ីនធើណិតដល់អ្នកប្រើប្រាស់ប្រហែល 500,000 នាក់នៅក្នុង 37 ប្រទេសលើពិភពលោក៕

February 21, 2023

ភាពយន្ត «Avatar 2» បំបែកកំណត់ត្រាប្រាក់ចំណូលរបស់ភាពយន្ត «Titanic»

ខ្សែភាពយន្ត «Avatar 2» រកប្រាក់ចំណូលបាន 2.2433 ពាន់លានដុល្លារអាម៉េរិក ច្រើនជាងភាពយន្ត «Titanic» និងក្លាយជាភាពយន្តដែលរកបានប្រាក់ចំណូលពីការលក់សំបុត្រចូលទស្សនាខ្ពស់ជាងគេលំដាប់ទីបីនៅគ្រប់សម័យកាល។

កាលពីថ្ងៃទី 20 កុម្ភៈ Variety បានផ្សាយថា Avatar 2 ឬ Avatar: The Way of Water (អវតា៖ វិថិមហាសាគរ) បានយកឈ្នះលើ Titanic (2.2428 ពាន់លានដុល្លារ) និងបានចូលមកកាន់កាប់តំណែងលំដាប់ទីបីក្នុងចំណោមភាពយន្តដែលមានប្រាក់ចំណូលខ្ពស់បំផុតក្នុងគ្រប់សម័យកាល។ បច្ចុប្បន្ន ភាពយន្ត Avatar 2 កំពុងតាមពីក្រោយ Avatar (2.92 ពាន់លានដុល្លារ) និង Avengers: Endgame (2.7 ពាន់លានដុល្លារ)។

លោក James Cameron បានក្លាយជាអ្នកដឹកនាំរឿងដែលមានខ្សែភាពយន្តចំនួនបីក្នុងចំណោមបួនដែលមានឈ្មោះនៅក្នុងបញ្ជីស្ដីពីភាពយន្តរកបានប្រាក់ចំណូលខ្ពស់ជាងគេ។

ខ្សែភាពយន្ត Avatar 2 ឬ Avatar: The Way of Water (អវតា៖ វិថិមហាសាគរ)

ក្រុមហ៊ុន Disney បានចំណាយប្រាក់ប្រហែល 460 លានដុល្លារដើម្បីផលិត និងឃោសនាឱ្យខ្សែភាពយន្ត អវតា៖ វិថិមហាសាគរ ធ្វើឱ្យវាក្លាយជាមួយក្នុងចំណោមគម្រោងភាពយន្តដែលមានការចំណាយខ្ពស់បំផុតក្នុងប្រវត្តិសាស្ត្រ។ លោក James Cameron ចំណាយពេលប្រហែល 13 ឆ្នាំដើម្បីអភិវឌ្ឍ និងបង្ហើយស្នាដៃរបស់លោក។ Avatar 2 បានចាប់ផ្ដើមបញ្ចាំងនៅរោងភាពយន្តកាលពីខែធ្នូ 2022 និងបាននាំមុខគេក្នុងបញ្ជរលក់សំបុត្រនៅអាម៉េរិកខាងជើងក្នុងរយៈពេល 10 សប្ដាហ៍ជាបន្តបន្ទាប់។

ខ្សែភាពយន្ត «Avatar 2» ដែលជាវគ្គបន្ទាប់របស់ «Avatar» ផលិតកាលពីឆ្នាំ 2009 និយាយអំពី Jake Sully (Sam Worthington) កសាងគ្រួសារថ្មីនៅ Pandora។ ពួកគេរស់ដោយសុភមង្គលជាមួយនឹងកូន 4 នាក់ ក្នុងនោះមាន Kiri (Sigourney Weaver) ដែលជាកូនស្រីរបស់សពបណ្ឌិត Grace Augustine។ ក៏ប៉ុន្តែ ជីវភាពសុខសាន្តរបស់ពួកគេមិនបានអូសបន្លាយពេលយូរឡើយ នៅពេលមនុស្សវិលត្រលប់ទៅសងសឹក។

ខ្សែភាពយន្ត Titanic

ចំណែក Titanic វិញ គឺជាខ្សែភាពយន្តដែលចាប់បញ្ចាំងលើកដំបូងក្នុងឆ្នាំ 1997។ ភាពយន្តនេះត្រូវបានផលិតឡើងដោយយោងទៅតាមហេតុការណ៍លិចកប៉ាល់ទេសចរណ៍មួយកាលពីឆ្នាំ 1912។ Titanic ទទួលបានជោគជ័យខ្លាំងនៅឯបញ្ជរលក់សំបុត្រ និងដណ្ដើមបានពានរង្វាន់ Oscar ចំនួន 11។ គម្រោងភាពយន្តនេះក៏ត្រូវបានដឹកនាំរឿងដោយជនជាតិកាណាដា លោក James Cameron៕

