សឿន សំណាង - La Reine Media

BYD Seagull អាចក្លាយជារថយន្តអគ្គិសនីលក់ដាច់ជាងគេនៅប្រទេសចិន

BYD ដែលជាក្រុមហ៊ុនផលិតរថយន្តអគ្គិសនីចិន បានបង្ហើបឱ្យដឹងថា រថយន្តអគ្គិសនីថ្មីបំផុតរបស់ខ្លួននៅឯពិព័រណ៍រថយន្តសៀងហៃ មានឈ្មោះថា Seagull EV។

BYD Seagull ថ្មីគឺជារថយន្តប្រភេទ hatchback អគ្គិសនីធុនតូច មានតម្លៃ 11,113 ដុល្លារអាម៉េរិកនៅទីផ្សារប្រទេសចិន។ ក្រោយត្រូវបានដាក់លក់ BYD hatchback ថ្មីនេះនឹងជារថយន្តអគ្គិសនីតម្លៃទាបបំផុតមួយក្នុងទីផ្សារចិន។

BYD Seagull នឹងមានពីកំណែបើគិតអំពីចម្ងាយផ្លូវដែលវាអាចបរបាន រួមមានកំណែដែលបើកបរបានចម្ងាយ 305 គីឡូម៉ែត្រ និង 405 គីឡូម៉ែត្រ។ រថយន្តនេះក៏នឹងមានអមជាមួយនឹងប្រព័ន្ធបញ្ចូលថាមពលលឿន អនុញ្ញាតឱ្យថ្ម BYD Blade Lithium-iron-phosphate របស់វា ទាញយកថាមពលពី 30% ឡើងដល់ 80% ក្នុងរយៈពេល 30 នាទី។

អ្នកជំនាញមួយចំនួន ក្នុងនោះមាន Bil Russo អគ្គនាយកប្រតិបត្តិរបស់ក្រុមហ៊ុន Automobility បានអះអាងថា BYD Seagull EV អាចក្លាយជាម៉ូដែលរថយន្តមួយដែលទទួលបានការគាំទ្រច្រើននៅទូទាំងសកលលោក។

April 22, 2023

សមាជិកទាំងអស់របស់ណាតូ យល់ព្រមថានឹងបញ្ចូលអ៊ុយក្រែនជាសមាជិក

អគ្គលេខាធិការនៃសម្ព័ន្ធមិត្តយោធាណាតូ (NATO) លោក Stoltenberg បានឱ្យដឹងថា សមាជិកទាំងឡាយបានយល់ព្រមបញ្ចូលប្រទេសអ៊ុយក្រែនជាសមាជិក ក្រោយពីសង្គ្រាមបានបញ្ចប់។

«ប្រធានាធិបតីវ៉ូឡូឌីមៀ ហ្សេឡែនស្គី មានក្ដីសង្ឃឹមយ៉ាងជាក់លាក់ ហើយយើងបានពិភាក្សាគ្នាអំពីបញ្ហាចូលជាសមាជិក និងការធានាសន្តិសុខសម្រាប់ទីក្រុងកៀវ» អគ្គលេខាធិការណាតូ លោក Jens Stoltenberg បានប្រាប់ក្រុមអ្នកយកព័ត៌មានកាលពីថ្ងៃទី 21 មេសាដូច្នេះ។ លោកបន្ថែមថា «សមាជិកទាំងអស់យល់ស្របថា អ៊ុយក្រែននឹងក្លាយជាសមាជិករបស់សម្ព័ន្ធនេះ»។

លោក Stoltenberg មិនបានលើកឡើងពេលវេលាដែលអ៊ុយក្រែនអាចចូលជាសមាជិកណាតូ ព្រោះថា ប្រការនេះនឹងអាចកើតឡើងតែនៅពេលសង្គ្រាមបានបញ្ចប់។ «បច្ចុប្បន្នមិនមាននរណាអាចកំណត់ពេលវេលា និងរូបមន្តក្នុងការបញ្ចប់សង្គ្រាម ប៉ុន្តែនៅពេលបញ្ចប់ យើងត្រូវការធានាថា ប្រវត្តិសាស្ត្រនេះនឹងមិនកើតឡើងជាថ្មី» អគ្គលេខាធិបការណាតូបញ្ជាក់បន្ថែម។

ប្រកាសខាងលើត្រូវបានលើកឡើងនៅខាងក្រៅកិច្ចប្រជុំរបស់ក្រុមរដ្ឋមន្ត្រីការពារជាតិស្ដីពីជំនួយយោធាសម្រាប់អ៊ុយក្រែន នៅប្រទេសអាល្លឺម៉ង់។

