សឿន សំណាង - La Reine Media

ប្រធានាធិបតីអាម៉េរិកដាក់សំណើបង្កើនថវិកាការពារជាតិជាង 880 ពាន់លានដុល្លារ

ប្រធានាធិបតី ចូ បៃដិន សង្កត់ធ្ងន់ថា ថវិកានេះនឹងធានាចំពោះការសន្យារបស់សហរដ្ឋអាម៉េរិក នៅក្នុងប្រឈមនឹងបញ្ហានានានៅទូទាំងសកលលោក និងរក្សាសុវត្ថិភាពសម្រាប់ទីក្រុងវ៉ាស៊ីងតោន ក៏ដូចជាជួយដល់អ៊ុយក្រែន។

កាលពីថ្ងៃទី 09 មីនា លោក បៃដិន បានប្រកាសអំពីសំណើថវិកាការពារជាតិប្រហែល 886 ពាន់លានដុល្លារសម្រាប់ឆ្នាំសារពើពន្ធ 2024 កើន 3.3% ធៀបនឹងឆ្នាំ 2023 ដើម្បីទប់ទល់នឹងឧបសគ្គដែលសហរដ្ឋអាម៉េរិកកំពុងជួបប្រទះ។

រដ្ឋាភិបាលរបស់លោក បៃដិន មានផែនការចំណាយសរុប 6.88 ទ្រីលានដុល្លារ កើន 8% ធៀបនឹងឆ្នាំ 2023 សម្រាប់ឆ្នាំសារពើពន្ធដែលចាប់ផ្ដើមពីថ្ងៃទី 01 តុលាខាងមុខ។

លោក បៃដិន សង្កត់ធ្ងន់ថា «ថវិកានេះជួយគាំទ្រដល់ការសន្យារបស់យើងនៅក្នុងការប្រឈមមុខនឹងឧបសគ្គសកល និងរក្សាសុវត្ថិភាពសម្រាប់សហរដ្ឋអាម៉េរិក។ វាគូសវាសនូវខ្ទង់វិនិយោគសំខាន់នានាដើម្បីប្រកួតប្រជែងជាមួយប្រទេសចិននៅលើពិភពលោក និងបន្តជួយដល់ប្រទេសអ៊ុយក្រែន។

យោងតាមវ៉ាស៊ីងតោន កំណើនថវិកាការពារជាតិខាងលើនឹងរួមចំណែកជំរុញសមត្ថភាពកំញើញទូទៅរបស់សហរដ្ឋអាម៉េរិក នៅក្នុងតំបន់ទាំងឡាយលើពិភពលោក៕

March 10, 2023

វគ្គផ្ដាច់ព្រ័ត្រនៃពានរង្វាន់ជើងឯកបាល់ទាត់ U20 អាស៊ី 2023 សុទ្ធតែមានវត្តមានរបស់ក្រុមខ្លាំងៗ

ការប្រកួតជើងទីបីនៃវគ្គសន្សំពិន្ទុនៅ U20 អាស៊ី 2023 (2023 AFC U-20 Asian Cup) បានបញ្ចប់ ក៏ជាពេលដែលគេកំណាត់បាននូវគូប្រកួតពេញលេញសម្រាប់បួនគូនៅវគ្គ ¼។

បណ្ដាក្រុមខ្លាំងៗដែលបានបង្ហាញខ្លួនសម្រាប់វគ្គបន្ទាប់ រួមមាន U20 អូស្ត្រាលី, U20 អ៊ុយបេគីស្ថាន, U20 កូរ៉េខាងត្បូង និង U20 ចិន។ ការប្រកួតនៅវគ្គ ¼ នឹងកាន់តែគួរឱ្យចាប់អារម្មណ៍មិនខាន។

យោងតាមការកំណត់ ក្រុមលេខមួយប្រចាំពូល A គឺអ៊ុយបេគីស្ថាន នឹងប្រកួតជាមួយ U20 អូស្ត្រាលី ដំបូងគេនៅវគ្គ ¼។ ក្រុមដែលឈ្នះនឹងត្រូវប៉ះក្រុមដែលឈ្នះក្នុងគូប្រកួតរវាង U20 កូរ៉េខាងត្បូង និង U20 ចិន នៅវគ្គពាក់កណ្ដាលផ្ដាច់ព្រ័ត្រ។ ដូច្នេះ គូប្រកួតទាំងនេះត្រូវបានវាយតម្លៃថាលំបាកជាងបណ្ដាគូខាងក្រោម។

បណ្ដាគូប្រកួតនៅខាងក្រោមរួមមាន U20 អ៊ីរ៉ង់ និង U20 អ៊ីរ៉ាក់នឹងជួបគ្នានៅវគ្គ ¼។ អ៊ីរ៉ាក់មិនត្រូវបានវាយតម្លៃខ្ពស់ព្រោះរកបានតែ 4 ពិន្ទុនៅវគ្គសន្សំពិន្ទុ ដោយសារឈ្នះឥណ្ឌូណេស៊ីតែមួយគត់។ ចំណែក U20 ជប៉ុន ត្រូវគេជឿថា នឹងអាចយកឈ្នះលើក្រុមខ្សោយ U20 ហ្ស៊កដានី នៅវគ្គ ¼ ដែលនឹងប្រកួតក្រោយគេ។

