សឿន សំណាង - La Reine Media

ភ្លើងគប់ស៊ីហ្គេមត្រូវបញ្ឆេះដោយពន្លឺថ្ងៃក្នុង «ព្រឹត្តិការណ៍ព្រះអាទិត្យរះចំកណ្តាលកំពូលប្រាសាទអង្គរវត្ត»

«ថ្ងៃនេះមានព្រឹត្តិការណ៍ព្រះអាទិត្យរះចំកណ្តាលកំពូលប្រាសាទអង្គរវត្ត ជាមួយនឹងភ្លើងគប់ស៊ីហ្គេមនឹងត្រូវបានបញ្ឆេះដោយពន្លឺព្រះអាទិត្យដែលរះនៅមុខប្រាសាទអង្គរវត្ត ដោយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នឹងយាងជាព្រះរាជាធិបតីដ៏ខ្ពង់ខ្ពស់ក្នុងព្រះរាជពិធីសុំភ្លើង “ព្រះអាទិទេពកីឡា” ដើម្បីដុតភ្លើងគប់នៃព្រឹត្តិការណ៍ស៊ីហ្គេម លើកទី 32 និងអាស៊ានប៉ារ៉ាហ្គេមឆ្នាំ 2023» ទំព័របណ្ដាញសង្គមរបស់ក្រសួងទេសចរណ៍ នាព្រឹកថ្ងៃទី 21 នេះ បានឱ្យដឹងដូច្នេះ។

ព្រឹត្តិការណ៍ដ៏អស្ចារ្យខាងលើនេះព្រព្រឹត្តទៅនៅថ្ងៃទី 21 មីនា 2023។ កាលពីម្សិលមិញ ក្រសួងក៏បានចេញសេចក្តីជូនដំណឹងស្តីពី «បាតុភូតធម្មជាតិព្រះអាទិត្យរះចំកណ្តាលកំពូលប្រាសាទអង្គរវត្ត» ឬ EQUINOX ដែលកើតឡើងចន្លោះថ្ងៃទី 20 ឬ21 ឬ 22 ឬ 23 ខែមីនា ឆ្នាំ 2023។ នេះគឺទស្សនីយភាពពិសេសមួយសម្រាប់ទេសចរគ្រប់រូប។

យោងតាមក្រសួងទេសចរណ៍ «បាតុភូតព្រះអាទិត្យរះចំកណ្តាលកំពូលប្រាសាទអង្គរវត្ត (EQUINOX)» កើតឡើងជារៀងរាល់ឆ្នាំចំនួនពីរលើក គឺនៅខែមីនាម្ដង និងខែកញ្ញាម្ដងទៀត។ ព្រឹត្តិការណ៍ដ៏អស្ចារ្យនេះស្តែងឲ្យឃើញពីអច្ឆរិយភាពនៃប្រាសាទអង្គរវត្ត ដែលបុព្វបុរសខ្មែរបានកសាងឡើងដោយមានការគិតគូរអំពីស្ថាបត្យកម្ម និងការផ្សារភ្ជាប់ជាមួយនឹងធម្មជាតិរវាងផែនដី និងព្រះអាទិត្យយ៉ាងច្បាស់លាស់គួរស្ញប់ស្ញែងជាទីបំផុត។

ក្រសួងទេសចរណ៍បានបញ្ជាក់ថា នៅឆ្នាំ 2023 បាតុភូតនេះអាចកើតឡើងចាប់ពីម៉ោង 05 កន្លះព្រឹក ដល់ម៉ោង 07 ព្រឹក។ ក្រសួងក៏បានអំពាវនាវដល់គ្រប់សមាគមទេសចរណ៍ ស្ថាប័នពាក់ព័ន្ធ អ្នកសារព័ត៌មាន ទេសចរជាតិ-អន្តរជាតិ និងសាធារណជនទូទៅចូលរួមផ្សព្វផ្សាយអំពីព្រឹត្តិការណ៍នេះផងដែរ៕

March 21, 2023

មហាសេដ្ឋីវ័យជាងកៅសិប «ជិតរៀបការលើកទីប្រាំ»

