សឿន សំណាង - La Reine Media

នាវាទេសចរណ៍ប្រណិតអាចមុជក្រោមទឹកសមុទ្រ និងធ្វើដំណើរបានចម្ងាយ 6,000 គីឡូម៉ែត្រ

ក្រុមហ៊ុនហូឡង់ U-Boat Worx បង្ហើបឱ្យដឹងអំពីរូបភាពដំបូងៗស្ដីពីរចនាខាងក្នុងរបស់ Nautilus ដែលជានាវាទេសចរណ៍ប្រណិតតម្លៃ 25 លានដុល្លារអាម៉េរិក។

នាវា Nautilus មានបណ្ដោយ 37.5 ម៉ែត្រ និងទម្ងន់ 1,250 តោន អាចធ្វើសកម្មភាពដូចទៅនឹងនាវាទេសចរណ៍ប្រណិតអណ្តែតលើទឹក និងនាវាមុជទឹក។ Nautilus អាចប្រែកាយពីនាវាអណ្ដែតលើកទឹក ទៅជានាវាមុជទឹកក្នុងពេលស្ថិតនៅលើសមុទ្រ។ ក្រុមហ៊ុន U-Boat Worx បានណែនាំ Nautilus នៅក្នុងពិព័រណ៍នាវាទេសចរណ៍ Monaco 2022 កាលពីចុងឆ្នាំកន្លង ហើយនេះគឺជាលើកដំបូងដែល U-Boat Worx បង្ហាញរូបភាពស្ដីពីសម្ភារខាងក្នុងរបស់នាវា។ នេះបើតាមទំព័រ New Atlas ចុះផ្សាយកាលពីថ្ងៃទី 19 មេសា។

Nautilus នឹងអាចដឹកទេសចរបាន 10 នាក់ និងបុគ្គលិក 7 នាក់។ នាវានេះប្រើប្រាស់ប្រព័ន្ធរុញច្រានកូនកាត់ម៉ាស៊ូត-អគ្គិសនី ដែលអាចបើកបរក្នុងល្បឿន 17 គីឡូម៉ែត្រ/ម៉ោង និងធ្វើដំណើរបានជិត 6,000 គីឡូម៉ែត្រពេលរត់លើផ្ទៃសមុទ្រ។ នៅពេលមុជទឹក Nautilus អាចបរបាន 6 គីឡូម៉ែត្រ/ម៉ោង នៅជម្រៅ 150 ម៉ែត្រ និង ក្នុងរយៈពេល 12 ម៉ោងជាប់ៗគ្នា ហើយអាចធ្វើដំណើរបានប្រហែល 185 គីឡូម៉ែត្រ។

នាវា Nautilus នឹងមានកាប៊ីនប្រណិតមួយធំជាងគេ ដែលមានបន្ទប់ងូតទឹកដោយឡែក។ ក្រៅពីនេះ វាក៏មានបន្ទប់សម្រាប់ភ្ញៀវចំនួនបួនដែលមានគ្រែនៅក្បែរបង្អួច តុកៅអីសម្រាប់ធ្វើការ ទូខោអាវ និងបន្ទប់ងូតទឹក។

ក្នុងបន្ទប់រួម ភ្ញៀវអាចជជែកគ្នា និងមើលទូរទស្សន៍អេក្រង់ខ្នាតយក្សលំដាប់ប្រណិត ឬទស្សនាពិភពនៅបាត់សមុទ្រតាមរយៈបង្អួចកញ្ចក់។ បង្អួចទាំងអស់របស់នាវានេះសុទ្ធតែលិចក្នុងទឹក សូម្បីតែនៅពេលវាបរលើផ្ទៃទឹក។ នាវានេះក៏មានកន្លែងភេសជ្ជៈ និងបន្ទប់ហាត់ប្រាណទំនើបផងដែរ៕

April 21, 2023

(ស៊ីហ្គេម 2023) – គ្រូបង្វឹកបង្ហើបអំពីដំណឹងមិនល្អសម្រាប់ក្រុមបាល់ទាត់ U-22 ថៃ

គ្រូបង្វឹកថៃ Issara Sritaro បានឱ្យដឹងខ្លះៗអំពីព័ត៌មានទាក់ទងនឹងស្ថានភាពធនធានមនុស្សរបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសនេះ នៅមុនការចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 (ស៊ីហ្គេមលើកទី 32)។

កាលពីថ្ងៃទី 20 មេសា U-22 ថៃ បានធ្វើការសាកល្បងកម្លាំងកាយនៅមុនពេលឈានចូលដល់ការហ្វឹកហាត់ចុងក្រោយដើម្បីឆ្ពោះមកកាន់ស៊ីហ្គេមលើកទី 32 នៅកម្ពុជា។