ដូច្នេះ ក្នុងគូប្រកួតចុងក្រោយ (ជប៉ុន និងហ្ស៊កដានី) នៃវគ្គ ¼ U20 ជប៉ុនអាចនឹងបានឡើងដល់វគ្គផ្ដាច់ព្រ័ត្រ បើសិនលេងឱ្យអស់ពីសមត្ថភាព។ ចំណែកបេក្ខភាពសម្រាប់តំណែងជើងឯកដទៃទៀត រួមមាន U20 អូស្ត្រាលី, ក្រុមម្ចាស់ផ្ទះ U20 អ៊ុយបេគីស្ថាន ឬ U20 កូរ៉េខាងត្បូង នឹងមានការលំបាក ហើយត្រូវចំណាយកម្លាំងច្រើន បើសិនចង់ឡើងដល់វគ្គចុងក្រោយ។

ក្រុម និងគូប្រកួតនៅវគ្គ 1/4 នៃពានរង្វាន់ជើងឯកបាល់ទាត់ U20 អាស៊ី 2023

វគ្គ ¼ នៃពានរង្វាន់ជើងឯកបាល់ទាត់ U20 អាស៊ី 2023 នឹងចាប់ផ្ដើមនៅថ្ងៃទី 11 មីនា និង 12 មីនា 2023។ បួនក្រុមដែលឡើងដល់វគ្គពាក់កណ្ដាលផ្ដាច់ព្រ័ត្រ U20 អាស៊ី 2023 នឹងទទួលបានសំបុត្រទៅចូលរួមវគ្គផ្ដាច់ព្រ័ត្ររបស់ FIFA U20 World Cup 2023 នៅប្រទេសឥណ្ឌូណេស៊ី៕

March 10, 2023

The Glory (គំនុំផ្កាពិស) វគ្គពីរ របស់កូរ៉េខាងត្បូង ចាប់បញ្ចាំងលើ Netflix

ឈុតក្រោយឆាករបស់វគ្គពីរនៃភាពយន្តកូរ៉េខាងត្បូង រឿង The Glory ដែលមិនសូវត្រូវបានគេដឹង ពេលនេះត្រូវបានអ្នកសម្ដែងមួយចំនួនទម្លាយឈុតឆាកខ្លះ។

ខ្សែភាពយន្តទូរទស្សន៍រឿង The Glory (គំនុំផ្កាពិស) ត្រូវបិទតែម 18+ ដោយសារតែមានឈុតហិង្សា និងឈុតក្ដៅសាច់ជាច្រើន។ ក្នុងវគ្គមួយ ខ្សែភាពយន្តនេះបានទទួលការវាយតម្លៃដល់កម្រិត Top 1 នៅទូទាំងពិភពលោកស្ដីពីភាពយន្តមិននិយាយភាសាអង់គ្លេសដែលទាក់ទាញបំផុតនៅលើ Netflix។ ក្នុង 8 ភាគបន្ទាប់របស់វគ្គពីរ រឿងរ៉ាវក្រោយឆាកត្រូវបានបង្ហើបឱ្យដឹង និងបង្ហាញថា គួរឱ្យចាប់អារម្មណ៍។

ប្ដីរបស់ស្រីចិត្តអាក្រក់ទទួលស្គាល់ថា មានសហាយក្នុងការគិត

តួអង្គស្វាមីរបស់ស្រីចិត្តអាក្រក់ Park Yeon Jin គឺ Ha Do Young។ ក្នុងវគ្គមួយ Ha Do Young បានលង់ស្នេហ៍លើ Moon Dong Eun។ ចប់វគ្គមួយ បុរសនេះក៏បានយល់ដឹងខ្លះៗអំពីទង្វើកាលពីអតីតកាលរបស់ភរិយាខ្លួនគឺនាង Yeon Jin។ Trailer វគ្គពីររបស់ The Glory បង្ហើបឱ្យដឹងអំពីទិដ្ឋភាពនាង Dong Eun ដោះអាវ និងឃើញស្នាមរបួសនៅចំពោះមុខប្ដីរបស់សត្រូវ។ ពេលនេះ Do Young កើតក្ដីអាណិត និងសួរ Dong Eun ថា តើក្រោយជម្លោះនោះ នាងមានសុភមង្គលឬទេ។

ក្នុងឈុតដែលត្រូវបានបង្ហើបឱ្យដឹង ប្ដីរបស់ស្ត្រីចិត្តអាក្រក់បានសារភាពពីការមានសហាយក្នុងចិត្ត។ ពេលដឹងថា ស្វាមីខ្លួនធ្លាប់លេងអុក និងមានចិត្តទៅលើ Dong Eun នាង Yeon Jin ក៏ខ្លឹងខ្លាំងណាស់ និងបានស្រែកដាក់ Do Young ថា «នោះគឺជារឿងផិតក្បត់»។ ប៉ុន្តែ Do Young តបថា «វាមិនមានយុត្តិធម៌សោះនៅពេលអូនក៏ធ្លាប់ដូច្នេះ តែខ្ញុំមិនបានស្ដីបន្ទោសទេ»។ ជម្លោះដែលជិតក្លាយជាការបែកបាក់គ្រួសារនេះធ្វើឱ្យទស្សនិកជនកាន់តែទន្ទឹងរង់ចាំ។

ក្នុងការចែករំលែកមួយ តារាសម្ដែងប្រុស Jung Sung Il បង្ហើបឱ្យដឹងថា «Ha Do Young នឹងធ្លាក់ក្នុងស្ថានភាពលំបាក អស់សង្ឃឹមនៅក្នុងវគ្គពីរ។

