សឿន សំណាង - La Reine Media

អ្នកអវកាសរុស្ស៊ីជិតបានជិះយាន SpaceX ឡើងទៅកាន់ទីអវកាស

ណាសាមានផែនការប្រើប្រាស់យានអវកាសរបស់ SpaceX ដើម្បីនាំអវកាសចររុស្ស៊ីយ៉ាងតិចពីរនាក់ទៀត ឡើងទៅកាន់ស្ថានីយអវកាសអន្តរជាតិ (ISS)។

ណាសាកំពុងចរចាដើម្បីបន្ថែមអវកាសចររុស្ស៊ីទៅក្នុង Crew-7 និង Crew-8 ដែលជាបេសកកម្មបន្ទាប់នៃគម្រោងនាំអ្នកអវកាសឡើងទៅកាន់ ISS។ នេះបើតាមទំព័រ Space ចុះផ្សាយកាលពីថ្ងៃទី 07 មីនា។

កិច្ចព្រមព្រៀងក្នុងការបញ្ចូលអ្នកអវកាសរុស្ស៊ីទៅក្នុងបេសកកម្ម Crew-7 ដែលគ្រោងនឹងបាញ់បង្ហោះនៅរដូវស្លឹកឈើជ្រុះឆ្នាំនេះ កំពុងត្រូវបានចរចាជាមួយរដ្ឋាភិបាលរុស្ស៊ី ហើយបន្ទាប់មកនឹងវិលមកចរចាជាមួយណាសាដើម្បីសម្រេចកិច្ចព្រមព្រៀងចុងក្រោយ។ Kathy Lueders អនុប្រធានផ្នែកគ្រប់គ្រងបេសកកម្មអវកាសប្រចាំណាសា ឱ្យដឹងដូច្នេះនៅក្នុងកិច្ចប្រជុំមួយដែលធ្វើឡើងបន្ទាប់ពីបេសកកម្ម Crew-6 ត្រូវបានបាញ់បង្ហោះដោយជោគជ័យកាលពីថ្ងៃទី 02 មីនា 2023។

Lueders បន្ថែមថា អាម៉េរិក និងរុស្ស៊ី កំពុងបន្តបញ្ជូនអវកាសចរទៅកាន់អវកាសតាមរយៈយានរបស់ប្រទេសនីមួយៗ ក្នុងករណីយាន Soyuz របស់រុស្ស៊ី ឬយានរបស់អាម៉េរិកមិនអាចប្រើប្រាស់ក្នុងរយៈពេលយូរ។ ការចរចាស្ដីពី Crew-8 ក៏កំពុងត្រូវបានធ្វើឡើង ប៉ុន្តែបេសកកម្មនេះ តាមផែនការ នឹងមិនត្រូវបានបាញ់បង្ហោះមុនឆ្នាំ 2024 ឡើយ។

ណាសាធ្លាប់ពឹងផ្អែកទាំងស្រុងលើរុស្ស៊ីក្នុងការនាំអ្នកអវកាសឡើងទៅកាន់គន្លងគោចរផែនដី។ ស្ថាប័ននេះបានដាក់យានអវកាស Shuttle ឱ្យចូលនិវត្តន៍កាលពីឆ្នាំ 2011។ ក្នុងអំឡុងប្រហែលមួយទសវត្សរ៍មកនេះ អវកាសចរដែលឡើងទៅកាន់ ISS សុទ្ធតែប្រើប្រាស់យាន Soyuz ហើយណាសាត្រូវចេញថ្លៃនៅពេលប្រើប្រាស់យានរបស់រុស្ស៊ី។

បច្ចុប្បន្ន ណាសាកំពុងត្រៀមយានអវកាសចំនួនពីរដើម្បីជំនួសឱ្យយាន Shuttle នោះគឺយានអវកាស Crew Dragon របស់ SpaceX និង Starliner របស់ Boeing៕

March 9, 2023

ស្រីស្អាតវ៉េណេស៊ុយអែឡា ដែលបានចោទកីឡាករព័រទុយហ្កាល់ថា «បបួលឡើងគ្រែ»

កំពូលតារាបាល់ទាត់ជនជាតិព័រទុយហ្កាល់ CR7 ធ្លាប់បានសម្ដែងការខឹងយ៉ាងខ្លាំង និងបានច្រានចោលការចោទប្រកាន់ដែលថា មានទំនាក់ទំនងផ្លូវភេទជាមួយតារាម៉ូដែលជនជាតិវ៉េណេស៊ុយអេឡា ឈ្មោះ Georgilaya។

Georgilaya គឺជាអ្នកសរសេរប្លក់ និងជាអ្នកបង្ហាញម៉ូដសម្លៀកបំពាក់ដ៏ល្បីឈ្មោះរបស់វ៉េណេស៊ុយអេឡា។ កាលពីសប្ដាហ៍កន្លង ស្រីស្អាតរូបនេះបានចោទប្រកាន់ Ronaldo ថា បានហៅនាងចូលទៅសណ្ឋាគារដើម្បីរួមភេទកាលពីថ្ងៃទី 25 មីនា 2022 ដែលពេលនោះ Ronaldo និងក្រុមជម្រើសជាតិព័រទុយហ្កាល់កំពុងត្រៀមខ្លួនសម្រាប់ World Cup 2022។

