សឿន សំណាង - La Reine Media

BMW បញ្ជាក់ពីការផលិតរថយន្តអគ្គិសនីនៅប្រទេសជិតខាងរបស់កម្ពុជា

BMW បានបញ្ជាក់ជាផ្លូវការថា ក្រុមហ៊ុនបុត្រសម្ប័ន្ធរបស់ខ្លួន កំពុងត្រៀមខ្លួនសម្រាប់ការដំឡើងរថយន្តអគ្គិសនីនៅប្រទេសថៃ។

Philippe Parin អនុប្រធានសាជីវកម្ម BMW បានឱ្យដឹងថា រោងចក្រដំឡើងនៅប្រទេសថៃគឺជាមួយក្នុងចំណោមខ្សែច្រវាក់ផលិតកម្មសំខាន់ និងទំនើបបំផុតរបស់ BMW និងផលិតរថយន្តទាំងបីម៉ាកគឺ BMW, Mini និង BMW Motorad។

បច្ចុប្បន្ន រោងចក្រ BMW នៅប្រទេសថៃ កំពុងផលិតរថយន្តម៉ាស៊ីនចំហេះក្នុង និងរថយន្តអគ្គិសនីប្រភេទ PHEV។ បណ្ដាគម្រោងអនាគតរបស់រោងចក្រ BMW នៅប្រទេសថៃ ក៏មានទាំងការផលិតរថយន្តដើរដោយថាមពលអគ្គិសនី 100% ផងដែរ។ ប្រការនេះស្ថិតក្នុងយុទ្ធសាស្ត្រ EV ដែលបានកំណត់គោលដៅលក់រថយន្តអគ្គិសនីឱ្យបាន 50% នៅក្នុងចំណោមរថយន្តសរុបរបស់ BMW នាឆ្នាំ 2030។

ការលក់រថយន្តអគ្គិសនីរបស់ BMW នៅទូទាំងសកលលោកសម្រេចបានជាង 30% ធៀបនឹងប្រាក់ចំណូលសរុបនៅក្នុងឆ្នាំកន្លង។ ឆ្នាំនេះ តួលេខនេះត្រូវបានរំពឹងថានឹងកើនឡើងបន្តទៀត។

រថយន្តអគ្គិសនីម៉ូដែល Countryman របស់ក្រុមហ៊ុន Mini នៃសាជីវកម្ម BMW

កំណែមួយរបស់រថយន្តអគ្គិសនីម៉ូដែល Mini Countryman របស់សាជីវកម្ម BMW ត្រូវបានដំឡើងនៅប្រទេសថៃនាពេលកន្លង។

April 12, 2023

គំនិតស្ដីពីការបង្កើតសមុទ្រទឹកនៅលើសមុទ្រខ្សាច់សាហារ៉ា (Sahara)

ឆ្នាំ 1957 ក្រុមអ្នកវិទ្យាសាស្ត្របានលើកឡើងនូវគំនិតស្ដីពីការបង្កើតសមុទ្រទឹកលើតំបន់ទំនាប Qattara ក្នុងសមុទ្រខ្សាច់សាហារ៉ា ក្នុងនោះមានទាំងការប្រើវិធីបំផ្ទុះគ្រាប់បែកនុយក្លេអែរផងដែរ។

សមុទ្រខ្សាច់សាហារ៉ាគឺជាតំបន់ដែលមានទំហំ 9.2 លានគីឡូម៉ែត្រក្រឡា នៅភាគខាងជើងនៃទ្វីបអាហ្វ្រិក។ ក្នុងប្រវត្តិសាស្ត្រ ធ្លាប់មានគម្រោងជាច្រើនស្ដីពីការធ្វើឱ្យមួយផ្នែករបស់សមុទ្រខ្សាច់សាហារ៉ាលិចក្នុងទឹក ព្រោះថា តំបន់ជាច្រើននៅទីនេះស្ថិតក្រោមនីវ៉ូទឹកសមុទ្រ។ នេះបើយោងតាមទំព័រ IFL Science។

មនុស្សដំបូងគេដែលបានលើកឡើងគំនិតខាងលើគឺវិស្វករជនជាតិស្កុតឡែន Donald McKenzie។ គាត់ស្នើឱ្យបង្កើតព្រែកជីកមួយដែលមានប្រវែង 644 គីឡូម៉ែត្រពីម៉ារ៉ុកទៅកាន់តំបន់ខ្សាច់ El Djouf ធ្វើឱ្យទីនេះក្លាយជាសមុទ្រទឹកសាហារ៉ា។ ឆ្នាំ 1870 ប្រធានក្រុមនាវិក Francois-Elie Roudaire របស់កងទ័ពបារាំង ក៏បានស្នើឱ្យជីកព្រែកប្រវែង 193 គីឡូម៉ែត្រ ដែលតភ្ជាប់សមុទ្រមេឌីទែរ៉ាណេ ទៅនឹងតំបន់បឹងអំបិល Chott el Fejej លើសមុទ្រខ្សាច់សាហារ៉ា នៅភាគខាងត្បូងប្រទេសទុយនីស៊ី ធ្វើឱ្យតំបន់ 4,828 គីឡុម៉ែត្រក្រឡាត្រូវលិចក្នុងទឹក។