February 21, 2023

21 ម៉ោងដែលលោក បៃដិន ធ្វើដំណើរពីវ៉ាស៊ីងតោនទៅកាន់អ៊ុយក្រែនដោយស្ងាត់ៗ

ដំណើរទស្សនកិច្ចទៅកាន់រដ្ឋធានីកៀវរបស់ប្រធានាធិបតីអាម៉េរិក បានចាប់ផ្ដើមដោយភាពស្ងប់ស្ងាត់នៅឯព្រលានយន្តហោះយោធានៅជាយក្រុងវ៉ាស៊ីងតោន កាលពីវេលាទៀបភ្លឺ ថ្ងៃទី 19 កុម្ភៈ។

ប្រធានាធិបតី ចូ បៃដិន ឈានជើងឡើងយន្តហោះ C-32A របស់ទ័ពអាកាសអាម៉េរិកនៅឯបន្ទាយ Andrews វេលាម៉ោង 04 ទៀបភ្លឺថ្ងៃទី 19 កុម្ភៈ (ម៉ោង 16 នៅកម្ពុជា)។

យន្តហោះ C-32A ពេលនោះចតនៅឆ្ងាយពីកន្លែងដែលលោក បៃដិន តែងតែឡើងយន្តហោះ ហើយបង្អួចទាំងអស់សុទ្ធតែត្រូវបានបិទបាំង។ 15 នាទីក្រោយ លោក បៃដិន និងអង្គរក្ស និងបុគ្គលិកពេទ្យមួយក្រុមតូច ចាប់ផ្ដើមធ្វើដំណើរជិត 24 ម៉ោង ទៅកាន់រដ្ឋធានីកៀវរបស់អ៊ុយក្រែន។

តម្រូវការសន្តិសុខតឹងរឹង និងការរក្សាការណ៍សម្ងាត់កម្រិតខ្ពស់របស់ដំណើរទស្សនកិច្ចនេះ ធ្វើឱ្យក្រុមអ្នកយកព័ត៌មានអមដំណើរដែលធ្លាប់តែមានគ្នា 13 នាក់ មកពីទីភ្នាក់ងារសារព័ត៌មាននានា ត្រូវកាត់បន្ថយមកនៅត្រឹមពីរនាក់ ក្នុងនោះម្នាក់ជាអ្នកសរសេរ ម្នាក់ជាអ្នកថតរូប។

Sabrina Siddiqui អ្នកយកព័ត៌មានរបស់ Wall Street Journal ឱ្យដឹងថា អ្នកស្រី និងមិត្តរួមអាជីព Evan Vucci មកពី AP ត្រូវតម្រូវឱ្យស្បថថានឹងរក្សាការណ៍សម្ងាត់ និងត្រូវស្នើឱ្យ «រង់ចាំអ៊ីម៉េលមានផ្ទុកព័ត៌មានស្ដីពីការណែនាំអំពីដំណើរនៅព្រឹកព្រលឹមថ្ងៃទី 19 កុម្ភៈ ដែលមានចំណងជើងថា «ការណែនាំទៅកាន់ការប្រកួតវាយកូនគោល»»។

យន្តហោះ C-32A (ខាងមុខ) និង VC-25A របស់ទ័ពអាកាសអាម៉េរិកនៅបារាំងកាលពីឆ្នាំ 2009

អ្នកយកព័ត៌មានពីររូបខាងលើមានវត្តមាននៅបន្ទាយ Andrews វេលាម៉ោង 02 និង 15 នាទី។ ទូរស័ព្ទរបស់ពួកគេត្រូវបានសមត្ថកិច្ចយកទៅរក្សាទុក និងប្រគល់មកវិញនៅពេលលោក បៃដិន មានវត្តមាននៅរដ្ឋធានីរបស់អ៊ុយក្រែន។