លោក Stoltenberg មួយថ្ងៃមុននោះបានធ្វើដំណើរទៅដល់ទីក្រុងកៀវ និងប្រកាសថា «អនាគតរបស់អ៊ុយក្រែនគឺការក្លាយជាសមាជិករបស់ណាតូ»។ បន្ទាប់មក រុស្ស៊ីក៏បានបញ្ជាក់ជាថ្មីថា ការរារាំងអ៊ុយក្រែនចូលជាសមាជិកណាតូនៅតែជាគោលដៅមួយក្នុងចំណោមគោលដៅសំខាន់ៗរបស់ប្រទេសនេះ។

រុស្ស៊ី តាំងពីយូរមកហើយ ធ្លាប់បានប្រកាសថា ដំណើរឆ្ពោះមកទិសខាងកើតរបស់ណាតូ គឺជាការគំរាមកំហែងដ៏ធ្ងន់ធ្ងរមួយចំពោះសន្តិសុខ បង្ខំឱ្យទីក្រុងមូស្គូត្រូវធ្វើយុទ្ធនាការយោធាពិសេសនៅអ៊ុយក្រែន។

កាលពីខែកញ្ញា 2022 អ៊ុយក្រែនបានចុះហត្ថលេខាលើពាក្យសុំចូលជាសមាជិកណាតូ បន្ទាប់ពីរុស្ស៊ីបានរឹបអូសយកខេត្តចំនួនបួននៅអ៊ុយក្រែន។ ទីក្រុងកៀវបានបញ្ចូលគោលដៅនេះទៅក្នុងរដ្ឋធម្មនុញ្ញតាំងពីឆ្នាំ 2019 បើទោះមានការព្រមានពីរុស្ស៊ី៕

April 22, 2023

U-22 វៀតណាម ចាញ់គូប្រកួត 2-3 នៅមុនថ្ងៃស៊ីហ្គេមមកដល់

ក្រុមបាល់ទាត់បុរសជម្រើសជាតិអាយុក្រោម 22 ឆ្នាំរបស់ប្រទេសវៀតណាម ដែលជាក្រុមនឹងត្រូវមកប្រកួតនៅកម្ពុជា កាលពីម្សិលមិញបានចាញ់ 2-3 ក្នុងការប្រកួតមិត្តភាពត្រៀមសម្រាប់ស៊ីហ្គេមលើកទី 32។

នៅលើទីលានបាល់ទាត់នៅ Ba Ria – Vung Tau ប្រទេសវៀតណាម កាលពីព្រលប់ថ្ងៃទី 21 មេសា TP HCM (ក្លឹបបាល់ទាត់នៅទីក្រុងព្រៃនគរ) បានបញ្ចេញក្រុមជើងខ្លាំងបំផុតដែលមានកីឡាករពីបរទេស រួមនឹងកីឡាករចូលសញ្ជាតិ Hoang Vu Samson ខណៈដែល U-22 វៀតណាម ក៏ប្រើប្រាស់ក្រុមកីឡាករដែលមានសមត្ថភាពមិនអន់នោះដែរ។

នៅចំពោះមុខគូប្រកួតដែលសម្បូរបទពិសោធន៍នៅ V-League ក្រុមជម្រើសជាតិ U-22 វៀតណាម នៅតែអាចរកបានមួយគ្រាប់មុនគេ។ ប៉ុន្តែ មុនពេលបញ្ចប់តង់ទីមួយ ក្លឹប TP HCM ក៏រកបានគ្រាប់បាល់ស្មើ 1-1 ដោយថ្វីជើងរបស់ Victor Mansaray។

ចូលដល់តង់ទីពីរ ក្លឹប TP HCM ក៏បាននាំមុខ 2-1។ ជិតដល់ចុងតង់ទីពីរ U-22 វៀតណាម ទទួលបានបាល់ពិន័យ ហើយក៏រកបានគ្រាប់បាល់ស្មើ 2-2។

ថ្វីបើ U-22 វៀតណាមបានខំប្រឹងរក្សាយុទ្ធសាស្ត្រប្រកួត ប៉ុន្តែ TP HCM នៅតែមានប្រៀបផ្នែកបទពិសោធន៍ក្នុងពេលវាយលុក និងរកបានគ្រាប់បាល់ទីបីដែលនាំឱ្យ U-22 វៀតណាម ត្រូវចាញ់ 2-3។