មហាសេដ្ឋីក្នុងវិស័យប្រព័ន្ធផ្សព្វផ្សាយ លោក Rupert Murdoch អាយុ 92 ឆ្នាំ មានគម្រោងរៀបការជាលើកទីប្រាំ ជាមួយនឹងស្ត្រីវ័យ 66 ឆ្នាំនៅរដូវក្ដៅនេះ។

«ខ្ញុំព្រួយបារម្ភណាស់។ ខ្ញុំខ្លាចរឿងស្នេហា ប៉ុន្តែខ្ញុំដឹងថា នេះនឹងជាស្នេហ៍លើចុងក្រោយរបស់ខ្ញុំ។ ល្អបំផុតគឺយ៉ាងនេះ។ ខ្ញុំសប្បាយចិត្ត» លោក Murdoch វ័យ 92 ឆ្នាំ និយាយពី Ann Lesley Smith ស្ត្រីដែលលោកទើបតែបានភ្ជាប់ពាក្យជាមួយ កាលពីថ្ងៃទី 20 មីនា។

អ្នកទាំងពីមានគម្រោងរៀបការនៅរដូវក្ដៅ ហើយនោះនឹងជាអាពាហ៍ពិពាហ៍លើកទីប្រាំរបស់មហាសេដ្ឋីក្នុងវិស័យប្រព័ន្ធផ្សព្វផ្សាយនៅសហរដ្ឋអាម៉េរិក អូស្ត្រាលី និងអឺរ៉ុប។ បណ្ដាញផ្សព្វផ្សាយរបស់លោក Murdoch មានដូចជា Sky News Australia, Fox News, Wall Street Journal, New York Post និង Sun ជាដើម។

មហាសេដ្ឋីអាម៉េរិកដើមកំណើតអូស្ត្រាលីរូបនេះ មានកូនបីនាក់នៅក្នុងអាពាហ៍ពិពាហ៍បីលើកដំបូង។ ភរិយាទីបួនរបស់លោក គឺកំពូលតារាម៉ូដែល Jerry Hall ដែលបានលែងលះកាលពីឆ្នាំមុន។

ចំណែកស្ត្រីដែលនឹងក្លាយជាភរិយាទីប្រាំរបស់លោក Murdoch បានឱ្យដឹងថា អ្នកស្រីធ្លាប់ជាអ្នកបង្ហាញម៉ូដ អ្នកចម្រៀង តន្ត្រីការិនី ពិធីការិនីរបស់វិទ្យុ San Francisco Bay Area និងជាអ្នកយកព័ត៌មានផងដែរ។ អ្នកស្រីបានឆ្លងកាត់អាពាហ៍ពិពាហ៍ពីរលើកមកហើយ។ ស្វាមីទីពីររបស់អ្នកស្រីដែលជាអតីតអ្នកចម្រៀង និងធ្លាប់ជានាយកប្រតិបត្តិរបស់វិទ្យុ និងទូរទស្សន៍ បានទទួលមរណភាពកាលពីឆ្នាំ 2008។

យោងតាមទំព័រ Forbes មហាសេដ្ឋី Rupert Murdoch មានទ្រព្យសម្បត្តិ 17.2 ពាន់លានដុល្លារអាម៉េរិក។ លោកគឺជាអ្នកមានជាងគេលំដាប់ទី 95 លើពិភពលោក៕

March 21, 2023

អាម៉េរិកផ្ដល់ជំនួយយោធាបន្ថែម 350 លានដុល្លារដល់អ៊ុយក្រែន

ក្រសួងការបរទេសអាម៉េរិកបានប្រកាសអំពីកញ្ចប់ជំនួយយោធាថ្មីតម្លៃ 350 លានដុល្លារសម្រាប់អ៊ុយក្រែន ក្នុងនោះមានទាំងរ៉ុក្កែត HIMARS រួមនឹងគ្រាប់រំសេវជាច្រើនប្រភេទទៀត។