«ស្ត្រីចិត្តអាក្រក់» ៖ ថតដោយមិនពាក់អាវទ្រនាប់

ស្រីចិត្តអាក្រក់ Lee Sa Ra ដែលមិនពាក់អាវទ្រនាប់ (ដើម្បីសម្ដែងបានល្អ) សម្ដែងដោយ Kim Hieora។ «ខ្ញុំចូលចិត្តសេរីភាពរបស់តួអង្គ។ តួអង្គ Sa Ra កម្រពាក់អាវទ្រនាប់។ ដូច្នេះហើយទើបក្នុងពេលថត ខ្ញុំគ្រាន់តែប្រើបង់បិទដើមទ្រូង និងមិនពាក់អាវទ្រនាប់» Kim Hieora បង្ហើបដូច្នេះ។

Lee Sa Ra មានចរិត និងទង្វើគួរឱ្យខ្លាច ដែលត្រូវបានបង្ហើបឱ្យដឹងនៅក្នុង trailer វគ្គពីរ។ នាងមានផែនការដើម្បីសងសឹកចំពោះ Moon Dong Eun (Song Hye Kyo)។ ក្នុងវគ្គមួយ Lee Sa Ra ត្រូវឱ្យប្រាក់យ៉ាងច្រើនទៅ Dong Eun ប៉ុន្តែ មិនទាន់រួចផុតពីគម្រោងការធ្វើបាប។ នៅក្នុងវគ្គពីរ នាងប្រហែលជានឹងធ្វើបាបតួអង្គឯកទៅតាមវិធីដ៏គួរឱ្យភ្ញាក់ផ្អើលមិនខាន។

«ស្រីចិត្តអាក្រក់ស៊ីចស៊ី»

តួអង្គស្រី Choi Hye Jung (សម្ដែងដោយ Cha Joo Young) គឺជាអ្នកបម្រើលើយន្តហោះ។ ដោយសារមិនចង់ត្រូវគេធ្វើបាប នាងបានចូលក្នុងក្រុមលំដាប់ខ្ពស់ ធ្វើជាអ្នកបម្រើនៅក្នុងអំពើហិង្សាកាលពីពេលនៅរៀន។

ឈុតឆាកខ្លីសំខាន់ៗរបស់ The Glory វគ្គពីរ

វគ្គពីររបស់ The Glory ដែលនឹងចាក់បញ្ចាំងជាផ្លូវការនៅលើកញ្ចក់ទូរទស្សន៍ចាប់ពីថ្ងៃទី 10 មីនា 2023 ប្រាកដជានាំមកនូវឈុតឆាកដ៏គួរឱ្យជក់ចិត្តមិនខាន ពិសេសគឺទិដ្ឋភាពនៃការសងសឹករបស់ Moon Dong Eun (សម្ដែងដោយ Song Hye Kyo) ដែលធ្វើទៅក្រុមមិត្តដែលធ្លាប់ធ្វើបាបនាងកាលពីនៅរៀន៕

March 10, 2023

លោក Kim Jong-un បញ្ជាឱ្យកងទ័ពត្រៀមខ្លួនសម្រាប់សង្គ្រាមជាក់ស្ដែង

មេដឹកនាំកូរ៉េខាងជើង លោក Kim Jong-un បានបញ្ជាឱ្យកងទ័ពជំរុញការធ្វើសមយុទ្ធ ត្រៀមខ្លួនសម្រាប់ស្ថានការណ៍សង្គ្រាមជាក់ស្ដែង ក្នុងគ្រាដែលលោកធ្វើទស្សនកិច្ចព្រឹត្តិការណ៍បាញ់សាកល្បងមីស៊ីលផ្លោង។

ទីភ្នាក់ងារសារព័ត៌មានកូរ៉េខាងជើង KCNA កាលពីម្សិលមិញប្រកាសថា លោក Kim Jong-un បានធ្វើទស្សនកិច្ចសមយុទ្ធបាញ់គ្រាប់ពិតរបស់អង្គភាពជំនាញវាយប្រហារមួយ និងបន្ថែមថា អង្គភាពនេះបានបាញ់កាំជ្រួចផ្លោងខ្លាំងក្លាជាច្រើនគ្រាប់ទៅកាន់គោលដៅលើសមុទ្រ ព្រមទាំងបានបង្ហាញសមត្ថភាពត្រៀមខ្លួនរួចរាល់សម្រាប់ការប្រឈមនឹងសង្គ្រាមជាក់ស្ដែង។

រូបភាពដែលត្រូវបានចុះផ្សាយបង្ហាញថា លោក Kim Jong-un និងកូនស្រីមានវត្តមាននៅមូលដ្ឋានទ័ព ខណៈដែលយានបាញ់ផ្លោងមីស៊ីលជាច្រើនគ្រឿងត្រូវបានដាក់ពង្រាយក្រោមការការពាររបស់រថពាសដែក និងទាហានថ្នើរជើង។ ក្រោយមក មីស៊ីលផ្លោង 6 គ្រាប់ត្រូវបានបាញ់ចេញដំណាលគ្នា។