ចប់ការប្រកួតខាងលើ U-22 វៀតណាមនៅមានមួយប្រកួតទៀតដែលជាការប្រកួតមិត្តភាពជាមួយនឹងក្រុមលេខមួយរបស់ Ba Ria – Vung Tau ដែលគ្រោងនឹងធ្វើឡើងនៅថ្ងៃទី 24 មេសា។ ក្រោយការប្រកួតនេះ គ្រូបង្វឹក Toussier របស់ U-22 វៀតណាម នឹងជម្រុះយកកីឡាករតែ 20 នាក់ ក្នុងចំណោម 31 នាក់នាបច្ចុប្បន្ន ដើម្បីចេញដំណើរមកប្រកួតនៅកម្ពុជា នៅថ្ងៃទី 26 មេសា៕

April 22, 2023

មហាសេដ្ឋី Jack Ma ក្លាយជាសាស្ត្រាចារ្យកិត្តិយសនៅហុងកុង

លោក Jack Ma ទទួលបានកិត្តិនាមជាសាស្ត្រាចារ្យកិត្តិយសនៅសាកលវិទ្យាល័យហុងកុង ដែលនេះក៏នឹងជួយឱ្យលោកអាចបន្តក្ដីស្រលាញ់ចំពោះវិស័យអប់រំ។

«យើងមានសេចក្ដីសោមនស្សដែលបញ្ជាក់ថា លោក Jack Ma បានផ្ដល់កិត្តិយសទទួលយកការអញ្ជើញឱ្យធ្វើជាសាស្ត្រាចារ្យកិត្តិយស ដោយជឿថា បទពិសោធន៍រួមនឹងគំនិតជំនួញរបស់លោកត្រូវបានប្រើប្រាស់ប្រកបដោយប្រសិទ្ធភាព» SCMP កាលពីថ្ងៃទី 21 មេសា ដកស្រង់សេចក្ដីប្រកាសរបស់មូលនិធិ Jack Ma ឱ្យដឹងដូច្នេះ។

តំណាងរបស់មហាសេដ្ឋីចិន Jack Ma និយាយថា ក្រោយមួយរយៈពេលដែលបានផ្អាកការងារក្នុងវិស័យអប់រំ លោក Ma មានបំណងត្រលប់មករកជីវភាពដែលមានការជួបជុំគ្រូបង្រៀន និងនិស្សិត ទន្ទឹមនឹងការផ្ដោតលើកិច្ចការស្រាវជ្រាវស្ដីពីនវានុវត្តន៍វិស័យអប់រំ និងជំនួញ។

ប្រកាសនៅលើគេហទំព័ររបស់មហាវិទ្យាល័យពាណិជ្ជកម្ម និងសេដ្ឋកិច្ចនៃសាកលវិទ្យាល័យហុងកុង (HKU) បានឱ្យដឹងថា លោក Jack Ma កាលពីថ្ងៃទី 01 មេសា ត្រូវបានអញ្ជើញឱ្យធ្វើជាសាស្ត្រាចារ្យកិត្តិយសរបស់មហាវិទ្យាល័យនេះក្នុងរយៈពេលបីឆ្នាំ រហូតដល់ខែមីនា 2026។

លោក Ma ត្រូវបានគេជឿថា នឹងផ្ដោតលើការសិក្សាស្រាវជ្រាវអំពីវិស័យហិរញ្ញវត្ថុ កសិកម្ម និងនវានុវត្តន៍ផ្នែកជំនួញជាមួយគ្រូបង្រៀននៅ HKU ប៉ុន្តែមិនទាន់មានគម្រោងចូលទៅបង្រៀន ឬថ្លែងការណ៍ជាសាធារណៈ។

មហាសេដ្ឋី Jack Ma កាលពីឆ្នាំ 2019 បានប្រកាសចូលនិវត្តន៍ និងដកខ្លួនចេញពីកៅអីប្រធាន Alibaba នៅក្នុងវ័យ 55 ឆ្នាំ

មុនពេលចាប់ផ្ដើមអាជីពជំនួញ លោក Jack Ma គឺជាគ្រូបង្រៀនផ្នែកអក្សរសាស្ត្រអង់គ្លេសនៅមហាវិទ្យាក្នុងខេត្ត Zhejiang ប្រទេសចិន។ លោកធ្លាប់ជាមហាសេដ្ឋីដែលមានទ្រព្យច្រើនជាងគេបង្អស់នៅចិនដីគោក។ លោក Ma គឺជាស្ថាបនិករបស់ក្រុមហ៊ុនខ្នាតយក្ស Alibaba និង Ant Group។

