សឿន សំណាង - La Reine Media

កម្ពុជាមិនគិតថ្លៃហូបចុក ស្នាក់នៅ និងធ្វើដំណើររបស់ក្រុមកីឡាចូលរួមស៊ីហ្គេមលើកទី 32

ម្ចាស់ផ្ទះកម្ពុជាបានសម្រេចមិនគិតថ្លៃហូបចុក ស្នាក់នៅ និងធ្វើដំណើររបស់ក្រុមកីឡានៃបណ្ដាប្រទេសចូលរួមព្រឹត្តិការណ៍ស៊ីហ្គេមលើកទី 32 ដែលតាមគម្រោងនឹងមានសមាជិកប្រមាណ 12,000 នាក់។

«ប្រតិភូកីឡាទាំង 11 ក្រុងដែលចូលរួមនឹងមិនត្រូវបានគិតថ្លៃអ្វីទាំងអស់ដែលទាក់ទងនឹងការហូបចុក ការស្នាក់នៅ និងការធ្វើដំណើរ» នេះបើតាមគណៈកម្មការរៀបចំព្រឹត្តិការណ៍ស៊ីហ្គេមលើកទី 32 (32^nd SEA Games)។

ការមិនគិតថ្លៃខាងលើនេះរាប់បញ្ចូលទាំងប្រតិភូកីឡាដែលស្នាក់នៅក្នុងសណ្ឋាគារខាងក្រៅភូមិកីឡានៅក្នុងអំឡុងពេលចូលរួមព្រឹត្តិការណ៍ស៊ីហ្គេមផងដែរ។

ក្រៅពីនេះ កម្ពុជាក៏សម្រេចមិនយកថ្លៃសំបុត្រចូលទស្សនាការប្រកួតកីឡានៅស៊ីហ្គេមលើននេះ។ បណ្ដាទីភ្នាក់ងារសារព័ត៌មានក្នុងតំបន់ក៏មិនត្រូវបង់ថ្លៃសម្រាប់ការផ្សាយបន្តផ្ទាល់តាមទូរទស្សន៍។ ប្រកាសនេះត្រូវបានផ្សាយនៅលើគេហទំព័រផ្លូវការរបស់ 32^nd SEA Games ។

យោងតាមប្រភពព័ត៌មាន ស៊ីហ្គេមលើកទី 32 នឹងត្រូវបានធ្វើឡើងនៅកម្ពុជាចាប់ពីថ្ងៃទី 05 ឧសភា ដល់ 17 ឧសភា ឆ្នាំ 2023។ នេះគឺជាលើកដំបូងដែលកម្ពុជាទទួលធ្វើជាម្ចាស់ផ្ទះនៃព្រឹត្តិការណ៍ប្រកួតកីឡាអាស៊ីអាគ្នេយ៍។ តាមគម្រោង ស៊ីហ្គេមលើកនេះនឹងមានសមាជិកចូលរួមប្រមាណ 12,000 នាក់ មកពីបណ្ដាប្រទេសក្នុងតំបន់អាស៊ីអាគ្នេយ៍។

នៅមុនការសម្រេចចិត្តមិនយកថ្លៃ សេវាហូបចុក ស្នាក់នៅដែលកម្ពុជាគ្រោងនឹងយកពីបណ្ដាក្រុមប្រតិភូកីឡាដែលចូលរួមព្រឹត្តិការណ៍ស៊ីហ្គេម គឺ 50 ដុល្លារអាម៉េរិក/ថ្ងៃ/ម្នាក់។ ដូច្នេះ តាមការគណនា ម្ចាស់កម្ពុជានឹងត្រូវចំណាយប្រាក់ប្រមាណ 600,000 ដុល្លារអាម៉េរិក/ថ្ងៃ ឬប្រហែលនឹង 7.8 លានដុល្លារអាម៉េរិក ក្នុងរយៈពេល 13 ថ្ងៃនៃព្រឹត្តិការណ៍នេះ ក្នុងនោះ ប្រហែល 3.5 លានដុល្លារសម្រាប់ថ្លៃស្នាក់នៅ និងហូបចុក៕

April 19, 2023

ស្អែកនេះអាចទស្សនាបាតុភូត «សូរ្យគ្រាសកូនកាត់» ដែលកម្រកើតមាន

នៅពេលកើតមានបាតុភូតសូរ្យគ្រាសកូនកាត់ ព្រះអាទិត្យនឹងមាន «រូបរាងពីរ» ផ្សេងគ្នានៅពេលមើលពីតំបន់ផ្សេងគ្នានៅលើផែនដី។

សូរ្យគ្រាសនៅថ្ងៃទី 20 មេសា 2023 គឺជាសូរ្យគ្រាសកូនកាត់ (hybrid solar eclipse) ដ៏សែនកម្រ ដោយសារវាមានតែ 3.1% ប៉ុណ្ណោះនៅក្នុងចំណោមបាតុភូតសូរ្យគ្រាសទាំងឡាយក្នុងសតវត្សរ៍ទី 21 នេះ។

សូរ្យគ្រាសលើកនេះនឹងចាប់ផ្ដើមពីភាគខាងត្បូងនៃមហាសមុទ្រឥណ្ឌា ឆ្លងកាត់ទ្វីបអូសេអានី អាស៊ីអាគ្នេយ៍ និងបញ្ចប់ត្រង់មហាសមុទ្រប៉ាស៊ីហ្វ៊ិក។ ប៉ុន្តែតំបន់ដែលមនុស្សអាចមើលឃើញសូរ្យគ្រាសរាងចិញ្ចៀន និងសូរ្យគ្រាសពេញលេញគឺមានតិចតួច ដោយភាគច្រើនកើតឡើងនៅលើសមុទ្រ។