នៅលើ Instagram នាង Georgilaya សរសេរថា «ពេលទទួលបានសាររបស់ Ronaldo ខ្ញុំក៏គិតថា នឹងទៅទីនោះគ្រាន់តែដើម្បីជជែកគ្នាលេង ហើយអាចថតរូបអនុស្សាវរីយ៍ជាមួយគ្នា។ ខ្ញុំមិនគិតថា ស្ថានភាពនោះនឹងមានទំនាក់ទំនងផ្លូវភេទ ប៉ុន្តែ វាបានកើតឡើងពិតមែន។ ខ្ញុំចង់បានដូច្នោះ ប៉ុន្តែបើទោះយ៉ាងនេះក៏ដោយ ខ្ញុំនៅតែមានអារម្មណ៍ថា ត្រូវគេប្រើឧបាយកល ព្រោះតែកេរ្តិ៍ឈ្មោះ និងអំណាចរបស់ Ronaldo»។

ក៏ប៉ុន្តែ ភាគីខាង Ronaldo បានបដិសេធ។ តំណាងរបស់ CR7 បាននិយាយថា «រឿងនេះខុសពីការពិតទាំងស្រុង និងមានចរិតបរិហាកេរ្តិ៍របស់គាត់»។

Georgilaya អះអាងថា រឿងនេះជាការពិត នៅពេលនាងបង្ហើបឱ្យដឹងពីខ្លឹមសារក្នុងសារដែល Ronaldo បបួលនាងទៅកាន់បន្ទប់លេខ 312 របស់សណ្ឋាគារ Solverde ក្នុងតំបន់ Vila Nova de Gaia ភាគខាងជើងនៃប្រទេសព័រទុយហ្កាល់។

ក្រោយពីបានឡើងគ្រែជាមួយអតីតកីឡាកររបស់ Real Madrid ស្រីស្អាតវ៉េណេស៊ុយអេឡា ក៏បានសម្រេចចិត្តលែងលះជាមួយស្វាមី ព្រោះគិតថា ខ្លួនជាស្រីមិនល្អ ហ៊ានក្បត់ចិត្តប្ដី៕

March 7, 2023

បាត់បង់ប្រាក់អស់រាប់ម៉ឺនដុល្លារ ព្រោះតែ AI ក្លែងបន្លំជាសំឡេងរបស់សាច់ញាតិ

ឪពុកម្ដាយរបស់ Benjamin Perkin (កាណាដា) បានទទួលទូរស័ព្ទពីកូនប្រុស ដែលតាមពិត នោះគឺជាសំឡេងបង្កើតឡើងដោយបច្ចេកវិទ្យាបញ្ញាសិប្បនិម្មិត (AI) និងនិយាយថា ខ្លួនកំពុងជាប់ឃុំ ហើយត្រូវការប្រាក់ 15,000 ដុល្លារជាបន្ទាន់។

រឿងអាក្រក់បានកើតឡើងនៅក្នុងគ្រួសាររបស់ Perkin អាយុ 36 ឆ្នាំ ក្រោយពីមានមនុស្សម្នាក់អះអាងថាជាមេធាវី ហៅទូរស័ព្ទទៅកាន់ឪពុកម្ដាយរបស់គាត់ ប្រាប់ថា Perkin បានបង្កគ្រោះថ្នាក់ចរាចរណ៍ បណ្ដាលឱ្យអ្នកការទូតម្នាក់បាត់បង់ជីវិត។ ជននេះប្រាប់ថា Perkin កំពុងស្ថិតនៅក្នុងមន្ទីរឃុំខាំង និងត្រូវការប្រាក់សម្រាប់ផ្លូវច្បាប់។

ដើម្បីធ្វើឱ្យទុកចិត្ត ជននេះក៏យកទូរស័ព្ទឱ្យ Perkin តែតាមពិតគឺគ្រាន់តែភ្ជាប់ជាមួយនឹងឧបករណ៍ AI ដែលមានសមត្ថភាពក្លែងបន្លំសំឡេង។ «Perkin AI» និយាយថា ត្រូវការប្រាក់ចាំបាច់។ «សំឡេងនិយាយស្និទ្ធស្នាលធ្វើឱ្យឪពុកម្ដាយខ្ញុំជឿថា នោះគឺជាសំឡេងរបស់ខ្ញុំ» Perkin រៀបរាប់ប្រាប់ Washington Post ដូច្នេះ។

ប៉ុន្មាននាទីក្រោយមក «មេធាវី» ក៏បានតឿនឱ្យឪពុកម្ដាយគាត់ផ្ទេរប្រាក់ ដូច្នេះពួកគាត់ក៏បានទៅកាន់ធនាគារដកប្រាក់ និងផ្ញើ 15,449 ដុល្លារតាមរយៈប្រព័ន្ធប្ដូរប្រាក់ទៅជា Bitcoin។ ឪពុកម្ដាយរបស់ Perkin និយាយថា ពួកគាត់សង្ស័យ ប៉ុន្តែនៅតែធ្វើតាម ព្រោះគិតថា បាននិយាយជាមួយកូនប្រុស។ ព្រលប់នោះ ពេល Perkin ហៅទូរស័ព្ទមក ទើបពួកគេដឹងការពិត។