ក៏ប៉ុន្តែ ក្រុមមន្ត្រីនៅប្រទេសចិន កាលពីពីរឆ្នាំមុនបានផ្អាកការធ្វើ IPO តម្លៃ 37 ពាន់លានដុល្លាររបស់ Ant Group។ ចំណែកសាជីវកម្ម Alibaba ក៏ត្រូវបានពិន័យ 2.8 ពាន់លានដុល្លារអាម៉េរិក ព្រោះតែរំលោភលើច្បាប់ប្រឆាំងសិទ្ធិផ្ដាច់មុខ។

មហាសេដ្ឋី Jack Ma កាលពីឆ្នាំ 2019 បានប្រកាសចូលនិវត្តន៍ និងដកខ្លួនចេញពីកៅអីប្រធាន Alibaba នៅក្នុងវ័យ 55 ឆ្នាំ ដើម្បីអាចចំណាយពេលច្រើនទៅលើកិច្ចការមនុស្សធម៌ និងស្វែងយល់អំពីវិស័យកសិកម្ម។ លោក Ma បានចាកចេញពីចិនដីគោកកាលពីចុងឆ្នាំ 2021 និងបានទៅកាន់ប្រទេសជាច្រើនលើពិភពលោក៕

April 22, 2023

ម៉ាឡេស៊ីខកចិត្តដ្បិតកម្ពុជាមិនយកថ្លៃអាជ្ញាប័ណ្ណស៊ីហ្គេមលើកទី 32

ក្រុមប្រឹក្សាប៉ាឡាំពិកម៉ាឡេស៊ី (PCM) មានការអន់ចិត្តជាខ្លាំងនៅពេលកម្ពុជាមិនលក់អាជ្ញាប័ណ្ណទូរទស្សន៍សម្រាប់ស៊ីហ្គេមលើកនេះដូចទៅនឹងគម្រោងដំបូង។

កាលពីថ្ងៃទី 22 កក្កដា 2022 ប្រទេសចំនួន 11 នៅអាស៊ីអាគ្នេយ៍ បានយល់ព្រមលុបចោលការមិនគិតថ្លៃ និងងាកទៅរកការធ្វើពាណិជ្ជកម្មលើអាជ្ញាប័ណ្ណស៊ីហ្គេមចាប់ពីលើកទី 32 ដែលកម្ពុជាធ្វើជាម្ចាស់ផ្ទះ។ ក្រុមប្រឹក្សាសហព័ន្ធកីឡាអាស៊ីអាគ្នេយ៍ (SEAGF) ចាត់ទុកថា នេះគឺជារឿងសំខាន់ដើម្បីកាត់បន្ថយការចំណាយរបស់ម្ចាស់ផ្ទះ និងបង្កើនប្រាក់ចំណូល ក៏ដូចជាអភិវឌ្ឍពាណិជ្ជកម្ម។

ក៏ប៉ុន្តែ កាលពីថ្ងៃទី 31 មីនា 2023 គណៈកម្មាធិការស៊ីហ្គេមលើកទី 32 របស់កម្ពុជា (CAMSOC) បានប្រកាសបន្តការមិនគិតថ្លៃលើអាជ្ញាប័ណ្ណស្ដីពីការផ្សាយលើកញ្ចក់ទូរទស្សន៍សម្រាប់ស៊ីហ្គេម និងប៉ារ៉ាហ្គេម។

«ជាការសម្រេចចិត្តដ៏អាក្រក់។ ស៊ីហ្គេមគួរតែត្រូវបានធ្វើពាណិជ្ជកម្មជាជាងការត្រលប់ទៅកាន់ចំណុចចាប់ផ្ដើម» ប្រធាន PCM លោក Megat D Shahriman Zaharudin បានប្រាប់សារព័ត៌មាន New Straits Times ដូច្នេះ។