គំនិតខាងលើទទួលបានការគាំទ្ររបស់ Ferdinand de Lesseps អ្នកការទូតបារាំងដែលបានដឹកនាំការជីកព្រែក Suez។ ការចំណាយដើម្បីអនុវត្តគំនិតនេះ កាលណោះគឺប្រហែល 25 លានហ្វ្រង់ (4.2 លានដុល្លារអាម៉េរិក)។ ក៏ប៉ុន្តែ ការស្រាវជ្រាវមួយចំនួនបានរកឃើញថា តំបន់ខាងលើមិនស្ថិតក្រោមនីវ៉ូទឹកសមុទ្រពិតប្រាកដនោះទេ ហើយការចំណាយក៏កើនឡើង ធ្វើឱ្យគំនិតនេះមិនអាចក្លាយជាការពិត។

ផែនការមួយផ្សេងទៀតដែលទាក់ទងនឹងការនាំសមុទ្រទឹកទៅកាន់សមុទ្រខ្សាច់សាហារ៉ា ត្រូវបានលើកឡើងនៅអេហ្ស៊ីប។ គម្រោង Plowshare គឺជាគំនិតរបស់គណៈកម្មការថាមពលអាតូមិកអាម៉េរិក។ ក្រុមអ្នកវិទ្យាសាស្ត្រគិតឃើញថា ត្រូវការបំផ្ទុះគ្រាប់បែកនុយក្លេអែរចំនួន 213 គ្រាប់ដើម្បីបង្កើតជាព្រែកដែលមានជម្រៅទាបជាងនីវ៉ូទឹកសមុទ្រ 60 ម៉ែត្រ នៅតំបន់ទំនាប Qattara ។ ប៉ុន្តែ កិច្ចព្រមព្រៀងអន្តរជាតិមួយចំនួនហាមឃាត់ការបំផ្ទុះគ្រាប់បែកនុយក្លេអែរ ហើយគម្រោង Plowshare ក៏ត្រូវបានលុបចោលកាលពីឆ្នាំ 1977។

ថ្មីៗនេះ ក្នុងឆ្នាំ 2018 ក្រុមហ៊ុនមួយនៅជ្រលង Silicon ដែលមានឈ្មោះថា Y Combinator បានលើកឡើងនូវគំនិតដែលជួយទប់ទល់នឹងបាតុភូតកើនឡើងកម្ដៅរបស់ផែនដី ដោយការធ្វើឱ្យតំបន់សមុទ្រខ្សាច់ Algodones នៅ California ស្ថិតក្នុងទឹក។ គម្រោងរបស់ពួកគេគឺការបង្កើតបឹងទឹកដែលមានទំហំ 0.4 ហិកតាចំនួនរាប់លាន ដើម្បីដាំសារាយដែលមានតួនាទីដូចទៅនឹងអាងស្រូបយកកាបូន។ ក៏ប៉ុន្តែ ដោយសារតែការចំណាយឡើងដល់ 50 ទ្រីលានដុល្លារអាម៉េរិក គម្រោងនេះក៏នៅតែមិនទាន់ត្រូវបានអនុវត្ត៕

April 12, 2023

Haaland បំបែកកំណត់ត្រារបស់ Ronaldo និង Salah ក្លាយជា «ស្ដេចកម្ទេចទី»

ខ្សែប្រយុទ្ធ Erling Haaland (ក្លឹប Man City) បានក្លាយជាកំពូលថ្វីជើងដែលប្រកួតនៅអង់គ្លេសឆ្នើមបំផុតក្នុងមួយរដូវកាល បន្ទាប់ពីបានស៊ុតបញ្ចូលទីរបស់ Bayern Munich។

កីឡាករន័រវែស កើតឆ្នាំ 2000 Haaland រកបានគ្រាប់បាល់នៅក្នុងជ័យជម្នះ 3-0 របស់ Man City ទៅលើ Bayern Munich ក្នុងវគ្គ ¼ នៃជើងទីពីរនៅពានរង្វាន់ជើងឯកបណ្ដាក្លឹបនៅអឺរ៉ុប (UEFA Champions League) 2022-2023។ នៅនាទីទី 76 បន្ទាប់ពីការតែតបញ្ជូនបាល់របស់ Stones កីឡាករ Haaland ក៏ទទួលបានបាល់ ហើយស៊ុតបញ្ចូលទីបានជោគជ័យ ជួយឱ្យ Man City ឈ្នះ 3-0។