មុននោះ គ្រូបង្វឹក Issara Sritaro បានប្រកាសបញ្ជីឈ្មោះកីឡាករ 29 រូបសម្រាប់ការហ្វឹកហាត់លើកចុងក្រោយនេះ ក្នុងនោះមានទាំងកីឡាករទាត់នៅបរទេសពីរនាក់ រួមមាន Achitphon Kirirom កំពុងទាត់ឱ្យក្លឹប Augsburg II នៅអាល្លឺម៉ង់ និង Chayapipat Suphanphen ទាត់ឱ្យក្លឹប Estoril Praia នៅព័រទុយហ្កាល់។ ក៏ប៉ុន្តែ ថ្មីៗនេះ Sritaro បានជូនដំណឹងមិនល្អដល់អ្នកគាំទ្រទាក់ទងនឹងស្ថានភាពធនធានមនុស្សរបស់ U-22 ថៃ។

លោក Sritaro ឱ្យដឹងថា លទ្ធភាពដែលខ្សែប្រយុទ្ធសំខាន់ Teerasak Poeiphimai ចូលរួមប្រកួតនៅស៊ីហ្គេមលើកទី 32 នៅតែស្រពេចស្រពិល។ «Teerasak បង្ហើបឱ្យដឹងថា តំណាង U-22 ថៃ កំពុងចរចាជាមួយមេដឹកនាំក្លឹប Port FC ស្ដីពីករណីរបស់គាត់» លោក Sritaro បញ្ជាក់ដូច្នេះ ប៉ុន្តែលោកបានអះអាងថា «…បើមិនមាន Teerasak នៅស៊ីហ្គេមលើកទី 32 …យើងមានមនុស្សមកជំនួស»។

Teerasak Poeiphimai ត្រូវបានចាត់ទុកថាជាក្ដីសង្ឃឹមនៅខ្សែប្រយុទ្ធរបស់ U-22 ថៃ នាបច្ចុប្បន្ន។ កីឡាករកើតឆ្នាំ 2002 រូបនេះ រកបាន 6 គ្រាប់រួចហើយក្រោយ 20 ប្រកួតនៅ Thai League នារដូវកាលនេះ។

កីឡាករកម្ពស់ 1.8 ម៉ែត្រ Teerasak ក៏បានបង្ហាញសមត្ថភាពយ៉ាងល្អនៅ Doha Cup 2023 នាពេលកន្លង ដូច្នេះបើសិនមិនមាន Teerasak ក្រុម U-22 នឹងអាចខាតបង់ច្រើននៅស៊ីហ្គេមលើកទី 32។

នៅស៊ីហ្គេម 2023 ក្រុម U-22 ថៃស្ថិតក្នុងពូល B ជាមួយនឹងក្រុមម្ចាស់មេដាយមាសវៀតណាម រួមនឹងក្រុមម៉ាឡេស៊ី សិង្ហបុរី និងឡាវ។ ថៃត្រូវទាត់បើកឆាកជាមួយសិង្ហបុរីនៅថ្ងៃទី 30 មេសាខាងមុខ។ ការប្រកួតដែល U-22 ថៃត្រូវប្រុងប្រយ័ត្នជាងគេគឺការប៉ះនឹងក្រុមវៀតណាមនៅជុំចុងក្រោយនៃវគ្គចែកពូល ដែលនឹងប្រកួតនៅថ្ងៃទី 11 ឧសភា៕

April 21, 2023

រ៉ុក្កែតកម្លាំងខ្លាំងបំផុតលើលោកផ្ទុះឆេះក្នុងការហោះហើរលើកដំបូង ប៉ុន្តែបុគ្គលិកក្រុមហ៊ុននៅតែសប្បាយចិត្ត

(សហរដ្ឋអាម៉េរិក) – រ៉ុក្កែត Starship បានផ្ទុះនៅលើអាកាសរដ្ឋ Texas បន្ទាប់ពីត្រូវបានបាញ់បង្ហោះចេញពីទម្រនៅក្នុងការសាកល្បងហោះហើរជាលើកដំបូង។

រ៉ុក្កែតដែលមានកម្លាំងខ្លាំងជាងគេបង្អស់របស់ពិភពលោក បានហោះឡើងពីមូលដ្ឋាន Starbase របស់ក្រុមហ៊ុន SpaceX នៅឯឆ្នេរសមុទ្រ Boca Chica ភាគខាងត្បូងរដ្ឋ Texas កាលពីម៉ោង 09 និង 33 នាទី ថ្ងៃទី 20 មេសា ត្រូវនឹងម៉ោង 21 និង 33 នាទី ថ្ងៃទី 20 មេសានៅភ្នំពេញ។