មុនពេលមានការសម្រេចចិត្តមិនគិតថ្លៃលើអាជ្ញាប័ណ្ណទូរទស្សន៍ពីកម្ពុជា PCM គឺជាស្ថាប័នដែលកាន់កាប់អាជ្ញាប័ណ្ណស៊ីហ្គេមលើកទី 32 ដែលជួយឱ្យម៉ាឡេស៊ីក្លាយជាមួយក្នុងបំណោមបួនប្រទេសដែលទិញអាជ្ញាប័ណ្ណជា គឺរួមមាន ឥណ្ឌូណេស៊ី សិង្ហបុរី វៀតណាម និងម៉ាឡេស៊ី។ PCM បានព្រមព្រៀងជាមួយនឹងទូរទស្សន៍ បួនស្ថានីយ ក្រុមហ៊ុនផ្គត់ផ្គង់អ៊ីនធើណិតចំនួនបី និងក្រុមហ៊ុនទូរគមនាគមន៍ចំនួនបួនទៀត ទាក់ទងនឹងការលក់អាជ្ញាប័ណ្ណស៊ីហ្គេមបន្ត ប៉ុន្តែពេលនេះគ្រប់យ៉ាងត្រូវខកខាន។

«យើងពិតជាមានការអន់ចិត្ត និងអស់សង្ឃឹមខ្លាំងណាស់» លោក Shahriman Zaharudin និយាយដូច្នេះ និងបន្ថែមថា «គម្រោងដំបូងគឺការប្រើប្រាស់ខ្ទង់ប្រាក់ដែលប្រមូលបានពីការលក់អាជ្ញាប័ណ្ណបន្តដើម្បីអភិវឌ្ឍហេដ្ឋារចនាសម្ព័ន្ធ និងការធ្វើសកម្មភាព»។

ការសម្រេចចិត្តរបស់កម្ពុជា បានធ្វើឱ្យក្ដីសង្ឃឹមក្នុងការលក់អាជ្ញាប័ណ្ណបន្តរបស់ម៉ាឡេស៊ី ត្រូវរង់ចាំដល់ស៊ីហ្គេមលើកទី 33 ដែលនឹងប្រព្រឹត្តទៅនៅប្រទេសថៃ។

កម្ពុជាមិនត្រឹមតែមិនគិតថ្លៃអាជ្ញាប័ណ្ណទូរទស្សន៍នោះទេ តែក៏មិនគិតថ្លៃសំបុត្រចូលទស្សនាការប្រកួតនៅស៊ីហ្គេម ព្រមទាំងមិនគិតថ្លៃហូបចុក ស្នាក់នៅ និងការធ្វើដំណើររបស់ប្រតិភូកីឡានៃបណ្ដាប្រទេសចូលរួមព្រឹត្តិការណ៍ស៊ីហ្គេមលើកទី 32 ទៀតផង៕

April 21, 2023

គ្រួសារ Dom ត្រូវរងការគំរាមកំហែងនៅក្នុងវគ្គដប់របស់ខ្សែភាពយន្តរឿង «Fast & Furious»

ឈុតខ្លីៗ សំខាន់ៗ (trailer) របស់ខ្សែភាពយន្ត «Fast X» បង្ហើបឱ្យដឹងថា ក្រុម Dom Toretto (សម្ដែងដោយ Vin Diesel) គឺជាគោលដៅនៃការសងសឹកដែលដឹកនាំដោយ Dante Reyes (សម្ដែងដោយ Jason Momoa)។

វីដេអូដែលបានចុះផ្សាយកាលពីថ្ងៃទី 20 មេសា បើកឆាកដោយទិដ្ឋភាពនៃការដេញតាមនៅលើដងផ្លូវក្នុងទីក្រុងរបស់ក្រុម Dom រួមជាមួយនឹងការបង្ហាញខ្លួនជាថ្មីរបស់ Han (សម្ដែងដោយ Sung Kang) ក្បែររថយន្តពណ៌ទឹកក្រូច។ Dante បង្ហាញខ្លួន និងបង្ហាញឱ្យឃើញផែនការបំផ្ទុះគ្រាប់បែកសំដៅលើទីក្រុង Vatican។ ប៉ុន្តែ Dom បានប្រើប្រាស់រថយន្តរុញច្រានគ្រាប់បែកចូលទៅក្នុងទឹកទន្លេ មុនពេលវាផ្ទុះ។

ក្រោយការប៉ះទង្គិចគ្នា Dante បានគំរាមថានឹងកម្ទេចគ្រួសាររបស់ Dom។ តួអង្គដែលជាកូនប្រុសរបស់ Hernan Reyes ធ្លាប់បង្ហាញខ្លួនក្នុង Fast Five (2011) និងបានស្លាប់នៅក្នុងករណីប្លន់ធនាគារមួយដែលប្រព្រឹត្តដោយក្រុម Dom។ លើកនេះ Dante ប្រមូលសម្ព័ន្ធមិត្តបានច្រើន និងរៀបផែនការសម្លាប់កូនប្រុសអាយុ 8 ឆ្នាំ Brian របស់តួអង្គឯក។