មេដឹកនាំរបស់កូរ៉េខាងជើងសង្កត់ធ្ងន់ថា «អង្គភាពប្រដាប់អាវុធខ្នាតធំត្រូវការការធ្វើសមយុទ្ធឱ្យបានម៉ឺងម៉ាត់ ដើម្បីបំពេញសមត្ថភាពនៃការអនុវត្តភារកិច្ចយុទ្ធសាស្ត្រ រួមមាន ការកំញើញអំពីសង្គ្រាម និងដើម្បីមានប្រៀបនៅពេលផ្ទុះសង្គ្រាម ក៏ដូចជាជំរុញការធ្វើសមយុទ្ធ ត្រៀមសម្រាប់សង្គ្រាមជាក់ស្ដែង»។

កូរ៉េខាងត្បូងឱ្យដឹងថា កូរ៉េខាងជើងបានបាញ់សាកល្បងមីស៊ីលកាលពីព្រលប់ថ្ងៃទី 09 មីនា ខណៈដែលសហរដ្ឋអាម៉េរិក បញ្ជាក់ថា ការបាញ់សាកល្បងអាវុធរបស់កូរ៉េខាងជើងនេះ ធ្វើឱ្យមានអស្ថិរភាពក្នុងតំបន់។

ថ្មីៗនេះ ឧបទ្វីបកូរ៉េ និងតំបន់ជុំវិញបន្តឡើងកម្ដៅ នៅពេលកូរ៉េខាងត្បូងចូលរួមធ្វើសមយុទ្ធយោធាទ្រង់ទ្រាយធំជាមួយសហរដ្ឋអាម៉េរិក និងជប៉ុន ហើយកូរ៉េខាងជើងក៏បាញ់សាកល្បងមីស៊ីល និងអាវុធថ្មីៗជាបន្តបន្ទាប់៕

March 10, 2023

ចំនួនក្រុមបាល់ទាត់ដែលនឹងឡើងទៅវគ្គផ្ដាច់ព្រ័ត្រ U20 World Cup 2023 បានកំណត់រួចហើយ

ដោយសារតែ U20 ឥណ្ឌូណេស៊ី ត្រូវបានជម្រុះយ៉ាងឆាប់រហ័ស តំបន់អាស៊ីក៏កំណត់បាននូវចំនួនក្រុមដែលនឹងត្រូវចូលរួមប្រកួតវគ្គផ្ដាច់ព្រ័ត្រដណ្ដើមពានរង្វាន់បាល់ទាត់ U20 World Cup 2023។

U20 ឥណ្ឌូណេស៊ី មិនអាចធ្វើឱ្យមានចំណាប់អារម្មណ៍នៅក្នុងការប្រកួតដណ្ដើម «ពានរង្វាន់ជើងឯកបាល់ទាត់អាស៊ីឆ្នាំ 2023» (2023 AFC U-20 Asian Cup)។ កូនសិស្ស និងគ្រូបង្វឹក Shin Tae-yong ត្រូវបានជម្រុះជាផ្លូវការពីវគ្គសន្សំពិន្ទុដោយលទ្ធផលឈ្នះ 1, ស្មើ 1 និងចាញ់ 1 និងមានពិន្ទុស្មើនឹងក្រុមរបស់អ៊ីរ៉ាក់ ប៉ុន្តែសន្ទស្សន៍បន្ថែមមានពិន្ទុទាបជាង។

ការដែល U20 ឥណ្ឌណេស៊ីត្រូវបានជម្រុះយ៉ាងឆាប់បែបនេះក៏ធ្វើឱ្យប៉ះពាល់ដល់តំបន់អាស៊ី។ ដោយសារថា ឥណ្ឌូណេស៊ីជាម្ចាស់ផ្ទះនៃវគ្គផ្ដាច់ព្រ័ត្រ U20 World Cup 2023 ដូច្នេះ បើសិនជាក្រុមឥណ្ឌូណេស៊ីអាចឡើងដល់វគ្គពាក់កណ្ដាលផ្ដាច់ព្រ័ត្រលើកនេះ នោះតំបន់អាស៊ីនឹងមានប្រាំក្រុមឡើងទៅប្រកួតនៅ World Cup ជំនួសឱ្យបួនក្រុមដូចដំបូង។

U20 ឥណ្ឌូណេស៊ី ត្រូវបានជម្រុះត្រឹមវគ្គសន្សំពិន្ទុនៅពានរង្វាន់បាល់ទាត់ជើងឯកអាស៊ី 2023 (2023 AFC U-20 Asian Cup)

ពេលនោះ បួនក្រុមដែលត្រូវបានជម្រុះត្រឹមវគ្គ ¼ នឹងត្រូវចាប់ឆ្នោតចែកគូ ទាត់វគ្គជម្រុះផ្ទាល់ (play-off) ដើម្បីជ្រើសរើសមួយក្រុមធ្វើជាតំណាងចុងក្រោយ។ ក៏ប៉ុន្តែ ករណីនេះមិនបានកើតឡើងនោះទេ ដោយសារតែ U20 ឥណ្ឌូណេស៊ីត្រូវបានជម្រុះត្រឹមវគ្គសន្សំពិន្ទុទៅហើយ។ ដូច្នេះ ទ្វីបអាស៊ីប្រាកដជានឹងមានតែបួនក្រុមប៉ុណ្ណោះដែលនឹងបានចូលរួមប្រកួតនៅ World Cup រដូវកាលខាងមុខ៕

March 9, 2023

ករណីចោរប្លន់ប្រាក់ជាង 32 លានដុល្លារក្នុងព្រលានយន្តហោះនៅស៊ីលី បានសម្លាប់មនុស្សច្រើននាក់