Starship ដែលមានកម្ពស់ 120 ម៉ែត្រ ត្រូវបានបាញ់ឡើងទៅកាន់គន្លងគោចរបន្ទាប់ពីម៉ាស៊ីន Raptor 33 គ្រឿងនៅកំណាត់ដំបូងត្រូវបានបញ្ឆេះ។ តាមគម្រោង កំណាត់លើដែលមានកម្ពស់ 50 ម៉ែត្ររបស់ Starship នឹងផ្ដាច់ខ្លួនពីរ៉ុក្កែត Super Heavy ដែលនៅកំណាត់ដំបូង ប្រហែលបីនាទីក្រោយពីបានហោះឡើង ប៉ុន្តែវាមិនអាចផ្ដាច់ខ្លួនបាន។ រ៉ុក្កែត និងយាន Starship នៅតែជាប់គ្នា និងចាប់ផ្ដើមក្រឡាប់ផ្ដាប់ផ្ងារ ហើយក៏ផ្ទុះនៅក្នុងនាទីទីបួនក្រោយការបាញ់បង្ហោះ។

ទោះជាយ៉ាងណាក៏ដោយ បុគ្គលិករបស់ SpaceX ដែលប្រមូលផ្ដុំគ្នានៅឯទីស្នាក់ការកណ្ដាលរបស់ SpaceX នៅ Hawthorne រដ្ឋ California ដើម្បីតាមដានការបាញ់បង្ហោះ នាំគ្នាស្រែកហ៊ោអបអរនូវអ្វីដែលពួកគេសម្រេចបានក្រោយការបាញ់បង្ហោះលើកដំបូង។ យោងតាម SpaceX រ៉ុក្កែត និងយានបានហោះឡើងដល់កម្ពស់ប្រហែល 39 គីឡូម៉ែត្រ។ នេះគឺជាការប្រឹងប្រែងលើកទីពីរក្នុងការបាញ់បង្ហោះ Starship។ ការធ្វើតេស្តលើកដំបូងកាលពីថ្ងៃទី 17 មេសា ត្រូវបានបញ្ចប់ភ្លាមៗដោយសារតែមានឧបករណ៍ខ្លះត្រូវត្រជាក់ដល់កក។

យោងតាមផែនការនៃការបាញ់បង្ហោះកាលពីម្សិលមិញ Super Heavy នឹងវិលមកចុះចតលើផែនដីប្រហែល 8 នាទីក្រោយពីបានបាញ់បង្ហោះ។ ចំណែកកំណាត់លើនឹងបញ្ឆេះម៉ាស៊ីន Raptor 6 គ្រឿងដើម្បីផ្ដាច់ខ្លួន និងហោះជុំវិញផែនដី។ គោលដៅរបស់ SpaceX គឺការនាំយក Starship ឡើងដល់កម្ពស់ 233 គីឡូម៉ែត្រ ហើយក្រោយមកនឹងចុះចតលើមហាសមុទ្រប៉ាស៊ីហ្វិក មិនឆ្ងាយពីកោះ Kauai របស់ Hawaii ក្រោយពីហោះឡើងបានប្រហែល 90 នាទី។

ក៏ប៉ុន្តែ SpaceX មិនបានរំពឹងថា គ្រប់យ៉ាងនឹងដំណើរការទៅដោយរលូន។ រ៉ុក្កែតថ្មីតែងតែបរាជ័យក្នុងការហោះហើរលើកដំបូង។ យោងតាមតំណាងក្រុមហ៊ុន SpaceX ការសាកល្បងកាលពីថ្ងៃទី 20 មេសា គឺដើម្បីប្រមូលទិន្នន័យ និងសកម្មភាពប្រតិកម្មចំពោះរាល់បញ្ហាដែលកើតឡើង។

Starship រួមមានរ៉ុក្កែតរុញច្រាននៅកំណាត់ដំបូងដែលមានឈ្មោះថា Super Heavy និងកំណាត់ទីពីរក៏មានឈ្មោះថា Starship។ យានទាំងនេះត្រូវបានរចនាឡើងដើម្បីអាចប្រើប្រាស់ឡើងវិញបានទាំងស្រុង ដែលនេះជាគន្លឹះសំខាន់សម្រាប់ការហោះហើរទៅកាន់ពិភពព្រះអង្គារនាពេលអនាគត៕

April 21, 2023

បទចម្រៀងស៊ីហ្គេមលើកទី 32 មានអ្នកចូលទស្សនាជាង 50 លានលើក

«Cambodian Pride» (ស្រលាញ់អ្វីដែលខ្មែរមាន) ជាបទចម្រៀងផ្លូវការរបស់ស៊ីហ្គេមលើកទី 32 ដែលបង្ហោះលើបណ្ដាញសង្គម YouTube ទាក់ទាញអ្នកចូលទស្សនាបានរហូតដល់ជាង 50 លានលើក បន្ទាប់ពីបង្ហោះបាន 10 ថ្ងៃ។