យន្តហោះដឹកប្រតិភូប្រធានាធិបតីអាម៉េរិកហោះឆ្លងកាត់មហាសមុទ្រអាត្លង់ទិកក្នុងរយៈពេល 7 ម៉ោង និងចុះចតនៅព្រលានយន្តហោះយោធា Ramstein នៅអាល្លឺម៉ង់ដើម្បីចាក់ប្រេង។ បង្អួចទាំងអស់របស់យន្តហោះ C-32A នៅតែបិទបាំងជិត និងមិនមានអ្នកចាកចេញពីយន្តហោះ។ បន្ទាប់មក C-32A ក៏បន្តហោះទៅកាន់ព្រលានយន្តហោះ Rzeszow-Jasionka របស់ប៉ូឡូញ ជាទីប្រមូលផ្ដុំអាវុធ និងគ្រាប់រំសេវដែលអាម៉េរិកផ្ដល់ឱ្យអ៊ុយក្រែន។

អ្នកយកព័ត៌មាន Sabrina Siddiqui និង Evan Vucci មិនបានមើលឃើញលោក បៃដិន នោះទេ នៅក្នុងពេលហោះហើរ។ បន្ទាប់ពីចុះចតនៅព្រលានយន្តហោះ Rzeszow-Jasionka នាពេលព្រលប់ ពួកគេត្រូវបានដឹកតាមយន្តហោះ SUV ដើម្បីចាកចេញ។ ក្បួនរថយន្តធ្វើដំណើរយ៉ាងស្ងាត់នៅក្នុងផ្ទៃមេឃងងឹត ដោយពុំមានសំឡេងសារ៉ែន ឬសញ្ញាណាមួយបញ្ជាក់ថា ប្រធានាធិបតីអាម៉េរិកកំពុងឆ្ពោះទៅកាន់ស្ថានីយរថភ្លើង Przemysl Glowny នៅក្បែរព្រំដែនប៉ូឡូញ-អ៊ុយក្រែនឡើយ។

ប្រតិភូចាប់ផ្ដើមឡើងរថភ្លើងនៅវេលាម៉ោង 21 និង 15 នាទី។ អ្នកយកព័ត៌មាន Sabrina Siddiqui និង Evan Vucci នៅតែមិនបានមើលឃើញស្រមោលរបស់លោក បៃដិន។ «រថភ្លើងមានទូប្រហែល 8។ មនុស្សភាគច្រើននៅលើរថភ្លើងនេះគឺជាបុគ្គលិកសន្តិសុខដែលបំពាក់ដោយអាវុធគ្រប់គ្រាន់» Siddiqui រម្លឹកឡើងដូច្នេះ។

លោក បៃដិន នៅស្ថានីយរថភ្លើងក្នុងក្រុងកៀវប្រទេសអ៊ូយក្រែន កាលពីព្រឹកថ្ងៃទី 20 កុម្ភៈ 2023

ការធ្វើដំណើរតាមរថភ្លើងពីស្ថានីយ Przemysl Glowny ទៅកាន់កៀវ អូសបន្លាយពេលប្រហែល 10 ម៉ោង។ រថភ្លើងធ្វើដំណើរចូលទៅកាន់ស្ថានីយ Kiev-Pasazhyrsky នៅវេលាម៉ោង 08 ថ្ងៃទី 20 កុម្ភៈ ប៉ុន្តែព័ត៌មានស្ដីពីការធ្វើដំណើរនេះនៅតែត្រូវបានរក្សាការណ៍សម្ងាត់ដដែល។

តំបន់ជុំវិញស្ថានីយរថភ្លើងខាងលើត្រូវបានបិទខ្ទប់ ខណៈដែលឯកអគ្គរដ្ឋទូតអាម៉េរិកប្រចាំអ៊ុយក្រែន Bridget Brink ឈររង់ចាំនៅខាងក្រៅទូរថភ្លើងជាស្រេច។ «ពិតជាអស្ចារ្យនៅពេលបានត្រលប់មកកាន់កៀវ» ប្រធានាធិបតី បៃដិន ថ្លែងនៅពេលចាកចេញពីរថភ្លើង។

មកដល់ពេលនេះ ទើបទីភ្នាក់ងារសារព័ត៌មាននានាចុះផ្សាយអំពីដំណើរទស្សនកិច្ចដំបូងរបស់ប្រធានាធិបតីអាម៉េរិក ចូ បៃដិន មកកាន់រដ្ឋធានីកៀវ។ រូបភាពដែលត្រូវបានចុះផ្សាយនាពេលនោះបង្ហាញថា លោក បៃដិន និងសមភាគីអ៊ុយក្រែន លោក ហ្សេឡែនស្គី ដើរទន្ទឹមគ្នានៅលើដងផ្លូវក្នុងក្រុងកៀវ នៅកណ្ដាលរង្វង់ការពារសន្តិសុខយ៉ាងដេរដាសរបស់ក្រុមអង្គរក្ស។