«រហូតដល់រុស្ស៊ីបញ្ចប់ជម្លោះ យើងនឹងនៅជាមួយអ៊ុយក្រែនរហូតដល់ពេលនោះ តាមដែលអាចធ្វើបាន» រដ្ឋមន្ត្រីក្រសួងការបរទេសអាម៉េរិក Antony Blinken កាលពីថ្ងៃទី 20 មីនា បាននិយាយដូច្នេះនៅពេលប្រកាសអំពីកញ្ចប់ជំនួយយោធាថ្មីសម្រាប់អ៊ុយក្រែន។ មកដល់ពេលនេះ ជំនួយយោធាសរុបដែលអាម៉េរិកបានផ្ដល់ឱ្យអ៊ុយក្រែន បន្ទាប់ពីរុស្ស៊ីបើកយុទ្ធនាការយោធាពិសេសកាលពីខែកុម្ភៈ 2022 គឺជាង 32 ពាន់លានដុល្លារអាម៉េរិក។

កញ្ចប់ទំនួយថ្មីតម្លៃ 350 លានដុល្លារនេះមានទាំងរ៉ុក្កែតសម្រាប់ប្រព័ន្ធ HIMARS, គ្រាប់សម្រាប់កាំភ្លើងធំរបស់រថក្រោះ M2 Bradley, មីស៊ីលប្រឆាំងរ៉ាដា AMG-88 HARM, អាវុធប្រឆាំងរថក្រោះ និងឧបករណ៍យោធាដទៃទៀត។

កញ្ចប់ជំនួយយោធាថ្មីនេះត្រូវបានប្រកាសនៅក្នុងគ្រាដែលសង្គ្រាមរវាងរុស្ស៊ី និងអ៊ុយក្រែនកំពុងស្ថិតក្នុងសភាពខ្លាំងក្លានៅទីក្រុង Bakhmut នៃខេត្ត Donetsk។ ទីក្រុង Bakhmut ត្រូវបានរុស្ស៊ីគ្រប់គ្រងប្រហែល 70% នៃផ្ទៃដីសរុប នេះបើតាមមេដឹកនាំក្រុមទាហានស៊ីឈ្នួលរុស្ស៊ី Wagner។

បណ្ដាប្រទេសដែលគាំទ្រអ៊ុយក្រែន កំពុងបង្វឹកទាហានប្រទេសនេះឱ្យចេះប្រើអាវុធ ឧបករណ៍បច្ចេកវិទ្យា និងយុទ្ធសាស្ត្រទំនើបៗ ដើម្បីទប់ទល់នឹងកងទ័ពឈ្លានពានរបស់រុស្ស៊ី៕

March 21, 2023

Mbappe ធ្វើជាប្រធានក្រុមបាល់ទាត់ជម្រើសជាតិបារាំង

គ្រូបង្វឹក Didier Deschamps ជ្រើសរើសកីឡាករខ្សែប្រយុទ្ធ Kylian Abappe ធ្វើជាប្រធានក្រុមបាល់ទាត់ជម្រើសជាតិបារាំង ជំនួសអ្នកចាំទី Hugo Lloris។

កីឡាករក្រុមបាល់ទាត់ជម្រើសជាតិបារាំងជួបជុំគ្នានៅ Clairefontaine ចាប់ពីថ្ងៃទី 20 មីនា ដើម្បីត្រៀមខ្លួនសម្រាប់ការប្រកួតវគ្គជម្រុះ Euro 2024 ដែលនឹងត្រូវប៉ះហូឡង់ និងអៀរឡង់។ គ្រូបង្វឹក Deschamps នឹងពិភាក្សាជាមួយ Mbappe ស្ដីពីការជ្រើសរើសកីឡាករនេះឱ្យធ្វើជាប្រធានក្រុម។ យោងតាមទំព័រ L’Equipe ការសម្រេចចុងក្រោយអាចត្រូវបានប្រកាសនៅក្នុងថ្ងៃព្រហស្បតិ៍ ទី 23 មីនាខាងមុខ។