នៅពេលបាតុភូតសូរ្យគ្រាសកើតឡើង តំបន់មួយចំនួននៅលើផែនដីនឹងមើលឃើញសូរគ្រាសពេញលេញ គ្រាដែលតំបន់ខ្លះទៀតនឹងមើលឃើញសូរ្យគ្រាសរាងចិញ្ចៀន ចំណែកតំបន់ខ្លះក៏មើលឃើញតែមួយផ្នែក។

សូរ្យគ្រាសពេញលេញលើកនេះនឹងមើលឃើញពីឧបទ្វីប North West Cape និងកោះ Barrow នៅអូស្ត្រាលីខាងលិច តំបន់ភាគខាងកើតរបស់ទីម័រខាងកើត កោះ Damar និងមួយផ្នែករបស់ខេត្ត Papua នៅឥណ្ឌូណេស៊ី។

សូរ្យគ្រាសពេញលេញ សូរ្យគ្រាសរាងចិញ្ចៀន និងសូរ្យគ្រាសមួយផ្នែក

យោងតាមអ្នកវិទ្យាសាស្ត្រ នៅពេលតាមដានបាតុភូតសូរ្យក្រាស អ្នកទស្សនាមិនត្រូវមើលដោយភ្នែកទទេ ឬពាក់វ៉ែនតាខ្មៅ ព្រោះមិនអាចទប់កាំរស្មីអាក្រក់ពីព្រះអាទិត្យ។ ល្អបំផុត អ្នកមើលគួរពាក់វ៉ែនតាពិសេសដែលអាចទប់រស្មី UV ឬវ៉ែនតាពិសេសសម្រាប់មើលបាតុភូតសូរ្យគ្រាស។

យើងក៏អាចមើលបាតុភូតសូរ្យគ្រាសដោយប្រយោល ដោយការចោះប្រហោងតូចលើប្រអប់កាតុង រួចដាក់ប្រហោងនោះឱ្យបែរចំថ្ងៃដើម្បីឱ្យពន្លឺព្រះអាទិត្យចាំងឆ្លងកាត់ប្រហោង និងជះទៅលើដី ដូច្នេះយើងអាចមើលរូបរាងសូរ្យគ្រាសនៅលើដីនោះដោយផ្ទាល់ និងដោយសុវត្ថិភាព។

សូរ្យគ្រាសកូនកាត់គឺជាការរួមផ្សំរបស់បាតុភូតសូរ្យគ្រាសពេញលេញ និងសូរ្យគ្រាសរាងចិញ្ចៀន។ សូរ្យគ្រាសកើតឡើងនៅពេលព្រះចន្ទស្ថិតនៅត្រង់ចន្លោះផែនដី និងព្រះអាទិត្យ និងបាំងពន្លឺមួយផ្នែកដែលជះពីព្រះអាទិត្យមកកាន់ផែនដី។ ពេលនោះ ស្រមោលរបស់ព្រះចន្ទនឹងជះមកលើផែនដី។ នៅតំបន់ដែលមានស្រមោលព្រះចន្ទឆ្លងកាត់ មនុស្សម្នានឹងមើលឃើញព្រះអាទិត្យត្រូវព្រះចន្ទបាំងបិទមួយផ្នែក (សូរ្យគ្រាសមួយផ្នែក) ឬបាំងបិទទាំងស្រុង (សូរ្យគ្រាសពេញលេញ)។

នៅពេលផែនដី និងព្រះចន្ទមានគម្លាតឆ្ងាយពីគ្នាជាងធម្មតា ទំហំព្រះចន្ទដែលមនុស្សមើលឃើញគឺមានទម្រង់តូចជាងទំហំនៃរូបរាងរបស់ព្រះអាទិត្យ នាំឱ្យព្រះចន្ទមិនអាចបិទបាំងព្រះអាទិត្យបានទាំងស្រុង ដោយបន្សល់ទុកពន្លឺជារង្វង់មូលត្រង់ជាយខាងក្រៅដែលដូចទៅនឹងចិញ្ចៀន ដែលនោះគេហៅថា សូរ្យគ្រាសរាងចិញ្ចៀន៕

April 19, 2023

កាលបរិច្ឆេទការប្រកួត «បាល់ទះនារី» វគ្គចែកពូលនៅស៊ីហ្គេមលើកទី 32

ការប្រកួតបាល់ទះនារីក្នុងព្រឹត្តិការណ៍ស៊ីហ្គេមលើកទី 32 នឹងត្រូវធ្វើឡើងចាប់ពីថ្ងៃទី 09 ឧសភា ដល់ថ្ងៃទី 14 ឧសភា ឆ្នាំ 2023 នៅកម្ពុជា។

ការប្រកួតបាល់ទះក្នុងផ្ទះបុរស នារី របស់ស៊ីហ្គេមលើកនេះនឹងចាប់ផ្ដើមជាផ្លូវការនៅថ្ងៃទី 03 ឧសភា នៅឯពហុកីឡដ្ឋានជាតិអូឡាំពិករបស់កម្ពុជា។ ក្នុងនោះ ក្រុមជម្រើសជាតិបុរសនឹងប្រកួតពីថ្ងៃទី 03 ឧសភា ដល់ថ្ងៃទី 08 ឧសភា ខណៈដែលក្រុមជម្រើសជាតិនារីនឹងប្រកួតពីថ្ងៃទី 09 ឧសភា ដល់ 14 ឧសភា។

វិញ្ញាសាបាល់ទះបុរស នារី នៅស៊ីហ្គេម 2023 នេះ មាន 7 ក្រុមចូលរួម រួមមាន ក្រុមម្ចាស់ផ្ទះកម្ពុជា ថៃ វៀតណាម សិង្ហបុរី ឥណ្ឌូណេស៊ី ម៉ាឡេស៊ី និង មីយ៉ាន់ម៉ា។ ដោយឡែក ហ្វ៊ីលីពីនមានតែក្រុមនារីប៉ុណ្ណោះដែលនឹងមានសិទ្ធិចូលរួមប្រកួត ចំណែកក្រុមបុរសត្រូវបានជម្រុះព្រោះតែកំហុសឆ្គងរបស់ហ្វ៊ីលីពីនក្នុងការចុះឈ្មោះ។