នេះគឺជាគ្រាប់បាល់ទី 45 ដែល Haaland រកបាននៅគ្រប់ការប្រកួតក្នុងរដូវកាល 2022-2023 នាំឱ្យជើងខ្លាំងរូបនេះក្លាយជាកីឡាករឆ្នើមជាងគេបង្អស់ក្នុងមួយរដូវកាល។

នៅមុន Haaland ខ្សែប្រយុទ្ធមួយចំនួន មានដូចជា Mohamed Salah (Liverpool ក្នុងរដូវកាល 2017-2018) និង Ruud van Nisterooy (Man United ក្នុងរដូវកាល 2002-2003) រកបាន 44 គ្រាប់នៅក្នុងការប្រកួត ពេលលេងឱ្យបណ្ដាក្លឹបនៅអង់គ្លេស។ ក្រៅពីនេះ Cristiano Ronaldo (Man United រដូវកាល 2007-2007) ក៏ធ្លាប់រកបាន 42 គ្រាប់ ក្រោយទាត់បាន 46 ប្រកួតដោយមិនលេងក្នុងខ្សែប្រយុទ្ធ។

ខ្សែប្រយុទ្ធ Erling Haaland បំបែកកំណត់ត្រាជាបន្តបន្ទាប់ នៅ UEFA Champions League និងលីគកំពូលអង់គ្លេស

ក្នុងចំណោម 45 គ្រាប់ដែលអតីតខ្សែប្រយុទ្ធរបស់ Dortmund រកបាន មាន 30 គ្រាប់នៅឯពានរង្វាន់លីគកំពូលអង់គ្លេស, 11 គ្រាប់នៅឯ UEFA Champions League, 3 គ្រាប់នៅឯ FA Cup និង 1 គ្រាប់នៅ League Cup។ Erling Haaland កំពុងនាំមុខគេនៅក្នុងបញ្ជីចំណាត់ថ្នាក់កីឡាករស៊ុតបញ្ចូលទីបានច្រើនជាងគេ ទាំងនៅក្នុងលីគកំពូលអង់គ្លេស ទាំងនៅ UEFA Champions League។

45 គ្រាប់នេះត្រូវបាន Haaland រកបាននៅក្នុង 39 ប្រកួត ហើយគាត់នៅសល់យ៉ាងតិច 10 ប្រកួតទៀតដែលអាចបង្កើនចំនួនគ្រាប់បាល់ឈ្នះរបស់ខ្លួន។

ក្លឹប Man City របស់ Haaland បច្ចុប្បន្ននៅមានឱកាសក្នុងការដណ្ដើមបានតំណែងជើងឯកនៅលីគកំពូលអង់គ្លេស, UEFA Champions League និង FA Cup៕

April 12, 2023

U-22 ឡាវ ហៅកំពូលកីឡាករបីនាក់កំពុងទាត់នៅបរទេស ឱ្យមកត្រៀមសម្រាប់ស៊ីហ្គេម

គ្រូបង្វឹកក្រុមបាល់ទាត់បុរសជម្រើសជាតិអាយុក្រោម 22 ឆ្នាំរបស់ប្រទេសឡាវ (U-22 ឡាវ) បានហៅកីឡាករចំនួន 25 នាក់ ឱ្យមកត្រៀមខ្លួនសម្រាប់ចូលប្រកួតស៊ីហ្គេមនៅកម្ពុជា ក្នុងនោះមានកំពូលកីឡាករបីនាក់ដែលកំពុងប្រកួតនៅប្រទេសបារាំង អាល្លឺម៉ង់ និងសហរដ្ឋអាម៉េរិក។

យោងតាមសហព័ន្ធកីឡាបាល់ទាត់ឡាវ (LFF) គ្រូបង្វឹក Michael Weiss របស់ U-22 ឡាវ ថ្មីៗនេះបានប្រកាសបញ្ជីឈ្មោះកីឡាករ 25 នាក់ ដែលនឹងត្រូវចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 (ស៊ីហ្គេមលើកទី 32) ដែលនឹងធ្វើឡើងនៅកម្ពុជា ចាប់ពីថ្ងៃទី 29 មេសាខាងមុខ។

អ្វីដែលគួរឱ្យចាប់អារម្មណ៍នោះគឺថា ក្នុងចំណោមកីឡាករខ្លាំងៗចំនួន 25 នាក់នោះ មានកីឡាករបីនាក់កំពុងទាត់ឱ្យក្លឹបនៅប្រទេសបារាំង អាល្លឺម៉ង់ និងសហរដ្ឋអាម៉េរិក រួមមាន ខ្សែការពារ Theo Klein, ខ្សែបម្រើ Roman Angot និងខ្សែប្រយុទ្ធ Victor Yovinasak។

ក្នុងចំណោមកីឡាខ្លាំងៗទាំងបីនាក់ខាងលើ ខ្សែការពារ Theo Klein ដែលជាកូនកាត់ឡាវ-អាម៉េរិក កំពុងទាត់ឱ្យក្លឹបរបស់អាម៉េរិក ត្រូវបានគេចាប់អារម្មណ៍ខ្លាំង។