វីដេអូនេះក៏បង្ហើបឱ្យដឹងអំពីការរួមដៃគ្នារវាងគូសត្រូវ Han និង Shaw។ ពួកគេទុកបញ្ហាផ្ទាល់ខ្លួនមួយឡែកដើម្បីជួយ Dom ទប់ទល់នឹងសត្រូវដ៏គ្រោះថ្នាក់។ Jakob Toretto (John Cena) ដែលជាតួអង្គអាក្រក់ក្នុងវគ្គមុន ពេលនេះបានក្លាយជាសម្ព័ន្ធមិត្តរបស់ក្រុមទាំងមូល។ គាត់បង្ហាញខ្លួនក្នុង trailer នៅពេលព្យាយាមការពារក្មួយប្រុស Brian ពីការដេញតាមរបស់សត្រូវ។

Trailer របស់ខ្សែភាពយន្ត «Fast X»

អ្នកដឹកនាំរឿង Fast X ដែលជាផលិតករភាពយន្តជនជាតិបារាំង Louis Leterrier បានប្ដូរផ្លាស់ Justin Lin បន្ទាប់ពីវគ្គដំបូង។ គាត់ត្រូវបានគេស្គាល់ច្រើនតាមរយៈកំពូលភាពយន្តមួយចំនួន មានដូចជា The Transporter, The Incredible Huk និង Now You See Me ។ល។

«Fast & Furious» បានក្លាយជាខ្សែភាពយន្តល្បីដែលរកចំណូលបានច្រើនជាងគេនៅ Hollywood នាបច្ចុប្បន្នដោយមិនពឹងផ្អែកលើរឿងនិពន្ធដែលមានស្រាប់។ បច្ចុប្បន្ន ខ្សែភាពយន្តទាំងនេះរកប្រាក់ចំណូលបានជាង 6 ពាន់លានដុល្លារអាម៉េរិក។ តាមគម្រោង យីហោខ្សែភាពយន្ត «Fast & Furious» នេះ នឹងត្រូវបញ្ចប់ត្រឹមវគ្គ 11៕

April 21, 2023

ក្រុមបាល់ទាត់មួយក្នុងពូលជាមួយកម្ពុជា បរាជ័យជាបន្តបន្ទាប់នៅប្រទេសថៃ មុនស៊ីហ្គេមមកដល់

ក្រុមបាល់ទាត់បុរស U-22 មីយ៉ាន់ម៉ា បន្តចាញ់មួយប្រកួតទៀតនៅក្នុងដំណើរបោះជំរំហ្វឹកហាត់នៅប្រទេសថៃ ដើម្បីត្រៀមខ្លួនសម្រាប់មកប្រកួតនៅកម្ពុជា។

U-22 មីយ៉ាន់ម៉ា បានទៅកាន់ប្រទេសថៃដើម្បីហ្វឹកហាត់តាំងពីថ្ងៃទី 11 មេសា ក្នុងនោះពួកគេមានការប្រកួតមិត្តភាពចំនួនបួនប្រកួតជាមួយបណ្ដាក្រុមបាល់ទាត់ដែលលេងនៅពានរង្វាន់ Thai League។

ថ្មីៗនេះ U-22 មីយ៉ាន់ម៉ាបានបញ្ចប់ការប្រកួតចុងក្រោយនៃដំណើរបោះជំរំហ្វឹកហាត់របស់ខ្លួន ដោយបានចាញ់ Customs United 0-2។ មុននោះ U-22 មីយ៉ាន់ម៉ាក៏បានចាញ់ Rachaburi FC 0-4 និងចាញ់ Samutsongkhram FC 1-4។ ជ័យជម្នះតែមួយគត់ដែល U-22 មីយ៉ាន់ម៉ាដណ្ដើមបានគឺការប៉ះក្រុម Bangkok FC ក្នុងលទ្ធផល 1-0។