កងកម្លាំងសន្តិសុខរបស់ព្រលានយន្តហោះនៅ Santiago ប្រយុទ្ធគ្នាជាមួយនឹងក្រុមចោរប្រដាប់អាវុធ ដើម្បីរារាំងសកម្មភាពប្លន់ប្រាក់ 32.5 លានដុល្លារនៅលើយន្តហោះ បណ្ដាលឱ្យមានមនុស្សពីរនាក់បាត់បង់ជីវិត។

ចោរប្លន់ប្រដាប់អាវុធមួយក្រុមមានគ្នាពី 10 ទៅ 12 នាក់ កាលពីវេលាទៀបភ្លឺថ្ងៃទី 08 មីនា បានបើករថយន្តបីគ្រឿងសម្រុកចូលព្រលានយន្តហោះអន្តរជាតិ Arturo Merino Benitez។ ពួកគេបានឆ្ពោះទៅកាន់កន្លែងលើកដាក់ទំនិញ ក្នុងគ្រាដែលបុគ្គលិកកំពុងជញ្ជូនប្រាក់ 32.5 លានដុល្លារអាម៉េរិកចេញពីយន្តហោះ ដើម្បីដាក់ចូលក្នុងរថពាសដែក។

«ទំនិញមានតម្លៃខ្ពស់ត្រូវបានដឹកជញ្ជូនតាមយន្តហោះរបស់ក្រុមហ៊ុនអាកាសចរណ៍ LATAM ពី Miami ដែលការពារដោយក្រុមហ៊ុនសន្តិសុខ Brinks។ ក្រុមចោរប្លន់បានសម្រុកចូល ប៉ុន្តែត្រូវក្រុមសន្តិសុខបាញ់ប្រហាររុញច្រានទៅវិញ» រដ្ឋអាជ្ញា Eduardo Baeza ដែលទទួលបន្ទុកស៊ើបអង្កេតរឿងក្ដីនេះ បានថ្លែងដូច្នេះ។

ការប្រយុទ្ធគ្នារវាងក្រុមសន្តិសុខ និងក្រុមចោរប្លន់ បានបណ្ដាលឱ្យមនុស្សពីរនាក់ស្លាប់ ក្នុងនោះមានម្នាក់ជាសន្តិសុខ និងម្នាក់ជាចោរ។ ក្រោយមក ក្រុមចោរក៏បានរត់គេចខ្លះ និងដុតរថយន្តពីរគ្រឿងក្នុងចំណោមបីគ្រឿងរបស់ពួកគេនៅលើផ្លូវល្បឿនលឿនក្បែរកន្លែងកើតហេតុ។

ប្រធានាធិបតី Gabriel Boric បានសន្យាថា ស្វែងរក និងកាត់ទោសក្រុមចោរប្លន់នេះឱ្យបាន។ លោកក៏បានអះអាងថា នឹងផ្ដល់កម្លាំងប៉ូលិសឱ្យបានគ្រប់គ្រាន់ដើម្បីប្រឈមមុខនឹងក្រុមឧក្រិដ្ឋជននេះ។

កាលពីឆ្នាំ 2020 នៅឯព្រលានយន្តហោះ Arturo Merino Benitez ក៏កើតមានករណីប្លន់ស្រដៀងគ្នានេះ ដែលពេលនោះ ចោរបានប្លន់យកប្រាក់ 15 លានដុល្លារអាម៉េរិកពីរថយន្តដឹកទំនិញ។ ឆ្នាំ 2014 ព្រលានយន្តហោះនេះក៏ត្រូវចោរប្លន់យកបានប្រាក់ជាង 10 លានដុល្លារ៕

March 9, 2023

«ដូនី យេន ត្រូវ លី លានជា វ៉ៃស្ទើរតែពិការភ្នែក» ប៉ុន្តែពេលនេះ តើមានទំនាក់ទំនងយ៉ាងណាហើយ?

រឿងរ៉ាវស្ដីពី លី លានជា (Jet Li) វ៉ៃ ដូនី យេន (Donnie Yen – ខ្មែរយើងច្រើនហៅថា កុំកុំ) ឱ្យរងរបួសស្ទើរតែពិការភ្នែក ត្រូវបានគេនិយាយជាហូរហែ ប៉ុន្តែ ថ្មីៗនេះកំពូលតារាក្បាច់គុន កុំកុំ ទើបតែរៀបរាប់ហេតុការណ៍បានច្បាស់។

នៅក្នុងកិច្ចសម្ភាសមួយជាមួយទស្សនាវដ្ដី GQ ដូនី យេន បាននិយាយអំពីរឿងដែលខ្លួនធ្លាប់ «ប៉ះទង្គិចគ្នា» ជាមួយ លី លានជា នៅកន្លែងថតកុន ក្នុងឈុតឆាកផ្សងគ្រោះថ្នាក់។ បញ្ហាកើតឡើងដំបូងគឺនៅពេលថតរឿង Once Upon a Time in China II (កំពូលក្បាច់គុន វ៉ាងហ្វ៊ីហុង) របស់អ្នកដឹករឿង Hark Tsui ដែលចាប់បញ្ចាំងកាលពីឆ្នាំ 1992។ ក្នុងភាពយន្តនេះ ដូនី យេន សម្ដែងជាតួអង្គអាក្រក់ ចំណែក លី លានជា សម្ដែងជាតួអង្គ វ៉ាង ហ្វ៊ីហុង។