បទចម្រៀងដែលត្រូវបានបង្ហោះលើ YouTube កាលពីថ្ងៃទី 10 មេសា ផលិតដោយផលិតកម្ម Galaxy Navatra។ បទចម្រៀងនេះមាននារីរាំកំដរជិតមួយពាន់នាក់នៅពីក្រោយកំពូលតារាចម្រៀងបួនដួង គឺ ឧកញ៉ា ព្រាប សុវត្ថិ , ឧកញ៉ា ខេមរៈ សិរីមន្ត, លោក ខេម ,និងកំពូលតារាចម្រៀងស្រី កញ្ញា តន់ ចន្ទសីម៉ា។

គិតមកដល់ល្ងាចថ្ងៃទី 20 មេសា 2023 បទចម្រៀងស៊ីហ្គេមលើកទី 32 មានអ្នកចូលទស្សនាជាង 50,548,000 លើក និងមានការបញ្ចេញមតិជិត 15,000 នាក់។

បទចម្រៀង «Cambodian Pride» ត្រូវបានអ្នកខ្លះចាត់ទុកជាបទចម្រៀងមរតកប្រវត្តិសាស្ត្រសម្រាប់ កម្ពុជា នៅឆ្នាំ 2023។ នៅលើបណ្ដាញសង្គម ទស្សនិកជនជាច្រើនសរសើរថា បទចម្រៀងនេះងាយស្រួលស្ដាប់ សប្បាយរីករាយ ហើយអត្ថន័យ និងទិដ្ឋភាពពោរពេញដោយលក្ខណៈវប្បធម៌ខ្មែរ។

នៅក្នុង MV នេះ ម្ចាស់ផ្ទះស៊ីហ្គេមលើកទី 32 ក៏បង្ហាញទិដ្ឋភាពមួយចំនួនស្ដីពីពហុកីឡដ្ឋានជាតិមរតកតេជោ រួមនឹងអង្គវត្ត ស្ពានអ្នកលឿង និងហេដ្ឋារចនាសម្ព័ន្ធ ក៏ដូចជាម្ហូបអាហារពិសេសរបស់កម្ពុជាមួយចំនួនផ្សេងទៀត។ រូបភាពនៃវិស័យមួយចំនួន ក្នុងនោះមានទាំងកីឡាគុនខ្មែរក៏ត្រូវបានលើកយកមកបង្ហាញ។

បទចម្រៀងស៊ីហ្គេមលើកទី 32 «Cambodian Pride»

ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 ដែលកម្ពុជាធ្វើជាម្ចាស់ផ្ទះនឹងប្រព្រឹត្តទៅចាប់ពីថ្ងៃទី 05 ដល់ 17 ឧសភា 2023។ ពិធីសម្ពោធបើកការប្រកួតនឹងធ្វើឡើងនៅថ្ងៃទី 05 ឧសភា ក្នុងពហុកីឡដ្ឋានជាតិមរតកតេជោ។ ស៊ីហ្គេមលើកនេះនឹងមាន 37 វិញ្ញាសា ក្នុងនោះមាន 36 វិញ្ញាសាមានមេដាយ។ វិញ្ញាសាបាល់ទាត់នឹងប្រព្រឹត្តទៅមុនគេ ពោលគឺចាប់ពីថ្ងៃទី 29 មេសា។

April 20, 2023

ស្ទើរគ្រប់យ៉ាងនៅឌូបៃសុទ្ធតែទំនើប សូម្បីតែទូ ATM ក៏គេអាចដកមាសបាន

ឌូបៃ (Dubai) គឺជាទីក្រុង និងជារាជាណាចក្រមួយនៅក្នុងប្រទេសអេមីរ៉ាតអារ៉ាប់រួម (UAE)។ នៅទីនេះ មនុស្សម្នារកប្រាក់បានច្រើន និងបានយ៉ាងលឿន ប៉ុន្តែក៏ចាយទៅវិញមិនស្រណោះដៃដែរ។

ឌូបៃរីកចម្រើនយ៉ាងឆាប់រហ័សក្រោយឆ្នាំ 1971។ មុននោះ រាជាណាចក្រនេះមិនមានអគារខ្ពស់សោះឡើយ ប៉ុន្តែសព្វថ្ងៃ ឌូបៃគឺជាទីក្រុងដ៏ទំនើប និងមានប្រជាជនជាង 3 លាននាក់មកពីជុំវិញពិភពលោក។ ជើងមេឃនៅឌូបៃបច្ចុប្បន្នលែងនៅជាសមុទ្រខ្សាច់ទៀតហើយ តែជាអគារកប់ពពករាប់មិនអស់ រួមនឹងស្ថាបត្យកម្មខ្នាតយក្សជាច្រើនដែលអាចមើលឃើញពីទីអវកាស។