ខាងក្រោមនេះគឺជាកាលបរិច្ឆេទការប្រកួត «បាល់ទះនារី» វគ្គចែកពូលនៅស៊ីហ្គេមលើកទី 32 ៖

April 18, 2023

ក្រុមហ៊ុនថ្មីចំនួនប្រាំបណ្ដាក់ទុកវិនិយោគសរុបជាង 100 លានដុល្លារអាម៉េរិកនៅកម្ពុជា

ក្រុមហ៊ុនចំនួនប្រាំដែលទើបតែទទួលបានវិញ្ញាបតបត្រចុះបញ្ជីវិនិយោគពីក្រុមប្រឹក្សាអភិវឌ្ឍន៍កម្ពុជា នឹងបណ្ដាក់ទុនសរុបចំនួន 103.3 លានដុល្លារអាម៉េរិកនៅក្នុងវិស័យកសិកម្ម ឧស្សាហកម្មកាត់ដេរ និងបច្ចេកវិទ្យានៅក្នុងខេត្តក្រចេះ ព្រះវិហារ ភ្នំពេញ តាកែវ និងកំពង់ស្ពឺ ផ្ដល់ការងារជូនពលរដ្ឋកម្ពុជាប្រមាណជាង 1,100 កន្លែង។

ក្រុមហ៊ុនទាំងនេះរួមមាន ៖

EASTERN RUBBER (CAMBODIA) CO., LTD ៖ គម្រោងបង្កើតកសិដ្ឋានចិញ្ចឹមគោពូជ និងគោសាច់ខ្នាតធំដែលមានទីតាំងវិនិយោគស្ថិតស្រុកស្នួល ខេត្តក្រចេះ ក្នុងទុនវិនិយោគប្រមាណ 73.4 លានដុល្លារអាម៉េរិក និងអាចបង្កើតការងារបានចំនួន 79 កន្លែង។

RITHY RUBBER (CAMBODIA) CO., LTD ៖ គម្រោងបង្កើតកសិដ្ឋានដាំដំណាំកសិ-ឧស្សាហកម្ម (ដើមកៅស៊ូ) និងសាងសង់រោងចក្រកែច្នៃ ដែលមានទីតាំងវិនិយោគស្ថិតនៅតំបន់ប្រើប្រាស់ដោយចីរភាពនៃដែនជម្រកសត្វព្រៃបឹងពែរ នៅឃុំរមណី ស្រុករវៀង ខេត្តព្រះវិហារ ក្នុងទុនវិនិយោគប្រមាណ 12 លានដុល្លារអាម៉េរិក និងអាចបង្កើតការងារបានចំនួន 158 កន្លែង។

GE NEW ENERGY TECHNOLOGY (CAMBODIA) CO., LTD ៖ គម្រោងបង្កើតរោងចក្រផ្គុំដំឡើងបន្ទះសូឡា ដែលមានទីតាំងវិនិយោគស្ថិតនៅភូមិតានួន សង្កាត់កំបូល ខណ្ឌកំបូល រាជធានីភ្នំពេញ ក្នុងទុនវិនិយោគប្រមាណ 7 លានដុល្លារអាម៉េរិក និងអាចបង្កើតការងារបានចំនួន 205 កន្លែង។

JINGMAOGUOJI (CAMBODIA) GARMENT CO., LTD ៖ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ ក្នុងទុនវិនិយោគប្រមាណ 5.7 លានដុល្លារអាម៉េរិក និងអាចបង្កើតការងារបានចំនួន 475 កន្លែង។

EBELNO (CAMBODIA) CO., LTD ៖ គម្រោងបង្កើតរោងចក្រផ្គុំដំឡើងសម្ភារៈអេឡិចត្រូនិក ដែលមានទីតាំងវិនិយោគស្ថិតនៅភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ 5.2 លានដុល្លារអាម៉េរិក និងអាចបង្កើតការងារបានចំនួន 251 កន្លែង។

April 18, 2023

កំណែថ្មីបំផុតរបស់បញ្ញានិម្មិត ChatGPT ធ្វើរោគវិនិច្ឆ័យពូកែជាងវេជ្ជបណ្ឌិតទៅទៀត

ពេលប្រើប្រាស់កម្មវិធី GPT-4 បណ្ឌិត Isaac Kohane ដែលជាអ្នកវិទ្យាសាស្ត្រកុំព្យូទ័រនៅ Harvard និងជាវេជ្ជបណ្ឌិតមានបទពិសោធន៍ច្រើនក្នុងវិស័យវេជ្ជសាស្ត្រ មានការភ្ញាក់ផ្អើលខ្លាំងនៅពេលបានឃើញសមត្ថភាពរបស់បច្ចេកវិទ្យាបញ្ញានិម្មិត (AI) ដែលអភិវឌ្ឍដោយ OpenAI ។

GPT-4 គឺជាកំណែថ្មីបំផុតក្នុងចំណោមរូបមន្ត AI ដែលកំពុងត្រូវបានប្រើដើម្បីដំណើរការ ChatGPT និង Bing Chat ថ្មីរបស់ក្រុមហ៊ុន Microsoft។ ធៀបទៅនឹង GPT-3.5 មុននេះ GPT-4 «មានការច្នៃប្រឌិតខ្ពស់ជាង និងកម្រិតនៃការសហការក៏ខ្ពស់ជាងពេលណាទាំងអស់» ព្រមទាំងអាច «ដោះស្រាយបញ្ហាលំបាកបានយ៉ាងសុក្រឹត» នេះបើតាម OpenAI ។