ឈុតឆាកប្រយុទ្ធមួយទល់នឹងមួយរបស់ ដូនី យេន និង លី លីនជា ត្រូវបានវិនិយោគច្រើនទៅលើក្បាច់គុន និងត្រូវបានចាត់ទុកថាជាឈុតឆាកដ៏អស្ចារ្យសម្រាប់ភាពយន្តកុងហ្វ៊ូ។ ក៏ប៉ុន្តែ ក្នុងពេលថត ដូនី យេន ត្រូវបាន លី លានជា វ៉ៃឱ្យរងរបួសធ្ងន់ វិះនឹងពិការភ្នែក។

ដេនី យេន និង លី លានជា ក្នុងរឿង កំពូលក្បាច់គុន វ៉ាងហ្វ៊ីហុង

«ពេលថតកុន គ្រោះថ្នាក់មួយបានកើតឡើង ធ្វើឱ្យខ្ញុំវិះនឹងពិការភ្នែក។ នោះគឺនៅពេល លី លានជា ត្រូវស្ថិតនៅខាងលើ ហើយខ្ញុំនៅខាងក្រោម ពួកយើងប្រើប្រាស់ឫស្សីមួយដើមធំ និងធ្ងន់ដើម្បីប្រយុទ្ធគ្នា» កុំកុំ និយាយដូច្នេះ និងបន្តថា «លី លានជា វាយប្រហារពីលើ ចំណែកខ្ញុំត្រូវរងជាបន្តបន្ទាប់នៅពីក្រោម។ បន្ទាប់ពីវាយបាន 30 ក្បាច់ ស្រាប់តែគាត់រអិលជើង និងវាយពីទទឹងជំនួសឱ្យការវាយពីលើ ដូច្នេះឫស្សីក៏វាត់ចំចុងចិញ្ចើមរបស់ខ្ញុំ។ ពេលនោះ ខ្ញុំថយក្រោយ 8 ជំហាន ដាក់ដៃចុះ ឈាមក៏ហូរទៅខាងមុខ ខ្ញុំមិនកុហកទេ ដូចភ្លៀងអ៊ីចឹង»។

ក្រោយពីហេតុការណ៍បានកើតឡើង ដូនី យេន ក៏ត្រូវបានបញ្ជូនទៅកាន់មន្ទីរពេទ្យសង្គ្រោះបន្ទាន់។ បើទោះជាត្រូវដេរ 6-7 ថ្នេរ ប៉ុន្តែ ស្អែកឡើង តារាក្បាច់គុនរូបនេះនៅតែទៅកាន់កន្លែងថតកុនដើម្បីបន្តសកម្មភាព។

https://www.youtube.com/watch?v=AeeoEpmyb2Y

រឿង Hero (អ្នកក្លាហាន)

10 ឆ្នាំក្រោយពីហេតុការណ៍ខាងលើ ដូនី យេន ក៏មានឱកាសប៉ះនឹង លី លានជា ម្ដងទៀតនៅក្នុងរឿង Hero (អ្នកក្លាហាន) ដែលជាកំពូលខ្សែភាពយន្តមួយរបស់ចិន។ លើកនេះ ពួកគេប្រយុទ្ធគ្នានៅលើទីលានក្នុងវត្ត ហើយគ្រោះថ្នាក់ក៏បានកើតឡើងម្ដងទៀត ធ្វើឱ្យផ្ទៃមុខរបស់ ដូនី យេន រងរបួស និងហូរឈាម។

កំពូលក្បាច់គុន វ៉ាងហ្វ៊ីហុង

រឿងរ៉ាវទាំងពីរខាងលើ ធ្វើឱ្យមានពាក្យចចាមអារ៉ាមមួយចំនួនកើតឡើង ក្នុងនោះមានដំណឹងខ្លះថា ទំនាក់ទំនងរវាងពួកគាត់មិនល្អ ខណៈដែលអ្នកខ្លះថា កំពូលតារាក្បាច់គុនទាំងពីរចាត់ទុកគ្នាជា «សត្រូវ»។

ក៏ប៉ុន្តែ ថ្ងៃមួយ ដូនី យេន បានចេញមុខបកស្រាយថា «…ដល់វ័យនេះ ខ្ញុំយល់ច្បាស់ហើយថាអ្វីដែលមានតម្លៃបំផុតសម្រាប់ជីវិត។ គ្រួសារ មិត្តភ័ក្ដិ និងក្បាច់គុន ខ្ញុំមិនអាចក្បាត់បីប្រការនេះបានឡើយ»៕

March 9, 2023

អូស្ត្រាលីមានគម្រោងទិញនាវាមុជទឹកតម្លៃបីពាន់លានដុល្លាររបស់អាម៉េរិក

ប្រទេសអូស្ត្រាលីមានផែនការទិញនាវាមុជទឹកថ្នាក់ Virginia ទំនើបបំផុតចំនួនប្រាំគ្រឿងរបស់សហរដ្ឋអាម៉េរិក ទន្ទឹមនឹងនេះក៏អនុញ្ញាតឱ្យវ៉ាស៊ីងតោនដាក់ពង្រាយនាវាមុជទឹកនៅប្រទេសនេះ។