Perkin សង្ស័យថា វីដេអូទាំងឡាយដែលខ្លួនបានបង្ហោះលើ YouTube ត្រូវបានជនទុច្ចរិតយកទៅបង្រៀនដល់ម៉ាស៊ីន AI របស់ពួកគេ។

នេះមិនមែនជាករណីតែមួយឡើយ។ នៅព្រឹកថ្ងៃមួយនោះ ស្ត្រីវ័យ 73 ឆ្នាំមួយរូប ឈ្មោះ Ruth Card រស់នៅក្នុងតំបន់ Regina ប្រទេសកាណាដា ក៏ជួបបញ្ហាស្រដៀងនឹងករណីខាងលើ។ ប៉ុន្តែ សំណាងល្អ មុនពេលផ្ញើប្រាក់ គាត់ត្រូវបានប្រធានមួយរូបរបស់ធនាគារអញ្ជើញឱ្យចូលការិយាល័យ និងបានប្រាប់ថា អាចជារឿងបោកប្រាស់។ ពេលពួកគេទូរស័ព្ទទៅកាន់ចៅប្រុស ទើបដឹងថា វាដូចទៅនឹងការរៀបរាប់របស់បុគ្គលិកធនាគារនេះពិតមែន។

ការរីកចម្រើនរបស់បច្ចេកវិទ្យាបញ្ញាសិប្បនិម្មិតនាពេលកន្លង បានជួយដល់ការអភិវឌ្ឍវិស័យនានា ប៉ុន្តែវាក៏ជាឧបករណ៍ដែលក្រុមជនទុច្ចរិតប្រើសម្រាប់រកលុយពីជនរងគ្រោះផងដែរ៕

March 7, 2023

នាវាមុជទឹកអគ្គិសនីដែលអាចធ្វើដំណើរបានជិតមួយពាន់គីឡូម៉ែត្រ

(អេមីរ៉ាតអារ៉ាប់រួម) – នាវាមុជទឹកខ្នាតតូចដែលមានរូបរាងដូចទៅនឹងយន្តហោះអវកាស ឬយានអវកាសក្នុងភាពយន្ត មានល្បឿនលឿនជាងឆ្ងាយធៀបនឹងនាវាផ្លាស់ទីក្រោមទឹកនាបច្ចុប្បន្ន។

នាវាមុជទឹកគំរូ ឈ្មោះ Kronos ធ្លាប់ត្រូវបានដាក់បង្ហាញនៅកំពង់នាវាទេសចរណ៍ក្នុងមជ្ឈមណ្ឌលជាតិពិព័រណ៍ Abu Dhabi របស់អេមីរ៉ាតអារ៉ាប់រួម (UAE) នេះបើតាម Popular Science ចុះផ្សាយកាលពីថ្ងៃទី 06 មីនា។ ដោយមានស្លាបនៅក្រោមផ្ទៃទឹក និងកាប៊ីនសម្រាប់អ្នកបើកបរមានរាងដូចដំបូលមូល Kronos ស្រដៀងទៅនឹងយានហោះអវកាស។

Kronos ត្រូវបានផលិតដោយក្រុមហ៊ុន Desert Power Design និង Highland System នៅ UAE។ នាវាមុជទឹកនេះសមស្របសម្រាប់ប្រើប្រាស់ក្នុងគោលដៅសម្ងាត់ផ្នែកយោធា សង្គ្រោះ និងបច្ចេកទេសក្រោមទឹក។ យោងតាមក្រុមហ៊ុន នាវាមុជទឹកគំរូនេះមានបណ្ដោយ 9.1 ម៉ែត្រ និងទទឹង 7.4 ម៉ែត្រ អាចបំពាក់មីស៊ីលក្រោមទឹក Black Scorpion ផលិតដោយអ៊ីតាលី ចំនួន 6 គ្រាប់។ Kronos ត្រូវការអ្នកបើកបរម្នាក់ និងអាចដឹកមនុស្សបាន 10 នាក់។

ដោយមានល្បឿន 48 គីឡូម៉ែត្រ/ម៉ោងពេលបរក្រោមទឹក និង 80 គីឡូម៉ែត្រ/ម៉ោងពេលបរលើទឹក Kronos អាចប្រៀបផ្ទឹមបានទៅនឹងនាវាមុជទឹកនុយក្លេអែរសម្រាប់ប្រើប្រាស់ក្នុងការវាយប្រហារ និងលឿនជាងឆ្ងាយបើធៀបនឹងនាវាដឹកជញ្ជូនក្រោមទឹកសម្រាប់កងកម្លាំងពិសេសនាបច្ចុប្បន្ន។

Kronos ដំណើរការដោយម៉ូទ័រអគ្គិសនីដែលអាចបរបាន 18 ម៉ោង។ នាវានេះក៏មានបំពាក់ម៉ាស៊ីនម៉ាស៊ូត ដូច្នេះអាចដំណើរការដោយប្រភពអគ្គិសនីពីម៉ាស៊ូត និងអគ្គិសនីពីថ្មក្នុងរយៈពេលជាង 50 ម៉ោង៕