ដើម្បីបញ្ជាក់អំពីសមត្ថភាពរបស់ GPT-4 វេជ្ជបណ្ឌិត Isaac Kohane ថ្មីៗនេះបានសហការជាមួយមិត្តរួមការងារពីរនាក់ដើម្បីពិសោធនៅក្នុងបរិស្ថានវេជ្ជសាស្ត្រ។ លទ្ធផលនៃការពិសោធបានធ្វើឱ្យក្រុមអ្នកវិទ្យាសាស្ត្រមានការភ្ញាក់ផ្អើល។

«ខ្ញុំពិតជាភ្ញាក់ផ្អើលណាស់នៅពេលនិយាយថា៖ GPT-4 ពូកែជាងវេជ្ជបណ្ឌិតជាច្រើនដែលខ្ញុំធ្លាប់បានដឹង» លោក Isaac Kohane បានឱ្យដឹងនៅក្នុងសៀវភៅ «បដិវត្តន៍ AI ក្នុងវេជ្ជសាស្ត្រ» ដែលជិតត្រូវបានបោះពុម្ពដូច្នេះ។

បណ្ឌិត Isaac Kohane ជាអ្នកវិទ្យាសាស្ត្រកុំព្យូទ័រនៅ Harvard និងជាវេជ្ជបណ្ឌិតមានបទពិសោធន៍ច្រើនក្នុងវិស័យវេជ្ជសាស្ត្រ

ក្នុងសៀវភៅខាងលើ Isaac Kohane ឱ្យដឹងថា GPT-4 (ដែលត្រូវបានបង្កើតឡើងកាលពីខែមីនា 2023 ក្នុងទម្រង់សាកល្បងសម្រាប់អ្នកប្រើប្រាស់បង់ប្រាក់) ឆ្លើយត្រូវជាង 90% នូវសំណួរក្នុងសម័យប្រឡងយកវិញ្ញាបនបត្រប្រកបអាជីពជាគ្រូពេទ្យរបស់សហរដ្ឋអាម៉េរិក។

ដូច្នេះ GPT-4 មានសមិទ្ធផលល្អជាងឆ្ងាយធៀបនឹងរូបមន្តបញ្ញានិម្មិតមុនៗរបស់ OpenAI មានដូចជា GPT-3 និង GPT-3.5។ លើសពីនេះ វាថែមទាំងពូកែជាងវេជ្ជបណ្ឌិតមួយចំនួនដែលទទួលបានវិញ្ញាបនបត្រប្រកបរបរជាគ្រូពេទ្យនៅសហរដ្ឋអាម៉េរិកទៅទៀត។

GPT-4 នៅមានសមត្ថភាពលើសពីអ្វីដែលបានរៀបរាប់ខាងលើ។ ក៏ប៉ុន្តែ វាមិនទាន់ល្អ ត្រឹមត្រូវឥតខ្ចោះនៅឡើយ ព្រោះនៅតែមានកំហុសខ្លះដែលត្រូវការមនុស្សកែប្រែបន្ថែមទៀត៕

April 18, 2023

Top 10 កីឡាករបាល់ទាត់ដែលមានទ្រព្យសម្បត្តិច្រើនជាងគេលើពិភពលោក

មិត្តអ្នកអានប្រហែលជាមានការភ្ញាក់ផ្អើលនៅពេលដឹងថា Cristiano Ronaldo និង Lionel Messi មិនមែនជាកីឡាករបាល់ទាត់ដែលមានទ្រព្យសម្បត្តិច្រើនជាងគេ ហើយកីឡាករមិនមានឈ្មោះល្បីបែរជាឈរលើកំពូលតារាងចំណាត់ថ្នាក់នេះ ប៉ុន្តែនោះគឺជាការពិត។

ទី 1 ៖ Faiq Bolkiah

កីឡាករខ្សែបម្រើ Faiq Bolkiah (Faiq Jefri Bolkiah) កើតឆ្នាំ 1998 នៅទីក្រុង Los Angeles រដ្ឋ California សហរដ្ឋអាម៉េរិក លេងឱ្យក្លឹប Maritimo និងមានទ្រព្យសម្បត្តិសរុប 20 ពាន់លានដុល្លារអាម៉េរិក។

មូលហេតុដែល Faiq Bolkiah មានទ្រព្យច្រើនជាងគេគឺដោយសារជាព្រះរាជនត្តា (ចៅស្ដេច) របស់រាជាណាចក្រព្រុយណេ។ ចំណែកបិតារបស់ Faiq Bolkiah គឺជារាជបុត្រា Jefri Bolkiah ដែលជាកំពូលអ្នកមានក្នុងវិស័យរ៉ែប្រេង។

តាំងពីតូច Faiq Bolkiah ត្រូវបានបណ្ដុះបណ្ដាលនៅក្នុងក្លឹបបាល់ទាត់ AFC Newbury, Arsenal ជាដើម។ ក្រោយពីបានចាកចេញពីកន្លែងហ្វឹកហាត់ Leicester City នៅអង់គ្លេស Faiq Bolkiah ក៏បានទៅចូលរួមជាមួយក្លឹបបាល់ទាត់ Maritimo នៅព័រទុយហ្គាល់។ ប៉ុន្តែ គាត់បានទាត់ក្នុងនាមជាកីឡាករជម្រើសដំបូងនៅតាមបណ្ដាពានរង្វាន់សម្រាប់ក្រុម U-21 និងមិនធ្លាប់បានទាត់នៅ Premier League។