ក្រោយ World Cup 2022 អ្នកចាំទី Hugo Lloris បានចាកចេញពីក្រុមជម្រើសជាតិបារាំង ធ្វើឱ្យតំណែងប្រធានក្រុមត្រូវនៅទំនេរ។ កីឡាករខ្សែបម្រើ Raphael Varane ដែលធ្លាប់ធ្វើជាប្រធានក្រុមបាន 20 ប្រកួតក៏បានសុំឈប់ពីក្រុមជម្រើសជាតិកាលពីខែកុម្ភៈ 2023 ដើម្បីផ្ដោតលើអាជីពនៅថ្នាក់ក្លឹប។ ក្នុងការជួបជុំលើកនេះ មានតែ Oliver Giroud និង Antoine Griezmann ប៉ុណ្ណោះដែលបានទាត់ឱ្យក្រុមជម្រើសជាតិមុន Mbappe។

Mbappe កើតនៅប៉ារីស តែទទួលបានការបណ្ដុះបណ្ដាលផ្នែកបាល់ទាត់ពីក្លឹបរបស់ប្រទេសម៉ូណាកូ និងលេចធ្លោនៅទីនេះ។ ចាប់តាំងពីរដូវកាល 2017-2018 Mbappe ទាត់ឱ្យក្លឹប PSG និងរកបាន 202 គ្រាប់ ក្នុង 250 ប្រកួត ហើយបច្ចុប្បន្នគឺជាអនុប្រធានក្រុម។ Mbappe កំពុងគ្រប់គ្រងកំណត់ត្រារកបានគ្រាប់បាល់ច្រើនជាងគេក្នុងប្រវត្តិសាស្ត្រនៃវគ្គផ្ដាច់ព្រ័ត្រនៅ World Cup (បូនគ្រាប់) និងច្រើនគ្រាប់បំផុតនៅវគ្គជម្រុះផ្ទាល់ (8 គ្រាប់)។

គ្រូបង្វឹក Deschamps ក៏បានកំណត់យកអ្នកចាំទី Mike Maignan ឱ្យមកជំនួស Lloris។ Maignan លេងឱ្យ ក្រុមជម្រើសជាតិបារាំងទើបតែបានប្រាំប្រកួតប៉ុណ្ណោះ ប៉ុន្តែអ្នកចាំទីពីររូបទៀតគឺ Alphonse Areola និង Brice Samba ក៏មានបទពិសោធន៍តិចជាង។

បារាំងស្ថិតនៅក្នុងពូល B ក្នុងវគ្គជម្រុះ Euro 2024 ជាមួយនឹងហូឡង់ អៀរឡង់ ក្រិក និងហ្ស៊ីប្រាល់តា។ គូប្រកួតដំបូងរបស់បារាំងគឺហូឡង់ ដែលទាត់នៅឯកីឡដ្ឋាន Stade de France កាលពីព្រលប់ថ្ងៃទី 24 មីនា បីថ្ងៃមុនពេលធ្វើជាភ្ញៀវនៅអៀរឡង់៕

March 21, 2023

បំណែកពីស្ថានីយអវកាសអន្តរជាតិ (ISS) ឆេះជះពន្លឺពេញផ្ទៃមេឃរដ្ឋអាម៉េរិក

(សហរដ្ឋអាម៉េរិក) – បំណែករបស់ឧបករណ៍ទូរគមនាគមន៍ដែលបាញ់ចេញពីស្ថានីយអវកាសអន្តរជាតិ ផ្លាស់ទីក្នុងល្បឿនជាង 27,000 គីឡូម៉ែត្រ/ម៉ោង បង្កើតបានជាខ្សែបន្ទាត់ពន្លឺ ភ្លឺពេញផ្ទៃមេឃរដ្ឋ California កាលពីសប្ដាហ៍កន្លង។

ខ្សែបន្ទាត់ពន្លឺលើអាកាសនាពេលរាត្រីរបស់រដ្ឋ California កាលពីថ្ងៃទី 17 មីនា 2023 គឺជាលទ្ធផលនៃការត្រលប់មកកាន់បរិយាកាសផែនដីរបស់បំណែកសំរាមអវកាស និងបានឆេះពេលកំពុងធ្លាក់សំដៅផែនដី។