March 7, 2023

CR7 បន្តទទួលបានកិត្តិនាមដ៏គួរឱ្យមានមោទកភាពនៅអាស៊ីខាងលិច

Cristiano Ronaldo កំពុងរកបានសេចក្ដីសុខនៅឯក្លឹប Al Nassr របស់អារ៉ាប៊ីសាអូឌីត នៅពេលបន្តដណ្ដើមបានតំណែងប្រកបដោយកិត្តិយសគួរឱ្យចាប់អារម្មណ៍។

កាលពីថ្ងៃទី 06 មីនា សហព័ន្ធកីឡាបាលទាត់អាស៊ី (AFC) បានប្រកាសជាផ្លូវការថា កីឡាកខ្សែប្រយុទ្ធ Cristiano Ronaldo របស់ក្លឹប Al Nassr ដណ្ដើមបានពានរង្វាន់កីឡាករឆ្នើមបំផុតនៅអាស៊ីខាងលិចប្រចាំខែកុម្ភៈ ដែលបោះឆ្នោតជ្រើសរើសដោយអ្នកគាំទ្រ។ កំពូលតារាបាល់ទាត់ជនជាតិព័រទុយហ្កាល់នេះទទួលបានសន្លឹកឆ្នោតគាំទ្រចំនួន 73,957 សំឡេង ស្មើនឹង 48%។

ឈរលំដាប់ទីពីរសម្រាប់ពានរង្វាន់ខាងលើ គឺ Aso Rostam របស់ក្លឹប Al Shorta (អ៊ីរ៉ាក់) ដោយទទួលបានសំឡេងគាំទ្រ 45%។ ចំណែក Odion Ighalo អតីតកីឡាកររបស់ Manchester United ដែលបច្ចុប្បន្នកំពុងប្រកួតឱ្យ Al Hilal នៅ Saudi Pro League ដូច Ronaldo ដែរនោះ ជាប់ចំណាត់ថ្នាក់លេខបី ដោយមានសំឡេងគាំទ្រ 4%។

រីឯកីឡាករមួយរូបផ្សេងទៀតដែលប្រកួតនៅពានរង្វាន់ជើងឯកអារ៉ាប៊ីសាអូឌីត គឺខ្សែប្រយុទ្ធ Omar Al Somah (ក្លឹប Al Arabi) ទទួលបាន 3% ក្នុងចំណោមសំឡេងគាំទ្រសរុប និងត្រូវជាប់លេខបួន។ យោងតាមស្ថិតិ ការបោះឆ្នោតជ្រើសរើសកីឡាករឆ្នើមនៅអាស៊ីខាងលិចប្រចាំខែកុម្ភៈ មានអ្នកគាំទ្រប្រមាណ 157,000 នាក់ចូលរួមបោះឆ្នោត។

AFC ឱ្យដឹងថា ពានរង្វាន់នេះត្រូវបានរៀបចំឡើងដើម្បីឱ្យអ្នកគាំទ្រជ្រើសរើសកីឡាករដែលលេងបានល្អបំផុតនៅតំបន់អាស៊ីខាងលិច ដោយយោងទៅលើលក្ខខណ្ឌមួយចំនួនមានដូចជា ចំនួនគ្រាប់បាល់ដែលរកបាន ឬបង្កឱកាសស៊ុតបញ្ចូលទីបានសម្រេច ចំណាត់ថ្នាក់របស់ក្លឹបនៅក្នុងស្រុក និងស្ថានភាពនៃការទាត់ឱ្យក្រុមជម្រើសជាតិជាដើម។

Ronaldo បានមកទាត់ឱ្យ Al Nassr ចាប់ពីចុងឆ្នាំ 2022 ក្រោយពីត្រូវ Man Utd បញ្ចប់កិច្ចសន្យាមុនកាលកំណត់។ នៅទីនេះ ម្ចាស់ពានរង្វាន់បាល់មាសចំនួន 5 រូបនេះ ទទួលបានប្រាក់បៀវត្សរ៍ឡើងដល់ 200 លានដុល្លារអាម៉េរិក/ឆ្នាំ៕

March 7, 2023

ខ្សែភាពយន្ត «Creed 3» រកចំណូលបាន 100 លានដុល្លារក្នុងសប្ដាហ៍ដំបូង

វគ្គទីបីរបស់ «Creed» ដែលតួអង្គសំខាន់សម្ដែង និងដឹកនាំរឿងដោយ «បុរសទាក់ទាញបំផុតប្រចាំឆ្នាំ 2020» Michael B. Jordan កំពុងនាំមុខគេនៅបញ្ជរលក់សំបុត្រក្នុងសប្ដាហ៍ដំបូងនៃការចាក់បញ្ចាំងឯរោងកុន។

កំពូលខ្សែភាពយន្តខាងលើរកចំណូលបាន 58.7 លានដុល្លារនៅអាម៉េរិកខាងជើង ខ្ពស់ជាង Ant-Man and the Wasp: Quantumania និងក្លាយជាភាពយន្តមានទស្សនិកជនច្រើនជាងគេនៅក្នុងរោងកុនកាលពីសប្ដាហ៍កន្លង។ «Creed 3» ក៏រកបាន 41.8 លានដុល្លារនៅលើទីផ្សារអន្តរជាតិ ជួយឱ្យប្រាក់ចំណូលសរុបទូទាំងសកលលោករបស់ភាពយន្តនេះ កើនឡើងដល់ 100.4 លានដុល្លារ។