U-22 មីយ៉ាន់ម៉ា បានកោះហៅកីឡាករសរុប 27 នាក់ ដើម្បីត្រៀមខ្លួនសម្រាប់ស៊ីហ្គេមនៅកម្ពុជា។ ប៉ុន្តែ បច្ចុប្បន្ន គ្រួបង្វឹក Michael Feichtenbeiner មិនទាន់មានកីឡាករគ្រប់ចំនួននៅឡើយ ក្នុងនោះកំពូលកីឡាករ Hein Htet Aung ដែលជាក្ដីសង្ឃឹមរបស់មីយ៉ាន់ម៉ា ក៏មិនទាន់បង្ហាញវត្តមាន ព្រោះតែជាប់រវល់ប្រកួតឱ្យក្លឹប Selangor នៅពានរង្វាន់ជើងឯកម៉ាឡេស៊ី។

ក្រៅពី U-22 មីយ៉ាន់ម៉ា ក៏មានពីរក្រុមផ្សេងទៀតដែលស្ថិតក្នុងពូល A នៃវិញ្ញាសាបាល់ទាត់បុរសនៅស៊ីហ្គេមលើកទី 32 ដែលបោះជំរំហ្វឹកហាត់នៅប្រទេសថៃ នោះគឺ កម្ពុជា និងទីម័រខាងកើត។

នៅស៊ីហ្គេមលើកនេះ U-22 មីយ៉ាន់ម៉ា ស្ថិតក្នុងពូល A ជាមួយ កម្ពុជា ឥណ្ឌូណេស៊ី ហ្វ៊ីលីពីន និងទីម័រខាងកើត។ សម្រាប់ពូល B វិញ រួមមាន វៀតណាម ថៃ ម៉ាឡេស៊ី សិង្ហបុរី និងឡាវ៕

April 21, 2023

ភូមិកីឡាសម្រាប់ទទួលប្រតិភូកីឡាបរទេស ត្រូវបានសម្ពោធដាក់ឱ្យប្រើប្រាស់ជាផ្លូវការ

(ភ្នំពេញ) – ភូមិកីឡាជាទីសម្រាប់ទទួលប្រតិភូកីឡា និងអត្តពលិកនៅក្នុងព្រឹត្តិការណ៍ស៊ីហ្គេមលើកទី 32 និង ប៉ារ៉ាហ្គេម លើកទី 12 ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីល្ងាចថ្ងៃទី 20 មេសា 2023។ នេះបើយោងតាមគេហទំព័រ Cambodia2023 ចុះផ្សាយនាព្រឹកថ្ងៃទី 21 មេសា។

ពិធីក្រុងពាលី និងសម្ពោធដាក់ឱ្យប្រើប្រាស់ជាផ្លូវការខាងលើ ត្រូវបានធ្វើឡើងក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍-អាស៊ានប៉ារ៉ាហ្គេម (CAMSOC-CAMAPGOC) រួមទាំងថ្នាក់ដឹកនាំ សមាជិក សមាជិកា និងអ្នកសារព័ត៌មានយ៉ាងច្រើនផងដែរ។

សម្តេចពិជ័យសេនា រំពឹងថា ប្រតិភូកីឡារបស់បណ្ដាប្រទេសដែលចូលរួមព្រឹត្តិការណ៍ស៊ីហ្គេមនៅកម្ពុជា នឹងទទួលបាននូវផាសុកភាព ហើយថា ម្ចាស់ផ្ទះកម្ពុជាបានរៀបចំជូនរួចរាល់ជាស្រេច។

ភូមិកីឡាមានគ្រែចំនួន 3,700 ស្ថិតនៅក្នុងពហុកីឡដ្ឋានជាតិមរតកតេជោ ដែលមានទីតាំងនៅក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។ ភូមិនេះត្រូវបានបើកការដ្ឋានសាងសង់កាលពីឆ្នាំ 2020 ដោយក្រុមហ៊ុន World Bridge Sport Village។ ទីនេះនឹងផ្តល់ជាកន្លែងស្នាក់នៅសម្រាប់អត្តពលិក អាជ្ញាកណ្ដាល ចៅក្រម និងប្រតិភូកីឡា ដែលចូលរួមនៅក្នុងស៊ីហ្គេមលើកទី 32 និងអាស៊ានប៉ារ៉ាហ្គេម លើកទី 12។

យោងតាម CAMSO ក្រៅពីភូមិកីឡាខាងលើ កម្ពុជាក៏បានរៀបចំសណ្ឋាគារចំនួន 11 កន្លែងទៀតក្នុងរាជធានីភ្នំពេញ ដើម្បីទទួលអត្តពលិក មន្ត្រី និងប្រតិភូកីឡា ស្នាក់នៅ។ សណ្ឋាគារទាំងនេះស្ថិតនៅជិតពហុកីឡដ្ឋានជាតិ មជ្ឈមណ្ឌលសន្និបាត និងពិព័ណ៍អន្តរជាតិជ្រោយចង្វារ (OCIC) និងទីតាំងប្រកួតមួយចំនួនទៀត៕