ដោយសារតែសម្បូរទ្រព្យពេក ពលរដ្ឋនៅឌូបៃក៏ចាយលុយទៅលើអ្វីៗដែលពលរដ្ឋភាគច្រើននៅកម្ពុជានឹកស្មានមិនដល់។ អ្វីៗទាំងនោះមានជាអាទិ៍ «ការជិះឧទ្ធម្ភាគចក្រសាមញ្ញដូចជិះ Pass App», «អាចដកមាសពីទូ ATM», «ចិញ្ចឹមសត្វសាហាវជាសត្វសំណព្វ», «ឡាវស្រោបមាស និងដាំត្បូង», «សណ្ឋាគារវិញសុទ្ធតែប្រភេទប្រណិត» ឯ «ឧទ្យានក៏មាននៅក្នុងអគារ»។ល។

April 20, 2023

រថយន្តអគ្គិសនី Tesla បញ្ចុះតម្លៃម្ដងទៀតហើយ នៅទីផ្សារអាម៉េរិក

ក្រុមហ៊ុន Tesla បានបញ្ចុះតម្លៃរថយន្តអគ្គិសនីជាថ្មីម្ដងទៀតក្នុងខែនេះ ហើយនេះគឺជាការបញ្ចុះតម្លៃលើកទីពីរក្នុងខែមេសា 2023។

យោងតាមគេហទំព័ររបស់ Tesla រថយន្តអគ្គិសនី Tesla Model 3 កំណែស្ដង់ដា RWD ត្រូវបានបញ្ចុះតម្លៃ 2,000 ដុល្លារអាម៉េរិក ស្មើនឹង 4.8% ពោលគឺពីតម្លៃ 41,990 ដុល្លារ មកនៅត្រឹម 39,990 ដុល្លារ។ Tesla Model 3 កំណែខ្ពស់ជាងនេះពុំមានការបញ្ចុះតម្លៃឡើយ។

ចំណែកកំណែចំនួនបីរបស់ Tesla Model Y ក៏សុទ្ធតែត្រូវបានបញ្ចុះតម្លៃ 3,000 ដុល្លារ។ បច្ចុប្បន្ន Tesla Model Y AWD ត្រូវបានលក់ចាប់ពី 46,990 ដុល្លារ ទាបជាង 6% ធៀបនឹងតម្លៃ 49,990 ដុល្លារនៅមុនការបញ្ចុះតម្លៃលើកនេះ។

តារាងបញ្ចុះតម្លៃរបស់រថយន្តអគ្គិសនី Tesla នៅលើទីផ្សារអាម៉េរិក ៖

Tesla Model 3 RWD: 39,990 ដុល្លារ (-2,000 ដុល្លារ ឬ -4,8% ពី 41,990 ដុល្លារ)
Tesla Model Y AWD: 46,990 ដុល្លារ (-3,000 ដុល្លារ ឬ -6% ពី 49,990 ដុល្លារ)
Tesla Model Y Long Range AWD: 49,990 ដុល្លារ (-3,000 ដុល្លារ ឬ -5,7% ពី 52,990 ដុល្លារ)
Tesla Model Y កំណែលំដាប់ខ្ពស់: 53,990 ដុល្លារ (-3,000 ដុល្លារ ឬ -5,3% ពី 56,990 ដុល្លារ)

April 20, 2023

សូរ្យគ្រាសក្នុងថ្ងៃទី 20 មេសា 2023 ៖ រូបភាពខ្លះៗដែលថតបានពីតំបន់មួយចំនួនលើពិភពលោក

នៅថ្ងៃទី 20 មេសានេះ សូរ្យគ្រាសកូនកាត់ត្រូវបានមើលឃើញនៅក្នុងតំបន់ជាច្រើននៅអូស្ត្រាលី និងឥណ្ឌូណេស៊ី រួមនឹងតំបន់ខ្លះរបស់នូវែលសេឡង់ ហ្វ៊ីលីពីន ទីម័រខាងកើត និងតំបន់ខ្លះទៀតនៅអាស៊ីអាគ្នេយ៍។

នៅអូស្ត្រាលី មនុស្សជិត 20,000 នាក់ប្រមូលផ្ដុំគ្នានៅក្រោមផ្ទៃមេឃដែលស្ទើរតែមិនមានពពកក្នុងទីរួមស្រុកក្បែរឆ្នេរសមុទ្រ Exmouth ដើម្បីគយគន់បាតុភូតសូរ្យគ្រាសពេញលេញដែលអូសបន្លាយពេលប្រហែលមួយនាទីនាព្រឹកថ្ងៃទី 20 មេសានេះ។ នេះគឺជាទីតាំងមួយក្នុងចំណោមតំបន់ដែលមានអំណោយផលល្អបំផុតនៅអូស្ត្រាលីក្នុងការតាមដានបាតុភូតសូរ្យគ្រាសដ៏កម្រជួបប្រទះ។