តួលេខខាងលើខ្ពស់ជាងឆ្ងាយ បើធៀបនឹងការរំពឹងទុកពីក្រុមអ្នកជំនាញ។ ពីរវគ្គដំបូងរបស់ «Creed» រកចំណូលបាន 29.6 លានដុល្លារក្នុងឆ្នាំ 2015 និង 35.5 លានដុល្លារក្នុងឆ្នាំ 2018។ តម្លៃសំបុត្រកើនឡើងខ្ពស់នៅឯបន្ទប់បញ្ចាំងភាពយន្ត Imax ក៏ជាមូលហេតុជួយឱ្យវគ្គបីរបស់ខ្សែភាពយន្តនេះរកប្រាក់បានច្រើន។

ឈុតខ្លីៗ សំខាន់ៗរបស់ Creed 3

វគ្គបីនិយាយអំពីជីវភាពរបស់អ្នកប្រដាល់ល្បីឈ្មោះ Adonis Creed។ ពេលនេះគាត់បានក្លាយជាតារា និងទទួលបានការគាំទ្រច្រើន។ ចៃដន្យ ថ្ងៃមួយតួអង្គឯកបានជួបមិត្តចាស់ Anderson Dame (សម្ដែងដោយ Jonathan Majors) ដែលទើបតែចេញពីពន្ធនាគារ។ Adonis រកវិធីដើម្បីជួយស្ដារជីវភាពរបស់ Anderson ឡើងវិញ។ ប៉ុន្តែ អ្វីដែល Anderson ចង់បាន គឺជីវភាពពេញដោយភាពជោគជ័យរបស់ Adonis ជារឿងដែល Anderson គិតថា ដើមឡើយវាយជារបស់ខ្លួន បើសិនមិនប្រថុយជួយដល់ Adonis កាលពីប៉ុន្មានឆ្នាំមុន។

Creed គឺជាវគ្គចុងក្រោយរបស់យីហោ Rocky របស់ Sylvester Stallone។ តួអង្គសំខាន់ក្នុងខ្សែភាពយន្តនេះគឺជាកំពូលអ្នកប្រដាល់ Adonis Creed កូនប្រុសរបស់ម្ចាស់ជើងឯក Apollo Creed។ វគ្គមួយរបស់ខ្សែភាពយន្តដែលចាប់បញ្ចាំងកាលពីឆ្នាំ 2015 បានទទួលជោគជ័យ និងទទួលបានបេក្ខភាព Oscar។ Michael B. Jordan មានឈ្មោះល្បីបន្ទាប់ពីសម្ដែងជាតួអង្គឯកក្នុងរឿង Creed។ ខ្សែភាពយន្តនេះក៏ជួយឱ្យ Jordan ទទួលបានការចាប់អារម្មណ៍ពី Marvel និងត្រូវបានអញ្ជើញឱ្យចូលរួមសម្ដែងក្នុងរឿង Black Panther៕

March 7, 2023

កម្ពុជាលក់លេខយានយន្តពិសេសបានជាង 50 លានដុល្លារក្នុងបីឆ្នាំកន្លង

ឯកឧត្តមទេសរដ្ឋមន្ត្រី ស៊ុន ចាន់ថុល នាថ្ងៃទី 07 មីនា 2023 នេះ បានថ្លែងថា កម្ពុជាលក់លេខយានយន្តពិសេសបានប្រមាណ 52 លានដុល្លារអាម៉េរិក ក្រោយពីដាក់លក់បានបីឆ្នាំ។

ក្រសួងសាធារណការ និងដឹកជញ្ជូន នាថ្ងៃទី 07 មីនា 2023 បានសម្ពោធបើកកម្មវិធី «អបអរសាទរខួបបីឆ្នាំ លេខពិសេសផ្ទាល់ខ្លួន» អមជាមួយនឹង ការតាំងពិព័រណ៍ផ្លាកលេខ និងរថយន្ត, ការដាក់តាំងលក់ និងដេញថ្លៃលេខពិសេសនៅសួនវត្តបទុម ក្រោមអធិបតីរបស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

នៅក្នុងព្រឹត្តិការណ៍ខាងលើ ឯកឧត្តមទេសរដ្ឋមន្ត្រីបានមានប្រសាសន៍ថា ថវិកាដែលបានពីការលក់លេខពិសេសផ្ទាល់ខ្លួននេះ មួយផ្នែកនឹងត្រូវបានយកទៅជួនមូលនិធិគន្ធបុប្ផា និងមន្ទីរពេទ្យកុមារជាតិ។

ទាក់ទងទៅនឹងការវិវត្តនៃការលក់លេខពិសេស ឯកឧត្តមទេសរដ្ឋមន្ត្រី បានឱ្យដឹងថា ក្នុងរយៈពេលបីឆ្នាំមកនេះ ក្រសួងលក់លេខពិសេសផ្ទាល់ខ្លួនបាន 16,000 លេខ រកចំណូលបានប្រមាណ 28 លានដុល្លារអាម៉េរិក ខណៈលេខពិសេសខេត្តក្រុងលក់បាន 101,000 លេខ រកចំណូលបានជាង 24 លានដុល្លារ។ ដូច្នេះ ក្នុងបីឆ្នាំកន្លង កម្ពុជាលក់លេខពិសេសបានប្រមាណជាង 52 លានដុល្លារអាម៉េរិក។