លោក បៃដិន និងលោក ហ្សេឡែនស្គី នៅវិមាន Mariinsky កាលពីថ្ងៃទី 20 កុម្ភៈ 2023

ទោះជាយ៉ាងណាក៏ដោយ សហរដ្ឋអាម៉េរិកមិនបានលាក់ការណ៍ទាំងស្រុងនូវដំណើរទស្សនកិច្ចខាងលើនេះចំពោះភាគីរុស្ស៊ីឡើយ។ ទីប្រឹក្សាសន្តិសុខជាតិអាម៉េរិក Jake Sullivan បានឱ្យដឹងថា ប៉ុន្មានម៉ោងមុនពេលលោក បៃដិន ឡើងយន្តហោះនៅសហរដ្ឋអាម៉េរិក មន្ត្រីនៅវ៉ាស៊ីងតោនក៏បានជូនដំណឹងដល់ភាគីរុស្ស៊ី។ ការជូនដំណឹងនេះគឺដើម្បី «បញ្ចៀសការគន់គូរមិនត្រឹមត្រូវ» ដែលអាចនាំឱ្យមហាអំណាចទាំងពីរធ្លាក់ទៅក្នុងសង្គ្រាមដោយផ្ទាល់។

បន្ទាប់ពីបានជួបប្រធានាធិបតី ហ្សេឡែនស្គី និងលើកឡើងនូវការសន្យាថ្មីទាក់ទងនឹងជំនួយយោធា លោក បៃដិន ក៏បានចាកចេញពីរដ្ឋធានីកៀវទៅកាន់ប៉ូឡូញ ដើម្បីធ្វើទស្សនកិច្ចប្រទេសនេះទៅតាមកាលបរិច្ឆេទដែលបានរៀបចំមុននោះ៕

February 21, 2023

ទីក្រុងរបស់ជប៉ុនស្នើឱ្យប្រជាជនសរសេរឈ្មះលើថង់សំរាម

អាជ្ញាធរក្រុង Ichikikushikino ស្នើឱ្យប្រជាពលរដ្ឋសរសេរឈ្មោះនៅលើថង់សំរាមមុនពេលបុគ្គលិកអនាម័យចុះទៅប្រមូល ដើម្បីលើកទឹកចិត្តឱ្យមានការបែងចែកប្រភេទសំរាម ប៉ុន្តែសំណើនេះបង្កឱ្យមានការបារម្ភអំពីសិទ្ធិឯកជន។

ក្រុមមន្ត្រីរបស់ទីក្រុង Ichikikushikino នៃខេត្ត Kagoshima ភាគនិរតីប្រទេសជប៉ុន បានដាក់ចេញការកំណត់នេះតាំងពីឆ្នាំ 1996។ កាលណោះ សមត្ថកិច្ចបានឱ្យដឹងថា មានករណីប្រជាជនដាក់ធុងហ្កាស ឬថ្មពិលចូលក្នុងថង់សំរាមរួម បង្កឱ្យមានអគ្គិភ័យនៅកន្លែងកែច្នៃសំរាម។ បើសិនថង់សំរាមមិនមានឈ្មោះម្ចាស់ ឬមិនត្រូវបានបែងចែកប្រភេទត្រឹមត្រូវ វានឹងត្រូវគេបិទស្លាក «ខុសច្បាប់» និងត្រូវទុកនៅកន្លែងដើម។

ម៉ោង 08 ព្រឹក ថង់សំរាមដែលមានឈ្មោះត្រូវបានដាក់នៅកន្លែងប្រមូលក្នុងទីក្រុង Ichikikushikino ហើយនៅក្បែរនោះមានផ្ទាំងបដាមួយសរសេរថា «សូមសរសេរឈ្មោះលើថង់សំរាម»។

មនុស្សមួយចំនួនបានសម្ដែងការព្រួយបារម្ភចំពោះការកំណត់ខាងលើ។ ស្ត្រីវ័យ 70 ឆ្នាំម្នាក់ដែលបានមករស់នៅក្នុងទីក្រុង Ichikikushikino កាលពីប៉ុន្មានឆ្នាំមុន បានឱ្យដឹងថា គាត់មិនធ្លាប់ត្រូវគេតម្រូវឱ្យសរសេរឈ្មោះលើថង់សំរាមនោះទេ នៅពេលរស់នៅក្នុងទីក្រុង Kanto។