បំណែករបស់ឧបករណ៍ទូរគមនាគមន៍ត្រូវបានបាញ់ចេញពី ISS កាលពីខែកុម្ភៈ 2020 និងហោះក្នុងល្បឿន 27,358 គីឡូម៉ែត្រ/ម៉ោង នេះបើយោងតាមអ្នកស្រាវជ្រាវនៅមជ្ឈមណ្ឌលរូបវិទ្យាតារាសាស្ត្រ Harvard – Smithsonian ។ គន្លងគោចររបស់វាបានរួមតូចបន្តិចម្ដងៗក្នុងរយៈពេលពីរឆ្នាំ រហូតដល់ធ្លាក់ចូលស្រទាប់បរិយាកាសផែនដី ហើយក៏បែកជាបំណែក និងឆាបឆេះ។

អ្នកវិទ្យាសាស្ត្រឱ្យដឹងថា នេះគឺជាបំណែករបស់អង់តែនទូរគមនាគមន៍ទម្ងន់ 318 គីឡូក្រាម មានឈ្មោះថា Inter-orbit Communication System-Exposed Facility ដែលត្រូវបានបង្ហោះដោយយានអវកាស Shuttle កាលពីឆ្នាំ 2009។ បំណែកទាំងនេះធ្លាក់មកលើផែនដីដោយសេរី ព្រោះមិនមានឧបករណ៍បញ្ជាទិសដៅ។ ពេលធ្លាក់លើផែនដី វានឹងប៉ះពាល់ដល់បរិស្ថាន ឬអាចបង្កគ្រោះថ្នាក់ដល់មនុស្ស បើសិនឆេះមិនអស់ពេលកំពុងធ្លាក់។

បច្ចុប្បន្ន នៅលើគន្លងគោចរជុំវិញផែនដី មានបំណែកឧបករណ៍វិទ្យាសាស្ត្រជាច្រើនកំពុងហោះហើរបន្ទាបខ្លួនក្នុងមានតាំងពីដុំដែលតូចៗប៉ុនទូរស័ព្ទរហូតដល់ប៉ុនយានអវកាស។ យោងតាមអ្នកជំនាញ បំណែកទាំងនេះនឹងធ្លាក់មកលើផែនដីនៅថ្ងៃអនាគត៕

March 21, 2023

ក្រុមហ៊ុនផលិតរថយន្តអគ្គិសនីដែលគាំទ្រដោយ Alibaba បញ្ចេញ minivan អគ្គិសនីតម្លៃទាប

កាលពីថ្ងៃទី 16 មីនា Matrix Motors បានបង្ហាញកូនឡានដឹកទំនិញខ្នាតតូចប្រើអគ្គិសនី Matrix 01 ស៊េរី 2023។ Matrix ដែលត្រូវបានបង្កើតឡើងកាលពីឆ្នាំ 2012 គឺជាក្រុមហ៊ុនផលិតរថយន្តអគ្គិសនីមួយមានទីស្នាក់ការនៅប្រទេសចិន និងគាំទ្រដោយក្រុមហ៊ុន Alibaba។

Matrix 01 ត្រូវបានរចនាឡើងសម្រាប់ការដឹកជញ្ជូនទំនិញក្នុងក្រុង។ Matrix 01 កំណែឆ្នាំ 2023 មានបណ្ដោយ 3,490 មម, ទទឹង 1,465 មម, កម្ពស់ 1,685 មម។ រថយន្តនេះមានកៅអីមួយជួរ និងទ្រុងដាក់ទំនិញមានចំណុះ 2,300 លីត្រ។

ថាមពលរបស់ Matrix 01 គឺ 15kW ដោយមានថ្មផ្ទុកអគ្គិសនីកម្លាំង 10.36 kWh និងបើកបរបាន 120 គីឡូម៉ែត្រ។ កំណែដំបូងរបស់រថយន្តនេះមានជម្រើស «ធ្វើដំណើរបាន 220 គីឡូម៉ែត្រ» ដោយប្រើប្រាស់ថ្ម 20.72 kWh ប៉ុន្តែ ម៉ូដែលឆ្នាំ 2023 មិនមានផ្ដល់ជម្រើសមួយនេះ។