នៅក្នុងឆ្នាំ 2022 កម្ពុជាលក់លេខពិសេសបាន 25 លានដុល្លារ កើន 22% បើធៀបនឹងឆ្នាំ 2021។ ក្រសួងសាធារណការ និងដឹកជញ្ជូនរំពឹងថា ការលក់លេខពិសេសក្នុងឆ្នាំនេះនឹងកើត 5% ធៀបនឹងឆ្លាំកន្លង៕

March 7, 2023

ប្អូនស្រីរបស់លោក Kim Jong-un ថា «ការបាញ់ទម្លាក់មីស៊ីលកូរ៉េខាងជើងគឺជាការប្រកាសសង្គ្រាម»

ប្អូនស្រីបង្កើតរបស់មេដឹកនាំកូរ៉េខាងជើង យល់ថា រាល់សកម្មភាពរបស់សហរដ្ឋអាម៉េរិកដើម្បីបាញ់ទម្លាក់មីស៊ីលរបស់កូរ៉េខាងជើងដែលបាញ់សាកល្បង នឹងត្រូវបានចាត់ទុកថាជាការប្រកាសសង្គ្រាម។

«ការសាកល្បងអាវុធយុទ្ធសាស្ត្ររបស់កូរ៉េខាងជើង សុទ្ធតែធ្វើឡើងនៅលើដែនអាកាស និងដែនសមុទ្រដែលស្ថិតនៅខាងក្រៅសិទ្ធិអារកាត់របស់សហរដ្ឋអាម៉េរិក និងមិនគំរាមកំហែងដល់សុវត្ថិភាពរបស់បណ្ដាប្រទេសជិតខាង។ រាល់សកម្មភាពប្រតិកម្មយោធា មានដូចជាការបាញ់ស្កាត់មីស៊ីលជាដើម នឹងត្រូវបានចាត់ទុកជាការប្រកាសសង្គ្រាមយ៉ាងច្បាស់សំដៅលើកូរ៉េខាងជើង» លោកស្រី Kim Yo-Jong ប្អូនស្រីបង្កើតរបស់មេដឹកនាំ Kim Jong-un ប្រកាសនាថ្ងៃនេះដូច្នេះ។

ការព្រមាននេះត្រូវបានលោកស្រី Kim Yo-jong លើកឡើង បន្ទាប់ពីសារព័ត៌មានកូរ៉េខាងត្បូងកាលពីថ្ងៃទី 06 មីនា បានដកស្រង់សម្ដីរបស់ John Aquilino មេបញ្ជាការកងទ័ពអាម៉េរិកប្រចាំតំបន់ឥណ្ឌូ-ប៉ាស៊ីហ្វ៊ិក និយាយថា វ៉ាស៊ីងតោននឹងបាញ់ស្កាត់ភ្លាមៗទៅលើមីស៊ីលផ្លោងអន្តរទ្វីប (ICBM) ដែលទីក្រុងព្យុងយ៉ាងបាញ់ទៅកាន់មហាសមុទ្រប៉ាស៊ីហ្វ៊ិក។

លោកស្រី Kim Yo-jong និងមេដឹកនាំកូរ៉េខាងជើង លោក Kim Jong-un

ភាគីខាងសហរដ្ឋអាម៉េរិក មិនទាន់មានប្រតិកម្មអ្វីនៅឡើយ ទាក់ទិននឹងការព្រមានខាងលើរបស់លោកស្រី Kim Yo-jong។

កន្លងមក សហរដ្ឋអាម៉េរិក និងបណ្ដាប្រទេសលោកខាងលិចមិនធ្លាប់បានបាញ់ទម្លាក់ ឬរកវិធីទប់ស្កាត់ករណីសាកល្បងមីស៊ីលអន្តរទ្វីបរបស់ទីក្រុងព្យុងយ៉ាង ដែលត្រូវបានហាមឃាត់ទៅតាមសេចក្ដីសម្រេចរបស់ក្រុមប្រឹក្សាសន្តិសុខនៃអង្គការសហប្រជាតិ។ កូរ៉េខាងជើងតែងបាញ់សាកល្បងមីស៊ីលទៅតាមជ្រុងខ្ពស់ដើម្បីកាត់បន្ថយរយៈចម្ងាយរបស់ក្បាលគ្រាប់ និងទើបតែបាញ់ ICBM រំលងទឹកដីជប៉ុនបានប៉ុន្មានដងប៉ុណ្ណោះ៕

March 7, 2023

Piers Morgan ថា «Man United ទទួលផលកម្មព្រោះតែធ្វើអាក្រក់ដាក់ Ronaldo»

Piers Morgan ដែលជាអ្នកធ្វើបទសម្ភាសជាមួយ Cristiano Ronaldo នាំឱ្យ CR7 ត្រូវក្លឹបបញ្ចប់កិច្ចសន្យានាពេលកន្លង បង្ហាញពីការសប្បាយចិត្តនៅពេល Manchester United ចាញ់ Liverpool 0-7 នៅលិគកំពូលអង់គ្លេស (English Premier League)។