កីឡាករ Faiq Bolkiah គឺជាព្រះរាជនត្តា (ចៅស្ដេច) របស់រាជាណាចក្រព្រុយណេ

ទី 2 ៖ Cristiano Ronaldo

ឈ្មោះពេញ ៖ Cristiano Ronaldo dos Santos Aveiro

ឆ្នាំកំណើត ៖ 1985

ស្រុកកំណើត ៖ Runchal, Madeira, ព័រទុយហ្គាល់

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ Al-Nassr របស់អារ៉ាប៊ីសាអូឌីត

ទ្រព្យសម្បត្តិសរុប ៖ ជាង 650 លានដុល្លារអាម៉េរិក

ទី 3 ៖ Lionel Messi

ឈ្មោះពេញ ៖ Lionel Andres Messi

ឆ្នាំកំណើត ៖ 1987

ស្រុកកំណើត ៖ Rosario, Santa Fe, អាហ្សង់ទីន

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ Paris Saint-Germain

ទ្រព្យសម្បត្តិសរុប ៖ 600 លានដុល្លារអាម៉េរិក

ទី 4 ៖ David Beckham

ឈ្មោះពេញ ៖ David Robert Joseph Beckham

ឆ្នាំកំណើត ៖ 1975

ស្រុកកំណើត ៖ Leytonstone, ក្រុងឡុងដ៍, ចក្រភពអង់គ្លេស

តួនាទី ៖ កីឡាករខ្សែបម្រើ

ក្លឹបបច្ចុប្បន្ន ៖ បានចូលនិវត្តន៍

ទ្រព្យសម្បត្តិសរុប ៖ 450 លានដុល្លារអាម៉េរិក

ទី 5 ៖ Neymar

ឈ្មោះពេញ ៖ Neymar da Silva Santos Junior

ឆ្នាំកំណើត ៖ 1992

ស្រុកកំណើត ៖ Mogi das Cruzes, Sao Paulo, ប្រេស៊ីល

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ Paris Saint-Germain

ទ្រព្យសម្បត្តិសរុប ៖ 200 លានដុល្លារអាម៉េរិក

ទី 6 ៖ Zlatan Ibrahimovic

ឈ្មោះពេញ ៖ Zlatan Ibrahimovic

ឆ្នាំកំណើត ៖ 1981

ស្រុកកំណើត ៖ Malmo, ស៊ុយអែត

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ A.C. Milan

ទ្រព្យសម្បត្តិសរុប ៖ 190 លានដុល្លារអាម៉េរិក

ទី 7 ៖ Wayne Rooney

ឈ្មោះពេញ ៖ Wayne Mark Rooney

ឆ្នាំកំណើត ៖ 1985

ស្រុកកំណើត ៖ អង់គ្លេស

តួនាទី ៖ អតីតកីឡាករខ្សែប្រយុទ្ធ និងខ្សែបម្រើ

ក្លឹបបច្ចុប្បន្ន ៖ គ្រូបង្វឹកក្លឹប D.C. United

ទ្រព្យសម្បត្តិសរុប ៖ 180 លានដុល្លារអាម៉េរិក

ទី 8 ៖ Gareth Bale

ឈ្មោះពេញ ៖ Gareth Frank Bale

ឆ្នាំកំណើត ៖ 1989

ស្រុកកំណើត ៖ វ៉ែលស៍, ចក្រភពអង់គ្លេស

តួនាទី ៖ កីឡាករខ្សែប្រយុទ្ធ

ក្លឹបបច្ចុប្បន្ន ៖ ចូលនិវត្តន៍

ទ្រព្យសម្បត្តិសរុប ៖ 150 លានដុល្លារអាម៉េរិក

ទី 9 ៖ Paul Pogba

ឈ្មោះពេញ ៖ Paul Labile Pogba

ឆ្នាំកំណើត ៖ 1993

ស្រុកកំណើត ៖ បារាំង

តួនាទី ៖ កីឡាករខ្សែបម្រើ

ក្លឹបបច្ចុប្បន្ន ៖ Juventus F.C របស់អ៊ីតាលី

ទ្រព្យសម្បត្តិសរុប ៖ 125 លានដុល្លារអាម៉េរិក

ទី 10 ៖ Andre Iniesta

ឈ្មោះពេញ ៖ Andre Iniesta Lujan

ឆ្នាំកំណើត ៖ 1984

ស្រុកកំណើត ៖ អេស្ប៉ាញ

តួនាទី ៖ កីឡាករខ្សែបម្រើ

ក្លឹបបច្ចុប្បន្ន ៖ Vissel Kobe របស់ជប៉ុន

ទ្រព្យសម្បត្តិសរុប ៖ 123 លានដុល្លារអាម៉េរិក

April 18, 2023

«សង្គ្រាមតម្លៃ» របស់ Tesla ធ្វើឱ្យ Xpeng ផ្ដោតលើរថយន្តអគ្គិសនីប្រភេទ «ធូរថ្លៃ»

ក្រុមហ៊ុនផលិតរថយន្តអគ្គិសនីចិន Xpeng សង្ឃឹមថា ការកាត់បន្ថយចំណាយក្នុងការផលិតនឹងជួយឱ្យក្រុមហ៊ុនដែលមានអាយុ 8 ឆ្នាំមួយនេះរកបានប្រាក់ចំណេញ។ នេះគឺជាការអះអាងរបស់សហប្រធាន Brian Gu ដែលបាននិយាយនៅមុនព្រឹត្តិការណ៍ពិព័រណ៍រថយន្តសៀងហៃ។

Brian Gu ឱ្យដឹងថា Xpeng មានផែនការកាត់បន្ថយចំណាយ 25% សម្រាប់ប្រព័ន្ធរុញច្រាន រួមទាំងថ្មផ្ទុកថាមពល និងសំច័យបាន 50% នៅក្នុងបណ្ដាមុខងារបើកបរឆ្លាតវៃ នៅចុងឆ្នាំ 2024។ លោកបន្ថែមថា គិតត្រឹមបច្ចុប្បន្ន ប្រព័ន្ធថ្មផ្ទុកថាមពល និងមុខងារបើកបរឆ្លាតវៃកាន់កាប់ជាងពាក់កណ្ដាលនៃការចំណាយក្នុងការផលិតរថយន្តអគ្គិសនីរបស់ Xpeng។