លំដាប់ទីពីរគឺជាខ្សែបម្រើ Roman Angot ដែលជាកីឡាករឡាវដើមកំណើតបារាំង និងត្រូវបានបណ្ដុះបណ្ដាលក្នុងបរិស្ថានបាល់ទាត់អាជីពតាំងពីក្មេង។ Angot កំពុងលេងឱ្យក្លឹប Bahlinger នៅអាល្លឺម៉ង់។

ចុងក្រោយគឺកីឡាករខ្សែប្រយុទ្ធ Victor Yovinasak ដែលកំពុងទាត់ឱ្យក្រុម Montceau នៅឯពានរង្វាន់លំដាប់ទីបួននៅប្រទេសបារាំង។

គេអាចនិយាយបានថា កំពូលកីឡាករទាំងបីនាក់ខាងលើ ទំនងជាអាចជួយឱ្យ U-22 ឡាវ ធ្វើឱ្យមានការភ្ញាក់ផ្អើលនៅស៊ីហ្គេមលើកនេះ ពិសេសគឺក្នុងពូល B ដែលមាន ថៃ វៀតណាម ម៉ាឡេស៊ី និងសិង្ហបុរី។

ក្រៅពីកីឡាករខាងលើ ឡាវក៏នៅមានខ្សែប្រយុទ្ធដើមកំណើតឡាវ Peeter Phanthavong ដែលត្រូវបានវាយតម្លៃថាជាជើងខ្លាំងមួយរូបរបស់ U-22 ឡាវផងដែរ។ កីឡាកររូបនេះ បច្ចុប្បន្នទាត់ឱ្យក្លឹប Ezra នៅពានរង្វាន់ជើងឯកថ្នាក់ជាតិឡាវ។

ក្រុម U-22 ឡាវ បានទៅកាន់អារ៉ាប៊ីសាអូឌីតដើម្បីហ្វឹកហាត់កាលពីថ្ងៃទី 11 មេសា។ បន្ទាប់មក ពួកគេនឹងមានវត្តមាននៅរាជធានីភ្នំពេញនៅថ្ងៃទី 25 មេសា ដើម្បីចូលរួមប្រកួតនៅស៊ីហ្គេម។ យោងតាមកាលបរិច្ឆេទ U-22 ឡាវនឹងប៉ះវៀតណាមនៅក្នុងការប្រកួតដំបូងនាថ្ងៃទី 30 មេសា នៅឯកីឡដ្ឋានព្រីសន៍៕

April 12, 2023

ផ្ទុះភ្នំភ្លើងនៅរុស្ស៊ី ផេះធូលីប៉ើងដល់កម្ពស់ 20 គីឡូម៉ែត្រ

ភ្នំភ្លើងនៅតំបន់ចុងបូព៌ារបស់រុស្ស៊ីបានផ្ទុះឡើង បំប៉ើងផេះធូលីពេញផ្ទៃមេឃ ធ្វើឱ្យក្រុមមន្ត្រីប្រកាសអាសន្នកម្រិតក្រហមចំពោះវិស័យអាកាសចរណ៍។

ភ្នំភ្លើង Shiveluch បានផ្ទុះឡើងនៅពាក់កណ្ដាលយប់ និងឈានដល់ចំណុចកំពូលបន្ទាប់ពីផ្ទុះបាន 6 ម៉ោង បង្កើតបានជាពពកផេះធូលីគ្របដណ្ដប់លើផ្ទៃមេឃប្រមាណ 108,000 គូឡូម៉ែត្រក្រឡានៅពីលើឧបទ្វីប Kamchatka ស្ថិតក្នុងតំបន់ចុងបូព៌ារបស់រុស្ស៊ីកាលពីថ្ងៃទី 11 មេសា។

យោងតាមស្ថាប័នមានសមត្ថកិច្ច ហេតុការណ៍ផ្ទុះភ្នំភ្លើងនេះបានបណ្ដាលឱ្យបណ្ដាភូមិឋាននៅជុំវិញត្រូវគ្របដណ្ដប់ដោយផេះធូលីកម្រាស់ 8.5 សង់ទីម៉ែត្រ ក្រាស់បំផុតក្នុងរង្វង់ 60 ឆ្នាំមកនេះ។