April 21, 2023

តម្លៃលក់រាយប្រេងឥន្ធនៈថ្មី ដែលត្រូវអនុវត្តចាប់ពីថ្ងៃទី 21 ដល់ថ្ងៃទី 30 ខែមេសា 2023

យោងតាមសេចក្ដីជូនដំណឹងស្ដីពី តម្លៃលក់រាយប្រេងឥន្ធនៈថ្មី ដែលត្រូវអនុវត្តចាប់ពីថ្ងៃទី 21 ដល់ថ្ងៃទី 30 ខែមេសា 2023 ប្រេងសាំងធម្មតា 4,664 រៀល/លីត្រ និងប្រេងម៉ាស៊ូតតម្លៃ 4,314 រៀល/លីត្រ។

April 21, 2023

អាម៉េរិកសហការជាមួយជប៉ុនក្នុងការហោះទៅយកដីពីព្រះចន្ទរបស់ពិភពអង្គារ

ទីភ្នាក់ងារអវកាសអាម៉េរិក (ណាសា-NASA) បានចុះហត្ថលេខាលើអនុស្សារណៈនៃការយោគយល់ជាមួយនឹងចាសា (JAXA) របស់ជប៉ុន ដើម្បីចូលរួមបេសកកម្មស្រាវជ្រាវទៅលើព្រះចន្ទរបស់ផ្កាយព្រះអង្គារ (MMX)។

អនុស្សារណៈនៃការយោគយល់ខាងលើនេះនឹងអនុញ្ញាតឱ្យណាសាផ្ដល់ប្រព័ន្ធពិសោធសម្រាប់ការស្រាវជ្រាវនៅឋានព្រះចន្ទរបស់ពិភពអង្គារ និងឧបករណ៍យកសំណាកឧស្ម័នសម្រាប់បំពាក់លើយានអវកាសរបស់បេសកកម្ម MMX។ MMX មានតួនាទីយកសំណាកដីពីព្រះចន្ទ Phobos របស់ពិភពអង្គារ និងនាំមកកាន់ផែនដី។

យានអវកាស MMX របស់ជប៉ុនគ្រោងនឹងត្រូវបានបាញ់បង្ហោះនៅឆ្នាំ 2024 និងឆ្ពោះចូលដល់គន្លងគោចររបស់ពិភពអង្គារនៅឆ្នាំ 2025។ MMX នឹងហោះទៅកាន់ព្រះចន្ទទាំងពីររបស់ពិភពអង្គារ គឺ Phobos និង Deimos ប៉ុន្តែនឹងចុះចតលើតែព្រះចន្ទធំជាងគេ Phobos ប៉ុណ្ណោះ។

MMX នឹងចុះចតលើដីព្រះចន្ទ Phobos ក្នុងរយៈពេលមិនច្រើនម៉ោងដើម្បីយកសំណាកដី។ សំណាកដីនោះនឹងត្រូវបាននាំមកកាន់ផែនដីនៅឆ្នាំ 2029 ដើម្បីឱ្យអ្នកវិទ្យាសាស្ត្រធ្វើការសិក្សាស្រាវជ្រាវ។ នេះនឹងក្លាយជាសំណាកដីដំបូងគេដែលត្រូវបានយកដោយផ្ទាល់ពីព្រះចន្ទ Phobos។

ព្រះចន្ទទាំងពីររបស់ពិភពអង្គារ គឺ Phobos និង Deimos

ទីភ្នាក់ងារអវកាសជប៉ុន ចាសា ធ្លាប់ទទួលបានជោគជ័យក្នុងការយកសំណាកដីពីអាចម៍ផ្កាយនានាក្នុងប្រព័ន្ធព្រះអាទិត្យនាពេលកន្លង។ ឆ្នាំ 2010 យានអវកាស Hayabusa បាននាំយកដុំថ្មពីអាចម៍ផ្កាយ Itokawa មកកាន់ផែនដី។ យាន Hayabusa2 របស់ជប៉ុនក៏ធ្លាប់បាននាំយកសំណាកដីពីអាចម៍ផ្កាយ Ryugu មកកាន់ផែនដីប្រកបដោយភាពរលូនផងដែរ កាលពីឆ្នាំ 2020៕

April 21, 2023

Author: សឿន សំណាង