សូរ្យគ្រាសលើកនេះចាប់ផ្ដើមពីភាគខាងត្បូងនៃមហាសមុទ្រឥណ្ឌា និងធ្វើដំណើរឆ្លងកាត់ទ្វីបអូសេអានី អាស៊ីអាគ្នេយ៍ និងបញ្ចប់នៅមហាសមុទ្រប៉ាស៊ីហ្វិក។ ប៉ុន្តែ តំបន់ដែលមើលឃើញបាតុភូតសូរ្យគ្រាសរាងវង់ចិញ្ចៀន និងសូរ្យគ្រាសពេញលេញគឺមានតិចតួច ដោយភាគច្រើនកើតឡើងនៅលើសមុទ្រ។

ពេលសូរគ្រាសកើតឡើង តំបន់មួយចំនួនលើផែនដីនឹងអាចមើលឃើញសូរ្យគ្រាសពេញលេញ ខណៈតំបន់ខ្លះមើលឃើញតែសូរ្យគ្រាសរាងរង់ចិញ្ចៀន ចំណែកខ្លះទៀតក៏ឃើញតែមួយផ្នែកតូច។ សូរ្យគ្រាសពេញលេញលើកនេះត្រូវបានមើលឃើញនៅឧបទ្វីប North West Cape និងកោះ Barrow នៅអូស្ត្រាលីខាងលិច តំបន់ភាគខាងកើតរបស់ទីម័រខាងកើត កោះ Damar និងមួយផ្នែករបស់ខេត្ត Papua នៅឥណ្ឌូណេស៊ី។

https://www.youtube.com/watch?v=KhXA7gkmYWk

April 20, 2023

ប្រព័ន្ធប្រតិកម្មថាមពលព្រះអាទិត្យធ្វើឱ្យទឹកក្លាយជាអ៊ីដ្រូសែន អាចផ្ដល់អគ្គិសនីគ្រប់គ្រាន់សម្រាប់គ្រួសារមានសមាជិកពីរនាក់

(ស្វ៊ីស) – នៅក្នុងការពិសោធ ប្រព័ន្ធប្រតិកម្មថ្មីនេះបង្កើតអ៊ីដ្រូសែនបានប្រហែល 500 ក្រាម/ថ្ងៃ ដែលអាចផ្គត់ផ្គង់អគ្គិសនីបានពាក់កណ្ដាលនៃតម្រូវការ សម្រាប់គ្រួសារតែមានសមាជិកបួននាក់។

ក្រុមវិស្វករនៅវិទ្យាស្ថានបច្ចេកវិទ្យារដ្ឋ Lausanne (EPFL) បានបង្កើត និងធ្វើតេស្តជោគជ័យលើប្រព័ន្ធប្រតិកម្មថាមពលព្រះអាទិត្យដែលអាចផលិតអ៊ីដ្រូសែនពីកម្ដៅថ្ងៃ និងទឹក នេះបើតាម New Atlas ចុះផ្សាយកាលពីថ្ងៃទី 17 មេសា។

ប្រព័ន្ធថ្មីនេះមិនត្រឹមតែមានប្រសិទ្ធភាពខ្ពស់ក្នុងការផលិតឧស្ម័នអ៊ីដ្រូសែននោះទេ តែថែមទាំងអាចស្រូបយកអនុផលដែលមានអុកស៊ីសែន និងកម្ដៅដើម្បីទុកប្រើប្រាស់ផងដែរ។ លទ្ធផលនៃការសិក្សាស្រាវជ្រាវខាងលើនេះត្រូវបានចុះផ្សាយលើទស្សនាវដ្ដី Nature Energy។

អ៊ីដ្រូសែនមានតួនាទីសំខាន់នៅក្នុងថាមពលកកើតឡើងវិញ ឬហៅថាថាមពលបៃតង។ មួយក្នុងចំណោមវិធីដ៏មានប្រសិទ្ធភាពដើម្បីផលិតអ៊ីដ្រូសែន គឺការបំបែកទឹកទៅជាមូលេគុលនានាដែលបានបង្កើតទឹក។ សកម្មភាពបំបែកធាតុទឹកដោយប្រើប្រាស់ថាមពលព្រះអាទិត្យត្រូវបានហៅថា សំយោគរស្មីសិប្បនិម្មិត។