ភ្នំភ្លើង Shiveluch គឺជាមួយក្នុងចំណោមភ្នំភ្លើងធំជាងគេ និងមានសកម្មភាពខ្លាំងក្លាបំផុតនៅ Kamchatk។ សមត្ថកិច្ចនិយាយថា កម្អែភ្នំភ្លើងនឹងមិនហូរចូលភូមិក្នុងតំបន់ក្បែរខាង ប៉ុន្តែអាចនឹងមានពពកផេះធូលីធំៗបន្តទៀត។ បច្ចុប្បន្ន មិនទាន់មានរបាយការណ៍ស្ដីពីករណីស្លាប់ដោយសារបន្ទុះភ្នំភ្លើងនេះនៅឡើយ។

https://www.youtube.com/watch?v=ibvprb_o4Dg

April 12, 2023

ម៉ូដសម្លៀកបំពាក់បញ្ច្រាសពីមុខទៅក្រោយកំពុងត្រូវបាន «សាបព្រោះ» ឡើងវិញ

ការស្លៀកពាក់ខោអាវបញ្ច្រាសពីមុខមកក្រោយ បច្ចុប្បន្នត្រូវបានក្រុមហ៊ុនច្នៃម៉ូដសម្លៀកបំពាក់ជាច្រើនក្នុងពិភពលោកយកមកឡង់សេ។

ក្នុងអតីតកាល Elsa Shiaparelli, John Galliano, Karl Lagerfeld, Kris Kross ធ្លាប់ច្នៃម៉ូដសម្លៀកបំពាក់បញ្ច្រាសនេះនៅក្នុងអាល់ប៊ុមរបស់ពួកគេក្នុងទសវត្សរ៍ឆ្នាំ 1930 និង 1990។

យោងតាម Vogue ម៉ូដបែបនេះបង្ហាញពីភាពសប្បាយរីករាយនៅក្នុងពេលដែលពិភពលោកស្ថិតក្នុងភាពច្របូកច្របល់ និងលុបបំបាត់គោលការណ៍បុរាណនៅក្នុងការស្លៀកពាក់។

សូមទស្សនាកម្រងរូបថតស្ដីពីម៉ូដសម្លៀកបំពាក់បញ្ច្រាសពីមុខមកក្រោយដូចមាននៅខាងក្រោម៖

April 11, 2023

មូលហេតុដែលជួយឱ្យ Barcelona អាចក្លាយជា «គ្រួសារថ្មី» របស់ Messi

ការប្រព្រឹត្តខុសគ្នារវាងអ្នកគាំទ្ររបស់ក្លឹប Barcelona និង Paris Saint-Germain (PSG) ចំពោះ Lionel Messi បង្ហាញច្បាស់អំពីមូលហេតុដែលថា Camp Nou ទើបជាផ្ទះពិតប្រាកដរបស់ El Pulga។

នៅក្នុងស្ថានភាពដែលកិច្ចព្រមព្រៀងរវាង Messi និង PGS នឹងត្រូវអស់សុពលភាពនៅត្រឹមខែមិថុនា 2023 ខាងមុខ Barcelona ត្រូវបានគេមើលឃើញថា កំពុងប្រឹងប្រែងដើម្បីនាំយកកំពូលតារាបាល់ទាត់ជនជាតិអាហ្សង់ទីន ត្រលប់ទៅកាន់កីឡដ្ឋាន Camp Nou របស់អេស្ប៉ាញ។

អ្នកគាំទ្រក្លឹបបាល់ទាត់នៅអេស្ប៉ាញមានការសប្បាយរីករាយជាខ្លាំងចំពោះព័ត៌មានខាងលើ ហើយពួកគេក៏តែងតែបង្ហាញសកម្មភាពបញ្ជាក់ពីសមានចិត្តចំពោះ Messi និងចង់ឃើញ El Pulga ប្រកួតក្នុងពណ៌អាវរបស់ Barcelona ជាថ្មី។

បច្ចុប្បន្ន Messi កំពុងប្រឈមនឹងបញ្ហាលំបាកជាច្រើននៅ PSG ។ បន្ទាប់ពីក្រុមបាល់ទាត់របស់ក្លឹបនេះត្រូវបានជម្រុះពីវគ្គ 1/8 នៅ Champions League អ្នកគាំទ្រមួយចំនួនរបស់ PSG បានទម្លាក់កំហុស និងការទទួលខុសត្រូវទាំងឡាយទៅលើ Messi។ ពួកគេថែមទាំងនាំគ្នាស្រែកចំអកឱ្យ El Pulga ជាច្រើនលើកនៅពេលខ្សែប្រយុទ្ធកើតឆ្នាំ 1987 រូបនេះចូលប្រកួតម្ដងៗ។

បើទោះជា Messi ជោគជ័យ ឬបរាជ័យ អ្នកគាំទ្ររបស់ Barcelona នៅតែលើកទឹកចិត្ត និងបង្ហាញពីសមានចិត្តល្អចំពោះ M10

គេអាចមើលឃើញថា ខុសពីអ្នកគាំទ្ររបស់ PGS អ្នកគាំទ្ររបស់ Barcelona បើទោះជា Messi ជោគជ័យ ឬបរាជ័យ ក៏ពួកគេនៅតែលើកទឹកចិត្តដល់កំពូលតារាបាល់ទាត់ជនជាតិអាហ្សង់ទីនរូបនេះដដែល ព្រោះពួកគេធ្លាប់បាននៅជាមួយគ្នាអស់កាលជាយូរ។