មន្ត្រីបួនរូបរបស់សហរដ្ឋអាម៉េរិក សុំមិនបញ្ចេញឈ្មោះ កាលពីថ្ងៃទី 08 មីនា បានឱ្យដឹងថា ការទិញដូរនាវាមុជទឹកថ្នាក់ Virginia ប្រាំគ្រឿងក្នុងទសវត្សរ៍ឆ្នាំ 2030 នឹងជាផ្នែកមួយក្នុងកិច្ចព្រមព្រៀង AUKUS រវាងអូស្ត្រាលី សហរដ្ឋអាម៉េរិក និងអង់គ្លេស។ នាវាមុជទឹកថ្នាក់ Virginia សម្រាប់ទ័ពជើងទឹកអាម៉េរិក មានតម្លៃពី 2.8 ដល់ 3.5 ពាន់លានដុល្លារ ប៉ុន្តែមិនទាន់ដឹងច្បាស់ថា អូស្ត្រាលីបានជ្រើសរើសកំណែណាមួយនៅឡើយ។

យោងតាមកិច្ចព្រមព្រៀង សហរដ្ឋអាម៉េរិកនឹងបញ្ជូននាវាមុជទឹកនុយក្លេអែរទៅធ្វើទស្សនកិច្ចនៅអូស្ត្រាលីជារៀងរាល់ឆ្នាំ មុនពេលបញ្ជូននាវាមុជទឹកមួយចំនួនទៅបោះទ័ពរយៈពេលយូរនៅភាគខាងលិចប្រទេសនេះ ដោយចាប់ផ្ដើមពីឆ្នាំ 2027។ ទីក្រុងកង់បេរ៉ានឹងទិញនាវាមុជទឹកថ្នាក់ Virginia ចំនួនបីគ្រឿងនៅដើមទសវត្សរ៍ឆ្នាំ 2030 អមនឹងជម្រើសទិញបន្ថែមពីរគ្រឿងទៀត បើសិនចាំបាច់។

កិច្ចព្រមព្រៀង AUKUS គ្រោងនឹងបញ្ចប់នៅចុងទសវត្សរ៍ឆ្នាំ 2030 នៅពេលដែលអូស្ត្រាលីបានទទួលនាវាមុជទឹកថ្មីដែលរចនាឡើងដោយអង់គ្លេស និងបំពាក់បច្ចេកវិទ្យាអាម៉េរិក។

ទាក់ទងនឹងព័ត៌មានខាងលើនេះ សេតវិមាន និងមន្ទីរបញ្ចកោណ មិនទាន់បញ្ចេញប្រតិកម្មអ្វីនៅឡើយ។ យោងតាមកិច្ចព្រមព្រៀង AUKUS ដែលចុះហត្ថលេខាកាលពីឆ្នាំ 2021 អូស្ត្រាលីអាចទិញនាវាមុជទឹកនុយក្លេអែរពីអាម៉េរិក។ វ៉ាស៊ីងតោន កង់បេរ៉ា និងក្រុងឡុង បានចំណាយពេល 18 ខែ ក្នុងការចរចាអំពីលទ្ធភាពដែលអូស្ត្រាលីអាចមានបច្ចេកវិទ្យាម៉ាស៊ីននុយក្លេអែរដ៏សម្ងាត់របស់អាម៉េរិក។

ការទិញដូរដែលមានតម្លៃរាប់សិបពាន់លានដុល្លារខាងលើ ក៏ជារបត់ដំបូងដែលអាម៉េរិកនាំចេញបច្ចេកវិទ្យានាវាមុជទឹកដើរដោយថាមពលនុយក្លេអែរ រាប់ចាប់ពីឆ្នាំ 1960 បន្ទាប់ពីបានជួយឱ្យអង់គ្លេសកសាងក្រុមនាវាចម្បាំង៕

March 9, 2023

កម្ពុជាចាញ់ភូមា 0-2 ក្នុងការប្រកួតបើកឆាកពូល G នៃពានរង្វាន់បាល់ទាត់នារីទ្វីបអាស៊ីអាយុក្រោមម្ភៃឆ្នាំ

ការប្រកួតបើកឆាកពូល G នៃវគ្គជម្រុះជុំទីមួយរបស់ពានរង្វាន់បាល់ទាត់នារីទ្វីបអាស៊ីអាយុក្រោមម្ភៃឆ្នាំឆ្នាំ 2024 (AFC U20 Women’s Asian Cup 2024) ដែលធ្វើឡើយនៅប្រទេសអ៊ុយបេគីស្ថាន ក្រុមកម្ពុជាបានចាញ់ក្រុមភ្ញៀវមីយ៉ាន់ម៉ា (ភូមា) 0-2 កាលពីថ្ងៃទី 08 មីនា នៅកីឡដ្ឋាន Smart RSN។

ក្នុងតង់ទីមួយ ក្រុមទាំងពីររក្សាទីបានល្អដូចគ្នា ដោយមិនមានក្រុមណាត្រូវប៉ើងសំណាញ់។ ចូលដល់តង់ទីពីរ ស្ថានការណ៍ចាប់ផ្ដើមប្រែប្រួលខ្លាំង ហើយមីយ៉ានម៉ាក៏រកបានមួយគ្រាប់ដំបូង ដោយថ្វីជើងរបស់ Sandar Lin នៅនាទីទី 55។

នៅនាទីទី 64 សំណាងមិនល្អបានកើតឡើងចំពោះក្រុមកម្ពុជា នៅពេល សំរឹទ្ធ និមល ទាត់ចូលទីខ្លួនឯងដោយអចេតនា។ ចប់ការប្រកួត មីយ៉ានម៉ាយកឈ្នះលើកម្ពុជាក្នុងលទ្ធផល 2-0 ធ្វើឱ្យកម្ពុជាបាត់បង់បីពិន្ទុ។