កាលពីឆ្នាំមុន ដោយសារតែបរិមាណរថយន្តដែលបានលក់មិនបានសមតាមបំណង Xpeng ក៏ត្រូវកំណត់ពេលវេលានៃការរកបានប្រាក់ចំណេញទៅឆ្នាំ 2025។

យោងតាមលោក Brian Gu វត្ថុធាតុសម្រាប់ផលិតថ្មផ្ទុកថាមពលកាន់តែមានតម្លៃទាប ជួយកាត់បន្ថយការចំណាយក្នុងការផលិតនៅក្នុងឆ្នាំនេះ និងឆ្នាំក្រោយ។ ក្រុមហ៊ុន Xpeng ក៏កំពុងព្យាយាមកាត់បន្ថយការប្រើប្រាស់រ៉ាដា ឈីប សេនស៊ើរ និងកាមេរ៉ាឡាសែរនៅក្នុងបណ្ដាមុខងារបើកបរស្វ័យប្រវត្ត។

ខាងក្នុងរោងចក្រផលិតរថយន្តអគ្គិសនីរបស់ Xpeng

He Xiaopeng ដែលជាអគ្គនាយកប្រតិបត្តិរបស់ក្រុមហ៊ុន Xpeng បានឱ្យដឹងថា ក្រុមហ៊ុននេះកំពុងផ្ដោតលើថ្នាលផលិតថ្មីដែលហៅថា SEPA2.0 ដែលជួយបង្កើនប្រសិទ្ធភាពការងារ និងកាត់បន្ថយការចំណាយក្នុងការផលិត។

សកម្មភាពការងារក្នុងរោងចក្រផលិតរថយន្តអគ្គិសនីរបស់ក្រុមហ៊ុនចិន Xpeng

Xpeng នឹងបង្ហាញរថយន្តម៉ូដែលថ្មីដែលត្រូវបានអភិវឌ្ឍលើថ្នាល SEPA2.0 នោះគឺរថយន្តប្រភេទកីឡាពហុមុខងារ ដើម្បីប្រកួតប្រជែងនឹង Model Y របស់ Tesla នៅក្នុងពិព័រណ៍រថយន្តសៀងហៃដែលនឹងបើកឱ្យចូលទស្សនាចាប់ពីថ្ងៃទី 18 មេសា។ Xpeng មិនបានប្រកាសអំពីតម្លៃរបស់ម៉ូដែលរថយន្តនេះ ប៉ុន្តែ លោក Gu និយាយថា Xpeng នឹងផ្ដោតលើការអភិវឌ្ឍរថយន្តអគ្គិសនីដែលមានតម្លៃទាប ចាប់ពី 21,800 ដុល្លារដល់ 50,900 ដុល្លារ ហើយក្រុមហ៊ុននឹងបញ្ចេញរថយន្តមួយម៉ូដែលទៀតនៅចុងឆ្នាំនេះ។

រថយន្តអគ្គិសនីមួយគ្រឿងរបស់ក្រុមហ៊ុនចិន Xpeng

ការផ្ដោតលើរថយន្តអគ្គិសនីតម្លៃទាបរបស់ Xpeng ក៏ដូចជាបណ្ដាក្រុមហ៊ុនផលិតរថយន្តអគ្គិសនីទាំងឡាយនៅលើពិភពលោក ត្រូវបានធ្វើឡើង ក្រោយពី Tesla បើកយុទ្ធនាការ «សង្គ្រាមតម្លៃ» ចាប់ពីដើមឆ្នាំ 2023៕

April 18, 2023

ឧត្ថម្ភាគចក្រដឹកទំនិញដែលធំ និងធ្ងន់ជាងគេបង្អស់លើពិភពលោក

(រុស្ស៊ី) – ឧទ្ធម្ភាគចក្រ Mi-26 អាចដឹកទំនិញទម្ងន់ 20 តោន និងអាចហោះបានចម្ងាយ 750 គីឡូម៉ែត្រ ត្រូវបានប្រើប្រាស់ទាំងក្នុងវិស័យយោធា ទាំងវិស័យស៊ីវិល។

ពិភពលោកបច្ចុប្បន្ន មានឧទ្ធម្ភាគចក្រមួយប្រភេទដែលអាចដឹកទាំងយន្តហោះចម្បាំង។ យោងតាមរបាយការណ៍របស់ណាតូ (NATO) Mi-26 របស់រុស្ស៊ី គឺជាឧទ្ធម្ភាគចក្រធំជាងគេបង្អស់លើសកលលោក។ ឧទ្ធម្ភាគចក្រនេះ មានតួនាទីដឹករថក្រោះ រថពាសដែកទម្ងន់ 13 តោន និងមីស៊ីលប្លោងជាដើម ទៅកាន់មូលដ្ឋានទ័ពនៅឆ្ងាយៗ។

ជាក់ស្ដែង Mi-26 គឺជាឧទ្ធម្ភាគចក្រដែលធ្ងន់ជាងគេលើពិភពលោក ក្រៅពីគំរូដំបូង V-12 ដែលបានបង្ហាញខ្លួនមុននោះ។ ដំណើរការអភិវឌ្ឍ Mi-26 ត្រូវបានធ្វើឡើងនៅដើមទសវត្សរ៍ឆ្នាំ 1970 បន្ទាប់ពីដឹងច្បាស់ថា V-12 មិនអាចដឹកទំនិញធុនធ្ងន់បាន។