ថ្មរបស់ Matrix 01 អាចបញ្ចូលថាមពលអគ្គិសនីមួយពេញដោយចំណាយពេលបួនម៉ោង ប៉ុន្តែកំណែទាបជាងនេះ ត្រូវការពេលរហូតដល់ 8 ម៉ោង។ តម្លៃរបស់កូនឡានដឹកទំនិញខ្នាតតូចប្រើអគ្គិសនី Matrix 01 ស៊េរី 2023 គឺចាប់ពី 4,200 ដុល្លារអាម៉េរិក៕

March 20, 2023

គម្រោងបង្កើតរោងចក្រថ្មីចំនួនបីនៅកម្ពុជា ប្រើប្រាស់ទុនវិនិយោគសរុបជាង 16 លានដុល្លារអាម៉េរិក

ក្រុមប្រឹក្សាអភិវឌ្ឍន៍កម្ពុជា នាពេលថ្មីៗនេះបានអនុម័តចុះបញ្ជីគម្រោងវិនិយោគថ្មីចំនួនបីដែលមានទុនសរុប 16.2 លានដុល្លារអាម៉េរិក ហើយគ្រោងនឹងបង្កើតការងារបានជាងបីពាន់កន្លែង។

យោងតាមគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ក្រុមហ៊ុន និងគម្រោងថ្មីទាំងនេះរួមមាន៖

ក្រុមហ៊ុន «DAZHENGXUAN (CAMBODIA) INDUSTRIAL CO., LTD» ៖ គម្រោងបង្កើតរោងចក្រផលិតឆត្រ អាវភ្លៀង វាំងនន កន្សែងតុបាយ និងផ្សេងៗទៀតដែលមានទីតាំងវិនិយោគស្ថិតនៅផ្លូវជាតិលេខ 2 ភូមិក្រាំងស្វាយ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ក្នុងទុនវិនិយោគប្រមាណ 6 លានដុល្លារអាម៉េរិក និងអាចបង្កើតការងារបានចំនួន 1,741 កន្លែង។

ក្រុមហ៊ុន «XIN YUAN CHENG FACTORY CO., LTD» ៖ គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅផ្លូវលំ ភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 318 កន្លែង។

ក្រុមហ៊ុន XU WEI GARMENT (CAMBODIA) CO., LTD» គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិព្រៃកំបុត សង្កាត់ចោមចៅទីពីរ ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 995 កន្លែង។

March 20, 2023

ស្រីស្អាតវ័យ 24 ឆ្នាំ ក្លាយជាបវរកញ្ញាឯកថៃ ប្រចាំឆ្នាំ 2023

Chonnikarn Supittayaporn អាយុ 24 ឆ្នាំ បានយកឈ្នះលើបេក្ខភាពចំនួន 46 នាក់ មុននឹងបានទទួលមកុដបវរកញ្ញាឯកប្រចាំប្រទេសថៃ ឆ្នាំ 2023។

យោងតាមទំព័រ Pageant Circles បវរកញ្ញាឯកថ្មីរូបនេះមានកម្ពស់ 1.7 ម៉ែត្រ និងទម្ងន់ 50 គីឡូក្រាម។ ស្រីស្អាត Chonnikarn Supittayaporn បានបញ្ចប់ការសិក្សាផ្នែកឱសថសាស្ត្រនៅសាកលវិទ្យាល័យ Chieng Mai។

ក្នុងព្រឹត្តិការណ៍ប្រកួតសម្រស់ Chonnikarn Supittayaporn ត្រូវបានគណៈកម្មការវាយតម្លៃខ្ពស់លើវិញ្ញាសាជាច្រើនមានដូចជា សមត្ថភាពធ្វើបទបង្ហាញ និយាយភាសាអន្តរជាតិ និងមានភាពជឿជាក់ជាដើម។ល។

ស្រីស្អាត Chonnikarn Supittayaporn នឹងឡើងទៅចូលរួមប្រកួត Miss World 2023 ដែលនឹងធ្វើឡើងនៅអេមីរ៉ាត់អារ៉ាប់រួមនៅចុងឆ្នាំនេះ។

មុនពេលចូលរួមប្រកួតដណ្ដើមតំណែងបវរកញ្ញាឯកថៃ Chonnikarn Supittayaporn ធ្លាប់បានចូលរួមកម្មវិធីប្រកួតសម្រស់មួយចំនួន មានជាអាទិ៍ Miss Chiang Mai និង Miss Mobile Thailand។