April 11, 2023

រថយន្តអគ្គិសនីប្រភេទប្រណិតរបស់ចិន ចេះរាំ និងអាចបរដោយកង់បី

ក្រុមហ៊ុន BYD នឹងដាក់បង្ហាញរថយន្តអគ្គិសនីប្រណិត U9 ចាប់ពីថ្ងៃទី 18 មេសា ក្រោមយីហោបុត្រសម្ព័ន្ធ Yangwang។ អ្នកនឹងបានឃើញថា រថយន្តអគ្គិសនីនេះពិតជាចេះរាំចុះឡើង។

មួយសប្ដាហ៍មុនពិព័រណ៍រថយន្តនៅ Shanghai ក្រុមហ៊ុនចិន BYD បានចាប់ផ្ដើមបង្ហាញ Yangwang U9 នៅក្នុងព្រឹត្តិការណ៍បង្ហាញបច្ចេកវិទ្យា ដែលណែនាំអំពីប្រព័ន្ធគ្រប់គ្រងដងខ្លួនរថយន្តបែបឆ្លាតវៃដែលត្រូវបានហៅថា DiSus។ បច្ចេកវិទ្យាថ្មីបំផុតរបស់ BYD ត្រូវបានបង្ហាញនៅលើបណ្ដារថយន្តអគ្គិសនីដែលជិតត្រូវបានបង្ហាញខ្លួនក្រោមផ្លាកក្រុមហ៊ុនបុត្រសម្ព័ន្ធ Yangwang ដែលត្រូវបានណែនាំលើកដំបូងកាលពីដើមខែមករា 2023។

ក្នុងពិធីធ្វើបទបង្ហាញនោះ BYD បានបង្ហើបឱ្យដឹងអំពីថ្នាលបច្ចេកវិទ្យា e4 របស់ខ្លួន ដែលត្រូវបានបំពាក់លើ SUV Yangwang U8 និងជិតបង្ហាញវត្តមានក្នុងទីផ្សារ។

ប្រព័ន្ធគ្រប់គ្រងដងខ្លួនថ្មីរបស់ BYD គឺ DiSus-X ដែលបំពាក់លើរថយន្តអគ្គិសនី Yangwang U9 អនុញ្ញាតឱ្យរថយន្តរាំ ប្ដូរកម្ពស់ និងអាចលោតឡើងផុតពីដី។ ជាងនេះ Yangwang U9 ក៏អាចបរនៅលើកង់ចំនួនបីផងដែរ។

រថយន្តអគ្គិសនីប្រណិតដែលជិតត្រូវបានដាក់បង្ហាញជាផ្លូវការនេះមានម៉ូទ័រអគ្គិសនីចំនួនបួនគ្រឿង អាចបង្កើនល្បឿនពី 0-100 គីឡូម៉ែត្រ/ម៉ោងដោយប្រើពេលពីរវិនាទី និងមានតម្លៃចាប់ពីប្រហែល 150,000 ដុល្លារអាម៉េរិក៕

April 11, 2023

ឈិន ឡុង និយាយថា «ជំនាន់របស់ខ្ញុំបានកន្លងផុតទៅហើយ»

ឈិន ឡុង (Jackie Chan) ដែលជាកំពូលតារាសម្ដែងភាពយន្តហុងកុងដ៏ល្បីឈ្មោះ បាននិយាយថា បច្ចុប្បន្នលែងមានអ្នកណាព្រមសម្ដែងឈុតគ្រោះថ្នាក់ដូចកាលជំនាន់របស់គាត់ទៀតហើយ។

យោងតាមទំព័រ Sohu ចុះផ្សាយកាលពីថ្ងៃទី 10 មេសា ប៉ុន្មានថ្ងៃកន្លងទៅ កំពូលតារាភាពយន្តហុងកុងវ័យ 69 ឆ្នាំ លោក ឈិន ឡុង បានចូលរួមព្រឹត្តិការណ៍ផ្សព្វផ្សាយខ្សែភាពយន្តថ្មី «ម្ចាស់សេះចិត្តសឿង» (Ride On)។ លោក ឈិន ឡុង សម្ដែងជាតួអង្គ Lao Luo ជាអ្នកគុននិយមជើងចាស់ដែលមានបញ្ហាច្រើនជាមួយនឹងកូនស្រី Xiaobao (សម្ដែងដោយ Liu Haocun)។

នៅក្នុងពិធីចួបជុំទស្សនិកជន លោក ឈិន ឡុង បានរម្លឹកអំពីសម្ដីដែល Xiaobao និយាយជាមួយ Lao Luo ៖ «ជំនាន់របស់ពុកបានកន្លងផុតទៅហើយ»។ តារាវ័យ 69 ឆ្នាំឱ្យដឹងថា សម្ដីដែល Xiaobao និយាយក៏ត្រឹមត្រូវ បើពិនិត្យក្នុងវិស័យភាពយន្តបច្ចុប្បន្ន។