«មើលទៅលើថង់សំរាម គេដឹងថាខ្ញុំបានបរិភោគអ្វី។ ខ្ញុំបានបែងចែកប្រភេទសំរាមរួចហើយ ហេតុអ្វីត្រូវសរសេរឈ្មោះទៀត?» លោកយាយខាងលើបានថ្លែងដូច្នេះនៅក្នុងកិច្ចសម្ភាសជាមួយ Mainichi កាលពីចុងសប្ដាហ៍កន្លង។

ស្ត្រីម្នាក់ទៀតនិយាយថា ការកំណត់នេះ «ប្រៀបបានទៅនឹងការតាមដានរបស់អ្នកដទៃមកលើការរស់នៅរបស់ខ្ញុំ»។

ក៏ប៉ុន្តែ ការកំណត់ខាងលើក៏ទទួលបានការគាំទ្រពីប្រជាពលរដ្ឋផងដែរ ដោយពួកគេយល់ថា នេះគឺជាការទប់ស្កាត់ករណីអគ្គិភ័យ ហើយវានឹងជួយឱ្យសមត្ថកិច្ចមានភាពងាយស្រួលក្នុងការស្វែងរកម្ចាស់សំរាមដែលបានបង្កបញ្ហា។

អាជ្ញាធរ Ichikikushikino ឱ្យដឹងថា បរិមាណសំរាមប្រចាំថ្ងៃជាមធ្យមរបស់ប្រជាជនក្នុងទីក្រុងនេះនៅតែមានកម្រិតខ្ពស់ជាងមធ្យមភាគនៅទូទាំងប្រទេស ខណៈដែលការកែច្នៃសំរាមមានអត្រាតែ 9.3% ប៉ុណ្ណោះ ទាបជាងឆ្ងាយធៀបនឹង 20% នៅទូទាំងប្រទេស៕

February 21, 2023

តម្លៃលក់រាយប្រេងឥន្ធនៈចាប់ពីថ្ងៃទី 21-28 ខែកុម្ភៈ ឆ្នាំ 2023

យោងតាមក្រសួងពាណិជ្ជកម្ម តម្លៃប្រេងឥន្ធនៈនៅកម្ពុជា ដែលអនុវត្តចាប់ពីថ្ងៃទី 21-28 ខែកុម្ភៈ ឆ្នាំ 2023 នឹងថយចុះ 50 រៀល/លីត្រ ក្នុងនោះ សាំងធម្មតាមមានតម្លៃ 4,350 រៀល/លីត្រ និងម៉ាស៊ូតមានតម្លៃ 4,300 រៀល/លីត្រ។

February 21, 2023

អារ៉ាប៊ីសាអូឌីតសាងសង់អគាររាងគូប មានកម្ពស់ 400 ម៉ែត្រ (មានវីដេអូ)

រាជរដ្ឋាភិបាលអារ៉ាប៊ីសាអូឌីត ប្រកាសអំពីគម្រោងសាងសង់អគារកប់ពពកមួយដែលមានរាងជាគូប កម្ពស់ 400 ម៉ែត្រ ក្នុងមជ្ឈមណ្ឌល Murabba នៅរាជធានីរីយ៉ាដ និងមានឈ្មោះថា Mukaab។

តំបន់ Murabba ដែលមានទំហំ 19 គីឡូម៉ែត្រក្រឡា នឹងក្លាយជាមជ្ឈមណ្ឌលថ្មីរបស់រាជធានីរីយ៉ាដ។ តំបន់នេះនឹងត្រូវអភិវឌ្ឍជុំវិញអគារ Mukaab ដែលជាស្ថាបត្យកម្មធំជាងគេបំផុតមួយរបស់ពិភពលោក។ អគារ Mukaab មានកម្ពស់ 400 ម៉ែត្រ និងបណ្ដោយ ឬទទឹងប្រវែង 400 ម៉ែត្រ។ យោងតាម Dezeen នេះគឺជាអគារខ្ពស់ជាងគេបង្អស់នៅក្នុងទីក្រុង និងអាចដាក់មនុស្សបានរាប់សែននាក់។

អគារមានរូបរាងជាគូបនេះនឹងបិទជិតមួយផ្នែក ដែលរួមមានរូបរាងត្រីកោណជាច្រើនត្រូវបានតម្រួតលើគ្នា។ អគារនេះនឹងមានលំហមិនមានជាន់រហូតដល់កំពូល ហើយខាងក្នុងមានអគារមួយដែលមានរាងដូចគូទខ្យង។