ក្រោយការប្រកួតនេះ កម្ពុជានៅសល់មួយប្រកួតទៀតដើម្បីដណ្ដើមយកសំបុត្រឡើងទៅប្រកួតនៅវគ្គបន្ទាប់។ កម្ពុជានឹងប៉ះក្រុមម៉ាឡេស៊ីនៅថ្ងៃទី 10 មីនា 2023 ក្នុងនោះបើសិនឈ្នះ ក្រុមកម្ពុជានឹងនៅមានឱកាសរង់ចាំអ៊ុតមើលការប្រកួតបញ្ចប់ពូល G រវាងម៉ាឡេស៊ី និងមីយ៉ានម៉ាដែលប្រកួតនៅថ្ងៃទី 12 មីនា។ ក៏ប៉ុន្តែ បើសិនជាចាញ់ កម្ពុជានឹងត្រូវហាលអាវ៕

March 9, 2023

Lionel Messi ប្រកួតចុងក្រោយនៅ Champions League ធ្វើឱ្យ Ronaldo «លួចសប្បាយចិត្ត»?

El Pulga ទំនងទើបតែបានបញ្ចប់ការបង្ហាញថ្វីជើងដែលត្រូវបានគេយល់ថា «ចុងក្រោយ» បន្ទាប់ពីចាញ់ Bayern ក្នុងការប្រកួតជើងទីពីរនៅឯកីឡដ្ឋាន Allianz Arena ប្រទេសអាល្លឺម៉ង់។ ប្រការនេះអាចធ្វើឱ្យ Ronaldo សប្បាយចិត្ត។

កំពូលតារាបាល់ទាត់ជនជាតិព័រទុយហ្កាល់ Cristiano Ronaldo ចាប់តាំងពីបានចាកចេញពីពិភពបាល់ទាត់លំដាប់កំពូល និងបានទៅប្រកួតឱ្យក្លឹបនៅមជ្ឈិមបូព៌ាក្នុងវ័យ 38 ឆ្នាំ ត្រូវបានគេយកមកប្រៀបធៀបជាមួយនឹង Messi ដែលជាកំពូលតារាបាល់ទាត់របស់ប្រទេសអាហ្សង់ទីន។ ជាពិសេស តំណែងជើងឯក World Cup 2022 ដែល Messi និងក្រុមអាហ្សង់ទីនដណ្ដើមបាន គឺជារឿងលេចធ្លោដែលគេលើកយកមកសង្កត់សង្កិនផ្លូវចិត្តរបស់ Ronaldo ព្រោះមនុស្សជាច្រើនយល់ថា CR7 បាន «អស់អំណាច» ពិតប្រាកដ។

ដូច្នេះហើយ យោងតាមទំព័រ Express រឿងដែលថា Messi លេងក្នុងការប្រកួតចុងក្រោយនៅ Champions League ឆ្នាំនេះ បន្ទាប់ពីបរាជ័យចំពោះមុខ Bayern ក្នុងជើងទីពីរ និងអាចជាការប្រកួតលើកចុងក្រោយក្នុងអាជីព បណ្ដាលឱ្យ Ronaldo ត្រេកអរខ្លាំង។ ប្រការនេះអាចនឹងកើតឡើង បើសិន Messi សម្រេចចិត្តមិនពន្យារកិច្ចព្រមព្រៀងជាមួយក្លឹប PSG។

បើទោះជានៅតែមានសមត្ថភាពលេងនៅពិភពបាល់ទាត់លំដាប់កំពូលរបស់ពិភពលោក ប៉ុន្តែបើសិនចាកចេញពី PSG មែន Messi ទំនងជាពិបាករកក្លឹបថ្មី ដោយសារថា បច្ចុប្បន្នមានក្លឹបមិនច្រើននោះទេដែលមានសមត្ថភាពផ្ដល់ប្រាក់បៀវត្សរ៍ឱ្យ El Pulga។ ជាងនេះ ក្នុងវ័យកាន់តែច្រើន ការទាត់ឱ្យក្លឹបធំៗក្នុងរយៈពេលយូរឆ្នាំទៀតគឺជាបញ្ហាធំដែលមិនមែនសម្រាប់តែ Messi នោះទេ តែកីឡាករទាំងអស់នឹងជួបរឿងនេះ។

ចំណែក Ronaldo វិញ ការចូលរួមជាមួយ Al Nassr គឺមានន័យថា គាត់បានឈប់ប្រកួតជាផ្លូវការនៅក្នុង «សមរភូមិ» អឺរ៉ុប និងបោះបង់តួនាទីជាអ្នកប្រមាញ់គ្រាប់បាល់លំដាប់កំពូលនៅទ្វីបនេះ។ ក្នុងអាជីព CR7 រកបាន 140 គ្រាប់នៅ Champions League ច្រើនជាង Messi ដែលរកបានតែ 129 គ្រាប់។ ដូច្នេះហើយ រឿងដែលថា M30 នឹងចាកចេញពី Champions League គឺជាកត្តាដែលនឹងជួយរក្សាកំណត់ត្រារបស់កំពូលតារាបាល់ទាត់ព័រទុយហ្កាល់ ឱ្យនៅគង់វង្ស៕

March 9, 2023

Author: សឿន សំណាង