ព្រឹត្តិការណ៍ប្រលងបវរកញ្ញាឯកថៃត្រូវបានធ្វើឡើងជាលើកដំបូងកាលពីឆ្នាំ 1934 ក្នុងនោះមានបវរកញ្ញាឯកថៃមួយចំនួនធ្លាប់ដណ្ដើមបានពានរង្វាន់អន្តរជាតិ រួមមាន Apasara Hongsakula ដណ្ដើមបានមកុដ Miss Universe 1965, Porntip Nakhirunkanok ដណ្ដើមបានមកុដ Miss Universe 1988៕

March 20, 2023

ចំការផលិតអគ្គិសនីពីកម្លាំងខ្យល់ខ្ពស់ជាងគេលើពិភពលោក

(ប្រទេសចិន) – ក្រោយពីការចាប់ផ្ដើមដំណើរការបានជាងមួយឆ្នាំ ស្ថានីយផលិតអគ្គិសនីដើរដោយកម្លាំងខ្យល់ Comai Trigu នៅទីបេ ដែលដំឡើងនៅលើរយៈកម្ពស់ពី 5,000 ទៅ 5,200 ម៉ែត្រធៀបនឹងផ្ទៃទឹកសមុទ្រ សម្រេចបានជាង 100 គីឡូវ៉ាត់ម៉ោង (kWh) កាលពីសប្ដាហ៍កន្លង។

ដោយសារត្រូវបានដំឡើងនៅលើតំបន់ដែលមានកម្ពស់ពី 5,000 ទៅ 5,200 ម៉ែត្រធៀបនឹងនីវ៉ូទឹកសមុទ្រ Comai Trigu គឺជាស្ថានីយផលិតអគ្គិសនីពីកម្លាំងខ្យល់ខ្ពស់ជាងគេលើពិភពលោក។

ចំការអគ្គិសនី Comai Trigu ដែលស្ថិតនៅក្នុងតំបន់ស្វយ័តទីបេនេះ ចាប់ផ្ដើមផលិតអគ្គិសនីតាំងពីខែធ្នូ 2022 ហើយមកដល់ពេលនេះវាផលិតអគ្គិសនីបានលើសពី 100 លាន kWh លឿនជាងពីរខែធៀបនឹងការរំពឹងទុកកន្លងមក។ ប្រការនេះស្មើនឹងការសន្សំសំចៃធ្យូងថ្មបាន 30,500 តោន និងកាត់បន្ថយការបំភាយឧស្ម័នកាបូនបាន 83,200 តោន។

ចំការអគ្គិសនី Comai Trigu ត្រូវបានដំឡើងនៅលើរយៈកម្ពស់ពី 5,000 ទៅ 5,200 ម៉ែត្រធៀបនឹងផ្ទៃទឹកសមុទ្រ

ចំការអគ្គិសនី Comai Trigu គ្រប់គ្រងដោយក្រុមហ៊ុនចិន China Three Gorges Corporation។ វាគឺជាគម្រោងផលិតអគ្គិសនីពីកម្លាំងខ្យល់ដំបូងដែលត្រូវបានភ្ជាប់ជាមួយនឹងបណ្ដាញអគ្គិសនីកណ្ដាលរបស់ទីបេ ដែលមានកម្លាំងទៅតាមការដំឡើងស្មើនឹង 22 MW (22.000 kW)។

ទិន្នន័យបានបង្ហាញថា អគ្គិសនីផលិតពីកម្លាំងខ្យល់ និងពីថាមពលព្រះអាទិត្យនៅទូទាំងប្រទេសចិននាបច្ចុប្បន្នមានកម្លាំងផលិតសរុបច្រើនជាង 700 លាន kW ក្នុងនោះមាន 120 លាន kW ទើបតែត្រូវបានបន្ថែមកាលពីឆ្នាំមុន៕