រចនាសម្ព័ន្ធ និងប្រភេទសេវាកម្មរបស់អគារ Mukaab

រាជទាយាទ Mohammed bin Salman របស់អារ៉ាប៊ីសាអូឌីតប្រកាសបង្កើតក្រុមហ៊ុន New Murabba Development ដើម្បីកែប្រែតំបន់កណ្ដាលរាជធានីរីយ៉ាដ តាមរយៈការសាងសង់អគារខាងលើដែលនឹងនាំមកនូវបទពិសោធន៍រស់នៅ ធ្វើការ និងកំសាន្តយ៉ាងពិសេស។ គម្រោងនេះនឹងផ្ដោតលើស្ថិរភាព ដោយមានតំបន់បៃតង ផ្លូវសម្រាប់ថ្មើរជើង និងជិះគង់ ក្នុងបំណងជួយលើកកម្ពស់គុណភាពជីវិត។ តំបន់ Murabba នឹងមានសារមន្ទីរ សាលាមហាវិទ្យាល័យផ្នែកបច្ចេកវិទ្យានិងស្ថាបត្យកម្ម សាលមហោស្រព ទីតាំងកំសាន្ត និងទីតាំងវប្បធម៌ជាង 80 កន្លែង។

គម្រោងសាងសង់អគារកប់ពពក Mukaab ដែលមានរាងជាគូប កម្ពស់ 400 ម៉ែត្រ នៅរាជធានីរីយ៉ាដ

Murabba នឹងមានផ្ទៃរបស់ជាន់នានាសរុបជាង 25 លានម៉ែត្រក្រឡា ដោយមានមនុស្សរស់នៅចំនួន 104,000 គ្រួសារ, មានបន្ទប់សណ្ឋាគារចំនួន 9,000, កន្លែងលក់រាយមានទំហំសរុប 980,000 ម៉ែទ្រក្រឡា, ការិយាល័យ 1.4 លានម៉ែត្រក្រឡា, ទីតាំងកំសាន្ត 620,000 ម៉ែត្រក្រឡា និងសហគមន៍មូលដ្ឋាន 1.8 លានម៉ែត្រក្រឡា។ គម្រោង Murabba នឹងមានប្រព័ន្ធចរាចរណ៍ក្នុងក្រុង និងមានចម្ងាយពីព្រលានយន្តតែ 20 នាទីប៉ុណ្ណោះ នៅពេលជិះឡាន។ តាមការគណនា គម្រោងនេះនឹងបង្កើតបានការងារថ្មីចំនួន 334,000 កន្លែងនៅពេលសាងសង់រួចរាល់នៅឆ្នាំ 3030៕

February 21, 2023

តំណាងក្រុមហ៊ុនថា Haaland របស់ Man City មានតម្លៃខ្លួន «មួយពាន់លានដុល្លារអាម៉េរិក»

Rafaela Pimenta តំណាងរបស់កីឡាករ Erling Haaland ជឿថា ថ្ងៃដែលខ្សែប្រយុទ្ធជនជាតិន័រវែសមានតម្លៃមួយពាន់លានដុល្លារអាម៉េរិក ជិតមកដល់។

«Erling Haaland មានតម្លៃមួយពាន់លានដុល្លារអាម៉េរិក។ ខ្ញុំមិនសន្និដ្ឋាន ប៉ុន្តែខ្ញុំប្រាកដជាមួយនឹងតួលេខនេះ។ អ្នកផ្សេងអាចគិតថា ខ្ញុំនិយាយផ្ដាស ហើយយល់ថា មិនមានក្លឹបណាមួយហ៊ានចំណាយទឹកប្រាក់នោះ។ ក៏ប៉ុន្តែ កត្តាអាយុ សមត្ថភាព ការអភិវឌ្ឍខ្លួន និងអាកប្បកិរិយា ខ្ញុំកំណត់តម្លៃខ្លួនរបស់កីឡាករនេះរហូតដល់មួយពាន់លានដុល្លារអាម៉េរិក។ ពុំមានអ្នកណាម្នាក់ដឹងមុនអំពីអនាគត ប៉ុន្តែថ្ងៃនោះនឹងមកដល់» Pimenta និយាយកាលពីថ្ងៃទី 20 កុម្ភៈ ក្នុងកម្មវិធី Telefoot របស់ទូរទស្សន៍ TF1 ដូច្នេះ។