«Ten Hag លាលែងពីតំណែងហើយនៅ? ធ្វើយ៉ាងណាទើបគ្រូបង្វឹករបស់ Man Utd អាចរក្សាបានតំណែង បន្ទាប់ពីការប្រកួតទទួលបានលទ្ធផលអាក្រក់បែបនេះ» Morgan សរសេរលើបណ្ដាញសង្គម Twitter ដូច្នេះ អមជាមួយរូបថត Erik ten Hag ឆ្លើយនឹងសំណួរក្នុងកិច្ចសម្ភាស ក្រោយពីការប្រកួតរវាង Manchester United និង Liverpool នៅ Anfield។

Morgan ធ្លាប់បានលើកជាសំណួរដើម្បីឱ្យ Ronaldo បង្ហើបអាថ៌កំបាំងផ្ទៃក្នុងរបស់ Man Utd ក៏ដូចជាចោទប្រកាន់ក្លឹបនេះថាក្បត់រូបគាត់ កាលពីដើមខែវិច្ឆិកា 2022។ កិច្ចសម្ភាសនោះបាននាំឱ្យ Man Utd សម្រេចចិត្តបញ្ចប់កិច្ចសន្យាមុនកាលកំណត់ជាមួយ CR7 ធ្វើឱ្យកំពូលកីឡាករជនជាតិព័រទុយហ្កាល់ត្រូវទៅទាត់ឱ្យក្លឹប Al Nassr នៅអារ៉ាប៊ីសាអូឌីត។

Piers Morgan, Ronaldo និងសាររបស់ Piers Morgan ចំអកឱ្យ Man Utd

ចាប់ពីពេលនោះមក ពិធីករផ្នែកកីឡា Morgan ក៏ផ្ដើមបញ្ចេញមតិកាន់ជើង Ronaldo និងរិះគន់ Man Utd ជាញឹកញាប់។ កាលពីថ្ងៃទី 06 មីនា 2023 បន្ទាប់ពីបានទស្សនាការប្រកួតដែលក្រុមរបស់គ្រូបង្វឹក Ten Hag ចាញ់ Liverpool 0-7 លោក Morgan បានបង្ហោះអត្ថបទចំនួន 4 ជាបន្តបន្ទាប់នៅលើបណ្ដាញសង្គមដើម្បីចំអកឱ្យ Man Utd។

«ពិតជារឿងដ៏គួរឱ្យចាប់អារម្មណ៍ និងអស់សំណើច ប៉ុន្តែនេះប្រាកដជាកម្មពារ ជាផលកម្ម» ពិធីករជនជាតិអង់គ្លេស Morgan សរសេរ និងបង្ហោះអមជាមួយរូបដែលលោកបានថតជាមួយ Ronaldo ពេលធ្វើបទសម្ភាសដែលនាំឱ្យ Man Utd មិនសប្បាយចិត្តនាពេលកន្លង។

បន្ទាប់មក ពិធីករវ័យ 57 ឆ្នាំខាងលើក៏បានថតអត្ថបទសម្ភាស Ten Hag នៅលើទំព័រកាសែតមួយ ហើយបង្ហោះលើបណ្ដាញសង្គម។ ក្នុងអត្ថបទសម្ភាសនេះ គ្រូបង្វឹករបស់ Man Utd និយាយថា គាត់ដេកលក់ស្រួលបន្ទាប់ពីបានលុបបំបាត់ Ronaldo ចេញពីក្រុម។ Morgan សរសេរថា «ជូនពរសំណាងល្អក្នុងដំណេកនៅយប់នេះណា៎ អ្នកមានទេពកោសល្យ»។

https://www.youtube.com/watch?v=FP9MCTFVutw

Man Utd ចាញ់ Liverpool 0-7

ការចាញ់ Liverpool 0-7 គឺជាបរាជ័យអាក្រក់បំផុតរបស់ Man Utd នៅក្នុងប្រវត្តិសាស្ត្រលិគកំពូលអង់គ្លេស។ លទ្ធផលនេះបានធ្វើឱ្យមានការសង្ស័យចំពោះសមត្ថភាពរបស់ «បីសាចក្រហម» បន្ទាប់ពីសម័យកាលត្រចះត្រចង់ ដែលមួយផ្នែកធំគឺដោយសារ Ronaldo។

Ronaldo មិនបានបញ្ចេញមតិទាក់ទងនឹងបរាជ័យរបស់ Man Utd ខាងលើនោះទេ។ CR7 ក៏ទើបតែបានរួមដៃជាមួយ Al Nassr យកឈ្នះ Al Batin 3-1 នៅពានរង្វាន់អារ៉ាប៊ីសាអូឌីត កាលពីថ្ងៃទី 04 មីនា។ ជ័យជម្នះនេះបានជួយឱ្យ Al Nassr រក្សាបានតំណែងកំពូលតារាង ដោយមានពិន្ទុច្រើនជាង Al Ittihad ចំនួនពីរពន្ទុ៕