ឧទ្ធម្ភាគចក្រ Mil Mi-26 ធៀបនឹងយន្តហោះ Boeing 737

Mi-26 ដែលមានបណ្ដោយ 40 ម៉ែត្រ ទម្ងន់ហោះហើរ 56 តោន កាប៊ីនផ្ទុកទំនិញទំហំ 3.2 ម៉ែត្រ និងមានចំណុះ 110 ម៉ែត្រគូប ត្រូវបានផលិតដោយរោងចក្រផលិតឧទ្ធម្ភាគចក្រ Mil Moscow របស់ប្រទេសរុស្ស៊ី។ ជើងហោះហើរដំបូងរបស់ Mi-26 ត្រូវបានធ្វើឡើងកាលពីខែធ្នូ 1977។ គិតត្រឹមឆ្នាំ 2015 Mil Moscow ផលិត Mi-26 បាន 316 គ្រឿង។

ឧទ្ធម្ភាគចក្រ Mil Mi-26 អាចដឹកយន្តហោះដឹកអ្នកដំណើរ

ឧទ្ធម្ភាគចក្រនេះអាចដឹកទំនិញបាន 20 តោន បើទោះវាមានទម្ងន់ទទេជិតស្មើនឹង Mi-6។ Mi-26 ដែលផ្ទុកទំនិញពេញអាចហោះបានចម្ងាយ 750 គីឡូម៉ែត្រ។ វាក៏អាចហោះហើរជាបន្តបន្ទាប់ក្នុងល្បឿនពី 240-270 គីឡូម៉ែត្រ/ម៉ោង។ បើមិនមានទំនិញ Mi-26 អាចហោះបានចម្ងាយ 2,350 គីឡូម៉ែត្រ។

April 18, 2023

ក្រុមជម្រើសជាតិគុនខ្មែរវៀតណាម ប្ដេជ្ញាដណ្ដើមមេដាយមាសនៅស៊ីហ្គេមកម្ពុជា

នៅក្នុងវិញ្ញាសាប្រកួតក្បាច់គុនខ្មែរនៅស៊ីហ្គេមលើកទី 32 ក្រុមកីឡាករជម្រើសជាតិផ្នែកប្រដាល់គុនខ្មែររបស់ប្រទេសវៀតណាម កំពុងត្រៀមខ្លួនសម្រាប់ការដណ្ដើមមេដាយមាស ដោយមានការជ្រោមជ្រែងពីម្ចាស់ជើងឯកពិភពលោកនៃវិញ្ញាសាគុនមួយថៃ ង្វៀន ត្រឹន យុយ ញឹត។

(គឺជាម្ចាស់ជើងឯកពិភពលោក WMF Muay Thai ប្រាំសម័យកាល និងជាម្ចាស់មេដាយ SEA Games 4 សម័យកាលនៅ Muay Thai)

នៅស៊ីហ្គេមលើកទី 32 ម្ចាស់ផ្ទះកម្ពុជានឹងបញ្ចូលវិញ្ញាសាថ្មីមួយចំនួន ក្នុងនោះមានបីវិញ្ញាសាដែលជាអត្តសញ្ញាណវប្បធម៌ជាតិរបស់កម្ពុជា រួមមាន គុនល្បុក្កតោ គុនខ្មែរ និងអុកចត្រង្គ។ ក្នុងចំណោមវិញ្ញាសាទាំងបីនេះ គុនខ្មែរត្រូវបានគេចាប់អារម្មណ៍ជាងគេ ព្រោះតែមានប្រទេសជិតខាងមួយរបស់កម្ពុជា ចាត់ទុកថា គុនខ្មែរគឺជារបស់ពួកគេ។

ង្វៀន ត្រឹន យុយ ញឹត (Nguyễn Trần Duy Nhất) គឺជាម្ចាស់ជើងឯកពិភពលោក WMF Muay Thai ប្រាំជំនាន់ និងជាម្ចាស់មេដាយស៊ីហ្គេមចំនួនបួនជំនាន់ក្នុងវិញ្ញាសាគុនមួយថៃ

នៅស៊ីហ្គេមដែលកម្ពុជាធ្វើជាម្ចាស់ផ្ទះ វិញ្ញាសាគុនខ្មែរមាន 7 ក្រុមត្រូវចូលរួមប្រកួតដើម្បីដណ្ដើមមេដាយចំនួន 19 គ្រឿង។ ប្រទេសវៀតណាមក៏បានបង្កើតក្រុមជម្រើសជាតិគុនខ្មែរ និងកំពុងត្រៀមខ្លួនសម្រាប់ការចូលរួមប្រកួតនៅស៊ីហ្គេមលើកនេះ ដោយមានការជួយជ្រោមជ្រែងពីកីឡាករប្រដាល់ ង្វៀន ត្រឹន យុយ ញឹត (Nguyễn Trần Duy Nhất) ដែលជាម្ចាស់ជើងឯកពិភពលោកនៃវិញ្ញាសាគុនមួយថៃ។ ម្ចាស់ជើងឯករូបនេះបានក្លាយជាជំនួយការគ្រូបង្វឹករបស់ក្រុមគុនខ្មែរជម្រើសជាតិវៀតណាម។

ការប្រកួតក្នុងវិញ្ញាសាគុនខ្មែរនៅស៊ីហ្គេមលើកទី 32

ដោយមានវត្តមានរបស់ ង្វៀន ត្រឹន យុយ ញឹត ក្រុមគុនខ្មែរជម្រើសជាតិវៀតណាម កំពុងតែមានការប្ដេជ្ញាចិត្តខ្ពស់ក្នុងការដណ្ដើមមេដាយមាសនៅឯព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 ដែលនឹងធ្វើឡើងនៅកម្ពុជា នាពេលដ៏ខ្លីខាងមុខ៕