Pimenta ចូលមកជំនួស Mino Raiola ក្នុងការគ្រប់គ្រងក្រុមហ៊ុនតំណាងកីឡាករ One បន្ទាប់ពីភ្នាក់ងារបាល់ទាត់អ៊ីតាលី បានទទួលមរណភាពកាលពីឆ្នាំកន្លង។ នេះគឺជាក្រុមហ៊ុនគ្រប់គ្រង Haaland និងកីឡាករល្បីៗជាច្រើនរូបទៀត មានដូចជា Marco Verratti, Paul Pogba, Zlatan Ibrahimovic ឬ Gianluigi Donnarumma ជាដើម។ល។ បើគិតអំពីតម្លៃទិញដូរ Haaland គឺជាកីឡាករមានតម្លៃជាងគេដែល Pimenta កំពុងគ្រប់គ្រង។

កាលពីរដូវក្ដៅឆ្នាំកន្លង Manchester City ចំណាយតែ 63 លានដុល្លារប៉ុន្តែ ក្នុងការទិញ Haaland។ ប៉ុន្តែ ក្លឹបម្ចាស់កីឡដ្ឋាន Etihad បានធ្វើឱ្យកីឡាករវ័យ 22 ឆ្នាំរូបនេះ ទៅជាខ្សែប្រយុទ្ធដែលទទួលបានអត្ថប្រយោជន៍ច្រើនជាងគេនៅលីគកំពូលអង់គ្លេស ដោយប្រាក់ចំណូលបានពីបៀវត្សរ៍ និងរង្វាន់ឡើងដល់ជិតមួយលានដុល្លារអាម៉េរិក/សប្ដាហ៍។

https://www.youtube.com/watch?v=tE8p4BLtmSY

ទិដ្ឋភាពនៃការស៊ុតបញ្ចូលទីរបស់កីឡាករ Erling Haaland

Haaland ក៏បានបង្ហាញអំពីតម្លៃរបស់ខ្លួន បន្ទាប់ពីបានទៅរួមរស់ជាមួយ Man City។ កីឡាករនេះរកបាន 32 គ្រាប់នៅក្នុងការប្រកួតនានា ក្នុងនោះមាន 26 គ្រាប់នៅ English Premier League និង 5 គ្រាប់នៅ Champions League។

យោងតាមអ្នកស្រី Pimenta តម្លៃខ្លួនរបស់កីឡាករនឹងបន្តកើនឡើងនាពេលអនាគត។ ដូច្នេះ អ្នកជំនួញជនជាតិប្រេស៊ីលរូបនេះជឿថា Haaland អាចបំបែកឯតទគ្គកម្មតម្លៃទិញដូរកីឡាករ បើសិនចាកចេញពី Man City។ បច្ចុប្បន្ន កំណត់ត្រាស្តីពីតម្លៃទិញដូរកីឡាករបាល់ទាត់លើពិភពលោក នៅតែជារបស់ Neymar ដោយ PSG បានចំណាយ 263 លានដុល្លារអាម៉េរិក ក្នុងការទិញកីឡាករនេះពី Barca កាលពីរដូវក្ដៅឆ្នាំ 2017៕

February 21, 2023

រញ្ជួយដីនៅភាគខាងត្បូងប្រទេសតួកគី សម្លាប់មនុស្សយ៉ាងតិច 3 នាក់

គ្រោះរញ្ជួយដីកម្លាំង 6.4 រិចទ័រ ដែលកើតឡើងនៅក្បែរទីក្រុង Antakya ភាគខាងត្បូងប្រទេសតួកគី បណ្ដាលឱ្យមានមនុស្សស្លាប់យ៉ាងតិច 3 នាក់ និងជាង 200 នាក់រងរបួស។

រញ្ជួយដីនេះកើតឡើងនៅក្នុងទីរួមស្រុក Defne នៃខេត្ត Hatay ភាគខាងត្បូងប្រទេសតួកគី ជិតព្រំដែនជាមួយស៊ីរី នៅវេលាម៉ោង 20 និង 04 នាទី ថ្ងៃទី 20 កុម្ភៈ (រំលងអធ្រាត្រថ្ងៃទី 21 កុម្ភៈនៅកម្ពុជា) ដែលមានចំណុចកណ្ដាលស្ថិតក្នុងជម្រៅ 10 គីឡូម៉ែត្រ។ មជ្ឈមណ្ឌលរញ្ជួយដីមេឌីទែរ៉ាណេ (EMSC) នៅអឺរ៉ុប បានបញ្ជាក់ថា រញ្ជួយដីនេះមានកម្លាំង 6.4 រិចទ័រ ខណៈស្ថាប័នសង្កេតភូមិសាស្ត្រអាម៉េរិក (USGS) ឱ្យដឹងថា វាមានកម្លាំង 6.3 រិចទ័រ។