ភាពយន្តថ្មីរឿង «ម្ចាស់សេះចិត្តសឿង» ដែលដឹកនាំសម្ដែងដោយ Yang Larry ត្រូវបានចាត់ទុកថាជាស្នាដៃស្ដីពីអាជីពរបស់លោក ឈិន ឡុង ហើយក៏ជាការដឹងគុណចំពោះក្រុមអ្នកគុននិយមដែលជំនាញខាងសម្ដែងឈុតឆាកគ្រោះថ្នាក់ក្នុងភាពយន្តហុងកុង។ «ម្ចាស់សេះចិត្តសឿង» មានឈុតខ្លះរម្លឹកអំពីខ្សែភាពយន្តមួយចំនួនដែលបានជួយឱ្យលោក ឈិន ឡុង មានឈ្មោះល្បី មានដូចជារឿង «ខ្ញុំជាអ្នកណា», «កំពូលក្បាច់ស្រវឹង – វគ្គ II», «ផែនការ A»។ល។

អ្នកផ្ដល់មតិយល់ថា តាមរយៈឈុតឆាកមួយចំនួននៅក្នុងភាពយន្តរឿង «ម្ចាស់សេះចិត្តសឿង» ឈិន ឡុង ព្រមទទួលយកការផ្លាស់ប្ដូរនៃសម័យកាល។ ឧទាហរណ៍ ក្នុងឈុតឆាក Lao Luo មានឱកាសត្រលប់មកកាន់កន្លែងថតកុនដើម្បីសម្ដែងឈុតឆាកគ្រោះថ្នាក់ដោយមិនព្រមប្រើប្រាស់កម្មវិធីកាត់តវីដេអូបែបទំនើប តែលោកប្ដេជ្ញាប្រើប្រាស់សេះដើម្បីសម្ដែងឈុតលោតពីជណ្ដើរ។ ក៏ប៉ុន្តែ បន្ទាប់ពីបានពិចារណាមួយស្របក់ Lao Luo ក៏បញ្ជាសេះឱ្យឈប់ និងបោះបង់ការថតឈុតគ្រោះថ្នាក់នេះ ដោយទុកឱ្យក្រុមអ្នកកាត់តវីដេអូជាអ្នកធ្វើជំនួស។

ឈុតសំខាន់ៗរបស់ភាពយន្តរឿង «ម្ចាស់សេះចិត្តសឿង»

លោក ឈិន ឡុង និយាយថា លោក និងក្រុមអ្នកថតឈុតគ្រោះថ្នាក់ធ្លាប់ផ្សងគ្រោះថ្នាក់នៅកន្លែងថត តាំងពីការលោតពីអគារមួយទៅអគារមួយ លោតពីរថយន្តកំពុងបរ ដាល់ទម្លុះកញ្ចក់ លោតពីភ្នំឡើងឧទ្ធម្ភាគចក្រជាដើម ដែលឈុតទាំងនេះត្រូវបានបញ្ចូលទាំងដុលទៅក្នុងខ្សែភាពយន្តដោយមិនឆ្លងកាត់ការកាត់តវីដេអូអ្វីទាំងអស់។ លោក ឈិន ឡុង ថ្លែងថា «ជំនាន់នោះ ពួកយើងមិនបានចាត់ទុកខ្លួនឯងថាជាមនុស្សនោះទេ…។ ប៉ុន្តែបច្ចុប្បន្ន បរិស្ថានធ្វើការបានប្រែប្រួលហើយ។ ទោះជាអ្នកសម្ដែងចង់ប្រថុយជីវិតក៏អ្នកដឹកនាំឈុតក្បាច់គុនមិនអនុញ្ញាត ព្រោះថា ពេលអ្នកសម្ដែងរងរបួស ក្រុមការងារទាំងមូលក៏ត្រូវផ្អាកការថត»។

យោងតាមលោក ឈិន ឡុង ការប្រថុយគ្រោះថ្នាក់លែងនៅជាកត្តាចាំបាច់ដែលត្រូវមានរបស់អ្នកសម្ដែងទៀតហើយ ភាពយន្តក្បាច់គុនក៏លែងជាប្រភេទដែលមានអ្នកគាំទ្រច្រើនជាងគេទៀតដែរ។