ប្រព័ន្ធនេះមានរូបរាងស្រដៀងនឹងចានផ្កាយរណប។ ចាននេះស្រូបយកកម្ដៅពីព្រះអាទិត្យ និងប្រមូលផ្ដុំកម្ដៅប្រហែល 800 ដង បញ្ចូលទៅក្នុងម៉ាស៊ីនប្រតិកម្មរស្មីអគ្គិសនី។ ទឹកត្រូវបានបញ្ចូលទៅក្នុងម៉ាស៊ីននេះ ហើយនៅទីនេះ ថាមពលព្រះអាទិត្យនឹងជួយបំបែកម៉ូលេគុលទឹកទៅជាអ៊ីដ្រូសែន និងអុកស៊ីសែន។

ក្រៅពីអ៊ីដ្រូសែន អនុផលពីរផ្សេងទៀតគឺអុកស៊ីសែននឹងអាចត្រូវបានយកទៅប្រើប្រាស់ក្នុងមន្ទីរពេទ្យ ឬឧស្សាហកមក្ម ខណៈកម្ដៅនឹងត្រូវបញ្ជូនតាមបណ្ដាញដើម្បីប្រើប្រាស់ក្នុងការដាំទឹក ឬកម្ដៅបរិយាកាសក្នុងអគារនារដូវត្រជាក់។

ប្រតិកម្មរបស់ប្រព័ន្ធខាងលើបង្កើតអ៊ីដ្រូសែនប្រហែល 500 ក្រាម/ថ្ងៃ ដែលអាចផ្គត់ផ្គង់អគ្គិសនីបានពាក់កណ្ដាលសម្រាប់តម្រូវការរបស់គ្រួសារដែលមានសមាជិកបួននាក់ តាមរយៈថ្មផ្ទុកថាមពលអ៊ីដ្រូសែន។

ក្រុមស្រាវជ្រាវខាងលើមានគម្រោងសាងសង់រោងចក្រពិសោធន៍មួយដែលមានកម្លាំងត្រឹមរាប់រយ kW នៅក្នុងកន្លែងផលិតលោហធាតុ។ អ៊ីដ្រូសែននឹងត្រូវបានប្រើប្រាស់ដើម្បីផ្អាប់លោហធាតុ គ្រាដែលកម្ដៅទុកសម្រាប់ដាំទឹក និងអុកស៊ីសែននឹងត្រូវបានផ្គត់ផ្គង់ឱ្យមន្ទីរពេទ្យនៅក្បែរនោះ៕

April 20, 2023

ស៊ីហ្គេម 2023 ៖ ថៃកំណត់គោលដៅដណ្ដើមមេដាយឱ្យបានច្រើនជាងគេបង្អស់

ប្រតិភូកីឡារបស់ប្រទេសថៃ បានកំណត់គោលដៅយ៉ាងខ្ពស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 (ស៊ីហ្គេមលើកទី 32) ដើម្បីដណ្ដើមតំណែងលេខមួយទូទាំងក្រុម។

នៅសល់ប្រហែលពីរសប្ដាហ៍ទៀតប៉ុណ្ណោះ ស៊ីហ្គេមលើកទី 32 នឹងចាប់ផ្ដើមការប្រកួតជាផ្លូវការនៅកម្ពុជា។ នេះគឺជាពេលវេលាចុងក្រោយសម្រាប់បណ្ដាក្រុមកីឡាដើម្បីត្រៀមខ្លួនឱ្យបានល្អបំផុត។

ថ្មីៗនេះ ប្រតិភូកីឡាថៃ បានកំណត់គោលដៅយ៉ាងជាក់លាក់នៅស៊ីហ្គេមលើកទី 32។ ថៃប្ដេជ្ញាដណ្ដើមតំណែងលេខមួយទូទាំងក្រុម ដោយត្រូវរកមេដាយមាសឱ្យបាន 162 គ្រឿង ដែលនេះគឺជាតួលេខខ្ពស់បំផុតក្នុង 7 សម័យកាលចុងក្រោយរបស់ស៊ីហ្គេម។ នៅស៊ីហ្គេមលើកទី 24 ថៃដែលជាម្ចាស់ផ្ទះដណ្ដើមបានមេដាយមាសសរុប 183 គ្រឿង។ នៅស៊ីហ្គេមបន្តបន្ទាប់ ប្រតិភូកីឡាថៃមានតែពីរលើកប៉ុណ្ណោះដែលដណ្ដើមបានមេដាយមាសច្រើនជាង 100 គ្រឿង នោះគឺនៅស៊ីហ្គេមលើកទី 26 និងលើកទី 27។

ទោះជាយ៉ាងណាក៏ដោយ អ្នកគាំទ្រខ្លះពិបាកក្នុងការជឿជាក់បានថា ថៃអាចសម្រេចបានគោលដៅដែលបានដាក់ចេញខាងលើ។ នៅស៊ីហ្គេមលើកទី 31 ក្រុមកីឡាថៃដណ្ដើមបានមេដាយមាសតែ 92 គ្រឿងប៉ុណ្ណោះ និងត្រូវជាប់លេខពីរ។