រញ្ជួយដីខាងលើស្ថិតនៅក្នុងតំបន់ដែលមានចម្ងាយប្រហែលពី 160 ទៅ 300 គីឡូម៉ែត្រ ធៀបនឹងតំបន់ដែលបានកើតមានគ្រោះរញ្ជួយដីពីរលើក កម្លាំង 7.7 និង 7.8 រិចទ័រ នៅតួកគី និងស៊ីរី កាលពីដើមខែ។

រដ្ឋមន្ត្រីក្រសួងមហាផ្ទៃតួកគី ឱ្យដឹងថា យ៉ាងហោចណាស់មានមនុស្ស 3 នាក់បានស្លាប់ និង 213 នាក់រងរបួស ត្រូវបានបញ្ជូនទៅកាន់មន្ទីរពេទ្យ។ ប្រភពខ្លះបាននិយាយថា អគារមួយចំនួនបានបាក់រលំទាំងស្រុង។

គ្រោះរញ្ជួយដីនេះបានកើតឡើងប្រហែលពីរសប្ដាហ៍បន្ទាប់ពីភាគខាងត្បូងប្រទេសតួកគី និងភាគខាងជើងប្រទេសស៊ីរី រងគ្រោះធ្ងន់ធ្ងរដោយសារគ្រោះរញ្ជួយដីដែលបានសម្លាប់មនុស្សជាង 47,000 នាក់ និងកម្ទេចផ្ទះរាប់សែនខ្នង៕

February 21, 2023

ជប៉ុនសន្យាផ្ដល់ជំនួយបន្ថែម 5.5 ពាន់លានដុល្លារដល់អ៊ុយក្រែន

នាយករដ្ឋមន្ត្រី Kishida បានអះអាងថា ជប៉ុន្តែ នឹងជួយអ៊ុយក្រែនក្នុងការទប់ទល់នឹងយុទ្ធនាការយោធារបស់រុស្ស៊ី ទន្ទឹមនឹងនេះ លោកក៏បានសន្យាផ្ដល់ជំនួយហិរញ្ញវត្ថុ 5.5 ពាន់លានដុល្លារអាម៉េរិកទៅឱ្យទីក្រុងកៀវទៀតផង។

«យើងបានសម្រេចចិត្តផ្ដល់កញ្ចប់ជំនួយហិរញ្ញវត្ថុបន្ថែមដែលមានតម្លៃ 5.5 ពាន់លានដុល្លារអាម៉េរិក» នាយករដ្ឋមន្ត្រីជប៉ុន Fumio Kishida ថ្លែងកាលពីថ្ងៃទី 20 កុម្ភៈដូច្នេះ។ «ត្រូវតែជួយដល់មនុស្សដែលត្រូវសង្គ្រាមដកហូតលទ្ធភាពនៃការចិញ្ចឹមជីវិត និងស្ដារហេដ្ឋារចនាសម្ព័ន្ធដែលត្រូវបានបំផ្លិចបំផ្លាញ»។

ការិយាល័យនាយករដ្ឋមន្ត្រីជប៉ុនបានឱ្យដឹងថា ប្រទេសនេះបានផ្ដល់ជំនួយហិរញ្ញវត្ថុ 600 លានដុល្លារអាម៉េរិកទៅឱ្យអ៊ុយក្រែន ក៏ដូចជាផ្ដល់ជំនួយមនុស្សធម៌បន្ទាន់តម្លៃរាប់រយលានដុល្លារផងដែរ។ ជប៉ុនក៏បាន និងកំពុងដាក់ទណ្ឌកម្មមួយចំនួនលើប្រទេសរុស្ស៊ី បន្ទាប់ពីសង្គ្រាមនៅអ៊ុយក្រែនបានផ្ទុះឡើង។

ទំនាក់ទំនងរវាងជប៉ុន និងរុស្ស៊ី ក្នុងឆ្នាំកន្លងប្រែជាអាក្រក់ឡើង។ ប្រទេសទាំងពីរមិនទាន់ចុះកិច្ចព្រមព្រៀងសន្តិភាពនៅឡើយ បន្ទាប់ពីសង្គ្រាមលោកលើកទីពីរ ដោយសារតែការខ្វែងគំនិតគ្នាទាក់ទិននឹងប្រជុំកោះ Kuril ជាតំបន់ដែលទីក្រុងតូក្យូហៅថា ដែនដីខាងជើង បច្ចុប្បន្នត្រូវបានគ្រប់គ្រងដោយរុស្ស៊ី។ កិច្ចចរចារវាងប្រទេសទាំងពីរបានជាប់គាំងតាំងពីខែមីនា 2022៕

February 21, 2023

Author: សឿន សំណាង