April 18, 2023

តៃវ៉ាន់ទំនងជាបានទិញមីស៊ីលប្រឆាំងនាវាចម្បាំងទំនើបពីសហរដ្ឋអាម៉េរិក

កោះតៃវ៉ាន់ទំនងជាបានចំណាយប្រាក់ជិត 1.2 ពាន់លានដុល្លារអាម៉េរិកដើម្បីទិញមីស៊ីលប្រឆាំងនាវាចម្បាំង Harpoon បាញ់ពីដី ដែលផលិតដោយសហរដ្ឋអាម៉េរិក ចំនួន 400 គ្រាប់បន្ថែមទៀត។

ប្រធានក្រុមប្រឹក្សាពាណិជ្ជកម្មអាម៉េរិក-តៃវ៉ាន់ Rupert Hammond-Chambers កាលពីថ្ងៃទី 17 មេសា និយាយថា កងទ័ពជើងទឹកអាម៉េរិកបានជំនួសមុខឱ្យកម្លាំងប្រដាប់អាវុធតៃវ៉ាន់ ចុះហត្ថលេខាលើកិច្ចព្រមព្រៀងទិញមីស៊ីលប្រឆាំងនាវាចម្បាំង UGM-84 ដែលផលិតដោយសាជីវកម្ម Boeing ហើយនេះគឺជាលើកដំបូងដែលតៃប៉ិមានមីស៊ីល Harpoon កំណែបាញ់ពីដី។

ព័ត៌មាននេះត្រូវបានបង្ហើបឱ្យដឹងនៅប៉ុន្មានថ្ងៃក្រោយពីមន្ទីរបញ្ចកោណប្រកាសអំពីកិច្ចព្រមព្រៀងតម្លៃ 1.17 ពាន់លានដុល្លារសម្រាប់ការទិញមីស៊ីលប្រឆាំងនាវាចម្បាំង Harpoon ចំនួន 400 គ្រាប់ ដែលត្រូវប្រគល់រួចរាល់នៅឆ្នាំ 2029 ប៉ុន្តែមិនបានឱ្យដឹងអំពីអតិថិជន។

ទាក់ទងនឹងកិច្ចព្រមព្រៀង ក៏ដូចជាព័ត៌មានដែលត្រូវបានបង្ហើបឱ្យដឹងខាងលើ ទីក្រុងតៃប៉ិមិនទាន់បញ្ចេញប្រតិកម្មអ្វីនៅឡើយ។ ចំណែកក្រសួងការពារជាតិអាម៉េរិកក៏បានបដិសេធការបញ្ចេញមតិអំពីករណីនេះ ប៉ុន្តែអះអាងថា វ៉ាស៊ីងតោនត្រៀមខ្លួនរួចរាល់ក្នុងការផ្ដល់ឱ្យតៃវ៉ាន់នូវសព្វាវុធចាំបាច់ដើម្បីរក្សាសមត្ថភាពការពារខ្លួន។

Chang Che-ping មេដឹកនាំយោធាលំដាប់ទីពីររបស់កងទ័ពតៃវ៉ាន់ កាលពីឆ្នាំ 2020 ធ្លាប់បានប្រកាសថា តៃប៉ិចង់ទិញ Harpoon បាញ់ពីដីរបស់វ៉ាស៊ីងតោន ដើម្បីពង្រឹងសមត្ថភាពការពារទឹកដី និងបានអះអាងថា ផែនការទាំងនេះអាចត្រូវបានអនុវត្តក្នុងឆ្នាំ 2023។ បច្ចុប្បន្ន តៃវ៉ាន់មានកំណែ Harpoon បាញ់ពីយន្តហោះ និងនាវាចម្បាំង។

មីស៊ីលប្រឆាំងនាវាចម្បាំង Harpoon របស់សហរដ្ឋអាម៉េរិក

Harpoon គឺជាមីស៊ីលប្រឆាំងនាវាចម្បាំងពិសេសដំបូងរបស់ទ័ពជើងទឹកអាម៉េរិក ដែលបង្ហាញខ្លួនជាលើកដំបូងកាលពីដើមឆ្នាំ 1977។ មីស៊ីលនេះអាចបាញ់បានចម្ងាយ 280 គីឡូម៉ែត្រ និងល្បឿន 865 គីឡូម៉ែត្រ/ម៉ោង ហើយអាចហោះលើផ្ទៃទឹកសមុទ្រតែប៉ុន្មានម៉ែត្រប៉ុណ្ណោះក្នុងពេលសំដៅជិតដល់គោលដៅ។ Harpoon មួយគ្រាប់ផ្ទុកក្បាលគ្រាប់ផ្ទុះទម្ងន់ 220 គីឡូក្រាម ល្មមអាចគំរាមកំហែងដល់នាវាចម្បាំងច្រើនប្រភេទនាពេលបច្ចុប្បន្ន។

ប្រទេសចិនចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួនដែលមិនអាចកាត់ផ្ដាច់បាន ហើយថានឹងប្រើប្រាស់កម្លាំងបាយដើម្បីដណ្ដើមយកមកកាន់កាប់ បើសិនចាំបាច់។ ចំណែកក្រុមមេដឹកនាំកោះតៃវ៉ាន់វិញអះអាងថា មានតែពលរដ្ឋរបស់កោះនេះប៉ុណ្ណោះដែលមានសិទ្ធិសម្រេចជោគវាសនារបស់តៃវ៉ាន់។ រីឯសហរដ្ឋអាម៉េរិកវិញ ថ្វីបើមិនមានទំនាក់ទំនងការទូតជាផ្លូវការជាមួយតៃវ៉ាន់ ប៉ុន្តែគឺជាអ្នកផ្គត់ផ្គង់អាវុធសំខាន់ជាងគេរបស់ទីក្រុងតៃប៉ិ៕

April 18, 2023

Author: សឿន សំណាង