នៅក្នុងវិញ្ញាសាបាល់ទាត់បុរស និងនារី សហព័ន្ធកីឡាបាល់ទាត់ថៃត្រូវបានប្រគល់ភារកិច្ចដណ្ដើមឱ្យបានមេដាយមាស។ បច្ចុប្បន្ន ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់វៀតណាម និងក្រុមបាល់ទាត់នារីជម្រើសជាតិវៀតណាម កំពុងគ្រប់គ្រងតំណែងជើងឯកនៃវិញ្ញាសានេះ៕

April 20, 2023

សាច់គោដែលឆ្ងាញ់ និងមានតម្លៃខ្ពស់ជាងគេបង្អស់លើពិភពលោក

គោ Wagyu ដែលមានរសជាតិឆ្ងាញ់ជាងគេ និងថ្លៃជាងគេបង្អស់លើពិភពលោកត្រូវបានជប៉ុនចាត់ទុកថាជាវត្ថុប្រចាំប្រទេស។

សាច់គោ Wagyu ល្បីឈ្មោះទូទាំងសកលលោក ព្រោះតែសាច់របស់វាឆ្ងាញ់ខ្លាំង ដោយសាច់ និងខ្លាញ់ប្រទាក់ក្រឡាគ្នាគ្មានគូប្រៀប។ ក៏ប៉ុន្តែ តម្លៃរបស់សាច់គោប្រភេទនេះក៏មិនថោកនោះដែរ។ សាច់គោ Wagyu របស់អាម៉េរិកមានតម្លៃប្រហែលតែពី 20 ទៅ 30 ដុល្លារ/គីឡូក្រាម ខណៈសាច់គោ Wagyu របស់ជប៉ុនមានតម្លៃរហូតដល់ពី 200 ទៅ 600 ដុល្លារ/គីឡូក្រាម។

Wagyu ពិតជាទំនិញដ៏សែនថ្លៃ ហើយវាត្រូវបានមេចុងភៅល្បីៗក្នុងពិភពលោកចាត់ទុកថាជាប្រភេទសាច់ដែលឆ្ងាញ់បំផុតដែលមនុស្សអាចទិញបានដោយប្រាក់។ ប៉ុន្តែ មូលហេតុអ្វីខ្លះដែលបានធ្វើឱ្យ Wagyu មានតម្លៃខ្ពស់កប់ពពកដូច្នេះ?

ប្រភពផ្គត់ផ្គង់ដែលមានមិនច្រើន តម្រូវការទីផ្សារខ្ពស់ខ្លាំង និងគុណភាពសាច់ល្អឯក បាននាំឱ្យសាច់គោ Wagyu របស់ជប៉ុន មានតម្លៃខ្ពស់កប់ពពក។ ប៉ុន្តែ ក្រៅពីនេះក៏នៅមានកត្តាផ្សេងៗជាច្រើនទៀតដែលរួមចំណែកធ្វើឱ្យសាច់គោប្រភេទនេះសម្រេចបានកិត្តិនាមខាងលើ។

1-របបអាហាររបស់គោ Wagyu ៖ ម្ចាស់កសិដ្ឋានជ្រើសរើសតែចំណីគុណភាពល្អ មានតម្លៃថ្លៃសម្រាប់ឱ្យគោស៊ី។

2-កសិដ្ឋាន ៖ ដើម្បីឱ្យសាច់គោ Wagyu មានគុណភាពល្អ ម្ចាស់កសិដ្ឋានត្រូវមានកន្លែងចិញ្ចឹមធំទូលាយ ដែលគោអាច «ហាត់ប្រាណ» បានស្រួល និង «លេងសប្បាយ» ដោយសេរី។

3-ពេលវេលាធំធាត់ ៖ គោ Wagyu ដែលត្រូវបានចាត់ទុកថា «ល្មម» គឺត្រូវមានទម្ងន់ចាប់ពី 680 គីឡូក្រាម និងមានអាយុចាប់ពី 400 ទៅ 450 ថ្ងៃ។

4-ភាពផ្ដាច់មុខ ៖ ជប៉ុនបានកំណត់បរិមាណនៃការនាំចេញនូវអ្វីៗគ្រប់យ៉ាងដែលទាក់ទងនឹងគោ Wagyu ធ្វើឱ្យពូជគោនេះមិនសូវមានវត្តមានក្នុងពិភពលោក។

5-ភោជនីយដ្ឋានលំដាប់កំពូល ៖ អាហារដែលចម្អិនពីសាច់គោ Wagyu របស់ជប៉ុន គឺមាននៅតែក្នុងភោជនីដ្ឋានលំដាប់កំពូលៗប៉ុណ្ណោះ ព្រោះតែតម្លៃរបស់វាថ្លៃហួសពេក៕

April 20, 2023

Author: សឿន សំណាង