March 7, 2023

ឥណ្ឌូណេស៊ីផ្ដល់ជំនួយសម្រាប់ការទិញយានយន្តអគ្គិសនីចាប់ពីថ្ងៃទី 20 មីនា

មន្ត្រីឥណ្ឌូណេស៊ីបានឱ្យដឹងថា រដ្ឋាភិបាលនឹងផ្ដល់ជំនួយដល់ការទិញម៉ូតូអគ្គិសនីថ្មីរហូតដល់ 200,000 គ្រឿង និងការប្ដូរម៉ូតូសាំងទៅប្រើម៉ូតូអគ្គិសនីចំនួន 50,000 គ្រឿងនៅក្នុងឆ្នាំនេះ។

លោក Luhut Pandjaitan រដ្ឋមន្ត្រីក្រសួងសម្របសម្រួលកិច្ចការសមុទ្រ និងវិនិយោគឥណ្ឌូណេស៊ី បានឱ្យដឹងថា រដ្ឋាភិបាលប្រទេសនេះនឹងចាប់ផ្ដើមអនុវត្តគោលនយោបាយផ្ដល់ប្រាក់ឧបត្ថម្ភសម្រាប់ការប្រើប្រាស់យានយន្តដែលដំណើរការដោយថាមពលអគ្គិសនី (KBLBB) ចាប់ពីថ្ងៃទី 20 មីនា 2023 ដើម្បីលើកទឹកចិត្តឱ្យប្រជាជនងាកមកប្រើប្រាស់យានយន្តដែលមិនបំភាយឧស្ម័ន និងទាក់ទាញការវិនិយោគក្នុងវិស័យយានយន្តអគ្គិសនីនៅក្នុងប្រទេស។

ថ្លែងក្នុងសន្និសីទសារព័ត៌មានកាលពីថ្ងៃទី 06 មីនា រដ្ឋមន្ត្រីខាងលើសង្កត់ធ្ងន់ថា ការប្រើប្រាស់ KBLBB នឹងជួយជំរុញការអភិវឌ្ឍប្រកបដោយចីរភាព តាមរយៈការកាត់បន្ថយឧស្ម័នផ្ទះកញ្ចក់ និងកសាងវិស័យឧស្សាហកម្មថ្មផ្ទុកអគ្គិសនីនៅក្នុងស្រុក ហើយប្រការទាំងនេះនឹងជួយបង្កើតការងារថ្មី និងបន្ថែមប្រាក់ចំណូលជូនរដ្ឋ។

ចំណែក Febrio Kacaribu ប្រធានទីភ្នាក់ងារគោលនយោបាយសារពើពន្ធនៃក្រសួងហិរញ្ញវត្ថុ ប្រកាសថា រដ្ឋាភិបាលនឹងផ្ដល់ជំនួយសម្រាប់ការទិញម៉ូតូអគ្គិសនីថ្មីចំនួន 200,000 គ្រឿង និងការប្ដូរពីម៉ូតូសាំងទៅប្រើប្រាស់ម៉ូតូអគ្គីសនីចំនួន 50,000 គ្រឿងនៅក្នុងឆ្នាំនេះ។ ការទិញ ឬប្ដូរយកម៉ូតូអគ្គិសនីថ្មីមួយគ្រឿងនឹងទទួលបានប្រាក់ឧបត្ថម្ភចំនួន 7 លានរូពៀ (457 ដុល្លារអាម៉េរិក)។

កម្មវិធីឧបត្ថម្ភសម្រាប់ការទិញម៉ូតូថ្មីនឹងត្រូវបានអនុវត្តចំពោះតែម៉ូតូផលិតក្នុងស្រុកដែលមានអត្រាមូលដ្ឋានីយកម្មចាប់ពី 40% ឡើងទៅ។ បណ្ដាក្រុមហ៊ុនផលិតម៉ូតូអគ្គិសនីក្នុងស្រុកមិនត្រូវបានអនុញ្ញាតឱ្យដំឡើងថ្លៃក្នុងអំឡុងពេលអនុវត្តការគោលការណ៍ឧបត្ថម្ភ និងត្រូវសន្យាថា ផលិតឱ្យបានគ្រប់ចំនួនសម្រាប់កម្មវិធីនេះ។

អ្នកដែលត្រូវបានផ្ដល់អាទិភាពក្នុងការទទួលប្រាក់ឧបត្ថម្ភប្ដូរក្នុងកម្មវិធីខាងលើ គឺអាជីវកម្មខ្នាតមីក្រូ តូច និងមធ្យម (MSME) ក៏ដូចជាគ្រួសារតែប្រើប្រាស់អគ្គិសនីប្រចាំខែចន្លោះពី 450 ទៅ 900VA ក្នុងគោលដៅបង្កើនការផលិត និងប្រសិទ្ធភាពជំនួញ។

យោងតាមក្រសួងថាមពល និងរ៉ែ KBLBB អាចនឹងជួយឱ្យអ្នកប្រើប្រាស់ និងរដ្ឋាភិបាលសន្សំសំច័យប្រាក់បាន 2.77 លាន និង 32.7 ពាន់លានរូពៀ/ឆ្នាំ ព្រមទាំងកាត់បន្ថយឧស្ម័នផ្ទះកញ្ចក់បាន 0.03 លានតោន/ឆ្នាំ និងបង្កើនការងារបានច្រើន បើទោះការប្រើប្រាស់អគ្គិសនីនឹងកើន 15.2GWh ក្នុងមួយឆ្នាំ៕

March 7, 2023

Author: សឿន សំណាង