March 20, 2023

រឿងទិញដូរកីឡាករបាល់ទាត់ថ្ងៃទី 20 មីនា៖ Messi ចង់ត្រលប់ទៅកាន់ Barcelona

ក្លឹបអនាគតរបស់ Messi ជិតបង្ហាញខ្លួន ឬ Real Madrid ត្រៀមទិញ Harry Kane គឺជាព័ត៌មានស្ដីពី «រឿងទិញដូរកីឡាករបាល់ទាត់» ដែលគួរឱ្យចាប់អារម្មណ៍សម្រាប់ថ្ងៃទី 20 មីនានេះ។

Lionel Messi ចង់ត្រលប់ទៅកាន់ Barcelona

យោងតាមអ្នកយកព័ត៌មាន Joan Fontes កំពូលកីឡាករ Messi បានទទួលការហៅទូរស័ព្ទសុំទោសពីប្រធានក្លឹប Barcelona Joan Laporta។ ប្រការនេះធ្វើឱ្យ M10 ពេញចិត្ត និងកំពុងពិចារណាលើការត្រលប់ទៅកាន់ក្លឹបចាស់មួយនេះ។

ការណ៍ដែលថា Messi ចង់ត្រលប់ទៅកាន់កីឡដ្ឋាន Camp Nou គឺជាអាទិភាពសម្រាប់អនាគតរបស់គាត់។ នេះមិនទាន់និយាយដល់រឿងភរិយា និងកូនៗរបស់ប្រធានក្រុមជម្រើសជាតិអាហ្សង់ទីន ក៏កំពុងត្រេកអរនឹងការត្រលប់ទៅរស់នៅក្នុងតំបន់ Catalunya (អេស្ប៉ាញ)។

Real Madrid កំពុងតាម «ប្រមាញ់» Harry Kane

បើទោះជាមានការសម្រេចចិត្តពន្យារសុពលភាពកិច្ចសន្យាជាមួយខ្សែប្រយុទ្ធ Karim Benzema រហូតដល់រដូវក្ដៅឆ្នាំ 2024 ក្លឹប Real Madrid ត្រូវបានគេជឿថា នៅតែយកចិត្តទុកដាក់ទៅលើកីឡាករជនជាតិអង់គ្លេស Harry Kane របស់ក្លឹប Tottenham (អង់គ្លេស) ដោយបំណងទិញយកមកជំនួយស Karim Benzema។

បច្ចុប្បន្ន Los Blancos (Real Madrid) នៅតែមិនទាន់ធ្វើការស្នើទៅកាន់ Kane ឬ Spurs (Tottenham) ព្រោះថា ពួកគេកំពុងរង់ចាំមើលថា តើខ្សែប្រយុទ្ធជនជាតិអង់គ្លេសខាងលើ ចង់ចាកចេញនៅចុងរដូវកាល ឬអត់។

PSG សម្លឹងមើល Khvicha Kvaratskhelia

យោងតាម Carriere dello Sport ក្លឹប PSG កំពុងត្រៀមចំណាយ 159 លានផោនដើម្បីទិញខ្សែប្រយុទ្ធរបស់ក្លឹប Napoli គឺកីឡាករ Kvaratskhelia។ កិច្ចព្រមពៀងបច្ចុប្បន្នរបស់កីឡាករនេះមានសុពលភាពរហូតដល់ឆ្នាំ 2027 ប៉ុន្តែគាត់រកបានតែ 26,000 ផោនប៉ុណ្ណោះក្នុងមួយសប្ដាហ៍។

គ្រូបង្វឹក Jurgen Klopp «បើកភ្លើងខៀវ» ឱ្យកីឡាករបីរូបចាកចេញពី Liverpool

អ្នកយុទ្ធសាស្ត្រជនជាតិអាល្លឺម៉ង់ Jurgen Klopp កំពុងតែមានបំណងស្ដារខ្សែកណ្ដាលរបស់ខ្លួនឡើងវិញ ដោយការអនុញ្ញាតឱ្យកីឡាករបីរូបចាកចេញនៅក្នុងរដូវក្ដៅឆ្នាំនេះ។ កីឡាករទាំងនេះរួមមាន Naby Keita, Alex Oxlade-Chamberlain និង Arthur Melo៕

March 20, 2023

Author: សឿន សំណាង