ឈុតផ្សងគ្រោះថ្នាក់មួយចំនួនរបស់លោក លោក ឈិន ឡុង

ទោះជាយ៉ាងណាក៏ដោយ លោក ឈិន ឡុង នៅតែមានតំណែងសំខាន់ក្នុងប្រវត្តិសាស្ត្ររបស់វិស័យភាពយន្តចិន និងអន្តរជាតិ។ ឈានចូលដល់វ័យ 70 ឆ្នាំ ការចូលចិត្តថតកុនរបស់លោកនៅតែមិនថមថយ។ ការថតកុនគឺជាពេលដែលលោកសប្បាយបំផុត។ លោកសង្ឃឹមថា ជារៀងរាល់ឆ្នាំ លោកអាចថតបានមួយរឿង។ គម្រោងភាពយន្តបន្ទាប់របស់លោក ឈិន ឡុង រួមមាន «The Myth វគ្គពីរ», «ថ្វីដៃប៉ូលីសថ្មី ឈិនឡុង វគ្គពីរ» (New Police Story II) និងរឿង «Chinese Zodiac វគ្គពីរ»។ល។

April 11, 2023

មិនទាន់ប្រកួតផង ក្រុមបាល់ទះកម្ពុជាត្រូវហ្វ៊ីលីពីនធ្វើឱ្យ «របូតឱកាស» ទៅពាក់កណ្ដាលផ្ដាច់ព្រ័ត្រនៅស៊ីហ្គេម

ពីបញ្ហាភ្លេចចុះឈ្មោះចូលរួមប្រកួតវិញ្ញាសាបាល់ទះបុរសក្នុងព្រឹត្តិការណ៍ស៊ីហ្គេមលើកទី 32 ក្រុមហ្វ៊ីលីពីនមិនត្រឹមតែធ្វើឱ្យការប្រកួតត្រូវលុបចោលនោះទេ តែក៏ធ្វើឱ្យកម្ពុជាបាត់បង់ឱកាសឡើងដល់វគ្គពាក់កណ្ដាលផ្ដាច់ព្រ័ត្រផងដែរ។

នៅស៊ីហ្គេមលើកទី 32 វិញ្ញាសាបាល់ទះក្នុងផ្ទះបុរស និងនារី បានកំណត់ថ្ងៃប្រកួតដែលចាប់ផ្ដើមពីថ្ងៃទី 03 ឧសភា ដល់ 14 ឧសភា នៅឯទីលានប្រកួតក្នុងពហុកីឡដ្ឋានជាតិអូឡាំពិកកម្ពុជា។ កាលពីថ្ងៃទី 05 មេសា គណៈកម្មការរៀបចំការប្រកួតបានស្រង់ចំនួនក្រុមដែលនឹងចូលរួម និងចាប់ឆ្នោតចែកពូល។

នៅពេលគ្រប់យ៉ាងដំណើរការដោយរលូត ភាគីហ្វ៊ីលីពីនបែរជាភ្លេចចុះឈ្មោះទៅវិញ។ សំណាងល្អ កម្ពុជាបានយល់ព្រមឱ្យចូលប្រកួត ប៉ុន្តែត្រូវអមជាមួយនឹងការយល់ព្រមរបស់គណៈកម្មការចំនួនប្រាំងនៅអូឡាំពិក។

បន្ទាប់មក បញ្ហាមួយផ្សេងទៀតបានកើតឡើងក្រោយពីហ្វ៊ីលីពីនមានឈ្មោះក្នុងបញ្ជី ដោយសារការចាប់ឆ្នោតថ្មីមួយអាចនឹងត្រូវបានធ្វើឡើង។ មុននោះ កម្ពុជាស្ថិតក្នុងពូលជាមួយនឹងជើងឯកឥណ្ឌូណេស៊ី និងសិង្ហបុរី ដូច្នេះ ឱ្យតែពួកគេអាចឈ្នះសិង្ហបុរីគឺនឹងឡើងដល់វគ្គពាក់កណ្ដាលផ្ដាច់ព្រ័ត្រ។

ក្នុងករណីមិនចាប់ឆ្នោតឡើងវិញ ឱកាសឡើងដល់វគ្គពាក់កណ្ដាលផ្ដាច់ព្រ័ត្ររបស់កម្ពុជានឹងនៅសល់តែពាក់កណ្ដាលប៉ុណ្ណោះ។ ប៉ុន្តែបើសិនចាប់ឆ្នោតឡើងវិញ កម្ពុជានឹងបាត់បង់ឱកាសដំបូង ហើយត្រូវរង់ចាំការកំណត់គូប្រកួត។

ឆ្នាំនេះ ក្រុមបាល់ទះបុរសជម្រើសជាតិកម្ពុជា ដាក់គោលដៅដណ្ដើមឱ្យបានមេដាយមាស។ ក៏ប៉ុន្តែ នោះគឺជាគោលដៅខ្ពស់បំផុតដែលសហព័ន្ធកីឡាបាល់ទះកម្ពុជា និងកីឡាករដាក់ចេញប៉ុណ្ណោះ។ ជាក់ស្ដែង ឱ្យតែការពារមេដាយសំរឹទ្ធរបស់ខ្លួនគឺចាត់ទុកថាបានសម្រេចភារកិច្ច៕

April 11, 2023

Author: សឿន សំណាង